Hanganaki “Ikuna ʻa e Kovi” ʻAki Hono Mapuleʻi ʻa e ʻItá

“Siʻoku ʻofaʻanga, ʻoua te mou sauni hoʻomou ngaahi meʻa . . . ka ke [hanganaki] ikuna ʻa e kovi ʻaki ʻa e lelei.”—LOMA 12:19, 21.

1, 2. Ko e hā ʻa e faʻifaʻitakiʻanga lelei naʻe fai ʻe ha Kau Fakamoʻoni naʻa nau folau?

N AʻE fononga ha kulupu ʻo e Kau Fakamoʻoni ʻa Sihova ʻe toko 34 ki hano fakatapui ʻo ha ʻōfisi vaʻa ʻi he taimi naʻe toloiʻi ai ʻe ha palopalema fakamīsini ʻa ʻenau puná. Ko e folau ko ia naʻe pehē ʻe tuʻu ʻi ha houa ʻe taha ki hono ʻutú naʻe iku ia ki ha houa ʻe 44 ʻo e tuʻunga faingataʻa ʻi ha malaʻe vakapuna mamaʻo naʻe ʻikai ha meʻakai feʻunga, vai, pe ngaahi falemālōlō maʻa. Naʻe hoko ai ʻo ʻita ʻa e kau pāsese tokolahi pea fakamanamanaʻi ʻa e kau ngāue ʻi he malaʻe vakapuná. Ka naʻe anga-mokomoko ai pē ʻa e fanga tokouá mo e fanga tuofāfiné.

² Naʻe faifai pē ʻo tūʻuta ʻa e Kau Fakamoʻoní ʻi he feituʻu naʻa nau ʻalu ki aí ʻi he taimi ki he konga fakaʻosi ʻo e polokalama fakatapuí. Neongo ʻenau helaʻiá, naʻa nau nofo ʻi heʻene tukú ke maʻu ʻa e fiefia ʻi he feohi mo e fanga tokoua ʻi he feituʻú. Ki mui ai, naʻa nau ʻiloʻi ko ʻenau faʻifaʻitakiʻanga ʻo e kātaki mo e mapuleʻi-kitá naʻe ʻikai taʻefakatokangaʻi. Ko e taha ʻo e kau pāsesé naʻá ne tala ange ki he kautaha vakapuná, “Kapau naʻe ʻikai ʻa e kau Kalisitiane ʻe toko 34 ʻi he folaú, ne mei hoko ha moveuveu ʻi he malaʻe vakapuná.”

Nofo ʻi ha Māmani ʻIteʻita

3, 4. (a) ʻOku anga-fēfē pea ko e hā hono fuoloa ʻo hono uesia ʻe he ʻita fakamālohí ʻa e faʻahinga ʻo e tangatá? (e) Naʻe mei lava ke mapuleʻi ʻe Keini ʻa ʻene ʻitá? Fakamatalaʻi.

³ Ko e tenge ʻo e moʻuí ʻi he fokotuʻutuʻu fulikivanu lolotonga ko ení ʻoku lava ke ne ʻai ʻa e kakaí ke nau ongoʻi ʻita. (Koh. 7:7) ʻOku faʻa iku ʻa e ʻita ko ení ki he tāufehiʻa pea aʻu ai ki he fakamālohi. ʻOku hoko ʻa e ngaahi tau ʻi he vahaʻa ʻo e ngaahi fonuá pea fai fakalotofonua, lolotonga ia ko e fetēleni ʻi he fāmilí ʻoku hoko hangatonu ai ʻi he ngaahi ʻapi lahi ʻa e fepaki. Ko e ʻita mo e fakamālohi peheé ʻoku motuʻa ʻa hono hisitōliá. Ko Keini, ʻa e ʻuluaki foha ʻo ʻĀtama mo ʻIví, naʻá ne tāmateʻi ʻa hono tehina ko ʻĒpelí ʻi heʻene ʻita loto-meheka. Naʻe fai ʻe Keini ʻa e ngāue kovi ko ení neongo hono fakakolekole ia ʻe Sihova ke ne mapuleʻi ʻa ʻene ongoʻí pea palōmesi ange te ne tāpuakiʻi ia kapau te ne fai pehē.—Lau ʻa e Senesi 4:6-8.

