Fekuki mo e ʻAhiʻahí ʻOkú Ne ʻAi Ke Mālohi ʻEma Falala kia Sihová

Fakamatala Fai ʻe Ada Dello Stritto

Ko e toki ʻosi eni ʻeku hiki ʻa e konga tohi fakaʻahó ki heʻeku kiʻi pepá. ʻOku ou taʻu 36, ka ko hono tohi ʻa e ngaahi sētesi ko iá ʻoku feʻunga ia mo e houa ʻe ua. Ko e hā ʻoku fuʻu fuoloa pehē aí? ʻE fakamatalaʻi atu ia ʻe heʻeku faʻeé.—Joel

NAʻÁ KU papitaiso mo hoku husepānití ko e ongo Fakamoʻoni ʻa Sihova ʻi he 1968. Hili hono fāʻeleʻi ha ongo tamaiki tangata moʻui lelei, ko David mo Marc, naʻá ku fāʻeleʻi ʻema tamasiʻi hono tolú, ko Joel. Naʻe fāʻeleʻi taʻehoko ia ʻi he 1973 ʻi ha falemahaki ʻi he kolo ko Binche ʻi Pelisiume, ʻi he kilomita nai ʻe 60 he fakatonga ʻo Brussels. Naʻe kilo ʻe 1.7 pē ʻa hono mamafá. ʻI heʻeku mavahe mei he falemahakí, naʻe fiemaʻu ke nofo pē ai ʻa Joel ke toe ʻalu hake ʻa hono mamafá.

ʻI ha ngaahi uike ki mui ai ʻi he kei ʻikai pē hā ha fakaʻilonga ʻo ha fakalakalaka ʻi homa fohá, naʻá ku ʻave ai ia mo hoku husepānití ko Luigi ki ha toketā ki he fānaú. Hili ʻene sivi ʻa Joel, naʻe pehē mai ʻe he toketaá: “He meʻa pango moʻoni ia. Ko Joel ʻoku hā ngali ʻokú ne maʻu ʻa e palopalema kotoa ʻoku ʻikai ke maʻu ʻe hono ongo taʻoketé.” Naʻe ʻi ai ha longo fuoloa. ʻI he mōmeniti ko iá, naʻá ku ʻiloʻi ai ko ʻema kiʻi tamasiʻí naʻe ʻi ai hono palopalema fakaemoʻui lelei mafatukituki. Naʻe taki atu leva ʻe he toketaá hoku husepānití ki he tafaʻakí ʻo tala ange ki ai: “Ko hoʻomo pēpeé ʻokú ne maʻu ʻa e trisomy 21,” ʻa ia ʻoku toe ʻiloa ko e mongokōliá.a

ʻI he mamahi he ʻilo ʻo e mahakí ʻe he toketā ki he fānaú, naʻá ma fili ai ke kumi faleʻi ki ha mataotao fakafaitoʻo ʻe taha. Naʻá ne sivi fakaʻāuliliki ʻa kiʻi Joel ʻi he meimei houa ʻe taha mo ʻikai haʻane lea. Kia Luigi mo au, ne hangē ia ha fuʻu taimi lōloá. Faifai pē, naʻe hanga hake ʻa e toketaá ʻo ne pehē mai, “ʻE mātuʻaki fakafalala hoʻomo tamá kiate kimoua.” Pea ʻi ha leʻo anga-ʻofa leva, naʻá ne toe pehē mai, “Ka ʻe fiefia ʻa Joel koeʻuhí ʻoku ʻofa ʻiate ia ʻa ʻene ongo mātuʻá!” ʻI heʻeku ongoʻi lōmekiná, naʻá ku fua fakaalaala ʻa Joel, pea naʻá ma ʻave ia ki ʻapi. ʻI he taimi ko ení, naʻá ne uike valu ai.

