‘ʻOua ʻe Ngalo ʻa e Anga-Lelei ki he Kau Solá’

1, 2. (a) Ko e hā ʻa e ngaahi pole ʻoku maʻu ʻe he kau muli tokolahi ʻi he ʻahó ni? (Sio ki he ʻuluaki fakatātā ʻi he kupú ni.) (e) Ko e hā ʻa e fakamanatu naʻe ʻomai ʻe he ʻapositolo ko Paulá, pea ko e hā ʻa e ngaahi fehuʻi te tau lāulea ki aí?

LAKA HAKE ʻi he taʻu ʻe 30 kuohilí, ko ʻŌsai, ʻa ia naʻe teʻeki ai ke hoko ko e taha ʻo e Kau Fakamoʻoni ʻa Sihová, naʻá ne mavahe mei hono ʻapí ʻi Kana ke nofo ʻi ʻIulope.^[1] (Sio ki he fakamatala ʻi he ngataʻangá.) ʻOkú ne pehē: “Naʻe vave ʻeku fakatokangaʻi naʻe ʻikai ke tokanga mai ʻa e tokolahi taha ʻo e kakaí. Naʻe toe fakaʻohovale ʻa e anga ʻo e ʻeá. ʻI heʻeku mavahe mei he malaʻe vakapuná pea ongoʻi ʻa e momokó ʻi he fuofua taimi ʻo ʻeku moʻuí, naʻá ku kamata tangi.” Koeʻuhí ko e faingataʻa kia ʻŌsai ke ako ʻa e leá, naʻe laka hake ʻi he taʻu ʻe taha peá ne toki maʻu ha ngāue lelei. Pea koeʻuhí ko ʻene mamaʻo mei ʻapí, naʻá ne ʻofa ki hono fāmilí pea ongoʻi taʻelata.

² Fakakaukau ki he founga te ke saiʻia ai ke fakafeangai atu kiate koe kapau naʻá ke ʻi ha tuʻunga meimei tatau. Ko hono moʻoní, te ke houngaʻia ke talitali māfana koe ʻi he Fale Fakatahaʻangá ʻe he kakai ʻoku nau ʻofa ʻiate koe ʻo tatau ai pē pe ko e hā ʻa e matakali pe lanu ho kilí. Ko e moʻoni, ʻoku tala ʻe he Tohi Tapú ki he kau Kalisitiane moʻoní ke ʻoua ‘ʻe ngalo ʻa e anga-lelei ki he kau solá.’ (Hep. 13:2) Ko ia tau lāulea angé ki he ngaahi fehuʻi ko ení: ʻOku anga-fēfē ʻa e ongoʻi ʻa Sihova fekauʻaki mo e kau solá? ʻOku fiemaʻu ke fakatonutonu ʻa e anga ʻetau ongoʻi ki he kau solá? Pea ʻe lava fēfē ke tau tokoniʻi ha taha mei ha fonua kehe ke ne ongoʻi ʻoku talitali lelei ia ʻi heʻetau fakatahaʻangá?

3, 4. Fakatatau ki he ʻEkisoto 23:9, naʻe anga-fēfē fiemaʻu ʻe he ʻOtuá ʻa e kau ʻIsilelí ke nau fakafeangai ki he kau mulí, pea ko e hā hono ʻuhingá?

³ Hili hono fakatauʻatāinaʻi ʻe Sihova hono kakaí mei he nofo pōpula ʻi ʻIsipité, naʻá ne ʻoange kia kinautolu ʻa e ngaahi lao ke akoʻi ʻaki kinautolu ke nau fakahāhā ʻa e anga-lelei ki he kau muli naʻe mavahe fakataha mo kinautolú. (ʻEki. 12:38, 49; 22:21) Koeʻuhí ko e ʻikai ke faingofua maʻu pē ʻa e moʻuí ki he kau mulí, naʻe tokangaʻi anga-ʻofa kinautolu ʻe Sihova. Ko e fakatātaá, naʻe lava ke nau tufi ʻa e meʻakai naʻe fakatoe ʻe he kau utu-taʻú.​—Liv. 19:9, 10.

