Meʻa ʻE Fakahoko ʻe he Haʻu ʻa Kalaisí

“MANAVAHĒ TUʻU ʻI SÃO PAULO.” Ko e anga ia hono fakamatalaʻi ʻe he makasini Veja ʻa e ʻaho ʻe fā ʻi Mē 2006 ʻi he taimi naʻe “fakapatū ai ki lalo” ʻe he kau faihiá ʻa e kolo lahi taha mo tuʻumālie taha ʻo Pelēsilá. Ko e kau ʻōfisa fakahoko lao, kau faihia mo e kau tangataʻifonua ʻe toko 150 nai naʻe mate lolotonga “ʻa e houa laka hake he 100 ʻo e nofo manavaheé.”

Ko e fakamālohí ʻoku hoko ia ko e ngaahi ʻuluʻi ongoongo ʻi he meimei tapa kotoa pē ʻo e māmaní. ʻOku hā ngali ʻoku ʻikai lava ke taʻofi ia ʻe he kau taki fakaetangatá. ʻOku ʻalu pē taimí mo e hoko ʻa hotau foʻi māmaní ko ha feituʻu fakatuʻutāmaki ia ki he nofó. Ngalingali ʻokú ke ongoʻi loto-siʻi koeʻuhi ʻi ha feituʻu pē ʻokú ke sio ki ai ʻoku lahi ʻaupito ʻa e ngaahi ongoongo koví. Kae kehe, ʻoku ofi ʻa e taimi ki ha liliu.

Naʻe akoʻi ʻe Sīsū ʻa hono kau muimuí ke nau lotu ki he Puleʻanga ʻo e ʻOtuá ke hoko mai pea ke fakahoko ʻa e finangalo ʻo e ʻOtuá “hange ko ia ʻi he langi ke pehe foki ʻi māmani.” (Mātiu 6:​9, 10) Ko ha Puleʻanga eni ʻa ia ko Kalaisi Sīsū ʻa hono Tuʻi kuo fakanofo ʻe he ʻOtuá. Te ne solova ʻa e ngaahi palopalema kotoa pē ʻa e faʻahinga ʻo e tangatá. Kae kehe, ke fai mai ʻe he Puleʻanga ʻo e ʻOtuá ha ngaahi liliu ki he māmaní, kuo pau ke ʻi ai ha liliu mei he kau pule fakaetangatá ki he pule ʻa Kalaisí. Ko e meʻa tofu pē eni ʻe fakahoko ʻi he haʻu ʻa Kalaisí.

Ko ha Liliu Melino?

ʻE moʻulaloa nai ʻi he melino ʻa e ngaahi puleʻangá ki he pule ʻa Kalaisí? Naʻe ʻoange ki he ʻapositolo ko Sioné ha vīsone ʻa ia ʻoku ʻomai ai ʻa e talí. ʻOku pehē ʻe Sione: “Pea u vakai ʻa e manu fekai [ko e fokotuʻutuʻu fakapolitikale ʻo e māmaní], mo e ngaahi tuʻi ʻo mamani, mo ʻenau ngaahi matatau, kuo nau fakataha ke fai tau mo ia [Sīsū] ʻoku heka ʻi he hōsi, pea mo ʻene tau aʻana.” (Fakahā 19:19) ʻE fēfē ʻa e ngaahi tuʻi ʻo māmaní ʻi he tau ko ení? Ko e Tuʻi kuo pani ʻa Sihová te ne “laiki kinautolu ʻaki ʻa e sepita ukamea te [ne] haveʻi kinautolu hange ha ipu ʻumea,” ko e lau ia ʻa e Tohi Tapú. (Sāme 2:9) Ko e fokotuʻutuʻu fakapolitikalé ʻe lailai ʻosi. Ko e Puleʻanga ʻo e ʻOtuá “te ne laiki mo fakaʻauha ʻa e ngaahi puleʻanga [fakaetangatá], kae tuʻu pe ia ʻo taʻengata.”—Taniela 2:44.

