Ngaahi Kikite Kuo Hoko Moʻoni

Naʻa tau lāulea ki muʻa ki he talatupuʻa fekauʻaki mo hono takihalaʻi ʻo Kolosasi ʻe he taulaʻeiki ʻo Delphi, ʻo iku ai ki hono ikunaʻi ia ʻe he tuʻi ʻo Pēsiá. ʻI he tafaʻaki ʻe tahá, ʻoku ʻi he Tohi Tapú ha kikite fakaofo fekauʻaki mo e tuʻi ʻo Pēsiá ʻa ia naʻe mātuʻaki fakahoko moʻoni.

ʻI ha taʻu nai ʻe 200 ki muʻa​—ki muʻa fuoloa ia pea toki ʻaloʻi mai ʻa e tuʻí​—naʻe lave ai ʻa e palōfita Hepelū ko ʻAiseá ki he hingoa ʻo Kōlesí ʻo fakamatalaʻi ʻa e founga te ne ikunaʻi ai ʻa e fuʻu kolo mālohi ko Pāpiloné.

ʻAisea 44:24, 27, 28: “Ko e folofola eni ʻa Sihova, . . . ‘ʻa e Tokotaha ʻokú ne pehē ki he ngaahi vai lolotó, “Ke ke mōmoa, pea te u fakamātuʻu ʻa ho ngaahi vaitafé kotoa”; ʻa e Tokotaha ʻokú ne pehē fekauʻaki mo Kōlesi, “Ko ʻeku tauhi-sipi ia, pea te ne fakahoko kakato ʻa e kotoa ʻo hoku lotó”; ʻa e Tokotaha ʻokú ne pehē ʻo fekauʻaki mo Selusalema, “ʻE toe langa ia,” pea fekauʻaki mo e temipalé, “ʻE toe fakatoka ho fakavaʻé.”’”

Fakatatau ki he faihisitōlia Kalisi ko Helotōtasi, naʻe hanga ʻe he kau tau ʻa Kōlesí ʻo afeʻi ʻa e ngaahi vai ʻo e vaitafe ʻIufaletesí, ʻa ia naʻe tafe atu ki he kolo ko Pāpiloné. Naʻe malava ʻi he palani ʻa Kōlesí ke aʻa atu ai ʻene kau taú ʻo hū ki he koló. Hili hono hamu ʻo e koló, naʻe fakatauʻatāinaʻi ʻe Kōlesi ʻa e kau Siu naʻa nau nofo pōpula ʻi Pāpiloné pea fakaʻatā kinautolu ke nau foki ʻo toe langa ʻa Selusalema, ʻa ia ne fakaʻauha ʻi he taʻu ʻe 70 ki muʻá.

ʻAisea 45:1: “Ko e folofola eni ʻa Sihova ki heʻene tokotaha paní, kia Kōlesi, ʻa ia kuó u puke ʻa hono nima toʻomataʻú ke ikunaʻi ha ngaahi puleʻanga ʻi hono ʻaó, ke toʻo ʻa e mālohi ʻo e ngaahi tuʻí, ke fakaava ʻi hono ʻaó ʻa e ongo laumatapaá, koeʻuhí ke ʻoua ʻe tāpuni ʻa e ngaahi matapā ʻo e koló.”

Naʻe hū ʻa e kau Pēsiá ki he koló ʻo fou ʻi he ongo lau matapā lalahi ʻi he ʻā ʻo e koló, ʻa ia naʻe tuku fakaava ʻi he taʻetokanga. Kapau naʻe ʻilo ʻa e kau Pāpiloné ki he palani ʻa Kōlesí, naʻa nau mei tāpuni ʻa e ngaahi matapā kotoa naʻe ava ki he vaitafé. Kae hangē ko ia naʻe hokó, naʻe ʻikai malu ʻa e koló.

Ko e kikite fakaofó ni ko e taha ia ʻo e ngaahi kikite lahi ʻi he Tohi Tapú kuo hoko moʻoni.a ʻI he ʻikai hangē ko e ngaahi meʻa kuo tomuʻa fakahā ʻe he tangatá, ʻo taukaveʻi ki honau ngaahi ʻotua loí, ʻoku tupu ʻa e ngaahi kikite ia ʻi he Tohi Tapú mei he Tokotaha ʻa ia naʻá ne talaki: “ʻOku ou tomuʻa tala mei he kamataʻangá ʻa e meʻa ʻe hokó, pea mei he kuonga muʻá ʻa e ngaahi meʻa kuo teʻeki ke faí.”​—ʻAisea 46:10.