⁴ ʻI he ʻikai ke fekauʻi pē ʻa e kau ʻIsilelí ke nau fakaʻapaʻapa ki he kau mulí, naʻe fiemaʻu ʻe Sihova ke nau manatuʻi ʻa e anga ʻo e hoko ko ha mulí. (Lau ʻa e ʻEkisoto 23:9.) Naʻa mo e ki muʻa ke hoko ʻa e kau ʻIsilelí ko e kau pōpula ʻi ʻIsipité, naʻe ʻikai ke saiʻia ʻa e kau ʻIsipité ʻiate kinautolu koeʻuhí naʻa nau kehe. (Sēn. 43:32; 46:34; ʻEki. 1:11-14) Naʻe moʻui faingataʻaʻia ʻa e kau ʻIsilelí ʻi he tuʻunga ko e kau muli. Naʻe fiemaʻu ʻe Sihova ke nau manatuʻi ia pea nau anga-lelei ki he kau muli naʻe nofo ʻi honau lotolotongá.​—Liv. 19:33, 34.

 5. Ko e hā te ne tokoniʻi kitautolu ke tau fakahāhā ʻa e anga-lelei ki he kau mulí ʻo hangē ko Sihová?

⁵ Kuo ʻikai ke liliu ʻa Sihova. Ko ia ʻi he taimi ʻoku haʻu ai ʻa e kau mulí ki heʻetau fakatahaʻangá, ʻoku totonu ke ʻoua ʻe ngalo ʻiate kitautolu ʻoku kei fakahāhā ʻe Sihova ʻa e anga-lelei ki he kakai peheé. (Teu. 10:17-19; Mal. 3:5, 6) Kiʻi tuʻu ʻo fakakaukau ki he ngaahi pole ʻoku fehangahangai mo e kau mulí. Ko e fakatātaá, ʻoku ʻikai nai ke nau mahinoʻi ʻa e lea foʻoú mo ʻikai fakafeangai lelei angé. Tau fai ha feinga ke tokoniʻi kinautolu pea anga-lelei kia kinautolu.​—1 Pita 3:8.

6, 7. Ko e hā naʻá ne fakahaaʻi naʻe ako ʻa e muʻaki kau Kalisitiane Siú ke ikuʻi ʻa e mālohi ʻo e tomuʻa fehiʻá?

⁶ Naʻe ako ʻa e muʻaki kau Kalisitiané ke nau ikuʻi ʻa e mālohi ʻo e tomuʻa fehiʻá ʻa ia naʻe faʻa hoko ʻi he lotolotonga ʻo e kau Siú. ʻI he Penitekosi ʻo e taʻu 33, ko e kau Kalisitiane Siu naʻe nofo ʻi Selusalemá naʻa nau fakahāhā ʻa e anga-talitali kakai mo tokanga anga-ʻofa ki he faʻahinga foʻou mei he ngaahi fonua kehé. (Ngā. 2:5, 44-47) Naʻe fakahaaʻi heni naʻe mahinoʻi ʻe he kau Kalisitiane Siú ʻa e ʻuhinga ʻo e “anga-talitali kakaí,” ʻa ia ko e ‘anga-lelei ki he kau solá.’

⁷ Kae kehe, lolotonga ʻa e taimi ko iá, naʻe hoko ha meʻa. Naʻe lāunga ʻa e kau Siu lea faka-Kalisí ʻi he ʻikai ke tokangaʻi lelei ʻenau kau uitoú. (Ngā. 6:1) Ke fakaleleiʻi ʻa e palopalemá, naʻe fili ʻe he kau ʻapositoló ha kau tangata ʻe toko fitu ke nau ʻalu ʻo fakapapauʻi ʻe tokangaʻi lelei ʻa e tokotaha kotoa. Naʻe fili ʻe he kau ʻapositoló ha kau tangata naʻa nau hingoa faka-Kalisi, ke ʻai nai ʻa e kau uitoú ke nau ongoʻi fiemālie ange.​—Ngā. 6:2-6.

