Kuo ʻIkai ʻAupito ke Liʻaki Au ʻe Sihova!

NAʻE ʻohake au ʻi Graz, ʻAositulia. ʻI heʻeku taʻu fitú, naʻe ʻave ai au ki ha ʻapiako fakalotu. Kae kehe, naʻá ku siotonu ai ʻi he ʻulungaanga taʻetaau fakaefehokotaki fakasino palakū ʻa e kau pātelé mo e kau tāupoʻoú. Ko ia naʻe fakaʻatā ai ʻe heʻeku faʻeé ke u mavahe ʻi loto ʻi ha taʻu ʻe taha mei he ʻapiakó.

Ki mui ai, naʻá ku hū ki ha ʻapiako nofo maʻu. ʻI he pō ʻe taha, naʻe haʻu ki ai ʻa ʻeku tamaí ke ʻave au ki ha feituʻu malu he naʻe laku pomuʻi lahi ʻa Graz. Naʻa mau fakaū ʻi he kolo ko Schladming. ʻI heʻemau aʻu ki ai hili pē ʻemau kolosi ʻi ha halafakakavakavá, naʻe pomuʻi ia ʻo ʻauha. ʻI he taimi ʻe taha, naʻe fana mai ai ha ngaahi vakapuna naʻe puna māʻulalo ki heʻeku kui fefiné mo au ʻi homau loto ʻapí. ʻI he ʻosi ʻa e taú, naʻe hā ngali naʻe liʻaki kimautolu ʻe he siasí mo e puleʻangá fakatouʻosi.

ʻI he 1950, naʻe kamata ke vahevahe ai ʻe ha taha ʻo e Kau Fakamoʻoni ʻa Sihová ʻa e pōpoaki ʻi he Tohi Tapú ki heʻeku faʻeé. Naʻá ku faʻa fanongo ki heʻena fetalanoaʻakí pea aʻu ʻo u ʻalu mo ʻeku faʻeé ki ha ngaahi fakataha ʻa e fakatahaʻangá. ʻI heʻene hoko ʻo tuipau naʻe maʻu ʻe he Kau Fakamoʻoni ʻa Sihová ʻa e moʻoní, naʻá ne papitaiso ʻi he 1952.

ʻI he taimi ko iá, naʻe hā ngali hangē ʻa e fakatahaʻanga ia ʻi he feituʻú kiate au ko ha kalapu ʻa e kau fineʻeikí. Kae kehe, ki mui ai, naʻá ma ʻaʻahi ki ha fakatahaʻanga ʻa ia naʻe tokolahi ai ʻa e toʻutupú​—ʻo ʻikai ʻaupito ko ha kalapu ʻa e kau fineʻeikí! ʻI he foki ki Graz, naʻe kamata ke u maʻu ʻa e ngaahi fakatahá kotoa, pea naʻe vave foki ʻeku tuipau ko e meʻa naʻá ku akó ko e moʻoní ia. Naʻá ku ʻiloʻi foki ko Sihová ko ha ʻOtua ʻokú ne tokoni hokohoko ki heʻene kau sevānití. ʻOkú ne fai pehē naʻa mo e taimi ʻoku tau ongoʻi ai ʻoku tau fehangahangai ʻiate kitautolu pē mo e ngaahi tuʻunga faingataʻá.​—Saame 3:5, 6.

Naʻá ku loto ke vahevahe atu ʻa e moʻoní ki he niʻihi kehé. Naʻá ku kamata ʻi heʻemau fānaú. Ko hoku fanga tokoua lalahi ʻe toko faá naʻa nau ʻosi mavahe mei ʻapi ʻo ngāue ko e kau faiako. Ka naʻá ku ʻaʻahi kiate kinautolu ʻi he ngaahi kolo kehekehe ʻo fakalototoʻaʻi ke nau ako Tohi Tapu. Naʻe faifai pē ʻo ako ʻa e kotoa ʻemau fānaú pea nau hoko ko e Kau Fakamoʻoni ʻa Sihova.