Fakaivimālohiʻi ʻe he Fakataha Faka-Kalisitiané mo e Ngāue Fakafaifekaú

Ko e ngaahi sivi lahi ange fakafaitoʻó naʻe fakahaaʻi ai naʻe toe maʻu ʻe Joel ha fehālaaki mafatukituki he faʻunga ʻo hono mafú mo ha palopalema lahi ʻo e hui molū. Koeʻuhi naʻe fuʻu fōlahi ʻa hono mafú, naʻe faʻaki ia ki hono maʻamaʻá ʻo ne laveangofua ai ʻi he mahakí. ʻIkai fuoloa mei ai, ʻi heʻene māhina faá, naʻe maʻu ʻe Joel ʻa e niumōnia ʻi he kau ʻo hono maʻamaʻá ʻo pau ai ke ne toe foki ki he falemahakí, ʻa ia naʻe tuku fakamavaheʻi ia ai. Naʻe fakamamahi kia kimaua ʻema sio atu ki heʻene faingataʻaʻiá. Naʻá ma fakaʻamu ange mai naʻe lava ke ma fua ia mo amoamohi, ka ʻi he uike fakamamahi ʻe hongofulu naʻe ʻikai fakaʻatā ai ke ma ala kiate ia. Naʻe ʻikai ha toe meʻa naʻe lava ke u fai mo Luigi, ka ko ʻema sio pē, fāʻofua pea mo lotu.

Lolotonga ʻa e taimi faingataʻa ko iá, naʻe hokohoko atu ʻema maʻu ʻa e ngaahi fakataha ʻa e fakatahaʻangá fakataha mo David pea mo Marc, ʻa ia naʻá na taʻu 6 mo taʻu 3 he taimi ko iá. Kia kimaua, ko e ʻi he Fale Fakatahaʻangá naʻe hangē ia ʻokú ma ʻi he toʻukupu tokanga ʻo Sihová. Lolotonga e ngaahi houa ʻo ʻema ʻi aí, ʻi hono takatakaiʻi ʻe homa fanga tokoua mo e fanga tuofāfine Kalisitiané, naʻá ma ongoʻi ai naʻe malava ke ma tuku ʻema kavengá kia Sihova, pea naʻá ma hokosia ai ha kiʻi nonga. (Sāme 55:22) Naʻa mo e kau neesi naʻa nau tokangaʻi ʻa Joel naʻa nau fakamatala ki heʻenau fakatokangaʻi ʻa hono tokoniʻi kimaua ʻe he ngaahi fakataha faka-Kalisitiané ke tauhi maʻu ʻema mafamafatataú.

Lolotonga e taimi ko iá, naʻá ku toe kole ai kia Sihova ki ha mālohi ke ʻalu ʻi he ngāue fakamalangá. ʻI he ʻikai nofo ʻi ʻapi ʻo tangí, naʻá ku loto ke talanoa ki he niʻihi kehé ʻo tala kia kinautolu ʻa hono ʻomai kiate au ʻa e mālohi ʻi heʻeku falala ki he talaʻofa ʻa e ʻOtuá ki ha māmani heʻikai ʻi ai ha puké. ʻI he taimi kotoa pē naʻá ku malava ai ke kau ʻi he ngāue fakafaifekaú, naʻá ku ongoʻi naʻe tali ʻe Sihova ʻa ʻeku ngaahi lotú.

“Ko e Meʻa Fakaofo Eni!”

Ko ha ʻaho fakafiefia moʻoni ē ko ia ʻa e faifai ange pea malava ke ma foki mo Joel ki ʻapi mei he falemahakí! Ka ʻi he ʻaho pē hono hokó naʻe liliu ai ʻema fiefiá ki he mamahi. Naʻe vave ʻa e kovi ange ʻa e tuʻunga ʻo Joel, pea naʻe pau ai ke ma fakafoki fakavave ia ki he falemahakí. Hili hono sivi iá, naʻe tala mai ʻe he kau toketaá: “Ko Joel ko e lōloa taha pē ʻene moʻuí ko e māhina ʻe ono.” ʻI he māhina ʻe ua ki mui ai, ʻi heʻene māhina valú nai, ne hā ngali moʻoni ai ʻa e meʻa naʻe tomuʻa tala mai ʻe he kau toketaá he naʻe faai hifo ʻa e tuʻunga ʻo Joel. Naʻá ma tangutu hifo ai mo ha toketā pea naʻá ne tala mai: “Kātaki. ʻOku ʻikai ha meʻa ʻe lava ke mau toe fai ki ai.” Peá ne toe pehē mai: “ʻI he tuʻunga ko ení, ko Sihova pē taha ʻe lava ke ne tokoniʻi iá.”