Ko e ʻOtua moʻoní pē, ʻa ia ko hono huafá ko Sihova, ʻoku lava ke ne fai ʻa e taukaveʻi ko iá. ʻOku ʻuhinga moʻoni ʻa e huafa ko iá ko e “ʻOkú Ne Fakatupunga ke Hoko.” ʻOku tuhu ia ki heʻene malava ke ne ʻafioʻi mo fakafōtunga ʻa e ngaahi meʻa ʻe hoko ʻi he kahaʻú ke fehoanaki mo hono finangaló. ʻOku fakapapauʻi mai ai kiate kitautolu kuo pau ke ne fakahoko ʻa e meʻa kotoa kuó ne talaʻofa ki aí.

ʻOkú ke fieʻilo ki he meʻa ʻoku leaʻaki ʻe he ngaahi kikite ʻi he Tohi Tapú ʻo fekauʻaki mo hotau taimí? ʻI he taʻu nai ʻe 2,000 kuo maliu atú, naʻe tomuʻa tala ai ʻe he Tohi Tapú ha “ngaahi taimi fakalilifu ʻa ia ʻe faingataʻa ke fekuki mo ia” ʻe hoko mai “ʻi he ngaahi ʻaho fakaʻosí.” Ngaahi ʻaho fakaʻosi ʻo e hā? ʻIkai ʻo e māmaní pe faʻahinga ʻo e tangatá, ka ko e tāufehiʻa, fakafeʻātungia mo e faingataʻa kuo tofanga ai ʻa e faʻahinga ʻo e tangatá ʻi he laui afeʻi taʻu. Tau sivisiviʻi angé ha ngaahi kikite siʻi pē ʻokú ne fakaʻilongaʻi ʻa e “ngaahi ʻaho fakaʻosí.”

2 Tīmote 3:1-5: “ʻI he ngaahi ʻaho fakaʻosí . . . , ko e tangatá te nau hoko ko e kau ʻofa kiate kinautolu pē, ko e kau ʻofa ki he paʻangá, loto-mahikihiki, hīkisia, kau lea taʻetokaʻi, talangataʻa ki he mātuʻá, kau taʻehoungaʻia, taʻemateaki, ʻikai maʻu ʻa e ʻofa fakanatulá, lotolotokehe, kau laukovi loi, ʻikai maʻu ʻa e mapuleʻi-kitá, anga-kakaha, ʻikai ʻofa ki he leleí, kau lavaki, taʻefieauna, fakafuofuolahi ʻi he hīkisia, kau ʻofa ki he mālié kae ʻikai ʻofa ki he ʻOtuá, hā fakangalingali atu ʻoku nau maʻu ʻa e anga-fakaʻotuá ka ʻoku ʻikai ke hā moʻoni ʻa hono mālohí ʻiate kinautolu.”

ʻIkai ʻokú ke loto-tatau ko e ʻulungaanga peheé ʻoku mātuʻaki hā mahino ia ʻi he kakaí ʻi he ʻahó ni? Kuó ke fakatokangaʻi ʻoku takatakai kiate kitautolu ʻa e kakai ʻoku nau ʻotuaʻaki pē kinautolu, ʻofa ki he paʻangá, pea tākiekina ʻe he hīkisiá? ʻIkai ʻokú ke fakatokangaʻi ʻoku toponongataʻa ange ʻa e kakaí pea ʻikai loko loto-tatau mo e niʻihi kehé? Ko hono moʻoní ʻokú ke fakatokangaʻi ʻa e lahi fau ʻa e talangataʻa ki he mātuʻá pea ko e kakaí fakalūkufua ʻoku lahi ange ʻenau ʻofa ki he mālié ʻi heʻenau ʻofa ki he ʻOtuá. Pea ʻoku fakaʻau ke kovi ange ʻa e ngaahi meʻá ʻi he ʻaho kotoa.

