ʻAve ki he ʻOtuá ʻa e Lāngilangí ʻIkai ki he Tangatá

ʻI HE ngaahi māhina ki mui ní, naʻe ako ai ʻa e kau ʻofa ki he māʻoniʻoní takatakai ʻi he kolopé ki he founga ke ʻave ai ʻa e lāngilangí ki he ʻOtuá ʻi heʻenau fakatahataha ʻi he ngaahi Fakataha-Lahi Fakavahe “ʻAve ki he ʻOtuá ʻa e Lāngilangí” ʻa e Kau Fakamoʻoni ʻa Sihová. Tau fakamanatu angé ʻa e polokalama fakaako naʻe fakahoko aí.

Ko e polokalama makatuʻunga he Tohi Tapú naʻe lele ia ʻi he ʻaho hokohoko ʻe tolu ki he tokolahi taha ʻo e kau maʻu fakataha-lahí pea ko e ʻaho ʻe fā ki he faʻahinga naʻa nau malava ke maʻu ʻa e ngaahi fakatahataha makehe fakavahaʻapuleʻangá. ʻI hono fakakātoá, ko e kau maʻu fakatahá naʻa nau fanongo ki he ngaahi konga Fakatohitapu laka hake he 30, ʻo kau ai ʻa e ngaahi malanga ʻa ia naʻá ne fakalolotoʻi ʻa e houngaʻia fakalaumālié, ngaahi meʻa naʻe hokosia naʻá ne ʻai ke mālohi ʻa e tuí, ngaahi fakahāhā naʻe fakaeʻa ai ʻa hono ngāueʻaki ʻaonga ʻo e ngaahi tefitoʻi moʻoni faka-Tohitapú, mo ha tulama teunga kakato ʻa ia naʻe fakatātaaʻi ai ʻa e ngaahi pole naʻe fehangahangai mo e kau Kalisitiane he ʻuluaki senitulí. Kapau naʻá ke maʻu ha taha ʻo e ngaahi fakataha-lahí, ko e hā ʻoku ʻikai ai te ke fakamanatu hoʻo ngaahi noutí ʻi hoʻo lau ʻa e kupú ni? ʻOku mau fakapapauʻi te ne ʻomai ʻa e ngaahi manatu ʻofa ki ha fuʻu kātoanga kai lahi fakalaumālie pea toe fakamaama foki.

Kaveinga ʻo e ʻAho ʻUluakí: “ʻOku Taau mo Koe, ʻe Sihova, . . . ke Maʻu ʻa e Lāngilangí”

Hili ha hiva mo ha lotu kamata, naʻe talitali lelei loto-māfana ʻe he ʻuluaki toko taha malangá ʻa e faʻahinga kotoa naʻa nau kau ki aí fakataha mo ha malanga naʻe fakahangataha ki he ʻuhinga tefito ʻo e fakataha-lahí ko e: “Fakatahataha ke Fakalāngilangiʻi ʻa e ʻOtuá.” ʻI he lave ki he Fakahā 4:​11, naʻe fakamamafaʻi ʻe he toko taha malangá ʻa e kaveinga fakalūkufua ʻo e fakataha-lahí. Naʻá ne fakamatala leva ki he ʻuhinga ʻo e ʻave ki he ʻOtuá ʻa e lāngilangí. ʻI hono ngāueʻaki ʻa e ngaahi Sāmé, naʻá ne fakamamafaʻi ai ko hono fakalāngilangiʻi ʻa e ʻOtuá ʻoku kau ki ai ʻa e “lotu,” “fakafetaʻi,” mo e “fakamalo.”—Sāme 95:​6, PM; Sāme 100:​4, 5; 111:​1, 2, PM.

