“Fai Eni ko Hoku Fakamanatu”

“ʻI he hili hono fai ha fakafetaʻí, naʻá ne pakipaki [ʻa e maá] mo ne pehē: ‘ʻOku ʻuhinga eni ki hoku sinó ʻa ia ʻoku foaki koeʻuhi ko kimoutolu. Hanganaki fai eni ko hoku fakamanatu.’”—1 KOL. 11:24.

ʻE FĒFĒ HAʻO TALI?

ʻOku anga-fēfē hono ʻiloʻi ʻa e ʻaho ʻo e Fakamanatú ʻi he taʻu taki taha?

ʻOku ʻuhinga ki he hā ʻa e maá mo e uainé?

Pe ʻoku tau ʻamanaki ke moʻui ʻi hēvani pe ʻi he māmaní, ko e hā ʻoku mahuʻinga ai ke ʻi he Fakamanatú?

1, 2. Ko e hā nai ʻa e fakakaukau ʻa e niʻihi ʻo e kau ʻapositoló ki muʻa ʻi he fononga fakaʻosi ʻa Sīsū ki Selusalemá?

‘ʻOKU tafitonga ʻa e langí he taimí ni, pea ʻoku lava ke tau sio ki he māhina kalipá. Kuo pau pē naʻe toe sio ki ai ʻanepō ʻa e kau tangata-leʻo ʻi Selusalemá. ʻI he ʻilo pē ʻa e Sanetalimí ki he meʻá ni, naʻa nau fanongonongo kuo kamata ʻa e māhina foʻoú, ʻa Nīsani. Naʻe fakamafola vave atu leva ʻa e ongoongó ʻaki hono tutu ha afi pe ʻoatu ʻe ha kau talafekau. Naʻa mo e kakai ʻi hení kuo nau fanongo ʻi he ongoongó. Ko e moʻoni, ʻe loto ʻa Sīsū ke mavahe atu ki Selusalema koeʻuhí ke ne lava ʻo ʻi ai ki muʻa ʻi he Pāsová.’

² Mahalo ko e ngaahi fakakaukau eni ʻa e niʻihi ʻo e kau ʻapositoló ʻi he taimi naʻa nau fakataha ai mo Sīsū ki muʻa ʻi heʻene fononga fakaʻosi ki Selusalemá. ʻI he taimi ko iá naʻa nau ʻi Pēlea, ʻi he tafaʻaki ʻe taha ʻo e Vaitafe Sioataní. (Māt. 19:1; 20:17, 29; Mk. 10:1, 32, 46) ʻI hono ʻiloʻi pē ʻe he kau Siú ʻa e taimi ʻe kamata ai ʻa Nīsani 1, te nau tatali ʻi ha toe ʻaho ʻe 13 pea kātoangaʻi leva ʻa e Pāsová hili ʻa e tō ʻa e laʻaá ʻi Nīsani 14.

 3. Ko e hā ʻoku mahuʻingaʻia ai ʻa e kau Kalisitiané ʻi he ʻaho ʻo e Pāsová?

³ Ko e ʻaho ʻo e Kai Efiafi ʻa e ʻEikí, ʻa ia ʻoku fehoanaki mo e Pāsová, ʻe fai ia hili ʻa e tō ʻa e laʻaá ʻi ʻEpeleli 14, 2014. ʻE hoko ia ko ha ʻaho makehe ki he kau Kalisitiane moʻoní mo e kakai mahuʻingaʻiá. Ko e hā hono ʻuhingá? Koeʻuhí ko e meʻa ʻoku tau lau ʻi he 1 Kolinitō 11:23-25: “Ko Sīsuú, ʻi he pō ko ia naʻe teu ai ke lavakiʻi iá, naʻá ne toʻo ha mā pea ʻi he hili hono fai ha fakafetaʻí, naʻá ne pakipaki ia mo ne pehē: ‘ʻOku ʻuhinga eni ki hoku sinó ʻa ia ʻoku foaki koeʻuhi ko kimoutolu. Hanganaki fai eni ko hoku fakamanatu.’ Naʻá ne fai foki ʻa e meʻa tatau ki he ipú.”

