Ko Hono ʻIloʻi ʻa e Manu Fekaí mo Hono Fakaʻilongá

ʻOKÚ KE fiefia ʻi hono solova ha misiteli? Ke fai iá, ʻokú ke kumi ki ha ngaahi ʻiloʻanga ʻa ia ʻokú ne tokoniʻi koe ke faifai pē peá ke ʻiloʻi ʻa e talí. ʻI heʻene Folofola fakamānavaʻí, ʻoku tokonaki mai ai ʻe he ʻOtuá ʻa e ngaahi ʻiloʻanga ʻoku fiemaʻú ʻi he fekauʻaki mo e fika 666, ko e hingoa, pe fakaʻilonga, ʻo e manu fekai ʻo e Fakahā vahe 13.

ʻI he kupú ni, te tau sio ai ki ha founga fakaʻuhinga tefito ʻe fā—ko e ngaahi ʻiloʻanga mātuʻaki mahuʻinga—ʻa ia ʻe fakahaaʻi ai ʻa e ʻuhinga ʻo e fakaʻilonga ʻo e manu fekaí. Te tau lāulea (1) ki he anga hono fili he taimi ʻe niʻihi ʻa e ngaahi hingoa ʻi he Tohi Tapú, (2) ko hono ʻiloʻi pau ʻo e manu fekaí, (3) ko e hā ʻa e ʻuhinga ʻo e hoko ʻa e 666 ko ha “fika fakaetangata,” mo e (4) ʻuhinga ʻo e fika 6 mo e ʻuhinga ʻoku hiki ai ʻo liunga tolú, ʻa ia ko e 600 tānaki 60 tānaki 6, pe 666.—Fakahā 13:18.

Ngaahi Hingoa Fakatohitapú​—ʻOku ʻIkai ko ha Ngaahi Leipolo Pē

Ko e ngaahi hingoa Fakatohitapú ʻoku faʻa ʻi ai hono ʻuhinga makehe, tautefito ʻi he taimi ʻoku ʻomai ai ʻe he ʻOtuá. Ko e fakatātaá, koeʻuhi naʻe pau ke hoko ʻa ʻEpalame ko e tamai ʻa e ngaahi puleʻangá, naʻe liliu ʻe he ʻOtuá ʻa e hingoa ʻo e pēteliaké ki he ʻĒpalahame, ko hono ʻuhingá ko e “tamai ki he gaahi buleaga lahi.” (Senesi 17:​5, PM) Naʻe tala ʻe he ʻOtuá kia Siosefa mo Mele ke na fakahingoa ʻa e tama ʻa Mele ʻi he kahaʻú ko Sīsū, ʻa ia ʻoku ʻuhingá ko “Sihova ʻa e Fakamoʻuí.” (Mātiu 1:​21, NW, fakamatala ʻi lalo; Luke 1:​31) ʻI he fehoanaki mo e hingoa mohu ʻuhinga ko iá, naʻe ʻai ai ʻe Sihova fakafou ʻi he ngāue fakafaifekau mo e pekia fakaefeilaulau ʻa Sīsuú, ke malava hotau fakamoʻuí.​—Sione 3:​16.

Fakatatau ki ai, ko e hingoa mataʻifika 666 naʻe ʻomai ʻe he ʻOtuá kuo pau pē ʻokú ne fakatātaaʻi ʻa e meʻa ʻoku vakai ki ai ʻa e ʻOtuá ko e ngaahi anga makehe ia ʻo e manu fekaí. Fakatatau ki ai, ke mahinoʻi ʻa e ngaahi anga ko iá, ʻoku fiemaʻu ke tau ʻiloʻi ʻa e manu fekaí tonu pea ako ʻo fekauʻaki mo ʻene ngaahi ngāué.

Fakaeʻa ʻo e Manu Fekaí

Ko e tohi Tohi Tapu ʻa Tanielá ʻokú ne ʻomai ʻa e fakamaama lahi ki he ʻuhinga ʻo e fanga manu fekai fakaefakatātaá. ʻOku ʻi he Taniela vahe 7 ha fakatātā mahino ʻo e “fuʻu manu ʻe fa”—ko ha laione, ko ha pea, ko ha lēpati mo ha manu fekai fakailifia ʻoku nifo ʻaione lalahi. (Taniela 7:​2-7) ʻOku tala mai ʻe Taniela kia kitautolu ko e fanga manu fekai ko ení ʻoku nau fakatātaaʻi ʻa e ngaahi “tuʻi,” pe ngaahi puleʻanga fakapolitikale, ʻa ia ʻoku pule taufetongi ki ha ngaahi fuʻu ʻemipaea lalahi.​—Taniela 7:​17, 23.

