Ko e Tui ʻa ha Faʻē ʻOku Ikunaʻi Ai ʻa e Meʻa Fakamamahí

“Kapau ʻoku mou lau ʻa e tohí ni, ʻoku ʻuhinga iá naʻe ʻikai te u moʻui ʻi he hili ʻa e tafá pea ʻoku ʻikai te u kei ʻiate kimoutolu.”

KO E ngaahi lea kamata eni ʻo ha tohi naʻe fai ʻe Carmen, ko ha faʻē Kalisitiane, ki heʻene fānau fefine ʻe toko tolu taʻu 25, 19 mo e 16. Hangē ko ia naʻe hokó, naʻe ʻikai ke lavameʻa ʻa e tafá, pea ko e meʻa fakamamahí he naʻe mate ai ʻa Carmen.

Ko hono liʻaki ʻa e fānau fefine ʻe toko tolu ʻi he ngaahi tuʻunga fakamamahi peheé ʻoku fakalotomamahi moʻoni ia ki ha taha pē. Neongo ia, ko e tui mālohi ʻa e faʻē ko ení kia Sihova mo ʻene ngaahi talaʻofá ʻoku mahino naʻá ne ikunaʻi ai ʻa e meʻa fakamamahí, ʻo ʻoange kiate ia ʻa e nonga naʻe hā mahino ʻi heʻene tohi fakaueʻilotó. Fakatokangaʻi ʻa e meʻa naʻá ne leaʻaki ki heʻene fānau fefiné.

“ʻUluakí, ʻoku ou loto ke tala atu ʻoku ou ʻofa atu kiate kimoutolu ʻaki ʻa e kotoa ʻo hoku lotó. . . . Ko e tamaiki fefine lelei taha kimoutolu ʻoku lava ke maʻu ʻe ha faʻē, pea ʻoku ou mātuʻaki laukauʻaki kimoutolu.

“ʻOku ou kei saiʻia ke hokohoko atu e nofo mo kimoutolú kae ʻoua ke aʻu ki he māmani foʻou kuo talaʻofa mai ʻe he ʻOtuá . . . , ka ʻi he ʻikai ke malavá, kuó u kole kiate ia ke ne tokoniʻi kimoutolu koeʻuhi ke mou lava ʻo faitōnunga, hangē pē ko ia kuo mou ʻi aí. Kuo tau kātekina fakataha ʻa e ngaahi ʻahiʻahi lahi, pea kuo ʻikai ʻaupito liʻaki kitautolu ʻe Sihova. . . . Ko ia hanganaki falala ki he tataki ʻokú ne ʻomai fakafou ʻi heʻene kautahá, pea hokohoko atu ʻa e poupou ki he fakatahaʻangá mo e kau mātuʻá. Malanga ʻi he lahi taha te mou malavá, pea ʻofa ʻi he fanga tokoua kotoa pē.

“Ko ʻetau māvaé ʻe fakataimi pē. . . . ʻOku ou kole fakamolemole atu ʻi he fehālaaki kotoa kuó u fai pea ʻi he taimi kotoa naʻe ʻikai te u mahinoʻi ai kimoutolu pe ʻikai tala atu ai ʻa e lahi ʻo ʻeku ʻofa ʻia kimoutolú. . . . ʻOku ou ʻiloʻi ko kimoutolu taki taha ʻoku ʻi ai hoʻomou ngaahi fiemaʻu. ʻOku ʻafioʻi lelei ange ʻe Sihova ʻa e meʻa ko iá ʻia kimoutolu, pea te ne tokonaki atu ʻa e meʻa kotoa pē ʻoku mou fiemaʻú pea fakapaleʻi kimoutolu ʻi he meʻa kotoa kuo mou kātekiná.

“ʻOua ʻaupito ʻe ngalo hoʻomou taumuʻá—ko e moʻui ʻi he māmani foʻoú​—pea hokohoko atu ʻa e feinga ke maʻu iá. ʻOfa ke tāpuakiʻi mo fakaivia kimoutolu ʻe Sihova koeʻuhi ke mou faitōnunga ʻo aʻu ki he ngataʻangá. . . . ʻOua ʻe loto-mamahi, ʻa siʻeku fānau ʻofeina. ʻOku ou ʻofa atu!”

ʻOku lava ke hoko ʻa e meʻa fakamamahí ki ha taha pē ʻi ha taimi pē. “ʻOku hokonoa ki he faʻahinga kotoa pe ʻa e faingamalie mo e tuʻutamaki,” ko e tohi ia ʻa Tuʻi Solomone ʻo e kuonga muʻá. (Koheleti 9:11) Kae kehe, ko e faʻahinga ʻoku nau maʻu ʻa e tui mālohi ki he ʻOtuá, ʻe lava ke nau maʻu ʻa e fakafiemālie tatau naʻe maʻu ʻe he ʻapositolo ko Paulá, ʻa ia naʻá ne pehē: “ʻOku te tui, ʻe ʻikai lava ʻe he mate, pe ko e moʻui, . . . pe ko ha meʻa ʻe taha ʻi Natula, ʻe ʻikai te ne lava ke motuhi kitautolu mei he ʻofa ʻa e ʻOtua, ʻa ia ʻoku ʻia Kalaisi Sisu ko hotau ʻEiki.”—Loma 8:​38, 39; Hepelu 6:10.