⁴ Neongo ʻa ʻene taʻehaohaoa tukufakaholó, naʻe ʻi ai ha fili ke fai ʻe Keini ʻi he meʻá ni. Naʻe mei lava ke ne mapukepuke ʻa ʻene ʻitá. Ko e ʻuhinga ia naʻe tukuakiʻi fakaʻaufuli ai ia ki heʻene tōʻonga fakamālohí. ʻI he founga meimei tatau, ko hotau tuʻunga taʻehaohaoá ʻoku ʻai ai ke faingataʻa ange ke tau kalofi ʻa e ʻitá mo e ngaahi tōʻonga ʻiteʻitá. Pea ʻoku tānaki mai ʻe he ngaahi palopalema mafatukituki kehe ʻa e mamahi ki he “ngaahi taimi faingataʻa” ko ení. (2 Tim. 3:1) Ko e fakatātaá, ko e ngaahi faingataʻa fakaʻekonōmiká ʻoku lava ke ne fai ʻa e tenge ki heʻetau ongoʻí. ʻOku fakafehokotaki ʻe he kau polisí mo e ngaahi kautaha tokoni ki he fāmilí ʻa e ngaahi faingataʻa ʻi he tuʻunga fakapaʻangá ki ha fakautuutu ʻo e ʻita tōlilí mo e fakamālohi ʻi he fāmilí.

5, 6. Ko e hā e vakai fakaemāmani fekauʻaki mo e ʻitá ʻe lava nai ke uesia ai kitautolu?

⁵ ʻIkai ko ia pē, ko e tokolahi ʻo e kakai ʻoku tau fetuʻutaki mo iá ko e kau “ʻofa kiate kinautolu pe,” “angataʻetokaʻi,” pea naʻa mo e “angafakamanu.” ʻOku faingofua ʻaupito ke uesia kitautolu ʻe he ʻulungaanga kovi hangē ko ení pea fakaʻitaʻi ai kitautolu. (2 Tim. 3:2-5) Ko hono moʻoní, ko e ngaahi faivá mo e polokalama TV ʻoku faʻa huluʻi ai ʻa e sāuní ko e meʻa lelei pea ko e fakamālohí ko ha fakaleleiʻanga fakanatula mo totonu ia ki he palopalemá. Ko e ngaahi talanoa anga-mahení ʻoku tataki ai ʻa e faʻahinga ʻoku mamatá ke nau fakatuʻotuʻa atu ki he mōmeniti ʻa ia ʻoku “oatu ai ʻa e tuha” ki he tokotaha faihiá—ʻa ia ʻoku faʻa iku ki hono tāmateʻi ʻi he anga-fakamālohi ʻe he helo ʻi he talanoá.

⁶ Ko e fakamatala fakangalilelei peheé ʻoku pouaki ai ʻo ʻikai ko e ngaahi founga ʻa e ʻOtuá, ka ko e “laumalie ʻoku ʻo mamani” pea mo hono pule ʻiteʻitá, ʻa Sētane. (1 Kol. 2:12; Ef. 2:2; Fkh. 12:12) Ko e laumālie ko iá ʻokú ne fakatōliʻa ʻa e holi ʻa e kakano taʻehaohaoá pea ʻoku fakafepaki fakaʻaufuli ia ki he laumālie māʻoniʻoni ʻo e ʻOtuá pea mo hono fuá. Ko e moʻoni, ko ha akonaki tefito ʻo e lotu faka-Kalisitiané ke ʻoua ʻe sāuni ʻi hono fakaʻitaʻí. (Lau ʻa e Mātiu 5:39, 44, 45.) ʻE lava fēfē leva ke tau ngāueʻaki ke kakato ange ʻa e akonaki ʻa Sīsuú?