ʻI he fekauʻaki mo e manu fekai ʻo e Fakahā 13:​1, 2, ʻoku fakahaaʻi ʻe he Interpreter’s Dictionary of the Bible ko e manu fekaí “ʻoku fakatahaʻi ʻiate ia ʻa e ngaahi anga kotoa ʻo e manu fekai ʻe fā ʻo e vīsone ʻa Tanielá . . . Fakatatau ki ai, ko e ʻuluaki manu fekai ko eni [ʻo e Fakahaá] ʻokú ne fakafofongaʻi ʻa e ngaahi kongakau fakatahataha ʻo e pule fakapolitikale kotoa pē ʻoku fakafepaki ki he ʻOtuá ʻi he māmaní.” Ko e fakamatala ko ení ʻoku fakapapauʻi ia ʻe he Fakahā 13:​7, ʻa ia ʻoku pehē ai fekauʻaki mo e manu fekaí: “Naʻe tuku kiate ia ʻa e pule ki he matakali kotoa pe, mo e faʻahinga, mo e lea, mo e puleʻanga.”a​—Fakaʻītali ʻamautolu.

Ko e hā ʻoku ngāueʻaki ai ʻe he Tohi Tapú ʻa e fanga manu fekaí ko e ngaahi fakatātā ʻo e tuʻunga-pule fakaetangatá? ʻI ha tuʻunga ʻi he ʻuhinga ʻe ua. ʻUluakí, koeʻuhi ko e lēkooti anga-fakamanu ʻo e lingitoto kuo fakahoko lahi fau ʻe he ngaahi founga-pulé ʻi he faai mai ʻa e ngaahi senitulí. “Ko e taú ko e taha ia ʻo e ngaahi tafaʻaki tuʻumaʻu ʻo e hisitōliá,” ko e tohi ia ʻa e ongo faihisitōlia ko Will mo Ariel Durant, “pea kuo ʻikai fakasiʻisiʻi ia ʻe he sivilaisé pe ko e temokalatí.” He moʻoni ē ko ia “ʻi he taimi naʻe pule ai ha tangata ki he kakai ke nau kovi ai”! (Koheleti 8:9) Ko e ʻuhinga hono uá he “naʻe tuku kiate ia ʻe he Talakoni [Sētane] a ʻene malohi aʻana mo hono taloni, mo ʻene fuʻu pule.” (Fakahā 12:9; 13:2) Fakatatau ki ai, ko e tuʻunga-pule fakaetangatá ko ha fakatupu ia ʻa e Tēvoló, ʻo tapua atu ai ʻa hono ʻulungāanga fakamanu, hangē ha talākoní.​—Sione 8:​44; Efeso 6:12.

Kae kehe, ʻoku ʻikai ʻuhinga eni ia ko e tokotaha-pule fakaetangata kotoa pē ko ha meʻangāue hangatonu ia ʻa Sētane. Ko e moʻoni, ʻi ha ʻuhinga ʻe taha, ʻoku ngāue ʻa e ngaahi founga-pule fakaetangatá ko e “sevaniti ia ʻa e ʻOtua,” ʻi hono ʻomai ʻa e faʻunga ki he sōsaieti fakaetangatá, ʻa ia ka ne ʻikai ia ʻe pule ʻa e maveuveú. Pea kuo maluʻi ʻe he kau taki ʻe niʻihi ʻa e ngaahi totonu tefito fakaetangatá, ʻo kau ai ʻa e totonu ke kau ʻi he lotu moʻoní—ko ha meʻa ʻa ia ʻoku ʻikai loto ki ai ʻa Sētane. (Loma 13:​3, 4; Esela 7:​11-27; Ngāue 13:7) Neongo ia, koeʻuhi ko e tākiekina ʻa e Tēvoló, ʻoku ʻikai ai ha tangata pe ko ha kautaha fakaetangata kuo faifai angé peá ne malava ke ʻomai ha melino mo e malu tuʻuloa ki he kakaí.b​—Sione 12:31.

