ʻOua Naʻa Tuku ha Meʻa Ke Ne Taʻofi Koe mei Hono Maʻu ʻa e Lāngilangí
“Ko ia ʻoku laumālie anga-fakatōkilaló te ne maʻu ʻa e lāngilangí.”—PAL. 29:23, NW.
ʻE FĒFĒ HAʻO TALI?
Ko e hā ʻa e lāngilangi ʻoku malava ke tau maʻu mei he ʻOtuá?
Ko e hā ʻe lava ke ne taʻofi kitautolu mei hono maʻu ʻa e lāngilangí?
ʻI he ʻuhinga fē ʻe lava ke hoko ai ʻetau kātakí ko e lāngilangi ia ki he niʻihi kehé?
1, 2. (a) Ko e hā ʻa e ʻuhinga ʻo e foʻi lea ʻi he muʻaki leá ki he “lāngilangí”? (e) Ko e hā ʻa e ngaahi fehuʻi te tau lāulea ki ai ʻi he kupu ko ení?
ʻI HE taimi ʻokú ke fanongo ai ki he foʻi lea “lāngilangi,” ko e hā ʻoku haʻu ki hoʻo fakakaukaú? Ko e fuʻu fakaʻofoʻofa ʻo e fakatupú? (Saame 19:1) Ko e fakahīkihiki mo e fakalāngilangi ʻoku fai ki he faʻahinga ʻoku taha kehe atu ʻenau koloá, potó, pe ngaahi lavameʻá? ʻI he Folofolá, ko e foʻi lea ʻi he muʻaki leá ki he “lāngilangí” ʻokú ne ʻomai ʻa e foʻi ʻuhinga ko e mamafa. ʻI he kuonga muʻá—ʻi he taimi naʻe ngaohi ai ʻa e paʻangá mei he ngaahi mētale mahuʻingá—ko e mamafa ange ʻa e koiní, ko e lahi ange ia hono mahuʻingá. Ko e ngaahi foʻi lea naʻe ngāueʻaki ke fakamatalaʻiʻaki ʻa e foʻi fakakaukau ʻo e mamafá naʻe hoko ia ʻo mahinoʻi ʻi ha ʻuhinga fakaefakatātā ki he meʻa ʻoku fakamahuʻingaʻi, tuʻu-ki-muʻa, pe maongo.
2 Lolotonga ʻe maongo nai kia kitautolu ʻa e mafai, tuʻunga, pe ongoongo ʻo ha taha kehe, ko e hā ʻoku sio ki ai ʻa e ʻOtuá ʻi ha tangata? ʻOku lave moʻoni ʻa e Folofolá fekauʻaki mo ha lāngilangi ʻoku ʻoange ʻe he ʻOtuá ki he tangatá. Ko e fakatātaá, ʻoku pehē ʻi he Palōveepi 22:4: “ʻOku tataʻo mai ki he angamalu ʻa e ʻapasia kia Sihova: Haʻu ai mo e koloa mo e ongoongo [pe lāngilangi] mo e moʻui.” Pea naʻe tohi ʻe he ākonga ko Sēmisí: “Mou hoko ʻo anga-fakatōkilalo ʻi he vakai mai ʻa Sihová, pea te ne hakeakiʻi kimoutolu.” (Sēm. 4:10) Ko e hā ʻa e lāngilangi ʻoku foaki ʻe Sihova ki he tangatá? Ko e hā ʻe lava ke ne taʻofi kitautolu mei hono maʻu iá? Pea ʻe lava fēfē ke tau tokoniʻi ʻa e niʻihi kehé ke nau maʻu ʻa e lāngilangi ko ení?
3-5. Ko e hā ʻa e lāngilangi ʻe taki nai kitautolu ki ai ʻe Sihová?