Faʻifaʻitakiʻanga Lelei mo e Kovi

 7. Ko e hā naʻe iku ki ai ʻi he ʻikai mapuleʻi ʻe Simione mo Līvai ʻa ʻena ʻitá?

⁷ ʻOku lahi ʻi he Tohi Tapú ʻa e akonaki fekauʻaki mo hono mapuleʻi ʻo e ʻitá pea ʻoku ʻi ai foki mo e ngaahi faʻifaʻitakiʻanga ʻaonga ki he meʻa nai ʻe hoko ʻi he taimi ʻoku tau mapuleʻi aí mo e taimi ʻoku ʻikai aí. Fakakaukau atu ki he meʻa naʻe hoko ʻi he taimi naʻe faisāuni ai ʻa e ongo foha ʻo Sēkope ko Simione mo Līvaí kia Sīkemi ʻi heʻene kākaaʻi hona tuofefine ko Tainá. Naʻá na ‘mamahi, peá na ʻita lahi.’ (Sen. 34:7) Ko hono hokó, naʻe ʻohofi ʻe he ngaahi foha kehe ʻo Sēkopé ʻa e kolo ʻo Sīkemí, pea nau faʻao fakamālohi ʻa e koloa ʻi aí pea taki pōpula ʻa e kakai fefiné mo e fānaú. Naʻa nau fai ʻa e meʻa kotoa ko ení ʻo ʻikai koeʻuhí pē ko Taina ka ʻoku ngalingali foki koeʻuhi ko hono fehuʻia ʻi he meʻa naʻe hokó ʻa honau ongoongó. Naʻa nau ongoʻi kuo fakalotomamahiʻi ʻe Sīkemi ʻa kinautolu mo ʻenau tamaí, ʻa Sēkope. Ka ko e hā e fakakaukau ʻa Sēkope ki heʻenau tōʻongá?

 8. Ko e hā ʻoku fakahaaʻi ʻi he talanoa kia Simione mo Līvaí fekauʻaki mo e sāuní?

⁸ Ko e hokosia fakamamahi ʻa Tainá kuo pau pē naʻe fakamamahiʻi lahi ai ʻa Sēkope; neongo ia, naʻá ne fakahalaiaʻi ʻa e ʻalunga faisāuni ʻa hono ongo fohá. Naʻe kei feinga pē ʻa Simione mo Līvai ke fakatonuhiaʻi ʻa ʻena tōʻongá, ʻi heʻena pehē: “Ko e pehē koā ke ne fai ki homa tuofefine ʻo hangē ko ha fefine feʻauaki ia”? (Sen. 34:31) Ka naʻe ʻikai ngata pē ai e meʻa naʻe hokó, he naʻe ʻikai ke hōifua ki ai ʻa Sihova. ʻI he ngaahi taʻu lahi ki mui ai, naʻe tomuʻa tala ai ʻe Sēkope koeʻuhi ko e tōʻonga ʻiteʻita anga-fakamālohi ʻa Simione mo Līvaí, ko hona hakó te nau movete holo ʻi he ngaahi matakali ʻo ʻIsilelí. (Lau ʻa e Senesi 49:5-7.) ʻIo, ko ʻena ʻita taʻemapuleʻí naʻe taʻefakahōifua fakatouʻosi ia kia Sihova pea mo ʻena tamaí.

 9. Ko fē ʻa e taimi naʻe meimei ʻulutukua ai ʻa Tēvita ki he ʻitá?

⁹ Naʻe kehe ʻaupito ʻa Tuʻi Tēvita ia. Naʻá ne maʻu ʻa e faingamālie lahi ke faisāuni ai, ka naʻe ʻikai te ne fai. (1 Sam. 24:3-7) Kae kehe, ʻi he taimi ʻe taha, naʻá ne meimei ʻulutukua ai ki he ʻitá. Ko ha tangata koloaʻia ko Nāpale naʻá ne kaikaila ʻo leakoviʻi ʻa e kau tangata ʻa Tēvitá, neongo naʻa nau maluʻi ʻa ʻene fanga sipí mo e kau tauhi-sipí. Mahalo ʻi heʻene ongoʻi mamahi, tautefito koeʻuhi ko ʻene kau tangatá, naʻe teu ai ke faisāuni anga-fakamālohi ʻa Tēvita. Lolotonga ʻa e fononga atu ʻa Tēvita mo ʻene kau tangatá ke ʻohofi ʻa Nāpale mo hono falé, naʻe fakahā ʻe ha talavou kia ʻApikale, ko e uaifi fakapotopoto ʻo Nāpalé, ʻa e meʻa naʻe hokó peá ne fakaʻaiʻai ia ke ne fai ha meʻa. Tuaiekemo, naʻá ne tānaki ha fuʻu meʻaʻofa peá ne fononga ke fakafetaulaki kia Tēvita. Naʻá ne kole fakamolemole anga-fakatōkilalo ki he fakalotomamahi naʻe fai ʻe Nāpalé pea kōlenga kia Tēvita ke ne manavahē kia Sihova. Naʻe foki mai ʻa e fakakaukau ʻa Tēvitá ʻo ne pehē: “Malo mo koe ʻa e taʻofi au he ʻaho ni mei he moʻua he toto.”—1 Sam. 25:2-35.

