Founga Hono Tokoniʻi Kitautolu ʻe he Laumālie Māʻoniʻoní

1-2. (a) Ko e hā ʻokú ne tokoniʻi kitautolu ke hokohoko atu he ʻaho taki taha? Fakamatalaʻi. (e) Ko e hā te tau lāulea ki ai ʻi he kupu ko ení?

“ʻI HEʻEKU fakakaukau fekauʻaki mo e ʻahiʻahi kuó u fekuki mo iá, ʻoku ou ʻilo naʻe ʻikai ke u mei lava ʻiate au pē ʻo fekuki toko taha mo ia.” Kuo faifai ange peá ke lea pehē? Ko e tokolahi ʻo kitautolu kuo tau lea pehē. Mahalo naʻá ke leaʻaki ia ʻi he hili haʻo fakakaukauloto atu ki he malava ke ke fekuki mo ha puke lahi pe ko e mate ha ʻofaʻanga. ʻI he vakai atu ki aí, ʻokú ke ongoʻi naʻe malava ke ke hokohoko atu he ʻaho taki taha koeʻuhí pē naʻe ʻoatu ʻe he laumālie māʻoniʻoni ʻo Sihová kiate koe ʻa e “mālohi ʻoku mahulu atu ia ʻi he tuʻunga anga-mahení.”​—2 Kol. 4:7-9.

² ʻOku tau toe falala foki ki he laumālie māʻoniʻoní ke fekuki ai mo e tākiekina ʻa e māmani fulikivanu ko ení. (1 Sio. 5:19) Tānaki atu ki aí, kuo pau ke tau fāinga mo e “ngaahi kongakau laumālie fulikivanu.” (ʻEf. 6:12) ʻI he fakakaukau atu ki he ngaahi tenge kotoa ko ení, te tau lāulea ki he founga ʻe ua ʻa ia ʻe tokoniʻi ai kitautolu ʻe he laumālie māʻoniʻoní. Pea te tau lāulea ki he meʻa ʻe lava ke tau fai ke maʻu ʻaonga kakato ai mei he laumālie māʻoniʻoní.

 3. Ko e hā ʻa e founga ʻe taha ʻa ia ʻoku tokoniʻi ai kitautolu ʻe Sihova ke kātekina ʻa e ʻahiʻahí?

³ ʻOku tokoniʻi kitautolu ʻe he laumālie māʻoniʻoni ʻo Sihová ʻaki hono ʻomai ʻa e mālohi ke fakakakatoʻaki hotau ngaahi fatongiá neongo ʻa e ʻahiʻahí. Naʻe ongoʻi ʻe he ʻapositolo ko Paulá naʻe malava ke ne hanganaki ngāue neongo hono ngaahi ʻahiʻahí koeʻuhi naʻá ne falala ki he “mālohi ʻo e Kalaisí.” (2 Kol. 12:9) ʻI he fononga fakamisinale hono ua ʻa Paulá, naʻe ʻikai ngata pē ʻene ngāue mālohi ʻi he ngāue fakamalangá ka naʻá ne toe poupouʻi fakapaʻanga ʻa ia tonu. Naʻá ne nofo ʻi Kolinitō ʻi he ʻapi ʻo ʻAkuila mo Pīsilá. Naʻá na ngaohi-tēniti. Koeʻuhi naʻe fai ʻe Paula ʻa e ngāue tatau, naʻá ne ngāue mo kinaua he ʻaho ʻe niʻihi. (Ngā. 18:1-4) Naʻe ʻoange ʻe he laumālie māʻoniʻoní kia Paula ʻa e mālohi ke ngāue fakamāmani pea ke fakahoko ʻene ngāue fakafaifekaú.

