Te Ke Tauhi Maʻu Hoʻo Anga-Tonú?

“Teu mate be ka e ikai teu tukuage eku agatonu meiate au.”—SIOPE 27:5, PM.

1, 2. Ko e hā ʻa e ngāue langa ʻoku fiemaʻu ke tau kau ki aí, pea ko e hā e ngaahi fehuʻi te tau lāulea ki aí?

FAKAʻUTA atu ʻokú ke sio hifo eni ki he ngaahi palani ʻo ha fale. ʻOkú ke ofo ʻi he lelei ʻo e tisainí. ʻOkú ke fiefia ʻi he fakakaukau atu ki he ngaahi founga ʻa ia ʻe lava ke ʻaonga ai ʻa e falé kiate koe mo ho fāmilí. Ko ia ai, ʻikai te ke loto-tatau ko e ngaahi palani ko iá mo ha fakakaukau pē nai ʻokú ke fai ki ai ʻe taʻeʻaonga kae ʻoua kuó ke langa moʻoni ʻa e falé, ʻo hiki ki ai pea tauhi leva ia?

² ʻI he tuʻunga meimei tatau, te tau fakakaukau nai ko e anga-tonú ko ha ʻulungāanga mātuʻaki mahuʻinga ia ʻa ia ʻe ʻaonga lahi kiate kitautolu mo e faʻahinga ʻoku tau ʻofa aí. Ka ko e fakakaukau lelei ʻo fekauʻaki mo e anga-tonú heʻikai ʻaonga ia kia kitautolu kae ʻoua kuo tau langa hake pea tauhi maʻu ʻa ʻetau anga-tonu faka-Kalisitiané. ʻI he māmani he ʻaho ní, ʻoku faʻa fakamoʻoniʻi ai ʻa e mamafa ʻa e ngaahi ngāue langa fale moʻoní. (Luke 14:28, 29) ʻI he tuʻunga meimei tatau, ko hono langa hake ʻa e anga-tonú ʻoku fakamoleki ki ai ʻa e taimi mo e feinga, neongo ia ʻoku ʻaonga ʻaupito ke fai ʻa e meʻa ko iá. Ko ia te tau lāulea ai heni ki he fehuʻi ʻe tolu: ʻE lava fēfē ke tau hoko ko e kakai anga-tonu? ʻE lava fēfē ke tau tauhi maʻu ʻetau anga-tonu faka-Kalisitiané? Ko e hā ʻe lava ke fai kapau naʻe ʻikai tauhi ʻe ha taha ʻi ha taimi ʻa ʻene anga-tonú?

ʻE Lava Fēfē Ke Tau Hoko ko e Kakai Anga-Tonu?

3, 4. (a) ʻI he ngaahi founga fē ʻoku tokoniʻi ai kitautolu ʻe Sihova ke tau ngāue ke langa hake ʻa e anga-tonú? (e) ʻE lava fēfē ke tau langa hake ʻa e anga-tonú, ʻo hangē ko ia naʻe fakatātaaʻi ʻe Sīsuú?

³ Naʻa tau fakatokangaʻi ʻi he kupu ki muʻá ʻoku fakangeingeiaʻi kitautolu ʻe Sihova ʻaki ʻa e monū ʻo e fili pe te tau hoko ko e kakai anga-tonu. Kae kehe, ko e meʻa fakafiefiá, ʻoku ʻikai te ne tukunoaʻi pē kitautolu ʻi he meʻá ni. ʻOkú ne akoʻi mai ʻa e founga ke tau langa hake ai ʻa e ʻulungāanga mahuʻinga ko ení, pea ʻokú ne foaki loto-lelei mai ʻa hono laumālie māʻoniʻoní, ʻa ia ʻokú ne tokoniʻi kitautolu ke tau ngāueʻaki ʻa ʻene ngaahi akonakí. (Luke 11:13) ʻOku aʻu ʻo ne tokonaki mai ʻa e maluʻanga fakalaumālie ki he faʻahinga ʻoku feinga ke ʻaʻeva ʻi he anga-tonú.—Pal. 2:7.