“Ko e Fika Fakaetangata”

Ko ha ʻiloʻanga hono tolu ki he ʻuhinga ʻo e 666 ko e moʻoniʻi meʻa ko ia ʻo hono ui “ko e fika fakaetangata,” pe hangē ko hono fakalea ʻe he Amplified Bible, “ko ha fika ʻa e faʻahinga ʻo e tangatá.” Ko e kupuʻi leá ni ʻoku ʻikai lava ke ʻuhinga ia ki ha tangata fakafoʻituitui, he ko Sētane—ʻo ʻikai ko ha tangata pē—ʻokú ne maʻu ʻa e mafai ki he manu fekaí. (Luke 4:​5, 6; 1 Sione 5:​19; Fakahā 13:​2, 18) ʻI hono kehé, ko hono maʻu ʻe he manu fekaí “ha fika ʻa e faʻahinga ʻo e tangatá,” pe fakaʻilongá, ʻoku fakahuʻunga ai ko ha natula fakaetangata ia, ʻo ʻikai ko ha laumālie pe tēmeniō, pea ko ia ai ʻoku fakahaaʻi ai ʻa e ngaahi anga fakaetangata moʻoni. Ko e hā nai ia? ʻOku tali ia ʻe he Tohi Tapú, ʻo pehē: “Kuo fai angahala kotoa pe [ʻa e faʻahinga ʻo e tangatá], pea ʻoku ʻikai te nau aʻusia ʻa e hōifua ʻa e ʻOtua.” (Loma 3:23) Ko ia ai, ko e manu fekaí ʻi heʻene maʻu “ha fika ʻa e faʻahinga ʻo e tangatá,” ʻoku fakahaaʻi ai ʻoku tapua atu mei he ngaahi founga-pulé ʻa e tuʻunga hinga fakaetangatá, ko e fakaʻilonga ʻo e angahala mo e taʻehaohaoa.

ʻOku fakamoʻoniʻi eni ʻe he hisitōliá. “Ko e sivilaise kotoa pē kuo faifai pea ʻi aí kuo iku ia ʻo holofa,” ko e lau ia ʻa e Sekelitali U.S. ki muʻa ʻa e Puleʻangá ko Henry Kissinger. “Ko e hisitōliá ko ha talanoa ia fekauʻaki mo e ngaahi feinga taʻelavameʻa, ko ha ngaahi holi naʻe ʻikai fakahoko . . . Ko ia, ʻi he tuʻunga ko ha faihisitōliá, kuo pau ke te tali ha ongoʻi ʻo e taʻealakalofi ʻa e meʻa fakamamahí.” Ko e fakafuofua faitotonu ʻa Kissinger ʻoku fakamoʻoni ia ki he moʻoni Fakatohitapu tefito ko ení: “ʻOku ʻikai ʻi he tangata hono hala: ʻoku ʻikai ʻi he tangata ʻoku haʻele ke fakaʻuli ʻene ʻalu.”—Selemaia 10:23.

ʻI heʻetau ʻiloʻi ko eni ʻa e manu fekaí pea ʻilo ki he anga ʻo e vakai ki ai ʻa e ʻOtuá, ʻoku tau ʻi ha tuʻunga ai ke sivisiviʻi ʻa e konga fakaʻosi ʻo ʻetau misitelí—ko e fika onó mo e ʻuhinga ʻoku tohi ai ʻo liunga tolu—ʻa ia ko e 666, pe 600 tānaki 60 tānaki 6.

Toe Leaʻaki ʻo Liunga Tolu ʻa e Onó​—Ko e Hā Hono ʻUhingá?