Ko e konga hokó naʻe fakakaveinga ia ko e “Monūʻiaā ka ko Kinautolu ʻOku Nau ʻAve ki he ʻOtuá ʻa e Lāngilangí.” Naʻe fai ha fakamatala mahuʻinga ʻe he toko taha malangá. Koeʻuhi ʻoku laka hake he Kau Fakamoʻoni ʻa Sihova ʻe toko ono miliona ʻi he fonua ʻe 234 takatakai ʻi he foʻi kolopé, ʻoku lava ke pehē ʻoku ʻikai ʻaupito tō ʻa e laʻaá ki he faʻahinga ko ia ʻoku nau ʻave ʻa e lāngilangí kia Sihová. (Fakahā 7:​15) Ko ha fakaʻekeʻeke ʻo ha fanga tokoua mo e fanga tuofāfine Kalisitiane ʻa ia ʻoku nau ʻi ha tuʻunga ʻo e ngāue makehe taimi-kakató ko ha tafaʻaki mahuʻinga ia ʻo e konga ko ení ʻa ia naʻá ne fakamāfanaʻi ʻa e loto ʻo e kau fanongó.

Ko e “Fakahā ʻe he Fakatupú ʻa e Lāngilangi ʻo e ʻOtuá” ʻa e malanga hokó. Neongo ʻene fakalongolongó, ko e langi matelié ʻokú ne viki ʻa e tuʻunga lahi ʻo e ʻOtuá pea tokoniʻi kitautolu ke fakalolotoʻi ʻetau houngaʻia ki heʻene tokanga ʻofá. Naʻe fakamatalaʻi fakaikiiki lelei eni.​—Aisea 40:26.

Ko e fakatangá, fakafepakí, ngaahi tākiekina fakamāmaní, mo e ngaahi hehema angahalaʻiá ʻoku poleʻi ai ʻa e anga-tonu ʻa e kau Kalisitiane moʻoní. Ko ia ai, ko e malanga “ʻAʻeva ʻi he Hala ʻo e Anga-Tonú” naʻe tuha ia mo e tokanga kakato ʻa e kau fanongó. Ko ha lāulea fakafoʻiveesi ʻi he Sāme hono 26 naʻe fakahoko ia fakataha mo e ngaahi fakaʻekeʻeke ʻo ha toko taha Fakamoʻoni taʻu ako ʻa ia naʻá ne tuʻu mālohi ki he ʻulungāanga maʻá mo e toko taha ʻe taha ʻa ia naʻá ne fakamoleki ʻa e taimi lahi ʻi he fakafiefia ala fehuʻiá ka kuó ne fou ʻi ha ngaahi sitepu ke ikuʻi ai ʻa e palopalemá.

Ko e malanga he tefitoʻi fakakaukaú, “Hanga ʻe he Ngaahi Vīsone Fakaekikite Lāngilangiʻiá ʻo Fakaivia Kitautolu!” naʻe fakaʻosiʻaki ʻa e polokalama pongipongí. Naʻe lave ʻa e toko taha malangá ki he ngaahi faʻifaʻitakiʻanga ʻa e palōfita ko Tanielá mo e ongo ʻapositolo ko Sione mo Pitá ʻi he tuʻunga ko e faʻahinga naʻe fakalongomoʻuiʻi ʻenau tuí ʻe he ngaahi vīsone fakaekikite lāngilangiʻia fekauʻaki mo e fokotuʻu pea mo e fakalele ʻo e Puleʻanga Faka-Mīsaia ʻo e ʻOtuá. ʻI he lave ki ha taha pē ʻoku mole nai ʻene vakai ki he fakamoʻoni māʻalaʻala ʻa ia ʻoku fakamoʻoniʻi ai ʻoku tau ʻi he taimi ʻo e ngataʻangá, naʻe pehē ʻe he toko taha malangá: “ʻOku mau ʻamanaki loto-moʻoni ko e faʻahinga peheé te nau toe tokangataha ki he moʻoni ʻo e ʻi ai ʻa Kalaisi ʻi he lāngilangi ʻo e Puleʻangá pea ʻe tokoniʻi kinautolu ke nau toe ake ʻo mālohi fakalaumālie.”

