3 Tokoni ke Fekuki mo e Ngaahi Palopalemá

ʻOku pehē ʻe Rose: “ʻOku ou maʻu ha palopalema fakakēnisi ʻokú ne fakatupunga ai ke u maʻu ha langa lahi mo tuʻumaʻu. Kuo tō lalo ʻa e tuʻunga ʻeku moʻuí.” Ko e taha ʻo ʻene ngaahi loto-hohaʻa lahi tahá ko e ngaahi taimi naʻe ʻikai malava ke tokangataha ai hono ʻatamaí ki heʻene ako ʻa e Tohi Tapú mo e ngaahi meʻa fakalaumālié. Ka naʻe tokoniʻi lahi ia ʻe he ngaahi lea ʻa Sīsū ʻoku lēkooti ʻi he Mātiu 19:6: “Ki he ʻOtuá ʻoku malava ʻa e meʻa kotoa pē.” Naʻe ʻiloʻi ʻe Rose ʻoku toe ʻi ai ʻa e founga ke ako ai. Koeʻuhi naʻe ʻai ia ʻe heʻene langá ke meimei ʻikai malava ke ne lautohi ʻi ha ngaahi taimi, naʻá ne kamata fanongo ki he ngaahi hiki-leʻo ʻo e Tohi Tapú mo e ʻū tohi Fakatohitapú.a “Ka ne ʻikai ʻa e ngaahi foungá ni,” ko ʻene laú ia, “ʻOku ʻikai te u ʻilo pe naʻe mei fēfē haʻaku tauhi maʻu hoku tuʻunga fakalaumālié.”

ʻI he loto-mamahi ʻa Rose ʻi he ʻikai malava ke ne fai ʻa e meʻa naʻá ne malava ki muʻá, ʻokú ne maʻu ʻa e fakafiemālie ʻi he ngaahi lea ʻoku lēkooti ʻi he 2 Kolinitō 8:12: “Kapau ʻoku ʻuluaki ʻi ai ʻa e loto-vēkeveké, ʻoku tautefito ʻene fakahōifuá ʻi hono fai ʻo fakatatau ki he meʻa ʻoku maʻu ʻe ha taha, ʻo ʻikai fakatatau ki he meʻa ʻoku ʻikai maʻu ʻe ha taha.” ʻOku fakamanatu ʻe he ngaahi lea ko iá kia Rose ʻoku hōifua ʻa e ʻOtuá ʻi he meʻa ʻokú ne faí, koeʻuhi ʻokú ne fai ʻa e kotoa ʻokú ne malavá ʻo fakatatau ki hono ngaahi ngataʻangá.

Ko Delphine, naʻe lave ki ai ki muʻá, ʻokú ne pehē: “ʻI he hili ʻa e mate ʻeku taʻahine taʻu 18, naʻe lahi fau hoku mamahí ʻo ʻikai ke u tui ʻe lava ke u kei moʻui atu. Naʻe halaʻatā ha meʻa ʻe tatau mo ia.” Neongo ia, naʻá ne maʻu ʻa e fiemālie lahi ʻi he ngaahi lea ʻo e Saame 94:19, ʻa ia naʻe pehē ai ʻe he tokotaha-tohi-sāmé ki he ʻOtuá: “ʻI hono lōmekina au ʻe he ngaahi loto-moʻuá, naʻá ke fakafiemālieʻi mo fakanonga au.” ʻOkú ne pehē, “Naʻá ku lotu kia Sihova ke ne tokoniʻi au ke u ʻilo ʻa e meʻa ke u fai ke nonga ai hoku mamahí.”

Naʻá ne ʻai ia ke ne femoʻuekina ʻi ha ngāue pole mohu ʻuhinga. ʻI he faai mai ʻa e taimí, naʻá ne kamata fakahoa ia ki ha foʻi kala ʻa ha kiʻi leka​—naʻa mo e ngaahi foʻi kala kuo motumotú ʻoku kei ʻaonga pē ki he tā valivalí. ʻI he founga meimei tatau, neongo ʻene ongoʻi hangē ha foʻi kala ʻoku motú, naʻá ne ʻilo ʻoku kei lava pē ke ne tokoniʻi ʻa e niʻihi kehé. ʻOkú ne manatuʻi: “Fakafokifā pē naʻá ku ʻilo ko e taimi pē naʻá ku ngāueʻaki ai ʻa e ngaahi tefitoʻi moʻoni Fakatohitapú mo e ngaahi founga fakakaukau Fakatohitapú ke fakafiemālieʻiʻaki ʻeku kau akó, ko e founga ia naʻe ngāueʻaki ʻe Sihova ke ne fakanonga mo fakafiemālieʻi aú.” Naʻá ne ʻai ha lisi ʻo e faʻahinga ʻi he Tohi Tapú naʻa nau foua ʻa e vahaʻa taimi ʻo e mamahi lahí. “Ko e moʻoni,” naʻá ne ʻiloʻi, “ko e kakai kotoa ia naʻa nau lotu.” Naʻá ne toe ʻilo “heʻikai ʻaupito te ke maʻu ha tali kapau ʻoku ʻikai te ke lau ʻa e Tohi Tapú.”

Ko hono ako ʻa e Tohi Tapú kuó ne akoʻi kia Delphine ha toe meʻa kehe​—ke tokangataha ki he kahaʻú, ʻikai ki he kuohilí. Ko e ʻamanaki ʻoku lave ki ai ʻa e Ngāue 24:15 ʻokú ne fakafiemālieʻi ia: “ʻE ʻi ai ʻa e toetuʻu fakatouʻosi ʻa e māʻoniʻoní mo e taʻemāʻoniʻoní.” ʻOku lahi fēfē ʻene fakapapauʻi ʻe fokotuʻu hake ʻe Sihova ʻene taʻahiné? Tuku ke tali mai ʻe Delphine: “ʻOku ou sio ki heʻeku taʻahiné ʻi he kahaʻú. Ko homa ‘ʻaho’ hokó kuo ʻosi fakataimitēpileʻi, ʻo hangē ia kuo ʻosi ʻi he tohimāhina ʻa ʻeku Tamaí. ʻOku ou sio fakatouʻosi kiate kimaua ʻi heʻema ngoué ʻo hangē pē ko ʻeku sio mo ʻofa ʻiate ia ʻi he ʻaho naʻe fāʻeleʻi ai iá.”