Ngaahi Vīsone Fekauʻaki mo e Nofoʻanga Laumālié

SIO fakamamaʻu ki he langí ʻi he lōloa taha ʻo hoʻo saiʻiá, ka heʻikai te ke sio koe ai ki ha tokotaha laumālie. Fakafanongo, ka heʻikai te ke fanongo koe ai ki ha taha. Neongo ia, ʻokú ke fakapapauʻi nai ʻoku ʻi ai ʻa e ngaahi laumālie. ʻI he ʻatamaiʻia mo mālohi lahí, ʻoku ʻi ai honau ngaahi hingoa mo e ngaahi ʻulungaanga tāutaha. ʻOku fai mai ʻe he niʻihi ʻa e meʻa lelei kia kitautolu; ʻoku loto ʻa e niʻihi ke fakatupu ha maumau kia kitautolu. ʻOku nau mahuʻingaʻia kotoa ʻia kitautolu.

Ko e ʻOtua moʻoní tonu ko ha Laumālie. (Sione 4:24) ʻOku ʻi ai hano huafa laulōtaha ʻoku fakafaikehekeheʻi ai ia mei he ngaahi ʻotua loi tokolahí. Ko hono huafá ko Sihova. (Sāme 83:18) Naʻe tohi ʻe he tokotaha-tohi-sāmé: “ʻOku lahi ʻa Sihova, pea ʻoku totonu ke lahi hono fakamaloʻia; ʻoku hulu hono ngeia ʻi he ngaahi ʻOtua kotoa. He ko e aitoli pe ʻa e ʻotua ʻo e ngaahi faʻahinga: Ka naʻe ngaohi ʻa e langi ʻe Sihova. Ko e ngeia mo e langilangi ʻoku feʻao mo ia: Ko e ivi mo e toulekeleka ʻoku ʻi hono faletapu na.”—Sāme 96:4-6.

Ngaahi Vīsone Fekauʻaki mo e ʻOtua Moʻoní

“Ko e meʻa ki he ʻOtua, kuo teʻeki ke mamata ki ai ʻe ha taha ʻi ha taimi,” ko e meʻa ia ʻoku tala mai ʻe he Tohi Tapú. (Sione 1:18) Ko hono fōtungá mo hono lāngilangí ʻoku taumamaʻo ia ki heʻetau mahinó, hangē ko e taumamaʻo ʻa e ngaahi lanú ki ha tokotaha naʻe fanauʻi kui. Kae hangē pē ko hano fakamatalaʻi ʻe ha faiako lelei ʻa e ngaahi meʻa fihi ki he kau akó ʻi he ngaahi lea ʻe lava ke nau fakakaukau ki ai, ʻoku pehē pē ʻa e ʻOtuá, fakafou ʻi heʻene Folofolá, ko e Tohi Tapú, ʻokú ne fakamatalaʻi ai ʻa e ngaahi meʻa ʻoku ʻikai lava ke tau sio ki aí fakafou ʻi he ngaahi meʻa ʻoku lava ke tau sio ki ai. ʻI he ngaahi vīsone fakamānavaʻi naʻe ʻoange ki he faʻahinga faitōnunga ʻo e kuohilí, ʻoku tokoniʻi ai kitautolu ʻe Sihova ke tau sioloto atu ki he langí pea ke mahinoʻi ʻa ʻetau felāveʻi mo e faʻahinga ʻoku nofo aí.

Ko e fakatātaá, ko e vīsone ʻe taha naʻe ʻoange ki he palōfita ko ʻIsikelí, ʻoku fakafekauʻaki ai ʻa e lāngilangi ʻo Sihová ki ha afi, ngingila, maka sāfaia, pea mo ha ʻumata. ʻI ha toe vīsone ʻe taha, ʻoku mamata ai ʻa e ʻapositolo ko Sioné kia Sihova ʻi hono taloní peá ne fakamatala ko e ʻOtuá ʻoku “hā hangē ko e maka ko e siasipa, mo e satio,” peá ne toe pehē ʻoku “takatakai ki he taloni ʻa e ʻumata, ʻo hā hangē ko e emalata.” Ko e ngaahi fakamatala ko iá ʻoku tala mai ai kia kitautolu ko e ʻi ai ʻa Sihová ʻoku fakaʻofoʻofa hāhāmolofia mo fetapaki, fakaholomamata, mo nonga.—Fakahā 4:2, 3; Isikeli 1:26-28.