ʻI he ngaahi Konga Tohi Tapú, ʻoku maʻu ai ʻe he ngaahi mataʻifika pau ha ʻuhinga fakaefakatātā. Ko e fakatātaá, ko e fika fitú, ʻoku faʻa ngāueʻaki ia ke fakatātaaʻi ʻaki ha meʻa ʻa ia ʻoku kakato, pe haohaoa, ʻi he vakai mai ʻa e ʻOtuá. Hangē ko ení, ko e uike fakaefakatupu ʻa e ʻOtuá ʻoku kau ki ai ʻa e ‘ngaahi ʻaho’ ʻe fitu, pe ngaahi vahaʻa taimi lahi, ʻa ia ʻi he lolotonga iá ʻoku fakahoko kakato ai ʻe he ʻOtuá ʻa ʻene taumuʻa fakaefakatupu fekauʻaki mo e foʻi māmaní. (Senesi 1:3–​2:3) Ko e “folofola” ʻa e ʻOtuá ʻoku hangē ia ha siliva ʻa ia kuo “tuʻo fitu hono sivi,” ʻo maʻa haohaoa ai. (Sāme 12:6; Palovepi 30:​5, 6) Ko e kilia ko Neamaní naʻe tala ki ai ke ne kaukau tuʻo fitu ʻi he Vaitafe Sioataní, ʻa ia naʻe fakamoʻui kakato ia ʻi he hili iá.​—2 Tuʻi 5:​10, 14.

Ko e onó ko e nounou ʻaki ia ʻa e taha mei he fitú. ʻIkai ʻe hoko ia ko ha fakatātā feʻungamālie ʻo ha meʻa ʻoku taʻehaohaoa, pe mele, ʻi he vakai mai ʻa e ʻOtuá? ʻIo, ʻoku moʻoni! (1 Kalonikali 20:​6, 7) ʻIkai ngata aí, ko e toe leaʻaki liunga tolu ʻa e onó, ko e 666, ʻoku fakamamafaʻi mālohi ai ʻa e taʻehaohaoa ko iá. ʻOku toe fakamoʻoniʻi ko e vakai totonú ení ko e foʻi moʻoni ko ia ko e 666 “ko ha fika ʻa e faʻahinga ʻo e tangatá,” hangē ko ia kuo tau ʻosi lāulea ki aí. Ko ia ai, ko e lēkooti ʻo e manu fekaí, ko hono “fika ʻa e faʻahinga ʻo e tangatá,” pea mo e fika 666 tonu ʻoku tuhu kotoa ia ki he fakamulituku taʻetoefehālaaki ʻe taha—ko e tōnounou fakaʻaufuli mo e taʻelavameʻa ʻi he vakai mai ʻa Sihová.

Ko e fakatātaaʻi ʻo e ngaahi taʻefeʻunga ʻa e manu fekaí ʻoku fakamanatu mai ai ʻa e meʻa naʻe leaʻaki fekauʻaki mo Tuʻi Pelisasa ʻo Pāpilone motuʻá. Fakafou ʻia Taniela, naʻe pehē ʻe Sihova ki he pule ko iá: “Kuo fua koe ʻi he meʻa-fua, pea ʻoku ke maʻamaʻa [pe taʻefeʻunga].” ʻI he pō pē ko iá naʻe tāmateʻi ai ʻa Pelisasa, pea naʻe tō ʻa e ʻEmipaea mālohi ʻo Pāpiloné. (Taniela 5:​27, 30) ʻI he tuʻunga tatau, ko e fakamāuʻi ʻe he ʻOtuá ʻa e manu fekai fakapolitikalé pea mo e faʻahinga ʻoku nau maʻu hono fakaʻilongá ʻoku ʻuhinga iá ko e ngataʻanga ʻo e manu fekai ko iá mo hono kau poupoú. Kae kehe, ʻi he tuʻunga ko ení, ʻe toʻo ʻosi ʻe he ʻOtuá ʻo ʻikai ko e fokotuʻutuʻu fakapolitikale pē ʻe taha ka ko e toetoenga kotoa ʻo e pule fakaetangatá. (Taniela 2:​44; Fakahā 19:​19, 20) Ko ia ai, he mahuʻinga ē ke tau fakaʻehiʻehi mei hono maʻu ʻa e fakaʻilonga fakatupu mate ʻo e manu fekaí!