Lolotonga ʻa e uike hono ua ʻo ʻeku ngāue fakafaifekau fale ki he falé, naʻá ku fetaulaki ai mo ha fefine taʻu 30 tupu ʻa ia naʻe kamata ke u ako Tohi Tapu mo ia. Naʻá ne fakalakalaka ʻo papitaiso, pea ki mui ai, naʻe papitaiso ʻa hono husepānití mo hono ongo foha. Ko e ako ko iá naʻe maongo lahi fakalaumālie ia kiate au. Ko e hā hono ʻuhingá? Ko hono moʻoní, naʻe teʻeki ai ke ako Tohi Tapu fakalelei ha taha mo au. Naʻe pau ai ke u teuteu lelei ʻa e lēsoni taki taha. ʻI ha ʻuhinga, naʻá ku ʻuluaki teuteú ke akoʻi tonu au pea hili iá ʻe lava ke u akoʻi ia ki heʻeku tokotaha akó! Naʻe ʻai moʻoni ʻe he meʻa ko iá ke loloto ʻa ʻeku houngaʻia ʻi he moʻoní. ʻI ʻEpeleli 1954, naʻá ku fakahāhā ai ʻeku fakatapui kia Sihová ʻaki ʻeku papitaiso ʻi he vaí.

ʻI he 1955, naʻá ku maʻu ai ha ngaahi fakataha-lahi fakavahaʻapuleʻanga ʻi Siamane, Falanisē, mo ʻIngilani. Lolotonga ʻeku ʻi Lonitoní, naʻá ku fetaulaki ai mo Albert Schroeder. Naʻá ne faiako ʻi he Akoʻanga Tohi Tapu ko Kiliatí, pea naʻá ne ngāue ki mui ai ko ha mēmipa ʻo e Kulupu Pulé. Lolotonga ha ʻaʻahi ki he Mesiume ʻi Pilitāniá, naʻe fakahaaʻi mai ai ʻe Tokoua Schroeder kiate kimautolu ha ngaahi muʻaki tatau tohinima Fakatohitapu. Naʻe ʻi ai ʻa e huafa ʻo e ʻOtuá ʻi he ngaahi mataʻitohi faka-Hepeluú, pea naʻá ne fakamatalaʻi ʻa honau mahuʻingá. Naʻe maongo fakaeongo mo fakalaumālie eni kiate au, ʻo ne ʻai au ke u toe fakapapauʻi ange ʻi ha toe taimi ki muʻa ke u pouaki ʻa e moʻoni mei he Folofola ʻa e ʻOtuá.

Naʻá ku kamata ke ngāue ko ha tāimuʻa taimi-kakato ʻi he ʻaho 1 ʻo Sanuali, 1956. ʻI ha māhina ʻe fā ki mui ai, naʻe fakaafeʻi au ke u ngāue ko ha tāimuʻa makehe ʻi ʻAositulia. ʻI he taimi ko iá, naʻe ʻikai ha Kau Fakamoʻoni ʻi Mistelbach, ʻa e kolo naʻe fiemaʻu ke u ngāue aí. Ka naʻá ku fetaulaki mo ha pole makehe. Naʻá ku fuʻu kehekehe mo hoku hoa tāimuʻá. Naʻá ku meimei taʻu 19 pea ko ʻeku haʻu mei he kolo lahí; naʻá ne taʻu 25 pea ko ha taʻahine ia mei ha kolo ʻuta. Naʻá ku saiʻia ke mohe fuoloa ʻi he pongipongi kotoa; naʻá ne saiʻia ʻi he ʻā pongipongiá. ʻI he aʻu ki he efiafí, naʻá ku hehema ke ʻā fuoloa; naʻá ne loto ke mohe efiafi. Neongo ia, ko hono ngāueʻaki ʻa e akonaki ʻi he Tohi Tapú, naʻá ma fakaleleiʻi ai ʻema ngaahi faikehekehé peá ma fiefia ʻi he hoko ko ha ongo hoa tāimuʻa lavameʻa.

Ko hono moʻoní, naʻá ma fehangahangai mo e ngaahi pole kehe naʻe toe mafatukituki ange. Naʻe toe ʻi ai ha fakatanga, ka naʻe “ʻikai liʻekina” kimaua. (2 Kol. 4:7-9) ʻI he taimi ʻe taha, lolotonga ʻema malanga ʻi ha kolo ʻuta, naʻe tuku ange mai ʻe he kakaí ʻenau fanga kulií. Naʻe vave hono takatakaiʻi au mo hoku hoá ʻe he fuʻu fanga kulī naʻa nau kālou mo ʻūʻūnifo. Naʻá ma fepiki, pea naʻá ku lotu foki, “ʻE Sihova, ʻi haʻanau aʻu mai, ʻai muʻa ke vave ʻema maté!” ʻI he meimei aʻu mai ʻa e fanga kulií, naʻa nau tuʻu, ʻo tāvilivili, pea nau mavahe. Naʻá ma ongoʻi naʻe maluʻi kimaua ʻe Sihova. ʻI he hili iá, naʻá ma malanga ʻi he kotoa ʻo e kolo ko iá, pea ʻi heʻema fiefiá, naʻe mātuʻaki fiefanongo ʻa e kakaí. Mahalo pē naʻa nau ʻohovale ʻi he ʻikai ke kai kimaua ʻe he fanga kulií pe ko ʻema kītaki pē ʻi he hili ʻa e hokosia fakailifia ko iá. Naʻe iku ʻo hoko ʻa e niʻihi ʻo kinautolu ko e Kau Fakamoʻoni.

