ʻAi Au ʻe ha Tofiʻa Faka-Kalisitiane Fakakoloa Ke U Lakalakaimonū

ʻI he 1913, ko ʻeku tamaí, ʻa John Mills, naʻá ne papitaiso ʻi Niu ʻIoke ʻi hono taʻu 25. Naʻe fai ʻe Tokoua Russell ʻa e malanga papitaisó. Taimi nounou mei ai, naʻe ʻalu ʻeku tamaí ki Tuliniteti, ʻo ne mali ai mo Constance Farmer, ko ha Ako Tohi Tapu faivelenga. Naʻe tokoni ʻeku tamaí ki hono kaumeʻa ko William R. Brown ke hulu ʻa e “Tulama-ʻAta ʻo e Fakatupú.” Naʻá na fai pehē ʻo toki aʻu ki hono vaheʻi ʻa Tokoua mo Tuofefine Brown ki ʻAfilika Hihifo ʻi he 1923. Ko ʻeku tamaí mo ʻeku faʻē, ʻa ia naʻá na maʻu ʻa e ʻamanaki fakahēvaní, naʻá na ngāue ai pē ʻi Tuliniteti.

Naʻe toko hiva ʻemau fānaú, ʻo fakahingoa ʻa e tamasiʻi lahí ki he palesiteni ʻi he taimi ko iá ʻo e Watch Tower Bible and Tract Society ko Rutherford. ʻI hono fāʻeleʻi au ʻi Tīsema 30, 1922, naʻe fakahingoa au kia Clayton J. Woodworth, ko e ʻētita ʻo e The Golden Age (ko e Awake! ia he taimí ni). Naʻe ʻai ʻe heʻemau ongo mātuʻá ke mau maʻu ha ako feʻunga, ka naʻá na fakalototoʻaʻi ke mau fokotuʻu ha taumuʻa fakalaumālie. Naʻe maʻu ʻe he fineʻeikí ha malava makehe ʻi he fakaʻuhinga fakatupu tuipau mei he Folofolá. Naʻe saiʻia ʻeku tamaí ke talanoa ki he ngaahi talanoa Fakatohitapú, peá ne fakatātaaʻi ia ʻo lava ke mau sioloto atu ki he fakamatala Fakatohitapú.

Naʻe ola lelei ʻena feingá. Ko e toko tolu ʻo kimautolu ʻi he tamaiki tangata ʻe toko nimá naʻa mau ʻalu ki he Akoʻanga Kiliatí. Naʻe tāimuʻa hoku tuofefine ʻe toko tolu ʻi he ngaahi taʻu ʻi Tuliniteti mo Topako. ʻI he akonaki mo e faʻifaʻitakiʻanga lelei ʻemau ongo mātuʻá, naʻá na tō ai kimautolu fānaú “ʻi he fale ʻo Sihová.” Ko ʻena fakalototoʻá naʻe tokoni ia ke mau nofo ai pē ai pea tupu ʻāfaʻafa “ʻi he ongo lotoʻā ʻo hotau ʻOtuá.”​—Saame 92:13.

Naʻe fokotuʻutuʻu ʻa e ngāue fakamalangá mei homau ʻapí. Naʻe fakataha ki ai ʻa e kau tāimuʻá pea faʻa talanoa fekauʻaki mo Tokoua George Young, ko ha misinale Kānata naʻá ne ʻaʻahi ki Tuliniteti. Naʻe talanoa fiefia ʻeku ongo mātuʻá ki hona ongo hoa ngāue ki muʻá, ʻa Tokoua mo Tuofefine Brown, ʻa ia naʻá na ʻi ʻAfilika Hihifo he taimi ko iá. Naʻe ueʻi au ʻe he meʻá ni kotoa ke kamata ʻeku ngāue fakamalangá ʻi heʻeku taʻu hongofulú.