 4. (a) Ko e hā ʻa e ngaahi fehuʻi te ke ʻeke hifo nai kiate koe fekauʻaki mo e Fakamanatú? (e) ʻOku anga-fēfē ʻetau ʻilo ʻa e ʻaho ʻe kātoangaʻi ai ʻa e Fakamanatú ʻi he taʻu taki taha? (Sio foki ki he puha “Fakamanatu 2014.”)

⁴ Ko e Fakamanatú ko e meʻa pē ia ʻe taha naʻe tala ange ʻe Sīsū ki hono kau muimuí ke nau kātoangaʻi ʻi he taʻu taki taha, pea te ke loto moʻoni ke ʻi ai. Ki muʻa aí, ʻeke hifo kiate koe: ‘ʻOku totonu ke fēfē ʻeku mateuteu ki he Fakamanatú? Ko e hā ʻa e meʻa fakaefakatātā ʻe ua ʻoku ngāueʻaki ʻi he Fakamanatú? Ko e hā ʻe hoko aí? Ko e hā ʻoku mahuʻinga ai kiate au ʻa e Fakamanatú mo e meʻa fakaefakatātā ʻe uá?’

MEʻA FAKAEFAKATĀTĀ ʻE UA ʻOKU NGĀUEʻAKI ʻI HE FAKAMANATÚ

 5. Ko e hā naʻe tala ange ʻe Sīsū ki he kau ʻapositoló ke nau fai ke teuteu ki he Pāsová?

⁵ ʻI he taimi naʻe tala ai ʻe Sīsū ki he kau ʻapositoló ke teuteu ha loki ki he kai ʻo e Pāsová, naʻe ʻikai te ne tala ange kia kinautolu ke teuteuʻi ʻa e lokí. Ka, naʻá ne loto pē ke maʻa ʻa e lokí, faingofua mo feʻunga kiate ia mo ʻene kau ʻapositoló. (Lau ʻa e Maʻake 14:12-16.) ʻE toe ʻomai ʻe he kau ʻapositoló ʻa e meʻa kotoa ʻoku fiemaʻu ki he kaí, kau ai ʻa e mā taʻelēvani mo e uaine kulokula. Hili ʻa e kai Pāsová, naʻe lea ʻa Sīsū ʻo fekauʻaki mo e maá mo e uainé. Ko e meʻa fakaefakatātā eni ʻe ua ʻe ngāueʻaki ki hono kātoangaʻi ʻa e Fakamanatú.

 6. (a) Hili ʻa e kai Pāsová, ko e hā naʻe leaʻaki ʻe Sīsū fekauʻaki mo e maá? (e) Ko e hā ʻa e faʻahinga mā ʻoku ngāueʻaki ʻi he Fakamanatú?

⁶ Naʻe ʻi ai ʻa e ʻapositolo ko Mātiú peá ne tohi ki mui ange: “Naʻe toʻo ʻe Sīsū ha mā, pea ʻi he hili ʻene tāpuakiʻi iá, naʻá ne pakipaki ia, ʻo ne ʻoange ki he kau ākongá peá ne pehē: ‘Mou toʻo, ʻo kai.’” (Māt. 26:26) Ko e ‘maá’ ko e mā taʻelēvani, ko e mā pē ia naʻe ngāueʻaki ki he Pāsová. (ʻEki. 12:8; Teu. 16:3) Naʻe ngaohi ʻa e mā ko ení mei he mahoaʻa uite mo e vai. Naʻe taʻelēvani, ʻo ʻuhingá naʻe ʻikai tānaki ki ai ha lēvani, ko ia naʻe ʻikai ke tupu ʻa e maá. Naʻe ʻikai foki toe ʻai ai ha meʻa fakaifoifo hangē ko e māsimá. Naʻe manifi mo pakupaku ʻo hangē ha mā pakupakú, pea naʻe faingofua ke pakipaki iiki. ʻI he ʻahó ni, ki muʻa ʻi he ʻaho ʻo e Fakamanatú, ʻe kole nai ʻe he kau mātuʻa ʻi he fakatahaʻangá ha taha ke ne ngaohi ʻa e faʻahinga mā ko ení. ʻOku totonu ke ngaohiʻaki ia ʻa e mahoaʻa uite mo e vai pea fakapaku ia ʻaki ha kiʻi meʻi lolo. ʻI he ngaahi feituʻu ʻoku maʻungataʻa ai ʻa e mahoaʻa uité, ʻe lava ke ngāueʻaki ʻa e mahoaʻa mei he laisé, paʻalé, koané, pe ko ha uite meimei tatau.