Tōʻonga Faka-Kalisitiane

10. Ko e hā e tōʻonga ʻoku totonu ke fakahāhā ʻe he kau Kalisitiané fekauʻaki mo e sāuní?

¹⁰ Ko e meʻa naʻe hoko ʻia Simione mo Līvaí pea ʻi he vahaʻa ʻo Tēvita mo ʻApikalé ʻoku fakahaaʻi taʻetoefehālaaki ai ʻoku talitekeʻi ʻe Sihova ʻa e ʻita taʻemapuleʻí mo e fakamālohí pea ʻokú ne tāpuakiʻi ʻa e ngaahi feinga ke fakamelinó. “Mou nofo melino pe mo e kakai kotoa pe, ʻo kapau ʻe ala lava,” ko e tohi ia ʻa e ʻapositolo ko Paulá. “Siʻoku ʻofaʻanga, ʻoua te mou sauni hoʻomou ngaahi meʻa, kae tuku ia ki he Houhau: he kuo tohi, ʻOku aʻaku ʻa e sauni; ko au te u ʻatu hono tuha—ko e folofola e ʻa e ʻEiki. Ka ko koe, kapau ʻoku fiekaia ho fili ke ke fafanga ia; kapau ʻoku ne fieinua, ʻange hano inu: he ko hoʻo fai pehe te ke fokotuʻu ai ʻa e ngaahi malalaʻi afi ki hono ʻulu. ʻE, ʻoua naʻa tuku ke ikuna koe ʻe he kovi, ka ke ikuna ʻa e kovi ʻaki ʻa e lelei.”—Loma 12:18-21.a

11. Naʻe anga-fēfē ʻa e ako ʻa ha tuofefine ke mapuleʻi ʻene ʻitá?

¹¹ ʻOku lava ke tau ngāueʻaki ʻa e akonaki ko iá. Ko e fakatātaá, naʻe lāunga ha tuofefine ki ha mātuʻa fekauʻaki mo hono pule ngāue foʻoú. Naʻá ne fakamatalaʻi ʻokú ne filifilimānako mo anga-kovi. Naʻá ne ʻita ʻi he fefiné pea loto ke ne nofo ʻi he ngāué. Naʻe ekinaki ʻa e mātuʻá kiate ia ke ʻoua te ne loto-ʻoho. Naʻá ne ʻiloʻi ko e ʻiteʻita ʻa e tuofefiné ki hono ngaohikoviʻi ʻe he pulé naʻe ʻai pē ai ke toe kovi ange ʻa e tuʻungá. (Tai. 3:1-3) Naʻe fakahaaʻi ange ʻe he mātuʻá neongo kapau ʻe iku ʻo ne maʻu ha toe ngāue ʻe taha, ʻe kei fiemaʻu pē ke liliu ʻa e anga ʻo ʻene fakafeangai ki he anga-koví. Naʻá ne faleʻi kiate ia ke ne fai ki he pulé ʻa e meʻa te ne saiʻia ke fai tonu ange kiate iá, ʻo hangē ko ia naʻe akoʻi mai ʻe Sīsū ke tau faí. (Lau ʻa e Luke 6:31.) Naʻe loto-lelei ʻa e tuofefiné ke ne ʻahiʻahi. Ko e hā ʻa e olá? Hili ha taimi, naʻe vaivai hifo ai ʻa e tōʻonga ʻa e pulé, pea naʻe aʻu ʻo ne fakamālō ki he tuofefiné ʻi heʻene ngāué.