Naʻe maʻu foki ʻe he palōfita ko Tanielá ha vīsone fekauʻaki mo Sihova, ʻa ia naʻá ne sio ai ki he “tokoʻi mano laui mano [ngaahi meʻamoʻui ko e kau ʻāngelo] naʻe tuʻu ʻi hono ʻao [Sihova].” (Taniela 7:10) He meʻa fakaofo ē kuo pau naʻá ne sio ki aí! Ke sio, naʻa mo e ʻi he vīsoné, ʻe fakaofo ha ʻāngelo ʻe taha, kae feinga angé ke sioloto atu ki he laui mano ʻo e ngaahi meʻamoʻui ko e kau ʻāngelo haohaoa!

ʻOku lave ki he kau ʻāngeló ʻo meimei tuʻo 400 ʻi he Tohi Tapú, pea ko honau ngaahi tuʻungá ʻoku kau ai ʻa e kau selāfimi mo e kau selupimi. Ko e ongo foʻi lea faka-Kalisi mo e faka-Hepelū naʻe liliu ko e “ʻangelo” ʻi he Tohi Tapú ʻoku fakatou ʻuhingá ko e “talafekau.” Ko ia ai ko e kau ʻāngeló ʻoku lava ke nau fetuʻutaki fakaekinautolu, pea kuo nau fetuʻutaki ʻi he kuohilí mo e tangatá. Ko e kau ʻāngeló ʻoku ʻikai ko e faʻahinga kinautolu ʻo e tangatá ki muʻa naʻa nau moʻui ʻi he māmaní. Naʻe fakatupu ʻe Sihova ʻa e ngaahi laumālie ko ení ki muʻa fuoloa ia ʻi hono fakatupu ʻo e tangatá.—Siope 38:4-7.

ʻI he vīsone ʻa Tanielá, naʻe fakatahataha ai ʻa e fuʻu kau ʻāngelo tokolahi ke siotonu ʻi ha meʻa fakaofo. Naʻe mamata leva ʻa Taniela ki he “Taha hange ha hakoʻi tangata” ʻoku fakaofiofi atu ki he taloni ʻo Sihová ke ʻoange kiate ia ʻa e “hau, mo ha langilangi, mo ha pule, koeʻuhi ke tauhi kiate ia ʻe he ngaahi kakai, matakali, mo faʻahinga lea kehekehe.” (Taniela 7:13, 14) Ko e “hakoʻi tangata,” ko ha tokotaha tefito ʻi he nofoʻanga laumālié, ko Sīsū Kalaisi ia kuo toetuʻú, ʻa ia naʻe ʻoange kiate ia ʻa e pule ki he māmaní kotoa. Ko ʻene pulé kuo vavé ni ke ne fetongi ʻa e ngaahi puleʻanga fakaetangatá kotoa pea fakangata ʻa e mahamahakí, mamahí, fakafeʻātungiá, masivá, pea naʻa mo e maté.—Taniela 2:44.

Ko e fakanofo tuʻi ʻo Sīsuú kuo ʻoatu moʻoni ai ʻa e fiefia lahi ki he fuʻu tokolahi ʻo e kau ʻāngelo faitōnungá, ʻa ia ʻoku nau fiemaʻu ʻa e lelei taha maʻá e faʻahinga ʻo e tangatá. Neongo ia, ko e meʻa fakamamahí, kuo ʻikai ke ongoʻi pehē ʻa e ngaahi meʻamoʻui laumālié kotoa.