 7. Ko e hā naʻe ʻi he ipu naʻe ngāueʻaki ʻe Sīsū ʻi he Kai Efiafi ʻa e ʻEikí? Ko e hā ʻa e faʻahinga uaine ʻe ngāueʻaki nai ʻi he Fakamanatú?

⁷ Naʻe toe pehē ʻe Mātiu, naʻe toʻo leva ʻe Sīsū “ha ipu, pea hili hono fai ha fakafetaʻi, naʻá ne ʻoange ia kiate kinautolu, ʻo ne pehē: ‘Mou inu kotoa mei ai.’” (Māt. 26:27, 28) Ko e uaine kulokula naʻe ʻi he ipu naʻe ngāueʻaki ʻe Sīsuú. ʻOku anga-fēfē ʻetau ʻiloʻi naʻe ʻikai ko e huhuaʻi kālepi foʻou? Koeʻuhí ko e utu-taʻu kālepí kuo fuoloa hono faí. Naʻe ʻikai kau ʻa e uainé ʻi he ʻuluaki kai Pāsova ʻi ʻIsipité. Ka naʻe ʻikai pehē ʻe Sīsū naʻe hala ke inu ia ʻi he Pāsová. Naʻe aʻu ʻo ne ngāueʻaki ha uaine lolotonga ʻa e Kai Efiafi ʻa e ʻEikí. Ko ia ʻoku toe ngāueʻaki ʻa e uainé ʻe he kau Kalisitiane he ʻaho ní ʻi he Fakamanatú. Ko e hā ʻa e faʻahinga uaine ʻoku totonu ke ngāueʻakí? Ko e uaine ʻoku ngāueʻaki ʻi he Fakamanatú ʻoku totonu ke ʻoua ʻe tānaki ki ai ha meʻa, hangē ko e ʻolokaholó pe ngaahi sipaisí. Naʻe ʻikai fiemaʻu ke toe tānaki ha meʻa ki he toto ʻo Sīsuú ke ʻai ia ke mahuʻinga ange. Ko ia ko e uaine kulokula ʻataʻatā pē ʻoku ngāueʻakí. ʻE lava ke ngaohi pē ʻi ʻapi, pe ko ha uaine hangē ko e Beaujolais, Burgundy, pe Chianti, ʻa ia ʻe lava ke fakatau mei ha falekoloa.

