ʻAmanaki Lolotonga e Siva ʻa e ʻAmanakí—Ko ha ʻAsemipilī ʻi ha Kemi Hūfanga

KO E kemi hūfanga Kakuma ʻoku tuʻu ia ʻi he tafaʻaki fakatokelau ʻo Keniaá, ofi ki he kauʻāfonua ʻo Sutaní. Ko e nofoʻanga ia ki he kakai ʻe toko 86,000 tupu. Ko e feituʻú ʻoku pakukā, ʻo aʻu ʻa e māfana ʻo e ʻeá ʻi he taimi ʻahó ki he tikilī selosiasi ʻe 50. Ko e fakamālohi ʻi he ngaahi kemi hūfangá ʻoku mafolalahia. Ki he tokolahi, ko e kemí ko ha feituʻu ia ʻo e siva ʻa e ʻamanakí. Kae kehe, ʻoku maʻu ʻe he niʻihi kehe ʻa e ʻamanaki.

ʻOku ʻi he lotolotonga ʻo e kau kumi hūfangá ha Kau Fakamoʻoni ʻa Sihova, ʻa ia ʻoku nau talaki faivelenga ʻa e ongoongo lelei ʻo e Puleʻangá. Ko ha konga kinautolu ʻo ha kiʻi fakatahaʻanga ʻi Lodwar, ʻoku kilomita ʻe 120 ki he tongá. Ko e fakatahaʻanga hokó ʻoku houa ʻe valu ʻa e lele ki aí.

Koeʻuhi ko e ʻikai lava ke fononga tauʻatāina holo ʻa e kau kumi hūfangá ʻi he tuʻa kemí, ʻoku ʻikai malava ai ʻa e tokolahi ke maʻu ʻa e ngaahi ʻasemipilī mo e ngaahi fakataha-lahi ʻoku fai ʻe he Kau Fakamoʻoni ʻa Sihová. ʻI he ʻuhinga ko ení, naʻe fai ai ʻa e ngaahi fokotuʻutuʻu ke fai ha ʻaho ʻasemipilī makehe ʻi he loto kemí.

Fononga ki he Tokelaú

Ke poupouʻi ʻa e ʻasemipilií, naʻe pole ai ha Kau Fakamoʻoni ʻe toko 15 ʻi he kolo ko Eldoret, ʻoku kilomita ʻe 480 ki he fakatonga ʻo e kemí, ke nau fai ha fononga faingataʻa ʻaupito ki he tokelau pakukaá, fakataha mo ha tokotaha ako Tohi Tapu ʻa ia naʻá ne fakafaingamālieʻi ke ngāueʻaki ʻa ʻene kiʻi pasí fakataha mo e fakaʻulí. Ko ʻenau holi fakamātoató ke fakalotolahiʻi mo fakaivimālohiʻi ʻa honau fanga tokouá.

Naʻe kamata pongipongia ʻa e fonongá ʻi ha pongipongi momoko ʻi he feituʻu moʻungaʻia fakahihifo ʻo Keniaá. Naʻe hake ʻa e hala tokakoví ʻo fou ʻi he feituʻu faama mo e ngaahi vaotā ki muʻa ke hifo ki he vela ʻo e vao he toafá. Naʻe kaikai ʻa e ngaahi tākanga kosi mo e kāmeli ʻi he kelekele kakaá. Naʻe luelue hake ʻa e kau tangata ʻi he matakalí ʻi honau ngaahi vala fakafonuá, ʻo toʻo ʻe he tokolahi ʻa e ngaahi pōvai, kaufana pea mo e ngahau. Hili ʻa e fononga feʻunga mo e houa ʻe 11, naʻe aʻu ai ʻa e Kau Fakamoʻoní ki Lodwar, ko ha feituʻu vela mo efua ʻoku ʻi ai ʻa e kakai ofi ki he toko 20,000. Hili hono talitali lelei māfana ʻe honau kau talitali Fakamoʻoní, naʻe ʻalu ʻa e kau fonongá ʻo mālōlō koeʻuhí ke nau mateuteu ki ha fakaʻosinga uike kakato ʻo e ngāué.