ʻIloʻi ʻa e Fakaʻilongá

Hili pē hono fakahaaʻi ʻa e fika 666, ʻoku lave ʻa e Fakahaá ki he kau muimui ʻe toko 144,000 ʻo e Lamí, ʻa Sīsū Kalaisi, ʻa ia ʻoku tohi ʻi honau laʻé ʻa hono hingoá mo e hingoa ʻo ʻene Tamaí, ʻa Sihova. ʻOku fakaʻilongaʻi ʻe he ongo hingoa ko ení ʻa e faʻahinga ʻoku nau kau kia Sihova pea ki hono ʻAló, ʻa ia ʻoku nau laukauʻaki ʻa e faifakamoʻoni ki aí. ʻI he tuʻunga tatau, ko e faʻahinga ʻoku nau maʻu ʻa e fakaʻilonga ʻo e manu fekaí ʻoku nau fakahaaʻi ʻa ʻenau tamaioʻeiki ki he manu fekaí. Ko ia ai, ko e fakaʻilongá, pe ʻoku ʻi he nima mataʻú pe ʻi he foʻi laʻé, ʻi he fakaefakatātaá, ko ha fakaʻilonga ia ʻoku fakaʻilongaʻi ai ʻa ia ʻoku ʻaʻaná ko e taha ʻoku poupou fakaelotu ki he ngaahi fokotuʻutuʻu fakapolitikale hangē ha manu ʻo e māmaní. Ko e faʻahinga ʻoku nau maʻu ʻa e fakaʻilongá ʻoku nau ʻave kia “Sisa” ʻa e meʻa totonu ʻa e ʻOtuá. (Luke 20:25; Fakahā 13:​4, 8; 14:1) Anga-fēfē? ʻAki hono ʻoange ʻa e lāngilangi fakaelotú ki he puleʻanga fakapolitikalé, ko hono ngaahi fakaʻilongá, mo ʻene mālohi fakakautaú, ʻa ia ʻoku nau hanga ki ai ki he ʻamanakí mo e fakamoʻuí. Ko ha lotu pē ʻoku nau fai ki he ʻOtua moʻoní ko e lotu loungutu pē ia.

ʻI hono kehé ʻoku ekinaki mai ʻa e Tohi Tapú kia kitautolu: “ʻOua ʻe tuʻu hoʻomou falala kia houʻeiki, ki ha hakoʻi tangata ʻoku ʻikai ai ha tokoni. ʻOku mole ʻene manava, ʻoku ne foki ki hono kelekele; ko e ʻaho pe ko ia ko ʻene ngaahi fakakaukau ʻoku mate.” (Sāme 146:​3, 4) Ko e faʻahinga ʻoku tokanga ki he akonaki fakapotopoto ko iá ʻoku ʻikai siva ʻenau ʻamanakí ʻi he taimi ʻoku ʻikai lava ai ʻa e ngaahi founga-pulé ke fakahoko ʻenau ngaahi talaʻofá pe ʻi he taimi ʻoku tō ai ʻa e kau taki fai fakamoʻuí mei honau tuʻungá.​—Palovepi 1:​33.

ʻOku ʻikai ʻuhinga eni ia ʻoku tangutu pē ʻa e kau Kalisitiane moʻoní ʻo ʻikai fai ha meʻa fekauʻaki mo e tuʻunga kovi ʻo e faʻahinga ʻo e tangatá. ʻI hono kehé, ʻoku nau fanongonongo longomoʻui ʻa e founga-pule ʻe taha ʻa ia te ne solova ʻa e ngaahi palopalema ʻa e faʻahinga ʻo e tangatá—ko e Puleʻanga ʻo e ʻOtuá, ʻa ia ʻoku nau fakafofongaʻí.​—Mātiu 24:14.

Ko e Puleʻanga ʻo e ʻOtuá—ʻA e ʻAmanaki Pē Taha ki he Faʻahinga ʻo e Tangatá

ʻI heʻene ʻi māmaní, naʻe ʻai ʻe Sīsū ʻa e Puleʻanga ʻo e ʻOtuá ko e kaveinga tefito ia ʻo ʻene malangá. (Luke 4:​43) ʻI heʻene sīpinga lotú, ʻa ia ʻoku ui he taimi ʻe niʻihi ko e Lotu ʻa e ʻEikí, naʻe akoʻi ai ʻe Sīsū ʻa hono kau muimuí ke nau lotu ki he Puleʻanga ko iá ke hoko mai pea ki he finangalo ʻo e ʻOtuá ke fai ʻi heni ʻi he māmaní. (Mātiu 6:​9, 10) Ko e Puleʻangá ko ha founga-pule ia ʻa ia te ne pule ki he māmaní kotoa, ʻo ʻikai mei ha kolomuʻa fakamāmani, ka mei hēvani. Ko ia ai, naʻe ui ia ʻe Sīsū ko e “Puleʻanga ʻo Hevani.”—Mātiu 11:12.