Naʻe fuʻu hangatonu ʻetau ʻū makasiní ʻi he taimi ko iá, ʻo fakaeʻa ʻa e lotu loí, kau fefakatauʻaki mānumanú mo e kau politiki kākaá. ʻI he tali ki aí, ʻi he 1936 naʻe poupouʻi ʻe he haʻa faifekaú ʻa e kōvana leʻoleʻo ʻo Tulinitetí ke ne taʻofi ʻa e ʻū tohi kotoa ʻa e Taua Leʻo. Naʻa mau fūfuuʻi ʻa e ʻū tohí kae hokohoko atu ke ngāueʻaki ia kae ʻoua ke ʻosi. Naʻa mau malanga ʻaki hono tui ʻa e papa tuʻuaki pea tufa mo e lauʻipepa-tuʻuaki ʻi heʻemau laka holo mo heka pasikala. Fakataha mo e faʻahinga ne nau ʻalu ʻi ha kā mo e meʻa fakaongo leʻo-lahi ki he kolo ko Tunapuna, naʻa mau malanga ʻo aʻu ki he kolo tuʻu mavahe taha ʻi Tulinitetí. Naʻe fakafiefia! Ko e ʻātakai fakalaumālie ko iá naʻe iku ai ki heʻeku papitaiso ʻi heʻeku taʻu 16.

Ko homau tofiʻa fakafāmilí mo e ngaahi hokosia ko ení naʻá ne ʻai ke u holi ke hoko ko ha misinale. Naʻe kei mālohi ʻa e holi ko iá ʻiate au ʻi heʻeku ʻalu ki Aruba ʻi he 1944 pea kau fakataha mo Tokoua Edmund W. Cummings. Naʻá ma fiefia ke fakataha mo ha kakai ʻe toko hongofulu ki he Fakamanatu ʻi he 1945. ʻI he taʻu hono hokó, naʻe fokotuʻu ʻa e fuofua fakatahaʻanga ʻi he motú.

Taimi nounou pē mei ai, naʻá ku faifakamoʻoni ʻikai anga-maheni ki ha kaungāngāue ko Oris Williams. Naʻe feinga mālohi ʻa Oris ke taukapoʻi ʻa e ngaahi tokāteline naʻe akoʻi ia ki aí. Kae kehe, fakafou ʻi ha ako Tohi Tapu, naʻá ne ako ʻa e moʻoni ʻo e Folofolá peá ne papitaiso ʻi Sanuali 5, 1947. ʻI he faai atu e taimí, naʻá ma feʻofaʻaki peá ma mali. Naʻá ne kamata tāimuʻa ʻi Nōvema 1950. Koeʻuhi ko Oris naʻe kamata ke u toe fiefia ange ʻi he moʻuí ʻi ha founga kehe.

ʻI he 1955 naʻe fakaafeʻi kimaua ki he Akoʻanga Kiliatí. ʻI he teuteu ki he monū ko iá, naʻá ku fakafisi mo Oris ʻi heʻema ngāué, fakatau atu homa ʻapí mo e ʻū koloa kehe, pea lea māvae ki Aruba. ʻI Siulai 29, 1956, naʻá ma maʻu tohi fakamoʻoni ako mei he kalasi hono 27 ʻo Kiliatí pea vaheʻi kimaua ki Naisīlia.

ʻI he sio atu ki muí, naʻe pehē ʻe Oris: “ʻE lava ke tokoniʻi ʻe he laumālie ʻo Sihová ha taha ke ne fekuki mo e faingataʻa ʻo e moʻui ko ha misinalé. ʻI he ʻikai hangē ko hoku husepānití, naʻe ʻikai ʻaupito ke u fie hoko ko ha misinale. Naʻá ku saiʻia ange ke maʻu ha ʻapi pea ʻohake ha fānau. Naʻe liliu ʻeku fakakaukaú ʻi heʻeku ʻiloʻi ʻa e fakavavevave hono fiemaʻu ke malangaʻi ʻa e ongoongo leleí. ʻI heʻema ʻosi mei Kiliatí, naʻá ku mateuteu kakato ke malanga ko ha misinale. ʻI heʻema heka ʻi he vaka Queen Mary, naʻe ui mai ʻa Worth Thornton, mei he ʻōfisi ʻo Tokoua Knorr ke ma maʻu ha folau lelei. Naʻá ne tala mai te ma ngāue ʻi Pēteli. ‘ʻOiauē!’ Naʻá ku māpuhoi. Ka naʻe vave ʻeku feʻunuʻakí peá u ʻofa ʻi he ngāue ʻi Pētelí, ʻa ia naʻá ku maʻu ai ʻa e vāhenga-ngāue kehekehe. Ko e ngāue ne u saiʻia taha aí ko e talitali kakaí. ʻOku ou ʻofa he kakaí, pea naʻe ʻai au ʻe he ngāué ni ke u fetaulaki tonu ai mo e fanga tokoua Naisīliá. Ne aʻu mai ʻa e tokolahi ʻoku nau efua, helaʻia, fieinua mo fiekaia. Ko ha monū ia ke ʻoange ʻa e meʻakai mo e fakafiemālie naʻa nau fiemaʻú. Ko e ngāue toputapu kotoa eni kia Sihova, pea ko e meʻa ia naʻá ne ʻomi kiate au ʻa e fiemālie mo e fiefia.” ʻIo ko e vāhenga-ngāue taki taha naʻe ʻai ai ke ma lakalakaimonū.