Naʻe toe ʻi ai ʻema hokosia fakalilifu. ʻI he ʻaho ʻe taha naʻe foki mai ai ʻa e pule ʻo e falé ʻokú ne konā, ʻo ne fakamanamana te ne tāmateʻi kimaua mo ne tukuakiʻi naʻá ma fakahohaʻasi ʻa e ngaahi kaungāʻapí. Naʻe feinga ʻa hono malí ke ʻai ia ke ne mokomoko ka naʻe ʻikai ha ola. Naʻá ma fanongo hifo mei homa loki ʻi ʻolungá ki he meʻa kotoa ko iá. Naʻá ma fokotuʻutuʻu fakavave ha ʻū sea ʻi muʻa ʻi homa matapaá pea kamata faʻo ʻema kató. ʻI heʻema fakaava ʻa e matapaá, naʻe tuʻu mai ʻa e pule falé ʻi ʻolunga ʻi he sitepú ʻokú ne pukepuke ha fuʻu hele. Ko ia naʻá ma hola ʻi he matapā ʻi muí ʻo ʻalu ʻi he hala lōloa ʻi he ngoué mo ʻema ʻū meʻá kotoa, pea ʻikai ʻaupito te ma toe foki ki ai.

Naʻá ma ʻalu ki ha hōtele pea kole ha loki ai. Ko e meʻa naʻe hokó, naʻá ma nofo ai ʻi he meimei taʻu ʻe taha, ʻa ia naʻe ʻaonga ʻaupito ia ki heʻema ngāue fakafaifekaú. Anga-fēfē? Naʻe tuʻu ʻa e hōtele ʻi he uhouhonga ʻo e koló, pea naʻe loto ʻa e niʻihi ʻo ʻema kau ako Tohi Tapú ke fai ai ʻenau akó. Naʻe vave ʻema fai ha ako tohi mo e Ako Taua Leʻo fakauike ʻi homa loki ʻi he hōtelé, ʻo kau ki ai ʻa e toko 15 nai.

Naʻá ma nofo ʻi Mistelbach ʻo laka hake he taʻu ʻe taha. Pea naʻe toe vaheʻi au ki Feldbach, ʻi he tonga-hahake ʻo Graz. Naʻe ʻi ai hoku hoa tāimuʻa foʻou, ka naʻe ʻikai foki ke ʻi ai ha fakatahaʻanga. Naʻá ma nofo ʻi ha kiʻi loki ʻi he fungavaka ʻuluaki ʻo ha fale naʻe ngaohiʻaki ha ngaahi kupuʻi ʻakau. Naʻe hū mai ʻa e havilí ʻi he vahaʻa ʻo e ngaahi kupuʻi ʻakaú, ko ia naʻá ma feinga ke monosi ʻaki ha nusipepa ʻa e ngaahi avaavá. Naʻe toe pau foki ke ma ʻutu vai mei ha vaitupu. Ka naʻe tuha ʻa e feinga ko iá. ʻI loto ʻi ha ngaahi māhina siʻi, naʻe fokotuʻu ai ha kulupu. Naʻe faifai pē ʻo haʻu ki he moʻoní ʻa e toko 30 nai ʻi ha fāmili ʻa ia naʻá ma ako mo ia!

Ko e ngaahi hokosia ko iá naʻe ʻai ai ke mālohi ʻeku houngaʻia ʻi hono tokoniʻi hokohoko ʻe Sihova ʻa e faʻahinga ʻoku nau ngāue mālohi ʻi he ngaahi meʻa ʻo e Puleʻangá. Neongo kapau ʻoku ʻikai malava ke aʻu mai kiate kitautolu ʻa e tokoni ʻa ha tangata, ʻoku ʻi ai maʻu pē ʻa Sihova.​—Saame 121:1-3.