⁴ Kuo anga-fēfē hono akoʻi kitautolu ʻe Sihova ke hoko ko e kau tauhi anga-tonú? ʻAki ʻene fekau mai ki he māmaní ʻo hiliō he meʻa kotoa, ʻa hono ʻAló, ʻa Sīsū. Naʻe moʻui ʻa Sīsū ʻi ha ʻalunga ʻo e talangofua haohaoa. Naʻá ne “fai talangofua ʻo aʻu ki heʻene mate.” (Fili. 2:8) ʻI he meʻa kotoa pē naʻá ne faí, naʻe talangofua ai ʻa Sīsū ki heʻene Tamai fakahēvaní, naʻa mo e taimi naʻe faingataʻa ʻaupito aí. “Ke ʻoua naʻa fai hoku loto ka ko hoʻou pē,” ko ʻene lea ia kia Sihová. (Luke 22:42) ʻOku lelei kia kitautolu taki taha ke ʻeke hifo kiate kita, ‘ʻOku ou maʻu ha fakakaukau talangofua meimei tatau?’ ʻI he tuli ki ha ʻalunga talangofua fakataha mo e ngaahi fakaueʻiloto totonú, te tau hoko ai ko e kau tauhi anga-tonu. Fakakaukau angé ki ha ngaahi tafaʻaki ʻo e moʻuí ʻa ia ʻoku tautefito ai ʻa e mahuʻinga ʻo e talangofuá.

5, 6. (a) Naʻe anga-fēfē hono fakamamafaʻi ʻe Tēvita ʻa e mahuʻinga ʻo e tauhi anga-tonú ʻo aʻu ki he taimi ʻoku ʻikai sio mai ai kia kitautolu ʻa e niʻihi kehé? (e) Ko e hā ʻa e ngaahi pole ʻoku fehangahangai mo e anga-tonu ʻa e kau Kalisitiane he ʻaho ní ʻi he taimi ʻoku nau toko taha aí?

⁵ ʻOku fiemaʻu ke tau talangofua kia Sihova ʻo aʻu ki he taimi ʻoku tau nofo toko taha nai aí. Naʻe fakahaaʻi ʻe he tokotaha-tohi-saame ko Tēvitá ʻa e mahuʻinga ʻo e anga-tonú ʻi he ngaahi taimi ʻa ia naʻá ne nofo toko taha nai aí. (Lau ʻa e Sāme 101:2, “PM.”) ʻI hono tuʻunga ko e tuʻí, naʻe feohi maʻu ai pē ʻa Tēvita mo e kakaí. ʻOku ʻikai ha veiveiua ne lahi e taimi naʻe siofi ai ia ʻe he kakai ʻe lauingeau naʻa mo e laui afe. (Fakafehoanaki mo e Sāme 26:12.) Ko e tauhi maʻu ʻo e anga-tonú ʻi he ngaahi taimi peheé naʻe mahuʻinga, he naʻe fiemaʻu ke fokotuʻu ʻe he tuʻí ha faʻifaʻitakiʻanga lelei maʻa hono kakaí. (Teu. 17:18, 19) Kae kehe, naʻe ʻiloʻi ʻe Tēvita ko e taimi ko ia naʻá ne nofo toko taha nai aí—‘ʻi hono loto falé’—naʻe kei fiemaʻu pē ke ne ʻaʻeva ʻi he anga-tonú. Fēfē kitautolu?

⁶ ʻI he Sāme 101:3, ʻoku tau maʻu ai ʻa e ngaahi lea ʻa Tēvita: “ʻE ʻikai te u tuku ke feʻao mo au ha meʻa fakalielia.” ʻOku lahi ʻa e ngaahi taimi he ʻahó ni ʻoku lava ke tau sio ai ki he ngaahi meʻa fakalieliá, tautefito ʻi he taimi ʻoku tau nofo toko taha aí. Ko e ngāueʻaki ʻo e ʻInitanetí kuo ʻomai ai ki he tokolahi ha pole ʻi he meʻá ni. ʻOku faingofua ke fakataueleʻi ke sio ʻi he meʻa taʻetaau naʻa mo fakalielia. Ka ko e fai peheé ko ha talangofua ia ki he ʻOtuá ʻa ia naʻá ne fakamānavaʻi ʻa Tēvita ke ne hiki ʻa e ngaahi lea ko iá? Ko e fakatātā fakalieliá ʻoku fakatupu maumau, he ʻokú ne tafunaki ʻa e ngaahi holi fehālaaki mo e havala, maumauʻi ʻa e konisēnisí, veuki ʻa e nofo malí pea tuku hifo ʻa e ngeia ʻo e tokotaha kotoa ʻokú ne ngāueʻakí.—Pal. 4:23; 2 Kol. 6:19 (2Ko 7:1, PM); 1 Tes. 4:3-5.