Fēfē ʻa e kakai ʻoku fakafepaki ki he Puleʻanga ʻo e ʻOtuá? “ʻO ka fakapū mai ʻa e ʻEiki ko Sisu mei he langi ʻi ha uloafi, pea haʻofia ʻe hono lahi ko e kau angelo,” ʻoku fakatātaaʻi ai ʻa Sīsū ko e tokotaha ʻokú ne “fai sauni ki he kau taʻeʻilo ʻOtua, pea ki he kau taʻetalangofua ki he Kosipeli.” (2 Tesalonaika 1:​7, 8) “Ko e kakai kovi,” ko e lau ia ʻa e Palovepi 2:​22, “ʻe tuʻusi mei he fonua, ʻio, ko kinautolu ʻoku fai kākā ʻe taʻaki mei ai.”

ʻI he fekauʻaki mo e haʻu ʻa Kalaisí, ʻoku pehē ʻe he Tohi Tapú: “Vakai, ʻoku ne hoko mai mo e ngaahi ʻao; pea ʻe mamata kiate ia ʻe he mata kotoa pe.” (Fakahā 1:7) ʻE ʻikai ke mamata kiate ia ʻa e kakaí ʻaki honau mata fakamatelié. Talu mei he ʻalu hake ʻa Sīsū ki hēvaní ko ha tokotaha laumālie ia ʻokú ne “ʻafio ʻi he maama taʻefaʻafotuaki; ʻa ia kuo teʻeki ke mātā ʻe ha tangata, pe te ne lava ke sio ki ai.”—1 Timote 6:16.

ʻOku ʻikai fiemaʻu ia ke ʻai ʻe Sīsū ha sino fakaetangata ke “mātā” ai ia ʻe he faʻahinga ʻoku nofo ʻi he māmaní ʻo hangē ko e ʻikai fiemaʻu kia Sihova ke ne hā mai ʻi he taimi naʻá ne ʻomai ai ki he kau ʻIsipité ʻa e Mala ʻe Hongofulú ʻi he ʻaho ʻo Mōsesé. Ko e kakai ʻi he taimi ko iá naʻe ʻikai haʻanau veiveiua ko Sihova naʻá ne fakatupunga ʻa e ngaahi mala ko iá pea naʻe pau ai ke nau ʻiloʻi ʻa hono mālohí. (Ekisoto 12:31) ʻI he founga tatau, ʻi he taimi ʻo e ngāue ʻa Kalaisi ko e Tokotaha Faitautea ʻa e ʻOtuá, ʻe pau ai ke “sio” pe ʻiloʻi ʻe he fulikivanú ʻoku ngāueʻaki ʻe he ʻOtuá ʻa Sīsū ke ne fakamāuʻi kinautolu. Te nau ʻiloʻi eni koeʻuhi ʻe ʻosi fai ha fakatokanga ki muʻa ki he faʻahinga ʻo e tangatá. ʻIo, “ʻe mamata [kia Sīsū] ʻe he mata kotoa pe, . . . pea ʻe lauʻaitu ʻa e ngaahi matakali kotoa pe ʻo mamani koeʻuhi ko ia.”—Fakahā 1:7.

ʻOku fiemaʻu ke fakaʻauha ʻa e fulikivanú mo toʻo ʻa e pule fulikivanú ki muʻa ke fakafoki mai ki he māmaní ʻa e melino mo e lakalakaimonū moʻoní. ʻE fakahoko eni ʻe Kalaisi. Te ne puleʻi kakato leva ʻa e ngaahi meʻa kotoa pē ʻi he māmaní, pea ʻe hoko mai ai ʻa e ngaahi liliu mahuʻinga.

Ko ha Fakafoʻou ʻOku Fakahoko Mai Ai ʻa e Ngaahi ʻAonga

Naʻe lea ʻa e ʻapositolo ko Pitá ʻo kau ki he “Fakafoʻou mai ʻo e meʻa kotoa pe, ʻa e ngaahi taimi kuo folofola ki ai ʻa e ʻEiki ʻi he fofonga o ʻene kau palofita tapu, talu mei muʻa.” (Ngāue 3:21) Ko e fakafoʻou ko ení ʻoku kau ai ʻa e liliu ʻe hoko ʻi he māmaní lolotonga ʻa e pule ʻa Kalaisí. Naʻe kau ʻi he kau palōfita ʻa ia naʻe folofola ai ʻa e ʻOtuá ki he “Fakafoʻou mai ʻo e meʻa kotoa pe” ʻi he māmaní, ʻa e palōfita ko ʻAisea ʻo e senituli hono valu K.M. Naʻá ne tala ki muʻa ko Sīsū Kalaisi ko e “ʻEiki ʻo e Melino,” te ne fakafoki mai ʻa e melinó ki he māmaní. ʻI he fekauʻaki mo e pule ʻa Kalaisí, ʻoku pehē ʻe he kikite ʻa ʻAiseá: “ʻE ʻikai fakangatangata ʻa e tupu o ʻene pule mo e melino.” (Aisea 9:​6, 7 [Ai 9:​5, 6, PM]) ʻE akoʻi ʻe Sīsū ʻa e ngaahi kakai ʻo māmaní ki he moʻui melinó. Ko e faʻahinga ʻoku nau nofoʻi ʻa e māmaní “te nau fefiefiaʻi ʻi he melino lahi.”—Sāme 37:11.