Naʻá ku toe foki ki he loki ʻo Joel ʻi he falemahakí. Neongo naʻá ku mamahi lahi fakaeongo pea helaʻia ʻaupito, naʻá ku fakapapauʻi ke ʻoua naʻá ku mavahe mei hono veʻe mohengá. Naʻe taufetongi ha fanga tokoua Kalisitiane ʻi he nofo mo aú, ʻi he pau ke tokangaʻi ʻe Luigi ʻa ʻema ongo tamaiki tangata lalahí. Naʻe mahili mei ai ha uike ʻe taha. Pea fakafokifā pē, naʻe tuʻu e tā ʻo e mafu ʻo Joel. Naʻe fakavave mai ʻa e kau nēsí ki he lokí ka naʻe ʻikai toe felave ha meʻa. Hili ha ngaahi miniti, naʻe fafana mai ai ha neesi, “Kuó ne mālōlō . . .” ʻI he ongoʻi ʻoku ʻikai toe ʻi ai haku iví, naʻá ku tangi ai peá u mavahe mei he lokí. Naʻá ku feinga ke lotu kia Sihova, ka naʻe ʻikai meimei lava ke u maʻu ha lea ke fakahaaʻi ʻaki hoku mamahí. Naʻe hili nai ha miniti ʻe 15 mei ai, mo e toki ui mai ha neesi kiate au, “kuo toe moʻui ʻa Joel!” Naʻá ne taki atu au mo ne pehē mai, “Haʻu, ʻe lava ke ke sio ki ai he taimí ni.” ʻI heʻeku foki atu kia Joel, naʻe toe tā ʻa hono mafú! Naʻe vave e mafola ʻa e ongoongo ʻo ʻene toe moʻuí. Naʻe haʻu ʻa e kau toketaá mo e kau nēsí ke sio kiate ia, pea naʻe kalanga ʻa e tokolahi, “Ko e meʻa fakaofo eni!”

ʻI he Taʻu Faá, ko ha Fakalakalaka Fakaʻohovale

Lolotonga ʻa e ʻuluaki ngaahi taʻu ʻo e moʻui ʻa Joel, naʻe toutou pehē mai ai ʻe he toketā ki he fānaú, “ʻOku fiemaʻu ʻe Joel ʻa e ʻofa lahi.” Koeʻuhi naʻá ku hokosia mo Luigi ʻi ha tuʻunga makehe ʻa e tokanga ʻofa ʻa Sihová hili hono fāʻeleʻi ʻo Joel, naʻá ma lotu ke ʻōʻōfaki ʻaki homa fohá ʻa e tokanga ʻofá foki. Naʻe lahi homa faingamālie ke fai ai ení koeʻuhi naʻá ne fiemaʻu ʻema tokoní ʻi he meʻa kotoa naʻá ne faí.