12. Ko e hā ʻoku fakalotomamahi ai ʻa e ngaahi faikehekehe tautefito ʻi he vahaʻa ʻo e kau Kalisitiané?

¹² Heʻikai nai fakaʻohovale kia kitautolu ʻa e taimi ʻoku hoko ai ha ngaahi palopalema pehē mo ha taha ʻi tuʻa ʻi he fakatahaʻanga Kalisitiané. ʻOku tau ʻiloʻi ko e moʻui ʻi he fokotuʻutuʻu ʻa Sētané ʻoku filifilimānako pea ʻoku fiemaʻu ke tau tauʻi hono tuku ke fakaʻitaʻi kitautolu ʻe he kau faikoví. (Sāme 37:1-11; Koh. 8:12, 13; 12:13, 14) Kae kehe, ʻi he taimi ʻoku hoko ai ha palopalema mo ha tokoua pe tuofefine fakalaumālie, ʻoku lava ke lahi ange ai ʻa e mamahí. Naʻe manatu ha tokotaha Fakamoʻoni, “Ko e fakafaingataʻaʻiaʻanga lahi taha ʻi heʻeku haʻu ki he moʻoní ko hono tali ʻa e moʻoniʻi meʻa ko ia ko e kakai ʻa Sihová ʻoku ʻikai te nau haohaoa.” Naʻa tau haʻu mei ha māmani taʻeʻofa mo taʻetokaʻi, ʻo tau ʻamanaki ko e faʻahinga kotoa ʻi he fakatahaʻangá te nau fefaiʻaki ʻa e anga-lelei faka-Kalisitiane. Ko ia ai, kapau ʻoku taʻefakakaukau pe fai ʻe ha kaungā Kalisitiane, tautefito ko ha tokotaha ʻoku lahi hono monū ʻi he fakatahaʻangá, ha tōʻonga ʻi ha founga taʻefakakalisitiane, ʻe lava ke fakamamahiʻi pe fakaʻitaʻi ai kitautolu. Te tau ʻeke nai, ‘ʻOku lava fēfē ke hoko ha ngaahi meʻa pehē ʻi he lotolotonga ʻo e kakai ʻa Sihová?’ Ko hono moʻoní, naʻe hoko ʻa e ngaahi meʻa pehē naʻa mo e ʻi he lotolotonga ʻo e kau Kalisitiane pani ʻi he ʻaho ʻo e kau ʻapositoló. (Kal. 2:11-14; 5:15; Sem. 3:14, 15) ʻOku totonu ke fēfē ʻetau talí ʻi he taimi ʻoku uesia ai kitautolú?

13. Ko e hā hono ʻuhingá pea ʻoku totonu ke tau ngāue fēfē ke ikuʻi ʻa e ngaahi faikehekehé?

¹³ “Naʻá ku ako ke lotu maʻa ha taha pē ʻokú ne fakalotomamahiʻi au,” ko e lau ia ʻa e tuofefine naʻe toki ʻosi lave ki aí. “ʻOku tokoni maʻu pē ia.” Hangē ko ia kuo tau ʻosi laú, naʻe akoʻi kitautolu ʻe Sīsū ke lotu maʻá e faʻahinga ko ia ʻoku nau fakatangaʻi kitautolú. (Mt. 5:44) Huanoa ange ai ʻa e totonu ke tau lotu maʻa hotau fanga tokoua mo e fanga tuofāfine fakalaumālié! Hangē ko e loto ʻa ha tamai ke feʻofaʻaki ʻa ʻene fānaú, ʻoku pehē pē ʻa e loto ʻa Sihova ke feʻofaʻaki ʻa ʻene kau sevāniti ʻi he māmaní. ʻOku tau fakatuʻotuʻa atu ke nofo fakataha ʻi he melino mo e fiefia ʻo taʻengata, pea ʻoku akoʻi kitautolu ʻe Sihova ke tau fai pehē he taimí ni. ʻOkú ne loto ke tau fāitaha ʻi hono fai ʻene ngāue kāfakafá. Ko ia ai, tau fakaleleiʻi ʻa e ngaahi palopalemá pe ‘fakamolemoleʻi’ pē ʻa e angahalá pea fāʻūtaha ai pē. (Lau ʻa e Palovepi 19:11, “PM.”) ʻI he ʻikai fakamavahe mei hotau fanga tokouá ʻi he malanga hake ʻa e palopalemá, ʻoku totonu ke tau fetokoniʻaki ke tau nofo ai pē ʻi he lotolotonga ʻo e kakai ʻa e ʻOtuá, ʻo malu ʻi he “nima taʻengata” ʻo Sihová.—Teu. 33:27.

Anga-Lelei ki he Tokotaha Kotoa Maʻu Ai ʻa e Ola Lelei

14. ʻE lava fēfē ke tau tauʻi ʻa e tākiekina fakatupu māvahevahe ʻa Sētané?