 7. Ko e hā e tefitoʻi moʻoni ʻe lava ke ne tokoniʻi kitautolu ke tauhi maʻu ai ʻa e anga-tonú ʻi he taimi ʻoku tau nofo toko taha aí?

⁷ Ko e moʻoni, ʻoku ʻikai ha sevāniti ʻa Sihova ʻe faifai ange pea tokotaha ai pē. ʻOku leʻohi anga-ʻofa kitautolu ʻe heʻetau Tamai hēvaní. (Lau ʻa e Sāme 11:4.) He fiefia ē ko Sihova ʻi heʻene sio atu ki hoʻo talitekeʻi ʻa e ʻahiʻahí! ʻI hoʻo fai peheé, ʻokú ke talangofua ai ki he fakatokanga ʻoku hā ʻi he lea ʻa Sīsū ʻoku maʻu ʻi he Mātiu 5:28. ʻI he meʻa kotoa, fakapapauʻi ke ʻoua ʻe sio ʻi he ngaahi ʻata ʻa ia ʻe fakataueleʻi ai koe ke ke faihalá. ʻOua ʻe fetongiʻaki hoʻo anga-tonu mahuʻingá ʻa e tōʻonga fakamā ʻo e sio pe ko hono lau ʻa e meʻa fakalieliá!

8, 9. (a) Ko e hā e pole naʻe fehangahangai mo Taniela mo hono ngaahi kaungāmeʻá ʻi he fekauʻaki mo ʻenau anga-tonú? (e) ʻOku anga-fēfē hono fakafiefiaʻi ʻe he kau talavou Kalisitiane he ʻaho ní ʻa Sihova mo honau kaungā Kalisitiané?

⁸ ʻOku toe lava ke tau hoko ko e kau tauhi anga-tonu ʻi he talangofua kia Sihova ʻi he taimi ʻoku tau ʻi he haʻohaʻonga ai ʻo e kau taʻetuí. Fakakaukau atu kia Taniela mo hono kaungāmeʻa ʻe toko tolú. ʻI honau tuʻunga talavoú, naʻe ʻave pōpula ai kinautolu ki Pāpilone. ʻI hono ʻātakaiʻi ai ʻe he kau taʻetui ʻoku siʻi pe halaʻatā haʻanau ʻilo kia Sihová, naʻe tenge ai ʻa e kau Hepelū ʻe toko faá ke nau kai ʻa e ngaahi meʻakai vovo naʻe tapui ʻi he Lao ʻa e ʻOtuá. Naʻe mei faingofua pē ke fakaʻuhinga ʻa e kau talavou ko iá ʻoku ʻikai hano kovi ka nau ka talangataʻa ki he laó. He ko ē ko ʻenau ngaahi mātuʻá, ko e kau mātuʻá mo e kau taulaʻeikí heʻikai lava ke nau sio mai ki he meʻa ʻoku fai ʻe he toko fā ko kinautolú. Ko hai te ne ʻiló? Ko Sihova tonu. Ko ia ai naʻa nau tuʻu maʻu ʻo talangofua kiate ia neongo ʻa e tengé mo e tuʻunga fakatuʻutāmaki ne nau ʻi aí.—Tan. 1:3-9.

⁹ Takatakai ʻi he māmaní, ʻoku muimui ai ʻa e kau talavou Fakamoʻoni ʻa Sihová ʻi ha ʻalunga meimei tatau, ʻo pīkitai ki he ngaahi tuʻunga ʻa e ʻOtuá ki he kau Kalisitiané pea fakafisi ke tukulolo ki he tenge fakatupu maumau ʻa e toʻumeʻá. ʻI he taimi ʻoku fakafisi ai ʻa kimoutolu kau talavoú ke kau ʻi hono ngāueʻaki ʻo e faitoʻo kona tapú, fakamālohí, kapekapé, ʻulungāanga taʻetāú mo e ngaahi faihala kehé, ʻoku mou talangofua ai kia Sihova. ʻI hoʻomou fai peheé, ʻoku mou tauhi maʻu ai ʻa hoʻomou anga-tonú. ʻOku mou maʻu ʻaonga ai, pea mou fakafiefiaʻi ʻa Sihova mo homou kaungā Kalisitiané!—Sāme 110:3.