ʻI ha fakataha fakafāmili ʻi Tuliniteti ʻi he 1961, naʻe lave ʻa Tokoua Brown ki he niʻihi ʻo ʻene ngaahi hokosia fakafiefia ʻi ʻAfiliká. Naʻá ku lave leva ki he tupu ʻi Naisīliá. Naʻe hili mai ʻe Tokoua Brown hono nimá ki hoku umá peá ne pehē ki heʻeku tamaí: “Johnny, naʻe ʻikai te ke aʻu koe ki ʻAfilika, ka naʻe aʻu ʻa Woodworth ia ki ai!” ʻI he tali ki aí, naʻe pehē heʻeku tamaí: “Hokohoko atu, Worth! Hokohoko atu!” Ko e fakalototoʻa pehē mei he faʻahinga taukei fakalaumālie ko iá naʻe toe fakalolotoʻi ai ʻeku holi ke fakahoko fakaʻāuliliki ʻeku ngāue fakafaifekaú.

ʻI he 1962, naʻá ku maʻu ha monū ke ako lahi ange ʻi he kalasi hono 37 ʻo Kiliatí, ko ha ako māhina ʻe hongofulu. Ko Tokoua Wilfred Gooch, ʻa e ʻovasia ʻo e vaʻa Naisīliá he taimi ko iá, naʻá ne maʻu ʻa e kalasi hono 38 pea vaheʻi ia ki ʻIngilani. Ko hono tokangaʻi ʻa e vaʻa Naisīliá naʻe hoko ia ko hoku fatongiá. ʻI he muimui ki he faʻifaʻitakiʻanga ʻa Tokoua Brown, naʻe lahi ange ʻeku folaú, hoko ʻo ʻiloʻi mo ʻofa ʻi he siʻi fanga tokoua Naisīliá. Neongo naʻe ʻikai fuʻu lahi ʻenau meʻa fakamatelié hangē ko e kakai ʻi he ngaahi fonua fakalakalaka angé, ko ʻenau fiefiá mo e toponó naʻe hā mahino mei ai ko ha moʻui mohu ʻuhinga ʻoku ʻikai fakatuʻunga ia ʻi he paʻangá pe koloa fakamatelié. ʻI he fakakaukau atu ki honau tuʻungá, ʻoku fakaofo ke sio ʻoku nau maʻa, maau pea fakangeingeia ʻi he ngaahi fakatahá. ʻI heʻenau ʻaukolo mai ki he ngaahi fakataha-lahí, ʻoku aʻu mai ʻa e tokolahi ʻi he ngaahi loli mo e bolekajasa (ko ha pasi ʻikai hano sioʻata he tafaʻakí naʻe ngaahi fakalotofonua pē). ʻOku faʻa tā ha ngaahi kupuʻi lea ʻi he ʻū pasí. Ko e taha: “Hoko ha tulutā vai ko ha ʻōseni lahi.”