8, 9. (a) Ko e hā ʻa e ongo fehuʻi te na tokoniʻi kitautolu ke ʻiloʻi ai pe ʻoku tau tomuʻa fehiʻá? (e) Ko e hā kuo pau ke tau toʻo atú? (1 Pita 1:22)

⁸ Tatau ai pē pe ʻoku tau ʻilo ki ai pe ʻikai, ʻoku tākiekina mālohi kitautolu kotoa ʻe hotau anga fakafonuá. (Loma 12:2) Pehē foki, ʻoku tau fanongo nai ki he ngaahi laukovi mei hotau kaungāʻapí, kaungāngāué, pe kaungāakó fekauʻaki mo e puipuituʻa, matakali, pe lanu ʻo e kili ʻo e kakai kehé. Ko e hā ʻa e lahi hono tākiekina kitautolu ʻe he ngaahi fakakaukau hala ko iá? Pe ko e hā ʻa e anga ʻetau fakafeangaí ʻi he taimi ʻoku fakakataʻaki ai ʻe ha taha hotau matakalí pe niʻihi hotau anga fakafonuá?

⁹ Naʻe ʻi ai ʻa e taimi naʻe tomuʻa fehiʻa ai ʻa e ʻapositolo ko Pitá ki he kakai naʻe ʻikai ko e kau Siú. Ka naʻe māmālie ʻene ako ke toʻo atu ʻa e ngaahi ongoʻi tāufehiʻa ko iá. (Ngā. 10:28, 34, 35; Kal. 2:11-14) ʻI he tuʻunga meimei tatau, kapau ʻoku tau fakatokangaʻi ha kiʻi tomuʻa fehiʻa pe pōlepoleʻaki hotau matakalí, ʻoku totonu ke tau ngāue mālohi ke toʻo fakaʻaufuli atu ia. (Lau ʻa e 1 Pita 1:22.) Ko e hā ʻe lava ke ne tokoniʻi kitautolu ke tau fai peheé? Manatuʻi ʻoku tau taʻehaohaoa kotoa, ʻo tatau ai pē pe ko e hā ʻa e fonua ʻoku tau haʻu mei aí, pea ʻoku ʻikai ha taha ʻo kitautolu ʻe tuha mo e fakamoʻuí. (Loma 3:9, 10, 21-24) Ko ia ʻoku ʻikai ha ʻuhinga ke tau ongoʻi ai ʻoku tau lelei ange ʻi ha taha pē! (1 Kol. 4:7) ʻOku totonu ke tau ongoʻi ʻo hangē ko ia ko e ʻapositolo ko Paulá. Naʻá ne tala ki hono kaungā-Kalisitiané naʻe ʻikai te nau “kei hoko ko ha kau sola mo ha kau muli” ka naʻa nau hoko “ko e kau mēmipa ʻo e fāmili ʻo e ʻOtuá.” (ʻEf. 2:19) ʻOku fiemaʻu ke tau ngāue mālohi kotoa ke toʻo atu ha tomuʻa fehiʻa pē koeʻuhí kae lava ke tau ʻai ʻa e angaʻitangata foʻoú.​—Kol. 3:10, 11.

10, 11. Naʻe anga-fēfē faʻifaʻitaki ʻa Pōasi ki he anga ʻo e vakai ʻa Sihova ki he kau solá?