MEʻA ʻOKU ʻUHINGA KI AI ʻA E MAÁ MO E UAINÉ

 8. Ko e hā ʻoku mahuʻingaʻia ai ʻa e kau Kalisitiané ʻi he meʻa ʻoku ʻuhinga ki ai ʻa e maá mo e uainé?

⁸ Naʻe leaʻaki ʻe he ʻapositolo ko Paulá ha meʻa ʻo fakahaaʻi ai ʻoku ʻikai ngata pē ʻi he kau ʻapositoló ka ʻoku fiemaʻu ki he kau Kalisitiané ke nau kātoangaʻi ʻa e Kai Efiafi ʻa e ʻEikí. Naʻe tohi ʻe Paula ki he fanga tokoua ʻi Kolinitoó ko Sīsū “naʻá ne toʻo ha mā pea ʻi he hili hono fai ha fakafetaʻí, naʻá ne pakipaki ia mo ne pehē: ‘ʻOku ʻuhinga eni ki hoku sinó ʻa ia ʻoku foaki koeʻuhi ko kimoutolu. Hanganaki fai eni ko hoku fakamanatu.’” (1 Kol. 11:23, 24) Koeʻuhí ʻoku fekauʻi ʻa e kau Kalisitiane he ʻaho ní ke nau kātoangaʻi ʻa e Fakamanatú ʻo tuʻo taha ʻi he taʻu kotoa pē, ʻoku nau mātuʻaki mahuʻingaʻia ʻi he meʻa ʻoku ʻuhinga ki ai ʻa e maá mo e uainé.

 9. Ko e hā ʻa e tui fehālaaki ʻoku maʻu ʻe he niʻihi fekauʻaki mo e mā naʻe ngāueʻaki ʻe Sīsuú?

⁹ ʻOku pehē ʻe he kakai lotu ʻe niʻihi ko e ʻuhinga eni ʻa e ngaahi lea ʻa Sīsuú: ‘Ko hoku sinó eni.’ Ko ia ʻoku nau tui naʻe ʻi ai ha mana pea hoko ai ʻa e maá ko e sino ʻo Sīsuú. Ka ʻoku ʻikai ko e meʻa ia naʻe hokó.a Ko e sino ʻo Sīsuú mo e mā taʻelēvaní naʻe ʻi ai fakatouʻosi ʻi he haʻohaʻonga ʻo e kau ʻapositolo faitōnungá. ʻOku hā mahino, naʻe pehē ʻe Sīsuú ʻoku ʻuhinga ʻa e maá ki hono sinó. Naʻe faʻa ngāueʻaki ʻe Sīsū ʻa e ngaahi fakahoa peheni ʻi heʻene faiakó.—Sione 2:19-21; 4:13, 14; 10:7; 15:1.

10. ʻOku ʻuhinga ki he hā ʻa e mā ʻi he Fakamanatú?

¹⁰ Ko e mā naʻe malava ke sio ki ai ʻa e kau ʻapositoló pea teu ke nau kaí naʻe ʻuhingá ki he sino ʻo Sīsuú. ʻI he taimi ʻe taha, naʻe tui ʻa e kau Kalisitiane moʻoní naʻe ʻuhinga ʻa e maá ki he fakatahaʻanga ʻo e kau Kalisitiane paní, ʻa ia ʻoku ui ʻi he Tohi Tapú ko e “sino ʻo e Kalaisí.” Naʻa nau tui ki he meʻá ni koeʻuhí he naʻe pakipaki iiki ʻe Sīsū ʻa e maá ka naʻe ʻikai motu ha taha hono ngaahi huí tonu. (ʻEf. 4:12; Loma 12:4, 5; 1 Kol. 10:16, 17; 12:27) Ka ʻi he hili ʻa e fekumi lahi ange, naʻa nau ʻiloʻi ʻoku ʻuhinga ʻa e maá ki he sino fakaetangata ʻo Sīsuú. ʻOku faʻa lave ʻa e Folofolá ki he founga naʻe ‘faingataʻaʻia ai ʻa Sīsū ʻi he kakanó’ pea aʻu ʻo tāmateʻi ʻi ha ʻakau fakamamahi. Ko ia ko e mā ʻi he Fakamanatú ʻoku ʻuhingá ki he sino fakaetangata naʻe feilaulauʻi ʻe Sīsū koeʻuhi ko ʻetau ngaahi angahalá.—1 Pita 2:21-24; 4:1; Sione 19:33-36; Hep. 10:5-7.

11, 12. (a) Ko e hā naʻe leaʻaki ʻe Sīsū fekauʻaki mo e uainé? (e) Ko e hā ʻoku ʻuhinga ki ai ʻa e uaine ʻi he Fakamanatú?