He moʻoni ē ko e kupuʻi lea ko iá! Ko e kiʻi feinga ʻa e tokotaha taki taha naʻe ʻaonga; naʻá ma tokoni mo kimaua ki ai. ʻI he 1974, naʻe hoko ʻa Naisīlia ko e fuofua fonua ia ʻi tuʻa mei ʻAmelika ke aʻu ki he kau malanga ʻe 100,000. Naʻe tupu ʻāfaʻafa ʻa e ngāué!

Lolotonga ʻa e tupu ko ení, naʻe hoko ʻa e Tau Fakalotofonua ʻi Naisīliá mei he 1967 ki he 1970. ʻI he laui māhina, ko hotau fanga tokoua ʻi he tafaʻaki ʻo Biafran ʻi he Vaitafe Naisá naʻe ʻikai lava ke nau toe fetuʻutaki mo e ʻōfisi vaʻá. Naʻe pau ke mau ʻave kiate kinautolu ʻa e meʻakai fakalaumālié. Hangē naʻe lave ki ai ʻi he talateú, ʻi he lotu mo e falala kia Sihova, naʻe tuʻo lahi ʻema kolosi ʻi he vaitafé.

ʻOku ou manatuʻi lelei ʻa e ngaahi fononga fakatuʻutāmaki ʻo e kolosi ʻi he Naisá, ʻo tuku ʻema moʻuí ke ʻi ha tuʻunga fakatuʻutāmaki ʻi he kau sōtia anga-fakamamahí, ko e mahamahakí mo e ngaahi fakatamaki kehe. Naʻe ʻosi fakatuʻutāmaki pē ʻa e fou atu ʻi he kau sōtia ʻa e puleʻangá, ka naʻe toe fakamanavahē ange ʻa e aʻu ki he tafaʻaki ʻo Biafran. ʻI he tuʻunga ʻe taha, naʻá ku kolosi ai ʻi he vaitafe tafe mālohi ʻo Naisá ʻi ha pōpao mei Asaba ki Onitsha pea ʻalu ke fakalototoʻaʻi ʻa e kau mātuʻa ʻi Enugu. Ko e fononga ʻe taha ke fakalototoʻaʻi ʻa e kau mātuʻá ʻi he tuʻutuʻuni ke tāmateʻi efiafia ʻa e ʻuhilá ʻi Aba. ʻI he Taulanga Harcourt, naʻe fakaʻosi fakavave ʻemau fakatahá ʻaki ha lotu ʻi he hū mai ʻi he tuʻakoló ʻa e kau sōtiá ki Biafran.

Naʻe mātuʻaki mahuʻinga ʻa e ngaahi fakataha ko iá ke fakapapauʻi ki siʻotau fanga tokouá ʻa e tokanga anga-ʻofa ʻa Sihová pea ʻoange ʻa e akonaki naʻa nau fiemaʻu lahi ʻi he fekauʻaki mo e tuʻu-ʻataá mo e fāʻūtahá. Naʻe kātekina lavameʻa ʻe he fanga tokoua ʻi Naisīliá ʻa e fakafepaki fakalilifu ko iá. Ko ʻenau feʻofaʻakí naʻe mālohi ange ia ʻi ha tāufehiʻa fakamatakali pē pea naʻa nau tauhi maʻu ʻa e fāʻūtaha faka-Kalisitiané. Ko ha monū ē ke ʻi ai fakataha mo kinautolu ʻi he taimi faingataʻa ko iá!

ʻI he 1969, ko Tokoua Milton G. Henschel naʻe sea ʻi he ʻAsemipilī Fakavahaʻapuleʻanga “Melino ʻi he Māmaní” ʻi he Yankee Stadium, ʻi Niu ʻIoke, pea naʻá ku tokoni kiate ia pea ako ʻa e meʻa lahi mei ai. Ko e ako taimi totonu eni koeʻuhi ʻi he 1970 naʻe fai ʻai ʻa e ʻAsemipilī Fakavahaʻapuleʻanga “Kakai ʻOku Hōifua ki Ai” ʻi Lagos, Naisīlia. ʻI hono fakahoko eni hili pē ʻa e tau fakalotofonuá, naʻe lavameʻa ʻa e kātoangá ni ʻi he tāpuaki pē ʻa Sihová. Ko ha kātoanga makehe eni naʻe fai ʻi he lea ʻe 17 pea maʻu ʻe he toko 121,128. Ko Tokoua Knorr mo Henschel mo e kau ʻaʻahi naʻa nau puna mai mei ʻAmelika mo ʻIngilani naʻa nau fakamoʻoni ki he papitaiso lahi taha faka-Kalisitiane talu mei he Penitekosí​—ko e kau ākonga foʻou ʻe 3,775! ʻI he tokoni ke fokotuʻutuʻu ʻa e kātoanga ko iá mahalo ko e taimi femoʻuekina taha ia ʻi heʻeku moʻuí. Naʻe tupulaki vave ʻaupito ʻa e kau malangá!

