Ngaahi Fehuʻi mei he Kau Lautohí

Ko e hā ʻa e silaʻi ʻoku lave ki ai ʻi he Fakahā 7:3?

ʻOku pehē ʻi he Fakahā 7:​1-3: “Naʻa ku vakai ha ʻangelo ʻe toko fa, naʻa nau ʻalu ʻo tuʻu ʻi he tuliki ʻe fa ʻo mamani, ʻo nau puke ʻa e matangi ʻe fa ʻo mamani, ke ʻoua naʻa angi ha matangi ki he fonua, pē ki he tahi, pē ki he ʻakau. Pea naʻa ku vakai ʻa e ʻangelo ʻe taha ʻoku ne ʻalu hake mei he hopoʻanga laʻā, ʻoku ʻiate ia ʻa e sila ʻa e ʻOtua Moʻui: pea naʻa ne kalanga leʻo lahi ki he ʻangelo ʻe toko fa, ʻa ia kuo tuku kiate kinautolu ke maumauʻi ʻa e fonua mo e tahi, ʻo ne pehē, ʻOtua te mou momoʻi maumauʻi ʻa e fonua, pē ko e tahi, pē ko e ngaahi ʻakau, kaeʻoua ke ʻosi ʻemau silaʻi ʻa e kau tamaioʻeiki ʻa hotau ʻOtua ʻi honau laʻe.”

ʻI he taimi ʻe tukuange mai ai ʻa e “matangi ʻe fa,” ʻe hoko ai ʻa e “mamahi lahi,” ko e fakaʻauha ʻa e lotu loí mo e toenga ʻo e māmani fulikivanu ko ení. (Fakahā 7:14) Ko e “kau tamaioʻeiki ʻa hotau ʻOtua” ko e fanga tokoua pani kinautolu ʻo Kalaisi ʻi he māmaní. (1 Pita 2:​9, 16) Ko ia ai, ko e kikité ni ʻoku fakahaaʻi ai ko hono silaʻi ʻo e fanga tokoua ʻo Kalaisí ʻe ʻosi fakakakato ia ʻi he taimi ʻe hoko ai ʻa e mamahi lahí. Kae kehe, ko e ngaahi veesi Tohi Tapu kehé ʻoku fakahaaʻi ai ʻoku ʻi ai ha muʻaki silaʻi ʻo e kau paní. Ko ia ai, ʻoku tau lau ʻi he taimi ʻe niʻihi fekauʻaki mo ha muʻaki silaʻi pea mo ha silaʻi fakaʻosi. Ko e hā ʻa e faikehekehe ʻi he ongo silaʻi ko ení?

Tau fakakaukau angé ki he ʻuhinga ʻo e foʻi lea “silaʻi.” ʻI he kuonga muʻá, ko e silá ko ha meʻangāue ia naʻe ngāueʻaki ke sitapaʻi ʻaki ha pepa fakamoʻoni. ʻOku toe lava ke ʻuhinga ʻa e foʻi leá ki he sitapá tonu. ʻI he ngaahi ʻaho ko iá, naʻe anga-maheni ʻaki hono sitapaʻi ha sila ki ha pepa pe ko ha ngaahi meʻa kehe ke fakahaaʻi ʻaki ʻoku alafalalaʻanga pe fakahaaʻi ai ʻa e tokotaha ʻoku ʻaʻaná.—1 Tuʻi 21:8; Siope 14:17.

Naʻe fakahoa ʻe Paula ʻa e laumālie māʻoniʻoní ki ha sila ʻi heʻene pehē: “Ko ia ʻoku ne vilitaki ai pe ʻa kimautolu mo kimoutolu ke tāu taha mo ʻene Pani, pea ne pani foki kitautolu, ko e ʻOtua ia: ʻa ia foki naʻa ne silaʻi kitautolu, pea ne ʻomi ʻa e meʻa fakaʻamanaki, ko e Laumalie ʻi hotau loto.” (Fakaʻītali ʻamautolu; 2 Kolinito 1:​21, 22) Ko ia ai, ʻoku pani ʻe Sihova ʻa e kau Kalisitiane ko ení ʻaki hono laumālie māʻoniʻoní ke fakahaaʻi ʻoku ʻaʻana kinautolu.

Kae kehe, ʻoku ʻi ai ʻa e ongo tafaʻaki ʻe ua ʻi hono silaʻi ʻo e kau paní. Ko e muʻaki silaʻí ʻoku kehe ia mei he silaʻi fakaʻosí (1) ʻi he taumuʻá pea (2) ʻi he taimí. Ko e silaʻí ʻi he muʻaki ʻuhingá ko hono fili ha mēmipa foʻou ʻa ia ʻoku tānaki atu ki he tokolahi ʻo e kau Kalisitiane paní. Ko e silaʻi ʻi he ʻuhinga fakaʻosí ʻoku hoko ʻo fakapapauʻi ai ko e tokotaha ko eni kuo fili mo silaʻí kuó ne fakahāhā kakato ʻa ʻene mateakí. Ko e toki taimi pē ʻo e silaʻi fakaʻosí, ʻe fokotuʻu maʻu ai ʻa e silá ‘ʻi he laʻe’ ʻo e tokotaha paní, ʻo fakaʻilongaʻi papau ai ia ko ha “tamaioʻeiki ʻa hotau ʻOtua” kuo ʻosi ʻahiʻahiʻi mo faitōnuga. Ko e silaʻi ʻoku lave ki ai ʻi he Fakahā vahe 7 ʻoku ʻuhinga iá ki he tafaʻaki fakaʻosi ʻo e silaʻi ko ení.—Fakahā 7:3.