10. (a) Ko e hā e ngaahi fakakaukau hala fekauʻaki mo e feʻauakí kuo tataki ai ʻa e kau talavou ʻe niʻihi ke nau fakangaloku ʻenau anga-tonú? (e) ʻOku anga-fēfē hono tataki kitautolu ʻe he anga-tonú ki he meʻa ke tau fai fekauʻaki mo e fakatuʻutāmaki ʻo e feʻauakí?

¹⁰ ʻOku toe fiemaʻu ke tau talangofua ʻi he feangainga mo e ngaahi mēmipa ʻo e fefiné pe tangatá. ʻOku tau ʻiloʻi ʻoku tapui ʻe he Folofola ʻa e ʻOtuá ʻa e feʻauakí. Kae kehe, ʻoku faingofua ke fakaʻatā ha laumālie talangofua ke liliu ki ha laumālie fakangofua tavale. Hangē ko ení, kuo kau ʻa e kau talavou ʻe niʻihi ʻi he fehokotaki fakasino ngutú pe ʻi he halanga tuʻumamaʻó pe ko e fealaʻaki fakalieliá, ʻo nau fakaʻuhinga ko e ngaahi tōʻongá ni ʻoku ʻikai loko kovi ia koeʻuhi ʻoku nau fakakaukau ʻoku ʻikai moʻoni te nau “fai ha fehokotaki fakasino.” ʻOku ngalo ʻi he kau talavou ko iá—pe ʻoku nau fili nai ke tukunoaʻi—ko e foʻi lea Fakatohitapu ki he feʻauakí ʻoku kau ai ʻa e ngaahi tōʻonga kotoa ko iá, ko e tōʻonga hala ʻa ia ʻe lava nai ke tuʻusi ai ha taha.a Kae kehe, ko e toe kovi angé, he ʻoku nau tukunoaʻi ai ʻa e fiemaʻu ke anga-tonú. Koeʻuhi ʻoku tau feinga mālohi ke tauhi maʻu ʻetau anga-tonú, ʻoku ʻikai ke tau kumi kalofanga. ʻOku ʻikai ke tau feinga ke aʻu ki he ofi taha te tau malavá ki he angahalá kae ʻikai tauteaʻi. ʻOku ʻikai ke tau tokangataha ʻataʻatā pē ki he ngaahi ola fakaefakamaau ʻe hoko mai nai ʻi ha faihala. ʻI hono kehé, ʻoku tau tokangataha ki hono fai ʻo e meʻa ʻe fakahōifuaʻi ai ʻa Sihová, pea fakaʻehiʻehi mei he meʻa ʻe hoko ʻo ne ongoʻi mamahi aí. ʻI he ʻikai sio ki he ofi ki he angahalá ʻe lava ke tau aʻu ki aí, ʻoku tau fakamamaʻo mei ai pea “hola pe mei he fai feʻauaki.” (1 Kol.1Ko 6:18) ʻOku tau fakahaaʻi leva ai ko e kakai anga-tonu moʻoni kitautolu.

ʻE Lava Fēfē Ke Tau Tauhi Maʻu ʻEtau Anga-Tonú?

11. Ko e hā ʻoku mahuʻinga ai ʻa e foʻi ngāue talangofua taki taha? Fakatātaaʻi.

¹¹ ʻOku tau langa hake ʻa e anga-tonú ʻaki ʻa e talangofuá, ko ia ʻoku tau tauhi maʻu ʻa e anga-tonú ʻi he kītaki ʻi ha ʻalunga talangofua. Ko ha foʻi ngāue pē ʻe taha ʻo e talangofuá ʻe hā ngali taʻemahuʻinga nai—ko ha kiʻi meʻa siʻisiʻi. Neongo ia, ko e ngāue talangofua peheé ʻoku tātānaki ia ʻi he faai atu ʻa e taimí. Ke fakatātaaʻi: ʻE hā ngali taʻemahuʻinga nai ha foʻi piliki ʻe taha, ka ʻo kapau te tau fokotuʻutuʻu fakataha ha ngaahi foʻi piliki lahi, ʻe lava ke tau langa ai ha fale fakaʻofoʻofa. Ko ia ʻi he hokohoko atu ʻa ʻetau fakalahi ʻetau ngāue talangofuá, ʻoku tau tauhi maʻu ai ʻetau anga-tonú.—Luke 16:10.

