ʻOkú Ke Mateuteu ke Hao?

“Hu koe mo ho famili kotoa ki he Aake; he ko koe kuo u mamata ki ai ʻi he toʻutangata ni ʻoku tonu [pe māʻoniʻoni] hoʻo fakafeangai kiate au.”​—SENESI 7:1.

 1. Ko e hā ʻa e tokonaki ʻo e haoʻanga naʻe fai ʻe Sihova ʻi he ngaahi ʻaho ʻo Noá?

KO Sihova naʻá ne “ʻomi ʻa e Lōmaki ki he maama ʻo e kau fakaʻotuamate” ʻi he ngaahi ʻaho ʻo Noá, ka naʻá Ne toe tokonaki foki mo ha haoʻanga. (2 Pita 2:5) Naʻe ʻoange ʻe he ʻOtua moʻoní ki he māʻoniʻoni ko Noá ha ngaahi fakahinohino mahino ki he founga ke foʻu ai ha ʻaʻake ki hono haofaki ʻo e moʻuí ʻi ha lōmaki ʻi he kolopé. (Senesi 6:​14-16) Hangē pē ko ia te tau ʻamanekina mei ha sevāniti tōnunga ʻa Sihová, naʻe “fai ʻe Noa; ʻilonga ha meʻa naʻe tuʻutuʻuni kiate ia ʻe he ʻOtua.” ʻIo, “naʻa ne fai ia.” Meimei koeʻuhi ko e talangofua ʻa Noá ʻoku tau moʻui ai he ʻaho ní.​—Senesi 6:​22.

2, 3. (a) Naʻe fēfē ʻa e fakafeangai ʻa e toʻutangata ʻo Noá ki he ngāue ʻa Noá? (e) ʻI he falala ki he hā naʻe hū ai ʻa Noa ki he ʻaʻaké?

² Ko hono foʻu ʻo e ʻaʻaké naʻe ʻikai ko ha ngāue siʻisiʻi ia. Ngalingali ko e kakai tokolahi naʻa nau ofo ʻi he meʻa naʻe fakahoko ʻe Noa mo hono fāmilí. Neongo ia, naʻe ʻikai feʻunga ia ke fakatuipauʻi ai kinautolu ko e fakahaofí ʻe fakatuʻunga ia ʻi haʻanau hū ki he ʻaʻaké. Naʻe faifai pē ʻo ngata ʻa e kātaki ʻa e ʻOtuá ki he māmani fulikivanu ko iá.​—Senesi 6:3; 1 Pita 3:​20.

³ Hili ha ngaahi hongofuluʻi taʻu ʻo e ngāue mālohi ʻa Noa mo hono fāmilí, naʻe tala ʻe Sihova kia Noa: “Hu koe mo ho famili kotoa ki he Aake; he ko koe kuo u mamata ki ai ʻi he toʻutangata ni ʻoku tonu [pe māʻoniʻoni] hoʻo fakafeangai kiate au.” ʻI he tui mo e falala ki he lea ʻa Sihová, naʻe “hu ʻa Noa ki he aake, mo hono ngaahi foha mo hono uaifi mo e ngaahi uaifi ʻo hono ngaahi foha.” Naʻe tāpuni ʻe Sihova ʻa e matapaá koeʻuhi ke maluʻi ʻene kau lotú. ʻI he tō mai ʻa e Lōmakí ki he māmaní, naʻe hoko moʻoni ʻa e ʻaʻaké ko e tokonaki falalaʻanga ia ʻa e ʻOtuá ki ha haoʻanga.​—Senesi 7:​1, 7, 10, 16.

Ngaahi Faitatau ʻi Onopooni ki he ʻAho ʻo Noá

4, 5. (a) Naʻe fakahoa ʻe Sīsū ki he hā ʻa e taimi ʻo ʻene ʻi aí? (e) Ko e hā ʻa e ngaahi faitatau ʻoku ʻi ai ʻi he vahaʻa ʻo e ʻaho ʻo Noá mo hotau taimí?