ʻI he taʻu kotoa pē ʻi he ʻuluaki taʻu ʻe fitu ʻo e moʻui ʻa Joel, naʻá ma feangainga ai mo e hokohoko ʻo e ngaahi meʻa tatau. ʻI he vahaʻa ʻo ʻOkatopa mo Maʻasí, naʻá ne faingataʻaʻia ai ʻi ha puke hokohoko, pea naʻe pau ai ke ma toutou ʻave ia ki he falemahakí. ʻI he taimi tatau, naʻá ku feinga mālohi ke vaheʻi ʻa e taimi lahi fakatatau ki heʻeku malavá ki homa foha ko David mo Marc. Koeʻuhi ko e meʻá ni, naʻá na kau lahi ki hono tokoniʻi ʻo Joel ke ne fakalakalaká—pea naʻe ʻi ai hono ngaahi ola fakaʻohovale. Hangē ko ení, naʻe tala mai kia kimaua ʻe ha kau toketā heʻikai ʻaupito lava ke ʻalu ʻa Joel. Ka ʻi he ʻaho ʻe taha ʻi he taʻu fā ʻa Joel, naʻe pehē mai ai ʻe homa foha ko Marc, “Sai Joel, fakahaaʻi kia Mami ʻoku lava ke ke fai ia!” ʻI heʻeku ʻohovalé, naʻe kamata ke lue ʻa Joel! Naʻá ma fiefia, pea naʻa mau lotu fakataha fakafāmili ʻo fakamālō kia Sihova mei homau lotó. ʻI he ngaahi taimi kehe, naʻa mo hono fai ʻe Joel ha fakalakalaka siʻisiʻi ʻi ha toe tafaʻakí, naʻa mau fakaongoongoleleiʻi loto-māfana maʻu pē ia.

Ko e Akoʻi Fakaʻotua mei he Valevalé ʻOku Ola Lelei

Naʻá ma ʻave ʻa Joel ki he ngaahi fakataha ʻi he Fale Fakatahaʻangá ʻi he lahi taha naʻe ala lavá. Ke maluʻi ia mei he siemú ʻa ia ʻe lavangofua ke ʻai ai ia ke ne puké, naʻá ma tuku ia ʻi he saliote makehe ʻa ia naʻe ʻufiʻufiʻaki ha pelesitiki naʻe lava ke sio ai ki loto. Neongo ia, naʻa mo ʻene nofo mei loto ʻi he ʻufiʻufi ko iá, naʻá ne fiefia ʻi heʻene ʻi he fakatahaʻangá.

Ko homa fanga tokoua mo e fanga tuofāfine Kalisitiané ko ha matavai ia ʻo e fakaivimālohi kia kimaua, ʻi heʻenau ʻōʻōfaki kimaua ʻaki ʻa e ʻofa pea fai mai ha tokoni ʻaonga. Naʻe faʻa fakamanatu mai ʻe ha tuongaʻane kia kimaua ʻa e lea ʻo e Aisea 59:1, 2: “Vakai, ʻoku ʻikai fakanounou ʻa e nima ʻo Sihova, ke ne taʻelava ha fakamoʻui; pea ʻoku ʻikai tuli hono fofonga, ke ne taʻe ongona.” Ko e ngaahi lea fakafiemālie ko iá naʻe tokoniʻi ai kimaua ke ma falala kia Sihova.

ʻI he tupu hake ʻa Joel, naʻá ma feinga ke ʻai ʻa e tauhi kia Sihová ko ha konga lahi ia ʻo ʻene moʻuí. ʻI he faingamālie kotoa pē, naʻá ma talanoa ai kiate ia fekauʻaki mo Sihova ʻi ha founga ʻa ia ʻe fakatupulekina ai ʻe Joel ha haʻi vāofi ʻo e ʻofa mo ʻene Tamai fakahēvaní. Naʻá ma kole kia Sihova ke ne tāpuakiʻi ʻema ngaahi feingá koeʻuhi ke ola lelei ai ʻa e akoʻi fakaʻotuá.