Ngaahi Fili ʻo e ʻOtuá mo e Tangatá

ʻI he kamataʻanga pē ʻo e hisitōlia ʻo e tangatá, ko e taha ʻo e kau ʻāngeló, ʻi hono ueʻi ʻe ha holi ke lotu ange ki aí, naʻá ne fakafepaki ai kia Sihova pea ʻai tonu ia ko Sētane, ʻoku ʻuhingá ko e “Tokotaha-Talitekeʻi.” Ko Sētane ʻa e fakasino taupotu ʻo e koví, ʻokú ne tuʻu ʻo fakafepaki lahi kia Sihova, ʻa ia ʻoku fakasino ʻiate ia ʻa e ʻofá. Naʻe kau fakataha ʻa e kau ʻāngelo kehe mo Sētane ʻi heʻene angatuʻú. ʻOku ui kinautolu ʻe he Tohi Tapú ko e fanga tēmeniō. Hangē ko Sētané, ko e fanga tēmenioó kuo nau ʻai kinautolu ko e ngaahi fili anga-fakamamahi ʻo e faʻahinga ʻo e tangatá. Ko e lahi ʻo e faingataʻa ʻi he māmaní, ʻa e fakamaau taʻetotonú, ko e mahamahakí, ko e masivá, pea mo e ngaahi taú ko e ngaahi nunuʻa ia ʻo ʻenau tākiekiná.

Neongo ko e talanoa fekauʻaki mo Sētané kuo hoko ʻo ʻikai kei tōʻongaʻaki ʻi he ngaahi siasi lahi ʻo e Puleʻanga-Haʻa-Kalisitiané, ʻoku ʻomai ʻe he tohi Siopé ʻi he Tohi Tapú ʻa e fakamaama ki he ʻulungaanga mo e ngaahi taumuʻa ʻa e ʻāngelo angatuʻu ko ení. ʻOku pehē ai: “Pea faifai pea hoko ʻa e ʻaho naʻe omi ai ʻa e ngaahi foha ʻo e ʻOtua ke ha kia Sihova, pea haʻu ʻa Setane foki ʻi honau lotolotonga.” ʻI he fetalanoaʻaki naʻe hoko atu aí, naʻe tukuakiʻi mālohi ai ʻe Sētane ko e tangata ko Siopé naʻá ne tauhi pē ki he ʻOtuá koeʻuhi ko e meʻa kuó ne maʻu mei aí. ʻI ha feinga ke fakamoʻoniʻi ʻene tukuakiʻí, naʻe ʻomai ʻe Sētane ʻa e mamahi lahi kia Siope, ʻi hono tāmateʻi ʻa ʻene fanga monumanú pea mo ʻene fānau kotoa ʻe toko hongofulú. Hili iá, naʻá ne taaʻi ʻa Siope ʻaki ha ngaahi hangatāmaki kovi ʻa ia naʻá ne maʻu hono sinó kotoa. Ko e kotoa ʻo e ngaahi ʻohofi naʻe fai ʻe Sētané naʻe ʻikai lava ke fakamoʻoniʻi ai ʻene tukuakiʻí.—Siope 1:6-19; 2:7.

ʻOku ʻi ai ʻa e ngaahi ʻuhinga lelei ki hono kātakiʻi ʻe Sihova ʻa Sētane ʻo fuʻu fuoloá, ka heʻikai te ne fai pehē ai pē ʻo taʻengata. Kuo vavé ni ke toʻo atu ʻa e Tēvoló. Kuo ʻosi fakahoko ʻa e muʻaki ngaahi sitepu ki aí pea ʻoku fakamatalaʻi mahino ia ʻi he tohi Fakahaá, ʻa ia ʻoku toe ʻi ai ha meʻa mahuʻinga ʻi he nofoʻanga laumālié naʻe ʻikai ʻaupito mei lava ke tau sio ki ai. ʻOku tau lau: “Naʻe hoko ha tau ʻi he langi: ko Maikeli [ko Sīsū Kalaisi kuo toetuʻú] mo ʻene kau ʻangelo naʻa nau fai tau mo e Talakoni [Sētane], pea naʻe tau ʻa e Talakoni mo ʻene kau ʻangelo aʻana, ka naʻe ʻikai te nau lava; ʻio, naʻe ʻikai kei maʻu hanau potu ʻi he langi. Pea naʻe kapusi ʻa e Talakoni lahi, ʻa ia ko e Ngata ʻo ono ʻaho, ʻa e toko taha ʻoku ui ko e Tevolo mo Setane, ʻa e toko taha ʻoku ne kākāʻi ʻa mamani kātoa: naʻe li ia ki mamani, pea li mo ia ʻene kau ʻangelo.”—Fakahā 12:7-9.