3 Naʻe fakahaaʻi ʻe he tokotaha-tohi-sāmé ʻa e falala-pau ʻe puke ʻe Sihova hono nima toʻomataʻú pea tataki ia ki he nāunau pe lāngilangi moʻoní. (Lau ʻa e Saame 73:23, 24, “PM.”) ʻOku anga-fēfē hono fai eni ʻe Sihová? ʻOku tataki ʻe Sihova ʻene kau sevāniti anga-fakatōkilaló ki he lāngilangí ʻaki hono fakangeingeiaʻi kinautolu ʻi he ngaahi founga lahi. ʻOkú ne tāpuakiʻi kinautolu ke nau mahinoʻi hono finangaló. (1 Kol. 2:7) ʻOkú ne foaki ki he faʻahinga ʻoku fanongo ki heʻene folofolá pea talangofua kiate iá ʻa e lāngilangi ʻo ha vahaʻangatae fakafoʻituitui vāofi mo ia.—Sēm. 4:8.
4 ʻOku toe tuku ʻe Sihova ki heʻene kau sevānití ʻa e koloa lāngilangiʻia ko e ngāue fakafaifekau faka-Kalisitiané. (2 Kol. 4:1, 7) Pea ko e ngāue fakafaifekau ko ení ʻoku tataki atu ia ki he lāngilangi. Ko e faʻahinga ʻoku nau ngāueʻaki honau monū ʻo e ngāué ke fakahīkihikiʻi iá pea ke maʻu ʻaonga ai ʻa e niʻihi kehé, ʻoku talaʻofa ʻa Sihova ki ai: “Ko kinautolu ʻoku fakahikihikiʻi au te u fakahikihikiʻi.” (1 Sām. 2:30) Ko e faʻahinga peheé ʻoku fakangeingeiaʻi kinautolu ʻaki ha hingoa lelei ʻi he vakai mai ʻa Sihová, pea ʻoku ngalingali ʻe talanoaʻi lelei kinautolu ʻe he kau sevāniti kehe ʻa e ʻOtuá.—Pal. 11:16; 22:1.
5 Fēfē ʻa e kahaʻu ʻo e faʻahinga ʻoku nau “tatali kia Sihova pea tauhi hono ʻalunga”? ʻOku talaʻofa kia kinautolu: “Te ne [Sihova] hakeakiʻi koe ke maʻu ʻa e fonua: Ka hoko ʻa e motuhi ʻo haʻa faikovi te ke mātā ia.” (Saame 37:34) ʻOku nau hanga atu ke maʻu ʻa e ngeia taʻealafakatataua ʻo hono maʻu ʻa e moʻui taʻengatá.—Saame 37:29.
“ʻOKU ʻIKAI TE U TALI ʻA E LĀNGILANGI MEI HE TANGATÁ”
6, 7. Ko e hā naʻe ʻikai loto-lelei ai ʻa e tokolahi ke tui kia Sīsuú?
6 Ko e hā ʻe lava ke ne taʻofi kitautolu mei hono maʻu ʻa e lāngilangi ʻoku loto-lelei ʻa Sihova ke ʻomai kia kitautolú? Ko e moʻoniʻi meʻa ʻe taha ko hono fai ʻa e fakamamafa tōtuʻa ki he ngaahi fakakaukau ʻa e faʻahinga ʻoku ʻikai hanau tuʻunga lelei ʻi he vakai mai ʻa e ʻOtuá. Fakakaukau ki he meʻa naʻe tohi ʻe he ʻapositolo ko Sioné fekauʻaki mo e faʻahinga maʻu mafai ʻe niʻihi ʻi he ʻaho ʻo Sīsuú: “Naʻa mo e tokolahi ʻo e kau pulé naʻa nau tui moʻoni [kia Sīsū], ka koeʻuhi ko e kau Fālesí, naʻe ʻikai ai te nau fakahaaʻi ʻenau tui kia Sīsuú, ke ʻoua naʻa kapusi ai kinautolu mei he sinakoké; he naʻa nau manako ki he lāngilangi ʻo e tangatá ʻo mahulu hake ia ʻi he lāngilangi ʻo e ʻOtuá.” (Sione 12:42, 43) Naʻe mei lelei lahi ange ki he kau pule ko iá kapau naʻe ʻikai te nau fakamahuʻingaʻi lahi ʻa e meʻa naʻe fakakaukau ki ai ʻa e kau Fālesí.