⁴ “Hange ko e taimi ʻo Noa, ʻe pehe foki ʻa e hoko mai ʻae Fanautama ʻa Tangata.” (Mātiu 24:37) ʻI he ngaahi lea ko ení naʻe fakamahino ai ʻe Sīsū ʻe meimei tatau ʻa e taimi ʻo ʻene ʻi ai taʻehāmaí mo e ngaahi ʻaho ʻo Noá, pea naʻe pehē tofu ia. Tautautefito talu mei he 1919, kuo talaki ai ki he kakai ʻo e puleʻanga kotoa pē ha pōpoaki fakatokanga meimei tatau mo ia naʻe fai ʻe Noá. ʻI hono fakalūkufuá, ko ʻenau tali ki aí kuo meimei hangē pē ia ko ia naʻe fai ʻe he kakai ʻo e ngaahi ʻaho ʻo Noá.

⁵ Fakafou ʻi he Lōmakí, naʻe faimeʻa ai ʻa Sihova ki ha māmani “kuo opeope ʻi he . . . fakamalohi.” (Senesi 6:13) Ko e fakaʻehiʻehi ko ia ʻa Noa mo hono fāmilí mei he kau ʻi he fakamālohi peheé, ka nau hokohoko atu kinautolu ʻi he fai ʻi he melino ʻa e ngāue ko hono foʻu ʻo ha ʻaʻaké, naʻe hā mahino ia ki he kakai kotoa naʻa nau mamata kia kinautolú. ʻOku tau toe sio foki heni ki ha faitatau mo hotau ʻahó ni. ʻOku lava ʻe he kakai loto-moʻoní he taimí ni ke “sio ki he fai kehe kehe ʻa e maʻoniʻoni mo e angahala, ʻa e faikehekehe ʻa e taha ʻoku ngaue ki he ʻOtua mo ia ʻoku ʻikai ke ngaue ki ai.” (Malakai 3:18) Ko e faitotonu, anga-lelei, melino mo e tōtōivi ʻoku fakahāhaaʻi ʻe he Kau Fakamoʻoni ʻa Sihová kuo maongo ia ki he kau mamata mai ko ia ʻoku ʻikai haʻanau tomuʻa fehiʻa maí pea ko e ngaahi ʻulungāanga ko ení ʻoku nau fakafaikehekeheʻi ai ʻa e kakai ʻa e ʻOtuá mei he māmaní fakalūkufua. ʻOku talitekeʻi ʻe he Kau Fakamoʻoní ʻa e founga kotoa ʻo e fakamālohí pea fakaʻatā kinautolu ke ueʻi ʻe he laumālie ʻo e ʻOtuá. Ko e ʻuhinga ia kuo tāpuekina ai kinautolu ʻaki ʻa e melino pea ko e ʻuhinga ia ʻoku nau tuli ai ki ha ʻalunga māʻoniʻoni.​—Aisea 60:17.

6, 7. (a) Ko e hā ʻa e meʻa naʻe taʻemalava ke mahinoʻi ʻe he kakai ʻi he ʻaho ʻo Noá, pea ʻoku fēfē ʻene meimei tatau he ʻahó ni? (e) Ko e hā ʻa e ongo fakatātā ʻoku hā ai ko e Kau Fakamoʻoni ʻa Sihová ʻoku meimei ke fakatokangaʻi ʻoku nau kehe?

⁶ Naʻe taʻemalava ʻa e toʻutangata ʻo Noá ke mahinoʻi naʻe poupouʻi fakaʻotua ʻa Noa pea ko ʻene fai pē ʻana ki he fakahinohino ʻa e ʻOtuá. Ko ia naʻe ʻikai ke nau tokanga fakamātoato kinautolu ki heʻene malangá mo fai ki heʻene pōpoaki fakatokangá. Fēfē ʻa e ʻahó ni? Neongo ʻoku maongo ki he tokolahi ʻa e ngāue mo e tōʻonga ʻa e Kau Fakamoʻoni ʻa Sihová, ko e tokolahi ʻoku ʻikai ke nau tokanga fakamātoato kinautolu ki he ongoongo leleí mo e ngaahi fakatokanga ʻa e Tohi Tapú. Ko e ngaahi kaungāʻapí, kau pule ngāué pe ngaahi kāingá te nau fakahīkihikiʻi nai ʻa e ngaahi ʻulungāanga lelei ʻo e kau Kalisitiane moʻoní ka te nau laulau kinautolu, “Pehē ange mai ʻoku ʻikai ko e Kau Fakamoʻoni ʻa Sihova kinautolu!” Ko e meʻa ʻoku ʻikai fakatokangaʻi ʻe he kau mamata mai ko ení, ko e ʻuhinga ʻoku fakahāhā ai ʻe he Kau Fakamoʻoní ʻa e ngaahi ʻulungāanga hangē ko e ʻofa, melino, anga-lelei, lelei, anga-malū pea mo e mapuleʻi-kitá, he ʻoku tataki kinautolu ʻe he laumālie māʻoniʻoni ʻo e ʻOtuá. (Kaletia 5:​22-25) ʻOku totonu ke hanga ʻe he meʻá ni ʻo ʻai ke toe fakatupu tokanga lahi ange ʻenau pōpoakí.