ʻI heʻene aʻu ki hono muʻaki ngaahi taʻu hongofulu tupú, naʻá ma houngaʻia ai ʻi hono fakatokangaʻi naʻe manako ʻa Joel ke vahevahe atu ʻa e moʻoni Fakatohitapú ki he faʻahinga naʻá ne feʻiloaki mo iá. Lolotonga ʻene fakaakeake mei hono tafa lahi ʻi hono taʻu 14, naʻá ku ongoʻi fiefia ʻaupito ai ʻi hono ʻeke mai ʻe Joel, “Mami, ʻe lava ke u ʻoange ki he toketā tafá ha tohi Moʻui Taʻengata?” ʻI ha ngaahi taʻu siʻi ki mui ai, naʻe pau ai ke toe fai kia Joel ha tafa lahi ange. Naʻá ma ʻiloʻi lelei heʻikai nai te ne moʻui ai. Ki muʻa ʻi he tafá, naʻe ʻoange ai ʻe Joel ki heʻene kau toketaá ha tohi naʻa mau teuteuʻi fakataha mo ia. Naʻe fakamatalaʻi ai ʻa hono tuʻunga ʻi hono ngāueʻaki ʻo e totó. Naʻe ʻeke ange ʻe he toketā tafá kia Joel, “Pea ʻokú ke loto-tatau mo ia?” Naʻe tali papau ange ʻe Joel, “ʻIo, Toketā.” Naʻá ma mātuʻaki laukau ʻi he falala ʻa homa fohá ki hono Tokotaha-Fakatupú mo ʻene fakapapauʻi ke fakahōifuaʻi Iá. Naʻe poupouʻi ʻaupito ia ʻe he kau ngāue ʻo e falemahakí, ʻa ia naʻá ma fakahoungaʻi lahi.

Fakalakalaka Fakalaumālie ʻa Joel

ʻI hono taʻu 17, naʻe fakahāhaaʻi ai ʻe Joel ʻa ʻene fakatapui ki he ʻOtuá ʻaki ʻene papitaiso ʻi he vaí. Ko ha ʻaho fakangalongataʻa moʻoni ē ko ia! Ko e sio ki heʻene fakalakalaka fakalaumālié naʻá ma fiefia lahi ai. Talu mei ai, mo e ʻikai hōloa ʻa ʻene ʻofa kia Sihova mo e faivelenga ki he moʻoní. Ko hono moʻoní, ki he tokotaha kotoa ʻokú ne feʻiloaki mo iá, ʻoku saiʻia ʻa Joel ke ne pehē, “Ko e moʻoní ʻa ʻeku moʻuí!”

ʻI hono taʻu hongofulu tupu lahí, naʻe ako ai ʻa Joel ke lautohi mo tohi. Naʻe fiemaʻu ki ai ʻa e feinga lahi. Ko e kiʻi foʻi lea taki taha naʻe lava ke ne tohí ko ha ikuna ia. Talu mei ai, ʻokú ne kamataʻaki e ʻaho taki taha ha lāulea ki he konga tohi fakaʻahó mei he Ko Hono Vakaiʻi Fakaʻaho ʻa e Tohi Tapú. Hili iá, ʻokú ne hiki fakamākukanga ai ʻa e konga Tohi Tapú ʻi he taha ʻo ʻene fanga kiʻi pepá, ʻa ia ʻoku faʻuʻaki ʻi he taimí ni ha tānekinga fakaueʻiloto!

ʻI he ngaahi ʻaho fakatahá, ʻoku fakapapauʻi ai ʻe Joel ke mau ʻalu tōmuʻa ki he Fale Fakatahaʻangá koeʻuhi ʻokú ne loto ke ʻi ai taimi totonu ke ne talitali lelei māfana ʻa e faʻahinga kotoa ʻoku nau hū ki he holó. Lolotonga ʻo e ngaahi fakatahá, ʻokú ne fiefia ʻi hono fai ʻo e talí mo e kau ʻi he ngaahi fakahāhaá. ʻOkú ne toe tokoni ki hono tokangaʻi ʻo e meʻa fakaongo leʻo-lahí mo fai ʻa e ngaahi ngāue kehe. ʻI he uike kotoa pē, kapau naʻe fakaʻatā ia ʻe hono tuʻunga moʻui leleí, ʻokú ne ʻalu fakataha ai mo kimaua ʻi he ngāue fakamalangá. ʻI he 2007 naʻe fanongonongo ai ki he fakatahaʻangá kuo fakanofo ʻa Joel ke ne hoko ko ha sevāniti fakafaifekau. Naʻá ma fakatō loʻimata ai ʻi he fiefia. Ko ha tāpuaki anga-ʻofa moʻoni ia meia Sihova!