Ko e hā ʻe hoko ki he masivá mo e fiekaiá ʻi he malumalu ʻo e pule ʻa Kalaisí? Naʻe pehē ʻe ʻAisea: “ʻI he moʻunga ko eni ʻe fai ʻe Sihova Sapaoti ki he ngaahi kakai kotoa pe ha katoanga meʻa lolo, ha katoanga uaine kuo fisi, ʻani meʻa lolo kuo loloʻi ʻaki ʻa e ngako ʻo e hui, ʻani uaine kuo fisi, ʻo sivi ke masivi.” (Aisea 25:6) Naʻe hiva ʻa e tokotaha-tohi-sāmé: “E i ai ae falukuga oe uite i he fonua i he tumutumu oe gaahi mouga.” (Sāme 72:​16, PM) ʻIkai ngata aí, ʻi he fekauʻaki mo e faʻahinga ʻoku nofo ʻi he māmaní, ʻoku tau lau: “Te nau langa fale, ʻo nofo ai; pea te nau to ngouevaine, pea kai hono fua. ʻE ʻikai te nau langa, kae nofo ai ha taha kehe; ʻe ʻikai te nau to, kae kai ʻe ha taha kehe: he hange ko e fuoloa ʻo ha ʻakau ʻe pehe ʻa e fuoloa ʻa hoku kakai; pea ko ʻeku fanga pele te nau ʻosiki ʻa e ngaue ʻa honau nima.”—Aisea 65:​21, 22.

Naʻe tala foki ki muʻa ʻe ʻAisea ʻa e ngata ʻa e puké mo e maté. Naʻe folofola ʻa e ʻOtuá fakafou ʻia ʻAisea ʻo pehē: “ʻE toki fakaava ʻa e mata ʻo e kui, pea toʻo ʻa e telinga ʻo e tuli. Toki hopo ʻa e heke hange ha tia, pea hiki mavava ʻa e ʻelelo ʻo e noa.” (Aisea 35:​5, 6) Pea ʻe “ʻikai ha nofo ai te ne pehe, ʻOku ou mahaki.” (Aisea 33:24) Ko e ʻOtuá te ne “folofua ʻa mate ʻo taʻengata; pea ko Atonai Sihova te ne holoholo ʻa e loʻimata mei he mata fuape.”—Aisea 25:8.

Fēfē ʻa e kau mate kotoa pē “ʻi he ngaahi faʻitoka”? (Sione 5:​28, 29) Naʻe kikiteʻi ʻe ʻAisea: “ʻE toe moʻui hoʻo kau pekia: ʻe toetuʻu.” (Aisea 26:19) ʻIo, ko kinautolu ʻoku mohe ʻi he maté ʻe toe fakafoki mai ki he moʻuí!

Ko e “ʻOtua, ko Ho Taloni ʻOku Ne Aʻusia ʻa e Kuonga ʻo Itaniti”

Ko e haʻu ʻa Kalaisí ʻe taki atu ia ki hono fakafoʻou fakaʻaufuli ʻa e foʻi palanite ko Māmaní. ʻE liliu ʻa e māmaní ki ha palataisi lāngilangiʻia, pea ʻe lotu fāʻūtaha ʻa e faʻahinga ʻo e tangatá ki he ʻOtua moʻoní. ʻE lava nai ke tau fakapapauʻi ʻe lavameʻa ʻa Sīsū Kalaisi ʻi hono toʻo ʻa e fulikivanú mei he māmaní pea ʻi hono ʻomai ʻa e ngaahi tuʻunga māʻoniʻoní?