Ko e polokalama efiafí naʻe kamataʻaki ia ha malanga naʻe fakakaveinga ko e “Fakaeʻa ʻa e Lāngilangi ʻo Sihová ki he Faʻahinga Anga-Fakatōkilaló.” Naʻe fakahaaʻi ʻe he toko taha malangá ʻa e anga hono fokotuʻu ʻe Sihova ʻa e faʻifaʻitakiʻanga ʻi he anga-fakatōkilaló, neongo ko e Toko Taha māʻolunga taha ia ʻi he ʻunivēsí. (Sāme 18:35) ʻOku leleiʻia ʻa Sihova ʻi he faʻahinga ʻoku nau anga-fakatōkilalo moʻoní, ka ʻokú ne talitekeʻi ʻa e faʻahinga ʻoku nau hā fakatōkilalo pē ʻi he taimi ʻoku nau feangainga ai mo honau toʻú pe ko honau kau māʻolungá ka nau feangainga anga-fefeka leva ki he faʻahinga ʻi he malumalu ʻo ʻenau pulé.​—Sāme 138:6.

Hokó, naʻe fakaeʻa ʻa e kikite faka-Tohitapú ʻi ha malanga fakakongokonga naʻe fakamamafaʻi ai ʻa e tafaʻaki kehekehe ʻo e kaveinga tefito: “Ko e Kikite ʻa ʻĒmosí—Ko ʻEne Pōpoaki ki Hotau ʻAhó.” ʻI he tuhu ki he faʻifaʻitakiʻanga ʻa ʻĒmosí, ko e ʻuluaki toko taha malangá naʻá ne tohoakiʻi ʻa e tokangá ki he fatongia ʻoku tau maʻu ke fakatokanga ki he kakaí ʻo kau ki he fakamaau ʻa Sihova ka hoko maí. Ko e kaveinga ʻo ʻene malangá ko e “Leaʻaki Loto-Toʻa ʻa e Folofola ʻa e ʻOtuá.” Ko e toko taha malanga hono uá naʻá ne ʻomai ʻa e fehuʻi: “ʻE fakangata ʻi ha taimi ʻe Sihova ʻa e fulikivanú pea mo e faingataʻa ʻi he māmani ko ení?” Ko ʻene konga ko e “Fakamaau Fakaʻotua ki he Fulikivanú,” naʻe fakahaaʻi ai ko e fakamaau fakaʻotuá ʻoku taau maʻu pē ia, taʻealakalofi, pea ʻoku fai filifili. Ko e toko taha malanga fakaʻosí naʻá ne fakahanga e tokangá ki he kaveinga “ʻOku Sivi ʻe Sihova ʻa e Lotó.” Ko e faʻahinga ʻoku nau fakaʻamu ke fakahōifuaʻi ʻa Sihová te nau tokanga ki he ngaahi lea ʻi he Emosi 5:​15: “Fehiʻa ki he kovi, pea ʻofa ki he lelei.”

Ko e ngaahi inu ʻolokaholó, hangē ko e uainé ʻa ia ʻokú ne ʻai ʻa e lotó ke fiefiá, ʻoku lava ke ngāuehalaʻaki. ʻI heʻene malanga “Fakaʻehiʻehi mei he Tauhele ʻo e Ngāuehalaʻaki ʻa e ʻOlokaholó,” naʻe fakahokohoko ai ʻe he toko taha malangá ʻa e ngaahi fakatuʻutāmaki fakaesino mo fakalaumālie ʻo hono ngāueʻaki taʻefakafuofua ʻo e ʻolokaholó, naʻa mo e ʻikai ke konā ha tahá. Naʻá ne ʻomai ha tefitoʻi moʻoni tataki: Koeʻuhi ko e makātakiʻi ʻo e ʻolokaholó ʻoku kehekehe ia mei he toko taha ki he toko taha, ko ha lahi pē ʻokú ne maumauʻi hoʻo “poto ʻaongá mo e malava fakaefakakaukaú” ʻoku fuʻu lahi ia kia koe.—Palovepi 3:​21, 22, NW.

Koeʻuhi ʻoku tau moʻui ʻi he ngaahi taimi faingataʻa, ko e tuʻunga-lea hokó, “Ko Sihová, ko Hotau ‘Hūfanga Ia ʻi he Ngaahi Taimi Faingataʻá,’” naʻe fakamoʻoniʻi ʻa ʻene fakafiemālié. Ko e lotú, laumālie māʻoniʻoní, mo e kaungā Kalisitiané ʻoku lava ke nau tokoniʻi kitautolu ke fekuki ai mo ia.