12. Naʻe anga-fēfē hono fokotuʻu ʻe Tēvita ha faʻifaʻitakiʻanga ʻo e tauhi maʻu ʻo e anga-tonú ʻi he fehangahangai mo e ngaohikoviá pea mo e fakamaau taʻetotonú?

¹² Ko ʻetau anga-tonú ʻoku hā mahino ia tautefito ʻi he taimi ʻoku tau kātaki ai ʻi he fehangahangai mo e ngaahi faingataʻá, ngaohikoviá, pe ko e fakamaau taʻetotonú. Fakakaukau angé ki he faʻifaʻitakiʻanga Fakatohitapu ʻa Tēvitá. ʻI hono tuʻunga ko ha talavoú, naʻá ne kātekina ai ʻa e fakatanga mei ha tuʻi ʻa ia naʻe totonu ke ne fakafofongaʻi ʻa e tuʻunga mafai ʻo Sihová. Kae kehe, ne mole meia Tuʻi Saula ʻa e hōifua ʻa Sihová pea naʻá ne meheka loto-kona kia Tēvita, ʻa ia naʻe hōifua ki ai ʻa e ʻOtuá. Neongo ia, naʻe kei ʻi he tuʻunga mafaí ʻa Saula ʻi ha vahaʻa taimi pea naʻá ne ngāueʻaki ʻa e kau tau ʻIsilelí ke tuli takai holo ʻa Tēvita. Naʻe fakaʻatā ʻe Sihova ʻa e fakamaau taʻetotonu ko ení ke hokohoko atu ʻi ha ngaahi taʻu. Naʻe kona ai ʻe loto ʻo Tēvitá ki he ʻOtuá? Naʻá ne fili ʻo pehē naʻe ʻikai hano ʻaonga ʻo e kātakí? Mole ke mamaʻo. Naʻá ne tauhi maʻu ʻa e fakaʻapaʻapa lahi ki he tuʻunga ʻo Saula ko e pani ʻa e ʻOtuá, ʻo ne fakafisi ke sāuniʻi ʻa Saula ʻi he taimi naʻe maʻu ai ha faingamālie ke ne fai peheé.—1 Sam. 24:2-7.

13. ʻE lava fēfē ke tau tauhi maʻu ʻetau anga-tonú kapau ʻoku tau mamahi pe ʻita?

¹³ He mālohi moʻoni ko e faʻifaʻitakiʻanga ʻa Tēvitá kia kitautolu he ʻaho ní! Ko e konga kitautolu ʻo ha fakatahaʻanga fakaemāmani lahi ʻo e faʻahinga taʻehaohaoa ʻo e tangatá, pea ʻe lava ke faihala pe aʻu ʻo taʻefaitōnunga mai kia kitautolu ha taha pē. Ko e moʻoni, ʻoku tau maʻu ʻa e monū ke moʻui ʻi ha taimi ʻa ia ʻe ʻikai ʻaupito lava ke fakameleʻi ai ʻa e kakai ʻa Sihová fakalūkufua. (Ai. 54:17) Kae kehe, ʻe fēfē ʻetau talí kapau ʻe fakasivaʻi ʻetau ʻamanakí ʻe ha taha pe ʻai ke tau ongoʻi mamahi? Kapau te tau tuku ke ʻuliʻi hotau lotó ʻe he loto-kona ki ha kaungātui, ʻe lava ke fakatupu maumau ia ki heʻetau anga-tonu ki he ʻOtuá. Ko e ʻulungāanga ʻo e niʻihi kehé ʻe ʻikai ʻaupito fakatupunga ai ha kalofanga ki he hoko ʻo kona hotau lotó ki he ʻOtuá pe siʻaki ai ha ʻalunga faitōnunga. (Sāme 119:165) Ko e kātaki ʻo aʻu ki he fehangahangai mo e ngaahi ʻahiʻahí ʻe tokoniʻi ai kitautolu ke tau tauhi maʻu ʻetau anga-tonú.