Fakaʻuta atu ki he matavai ʻo e mālohi mo e mafai kuo foaki kia Sīsuú. ʻI he lau fekauʻaki mo e ʻAló, ʻoku pehē ʻe he Tohi Tapú: “[Ko e] ʻOtua, ko ho taloni ʻoku ne aʻusia ʻa e kuonga ʻo itaniti: pea ko e sepita ʻa Faitotonu, ko ha sepita ia ʻo hono puleʻanga. Ne ke manako ki he faitotonu, ka ke fehiʻa ki he maumau lao.” (Hepelu 1:​8, 9) Ko e taloni ʻo Sīsuú, ʻa ia ko hono tuʻungá pe mafaí ʻoku tupu meia Sihova ia. Ko e ʻOtuá ʻa e Tupuʻanga mo e Tokotaha-Foaki ʻo e taloni ko ení. ʻE ʻikai ha palopalema ʻe fuʻu faingataʻa ke fakaleleiʻi ʻe Sīsū.

ʻI he hili ʻa e toetuʻu ʻa Sīsuú naʻá ne tala ange ki heʻene kau ākongá: “Kuo tuku kiate au ʻa e pule kotoa pe ʻi langi pea ki mamani.” (Mātiu 28:18) “Ko e kau angelo mo e kau maʻu tuʻunga mo e kau maʻu malohi kuo tuku ki lalo kiate ia,” ko e lau ia ʻa e 1 Pita 3:22. ʻE ʻikai ha mālohi pe mafai ʻe lavameʻa ʻi hono fakafepakiʻi ʻa Sīsuú. ʻE ʻikai ha meʻa ʻe lava ke ne taʻofi ia mei hono fakahoko mai ʻa e ʻaonga tuʻuloa ki he faʻahinga ʻo e tangatá.

Anga ʻo e Kaunga ki he Kakaí ʻa e Haʻu ʻa Kalaisí

ʻI he tohi ʻa e ʻapositolo ko Paulá ki he kau Tesalonaiká, naʻá ne pehē: “[ʻOku mau] manatu mau ai be ki hoo mou gaue i he tui, moe faa fai i he ofa, moe faa kataki i he amanaki lelei, i ho tau Eiki ko Jisu Kalaisi, i he ao oe Otua koe tau Tamai.” (1 Tesalonaika 1:​3, PM) Naʻe tuku ʻe Paula ʻa e ngāue fua lahí mo e kātakí ki he ʻamanaki kia Sīsū Kalaisí. Ko e ʻamanaki ko iá ʻoku kau ki ai ʻa e tui ki he haʻu ʻa Kalaisí pea ʻi he fakafoʻou ʻe hoko aí. Ko ha ʻamanaki pehē ʻe malava ke ne fakaivimālohiʻi ʻa e kau Kalisitiane moʻoní pe ʻai ke nau kei hokohoko atu neongo ʻa e ngaahi tuʻunga mātuʻaki faingataʻá.

Ko e fakatātaá ko Carlos ʻa ia ʻoku nofo ʻi São Paulo, Pelēsila. ʻI ʻAokosi 2003, naʻe ʻiloʻi ai ʻe Carlos naʻá ne kanisā. Talu mei ai naʻe tuʻo valu hono tafa ia ʻa ia naʻe tupu ai ʻa e ngaahi ola kehe ko e langa mo e vaivai ʻa e sinó. Neongo ia, kuo hokohoko atu ʻene hoko ko e matavai ʻo e fakalototoʻa ki he niʻihi kehé. Hangē ko ení, ʻi he lolotonga ʻene ngāue fakaʻevangeliō ʻi he halá ʻi muʻa ʻi ha falemahaki lahi, naʻá ne fetaulaki ai mo ha toe Fakamoʻoni ʻa Sihova ʻe taha, ʻa ia ko hono husepānití naʻe fai hono faitoʻo kanisā. ʻI heʻene aʻusia tonu ʻa e ngaahi ola taulōfuʻu ʻo e kanisaá, naʻe malava ai ʻe Carlos ke ne fai ha fakalototoʻa mo e fakafiemālie fakatouʻosi ki he husepānití mo e uaifí. ʻI he hili iá, naʻá na pehē naʻe hoko ʻa e talanoa ko ení ko ha fakalotolahi ia kiate kinaua. Naʻe hokosia ai ʻe Carlos ʻa e moʻoni ʻo e ngaahi lea ko eni ʻa Paulá: “[Ko e ʻOtua] oku ne fakafiemalieʻi akimautolu i he e mau mamahi kotoabe, koeuhi ke mau faa fai ai ke fakafiemalieʻi akinautolu oku mamahiia, aki ae fakafiemalie koia aia oku fakafiemalieʻi aki akimautolu e he Otua.”—2 Kolinito 1:​4, PM.