Ko e malanga fakaʻosi ʻo e ʻahó, “‘Ko e Fonua Lelei’—Tomuʻa Fakaʻali ʻo e Palataisí,” naʻe fakaʻosiʻaki ia ha meʻa fakafiefia fakaʻohovale ki he toko taha kotoa—ko ha tohi foʻou fakataha mo e ʻū mape faka-Tohitapu lahi! ʻOku fakakaveinga ia ko e See the Good Land.

Kaveinga ʻo e ʻAho Uá: “Talaki Hono Lāngilangí ʻi he Lotolotonga ʻo e Ngaahi Puleʻangá”

Hili e lāulea ki he konga tohi fakaʻahó, naʻe fakahoko ai ʻa e malanga fakakongokonga hono ua ʻo e fakataha-lahí, fakataha mo e kaveinga “Tapua Atu Hangē ha Ngaahi Sioʻatá ʻa e Lāngilangi ʻo Sihová.” Ko e konga ʻuluakí naʻe fakamatala ai ki hono “Fakamafola ʻa e Ongoongo Leleí ki he Feituʻu Kotoa Pē” pea fakakau ai ha fakatātaaʻi ʻo e meʻa naʻe hokosia moʻoni he malaʻe ngāué. Ko e malanga hono uá naʻe kau ai ha fakahāhā ʻo ha toe ʻaʻahi ʻi hono fakahoko ʻe he toko taha malangá ʻa e kaveinga “Tatala ʻa e Pulongá mei he Faʻahinga Kuo Fakakuihí.” Ko e konga fakaʻosí, naʻe fakakaveinga “Fai Ia ke Kakato Ange ʻi Heʻetau Ngāue Fakafaifekaú,” naʻe fakalahi ia ʻaki ha ngaahi fakaʻekeʻeke mahuʻinga ʻo kau ki he ngaahi meʻa naʻe hokosia he malaʻe ngāué.

Ko e konga hoko ʻo e polokalamá naʻe fakakaveinga ia ko e “Fehiʻanekinaʻi Taʻehanoʻuhinga.” Naʻe kau ai ha ngaahi fakaʻekeʻeke fakalototoʻa ʻo e faʻahinga faitōnunga tāutaha ʻa ia naʻa nau tauhi maʻu ʻenau anga-tonú ʻi he mālohi ʻo e ʻOtuá ʻi he malumalu ʻo e fakafepakí.

Ko ha tafaʻaki ʻo e ngaahi fakataha-lahí naʻe fai ʻa e fakatuʻotuʻa lahi ki aí ko e malanga papitaisó ʻo hoko atu ai ha fakauku kakato ʻi he vaí ʻa e kau kanititeiti kotoa naʻe tāú. Ko e papitaiso ʻi he vaí ʻoku fakaʻilongaʻi ai ha fakatapui kakato ʻa ha toko taha kia Sihova. Ko ia ai, naʻe mātuʻaki feʻungamālie ʻa e kaveingá: “Ko e Moʻui ʻo Fakatatau ki Heʻetau Fakatapuí ʻOku Fakalāngilangiʻi Ai ʻa e ʻOtuá.”

Ko e polokalama efiafí naʻe kamata ia ʻaki ha malanga ʻa ia naʻe fakalototoʻaʻi ai ʻa e sivisiviʻi-kitá, “Fakatupulekina ha Vakai Faka-Kalaisi ki he Tuʻunga Lahí.” Naʻe lave ʻa e toko taha malangá ki he poini mahuʻinga ko ení: ʻOku hoko ʻa e tuʻunga lahí ʻi he faʻifaʻitaki ki he anga-fakatōkilalo ʻa Kalaisí. Ko ia ai, ʻoku ʻikai totonu ke kumi ha Kalisitiane ki he fatongiá koeʻuhi ke fakatōliʻa ʻaki ʻene taumuʻa fakafoʻituituí. ʻOku totonu ke ne ʻeke hifo kiate ia, ‘ʻOku ou loto-lelei ke fakahoko ha ngaahi ngāue ʻaonga ʻa ia ʻe ʻikai moʻoni ke fakatokangaʻí?’