ʻI he pongipongi hokó, naʻe ʻalu ai ʻa e kau ʻaʻahí ʻo sio ʻi he niʻihi ʻo e ngaahi mātanga ʻo e feituʻú. Ko e Anovai Turkana, ʻa e anovai lahi taha ʻi Keniaá, naʻe fika ʻuluaki ia ki he mamatá. ʻI hono ʻā takaiʻi ʻe he laui kilomita ʻo e vao toafá, ko e nofoʻanga ia ʻo e fanga kalokataile lalahi taha ʻi he māmaní. Ko e vai ʻalakalaí ʻoku tokoni ia ki hono tauhi ʻa e kiʻi kakai tokosiʻi ʻa ia ʻoku nofo ʻi hono veʻe vaí. Naʻe fakamoleki fiefia ʻe he kau ʻaʻahí ʻa e efiafí ʻi hono maʻu ʻa e Ako Fakafaifekau Fakateokalatí mo e Fakataha Ngāué fakataha mo e fakatahaʻanga fakalotofonuá. ʻOku nau maʻu ha Fale Fakatahaʻanga fakaʻofoʻofa, naʻe langa ʻi he 2003 fakafou ʻi he polokalama langa ʻa e Kau Fakamoʻoní ki he ngaahi fonua ʻoku fakangatangata ʻenau koloá.

Ko e ʻAho ʻAsemipilī Makehé

Naʻe vaheʻi ʻa e Sāpaté ki he ʻaho ʻasemipilī makehé. Ko e Fakatahaʻanga Lodwar, pea mo e fanga tokoua ʻaʻahí naʻe fakangofua ke nau hū ki he kemí ʻi he 8:00 pongipongi, ko ia naʻe vēkeveke ʻa e Kau Fakamoʻoní ke kamata pongipongia. Naʻe lele ʻa e hala pikopikó ʻo fou atu ʻi he feituʻu kakaá ki he kauʻāfonua Sutaní. Naʻe ʻi ʻolunga ʻi he halá ʻa e ʻotu moʻunga fetungotungaʻi. Naʻe kamata ʻa e fakaʻofoʻofa ʻa e mātangá ʻi he kolo ko Kakuma. Naʻe ʻuha pea ko e hala kelekele ki he kemí naʻe tāfea ia ʻi he ngaahi feituʻu ʻe niʻihi. Ko e lahi taha ʻo e ngaahi ʻapí naʻe piliki ʻumea mo ʻato kapa, pe tapoleni. Ko e ngaahi kulupu ʻo e kau Somalí, Sutaní, ʻItiopeá mo e niʻihi kehé naʻa nau taki taha nofo pē ʻi honau feituʻu. Naʻe talitali loto-māfana ʻa e kau fonongá ʻe he kau kumi hūfangá.

Naʻe fai ʻa e ʻasemipilií ʻi ha senitā fakaako. Ko e ngaahi tā fakatātā ʻi he holisí naʻe fakahaaʻi ai ʻa e ngaahi tuʻunga fakalilifu ʻo e moʻui kumi hūfangá, ka ko e laumālie ʻi he holó ʻi he ʻaho ko iá ko e taha ia ʻo e ʻamanaki. Naʻe fai ʻa e malanga kotoa pē ʻi he faka-Pilitāniá mo e faka-Suahilí. Ko e kau malanga ʻe niʻihi ʻoku nau pōtoʻi fakatouʻosi ʻi he ongo leá naʻe aʻu ʻo nau fakatonulea pē maʻanautolu. Ko ha tokoua kumi hūfanga mei Sutani naʻá ne fai ʻa e malanga kamatá, ko e “Sivisiviʻi Hotau Lotó.” Ko e ngaahi konga kehé naʻe fakahoko ia ʻe he kau mātuʻa ʻaʻahí.