¹⁰ Naʻe faʻifaʻitaki ʻa e tangata faitōnunga ko Pōasí ki he anga ʻo e vakai ʻa Sihova ki he kau solá. Anga-fēfē? ʻI he taimi naʻe ʻalu ai ʻa Pōasi ke vakaiʻi ʻene ngoué lolotonga ʻa e utu-taʻú, naʻá ne fakatokangaʻi ʻa Lute, ko ha fefine muli mei he fonua ko Mōapé. Naʻá ne ngāue mālohi ke tānaki ʻa e uite mei he kelekelé. ʻI he Lao ʻa Mōsesé, naʻe maʻu ai ʻe Lute ʻa e totonu ki he tufí. Ka ʻi he taimi naʻe fanongo ai ʻa Pōasi naʻe kole ʻe Lute ha ngofua ke tufi ʻi heʻene ngoué, naʻe maongo loloto kiate ia ʻo ne fakaʻatā ia ke ne tufi naʻa mo e ʻi he ngaahi haʻinga uité.​—Lau ʻa e Lute 2:5-7, 15, 16.

¹¹ Ko e meʻa naʻe hokó ʻoku fakahaaʻi mahino ai naʻe hohaʻa ʻa Pōasi fekauʻaki mo Lute pea mo hono tuʻunga faingataʻa ko ha mulí. Naʻá ne fakaafeʻi ia ke ne tufi fakataha mo ʻene kau fefine kei siʻí koeʻuhí ke ʻoua ʻe ngaohikoviʻi ia ʻe he kau tangata ʻoku ngāue ʻi he ngoué. Naʻe aʻu ʻo ne fakapapauʻi naʻe maʻu ʻe Lute ha meʻakai mo e vai feʻunga, ʻo hangē pē ko ʻene kau ngāué tonu. Naʻe fakahaaʻi ʻe Pōasi ʻa e fakaʻapaʻapa ki he fefine muli masiva ko ení pea fakalototoʻaʻi ia.​—Lute 2:8-10, 13, 14.

12. Ko e hā ʻa e ʻaonga ʻo e anga-lelei ki he kau solá?

¹² Naʻe fakahāhā ʻe Pōasi ʻa e anga-lelei kia Lute ʻo ʻikai koeʻuhí pē ko e ʻofa mateaki ʻa Lute ki heʻene faʻē-ʻi-he-fonó, ʻa Nāomi, ka koeʻuhí foki kuó ne ʻosi tauhi kia Sihova pea hanga kiate Ia ki ha maluʻi. ʻI he anga-lelei ʻa Pōasi kia Luté, naʻá ne faʻifaʻitaki moʻoni ai ki he ʻofa mateaki ʻa Sihová. (Lute 2:12, 20; Pal. 19:17) ʻI he tuʻunga meimei tatau he ʻahó ni, ʻi he taimi ʻoku tau anga-lelei aí, ʻoku malava nai ai ke tau tokoniʻi “ʻa e faʻahinga kakai kotoa pē” ke nau ako ʻa e moʻoní pea sio ki hono ʻofaʻi lahi kinautolu ʻe Sihová.​—1 Tīm. 2:3, 4.

13, 14. (a) Ko e hā ʻoku totonu ai ke tau lea fakafeʻiloaki ki he kau sola ʻi he Fale Fakatahaʻangá? (e) Ko e hā ʻe lava ke ne tokoniʻi koe ke ke ongoʻi fiemālie ʻi he lea ki ha taha mei ha anga fakafonua kehe?

¹³ ʻE lava ke tau fakahāhā ʻa e anga-leleí ki he kau solá ʻaki ʻetau lea fakafeʻiloaki māfana kia kinautolu ʻi he Fale Fakatahaʻangá. Ko e faʻahinga naʻa nau toki hiki ki ha fonua ʻoku nau ongoʻi nai he taimi ʻe niʻihi ʻoku nau mā pea tangutu pē ʻia kinautolu. Koeʻuhí ko honau anga fakafonuá pe ko honau tuʻunga fakasōsialé, ʻoku nau ongoʻi māʻulalo nai ʻi he kakai mei ha matakali kehe. Ko ia ʻoku totonu ke tau ʻuluaki fakafeʻiloaki kia kinautolu pea fakahāhā ʻa e anga-lelei mo e mahuʻingaʻia loto-moʻoni ʻia kinautolu. Kapau ʻoku ala maʻu ʻi hoʻo leá, ʻe lava ke tokoniʻi koe ʻe he JW Language app ke ke ako ʻa e founga ke lea fakafeʻiloaki ai ʻi heʻenau leá.​—Lau ʻa e Filipai 2:3, 4.