ʻI he taʻu ʻe 30 tupu ʻi Naisīliá, naʻá ku fiefia ʻi heʻeku faʻa ngāue ko ha ʻovasia fefonongaʻaki mo ha ʻovasia sone ʻi ʻAfilika Hihifo. He houngaʻia ē ko e kau misinalé ʻi hono maʻu ʻa e tokanga fakatāutaha mo e fakalototoʻá! He monū ē ko ia ke fakapapauʻi kiate kinautolu naʻe ʻikai te nau ngalo! Naʻe akoʻi mai ʻe he ngāué ni kiate au ko hono fakahāhā ʻa e mahuʻingaʻia fakafoʻituitui ʻi he kakaí ko e kī ia ki hono tokoniʻi kinautolu ke nau lakalakaimonū pea tauhi maʻu ʻa e mālohi mo e fāʻūtaha ʻa e kautaha ʻa Sihová.

Ko e tokoni pē ʻa Sihová naʻe malava ai ke ma fekuki mo e palopalema tupu mei he tau fakalotofonuá mo e mahamahakí. Naʻe hā mahino maʻu pē ʻa e tāpuaki ʻa Sihová. Naʻe pehē ʻe Oris:

“Naʻe toutou maʻu kimaua ʻe he malēliá. ʻI he taimi ʻe taha, naʻe leleakiʻi ʻa Worth ki ha falemahaki ʻi Lagos kuó ne pongia. Naʻe tala mai mahalo te ne mate, kae mālō naʻe ʻikai pehē! ʻI heʻene toe aké, naʻá ne talanoa fekauʻaki mo e Puleʻanga ʻo e ʻOtuá ki he neesi naʻá ne tokangaʻi iá. Ki mui ai, ne u ʻalu mo Worth ke sio ki he nēsí, ko Mr. Nwambiwe, ke fakatupulekina ʻene mahuʻingaʻia ʻi he Tohi Tapú. Naʻá ne tali ʻa e moʻoní peá ne hoko ki mui ai ko ha mātuʻa ʻi Aba. Naʻá ku lavameʻa foki ʻi hono tokoniʻi ʻa e tokolahi, ʻo aʻu ki he kau Mosilemi fefeka, ke nau hoko ko e kau sevāniti līʻoa kia Sihova. Ka naʻá ma fiefia lahi tahá ʻi he hoko ʻo ʻiloʻi mo ʻofa ʻi he kakai Naisīliá, ko ʻenau anga fakafonuá, tōʻongá mo e leá.”

Ko e toe lēsoni eni ʻe taha: Ke lakalakaimonū ʻi heʻema vāhenga-ngāue mulí, naʻe fiemaʻu ke ma ʻofa ʻi homa fanga tokouá mo e fanga tuofāfiné neongo ʻa e kehe ʻenau anga fakafonuá meiate kimaua.

Hili ʻa e ngāue ʻi he Pēteli ʻi Naisīliá, ʻi he 1987 naʻá ma maʻu ha vāhenga-ngāue foʻou ko e ongo misinale ʻi he malaʻe malangá ʻi he kiʻi motu fakaʻofoʻofa ko Sā. Lūsia ʻi he Kalipiané. Ko ha vāhenga-ngāue fakafiefia moʻoni ia, ka naʻe ʻi ai hono pole foʻou. ʻI he ʻikai hangē ko ʻAfiliká, ʻa ia naʻe maʻu ai ʻe he tangata ʻe taha ha ngaahi uaifi tokolahi, ʻi heni ʻi Sā. Lūsia, ko e palopalemá naʻe nonofo pē ʻa e ongo meʻá kae ʻikai mali fakalao. Naʻe ueʻi ʻe he Folofola mālohi ʻa e ʻOtuá ʻa e tokolahi ʻema kau ako Tohi Tapú ke fai ʻa e ngaahi liliu naʻe fiemaʻú.