14. ʻOku fakafeangai ʻi he founga fē ʻa e kau tauhi anga-tonú ki he ngaahi liliu fakaekautahá mo e ngaahi fakalelei fakatokāteliné?

¹⁴ ʻE toe lava ke tau tauhi maʻu ʻetau anga-tonú ʻi he fakaʻehiʻehi mei ha laumālie fakasio hala mo fakaanga. Ko e moʻoni, ʻoku ʻuhinga iá, ko e mateaki kia Sihova. ʻOkú ne tāpuakiʻi ʻa hono kakaí he taimí ni ʻo laka ia ʻi ha toe taimi. Ko e lotu maʻá kuo teʻeki ai ʻaupito ke hakeakiʻi pehē ia ʻi he māmaní ʻi he kotoa ʻo e hisitōliá. (Ai. 2:2-4) ʻI he taimi ʻoku fai ai ha ngaahi feʻunuʻaki ʻi hono fakamatalaʻi ʻa e ngaahi konga Tohi Tapú pe ʻi he founga hono fai ʻo e ngaahi meʻá, ʻoku tau loto ke tali ia. ʻOku tau fiefia ke sio ki he fakamoʻoni ʻo e kei fakautuutu e ulo ʻa e maama fakalaumālié. (Pal. 4:18) Kapau ʻoku tau fakakaukau hifo ʻoku faingataʻa ke mahinoʻi ha liliu, tau kole kia Sihova ke ne tokoniʻi kitautolu ke tau mahinoʻi ʻa e poini ko iá. Lolotonga iá, ʻoku tau kātaki ʻi ha ʻalunga talangofua, ʻo tauhi maʻu ʻetau anga-tonú.

Fēfē Kapau ʻOku ʻIkai Tauhi ʻe ha Taha ʻEne Anga-Tonú?

15. Ko hai pē ʻe lava ke ne toʻo hoʻo anga-tonú?

¹⁵ Ko ha fehuʻi fakatupu fakakaukau ia, ʻikai ko ia? Hangē ko ia ne tau ako ʻi he kupu ki muʻá, ʻoku mātuʻaki fiemaʻu ʻaupito ʻa e anga-tonú. Ka ʻikai ia, heʻikai hatau vahaʻangatae mo Sihova pea ʻikai ha ʻamanaki moʻoni. Manatuʻi maʻu eni: Ko e tokotaha pē ʻi he ʻunivēsí ʻe lava ke ne toʻo ʻa hoʻo anga-tonú. Ko e tokotaha ko iá ko koe. Naʻe mahinoʻi lelei ʻe Siope ʻa e foʻi moʻoni ko iá. Naʻá ne pehē: “Teu mate be ka e ikai teu tukuage eku agatonu meiate au.” (Siope 27:5, PM) Kapau ʻokú ke maʻu ʻa e fakapapau tatau pea kapau ʻokú ke nofo ofi kia Sihova, heʻikai ʻaupito mole ʻa hoʻo anga-tonú.—Sem. 4:8.

16, 17. (a) Kapau ʻoku tō ha taha ki he angahala mamafá, ko e hā e ʻalunga hala ke ʻoua ʻe fou aí? (e) Ko e hā e ʻalunga totonu ke fou aí?