 4. Fakatatau ki he 2 Kolinitō 12:7e-9, ko e hā naʻe fāinga mo Paulá?

⁴ Lau ʻa e 2 Kolinitō 12:7e-9. ʻI he fakamatala ko ení, ko e hā naʻe ʻuhinga ki ai ʻa Paula ʻi heʻene pehē naʻá ne fāinga mo ha “tolounua ʻi he kakanó”? Kapau ʻoku tolounua ha meʻa ʻi ho sinó, te ke mamahiʻia lahi. Ko ia naʻe pehē ʻe Paula naʻá ne fehangahangai mo ha ʻahiʻahi fakafoʻituitui fakamamahi. Naʻá ne ui ʻa e ʻahiʻahi ko ení “ko ha ʻāngelo ʻa Sētane” ʻokú ne hanganaki “sipiʻi” (“taaʻi,” fkm. ʻi lalo) ia. Naʻe ʻikai nai fakatupunga fakahangatonu ʻe Sētane mo ʻene kau ʻāngelo tēmenioó ʻa e ngaahi ʻahiʻahi ʻo Paulá, ʻo hangē ko hono ʻai ke tolounua hono kakanó. Ka ʻi he fakatokangaʻi ʻe he ngaahi laumālie fulikivanu ko iá ʻa e ‘tolounuá,’ naʻa nau vēkeveke nai ke toe teke ia ke toe loloto ange, hangē ko e laú, ke fakalahi ʻa e mamahi ʻa Paulá. Ko e hā naʻe fai ʻe Paulá?

 5. Naʻe anga-fēfē ʻa e tali ʻa Sihova ki he ngaahi lotu ʻa Paulá?

⁵ ʻI he kamatá, naʻe loto ʻa Paula ke toʻo ʻa e “tolounua.” ʻOkú ne pehē: “Naʻe tuʻo tolu ʻeku kōlenga ki he ʻEikí [Sihova] . . . ke mavahe atu ia meiate au.” Ka, neongo ʻa e ngaahi lotu ʻa Paulá, naʻe kei nofo pē ʻa e tolounuá ʻi hono kakanó. ʻOku ʻuhinga ení naʻe ʻikai ke tali ʻe Sihova ʻa e ngaahi lotu ʻa Paulá? ʻIkai ʻaupito. Naʻá ne tali ia. Naʻe ʻikai toʻo ʻe Sihova ʻa e palopalemá, ka naʻá ne ʻoange kia Paula ʻa e mālohi ke kātekina ia. Naʻe pehē ʻe Sihova: “Ko hoku mālohí ʻoku fakahaohaoaʻi ia ʻi hoʻo hoko ʻo vaivaí.” (2 Kol. 12:8, 9) Pea ʻi he tokoni ʻa e ʻOtuá, naʻe malava ke tauhi maʻu ʻe Paula ʻene fiefiá mo e nonga ʻi lotó!​—Fil. 4:4-7.

 6. (a) ʻOku anga-fēfē nai ʻa e tali ʻe Sihova ʻetau ngaahi lotú? (e) Ko e hā ʻa e ngaahi talaʻofa mei he ngaahi konga Tohi Tapu ʻoku haá ʻokú ne ʻoatu ʻa e mālohi kiate koe?

⁶ Hangē ko Paulá, kuó ke kōlenga ʻi ha taimi kia Sihova ke fakahaofi koe mei ha ʻahiʻahi? Neongo hoʻo ngaahi kōlenga loto-moʻoní ʻoku kei ʻi ai pē ʻa e palopalemá​—pe hoko ʻo toe kovi ange—​naʻá ke hohaʻa nai pe ʻoku ke taʻefakahōifua kia Sihova? Kapau ko ia, manatuʻi ʻa e faʻifaʻitakiʻanga ʻa Paulá. Hangē pē ko hono tali ʻe Sihova ʻene ngaahi lotú, te Ne tali moʻoni hoʻo ngaahi lotú! Heʻikai nai ke toʻo ʻe Sihova ʻa e palopalemá. Kae fakafou ʻi he laumālie māʻoniʻoní, te ne ʻoatu kiate koe ʻa e mālohi ʻoku fiemaʻu ke ke kātekina ʻaki ʻa e ʻahiʻahí. (Saame 61:3, 4) ʻE ‘lī nai koe ki lalo,’ ka ko Sihova heʻikai te ne liʻaki koe.​—2 Kol. 4:8, 9; Fil. 4:13.

7-8. (a) ʻI he founga fē ʻoku hangē ai ʻa e laumālie māʻoniʻoní ko e matangí? (e) Naʻe anga-fēfē hono fakamatalaʻi ʻe Pita ʻa e ngāue ʻa e laumālie māʻoniʻoní?

⁷ Ko e hā ha toe founga ʻa ia ʻoku tokoniʻi ai kitautolu ʻe he laumālie māʻoniʻoní? Hangē ko ha matangi lelei ʻi ha tahi hou, ko e laumālie māʻoniʻoní ʻokú ne ueʻi kitautolu ke tau ngaʻunu ki muʻa neongo ʻa e ngaahi ʻahiʻahi faingataʻá ke tau aʻu ki he māmani foʻou malu kuo talaʻofa mai ʻe he ʻOtuá.