¹¹ Ko hono ʻiloʻi ʻa e ʻuhinga ʻo e maá ʻoku tokoniʻi ai kitautolu ke mahinoʻi ʻa e meʻa ʻe toki leaʻaki ʻe Sīsū fekauʻaki mo e uainé. ʻOku tau lau: “Naʻá ne fai foki ʻa e meʻa tatau ki he ipú, hili ia ʻene fai ʻa e kai efiafí, ʻo ne pehē: ‘Ko e ipú ni ʻoku ʻuhinga ia ki he fuakava foʻou ʻoku faiʻaki hoku totó.’” (1 Kol. 11:25) ʻOku lave ʻa e ngaahi Tohi Tapu lahi ki he meʻa meimei tatau mo ia ʻi he liliu ʻa Robert Young: “Ko e ipú ni ko e fuakava foʻou ʻi hoku totó.” (Mataʻitohi mata-ʻāʻā ʻamautolu.) Ko e ipu naʻe puke ʻe Sīsuú ko e fuakava foʻoú ia? ʻIkai. Naʻe lave ʻa Sīsū fekauʻaki mo e uaine ʻi he ipú. Ko e hā naʻe pehē ʻe Sīsū naʻe ʻuhinga ki ai ʻa e uainé? Naʻe ʻuhinga ia ki hono toto te ne feilaulauʻí.

¹² ʻI he Kōsipeli ʻa Maʻaké, ʻoku tau lau ai ʻa e ngaahi lea ʻa Sīsū: “ʻOku ʻuhinga eni ki hoku ‘toto ʻo e fuakavá,’ ʻa ia ʻe lilingi koeʻuhi ko e tokolahi.” (Mk. 14:24) Pea ʻi he Mātiú, ʻoku tau lau ai ko e toto ʻo Sīsuú ʻe “lilingi koeʻuhi ko e tokolahi ki he fakamolemole ʻo e ngaahi angahalá.” (Māt. 26:28) Ko ia ko e uaine kulokulá ʻoku ʻuhingá ki he toto tonu ʻo Sīsuú. ʻOku tokonaki ʻe he taʻataʻa ʻo Sīsuú ha huhuʻi koeʻuhí ke lava ʻo fakamolemoleʻi ai ʻetau ngaahi angahalá.—Lau ʻa e ʻEfesō 1:7.

KO E HĀ ʻOKU HOKO ʻI HE FAKAMANATU ʻA E PEKIA ʻA KALAISÍ?

13. Ko e hā ʻoku hoko ʻi he Fakamanatu ʻa e pekia ʻa Kalaisí?

¹³ Kapau ko e ʻuluaki taimi eni te ke maʻu ai ʻa e Fakamanatú fakataha mo e Kau Fakamoʻoni ʻa Sihová, ko e hā ʻe lava ke ke ʻamanekiná? ʻE fai ʻa e Fakamanatú ʻi ha feituʻu fakaʻofoʻofa mo maʻa ʻa ia ʻe hao ai ʻa e tokotaha kotoa pea ongoʻi fiemālie ai mo fiefia ʻi he fakatahá. ʻE ʻi ai nai ha ngaahi matalaʻiʻakau feʻunga, ka ʻe ʻikai te ke sio ai ki ha fuʻu teuteu lahi, pea ʻe ʻikai ke hangē ia ha pātí. Ko ha mātuʻa taau te ne fai ha malanga mahino mo fakangeingeia ʻo makatuʻunga ʻi he meʻa ʻoku leaʻaki ʻe he Tohi Tapú fekauʻaki mo e Kai Efiafi ʻa e ʻEikí. Te ne fakamatalaʻi ai naʻe pekia ʻa Kalaisí ko ha huhuʻi kae malava ke tau moʻui. (Lau ʻa e Loma 5:8-10.) ʻE toe lāulea ʻa e tokotaha-malangá ki he ʻamanaki ʻe ua ʻoku fakamatalaʻi ʻi he Tohi Tapú.