7 Ki muʻa ange ʻi heʻene ngāue fakafaifekaú, naʻe fakamatalaʻi mahino ʻe Sīsū ʻa e ʻuhinga naʻe ʻikai tali ai ia ʻe he tokolahi mo tui kiate iá. (Lau ʻa e Sione 5:39-44.) Ko e puleʻanga ʻIsilelí naʻa nau tatali atu ʻi he laui senituli ki he aʻu mai ʻa e Mīsaiá. ʻI he taimi naʻe kamata ai ʻa e faiako ʻa Sīsuú, ko e faʻahinga tāutaha ʻe niʻihi naʻa nau ʻiloʻi nai mei he kikite ʻa Tanielá ko e taimi kotofa ki he hā mai ʻa Kalaisí kuo aʻu mai ia. ʻI ha ngaahi māhina ki muʻa ai ʻi he taimi naʻe malanga ai ʻa Sione ko e Faipapitaisó, naʻe pehē ʻe he tokolahi: “Ko e Kalaisí nai ia?” (Luke 3:15) ʻI he taimi ko ení naʻe ʻi honau lotolotongá ai ʻa e Mīsaia naʻe fai ʻa e tatali fuoloa ki aí ʻo faiako. Ka ko e faʻahinga naʻe mataotao ʻi he Laó naʻe ʻikai ke nau tali ia. ʻI hono fakaeʻa tonu ʻa e ʻuhingá, naʻe ʻeke ange ʻe Sīsū: “ʻE lava fēfē ke mou tui, lolotonga ia ʻoku mou tali ʻa e fefakalāngilangiʻaki ʻoku mou fai ʻiate kimoutolú kae ʻikai te mou kumi ki he lāngilangi ko ia ʻoku mei he ʻOtua tofu pē tahá?”
8, 9. ʻI hono ngāueʻaki ʻa e fakatātā ʻo e māmá, fakahaaʻi ʻa e founga ʻe lava ai ʻe he lāngilangi fakaetangatá ʻo fakaʻuliʻulilātaiʻi ʻa e lāngilangi fakaʻotuá.
8 Ko e founga ʻe lava ke fakaʻuliʻulilātaiʻi ai ʻe he lāngilangi fakaetangatá ʻa e lāngilangi fakaʻotuá ʻe lava ke fakatātaaʻiʻaki ia hono fakahoa ʻa e lāngilangí ki he māmá. Ko hotau ʻunivēsí ʻoku fonu ʻi he maama. ʻOkú ke manatuʻi ʻa e taimi naʻá ke sio fakamuimui ai ki he langí ʻi ha pō tafitonga peá ke ʻilo ai ʻoku takatakaiʻi koe ʻe he ngaahi fetuʻu ʻe laui afe? “Ko e nāunauʻia ʻo e ngaahi fetuʻú” ʻoku fakaofo. (1 Kol. 15:40, 41) Ka ʻi he taimi ʻoku vakai ai ki ai mei he hala ʻo ha kolo ʻoku lahi ai ʻa e māmá, ʻoku anga-fēfē ʻa e hā mai ʻa e langi tatau ko iá? He ko e ngaahi maama ʻi he koló ʻokú ne ʻai ai ke ʻikai mei malava ke tau sio ki he maama ʻoku tapua mai mei he ngaahi fetuʻu mamaʻó! ʻOku pehē ení koeʻuhí ko e ngaahi maama mei he ngaahi halá, ngaahi sitētiumé, mo e ngaahi falé ʻoku mālohi ange pe fakaʻofoʻofa ange ia ʻi he maama mei he fetuʻú? ʻIkai! ʻOku hoko eni koeʻuhí ko e ngaahi maama ʻi he koló ʻoku ofi ange ia kia kitautolu pea ʻoku nau fakahohaʻasi ʻa e meʻa ʻe lava ke tau ʻiloʻi fekauʻaki mo e fakatupu ʻa Sihová. Ke mātā ʻa e fakaofo ʻo e langí ʻi he poʻulí, kuo pau ke tau taʻofi pe fakaʻehiʻehi ʻi ha founga mei he fakahohaʻa ʻa e maama faʻu ʻe he tangatá.