Mātiu 24:6, 7: “Te mou fanongo ʻi he ngaahi tau pea mo e ongoongo ʻo e ngaahi tau. . . . ʻE tuʻu ʻa e fonua ki he fonua mo e puleʻanga ki he puleʻanga.”

ʻOku pehē ʻe he savea ʻe niʻihi ko e tokolahi fakakātoa ʻo e mate ʻi he taú mo e ngaahi fepaki fakakautaú talu mei he 1914 ʻoku laka hake ʻi he 100 milioná, ʻoku lakasi ʻe he fika ko iá ʻa e tokolahi fakakātoa ʻo e ngaahi puleʻanga lahi. Sioloto atu ki he loʻimata, mamahi, mo e faingataʻaʻia ʻoku fakafofongaʻi ʻe he mataʻifika lahi fau ko iá. Kuo fakatokangaʻi ia ʻe he ngaahi puleʻangá pea nau fakangata ʻa e taú?

Mātiu 24:7: “ʻE ʻi ai ʻa e ngaahi nounou fakameʻatokoni.”

Naʻe pehē ʻe he Polokalama Meʻakai ʻa e Māmaní: “ʻI ha māmani ʻoku tau fakatupu ai ʻa e meʻakai feʻunga ke fafangaʻaki ʻa e tokotaha kotoa, ko e kakai ʻe toko 815 miliona​—toko taha ʻi he toko hiva—​ʻoku mohe fiekaia ʻi he pō taki taha. Ko e toe kovi angé​—ko e toko taha ʻi he toko tolu—​ʻoku faingataʻaʻia tupu mei he fasimanavá.” ʻOku fakafuofua ko e fānau ʻe toko tolu miliona nai ʻoku mate ʻi he taʻu taki taha tupu mei he fiekaiá.

Luke 21:11: “ʻE ʻi ai ʻa e ngaahi mofuike lalahi.”

ʻI he taʻu taki taha, ʻoku ʻi ai ʻa e mofuike ʻe 50,000 nai ʻoku lahi feʻunga ke ongoʻi ʻe he faʻahinga ʻo e tangatá. ʻOku fakahoko ʻe he mofuike ʻe 100 nai ha maumau lahi ki he ngaahi falé, pea ʻoku hoko ha fuʻu mofuike lahi ʻaupito ʻi he taʻu kotoa pē. Fakatatau ki ha savea ʻe taha, ʻi he 1975 ki he 2000, kuo toʻo ai ʻe he ngaahi mofuiké ʻa e moʻui ʻa e kakai ʻe toko 471,000.

Mātiu 24:14: “Ko e ongoongo lelei ko ʻeni ʻo e Puleʻangá ʻe malangaʻi ia ʻi he kotoa ʻo e māmani kuo nofoʻí ko ha fakamoʻoni ki he ngaahi puleʻanga kotoa pē, pea ʻe toki hoko mai ʻa e ngataʻangá.”

Ko e Kau Fakamoʻoni ʻa Sihová, ʻa ia ʻoku laka hake ʻi he toko valu milioná, kuo nau malanga mo faifakamoʻoni ki he ongoongo lelei ʻo e Puleʻanga ʻo e ʻOtuá ʻi he ngaahi fonua ʻe 240 nai ʻi he kotoa ʻo e māmaní. ʻOku nau fanongonongo ʻa e ongoongo leleí ʻi he ngaahi fuʻu kolo lalahí mo e fanga kiʻi kolo tuʻu mavahé, ʻi he vaotaá, pea ʻi he ʻotu moʻungá. ʻOku tomuʻa taha ʻe he kikité ʻi he kakato pē ʻa e ngāué ni ʻo fiemālie ki ai ʻa e ʻOtuá “ʻe toki hoko mai ʻa e ngataʻangá.” ʻE ʻuhinga iá ki he hā? ʻE ʻuhinga ia ki he ngataʻanga ʻo e pule fakaetangatá pea hoko mai ha pule ʻe taha​—ko e pule ʻa e Puleʻanga ʻo e ʻOtuá. Ko e hā ʻa e ngaahi talaʻofa ʻe fakahoko moʻoni ʻi he malumalu ʻo e Puleʻanga ʻo e ʻOtuá? Hoko atu hoʻo lautohí ke ke ʻilo.