¹⁴ Te ke ongoʻi mā nai ke lea ki ha taha mei he anga fakafonua kehe. Ke ikuʻi ʻa e ngaahi ongoʻi ko iá, ʻe lava ke ke tala ange kiate ia ha meʻa fekauʻaki mo koe. Te ke ʻiloʻi leva ai ʻoku lahi ange ʻa e ngaahi meʻa ʻokú mo tatau aí ʻo kehe ia mei he anga hoʻo fakakaukaú. Manatuʻi ko e anga fakafonua taki taha ʻoku ʻi ai hono mālohinga mo e vaivaiʻanga.

15. Ko e hā te ne tokoniʻi kitautolu ke tau mahinoʻi ʻa e faʻahinga ʻoku nau feinga ke alāanga ki ha feituʻu foʻoú?

¹⁵ Ke tokoniʻi ʻa e niʻihi kehé ke nau ongoʻi ʻoku talitali lelei kinautolu ʻi he fakatahaʻangá, ʻeke faitotonu hifo kiate koe, ‘Kapau naʻá ku ʻi ha fonua muli, ko e hā ʻoku ou loto ke fai mai kiate aú?’ (Māt. 7:12) Anga-kātaki ki he faʻahinga ʻoku nau feʻunuʻaki ki ha feituʻu foʻou. ʻI he ʻuluaki taimí, ʻe ʻikai nai ke tau mahinoʻi kakato ʻa e anga ʻenau fakakaukaú pe tōʻongá. Ka ʻi he ʻikai ke tau ʻamanekina ke nau fakakaukau mo fakafeangai ʻo hangē ko e kakai mei hotau anga fakafonuá, ko e hā ʻoku ʻikai ai ke tau tali kinautolu ʻi he tuʻunga ʻoku nau ʻi aí?​—Loma 15:7.

16, 17. (a) Ko e hā ʻe lava ke tau fai ke ongoʻi vāofi ange ai mo e faʻahinga mei ha anga fakafonua kehe? (e) Ko e hā ʻa e tokoni ʻaonga ʻe lava ke tau ʻoange ki he faʻahinga ʻoku hiki mai ki heʻetau fakatahaʻangá?

¹⁶ Kapau ʻoku tau vaheʻi ha taimi ke ako ki he feituʻu mo e anga fakafonua ʻo e kau mulí, ʻe faingofua nai ai ke tau ʻiloʻi kinautolu. Lolotonga ʻetau lotu fakafāmilí, ʻe lava ke tau fai ha fekumi ki he anga fakafonua ʻo e faʻahinga ʻoku nau hiki mai ki heʻetau fakatahaʻangá pe feituʻu ngāué. Ko e founga ʻe taha ke vāofi ange ai mo e kau hiki maí ko hono fakaafeʻi kinautolu ki ha houa kai ʻi hotau ʻapí. Kuo hanga ʻe Sihova ʻo “fakaava ki he ngaahi puleʻangá ʻa e matapā ki he tuí,” ko ia ʻoku totonu ke tau faʻifaʻitaki kiate ia pea fakaava hotau ʻapí ki he kau sola ʻoku “fekauʻaki mo kitautolu ʻi he tuí.”​—Ngā. 14:27; Kal. 6:10; Siope 31:32.

