Mamata Pea Toki Tui

“Ko ha ʻakinositika ko ha tangata ia ʻokú ne tui ʻoku taʻemalava ke ʻiloʻi ʻa e foʻi moʻoni ʻi he ngaahi meʻa hangē ko e ʻOtuá mo ha moʻui ʻi he kahaʻú, ʻa ia ʻoku tokanga ki ai ʻa e lotu faka-Kalisitiané mo e ngaahi lotu kehé. Pe, kapau heʻikai ke taʻemalava maʻu pē ia, ka ʻoku taʻemalava ʻi he lolotongá ni.”—FILŌSEFA BERTRAND RUSSELL, 1953.

KO E tangata naʻá ne faʻu ʻa e foʻi lea “ʻakinositika” ko ha faisaienisi ʻo e fanga manú ko hono hingoá ko Thomas Huxley. Naʻe fāʻeleʻi ʻa Huxley ʻi he 1825 pea naʻe toʻutangata mo Charles Darwin pea ko ha tokotaha naʻe poupou ki hono akoʻi ʻa e ʻevalūsiō. ʻI he 1863, naʻe tohi ai ʻe Huxley naʻe ʻikai te ne sio ki ha fakamoʻoni naʻe ʻi ai ha ʻOtua ʻokú ne “ʻofa mo tokanga mai kiate kitautolu ʻo hangē ko ia ʻoku taku ʻe he lotu faka-Kalisitiané.”

Ko e kakai tokolahi he ʻahó ni te nau tui tatau mo e ngaahi fakakaukau ʻa e kau tangata mafai lahi ko iá, ʻo pehē te nau toki tui pē ki he meʻa ʻoku malava ke nau sio ki aí. Te nau pehē nai, ke tui ki ha taha pe ki ha meʻa ʻoku ʻikai ha fakamoʻoni ki ai ko e tui noaʻia moʻoni ia.

ʻOku fiemaʻu nai ʻi he Tohi Tapú ke tau tui noaʻia pē ki he ʻOtuá? ʻIkai ʻaupito. ʻOku fakahaaʻi ʻe he Tohi Tapú ʻoku fakavalevale ke tui ki ha ngaahi meʻa ʻoku taukaveʻi ka ʻoku ʻikai ke poupouʻiʻaki ha fakamoʻoni. “Ko e hehemangofua ʻoku ne tui ki he lea kotoa,” ko e lau ia ʻa e Tohi Tapú, “ka ko e fakapotopoto ʻoku ne fakakaukau ʻene laka.”—Palovepi 14:15.

Fēfē leva ʻa e tui ki he ʻOtuá? ʻOku ʻi ai moʻoni ha faʻahinga fakamoʻoni ʻoku ʻi ai ha ʻOtua, kaeʻumaʻā haʻane ʻofa mo tokanga mai kiate kitautolu?

Hā ʻa e Ngaahi Anga ʻo e ʻOtuá

ʻI he lea ʻa e tokotaha hiki Tohi Tapu ko Paulá ki ha kau poto ʻAtenisi, naʻá ne pehē ai ko e ʻOtuá “naʻá ne ngaohi ʻa māmani mo e meʻa kotoa ʻoku ʻi aí.” Naʻe tala ange ʻe Paula ki he kau tālaʻa naʻe fanongo kiate iá, ʻoku mahuʻingaʻia ʻa e ʻOtuá ʻi he faʻahinga ʻo e tangatá pea ko hono moʻoní, “ʻoku ʻikai te ne mamaʻo mei ha taha ʻiate kitautolu.”—Ngāue 17:24-27, Ko e Taulua.

Ko e hā naʻe tuipau ai ʻa Paula ʻoku ʻi ai ʻa e ʻOtua pea ʻokú ne mahuʻingaʻia mai ʻi he tangata naʻá Ne fakatupú? Naʻe fakahā ʻe Paula ʻa e ʻuhinga ʻe taha ʻi heʻene tohi ki hono kaungā Kalisitiane ʻi he kolo ko Lomá. Fekauʻaki mo e ʻOtuá naʻá ne pehē: “Koe gaahi mea tae ha mai aana, . . . kuo ilogofua ia i hono gaohi o mamani, oku iloʻi ia mei he gaahi mea kuo gaohi.”—Loma 1:20, PM.

Ko e ngaahi peesi hoko maí ʻoku ʻomai ai ʻa e ngaahi ʻulungāanga ʻe tolu ʻo e ʻOtuá ʻa ia ʻoku malava ke hā mahino mai ʻi he ngaahi meʻa naʻá ne fakatupú. ʻI hoʻo vakaiʻi ʻa e ngaahi fakatātā ko ení, ʻeke hifo kiate koe, ‘ʻOku anga-fēfē ʻene kaunga kiate au ʻeku ʻilo ʻa e ngaahi ʻulungāanga ko eni ʻo e ʻOtuá?’

[Fakamatala ʻi he peesi 3]

ʻOku ʻikai fiemaʻu ʻi he Tohi Tapú ke tau tui noaʻia pē ki he ʻOtuá