¹⁶ Kae kehe, ʻoku ʻikai malava ke tauhi maʻu ʻe he niʻihi ʻa ʻenau anga-tonú. Hangē ko ia naʻe hoko ʻi he taimi ʻo e kau ʻapositoló, ne tō ʻa e niʻihi ki ha tōʻonga angahala mamafa. Kapau ne hoko ia kiate koe, ʻoku ʻuhinga iá ʻoku ʻikai ha toe ʻamanaki ia ki he tuʻunga ko iá? ʻIkai ʻaupito. Ko e hā ʻe lava ke faí? Tau ʻuluaki lāulea angé ki he meʻa ke ʻoua ʻe faí. Ko e hehema fakaetangatá ke fufū ha hala mei he ongo mātuʻá, kaungā Kalisitiané pe ko e kau mātuʻá. Kae kehe, ʻoku fakamanatu mai ʻe he Tohi Tapú: “Ko ia ʻoku ʻufiʻufi ʻene ngaahi angahala, ʻe ʻikai te ne tuʻumalie: Ka ko ia ʻoku ne vete mo siʻaki, ʻe fai ha mēsi ki ai.” (Pal. 28:13) Ko e faʻahinga ʻoku nau feinga ke fufū ʻa e angahalá ʻoku nau fai ha fehālaaki fakamamahi, he ʻoku ʻikai lava ke fufū ha meʻa mei he ʻOtuá. (Lau ʻa e Hepelu 4:13.) ʻOku aʻu ʻo feinga ʻa e niʻihi ke moʻuiʻaki ha moʻui lōua, ʻo fakangalingali ʻoku nau tauhi kia Sihova lolotonga ia ʻoku nau hokohoko atu ʻi ha ʻalunga angahala. Ko ha moʻui pehē ʻoku ʻikai ʻi ai ha anga-tonú—ko hono moʻoní, ko e fehangahangai tofu pē ia ʻo e anga-tonú. ʻOku ʻikai hōifua ʻa Sihova ʻi he ngaahi lotu ʻoku fai ʻe he faʻahinga ʻoku nau fufū ʻa e angahala mamafá. ʻI hono kehé, ko e mālualoi peheé ʻoku fakahouhau ia kiate ia.—Pal. 21:27; Ai. 1:11-16.

¹⁷ ʻI he taimi ʻoku kau ai ha Kalisitiane ʻi he faihala mamafá, ʻoku māʻalaʻala ʻa e ʻalunga totonú. Ko e taimi ia ke kumi ai ki he tokoni ʻa e kau mātuʻa Kalisitiané. ʻOku ʻi ai ha fokotuʻutuʻu ʻa Sihova ke feangainga ai mo e ngaahi tuʻunga ʻo e puke lahi fakalaumālié. (Lau ʻa e Semisi 5:14.) ʻOua ʻe tuku ʻa e manavahē ki he akonaki pe fakatonutonu ʻe ala fai maí ke ne taʻofi koe mei he tuli ki he tuʻunga moʻui lelei fakalaumālié. He ko e moʻoni, meʻa ní ʻe tuku ʻe ha taha poto ʻa e mamahi fakataimi ʻo ha huhu pe naʻa mo ha tafa, ke ne taʻofi ia mei hano tokangaʻi ʻo ha palopalema fakatuʻutāmaki ki he moʻui leleí?—Hep. 12:11.

18, 19. (a) ʻOku anga-fēfē hono fakahaaʻi ʻi he faʻifaʻitakiʻanga ʻa Tēvitá ʻe lava ke toe maʻu ʻa e anga-tonú? (e) Ko e hā hoʻo fakapapau fekauʻaki mo hoʻo anga-tonú?

¹⁸ ʻOku ʻi ai ha ʻamanaki ki ha fakaakeake fakaʻaufuli? ʻE lava ke toe maʻu ʻa e anga-tonú kapau ne mole ki muʻa? Toe fakakaukau angé ki he faʻifaʻitakiʻanga ʻa Tēvitá. Naʻá ne tō ki he angahala mamafá. Naʻá ne sio mānumanu ki he uaifi ʻo ha tangata ʻe taha, fai ʻa e tono, pea fokotuʻutuʻu ke tāmateʻi ʻa e hoa mali tonuhiá. ʻOku faingataʻa ke fakakaukau atu ko ha tangata anga-tonu ʻa Tēvita ʻi he taimi ko iá, ʻikai ko ia? Neongo ia, naʻe ʻikai ai ha toe ʻamanaki ki hono tuʻungá? Naʻe fiemaʻu pea naʻe fai kia Tēvita ʻa e akonaki fefeka. Ko ʻene fakatomala moʻoní leva naʻe iku ai ʻo fakaaʻu ʻe Sihova kiate ia ʻa e mēsí. Naʻe ako ʻa Tēvita mei he akonakí peá ne toe maʻu ʻa e anga-tonú ʻi heʻene talangofua ki he ʻOtuá pea kītaki ʻi he ʻalunga ko iá. ʻOku fakatātaaʻi ʻi he moʻui ʻa Tēvitá ʻa e meʻa ʻoku tau lau ʻi he Palovepi 24:16: “He tuʻo fitu ʻa e to ki lalo ʻa e faitotonu, ka ne tuʻu pe.” Ko e hā hono olá? Fakakaukau angé ki he meʻa naʻe fakahaaʻi ʻe Sihova kia Solomone ʻo fekauʻaki mo Tēvita ʻi he hili ʻene maté. (Lau ʻa e 1 Tuʻi 9:4, “PM.”) Naʻe manatuʻi ʻe he ʻOtuá ʻa Tēvita ko ha tangata anga-tonu. Ko e moʻoni, ʻe lava ke fakamaʻa ʻe Sihova ʻa e kau angahala fakatomalá ʻo aʻu ki he mele ʻo e ngaahi angahala mamafá.—Ai. 1:18.