¹⁷ ʻI heʻetau fakamoleki ʻa e taimi mo ha fāmili kuo nau hiki mai, ʻe tokoni eni kia kitautolu ke tau mahinoʻi mo fakamahuʻingaʻi ʻenau ngaahi feinga ke feʻunuʻaki ki hotau anga fakafonuá. Te tau ʻiloʻi nai ai ʻenau fiemaʻu ʻa e tokoni ke ako ki he leá. ʻOku tau toe tala nai kia kinautolu ʻa e ngaahi kautaha ʻe lava ke nau tokoniʻi kinautolu ke nau maʻu ha ʻapi pe ko ha ngāue lelei. Ko e tokoni ʻaonga peheé ʻe maongo moʻoni ia ki hotau fanga tokouá mo e fanga tuofāfiné.​—Pal. 3:27.

18. Ko e hā ʻa e faʻifaʻitakiʻanga ʻo e fakaʻapaʻapá mo e houngaʻiá ʻe lava ke faʻifaʻitaki ki ai he ʻahó ni ʻa e faʻahinga ʻoku hiki maí?

¹⁸ Ko e moʻoni, ʻe loto nai ʻa e faʻahinga ʻoku hiki maí ke fai ʻenau lelei tahá ke feʻunuʻaki ki he anga fakafonua ʻo ha feituʻu foʻou. Naʻe fokotuʻu ʻe Lute ha faʻifaʻitakiʻanga lelei ʻi he tafaʻaki ko ení. ʻUluakí, naʻá ne fakahāhā ʻa e fakaʻapaʻapa ki he anga fakafonua ʻo e feituʻu foʻou naʻá ne hiki ki aí ʻaki hono kole ha ngofua ki he tufí. (Lute 2:7) Naʻe ʻikai ke ne ngāuekoviʻaki ʻa e totonu ko ení pe ongoʻi ʻoku moʻua ange ʻa e niʻihi kehé kiate ia ʻaki ha meʻa. Uá, naʻe vave ʻene tala ange ki he niʻihi kehé naʻá ne houngaʻia ʻi he anga-lelei naʻe fakahāhā ange kiate iá. (Lute 2:13) ʻI he taimi ʻoku fakahāhā ai ʻe he faʻahinga ʻoku hiki maí ha ʻulungaanga lelei meimei tatau peheé, ngalingali ʻe fakaʻapaʻapaʻi ange ai kinautolu ʻe honau fanga tokouá mo e fanga tuofāfiné pea mo e kakai ʻi he feituʻu ko iá.

19. Ko e hā ʻa e ngaahi ʻuhinga ke tau ʻai ke ongoʻi ai ʻe he kau solá ʻoku talitali lelei kinautolú?

¹⁹ ʻOku tau fiefia ʻaupito ʻi hono fakahāhā ʻe Sihova ʻa e ʻofa maʻataʻataá pea fakaʻatā ʻa e kakai kotoa pē ke nau fanongo ki he ongoongo leleí. ʻI honau fonua tupuʻangá, naʻe ʻikai mei malava nai ʻa e niʻihi ke ako ʻa e Tohi Tapú mo e kakai ʻa Sihová pe ʻalu ki heʻenau ngaahi fakatahá. Ka ʻi he taimi ní kuo nau maʻu ʻa e faingamālie ke fakataha mo kitautolu, ko ia ʻoku totonu ke tau tokoniʻi kinautolu koeʻuhí ke ʻoua te nau ongoʻi ʻo hangē ha kau solá. ʻOku ʻikai nai ke tau maʻu ha paʻanga lahi pe malava ke fai ha fuʻu tokoni ʻaonga, ka ʻi he taimi ʻoku tau anga-lelei ai ki he kau mulí, ʻoku tau faʻifaʻitaki ai ki he ʻofa ʻa Sihova ʻia kinautolú. ʻI he tuʻunga “ko e kau faʻifaʻitaki ki he ʻOtuá,” ʻofa ke tau fai hotau lelei tahá ke talitali lelei ʻa e kau sola ʻi hotau lotolotongá!​—ʻEf. 5:1, 2.