ʻOkú ke ongoʻi helaʻia ʻi ha taimi? ʻOku mahino ʻa e tali ki aí. Ko e malanga “Helaʻia kae ʻIkai Helaʻia ʻOsi” naʻe fiefia ai ʻa e toko taha kotoa. Ko e fakaʻekeʻeke ʻo e Kau Fakamoʻoni ʻi he taimi fuoloá naʻe fakahaaʻi ai ʻe lava ʻe Sihova ke ʻai kitautolu ke tau “ivi[ʻia] ʻi hono Laumalie.”—Efeso 3:16.

Ko e nima-homó ko ha ʻulungāanga ia ʻoku ʻikai ke fanauʻi kitautolu mo ia ka kuo pau ke tau ako. Ko e poini tefito ko ení naʻe fakamamafaʻi ia ʻi he konga ko e “Nimahomo ʻo Angafietokoni.” Pea naʻe ʻohake ai ʻa e foʻi fehuʻi fakatupu fakakaukau ko ení: “ʻOku tau mateuteu ke vahevahe atu ha ngaahi miniti ʻi hotau ʻahó mo e fanga tokoua mo e tuofāfine ʻoku nau taʻumotuʻá, puké, loto-mafasiá pe tuēnoá?”

Ko e “Tokanga Fekauʻaki mo e ‘Leʻo ʻo e Kau Mulí’” naʻá ne puke ʻa e tokanga ʻa e kau fanongó. Naʻe fakahoa ʻi he malanga ko ení ʻa e kau muimui ʻo Sīsuú ki he fanga sipi ʻoku nau fanongo ki hono leʻó pē ʻi he tuʻunga ko e “Tauhi Lelei” pea ʻoku ʻikai ke nau fanongo ki he “leʻo ʻo e kau mulí” hangē ko ia ʻoku leaʻaki ʻe he ngaahi kautaha lahi ʻoku tākiekina ʻe he Tēvoló.—Sione 10:​5, 14, 27.

Kuo pau ke hiva feongoongoi ha kau hiva ke hoko ai ʻo mahinoʻi. Koeʻuhi ke fakalāngilangiʻi ʻa e ʻOtuá, ko e kau lotu moʻoni takatakai he māmaní kuo pau ke nau fāʻūtaha. Ko ia ai, ko e “Fakalāngilangiʻi ʻa e ʻOtuá ʻi he ‘Ngutu Taha’” naʻe ʻomai ai ʻa e fakahinohino ʻaonga ki he founga ʻe lava ke tau lea kotoa ʻaki ai ʻa e “lea maa” pea tauhi kia Sihova ʻi he “uouagataha.”—Sefanaia 3:​9, PM.

Ko e ngaahi mātuʻá, tautefito ki he faʻahinga ʻoku ʻi ai ʻenau fānau īkí, naʻa nau fiefia kakato ʻi he malanga fakaʻosi ʻo e ʻahó, “Ko ʻEtau Fānaú—Ko ha Tofiʻa Mahuʻinga.” Naʻe tukuange mai ai ha tohi foʻou peesi ʻe 256, naʻe fakaʻohovaleʻi fakafiefia ai ʻa e kau fanongó. Ko e Ako mei he Faiako Lahí ko ha tohi ia ʻa ia te ne tokoniʻi ʻa e ngaahi mātuʻá ke nau fakamoleki ha taimi mahuʻinga fakalaumālie mo ʻenau fānaú, ʻa e meʻaʻofa ʻa e ʻOtuá kia kinautolú.

Kaveinga ʻo e ʻAho Tolú: “Fai ʻa e Meʻa Kotoa Pē ke Lāngilangi Ai ʻa e ʻOtuá”

Ko e ngaahi fakamanatu ʻo e konga tohi fakaʻahó naʻá ne kamata ʻa e ʻaho fakaʻosi ʻo e fakataha-lahí ʻi ha foʻi fakakaukau fakalaumālie. Ko e ʻuluaki konga ʻo e polokalama ʻo e ʻaho ko ení naʻe fai ai ʻa e tokanga lahi ange ki he fokotuʻutuʻu fakafāmilí. Ko e ʻuluaki malangá, ko e “Ngaahi Mātuʻa, Langa Hake ʻa e Siakale Fakafāmilí,” naʻá ne ʻai ke mateuteu ʻa e ʻatamaí. Hili hono fakamanatu ʻa e ngaahi fatongia ʻo e ngaahi mātuʻá ke tokonaki fakamatelie ki honau fāmilí, naʻe fakamoʻoniʻi ʻe he toko taha malangá ko e fatongia tefito ʻo e ngaahi mātuʻá ke tokonaki fakalaumālie ki heʻenau fānaú.