¹⁴ Ke taʻofi ʻa ʻetau fakamafola ʻa e ongoongo leleí, ʻoku feinga longomoʻui ʻa Sētane mo ʻene kau tēmenioó ke veuki ʻa e ngaahi fāmili fiefiá mo e ngaahi fakatahaʻangá. ʻOku nau feinga ke fakatupunga ʻa e movetevete, ʻi he ʻiloʻi ko e māvahevahe ʻi lotó ʻoku fakatupu ʻauha. (Mt. 12:25) ʻI he tauʻi ʻa ʻenau tākiekina koví, ʻoku lelei ke tau muimui ʻi he akonaki ʻa Paulá: “Ko e tamaioʻeiki ʻa e ʻEiki ʻoku ʻikai tāu ke ne fakakikihi [pe faitau], kaekehe ke ne angalelei ki he kakai kotoa pe.” (2 Tim. 2:24) Manatuʻi ko ʻetau faitaú, ʻoku ʻikai ko e “fai mo ha toto mo kakano; kaekehe, ko e fai mo e . . . ngaahi kongakau laumalie ʻa e kovi ʻi he ngaahi feituʻu ʻo langi.” Ke lavameʻa ʻi he faitau ko ení, ʻoku fiemaʻu ke tau ngāueʻaki ʻa e teunga tau fakalaumālié, ʻo kau ai ʻa e “teuteu mei he Kosipeli fakamelino.”—Ef. 6:12-18.

15. ʻOku totonu ke fēfē ʻetau tali ki he ngaahi ʻoho mei tuʻa ʻi he fakatahaʻangá?

¹⁵ ʻI tuʻa ʻi he fakatahaʻangá, ʻoku fai ai ʻe he ngaahi fili ʻo Sihová ʻa e ʻohofi anga-fītaʻa ʻo ʻene kakai melinó. Ko e niʻihi ʻo e ngaahi fili ko ení ʻoku nau ngaohikoviʻi ʻa e Kau Fakamoʻoni ʻa Sihová. ʻOku lauʻikoviʻi loi ʻe he niʻihi kitautolu ʻi he nusipepá pe ʻi he ngaahi fakamaauʻangá. Naʻe tala ʻe Sīsū ki hono kau muimuí ke nau ʻamanekina eni. (Mt. 5:11, 12) ʻOku totonu ke fēfē ʻetau fakafeangaí? Kuo pau ke ʻoua ʻaupito te tau ‘totongi e kovi ʻaki ʻa e kovi,’ ʻi he lea pe ʻi he ngāue.—Loma 12:17; lau ʻa e 1 Pita 3:16.

16, 17. Ko e hā ʻa e tuʻunga faingataʻa naʻe fehangahangai mo e fakatahaʻanga ʻe taha?

¹⁶ Tatau ai pē pe ko e hā ʻoku ʻomai ʻe he Tēvoló kia kitautolú, ʻi hono “ikuna ʻa e kovi ʻaki ʻa e lelei,” ʻoku lava ke tau fai ai ha fakamoʻoni lelei. Ko e fakatātaá, naʻe haea ʻe ha fakatahaʻanga ʻi he motu ʻe taha ʻi he Pasifikí ha holo ki he Fakamanatú. ʻI hono ʻiloʻi ení, naʻe tala ai ʻe he kau ʻōfisa fakasiasi ʻo e feituʻú ki honau ngaahi vāhenga fakasiasí ke nau fakatahataha ki he holo ko iá ki ha ouau fakalotu ʻi he taimi naʻe fakataimitēpileʻi ki heʻetau Fakamanatú. Kae kehe naʻe tuʻutuʻuni ʻa e pule polisí ki he kau ʻōfisa ʻo e siasí ke nau fakafaingamālieʻi ʻa e holó ki he Kau Fakamoʻoní ʻi he taimi naʻe fiemaʻu ki aí. Neongo ia, ʻi he aʻu ki he taimí, naʻe fonu ʻa e holó ia ʻi he kau mēmipa ʻo e siasí pea naʻe kamata ʻa ʻenau ouaú.