9 ʻI he tuʻunga meimei tatau, kapau naʻe fuʻu ofi mai ki hotau lotó ʻa e faʻahinga hala ʻo e lāngilangí, ʻe lava ke ne taʻofi kitautolu mei hono fakahoungaʻi pea kumi ki he lāngilangi tuʻuloa ʻoku loto-lelei ʻa Sihova ke foaki maí. ʻOku ʻikai ke tali ʻe he tokolahi ʻa e pōpoaki ʻo e Puleʻangá koeʻuhí ʻoku nau ilifia ki he meʻa ʻe fakakaukau nai ki ai ʻa honau ngaahi mahení pe ngaahi mēmipa ʻo e fāmilí fekauʻaki mo kinautolú. Ka ʻe lava nai ke uesia ʻe he holi ke maʻu ʻa e lāngilangi mei he tangatá naʻa mo e kau sevāniti ʻosi fakatapui ʻa e ʻOtuá? Fakaʻuta atu ko ha kiʻi talavou ʻoku vaheʻi ke malanga ʻi ha feituʻu ʻa ia ʻoku ʻiloʻi nai ai ia ʻi he feituʻu ko iá ka ʻoku teʻeki ai ke ʻiloʻi ia ko e taha ʻo e Kau Fakamoʻoni ʻa Sihová. Te ne tauholomui nai ʻi he manavahē? Pe, fēfē kapau ʻoku manukiʻi ha taha koeʻuhi ko ʻene tuli ki he ngaahi taumuʻa fakateokalatí? Te ne fakaʻatā ʻa e faʻahinga ʻoku ʻikai māʻalaʻala ʻenau sio fakalaumālié ke nau tākiekina ʻene ngaahi fili he moʻuí? Pe mahalo ko ha Kalisitiane kuó ne fai ha angahala mamafa. Te ne fūfuuʻi ʻene faihalá koeʻuhí ʻokú ne manavahē ʻi he mole hono tuʻunga ʻi he fakatahaʻangá pe koeʻuhí ʻoku ʻikai ke ne loto ke fakalotomamahiʻi ʻa e faʻahinga ʻokú ne ʻofa aí? ʻI he tuʻunga ko iá, kapau ko ʻene fakakaukau tefitó ke fakaleleiʻi hono vahaʻangatae mo Sihová, te ne “ui mai ʻa e kau mātuʻa ʻo e fakatahaʻangá” pea kumi ki heʻenau tokoní.—Lau ʻa e Sēmisi 5:14-16.
10. (a) ʻE anga-fēfē hano uesia nai ʻe he hohaʻa tōtuʻa fekauʻaki mo e anga ʻo e vakai mai ʻa e niʻihi kehé ki heʻetau fakafuofuá? (e) Ko e hā ʻoku tau fakapapauʻí kapau ʻoku tau ngāue ʻi he anga-fakatōkilalo?