⁷ Hangē ko e meʻa ko eni naʻe hoko ʻi Lūsiá, naʻe fai ha langa Fale Fakatahaʻanga ʻa e Kau Fakamoʻoni ʻa Sihová. Naʻe tuʻu mai ha tangata ke talanoa mo e taha ʻo e kau ngāué ʻo ne pehē: “He feituʻu ngāue faikehe moʻoni​—ʻikai ha ifi tapaka, ʻikai ha lea kovi pea ʻikai ha taha ʻe konā! Ko ha taha nai koe ʻo e Kau Fakamoʻoni ʻa Sihová?” Naʻe ʻeke ange ʻe he taha ko eni ʻo e kau ngāué, “Kapau te u pehē atu ʻikai, te ke tui mai?” Naʻe tali vave ange ʻe he tangatá, “Mahalo ʻikai.” ʻI ha toe kolo ʻe taha ʻi Lūsia, naʻe maongo lahi ki he pule koló ʻene sio ki he langa ko ia ʻe he Kau Fakamoʻoní honau Fale Fakatahaʻanga foʻoú. Naʻá ne pehē neongo naʻá ne fakakaukau ki muʻa ko e ngaahi kulupu lotu kotoa pē ʻoku nau tatau, ʻi he hili ko eni ʻene vakai ki he taʻesiokita moʻoni naʻe hā mai ʻi he Kau Fakamoʻoni ʻa Sihová, kuo ʻikai ai te ne toe fakakaukau pehē. Ko e fakatātā pē eni ʻe ua ʻoku hā ai ʻa e kehe ʻa e kakai ʻa Sihová mei he faʻahinga ko ia ʻoku ʻikai ke nau piki ki he ngaahi tuʻunga ʻa e Tohi Tapú.

 8. Ko ʻetau hao ʻi he ngataʻanga ʻo e māmani fulikivanu ko ení ʻoku fakatuʻunga ia ʻi he hā?

⁸ Lolotonga ʻa e vahaʻa taimi fakaʻosi ʻo e “maama motuʻa” ko ia naʻe ʻauha ʻi he Lōmakí, naʻe tōnunga ʻa Noa he “malangaʻaki ʻa e maʻoniʻoni.” (2 Pita 2:5) ʻI he ngaahi ʻaho fakaʻosi ko eni ʻo e fokotuʻutuʻu ʻo e ngaahi meʻa lolotongá, ʻoku fakaʻilo atu ai ʻe he kakai ʻa Sihová ʻa e ngaahi tuʻunga māʻoniʻoni ʻa e ʻOtuá pea ʻoku nau talaki ʻa e ongoongo lelei ko ia fekauʻaki mo e malava ke fai ʻa e hao atu ki he māmani foʻoú. (2 Pita 3:​9-13) Hangē pē ko hono fakahaofi ʻo Noa mo hono fāmili manavahē-ʻOtuá ʻi he ʻaʻaké, ko e hao ʻa e tokotaha tāutaha ʻi he ʻaho ní ʻoku fakatuʻunga ia ʻi heʻenau tui mo e feohi mateaki mo e konga fakamāmani ʻo e kautaha fakaeʻuniveesi ʻa Sihová.

Fiemaʻu ʻa e Tui Kae Hao

9, 10. Ko e hā ʻoku mātuʻaki mahuʻinga ai ʻa e tuí kapau ʻoku tau fie hao ʻi he ngataʻanga ʻo e fokotuʻutuʻu ʻo e ngaahi meʻa ʻa Sētané?

