ʻE Lava Ke Ke Matuʻuaki ʻa e Afaá

ʻI HE ngaahi taimi faingataʻa ko ení, ʻoku kātekina ai ʻe he tokolahi ʻa e ngaahi faingataʻa hangē ha afaá. Ka ki he kau Kalisitiané, ko e ʻofa ki he ʻOtuá mo e mateaki ki heʻene ngaahi tefitoʻi moʻoní ʻoku tokoniʻi ai kinautolu ke nau fekuki mo ia. ʻO anga-fēfē? Ko e talí ʻe lava ke maʻu ia ʻi ha talanoa fakatātā naʻe fai ʻe Sīsū Kalaisi. Naʻá ne fakahoa ʻa ʻene kau ākonga talangofuá ki ha “tangata fakapotopoto, ʻa ia naʻa ne langa hono fale ki he maka.” Naʻe pehē ʻe Sīsū: “Naʻe to ʻa e ʻuha, pea tafe mai ʻa e ngāhi vai, pea angi ʻa e ngāhi matangi, ʻo nau faʻafaʻaki ki he fale ko ia: ka naʻe ʻikai holo, he ne tuʻunga ki he maka.”—Mātiu 7:​24, 25.

Fakatokangaʻi neongo ko e tangata ʻi he talanoa fakatātā ko ení ʻoku fakapotopoto, ʻokú ne kei fehangahangai pē mo e faingataʻá—ʻa ia ʻoku fakafofongaʻi ʻe he ʻuhá, ngaahi vaí mo e ngaahi matangi fakaʻauhá. Ko ia ai, naʻe ʻikai ke fakahaaʻi ia ʻe Sīsū ko ʻene kau ākongá te nau hao mei he faingataʻa kotoa pē pea maʻu ha moʻui melino mo nonga ʻo taʻefakahohaʻasi. (Sāme 34:19; Semisi 4:​13-15) Ka naʻá ne leaʻaki tonu ʻo pehē ko e kau sevāniti faitōnunga ʻa e ʻOtuá ʻe lava ke nau teuteu pea ke nau fekuki mo e ngaahi faingataʻa mo e fakatamaki hangē ha afaá.

Naʻe kamata ʻe Sīsū ʻa e talanoa fakatātaá ʻaki ʻene pehē: “ʻIlonga ʻa ia ʻoku ne fanongo ki he ngāhi tala ni aʻaku, mo ne fai ki ai, te u fakatatau ia ki he tangata fakapotopoto, ʻa ia naʻa ne langa hono fale ki he maka.” Ko e moʻoni, naʻe talanoa ʻa Sīsū ʻo ʻikai fekauʻaki mo hono langa ha ngaahi fale moʻoni, ka ko hono langa hake ʻo e ngaahi moʻui. Ko e faʻahinga ʻoku nau talangofua ki he ngaahi lea ʻa Kalaisí ʻoku nau ngāueʻaki ʻa e ʻiloʻiló pea fakahaaʻi ʻa e fakafuofua leleí. ʻOku nau langa ʻenau ngaahi fakaueʻilotó mo e tōʻongá ʻi he maka fefeka ʻo e ngaahi akonaki ʻa Kalaisí ʻaki hono ngāueʻaki ʻa e ngaahi meʻa kuo akoʻi kia kinautolú. Ko e meʻa fakatupu tokangá, ko e maka fakaefakatātā ko ení ʻoku ʻikai ke maʻu ia ʻi ʻolunga. Ko e tangata ʻi he talanoa fakatātaá naʻe pau ke ne keli ʻo toe “foaʻaki” ke aʻu ki ai. (Luke 6:48) ʻI he tuʻunga meimei tatau, ʻoku hanganaki ngāue mālohi ʻa e kau ākonga ʻa Sīsuú ke fakatupulekina ʻa e ngaahi ʻulungāanga tuʻuloa ʻoku tohoakiʻi ofi ange ai kinautolu ki he ʻOtuá.—Mātiu 5:​5-7; 6:33.

Ko e hā ʻa e meʻa ʻoku hokó ʻi he taimi ʻoku ʻahiʻahiʻi ai ʻe he ngaahi faingataʻa hangē ha afaá ʻa e fefeka ʻo e makatuʻunga faka-Kalisitiane ʻa e kau muimui ʻo Sīsuú? Ko ʻenau talangofua loto-lelei ki he ngaahi akonaki ʻa Kalaisí pea mo honau ngaahi ʻulungāanga faka-Kalisitiané ʻoku fakamoʻoniʻi ai ia ko e ngaahi matavai ʻo e mālohi lolotonga ʻa e ngaahi taimi faingataʻa peheé, pea ko e meʻa mahuʻinga angé ko e lolotonga ʻa e afā ʻoku tuʻunuku vave mai ko ʻĀmaketoné. (Mātiu 5:​10-12; Fakahā 16:​15, 16) ʻIo, ʻi he muimui ki he ngaahi akonaki ʻa Kalaisí, ʻoku matuʻuaki lavameʻa ai ʻe he tokolahi ʻa e ngaahi ʻahiʻahi hangē ha afaá. ʻE lava ke ke fai ʻa e meʻa tatau.—1 Pita 2:​21-23.