10 ʻOku tau fakalakalaka atu nai ki he matuʻotuʻa faka-Kalisitiané ka ʻoku akonakiʻi kitautolu ʻe ha kaungātui. Ko ʻene ngaahi fakamatala faitotonú ʻe lava ke ne tokoniʻi kitautolu kapau heʻikai ke tau feinga ke taukapoʻi kitautolu koeʻuhi ko e hīkisiá, ko e holi ke taʻofi ʻa e fakamaá, pe ko e fakatauele ke fakatonuhiaʻi hotau ʻalungá. Pe mahalo ʻokú ke fai fakataha ha ngāue mo ha kaungātui. Ko hoʻo fengāueʻaki fakataha mo iá ʻe tākiekina nai ia ʻe hoʻo hohaʻa pe ko hai ʻokú ne maʻu ʻa e lāngilangi ki hoʻo ngaahi fakakaukau leleí mo e ngāue mālohí? Kapau ʻokú ke hokosia ha taha ʻo e ongo tuʻunga ko ení, fakapapauʻi “ko ia ʻoku laumālie anga-fakatōkilaló te ne maʻu ʻa e lāngilangí.”—Pal. 29:23, NW.
11. ʻOku totonu ke fēfē ʻetau ongoʻi ʻi loto ki he fakaongoongoleleí, pea ko e hā hono ʻuhingá?
11 Ko e kau ʻovasiá mo e faʻahinga “ʻoku kakapa atu” ki ha fatongia pehē ʻoku totonu ke pehē pē ʻenau fakaʻehiʻehi mei hono kumi ʻa e fakahīkihiki mei he tangatá. (1 Tīm. 3:1; 1 Tes. 2:6) ʻOku totonu ke fēfē ʻa e tali ʻa ha tokoua ʻi he taimi ʻoku fai atu ai ha fakaongoongolelei loto-moʻoni ki ha ngāue kuó ne fakahoko lelei? Ngalingali ʻe ʻikai te ne fokotuʻu moʻona hano fakamanatu, ʻo hangē ko ia naʻe fai ʻe Tuʻi Saulá. (1 Sām. 15:12) Kae kehe, ʻokú ne fakahaaʻi loto-lelei nai ko ʻene lavameʻá naʻe malava pē iá ʻi he ʻofa maʻataʻatā ʻa Sihová pea ko ha ʻamanaki pē ki ha lavameʻa ʻi he kahaʻú ʻoku kei fakatuʻunga pē ia ʻi he tāpuaki mo e tokoni ʻa e ʻOtuá? (1 Pita 4:11) Ko ʻetau ongoʻi ʻi loto ki he fakahīkihikí ʻoku fakaeʻa ai pe ko e faʻahinga lāngilangi fē ʻoku tau kumí.—Pal. 27:21.
“ʻOKU MOU LOTO KE FAI ʻA E NGAAHI HOLI ʻA HOʻOMOU TAMAÍ”
12. Ko e hā naʻá ne taʻofi ʻa e kau Siu ʻe niʻihi mei he fanongo kia Sīsuú?
12 Ko e tafaʻaki ʻe taha ʻe lava ke ne taʻofi kitautolu mei hono maʻu ʻa e lāngilangi mei he ʻOtuá ko ʻetau ngaahi holí. Ko e ngaahi holi ʻoku halá ʻe lava ke ne taʻofi kitautolu ke ʻoua ʻaupito te tau fanongo ki he moʻoní. (Lau ʻa e Sione 8:43-47.) Naʻe tala ange ʻe Sīsū ki he kau Siu ʻe niʻihi, naʻe ʻikai ke nau fanongo ki heʻene pōpoakí koeʻuhí ‘naʻa nau loto ke fai ʻa e ngaahi holi ʻa ʻenau tamai ko e Tēvoló.’
13, 14. (a) Ko e hā ʻoku leaʻaki ʻe he kau fakatotoló ʻo fekauʻaki mo e founga ʻo e ngāue hotau ʻutó ki he lea fakaetangatá? (e) Ko e hā ʻokú ne fakapapauʻi pe ko hai te tau fanongo ki aí?