⁹ Ko e hā kuo pau ke fai ʻe ha taha ke hao ai ʻi he fakaʻauha ʻoku tuʻunuku mai ki he māmani ko ia ʻoku tokoto ʻi he mafai ʻo Sētané? (1 Sione 5:19) Kuo pau ke ne tomuʻa ʻiloʻi ʻoku ʻi ai ʻa e fiemaʻu ki ha maluʻanga. Pea kuo pau ke ne ngāueʻaki ʻa e maluʻanga peheé. Ko e kakai ʻi he ʻaho ʻo Noá naʻa nau femoʻuekina pē ʻi heʻenau moʻui fakaʻahó ʻi heʻenau ngaahi meʻa anga-mahení pea nau sio ai naʻe ʻikai fiemaʻu ha maluʻanga ia mei he fakatamaki naʻe ene ke hokó. Naʻe toe ʻi ai mo e meʻa naʻe ʻikai ke nau maʻu​—ko e tui ki he ʻOtuá.

¹⁰ ʻI he tafaʻaki ʻe tahá, naʻe ʻiloʻi ʻe Noa ia mo hono fāmilí ʻoku nau fiemaʻu ha maluʻanga mo ha haoʻanga. Naʻa nau toe maʻu foki ʻa e tui ki he Hau Fakalevelevá, ʻa Sihova ko e ʻOtuá. “Ka taʻekau ʻa e tui, ʻoku ʻikai momoʻi lava haʻate fakahōifua [ʻa Sihova],” ko e tohi ia ʻa e ʻapositolo ko Paulá, “he ko ia ʻoku ʻunuʻunu ki he ʻOtua, kuo pau ʻoku ne tui ʻoku ʻi ai ia, pea te ne hanga ʻo totongi kiate kinautolu ʻoku kumi hākili kiate ia.” Naʻe toe tānaki mai ʻe Paula: “Ko tui naʻe ngaue ai ʻa Noa, ʻi hono valokia ki ha ngaahi meʻa kuo teʻeki hamai; pea ʻi heʻene manavahe ki ai, naʻa ne faʻu ʻa e Aake moʻo fakamoʻui hono ʻapi: ʻio, ko ia ia naʻa ne fakahalaia ai ʻa mamani, ʻo ne hoko ko e ʻea ki he maʻoniʻoni fakatui.”—Hepelu 11:​6, 7.

11. Ko e hā ʻoku lava ke tau ako mei he anga hono tokonaki ʻe Sihova ha maluʻanga ʻi he ngaahi taimi ki muʻá?

¹¹ Ke hao ʻi he ngataʻanga ʻo e fokotuʻutuʻu fulikivanu ʻo e ngaahi meʻa lolotongá, kuo pau ke tau fai ʻa e meʻa lahi ange ia ʻi he tui pē ʻe fakaʻauhá. Kuo pau ke tau ngāueʻi ʻa e tuí, ʻo ngāue ʻaonga kakato ʻaki ʻa e ngaahi tokonaki ʻa e ʻOtuá ki he haó. Ko e moʻoni, ʻoku fiemaʻu ke tau ngāueʻi ʻa e tui ki he feilaulau huhuʻi ʻa e ʻAlo ʻo e ʻOtuá, ʻa Sīsū Kalaisi. (Sione 3:​16, 36) Kae kehe, ʻoku lelei ke tau manatuʻi ko kinautolu pē naʻa nau ʻi loto moʻoni ʻi he ʻaʻaké naʻe hao ʻi he Lōmakí. Pehē foki, ko e ngaahi kolo-hūfanga ʻi ʻIsileli ʻo e kuonga muʻá naʻa nau tokonaki ʻa e maluʻanga ki he tokotaha fakapō fāinoá ʻo kapau pē te ne tomuʻa hola ki ha kolo pehē pea nofo maʻu ʻi loto ai kae ʻoua kuo pekia ʻa e taulaʻeiki lahí. (Nomipa 35:​11-32) ʻI he mala hono hongofulu naʻe tō ki ʻIsipite ʻi he ʻaho ʻo Mōsesé, naʻe fakapoongi ai ʻa e ʻuluaki fānau ʻa e kau ʻIsipité ka naʻe fakahaofi ʻa e fānau ia ʻa e kau ʻIsilelí. Ko e hā hono ʻuhingá? Naʻe ʻosi fakahinohino ʻe Sihova ia kia Mōsese: “Te nau [kau ʻIsilelí] toʻo ha toto mei ai [lami ʻo e Pāsová], ʻo ʻai ki he ongo pou matapa, mo e ʻakau fakalava ʻo e ngaahi fale ʻoku nau kai ai ia. . . . Pea ʻe ʻikai hu kituʻa hamou toko taha ʻi he matapa ʻo hono fale, ʻo aʻu ki he ʻapongipongi.” (Ekisoto 12:​7, 22) Ko hai ia ha ʻuluaki fānau ʻi he kau ʻIsilelí ʻe fakatoʻotoʻa ke taʻetokanga ki ha fakahinohino fakaʻotua pehē ʻaki ʻene hū ki tuʻa mei ha fale kuo vali ʻaki ha toto hono ongo pou matapaá mo e ʻakau fakalavá?