14. Lolotonga ʻa e Fakamanatú, ko e hā ʻa e ʻamanaki ʻe ua ʻe lāulea ki ai ʻa e tokotaha-malangá?

¹⁴ Ko e ʻamanaki ʻe taha ke pule fakataha mo Kalaisi ʻi hēvani. Ko ha kiʻi tokosiʻi pē ʻo e kau Kalisitiané, hangē ko ʻene kau ʻapositolo faitōnungá, ʻoku nau maʻu ʻa e ʻamanaki ko ení. (Luke 12:32; 22:19, 20; Fkh. 14:1) Ko e ʻamanaki ʻe tahá ko e ʻamanaki ʻoku maʻu ʻe he tokolahi taha ʻo e kau Kalisitiane mateakí. Ko ʻenau ʻamanakí ke moʻui taʻengata ʻi ha māmani palataisi. ʻE faai atu pē ʻo hoko ʻa e māmaní ki he meʻa naʻe finangalo ki ai ʻa e ʻOtuá, ʻa ia kuo lotu maʻu pē ʻa e kau Kalisitiané fekauʻaki mo iá. (Māt. 6:10) ʻOku fakamatalaʻi ʻe he Folofolá ʻa e moʻui fakaofo te nau maʻu ʻo taʻengata pea taʻengatá.—ʻAi. 11:6-9; 35:5, 6; 65:21-23.

15, 16. ʻI he Fakamanatú, ko e hā ʻoku fai ki he mā taʻelēvaní?

¹⁵ Hili hono fakamatalaʻi ʻa e ʻamanaki ʻe ua ko ení, ʻe pehē ʻe he tokotaha-malangá kuo aʻu mai eni ki he taimi ke fai ʻa e meʻa naʻe fai ʻe Sīsū ʻi he Kai Efiafi ʻa e ʻEikí. ʻE ʻi ai ʻa e mā taʻelēvani mo e uaine kulokula ʻi ha tēpile ofi kiate ia. ʻE lau ʻe he tokotaha-malangá ha fakamatala Fakatohitapu ʻa ia ʻoku fakamatalaʻi ai ʻa e meʻa naʻe fai ʻe Sīsū ki he maá. Te ne lau nai ʻa e fakamatala ʻi he Mātiú, ʻa ia ʻoku pehē: “Naʻe toʻo ʻe Sīsū ha mā, pea ʻi he hili ʻene tāpuakiʻi iá, naʻá ne pakipaki ia, ʻo ne ʻoange ki he kau ākongá peá ne pehē: ‘Mou toʻo, ʻo kai. ʻOku ʻuhinga eni ki hoku sinó.’” (Māt. 26:26) Naʻe pakipaki iiki ʻe Sīsū ʻa e maá koeʻuhí ke malava ʻo ne ʻoatu ia ki he kau ʻapositolo ʻi hono ongo tafaʻakí fakatouʻosi. ʻI he Fakamanatu ʻi ʻEpeleli 14, te ke sio ai ki ha mā taʻelēvani ʻi ha ngaahi peleti.

¹⁶ Ki muʻa ke paasi holo ʻa e ngaahi peletí, ʻe fai ʻe ha tokoua ha lotu nounou. ʻE ʻi ai ʻa e ngaahi peleti feʻunga koeʻuhí ke malava ʻa e maá ʻo paasi takai ki he tokotaha kotoa ʻi ha taimi nounou pea ʻi ha founga maau. ʻOku fai eni ʻo ʻikai ha ouau makehe pea ʻi ha founga ʻoku feʻungamālie ki he feituʻú. ʻE kai ʻa e maá ʻe he niʻihi pe ʻikai kai nai ia ʻe ha taha, hangē pē ko ia ʻi he lahi taha ʻo e ngaahi fakatahaʻangá ʻi he Fakamanatu he 2013.

17. ʻI he Fakamanatú, ʻoku anga-fēfē ʻa e muimui ki he fakahinohino ʻa Sīsū fekauʻaki mo e uainé?