13 Ko e meʻa ʻoku tau holi ki aí ʻokú ne tākiekina ʻa e anga ʻetau fanongó. (2 Pita 3:5) Naʻe faʻu kitautolu ʻe Sihova mo e malava fakaofo ke tukunoaʻi ʻa e ngaahi ongo fakahohaʻa ʻoku ʻikai fiemaʻú. Kiʻi tuʻu ʻi ha mōmeniti pea tokanga angé ki he lahi ʻo e ngaahi ongo kehekehe ʻe lava ke ke fakatokangaʻi he taimi ní. Ki muʻa angé, ngalingali naʻe ʻikai te ke fakatokangaʻi ʻa e lahi ʻo e ngaahi ongo ko iá. Neongo ʻoku maʻu ʻe ho ʻutó ʻa e malava ke fanongo ki he ngaahi ongo kehekehe kotoa ko iá, naʻá ne tokoniʻi koe ke ke tokangataha pē ki he meʻa pē ʻe taha. Ka kuo ʻilo ʻe he kau fakatotoló ko e foʻi ngāue ko ia ʻo hono fakafaikehekeheʻi ʻi he taimi tatau ʻa e ngaahi ongo lahi kehekehe ʻoku hoko ia ʻo toe faingataʻa ange ʻi he taimi ʻoku tau fanongo ai ki he lea ʻa ha taha. ʻOku ʻuhinga ení ʻi he taimi ʻokú ke fanongo ai ki ha leʻo ʻe ua he taimi tatau, kuo pau ke ke fili ʻa e taha te ke tokanga tefito ki aí. Ko hoʻo filí ʻe fakatuʻunga ia pe ko fē ʻa e taha ko ia ʻokú ke loto ke fanongo ki aí. Ko e kau Siú ʻa ia naʻa nau loto ke fai ʻa e ngaahi holi ʻa ʻenau tamaí, ʻa e Tēvoló, naʻe ʻikai ke nau fanongo kia Sīsū.
14 ʻOku tau maʻu ʻa e ngaahi pōpoaki mei he ‘fale ʻo e potó’ pea mei he ‘fale ʻo e valé.’ (Pal. 9:1-5, 13-17) Fakatouʻosi ʻa e potó mo e valé ʻoku hangē ko e laú ʻokú na hanganaki tangi mai kia kitautolu, pea ʻoku tuku mai ai ʻi he meʻa ko iá kia kitautolu ha fili. Ko e fakaafe ʻa hai te tau talí? Ko e talí ʻoku fakatuʻunga ia pe ko e loto ʻo hai ʻoku tau loto ke faí. ʻOku fanongo ʻa e fanga sipi ʻa Sīsuú ki hono leʻó pea muimui ʻiate ia. (Sione 10:16, 27) ʻOku nau “ʻi he faʻahi ʻo e moʻoní.” (Sione 18:37) “ʻOku ʻikai te nau ʻiloʻi ʻa e leʻo ʻo e faʻahinga kehé.” (Sione 10:5) Ko e faʻahinga anga-fakatōkilalo peheé ʻoku nau maʻu ʻa e lāngilangí.—Pal. 3:13, 16; 8:1, 18.
“ʻOKU HOKO ʻA E NGAAHI MEʻÁ NI KO HA LĀNGILANGI MAʻAMOUTOLU”