12. Ko e hā ʻa e fehuʻi ʻoku totonu ke tau taki taha ʻeke hifo kia kitautolu, pea ko e hā hono ʻuhingá?

¹² Ko ia ai ʻoku tau maʻu ʻa e ʻuhinga ke fakakaukau lelei ai fekauʻaki mo hotau tuʻunga fakafoʻituituí. ʻOku tau ʻi loto moʻoni ʻi he fokotuʻutuʻu ʻa Sihova ki he maluʻanga fakalaumālié? ʻI he tō mai ʻa e fuʻu mamahi lahí, ko e loʻimata pē ʻo e fiefia mo e fakafetaʻi ʻe tō mei he ngaahi fofonga ko ia ʻo kinautolu kuo nau kumi ki he maluʻanga peheé. Ki he niʻihi kehé, ko e loʻimata pē ʻo e mamahi mo e fakaʻiseʻisa.

Teuʻi Kitautolu ʻe he Ngaahi Fengaʻunuʻaki Fakalakalaka

13. (a) Ko e hā ʻa e taumuʻa kuo fakahoko ʻe he ngaahi fengaʻunuʻaki fakaekautahá? (e) Fakamatalaʻi angé ha ngaahi fakalelei fakalakalaka ʻe niʻihi.

¹³ Kuo ʻomi fakalakalaka ʻe Sihova ʻa e ngaahi fengaʻunuʻaki ʻi he konga fakaemāmani ʻo ʻene kautahá. Kuo hoko eni ʻo ne ʻai ke fakaʻofoʻofa, tuʻumaʻu mo mālohi ʻene fokotuʻutuʻu ki heʻetau maluʻanga fakalaumālié. Mei he 1870 tupú ki he 1932, ko e kau mātuʻá mo e kau tīkoní naʻe fili kinautolu ʻi hono palotiʻi ʻe he kau mēmipa ʻo e fakatahaʻangá. ʻI he 1932 ko e kau mātuʻa ne filí naʻe fetongi kinautolu ʻaki ha kōmiti ngāue kuo fili ʻe he fakatahaʻangá ke tokoni ki ha talēkita ngāue kuo fili. Lolotonga ʻa e 1938, naʻe fai ʻa e ngaahi fokotuʻutuʻu ki hono fakanofo fakateokalati ʻo e kau sevāniti kotoa ʻi he fakatahaʻangá. ʻI he malumalu ʻo e tataki ʻa e Kulupu Pule ʻo e Kau Fakamoʻoni ʻa Sihová, talu mei he 1972, kuo fai ʻa e ngaahi fakaongoongolelei pea kapau ʻe tali ʻoku maʻu ai ʻe he ngaahi fakatahaʻangá ʻa e ngaahi tohi ʻo hono fakanofo fakateokalati ʻo e kau ʻovasia mo e kau sevāniti fakafaifekaú. ʻI he faai mai ʻa e ngaahi taʻú, ko e ngafa kuo fakahoko ʻe he Kulupu Pulé kuo ʻalu ʻo lahi ange pea kuo fai ai ʻa e ngaahi liliu ke fakafaingofua ange ai ʻene ngāué.