¹⁷ Hokó, ʻe lau ʻe he tokotaha-malangá ʻa e meʻa naʻe fai ʻe Sīsū ki he uainé: “Naʻá ne toʻo ha ipu, pea hili hono fai ha fakafetaʻi, naʻá ne ʻoange ia kiate kinautolu, ʻo ne pehē: ‘Mou inu kotoa mei ai, he ʻoku ʻuhinga eni ki hoku “toto ʻo e fuakavá,” ʻa ia ʻe lilingi koeʻuhi ko e tokolahi ki he fakamolemole ʻo e ngaahi angahalá.’” (Māt. 26:27, 28) ʻI he muimui ki he fakahinohino ʻa Sīsuú, ʻe fai ha toe lotu pea ʻe paasi leva ʻa e uaine kulokulá ki he kotoa ʻo e kau fanongó.

18. Kapau ko e tokosiʻi pē pe ʻikai ha taha ʻoku kai ʻi he maá pe inu ʻa e uainé, ko e hā ʻoku kei mahuʻinga ai ke ʻi he Fakamanatú?

¹⁸ Ko e faʻahinga pē te nau pule fakataha mo Kalaisi ʻi hēvaní te nau kai ʻa e maá mo inu ʻa e uainé. Ko ia ko e tokolahi taha ʻo e kakai ʻi he Fakamanatú te nau paasi pē ʻa e maá mo e uainé ki he tokotaha hokó. (Lau ʻa e Luke 22:28-30; 2 Tīm. 4:18) Neongo ko e tokolahi taha ʻo e kau Kalisitiané ʻoku ʻikai te nau kai ʻa e maá pe inu ʻa e uainé, ʻoku kei mahuʻinga pē ke nau ʻi he Fakamanatú. Ko e hā hono ʻuhingá? ʻI heʻenau ʻi aí, ʻoku nau fakahaaʻi ai ʻa e lahi ʻenau fakamahuʻingaʻi ʻa e feilaulau ʻa Sīsuú. Lolotonga ʻa e Fakamanatú, ʻoku lava ke nau fakakaukau ki he kotoa ʻo e ngaahi tāpuaki ʻe lava ke ʻomai kia kinautolu ʻe he huhuʻí. Ko e fakatātaá, ʻoku nau maʻu ʻa e ʻamanaki ʻo e hoko ʻo ʻi he haʻohaʻonga ʻo e “fuʻu kakai lahi” ʻa ia te nau hao atu ʻi he “fuʻu mamahi lahí.” Koeʻuhi ko ʻenau tui ki he feilaulau ʻa Sīsuú, te nau hoko ai ʻo māʻoniʻoni ʻi he vakai ʻa e ʻOtuá, ʻo hangē ia naʻa nau “fō honau ngaahi kofu tōtōlofá ʻo fakahinehina kinautolu ʻi he taʻataʻa ʻo e Lamí.”—Fkh. 7:9, 14-17.

19. Ko e hā ʻe lava ke tau fai ke teuteu ai pea maʻu ʻaonga mei he Fakamanatú?

¹⁹ ʻOku anga-fēfē ʻa e teuteu ʻa e Kau Fakamoʻoni ʻa Sihova takatakai he māmaní ki he Fakamanatú? ʻI he ngaahi uike siʻi ki muʻa ʻi he ʻaho ʻo e Fakamanatú, ʻoku tau fakaafeʻi ʻa e tokolahi taha ʻe malavá ke nau maʻu ia. ʻI he ngaahi ʻaho ki muʻa ʻi he fakataha makehe ko ení, ʻoku tau lau ʻa e ngaahi fakamatala Fakatohitapu fekauʻaki mo e meʻa naʻe fai ʻe Sīsuú mo e meʻa naʻe hoko ʻi he ngaahi ʻaho ki muʻa ʻi he Kai Efiafi ʻa e ʻEikí ʻi he taʻu 33. ʻOku tau fai ʻa e ngaahi palani tokamuʻa ke ʻi he Fakamanatú. ʻOku tau aʻu tōmuʻa ki he fakatahá koeʻuhí ke tau lava ʻo talitali lelei ʻa e kau ʻaʻahí pea ʻoua ʻe tō mei ha konga pē ʻo e polokalamá. Ko kitautolu kotoa, ʻa e kau mēmipa ʻo e fakatahaʻangá mo e kau ʻaʻahí, te tau maʻu ʻaonga kapau ʻoku tau muimui fakataha ʻi heʻetau Tohi Tapú ʻi he taimi ʻoku lau mo fakamatalaʻi ai ʻe he tokotaha-malangá ʻa e Folofolá. Ko e mahuʻinga tahá, ʻi hono maʻu ʻa e Fakamanatú, ʻoku tau fakahaaʻi ai ʻoku tau houngaʻia loloto ʻi he feilaulau ʻa Sīsuú pea tau talangofua ki heʻene fekau: “Hanganaki fai eni ko hoku fakamanatu.”—1 Kol. 11:24.