15. Naʻe lava fēfē ke hoko ʻa e ngaahi mamahi ʻa Paulá “ko ha lāngilangi” ki he niʻihi kehé?
15 Ko ʻetau kītaki ʻi hono fai ʻa e finangalo ʻo Sihová te ne tokoniʻi ʻa e niʻihi kehé ke nau maʻu ʻa e lāngilangí. Naʻe tohi ʻa Paula ki he fakatahaʻanga ʻi ʻEfesoó: “ʻOku ou kole atu kiate kimoutolu ke ʻoua te mou foʻi ko e meʻa ʻi hoku ngaahi mamahi koeʻuhi ko kimoutolú, he ʻoku hoko ʻa e ngaahi meʻá ni ko ha lāngilangi maʻamoutolu.” (ʻEf. 3:13) ʻI he ʻuhinga fē naʻe hoko ai ʻa e ngaahi mamahi ʻa Paulá “ko ha lāngilangi” ki he kau ʻEfesoó? Ko e mateuteu ʻa Paula ke hokohoko atu ʻene ngāue kia kinautolu neongo ʻa e ngaahi ʻahiʻahí naʻe fakahaaʻi ai ki he kau ʻEfesoó ko e ngaahi monū naʻa nau maʻu ʻi he tuʻunga ko e kau Kalisitiané naʻe mafatukituki pea ko e meʻa mahuʻinga taha ia ʻoku ala fakakaukau atu ki aí. Kapau naʻe foʻi ʻa Paula ʻi he malumalu ʻo e mamahí, ʻikai naʻe mei fakaaʻu atu ai ʻa e pōpoaki ko honau vahaʻangatae mo Sihová, ʻenau ngāue fakafaifekaú, mo ʻenau ʻamanakí naʻe ʻikai hano mahuʻinga? Ko e kātaki ʻa Paulá naʻe hakeakiʻi ai ʻa e lotu faka-Kalisitiané pea fakahaaʻi ai ko e tuʻunga-ākongá ʻoku tuha ia mo ha feilaulau pē.
16. Ko e hā ʻa e mamahi naʻe hokosia ʻe Paula ʻi Līsitá?
16 Fakakaukau fekauʻaki mo e ola ʻo e faivelenga mo e kātaki ʻa Paulá. ʻOku fakamatala ʻi he Ngāue 14:19, 20: “Naʻe aʻu mai ha kau Siu mei ʻAniteoke mo ʻAikoniume ʻo nau fakalotoʻi ʻa e fuʻu kakaí, pea nau tolomakaʻi ʻa Paula pea toho ia ki tuʻa mei he koló [ʻa Līsita], ʻi he fakakaukau kuó ne ʻosi mate. Kae kehe, ʻi he takatakai kiate ia ʻa e kau ākongá, naʻá ne mālanga hake ʻo ne hū ki he koló. Pea ʻi he ʻaho hono hokó naʻá ne mavahe ai mo Panepasa ki Teape.” Fakaʻuta atu ki hono liʻaki ʻo pehē kuo mate ʻi he ʻaho pē ʻe tahá pea fai ha fononga ʻi ha maile ʻe 60 (100 km) ʻi he ʻaho pē hono hokó, pea fai ia ʻo ʻikai ha meʻalele!
17, 18. (a) ʻI he ʻuhinga fē naʻe malava ai ʻa Tīmote ke muimui ofi ʻi he faingataʻaʻia ʻa Paula ʻi Līsitá? (e) Ko e hā ʻa e ola ʻo e kātaki ʻa Paulá kia Tīmoté?
17 Naʻe kau nai ʻa Tīmote ʻi he taha ʻo e “kau ākongá” ʻa ia naʻe fakatahataha atu ke tokoniʻi ʻa Paulá? Ko e fakamatala ʻi he tohi Ngāué ʻoku ʻikai ke fakahaaʻi mahino mai ia ai, ka ʻoku malava pē ke pehē. Fakakaukau ki he meʻa naʻe tohi ʻe Paula ʻi heʻene tohi hono ua kia Tīmoté: “Kuó ke muimui ofi ʻi heʻeku akonakí, ʻi heʻeku ʻalunga moʻuí, . . . ʻo hangē ko ia naʻá ku hokosia ʻi ʻAniteoké [ʻa hono kapusi mei he koló], ʻi ʻAikoniumé [ʻa e feinga ke tolomakaʻí], ʻi Līsitá [ʻa e tolomakaʻí]. Naʻá ku kātekina ʻa e ngaahi fakatanga ko ʻení, pea naʻe fakahaofi au ʻe he ʻEikí mei he ngaahi meʻa ko iá kotoa.”—2 Tīm. 3:10, 11; Ngā. 13:50; 14:5, 19.