ʻI he 1958 naʻe teuteu ke fai ha fakataha-lahi fakavahaʻapuleʻanga ʻi he Kolo Niu ʻIoké, ʻi he Yankee Stadium mo e Polo Grounds. Naʻá ku tohi kole ke ʻalu ki ai, pea naʻe ʻeke mai ʻe he vaʻa ʻi ʻAosituliá pe te u saiʻia ke kau ki he kalasi hono 32 ʻi he Akoʻanga Kiliatí. ʻE lava fēfē ke u fakafisingaʻi ha monū pehē? ʻI he taimi pē ko iá naʻá ku tali, “ʻIo!”

ʻI he kalasi ʻi Kiliatí, naʻá ku tangutu ai ʻi he tafaʻaki ʻo Martin Poetzinger. Naʻá ne kātekina ha ngaahi hokosia fakalilifu ʻi he ngaahi kemi fakamamahi ʻa e kau Nasí. Naʻá ne ngāue foki ki mui ko ha mēmipa ʻo e Kulupu Pulé. Lolotonga ʻa e kalasí, naʻe fafana mai ai ʻa Martin ʻi he taimi ʻe niʻihi, “Erika, ko e hā ʻa e ʻuhinga ʻo e meʻá ni ʻi he lea faka-Siamané?”

ʻI he vaeua ʻo e akó, naʻe fanongonongo ai ʻe Nathan Knorr ʻa homau ngaahi vāhenga-ngāué. Naʻe vaheʻi au ki Palakuei. Koeʻuhí naʻá ku fuʻu kei siʻi, naʻe fiemaʻu ha ngofua mei heʻeku tamaí kae lava ke u hū ki he fonua ko iá. Hili hono maʻu iá, naʻá ku tūʻuta ʻi Palakuei ʻi Maʻasi 1959. Naʻe vaheʻi au ki ha ʻapi misinale ʻi Asunción, fakataha mo hoku hoa foʻou.

ʻIkai fuoloa mei ai, naʻá ku fetaulaki mo Walter Bright, ko ha misinale naʻe maʻu tohi fakamoʻoni ako ʻi he kalasi hono 30. Naʻe faai atu pē ʻo ma mali pea lava ai ke ma fehangahangai fakataha mo e pole ʻi he moʻuí. ʻI ha taimi pē naʻá ma fetaulaki ai mo ha palopalema faingataʻa, naʻá ma lau ʻa e talaʻofa ʻa Sihova ʻi he ʻAisea 41:10: “ʻOua ʻe ilifia, he ʻoku ou kau mo koe. ʻOua ʻe loto-moʻua, he ko au ʻa ho ʻOtuá. Te u fakaivimālohiʻi koe.” Naʻe fakapapauʻi mai heni kiate kimaua kapau te ma feinga mālohi ke hanganaki faitōnunga ai pē ki he ʻOtuá pea fakamuʻomuʻa ʻa hono Puleʻangá, heʻikai ʻaupito te ne liʻaki kimaua.

Naʻe vaheʻi kimaua ʻi ha taimi ki ha feituʻu naʻe ofi ki he kauʻāfonua ʻo Pelēsilá. Naʻe fakaʻaiʻai ai ʻe he kau faifekaú ʻa e toʻutupú ke nau tolomakaʻi homau ʻapi misinalé, lolotonga iá naʻe ʻikai ke ʻi ha tuʻunga lelei. Pea naʻe kamata ako Tohi Tapu ʻa Walter mo e pule polisí. Naʻá ne fakapapauʻi ke tuʻu ha kau ʻōfisa polisi ʻo ofi ki homa ʻapí ʻi ha uike, pea naʻe ʻikai ai ke toe fakahohaʻasi kimaua ʻe he kau fakatangá. Taimi nounou mei ai, naʻá ma hiki ki ha ngaahi nofoʻanga feʻungamālie ʻi he tafaʻaki ʻe taha ʻo e kauʻāfonua ʻo Pelēsilá. Naʻe ʻaonga moʻoni eni koeʻuhí naʻe lava ai ke ma fai ha ngaahi fakataha fakatouʻosi ʻi Palakuei pea ʻi Pelēsila. Ki muʻa ke ma mavahe mei he vāhenga-ngāue ko iá, naʻe fokotuʻu ai ha ongo kiʻi fakatahaʻanga.