⁸ ʻI he tuʻunga ko ha tangata toutai, ko e ʻapositolo ko Pitá naʻá ne maheni mo e folau tahí. Ko ia ʻoku taau ke fakatokangaʻi naʻá ne fakamatalaʻi ʻa e ngāue ʻa e laumālie māʻoniʻoní ʻo ngāueʻaki ʻa e fakalea ʻoku hā ngali naʻe fekauʻaki mo e folau tahí. Naʻá ne tohi: “Naʻe teʻeki ʻi ai ha taimi ʻe ʻomi ai ha kikite ʻi he tuʻutuʻuni ʻa e tangatá, ka naʻe lea mei he ʻOtuá ha kau tangata ʻi hono ueʻi kinautolu ʻe he laumālie māʻoniʻoní.” Ko e foʻi lea faka-Kalisi naʻe liliu ko e “ueʻi” ʻoku ʻuhinga fakafoʻilea ki he “fataki; taki.”​—2 Pita 1:21; fkm. ʻi lalo.

 9. Ko e hā ʻa e lea fakaefakatātā naʻe ʻomai ʻe Pita ʻi heʻene ngāueʻaki ʻa e foʻi lea “taki”?

⁹ Ko e hā ʻa e lea fakaefakatātā naʻe ʻomai ʻe Pita ʻi he ngāueʻaki ʻa e foʻi lea “taki”? Naʻe ngāueʻaki ʻe Luke, ʻa e tokotaha-tohi ʻo e tohi Ngāué, ha founga meimei tatau ʻo e foʻi lea faka-Kalisí ke fakamatalaʻi ha vaka ʻoku “ʻauhia” ʻi he matangí. (Ngā. 27:15) Ko ia ʻi he taimi naʻe tohi ai ʻe Pita ʻo pehē ko e kau hiki Tohi Tapú naʻe “taki,” naʻá ne ngāueʻaki ʻa e “fakalea ke ueʻi ʻa e kakaí ke fakakaukau ki he folau tahí,” ko e lau ia ʻa ha mataotao Tohi Tapu ʻe taha. Ko hono moʻoní naʻe pehē ʻe Pita, hangē pē ko hono ueʻi ʻe he matangí ha vaka ke fakakakato ʻene fonongá, ko e kau palōfita mo e kau hiki Tohi Tapú naʻe ueʻi kinautolu ʻe he laumālie māʻoniʻoní ke fakakakato ʻenau ngāué. Naʻe pehē ʻe he tokotaha mataotao tatau: “Naʻe fusi ʻe he kau palōfitá ʻa e laá, hangē ko e laú.” Naʻe fai ʻe Sihova ʻene tafaʻakí. Naʻá ne tokonaki ʻa e “matangi,” pe laumālie māʻoniʻoní. Naʻe fai ʻe he kau hiki Tohi Tapú ʻenau tafaʻakí. Naʻa nau ngāue ʻo fehoanaki mo e fakahinohino ʻa e laumālie ko iá.

10-11. Ko e hā ʻa e meʻa ʻe ua ʻoku fiemaʻu ke tau fai ke fakapapauʻi ʻoku tataki kitautolu ʻe he laumālie māʻoniʻoní? Fakatātaaʻi.

¹⁰ Ko e moʻoni, ʻi he ʻahó ni ʻoku ʻikai ke toe ngāueʻaki ʻe Sihova hono laumālie māʻoniʻoní ke ʻai ʻa e kakaí ke hiki ha ngaahi tohi Tohi Tapu. Kae kehe, ko e laumālie māʻoniʻoní ʻokú ne kei fakaivimālohiʻi pē ʻa e kakai ʻa e ʻOtuá. ʻOku kei fai pē ʻe Sihova ʻene tafaʻakí. ʻOku lava fēfē ke tau maʻu ʻaonga mei he laumālie māʻoniʻoni ʻo e ʻOtuá? ʻOku fiemaʻu ke tau fakapapauʻi ʻoku tau hanganaki fai ʻetau tafaʻakí. Anga-fēfē?