ʻI he hōloa homa mālohí ʻi he taʻumotuʻá, naʻe vaheʻi anga-ʻofa kimaua ʻe he Kulupu Pulé ki he ʻuluʻi ʻapitanga ʻi māmani ʻi Brooklyn, Niu ʻIoke, ʻAmelika, ʻi he 2005. ʻOku ou kei fakamālō pē he ʻaho kotoa kia Sihova koeʻuhi ko Oris. Naʻe ikuʻi ia ʻe he fili ko e maté ʻi he 2015, pea ko e mamahi ʻi heʻene molé ʻoku taʻealafakamatalaʻi. Ko e hoa lelei moʻoni mo ha uaifi anga-ʻofa ia. Naʻá ku ʻofa moʻoni ʻiate ia ʻi he taʻu ʻe 68 ʻema nofo malí. Naʻá ma ʻiloʻi ko e kī ki he fiefiá, ʻi he nofo malí pea ʻi he fakatahaʻangá, ko e fakaʻapaʻapaʻi ʻa e tuʻunga-ʻulú, fakamolemole loto-lelei, hanganaki anga-fakatōkilalo pea fakahāhā ʻa e fua ʻo e laumālié.

ʻI heʻema hokosia ʻa e siva ʻa e ʻamanakí mo e loto-siʻí, naʻá ma hanga kia Sihova ke ne tokoniʻi kimaua ke tauhi maʻu taʻeueʻia ʻema ngaahi feilaulau fakafoʻituituí. ʻI heʻema hokohoko atu ke feʻunuʻakí, naʻá ma sio naʻe hoko ʻo toe lelei ange ʻa e ngaahi meʻá ʻi he taimi kotoa​—pea ko e lelei tahá ʻoku kei ʻi muʻa!​—ʻAi. 60:17; 2 Kol. 13:11.

ʻI Tuliniteti mo Topako, naʻe tāpuakiʻi ʻe Sihova ʻa e ngāue ʻeku ongo mātuʻá mo e niʻihi kehé koeʻuhi​—fakatatau ki he līpooti fakamuimui tahá—​ko e toko 9,892 kuo nau kau ki he lotu moʻoní. ʻI Aruba, naʻe ngāue ʻa e tokolahi ke fakaivimālohiʻi ʻa e muʻaki fakatahaʻanga ne u kau ki aí. ʻI he motu ko iá he taimí ni ʻoku ʻi ai ʻa e fakatahaʻanga lakalakaimonū ʻe 14. Ka ʻi Naisīlia, kuo tupulaki ʻa e kau malangá ki ha fuʻu kakai ʻe toko 381,398. Pea ʻi Sā. Lūsia, ko e toko 783 ʻoku nau poupouʻi ʻa e Puleʻanga ʻo Sihová.

ʻOku ou taʻu 90 tupu he taimí ni. ʻOku pehē ʻe he Saame 92:14 fekauʻaki mo e faʻahinga ʻoku tō ʻi he fale ʻo Sihová: “Naʻa mo ʻenau taʻumotuʻá te nau kei lakalakaimonū ai pē; te nau kei iviivi ai pē mo moʻui lelei.” ʻOku ou houngaʻia ʻaupito ʻi heʻeku fakamoleki ʻeku moʻuí ʻi he ngāue ʻa Sihová. Ko e tofiʻa faka-Kalisitiane fakakoloa kuó u maʻú kuó ne fakalototoʻaʻi au ke tauhi kakato kia Sihova. ʻI he ʻofa mateaki ʻa Sihová, kuó ne ʻai au ke u “tupu ʻāfaʻafa ʻi he ongo lotoʻā ʻo [hoku] ʻOtuá.”​—Saame 92:13.