Ongoʻi ʻa e Toʻukupu Tokoni ʻo Sihová

ʻI he 1999 naʻá ma fehangahangai ai mo ha toe ʻahiʻahi. Naʻe tuiʻi ai ʻema kaá ʻe ha tokotaha fakaʻuli taʻetokanga pea naʻe lavea lahi ai ʻa Luigi. Naʻe pau ai ke tuʻusi ʻa e taha ʻo hono vaʻé, pea naʻe fai ai hono ngaahi tafa lahi ʻi hono hui-tuʻá. Naʻa mau toe ongoʻi ai, ʻi he falala kia Sihová, ʻa e mālohi ʻokú ne ʻomai ki heʻene kau sevāniti faingataʻaʻiá. (Fili. 4:13) Neongo ʻoku faingataʻaʻia fakaesino ai pē ʻa Luigi, ʻoku mau feinga ke sio ki he tafaʻaki leleí. Koeʻuhi ʻoku ʻikai te ne malava ke fai ha ngāue paʻanga, ʻokú ne maʻu ʻa e taimi lahi ange ke tokangaʻi ai ʻa Joel. ʻOku fakaʻatā ai heni au ke u vaheʻi ʻa e taimi lahi ange ki he ngaahi ngāue fakalaumālié. ʻOku toe lava ke fai ʻe Luigi ʻa e tokanga lahi ange ki he fiemaʻu fakalaumālie ʻa homa fāmilí pea ki he faʻahinga ʻi heʻemau fakatahaʻangá, ʻa ia ʻoku hokohoko atu ai ʻene ngāue ko e sea ʻo e kau mātuʻá.

Koeʻuhi ko homau ngaahi tuʻunga makehé, ʻoku mau fakamoleki ai ʻa e taimi lahi ʻi he tuʻunga ko ha fāmilí. ʻI he faai mai ʻa e taimí, kuo mau ako ai ke fakaʻatuʻi pea ʻoua ʻe ʻamanekina ʻa e meʻa lahi ange ʻi he meʻa ʻoku malavá. ʻI he ngaahi ʻaho ʻoku mau ongoʻi loto-siʻi aí, ʻoku mau fakahaaʻi ʻemau ongoʻí kia Sihova ʻi he lotu. Ko e meʻa fakamamahí, ʻi he aʻu ʻa homa foha ko David mo Marc ʻo lalahi peá na mavahe mei ʻapí, naʻe faifai atu pē ʻo tuku ʻena tauhi kia Sihová. ʻOkú ma ʻamanaki pē ʻe kei lava ke na foki mai kia Sihova.—Luke 15:17-24.

Kuó ma ongoʻi ʻi he kotoa ʻo e ngaahi taʻú ʻa e poupou ʻa Sihová pea kuó ma ako ke falala kiate ia ʻi he faingataʻa kotoa pē ʻokú ma fehangahangai mo iá. Ko e ngaahi lea ʻi he Aisea 41:13 ʻoku tautefito ʻa ʻene maongo kia kimauá: “Ko au Sihova ko ho ʻOtua te u puke ho toʻomataʻu, ʻa au ʻoku ou pehe atu, ʻOua ʻe manavahe; ko au ʻoku ou tokoniʻi koe.” ʻI hono ʻiloʻi ʻoku puke maʻu ʻe Sihova ʻa homa nimá ko ha matavai ia ʻo e fakafiemālie. Ko e moʻoni, ʻoku lava moʻoni ke ma pehē ko e fekuki mo e ʻahiʻahí kuó ne fakaivimālohiʻi ʻema falala ki heʻema Tamai fakahēvaní, ʻa Sihova.

[Fakamatala ʻi lalo]

[Fakatātā ʻi he peesi 16, 17]

Joel mo ʻene faʻeé, ko Ada

[Fakatātā ʻi he peesi 18]

Ada, Joel mo Luigi

[Fakatātā ʻi he peesi 19]

Fiefia ʻa Joel ʻi hono talitali lelei ʻa e fanga tokouá mo e fanga tuofāfiné ʻi he Fale Fakatahaʻangá