¹⁷ Lolotonga ʻa e teuteu ʻa e kau polisí ke fakaʻataʻatā ʻi he tuʻunga fakamālohi ʻa e holó, naʻe haʻu ʻa e palesiteni ʻo e siasí ki he taha ʻo ʻetau kau mātuʻá ʻo ʻeke ange: “ʻOku ʻi ai haʻamou meʻa makehe naʻe palani ki he efiafí ni?” Naʻe tala ange ki ai ʻe he tokouá ʻa e Fakamanatú, pea naʻe tali ange ʻe he tangatá: “ʻOi, naʻe ʻikai te u ʻilo ia ʻe au!” ʻI he taimi ko iá, naʻe kaila mai ha polisi: “Ka naʻa mau ʻosi tala atu kia koe he pongipongí ni!” Naʻe tafoki hake ʻa e faifekaú ki he mātuʻá pea ʻi haʻane malimali mataʻi kākā naʻá ne pehē ange: “Ko e hā leva hoʻo meʻa ʻe fai he taimi ní? Kuo fonu ʻa e holó ʻi heʻemau kakaí. Te ke ʻai ʻa e kau polisí ke nau tuli kimautolu?” Naʻá ne faʻufaʻu kākā ʻa e ngaahi meʻá ke ʻai ke hā ko e Kau Fakamoʻoní ko e kau fakatanga! Naʻe fēfē ʻa e tali ʻa hotau fanga tokouá?

18. Naʻe anga-fēfē ʻa e tali ʻa e fanga tokouá ki he fakatupu ʻitá, pea ko e hā ʻa e olá?

¹⁸ Naʻe fakaʻatā ʻe he Kau Fakamoʻoní ke fai ʻe he siasí haʻanau ouau haafe houa, ʻa ia ʻe hoko atu ʻa e fanga tokouá ʻi he hili iá ʻo fai ʻa e Fakamanatú. Naʻe ʻovataimi ʻa e ouau ʻa e siasí, ka ʻi he hili e mavahe atu ʻa honau ngaahi mēmipá, naʻe hoko atu ʻa e Fakamanatú. ʻI he ʻaho hono hokó, naʻe ui ai ʻe he puleʻangá ha poate fakaʻekeʻeke fakaʻofisiale. Hili e lāulea ki he ngaahi moʻoniʻi meʻá, naʻe tuʻutuʻuni ʻa e poaté ki he siasí ke nau fanongonongo ko e tupuʻanga ʻo e palopalemá naʻe ʻikai ko e Kau Fakamoʻoní, ka ko e palesiteni ʻo e siasí. Naʻe toe fakamālō ʻa e poaté ki he Kau Fakamoʻoni ʻa Sihová ʻi heʻenau fakaleleiʻi anga-kātaki ha tuʻunga faingataʻa. Ko e ngaahi feinga ʻa e Kau Fakamoʻoní ke “melino pe mo e kakai kotoa pe” naʻe ola lelei.

19. Ko e hā ha toe meʻa ʻoku lava ke pouaki ai ʻa e ngaahi vahaʻangatae melinó?

¹⁹ Ko e kī ʻe taha ki hono tauhi ʻa e vahaʻangatae melino mo e niʻihi kehé ko hono ngāueʻaki ʻa e lea anga-ʻofa. Ko e kupu hokó ʻe lāulea ai ki he lea anga-ʻofá mo e founga ʻe lava ke tau fakatupulekina ai pea ngāueʻaki iá.

[Fakamatala ʻi lalo]

ʻE Lava Ke Ke Fakamatalaʻi?

• Ko e hā ʻoku ʻita tōtuʻa ai ʻa e kakai ʻi he māmaní he ʻaho ní?

• Ko e hā ʻa e ngaahi fakatātā Fakatohitapu ʻoku fakahaaʻi ai ʻa e ngaahi nunuʻa ʻo hono mapuleʻi pe taʻemapuleʻi ʻo e ʻitá?

• ʻOku totonu ke fēfē ʻetau fakafeangaí kapau ʻoku fakalotomamahiʻi kitautolu ʻe ha kaungā Kalisitiane?

• ʻOku totonu ke fēfē ʻetau fakafeangai ki he ʻoho mei tuʻa ʻi he fakatahaʻangá?

[Fakatātā ʻi he peesi 16]

Naʻe foki ʻa Simione mo Līvai—ka ʻi he toki hili ʻena ʻulutukua ki he ʻitá

[Fakatātā ʻi he peesi 18]

Ko hono fakahāhā ʻo e anga-leleí ʻoku lava ke fakavaivaiʻi ai ʻa e tōʻonga ʻa e niʻihi kehé