Ko e toko taha malanga hokó naʻá ne lea ki he fānaú ʻo sivisiviʻi ʻa e kaveinga “Founga ʻOku Fakahīkihikiʻi Ai ʻa Sihova ʻe he Toʻutupú.” Naʻá ne pehē ko e fānaú ʻoku nau hangē ko e “hahau” koeʻuhi ʻoku nau tokolahi pea ko honau tuʻunga fakatalavoú ʻoku fakaivifoʻou. ʻOku fiefia ʻa e kakai lalahí ke ngāue mo kinautolu ʻi he ngāue ʻa Sihová. (Sāme 110:3) Ko e konga ko ení naʻe kau ai ʻa e ngaahi fakaʻekeʻeke fakafiefia ʻo e kau talavou alafaʻifaʻitakiʻanga.

Ko e ngaahi tulama faka-Tohitapu teunga kakató ko ha tafaʻaki fakamāfana maʻu pē ia ʻo e ngaahi fakataha-lahi fakavahé, pea naʻe ʻikai kehe mei ai ʻa e fakataha-lahi ko ení. Ko e tulama “Faifakamoʻoni Loto-Toʻa Neongo ʻa e Fakafepakí” naʻe fakatātaaʻi ai ʻa e kau muimui ʻo Sīsū ʻi he ʻuluaki senitulí. Naʻe ʻikai ko ha fakafiefia pē ia, ka ko e meʻa ʻoku mahuʻinga angé, naʻe fakamaama. Ko e malanga naʻe hoko atu he tulamá, ko e “Talaki ʻa e Ongoongo Leleí ʻo ‘ʻIkai Tuku,’” naʻá ne fakamamafaʻi ʻa e ngaahi poini tuʻu-ki-muʻa ʻo e tulamá.

Ko e faʻahinga kotoa naʻa nau maʻu iá naʻa nau fakatuʻotuʻa atu ki ha meʻa mahuʻinga ʻo e polokalama he Sāpaté, ko e malanga maʻá e kakaí, “Ko Hai ʻOku Nau ʻAve ki he ʻOtuá ʻa e Lāngilangí he ʻAho Ní?” Naʻe ʻomai ʻe he toko taha malangá ʻa e fakamoʻoni ʻo e ʻikai fakalāngilangiʻi ʻe he ngaahi malaʻe fakasaienisí mo e fakalotú ʻa e ʻOtuá. Ko e kakai pē ʻoku uiʻaki hono huafá, ʻa e faʻahinga ʻoku nau malangaʻi mo akoʻi ʻa e moʻoni fekauʻaki mo Sihová, ʻoku nau fakalāngilangiʻi moʻoni ʻa hono huafá he ʻaho ní.

Ko e malanga maʻá e kakaí naʻe hoko atu ai ha fakamatala fakanounou ʻo e lēsoni makasini Taua Leʻo ki he uike ko iá. Naʻe hoko atu leva ai ʻa e malanga fakaʻosí, ko e “‘Fua Lahi’ Maʻá e Lāngilangi ʻo Sihová.” Naʻe ʻomai ʻe he toko taha malangá ha fakapapau poini ʻe hongofulu ki he toko taha kotoa naʻe kau ki aí ke nau tali. Naʻe fakatefito ia ʻi he ngaahi founga kehekehe ʻe lava ke ʻave ai ʻa e lāngilangí kia Sihova, ko e Tokotaha-Fakatupú. Ko ha “ʻIo” loto-taha naʻe fakaongo atu ia ʻi he kotoa ʻo e ngaahi fakataha-lahí mei he ngataʻanga ʻe taha ʻo e māmaní ki he ngataʻanga ʻe tahá.