Ko hai ia ʻe feʻungamālie lelei ange ke hoko ko e Tuʻi ʻo e Puleʻanga ko iá ka ko Sīsū Kalaisi, ʻa e tokotaha ʻa ia naʻe pekia maʻá e faʻahinga te ne pule mai ki ai ʻi he kahaʻú? (Aisea 9:​6, 7; Sione 3:​16) ʻIkai fuoloa ko e Pule haohaoa ko ení, ko ha tokotaha laumālie māfimafi ia he taimí ni, te ne lī ʻa e manu fekaí, ko hono ngaahi tuʻí, mo ʻene ngaahi kau taú ki he “anoafi, ʻa ia ʻoku ulo sulifa,” ko ha fakaʻilonga ʻo e fakaʻauha fakaʻaufuli. Ka ʻoku ʻikai ko ia pē. ʻE toe toʻo ʻosi ʻe Sīsū ʻa Sētane, ko e meʻa ʻa ia ʻe ʻikai lava ke faifai ange pea fai ia ʻe ha tangata.—Fakahā 11:15; 19:​16, 19-21; 20:​2, 10.

ʻE ʻomai ʻe he Puleʻanga ʻo e ʻOtuá ʻa e melino ki he kotoa ʻo ʻene faʻahinga talangofua ʻe pule mai ki aí. (Sāme 37:​11, 29; 46:​8, 9) Naʻa mo e mamahí, langá mo e maté ʻe ʻikai ke toe ʻi ai. Ko ha ʻamanaki lāngilangiʻia ē ki he faʻahinga ʻoku nau hanganaki ʻatā mei he fakaʻilonga ʻo e manu fekaí!​—Fakahā 21:​3, 4.

[Fakamatala ʻi lalo]

[Puha ʻi he peesi 5]

Ngaahi ʻIloʻanga ki he ʻUhinga ʻo e 666

 1. Ko e ngaahi hingoa Fakatohitapú ʻoku faʻa fakahaaʻi ai ʻa e meʻa fekauʻaki mo e anga pe moʻui ʻa e tokotaha ko iá, hangē ko ia ʻi he tuʻunga ʻo ʻĒpalahame, Sīsū pea mo e tokolahi kehe. ʻI he tuʻunga tatau, ko e hingoa mataʻifika ʻo e manu fekaí ʻoku fakahāhā ai hono ngaahi angá.

 2. ʻI he tohi Tohi Tapu ʻa Tanielá, ʻoku fakafofongaʻi ai ʻe he fanga manu fekai kehekehe ʻa e taufetongi ʻa e ngaahi puleʻanga, pe ʻemipaea fakaetangatá. Ko e manu fekai fetuiaki ʻo e Fakahā 13:​1, 2 ʻokú ne fakatātaaʻi ʻa e fokotuʻutuʻu fakapolitikale ʻi māmani lahí ʻa ia ʻoku fakaivia mo puleʻi ʻe Sētané.

 3. Ko e manu fekaí ʻi heʻene maʻu ha “fika fakaetangata,” pe “ko ha fika ʻa e faʻahinga ʻo e tangatá,” ʻoku fakahaaʻi ai ko ha tangata mavahe ia, ʻo ʻikai ko ha tēmeniō. Ko ia ai, ʻoku tapua atu ai ʻa e ngaahi taʻelavameʻa fakaetangata ko e tupu mei he angahalá mo e taʻehaohaoá.

 4. ʻI he vakai mai ʻa e ʻOtuá, ko e fika onó, ʻi heʻene nounou ʻi he kakato, pe haohaoa Fakatohitapú, ʻoku fakahaaʻi ai ʻa e taʻehaohaoa. Ko e fakaʻilonga 666 ʻokú ne fakamamafaʻi ʻa e taʻetaau ko iá ʻaki hono toe ʻai ʻo liunga tolu ʻa e foʻi fiká.

[Fakatātā ʻi he peesi 6]

Kuo fakamoʻoniʻi ʻa e taʻelavameʻa ʻa e tuʻunga-pule fakaetangatá, ʻo fakatātaaʻi lelei ia ʻe he fika 666

[Maʻuʻanga]

Kiʻi tama fiekaia: UNITED NATIONS/Photo by F. GRIFFING

[Fakatātā ʻi he peesi 7]

ʻE ʻomai ʻe Sīsū Kalaisi ʻa e tuʻunga-pule haohaoa ki he foʻi māmaní