14. Ko e hā ʻa e polokalama ako naʻe kamata ʻi he 1959?

¹⁴ ʻI he 1950, naʻe fai ai hono fakakaukauʻi fakalelei ʻo e Sāme 45:16 ʻo taki atu ai ki ha polokalama ako hokohoko. ʻOku pehē ʻe he potutohí: “ʻE fetongi hoʻo ngaahi tamai ʻe ho ngaahi foha, te ke fakanofo kinautolu ko e houʻeiki ʻi he ngaahi feituʻu kotoa.” Ko e kau mātuʻa ko ia ʻoku nau takimuʻa he taimí ni ʻi he ngaahi fakatahaʻangá ʻoku fai honau akoʻi ki he ngaahi fatongia fakateokalati ʻi he lolotongá ni mo e hili ʻa ʻĀmaketoné. (Fakahā 16:​14, 16) Ko e Akoʻanga Ngāue Fakafaifekau ʻo e Puleʻangá naʻe kamata ia ʻi he 1959. ʻI he taimi ko iá, naʻe fai ai ha ako māhina ʻe taha ʻo tokonaki ai ʻa e fakahinohino tautefito ki he kau sevāniti ʻo e fakatahaʻangá, ʻa ia ko hono ui ia ʻo e kau ʻovasia tauhi ʻi he taimi ko iá. Ko e akoʻanga ko ení kuo fakalahi ia he taimí ni ke ʻoatu ai ha fakahinohino ki he kau ʻovasia mo e kau sevāniti fakafaifekau kotoa pē. ʻOku hoko atu leva ai ʻa e fanga tokoua ko ení ʻo takimuʻa ʻi hono akoʻi fakatāutaha ʻa e Kau Fakamoʻoni ʻa Sihova ʻi honau taki taha fakatahaʻanga. ʻI heʻene peheé, ʻoku poupouʻi fakalaumālie ai ʻa e tokotaha kotoa mo tokoniʻi ke fakautuutu ʻenau ola lelei ʻi heʻenau ngāue fakafaifekaú ʻi he tuʻunga ko e kau talaki ʻo e ongoongo lelei ʻo e Puleʻangá.​—Maake 13:10.

15. Ko e hā ʻa e founga ʻe ua ʻoku tauhi ai ʻa e fakatahaʻangá ke maʻá?

¹⁵ Ko e faʻahinga tāutaha ko ia ʻoku nau loto ke hoko ko e konga ʻo e fakatahaʻanga Kalisitiané kuo pau ke nau aʻusia ʻa e ngaahi fiemaʻu pau. ʻE ʻuhinga lelei leva ai ke taʻofi ʻi tuʻa ʻa e kau manuki ko ia ʻi onopōní, ʻo hangē pē ko e faʻahinga pehē naʻe ʻikai ʻilo hanau potu ʻi loto ʻi he ʻaʻake ʻo Noá. (2 Pita 3:​3-7) Tautautefito talu mei he 1952, kuo fai ai ʻe he Kau Fakamoʻoni ʻa Sihová ha poupou fakautuutu ange ki ha fokotuʻutuʻu ʻoku tokoni ke maluʻi ʻa e fakatahaʻangá, ʻa ia ko hono tuʻusi atu ʻa e kau angahala taʻefakatomalá. Ko e moʻoni, ko e kau faihala ʻoku fakatomala moʻoní ʻoku tokoniʻi anga-ʻofa kinautolu ke ‘tofaʻaki honau topuvaʻé ha ngaahi ʻalunga totonu.’​—Hepelu 12:​12, 13; Palovepi 28:13; Kaletia 6:1.

16. ʻOku fēfē ʻa e tuʻunga fakalaumālie ʻo e kakai ʻa Sihová?

¹⁶ Ko e tuʻunga lakalakaimonū fakalaumālie ʻa e kakai ʻa Sihová ʻoku ʻikai ko ha meʻa fakaʻohovale ia pe ko ha meʻa hokonoa. Fakafou ʻi he palōfita ko ʻAiseá, naʻe pehē ʻe Sihova: “Vakai ko ʻeku kau sevaniti te nau kai, kae honge ʻa kimoutolu: vakai ko ʻeku kau sevaniti ʻe inu, kae fieinua kimoutolu: vakai ko ʻeku kau sevaniti te nau fiefia, ka ko kimoutolu ʻe ma: vakai ko ʻeku kau sevaniti te nau mavava ʻi he fiefia honau loto, ka ko kimoutolu te mou tangi ko e mamahi homou loto, pea te mou ʻoiaue ʻi he fasi homou laumalie.” (Aisea 65:​13, 14) ʻOku hokohoko atu ʻa Sihova ke tokonaki mai ʻa e tokonaki lahi ʻaupito ʻo e meʻakai fakatupu moʻui lelei fakalaumālie taimi totonu ʻokú ne tauhi kitautolu ke mālohi fakalaumālie.​—Mātiu 24:45.