Ko e hā ʻokú ne tokoniʻi ʻa Carlos ke ne maʻu ʻa e ivi ke hokohoko atu ʻene fakalototoʻaʻi ʻa e niʻihi kehé neongo ʻa hono mahakí? Ko e ʻamanaki ki he haʻu ʻa Kalaisí pea mo e meʻa kotoa ʻe fakahoko aí ʻokú ne ueʻi ʻa Carlos ke hokohoko atu ʻene “failelei.”—Kaletia 6:9.

Toe vakai ange foki ki he tuʻunga ʻo Samuel, ʻa ia ko hono tokouá naʻe fakapoongi ʻi he mita pē ʻe 50 mei he ʻapi ʻo ʻena tamaí. Ko e foʻi mahafu ʻe hongofulu naʻe fanaʻi ʻaki ʻa hono tokouá. Naʻe ʻi he ʻaluʻangá ʻa e sino ʻo e pekiá ʻi he houa ʻe valu lolotonga ia hono fakatotoloʻi ʻe he kau polisí ʻa e hiá. ʻOku ʻikai lava ke ngalo ʻia Samuel ʻa e meʻa naʻe hoko ʻi he ʻaho ko iá. Kae kehe, ʻoku tokoniʻi ia ʻe he ʻamanaki ʻe toʻo ʻosi ʻe Kalaisi ʻa e fulikivanu kotoa pē mei he māmaní pea ko e pule māʻoniʻoni ʻe hoko mai aí te ne ʻomai ʻa e ngaahi tāpuaki ki he faʻahinga ʻo e tangatá. ʻOku faʻa sioloto atu ʻa Samuel ki heʻene feʻiloaki mo hono tokoua kuo toetuʻú ʻi ha Palataisi ʻi he māmaní.—Ngāue 24:15.

Ko e Hā Kuo Pau Ke Ke Faí?

ʻE lava ke ke maʻu ʻa e fiemālie lahi ʻi he ʻamanaki ki he haʻu ʻa Kalaisí pea mo e meʻa ʻe fakahoko aí. Ko e moʻoni ʻe fakaleleiʻi ʻe Sīsū Kalaisi ʻa e ngaahi tefitoʻi tupuʻanga kotoa pē ʻo e ngaahi palopalema ʻa e tangatá pea mo e kovi ʻokú ne loki kitautolú.

Ko e hā kuo pau ke ke fai ka ke maʻu ʻa e ngaahi tāpuaki ʻe huaʻi hifo ʻe he pule ʻa Kalaisí ki he faʻahinga ʻo e tangatá? Ako fakamākukanga ʻa e Folofola ʻa e ʻOtuá ko e Tohi Tapú. ʻI ha lotu ʻa Sīsū ki heʻene Tamaí, naʻá ne pehē: “Ko eni ia ʻa e moʻui taʻengata, ke nau fai ke ʻilo koe ko e Otua moʻonia pe taha, pea mo Sisu ne ke fekau mai ko e Misaia.” (Sione 17:3) ʻAi ko hoʻo taumuʻá ia ke ke sivisiviʻi ʻa e meʻa ʻoku akoʻi ʻe he Tohi Tapú. ʻE fiefia ʻa e Kau Fakamoʻoni ʻa Sihova ʻi ho feituʻú ke tokoniʻi koe ʻi he meʻá ni. ʻOku mau fakaafeʻi loto-māfana atu koe ke ke fetuʻutaki kiate kinautolu pe tohi ki he kau faipulusi ʻo e makasini ko ení.

[Fakatātā ʻi he peesi 7]

Ko e haʻu ʻa Kalaisí ʻe taki atu ia ki hono fakafoʻou fakaʻaufuli ʻo e māmaní

[Maʻuʻanga]

Tā ʻi lotó, ʻa mui pē: Rhino and Lion Park, Gauteng, South Africa