ʻI he fekauʻaki mo e taimi ʻo e muʻaki silaʻí, naʻe tohi ʻa e ʻapositolo ko Paulá ki he kau Kalisitiane paní: “Naʻa mou falala foki ki ai, ʻi hoʻomou fanongo ki he tala ʻo e moʻoni, ko e kosipeli ʻo homou fakamoʻui; pea ʻi hoʻomou tui foki naʻe fai ʻiate ia homou silaʻi ʻaki ʻa e Laumalie naʻe talaʻofa, ʻa e Laumalie Maʻoniʻoni.” (Fakaʻītali ʻamautolu; Efeso 1:​13, 14) ʻI he ngaahi tuʻunga lahi, ʻoku fakahaaʻi ʻi he lēkooti he Tohi Tapú ko e kau Kalisitiane ʻi he ʻuluaki senitulí naʻe silaʻi moʻoni kinautolu ʻi he taimi nounou hili ʻenau fanongo ki he ongoongo leleí pea nau hoko ko e kau tui kia Kalaisí. (Ngāue 8:​15-​17; 10:44) Ko e silaʻi ko iá naʻe fakahāhā ai ʻa e hōifua kia kinautolu ʻa e ʻOtuá. Kae kehe, naʻe ʻikai fakahaaʻi ai ʻa e hōifua fakaʻosi ʻa e ʻOtuá. Ko e hā hono ʻuhingá?

Naʻe fakahaaʻi ʻe Paula ko e kau Kalisitiane paní ʻoku ‘silaʻi kinautolu ki he ʻaho huhuʻí.’ (Efeso 4:30) ʻOku fakahaaʻi heni ʻa e vahaʻa taimi, ko e ngaahi taʻu lahi ʻoku faʻa hoko hili ʻa e muʻaki silaʻí. Ko e faʻahinga paní ʻoku fiemaʻu ke nau faitōnunga ai pē mei he ʻaho ʻo honau silaʻi ʻaki ʻa e laumālie māʻoniʻoní kae ʻoua ke aʻu ki he ‘ʻaho honau huhuʻi’ mei honau ngaahi sino fakakakanó—ʻa ia ko ʻenau maté. (Loma 8:​23; Filipai 1:​23; 2 Pita 1:​10) Ko ia ai, ko e toki ngataʻanga tonu ʻo e moʻui ʻa Paulá naʻe lava ai ke ne pehē: “Kuo u lavaʻi ʻa e fakapuepue, kuo u tauhi mai ʻa e tui totonu. Hili ʻeni kuo tuku tauhi maʻaku ʻa e pale ʻo e maʻoniʻoni.” (2 Timote 4:​6-8) ʻIkai ngata aí, naʻe pehē ʻe Sīsū ki ha fakatahaʻanga ʻo e kau Kalisitiane paní: “Pikitai kiate au, ʻo aʻu ki he mate, pea te u ʻatu kiate koe ʻa e kalauni ʻo e moʻui.”—Fakahā 2:10; 17:14.

Ko e foʻi lea “kalauni” ʻoku ʻomai ai ʻa e toe fakamoʻoni lahi ange ʻoku ʻi ai ʻa e vahaʻa taimi ʻi he muʻaki silaʻí mo e silaʻi fakaʻosí. Ko e hā hono ʻuhingá? ʻI he kuonga muʻá, naʻe tōʻongaʻaki ai hono ʻave ha kalauni ki he tokotaha lele naʻá ne ikuna ha lova. Ke maʻu ʻa e kalauní, naʻe pau ke ne fai ʻa e meʻa lahi ange ʻi he hū pē ʻo kau ʻi he lová. Naʻe pau ke ne lele ke aʻu ki he tepí. ʻI he tuʻunga meimei tatau, ko e toki taimi pē ʻe kītaki ai ʻa e kau Kalisitiane paní ʻo aʻu ki he ngataʻanga ʻo ʻenau lová—mei he muʻaki silaʻí ki he silaʻi fakaʻosí—ʻe toki fakakalauni ʻaki ai kinautolu ʻa e moʻui taʻefaʻamate ʻi hēvaní.—Mātiu 10:22; Semisi 1:​12.

Ko fē ʻa e taimi ʻe maʻu ai ʻe he toenga ʻo e kau Kalisitiane pani kuo muʻaki silaʻí ʻa honau silaʻi fakaʻosí? Ko ha niʻihi pē ʻe kei moʻui ʻi he māmaní ʻe silaʻi “honau laʻe” ki muʻa ʻi he hoko ʻa e mamahi lahí. ʻI he taimi ʻe tukuange mai ai ʻa e matangi ʻe fā ʻo e mamahi lahí, ko e kau ʻIsileli fakalaumālié kotoa ʻe ʻosi silaʻi fakaʻosi kinautolu ia, neongo ʻe kei moʻui pē ha tokosiʻi ʻi he kakanó pea kuo pau ke nau fakaʻosi honau ʻalunga ʻi he māmaní.