Naʻe tala mai ʻe heʻeku kau toketaá heʻikai lava ke u maʻu ha fānau, ko ia naʻá ma ʻohovale ʻi he ʻiloʻi naʻá ku feitama ʻi he 1962! Naʻe faifai pē ʻo ma nofo ʻi Hollywood, Fololita, ofi ki he fāmili ʻo Walter. ʻI ha ngaahi taʻu, naʻe ʻikai lava ai ke u tāimuʻa pea pehē kia Walter. Naʻe pau ke ma tokangaʻi ha fāmili. Neongo ia, naʻe hokohoko atu pē ʻema fakamuʻomuʻa ʻa e ngaahi meʻa ʻo e Puleʻangá.​—Māt. 6:33.

ʻI heʻema aʻu ki Fololita ʻi Nōvema 1962, naʻá ma ʻohovale ai ʻi he ʻilo ko e anga ʻo e fakakaukau ʻa e feituʻú fekauʻaki mo e ngāue fāitahá naʻe ʻuhinga iá ʻe fai ʻe he fanga tokoua ʻuliʻulí ʻenau ngaahi fakatahá ʻo mavahe mei he fanga tokoua pālangí, pea naʻa nau malanga ʻi he ngaahi feituʻu kehekehe. Ka ko Sihová ʻoku ʻikai te ne fakafaikehekeheʻi ʻa e ngaahi matakalí, pea ʻikai fuoloa mei ai naʻe ngāue fāitaha ʻa e ngaahi matakali ʻi he ngaahi fakatahaʻangá. Naʻe hā mahino ʻa e kau ʻa e toʻukupu ʻo Sihová ʻi he fokotuʻutuʻu ko ení, he ʻi he taimi ní ʻoku ʻi ai ʻa e ngaahi fakatahaʻanga lahi ʻi he feituʻu ko iá.

Ko e meʻa fakamamahí, naʻe mate ʻa Walter ʻi ha kanisā ʻuto ʻi he 2015. Naʻá ne hoko ko ha husepāniti lelei ʻaupito ʻi he taʻu ʻe 55, ko ha tokotaha ia naʻe ʻofa kia Sihova peá ne tokoniʻi ʻa e fanga tokoua tokolahi. ʻOku ou fakatuʻamelie atu ke toe sio kiate ia ʻi heʻene toe foki ʻo moʻui lelei ʻi he taimi te ne toetuʻu aí.​—Ngā. 24:15.

ʻOku ou houngaʻia ʻi he kau ʻi he ngāue taimi-kakató ʻi he taʻu ʻe 40 tupu, ʻo u hokosia ai ʻa e fiefia lahi mo e pale lahi. Ko e fakatātaá, naʻe malava ke u ʻi ai mo Walter ʻi he papitaiso ʻema kau ako Tohi Tapu ʻe toko 136. Ko e moʻoni, naʻe ʻi ai ʻa e ngaahi faingataʻa. Ka naʻe ʻikai ʻaupito te ma vakai ki he ngaahi meʻá ni ko ha ʻuhinga ia ke tuku ai ʻema ngāue ki homa ʻOtua faitōnungá. ʻI hono kehé, naʻá ma ʻunuʻunu ʻo toe ofi ange kiate ia, ʻo falala te ne fakaleleiʻi ʻa e ngaahi meʻá ʻi heʻene taimi pē ʻaʻana mo ʻene founga pē ʻaʻana. Pea ʻokú ne fai pehē!​—2 Tīm. 4:16, 17.

ʻOku ou ongoʻi ʻaupito ʻa e puli ʻa Walter, ka ʻoku tokoniʻi au ʻe he tāimuʻá ke u fekuki mo ia. ʻOku ou ʻiloʻi ʻoku mātuʻaki ʻaonga hono akoʻi ʻa e niʻihi kehé, naʻa mo hono vahevahe kiate kinautolu ʻa e ʻamanaki ʻo e toetuʻú. Ko e moʻoni, kuo ʻikai ʻaupito ke liʻaki au ʻe Sihova ʻi ha ngaahi founga lahi ʻoku ʻikai lava ke u fakalau. ʻI heʻene fai ki heʻene talaʻofá, kuó ne tokoniʻi au, fakaivimālohiʻi au, pea hanganaki piki maʻu kiate au ʻaki hono “nima toʻomataʻu ʻo e māʻoniʻoní.”​—ʻAi. 41:10.