Ko ha tafaʻaki mahuʻinga makehe ʻo e ʻasemipilī kotoa pē ko e papitaisó. ʻI he fakaʻosi ʻo e malanga papitaisó, naʻe sio ʻa e tokotaha kotoa ki he kanititeiti ʻe toko tahá ʻi heʻene tuʻu haké. Ko Gilbert naʻá ne hola mo ʻene tamaí mei honau fonua tupuʻangá lolotonga ʻa e fakaʻauha fakafaʻahinga ʻo e 1994. ʻUluakí, naʻá na ʻamanaki ke maʻu ha maluʻanga ʻi Pulunitī, ka naʻe vave ʻa ʻena ʻiloʻi naʻá na kei ʻi he fakatuʻutāmakí. Naʻe hola ʻa Gilbert ki Sāie, pea mei ai ki Tenisania—ʻo toitoi ʻi he taimi ʻe niʻihi ʻi he vaotaá—pea iku ai ki Keniā. Naʻe fakatōloʻimata ʻa e tokolahi ʻi hono talitali lelei ia ʻe he tokotaha malangá ko ha tokoua ʻi he fakatahaʻangá. ʻI heʻene tuʻu ʻi he ʻao ʻo e kiʻi ʻasemipilī ʻo e kakai ʻe toko 95, naʻe tali ʻa Gilbert ʻaki ha “Ndiyo!” māʻalaʻala mo tuipau—ko e faka-Suahili ia ki he “ʻIo!”—ki he ongo fehuʻi naʻe fai kiate ia ʻe he tokotaha malangá. Ko ia mo e fanga tokoua kehe ʻe niʻihi naʻa nau keli nimaʻi ha kiʻi vai pea faliki ʻaki ʻa e tapoleni naʻe ʻato ʻaki ki muʻa ʻa hono nofoʻanga ʻoʻona ʻi he kemí. ʻI hono fakahāhā ʻene vēkeveke ke papitaisó, naʻá ne fakafonu vai ʻa e kiʻi vaí ʻi he pongipongi pē ko iá, ʻo ne fetuku kane tokotaha pē!

Ko e taha ʻo e ngaahi meʻa mahuʻinga ʻo e konga efiafí ko e fakamatala ki he ngaahi meʻa naʻe hokosia fekauʻaki mo e tuʻunga makehe ʻo e Kau Fakamoʻoni kumi hūfangá. Naʻe fakamatala ha tokoua ʻe taha ki he anga ʻo ʻene fakaofiofi atu ki ha tangata naʻe mālōlō ʻi ha lalo ʻakau.

“Tala mai angé, ʻoku malu ʻi he taimi kotoa pē ke tangutu ʻi ha lalo ʻakau?”

“ʻIo,” ko e tali ia ʻa e tangatá. Peá ne tānaki mai, “Kae ʻikai,ʻoku ʻikai pehē ia ʻi he poʻulí.”

Naʻe lau ange kiate ia ʻe he tokouá ʻa e Maika 4:​3, 4: “Te nau nofo taki taha ʻi hono lolo vaine, pea ʻi hono lolo fiki; ʻo ʻikai mafakahohaʻa kinautolu ʻe ha taha.” “Sio,” ko ʻene fakamatalá ia, “ʻi he māmani foʻou ʻa e ʻOtuá, ʻe malu ai ʻi he taimi kotoa pē.” Naʻe tali ʻe he tangatá ha tokoni ako Tohi Tapu.

Ko ha tuofefine ʻe taha ʻa ia naʻe fononga ki Kakuma naʻá ne toki hokosia ki muí ni ha mate ʻa ha mēmipa fāmili ofi ʻe toko tolu. ʻI he fakamatala ki he fanga tokoua ʻi he kemí, naʻá ne pehē: “Ko ha feituʻu eni ʻoku lahi fau ai ʻa e faingataʻá; neongo ia, kuo nau tauhi ʻo mālohi ʻenau tuí. ʻOku nau nofo ʻi ha feituʻu ʻoku ʻikai ha fiefia, ka ʻoku nau tauhi fiefia kia Sihova. ʻOku nau melino mo e ʻOtuá. Naʻe fakalototoʻaʻi au ke u tauhi ʻa e melinó pea tauhi kia Sihova. ʻOku ʻikai ha meʻa ke u lāunga fekauʻaki mo ia!”

Naʻe ʻosi vave ʻa e ʻaho ʻasemipilií. ʻI he malanga fakaʻosí, naʻe fakahaaʻi ai ʻe he tokotaha malangá naʻe ʻi ai ʻa e kau fakafofonga mei he ngaahi fonua kehekehe ʻe valu. Naʻe pehē ʻe ha taha ʻo e Kau Fakamoʻoni kumi hūfangá ko e ʻasemipilī ko ení ko e fakamoʻoni ia ʻo e fāʻūtaha mo e ʻofa ʻi he lotolotonga ʻo e Kau Fakamoʻoni ʻa Sihová ʻi ha māmani māvahevahe. Ko haʻanautolú ko ha fetokouaʻaki faka-Kalisitiane moʻoni ia.—Sione 13:35.