Ko ia naʻe fakaʻosi ai ʻa e fakataha-lahí fakataha mo e ongona ʻa e kaveinga “ʻAve ki he ʻOtuá ʻa e Lāngilangí” ʻi he telinga ʻo e toko taha maʻu fakataha taki taha. Pea ʻi he tokoni ʻa e laumālie ʻo Sihová pea mo e konga hāmai ʻo ʻene kautahá, ʻofa ke tau feinga maʻu pē ke ʻave ki he ʻOtuá ʻa e lāngilangí ʻo ʻikai ki he tangatá.

[Puha/Fakatātā ʻi he peesi 23]

Ngaahi Fakataha-Lahi Fakavahaʻapuleʻangá

Naʻe fai ʻa e fakataha-lahi fakavahaʻapuleʻanga ʻaho ʻe fā hono lōloá ʻi ʻAfilika, ʻAmelika Tokelau, ʻAmelika Tonga, ʻAositelēlia, ʻĒsia mo ʻIulope. Ko e kau fakafofonga Fakamoʻoni naʻe fili mei he māmaní takatakai naʻe fakaafeʻi ke nau hoko ko e kau fakafofonga ʻi he ngaahi fakatahataha ko ení. ʻI he foungá ni naʻe ʻi ai ha “fetokoniʻaki” ʻi he vahaʻa ʻo e kau fakaafé mo honau kau talitalí. (Loma 1:12) Naʻe fakafoʻou ai ʻa e ngaahi maheni motuʻá, pea naʻe maʻu ai mo e ngaahi maheni foʻou. Ko ha tafaʻaki makehe ʻo e fakataha-lahi fakavahaʻapuleʻangá ko e konga ʻo e polokalamá naʻe fakakaveinga ko e “Ngaahi Līpooti mei he Ngaahi Fonua Kehé.”

[Puha/Fakatātā ʻi he peesi 25]

Ongo Tohi Foʻou ʻOku ʻAve Ai ki he ʻOtuá ʻa e Lāngilangí

Ko e tohi foʻou ʻe ua naʻe tukuange mai ʻi he ngaahi Fakataha-Lahi Fakavahe “ʻAve ki he ʻOtuá ʻa e Lāngilangi.” Ko e ʻatalasa faka-Tohitapu See the Good Land ʻoku ʻi ai hono takafi tolonga mo e mape peesi ʻe 36 ʻo e ngaahi fakatātā ʻo e ngaahi feituʻu faka-Tohitapú. Ko e peesi kotoa pē ʻoku fakalanu pea ʻi ai ʻa e ʻū mape ʻo e ngaahi ʻemipaea ʻo ʻAsīlia, Pāpilone, Meto-Pēsia, Kalisi, pea mo Loma. ʻOku ʻi ai ʻa e ʻū mape mavahe ʻoku kāpui ai ʻa e ngāue fakafaifekau ʻa Sīsuú mo e fakalahi ʻo e lotu faka-Kalisitiané.

Ko e Ako mei he Faiako Lahí ko ha tohi peesi ʻe 256 ia ʻoku ʻi ai ha ngaahi fakatātā fakafuofua ki he 230. ʻOku lava ke fakamoleki ʻa e ngaahi konga fakafiefia lahi mo e fānaú ʻi he sio pē ʻi he ngaahi fakatātaá pea tali ʻa e ngaahi fehuʻi fakatupu fakakaukau ʻoku maʻu ʻi he tohí. Ko e tohi foʻoú ni ʻoku faʻufaʻu ia ke fakafepakiʻi ʻa hono ʻohofi ʻe Sētane ʻa ʻetau fānaú, ʻa ia ʻoku fakataumuʻa ke fakameleʻi ai honau ʻulungāangá.

[Fakatātā ʻi he peesi 23]

Lave ʻa e kau misinalé ki he ngaahi meʻa fakatuimālohi naʻe hokosia

[Fakatātā ʻi he peesi 24]

Ko e papitaisó ko ha tafaʻaki mahuʻinga ia ʻo e ngaahi fakataha-lahi “ʻAve ki he ʻOtuá ʻa e Lāngilangí”

[Fakatātā ʻi he peesi 24]

Fiefia ʻa e iiki mo e lalahi he ngaahi tulama faka-Tohitapú