[Fakamatala ʻi lalo]

[Fakatātā ʻi he peesi 22]

[Fakatātā ʻi he peesi 23]

FAKAMANATU 2014

ʻOku vilo takai ʻa e foʻi māhiná ʻi he māmaní ʻi he māhina taki taha. ʻI ha taimi pau lolotonga ʻa e māhiná, ʻoku tuʻu ai ʻa e foʻi māhiná ʻi he vahaʻa ʻo e māmaní mo e laʻaá. ʻI he taimi ʻoku tuʻu ai ʻa e foʻi māhiná ʻi he tuʻuʻanga ko ení, ʻoku ui ia ko ha māhina foʻou pea heʻikai malava ke sio ki ai mei he māmaní ʻi ha houa ʻe 18 ki he 30 ki mui ai.

Lolotonga ʻa e 2014, ko e māhina foʻou ofi taha ki he ʻekunoti ʻi he faʻahitaʻu failaú ʻe tō ia ʻi Maʻasi 30, ʻi he 8:45 p.m. (20:45) ʻi Selusalema. Ko e tō hono hoko ʻa e laʻaá ʻe hoko ia ʻi he houa nai ʻe 21 ki mui ai. Ka ko Nīsani 1 heʻikai kamata ia ʻi he ʻaho ko iá. Ko e hā hono ʻuhingá? Koeʻuhí ko e māhina foʻoú ʻe ngalingali heʻikai malava ke sio ki ai ʻi he taimi ko iá. Ka, ko e ʻuluaki tō ʻa e laʻaá ko e taimi ia ʻe malava nai ai ke sio ki ha konga ʻo e māhina foʻoú ʻi Selusalema ʻi ʻEpeleli 1. Ko ia ʻi he taimi ʻoku tau ngāueʻaki ai ʻa e founga tatau naʻe ngāueʻaki ʻe he muʻaki kau Siú, ʻe lava ke tau pehē ko Nīsani 1 ʻe kamata ia ʻi he tō ʻa e laʻaá ʻi ʻEpeleli 1.

Ko e ngaahi fakatahaʻanga ʻo e Kau Fakamoʻoni ʻa Sihova takatakai he māmaní ʻoku nau ʻilo ko Nīsani 14 ʻe kamata ia ʻi he tō ʻa e laʻaá ʻi he Mōnite, ʻEpeleli 14, 2014. ʻE hoko nai ia he taimi ʻe kātoa ai ʻa e foʻi māhiná—Kapau ʻokú ke loto ke ako lahi ange fekauʻaki mo e founga ʻoku tau ʻilo ai ʻa e taimi ʻe hoko ai ʻa Nīsani 14 ʻi he taʻu taki taha, sio ki he Watchtower ʻo Sune 15, 1977, peesi 383-384.

[Fakatātā ʻi he peesi 24]

Naʻe inu ʻe he kau ʻapositoló ʻa e uaine naʻá ne fakatātaaʻi ʻa e toto fuakava ʻo Sīsuú (Sio ki he palakalafi 11, 12)