Mateuteu ke Hao

17. Ko e hā te ne tokoniʻi kitautolu ke mateuteu ke haó?

¹⁷ ʻOku ʻikai mo ha toe taimi ka ko e taimí pē eni “ke tau fetokangaʻaki, ke fefakaʻaiʻaiʻaki ʻa kitautolu ki he feʻofaʻaki mo e ngaue lelei: ʻo ʻoua naʻa tau liʻaki ʻetau ngaahi fakataha, ʻo hange ko e anga ʻo e niʻihi; ka mou feenginakiʻaki.” (Hepelu 10:​23-25) Ko ʻetau pipiki ofi pea nofoʻaki longomoʻui ʻi he taha ʻo e ngaahi fakatahaʻanga laka hake he 98,000 ʻo e Kau Fakamoʻoni ʻa Sihová ʻe tokoniʻi ai kitautolu ke tau mateuteu ke hao. Te tau maʻu ai ʻa e poupou ʻo e kaungātuí ʻi heʻetau feinga ko ia ke fakahāhā ʻa e “tangata foʻou” pea tau kīvoi ʻaufuatō ʻi he tokoniʻi ʻa e niʻihi kehé ke ako fekauʻaki mo e tokonaki ʻa Sihova ki he fakamoʻuí.​—Efeso 4:​22-​24; Kolose 3:​9, 10; 1 Timote 4:​16.

18. Ko e hā ʻokú ke fakapapau ai ke piki ofi ki he fakatahaʻanga Kalisitiané?

¹⁸ Ko Sētane mo hono māmani koví ʻokú na holi vēkeveke ke tohoakiʻi mamaʻo kitautolu mei he fakatahaʻanga Kalisitiané. Kae kehe, ʻe lava ke tau kei nofo maʻu ko ha konga ʻo ia pea lava ʻo hao ʻi he ngataʻanga ʻo e fokotuʻutuʻu fulikivanu ʻo e ngaahi meʻa lolotongá. ʻOfa ke hanga ʻe he ʻofa kia Sihova mo e houngaʻia ki heʻene ngaahi tokonaki anga-ʻofá ʻo ueʻi kitautolu ke tau toe fakapapau ʻo laka ange ʻi ha toe taimi ke taʻofi ʻa e ngaahi feinga ʻa Sētané. Ko e fakalaulauloto ki hotau ngaahi tāpuaki ʻi onopōní te ne ʻai ke mālohi ai ʻetau fakapapaú. Ko e niʻihi ʻo e ngaahi tāpuaki ko ení te tau lāulea ki ai ʻi he kupu hono hokó.

Ko e Hā Hoʻo Talí?

• ʻOku anga-fēfē ʻa e faitatau hotau taimí mo e ʻaho ʻo Noá?

• Ko e hā ʻa e anga ʻoku mātuʻaki mahuʻinga ki he haó?

• Ko e hā ʻa e ngaahi fengaʻunuʻaki fakalakalaka kuó ne fakamālohiʻi ʻa e fokotuʻutuʻu ʻa Sihova ki heʻetau malú?

• ʻE lava fēfē ke tau mateuteu fakafoʻituitui ke hao?

[Fakatātā ʻi he peesi 22]

Ko e toʻumeʻa ʻo Noá naʻe ʻikai ke nau tokanga fakamātoato kia Noa

[Fakatātā ʻi he peesi 23]

ʻOku ʻaonga ke tokanga fakamātoato ki he ngaahi pōpoaki fakatokanga ʻa e ʻOtuá

[Fakatātā ʻi he peesi 24]

Ko e hā ʻa e taumuʻa ʻoku fakahoko ʻe he Akoʻanga Ngāue Fakafaifekau ʻo e Puleʻangá?

[Fakatātā ʻi he peesi 25]

Ko e taimi eni ke piki ofi ai ki he fakatahaʻanga Kalisitiané