[Puha/Fakatātā ʻi he peesi 25]

KO E TAMAIKI TANGATA HĒ ʻO SUTANÍ

Talu mei he kamataʻanga ʻo e tau fakalotofonua ʻi Sutani ʻi he 1983, mo hono tuli ʻa e kakai ʻe toko nima miliona mei honau ngaahi ʻapí. Naʻe kau ʻi he tokolahi ko iá ʻa e fānau ʻe toko 26,000 nai, ʻa ia naʻe fakamavaheʻi mei honau ngaahi fāmilí. Naʻe hola ʻa e laui afe ʻo kinautolu ki he ngaahi kemi hūfanga ʻi ʻItiopeá, ʻa ia naʻa nau nofo ai pē ʻo feʻunga mo e taʻu nai ʻe tolu. ʻI hono fakamālohiʻi ke nau toe hikí, naʻa nau fononga lalo ai ʻi ha taʻu ʻo toe foki fou atu ʻi Sutani ki he fakatokelau ʻo Keniaá, ʻi hono fakaʻauha ʻe he kau sōtiá, kau kaihaʻá, ngaahi mahakí, mo e fanga manu kaivaó. Ko e vaeua pē ʻo e fānaú ni naʻe hao ʻi he ngaahi fononga faingataʻa ko ení, ʻo iku ai ʻo nau hoko ko e faʻahinga tefito ia ʻo e kemi Kakuma. Ki he ngaahi kautaha tokoní, naʻa nau hoko ʻo ʻiloa ko e tamaiki tangata hē ʻo Sutaní.

Ko e kemi hūfanga Kakuma ko ha ʻapi fakafonua ia he taimí ni ki he kau kumi hūfanga mei Sutani, Somālia, ʻItiopea mo e ngaahi fonua kehé. ʻI he aʻu atu ki he kemí, ʻoku ʻoange ai ki he tokotaha kumi hūfangá ha naunau tefito ki hono langa ha nofoʻanga mo ha tapoleni ki he ʻató. Tuʻo ua he māhina, ʻoku ʻoange ai ki he tokotaha kumi hūfanga taki taha ʻa e mahoaʻa fakafuofua ki he kilo ʻe ono, piini kilo ʻe taha, mo ha lolo ngaohi kai pea mo e māsima. ʻOku fakatau atu ʻe he kau kumi hūfanga tokolahi honau ʻinasí ke maʻu mai ʻaki ʻa e ngaahi fiemaʻu tefito kehé.

Ko e niʻihi ʻo e tamaiki tangata ko eni naʻe heé kuo nau toe fakataha mo honau ngaahi fāmilí pe toe hiki ʻo nofo ʻi he ngaahi fonua kehe. Kae fakatatau ki he ʻŌfisi Fehikitaki Kumi Hūfangá, “kuo nofo ai pē ʻa e toe laui afe ʻi he kemi hūfanga efua mo langoa ʻi Kakuma, ʻa ia kuo pau ai ke nau kumi fāivavale holo ki ha meʻakai pea fāinga ke lava ʻo maʻu ha ako.”

[Maʻuʻanga]

Courtesy Refugees International

[Mape ʻi he peesi 23]

(Ki he konga tohi kuo fokotuʻú, sio ki he tohi)

KENIĀ

Kemi Kakuma

Anovai Turkana

Lodwar

Eldoret

Nairobi

[Fakatātā ʻi he peesi 23]

Ko e ngaahi tuʻunga ʻo e moʻui ʻi he kemí ʻoku faingataʻa

[Fakatātā ʻi he peesi 23]

ʻOku vahevahe ʻa e vaí ʻi he kemi Kakuma

[Fakatātā ʻi he peesi 23]

Fai ʻe he Kau Fakamoʻoni Keniaá ʻa e fononga faingataʻa ki he tokelaú ke fakalototoʻaʻi honau fanga tokouá

[Fakatātā ʻi he peesi 24]

Ko ha misinale ʻoku fakatonulea ki ha malanga ʻoku fai ʻe ha tāimuʻa makehe fakalotofonua

[Fakatātā ʻi he peesi 24]

Vai papitaiso

[Maʻuʻanga ʻo e Tā ʻi he peesi 23]

Ko hono vahevahe ʻo vaí mo e Kemi Hūfanga Kakuma: Courtesy Refugees International