Fakatokangaʻi ʻoku pehē ko Sētané ʻokú ne “kākāʻi ʻa mamani kātoa.” ʻOkú ne kākaaʻi ʻa e kakaí ʻaki hono pouaki ʻa e ngaahi loi fakalotu ke fakatafokiʻi kinautolu meia Sihova mo ʻene Folofolá. Ko ha foʻi loi pehē ʻa e lau ko ia ʻi he maté ʻoku hoko atu ai ʻa e tokotaha kotoa ki he nofoʻanga laumālié. ʻOku ʻi ai ʻa e kehekehe lahi ʻi he fakakaukau ko ení. Ko e fakatātaá, ʻi ʻAfilika mo ʻĒsia, ʻoku tui ai ʻa e tokolahi ʻi he maté ʻoku hoko atu ai ʻa e kakaí ki ha māmani laumālie kuo nofoʻi ʻe heʻenau fanga kuí. Ko e ongo akonaki fekauʻaki mo pulekatolió mo e helí ʻoku toe fakatefito ia ʻi he fakakaukau ʻoku hokohoko atu ʻa e moʻui ʻa ha taha hili ʻa e maté.

Hili ʻa e Maté—Moʻui Fakahēvani?

Kae kehe, fēfē ʻa e tui kuo maʻu ʻe he laui miliona ʻi māmani lahi, ʻo pehē ʻoku ʻalu ʻa e kakai lelei kotoa pē ki hēvani? Ko e moʻoni ʻoku ʻalu ʻa e kakai lelei ʻe niʻihi ki ai, ka ko honau tokolahí ʻoku siʻi ia ʻi hono fakahoa atu ki he laui piliona kuo nau puli atu ʻi he maté. ʻOku fakahaaʻi ʻe he Tohi Tapú ko e kakai ʻe toko 144,000 ʻe “fakatau mei mamani” pea te nau ngāue ko e “ngaahi taulaʻeiki” mo “Hau [pe hoko ko e ngaahi tuʻi ki he] mamani.” (Fakahā 5:9, 10; 14:1, 3) ʻE faʻuʻaki kinautolu fakataha mo e hakoʻi tangatá, ʻa Sīsū Kalaisi, ha founga-pule fakahēvani, ko e Puleʻanga ʻo e ʻOtuá. ʻE fakangata ʻe he puleʻanga ko iá ʻa Sētane mo ʻene fanga tēmenioó pea te nau ngaohi ʻa e māmaní ko ha palataisi. Ko e tokolahi taha ʻo e faʻahinga ko ia kuo nau maté ʻe toe fakafoki kinautolu ki he moʻuí ʻi ha taimi he kahaʻú fakataha mo e ʻamanaki ʻo e moʻui taʻengata ʻi he Palataisi ko ia ʻi he māmaní.—Luke 23:43.

Ke fakanounoú leva, ko e fuʻu tokolahi ʻoku nau nofo ʻi he nofoʻanga laumālié. Ko e aoniu ʻi honau lotolotongá ko Sihova ko e ʻOtuá, ʻa e Tokotaha-Fakatupu ʻo e moʻuí kotoa. ʻOku tauhi faitōnunga kiate ia ʻa e kau ʻāngelo ʻe laui mano. Ko e kau ʻāngelo kehe, ʻi hono tataki ʻe Sētané, kuo nau fakafepaki kia Sihova pea ngāue ke kākaaʻi ʻa e tangatá. ʻIkai ko ia pē, ko ha tokolahi fakangatangata ʻo e tangatá kuo “fakatau” pe fili kinautolu mei he māmaní ke nau fakahoko ʻa e ngaahi fatongia makehe ʻi hēvani. ʻI he fakakaukau atu ki hení, tau lāulea he taimí ni pe ko hai ʻe lava ke fetuʻutaki ki ai ʻi he nofoʻanga laumālié pea mo e founga ʻoku totonu ke tau fai ai ʻa e fetuʻutakí.