¹⁹ ʻIo, te ke hoko ko ha tokotaha anga-tonu ʻi hono fakahāhā ʻa e talangofua ʻi he ʻofa. Tauhi maʻu ʻa e kātaki mateakí, pea kapau ʻoku hoko ha angahala mamafa, fakahāhā ʻa e fakatomala moʻoni. Ko ha makakoloa mahuʻinga moʻoni ē ko e anga-tonú! ʻOfa ke tau kau taki taha ʻi he fakapapau naʻe maʻu ʻe Tēvitá: “Ka ko au, teu eveeva i he eku agatonu.”—Sāme 26:11, PM.

[Fakamatala ʻi lalo]

ʻE Fēfē Haʻo Tali?

• ʻE lava fēfē ke ke hoko ko ha tokotaha anga-tonu?

• ʻI he ngaahi founga fē ʻe lava ke ke tauhi maʻu ai hoʻo anga-tonú?

• ʻOku malava fēfē ke toe maʻu ʻa e anga-tonú?

[Puha ʻi he peesi 8]

‘KO HA MEʻA FAKAʻOFOʻOFA IA’

Naʻe leaʻaki e ngaahi lea ko iá ʻe ha fefine naʻe feitama māhina nima ʻo fekauʻaki mo e anga-lelei pea mo e anga-tonu ʻa ha sola. Naʻá ne ʻi ha fale kofi, pea ʻi ha ngaahi houa ki mui ai naʻá ne fakatokangaʻi hifo naʻe liʻaki ʻene uāletí he fale kofí. Naʻe ʻi he uāletí ʻa e $2,000, ko ha paʻanga lahi ʻaupito ia ʻi he meʻa naʻá ne angaʻaki hono faʻa toʻo holó. “Naʻá ku ongoʻi loto-mamahi ʻaupito,” ko ʻene tala ange ia ki mui ki ha nusipepa ʻi he feituʻú. Kae kehe, naʻe maʻu ʻe ha finemui ʻa e uāletí peá ne kumi leva ki he tokotaha totonu ʻoku ʻaʻaná. ʻI he ʻikai lava ke ne maʻú, naʻá ne ʻave ia ki he ʻapitanga polisí, pea naʻe faifai pē ʻo maʻu ʻe he kau polisí ʻa e fefine feitamá. “Ko e moʻoni, ko ha meʻa fakaʻofoʻofa moʻoni ia ke fai,” ko e fakamatala ia ʻa e tokotaha houngaʻia naʻe ʻaʻaná. Ko e hā naʻe feinga lahi ai ʻa e finemuí ke fakafoki ʻa e paʻangá? Naʻe pehē ʻi he nusipepá ʻi hono tuʻunga ko e taha ʻo e Kau Fakamoʻoni ʻa Sihová, ʻokú ne “fakahaaʻi ko ʻene anga-tonú koeʻuhi ko e lotu naʻe ʻohake ai iá.”

[Fakatātā ʻi he peesi 9]

ʻE lava ke tauhi anga-tonu ʻa e kau talavoú ʻi he malumalu ʻo e ʻahiʻahí

[Fakatātā ʻi he peesi 10]

Naʻe ʻikai lava ke tauhi maʻu e anga-tonu ʻa Tēvitá ʻi ha taimi, ka naʻá ne fakaakeake