18 Naʻe “muimui ofi” ʻa Tīmote ʻi he ngaahi meʻa naʻe hoko ko iá pea naʻá ne ʻilo fakaʻāuliliki fekauʻaki mo e kātaki ʻa Paulá. Naʻe maongo loloto eni ki he ʻatamai ʻo Tīmoté. ʻI he taimi naʻe ʻaʻahi ai ʻa Paula ki Līsitá, naʻá ne ʻilo ai ʻa Tīmote ko ha Kalisitiane ala faʻifaʻitakiʻanga, ʻa ia “naʻe talanoaʻi ʻa e lelei ʻa hono ongoongó ʻe he fanga tokoua ʻi Līsita mo ʻAikoniumé.” (Ngā. 16:1, 2) ʻI he faai mai ʻa e taimí, naʻe taau ai ʻa Tīmote ke ne fua ha ngaahi fatongia mamafa.—Fil. 2:19, 20; 1 Tīm. 1:3.
19. Ko e hā ʻa e ola ʻe lava ke fai ʻe heʻetau kātakí ki he niʻihi kehé?
19 Ko ʻetau kītaki ʻi hono fai ʻa e finangalo ʻo e ʻOtuá ʻe lava ke ʻi ai hono ola meimei tatau ki he niʻihi kehé—tautefito ki he fānaú, ko e tokolahi ʻo kinautolu te nau tupu hake ʻo hoko ko e kau sevāniti mātuʻaki mahuʻinga ʻa e ʻOtuá. Ko e kau ākonga kei siʻí ʻoku ʻikai ngata pē ʻi heʻenau siofi kitautolu pea ako ʻa e ngaahi founga lea mo e ngaahi pōtoʻi meia kitautolu ʻi he ngāue fakamalangá ka ʻoku nau toe maʻu ʻaonga mei he sio ki he anga ʻetau fakafeangai ki he ngaahi tuʻunga faingataʻa ʻo e moʻuí. Ko Paula naʻe ‘hokohoko atu ʻene kātekina ʻa e ngaahi meʻa kotoa pē’ koeʻuhí ke hoko ai ʻa kinautolu kotoa ʻoku nofoʻaki faitōnungá ʻo ‘maʻu ʻa e fakamoʻuí fakataha mo e lāngilangi taʻengata.’—2 Tīm. 2:10.
20. Ko e hā ʻoku totonu ai ke tau hokohoko atu ke kumi ki he lāngilangi ʻoku mei he ʻOtuá?
20 ʻIkai ʻoku totonu leva ke tau hokohoko atu ke “kumi ki he lāngilangi ko ia ʻoku mei he ʻOtua tofu pē tahá”? (Sione 5:44; 7:18) Ko ia hono kotoa! (Lau ʻa e Loma 2:6, 7.) ʻOku foaki ʻe Sihova ʻa e ‘moʻui taʻengatá ki he faʻahinga ʻoku nau kumi ki he lāngilangí.’ ʻIkai ko ia pē, ko ʻetau “kātaki ʻi he ngāue ʻa ia ʻoku leleí” ʻoku fakaʻaiʻai ai ʻa e niʻihi kehé ke nau tuʻu maʻu ai pē, ʻo hoko ia ko e ʻaonga tuʻuloa kia kinautolu. Ko ia ai, ʻoua naʻa tuku ha meʻa ke ne taʻofi koe mei hono maʻu ʻa e lāngilangi ʻoku foaki mai ʻe he ʻOtuá.
[Fakatātā ʻi he peesi 25]
[Fakatātā ʻi he peesi 28]
[Fakatātā ʻi he peesi 29]
Fānau, mou houngaʻia ʻi he kītaki ʻa e kau Kalisitiane taʻumotuʻá