¹¹ Fakakaukau ki he fakahoa ko ení. Ke maʻu ʻaonga mei he matangí, ko ha tokotaha folau tahi kuo pau ke ne fai ʻa e meʻa ʻe ua. ʻUluakí, kuo pau ke ne ʻai ke angimui ʻa e matangí ʻi hono vaká. He ko hono moʻoní, heʻikai ke ngaʻunu hono vaká kapau ʻe tau ʻi he taulangá ʻo ʻikai ʻalu ki he feituʻu ʻe puhi ai ʻe he matangí. Uá, ʻoku fiemaʻu ke ne fusi ʻa e laá ke mafola lelei. ʻOku hā mahino, tatau ai pē pe ʻoku puhi ʻa e matangí, ʻe toki ngaʻunu pē ʻa e vaká ki muʻa kapau ʻe mafola lelei ʻa e laá. ʻI he tuʻunga meimei tatau, ʻe lava ke tau kītaki ʻi he ngāue ʻa Sihová kapau pē te tau maʻu ʻa e tokoni ʻa e laumālie māʻoniʻoní. Ke maʻu ʻaonga mei he laumālie ko iá, kuo pau ke tau fai ʻa e meʻa ʻe ua. ʻUluakí, kuo pau ke tau ʻai ke angimui ʻiate kitautolu ʻa e laumālie ʻo e ʻOtuá ʻaki ʻa e kau ki he ngaahi ngāue ʻoku tataki ʻe he laumālie ʻo e ʻOtuá. Uá, ʻoku fiemaʻu ke tau “fusi ʻa e laá” ke mafola lelei ʻaki ʻa e kau kakato ki he ngaahi ngāue ko ení ʻi he lelei taha ʻo ʻetau malavá. (Saame 119:32) ʻI heʻetau fakahoko ʻa e meʻa ʻe ua ko ení, ko e laumālie māʻoniʻoní te ne teke kitautolu ki muʻa neongo ʻa e ngaahi peau ʻo e fakafepakí mo e ʻahiʻahí pea ʻe tokoniʻi ai kitautolu ke tau kātaki faitōnunga ʻi he hala ki he māmani foʻou ʻa e ʻOtuá.

12. Ko e hā te tau lāulea ki ai he taimi ní?

¹² Kuo tau lāulea mai eni ki he founga ʻe ua ʻa ia ʻoku tokoniʻi ai kitautolu ʻe he laumālie māʻoniʻoní. ʻOku ʻomai ʻe he laumālie māʻoniʻoní ʻa e mālohi pea tokoniʻi kitautolu ke nofoʻaki faitōnunga neongo ʻa e fekuki mo e ngaahi ʻahiʻahí. ʻOku toe ueʻi kitautolu ʻe he laumālie māʻoniʻoní ke tau ngaʻunu ki muʻa pea tokoniʻi kitautolu ke tau nofo ai pē ʻi he hala ki he moʻui taʻengatá. Te tau lāulea he taimí ni ki he meʻa ʻe fā kuo pau ke tau fai ke maʻu ʻaonga kakato ai mei he laumālie māʻoniʻoní.

13. Fakatatau ki he 2 Tīmote 3:16, 17, ʻe tākiekina fēfē kitautolu ʻe he Folofolá, pea ko e hā kuo pau ke tau faí?

¹³ ʻUluakí, ako ʻa e Folofola ʻa e ʻOtuá. (Lau ʻa e 2 Tīmote 3:16, 17.) Naʻe ngāueʻaki ʻe he ʻOtuá hono laumālié ke “fakamānavaʻi” ʻene fakakaukaú ki he ʻatamai ʻo e kau hiki Tohi Tapú. ʻI heʻetau lau ʻa e Tohi Tapú pea fakalaulauloto ki he meʻa ʻoku tau laú, ʻoku hū ai ʻa e ngaahi fakahinohino ʻa e ʻOtuá ki hotau ʻatamaí mo e lotó. ʻOku ueʻi kitautolu ʻe he ngaahi fakakaukau fakamānavaʻi ko iá ke ʻai ʻetau moʻuí ke fehoanaki mo e finangalo ʻo e ʻOtuá. (Hep. 4:12) Ka ke maʻu ʻaonga kakato mei he laumālie māʻoniʻoní, kuo pau ke tau vaheʻi ha taimi ke ako tuʻumaʻu ʻa e Tohi Tapú pea fakakaukau loloto fekauʻaki mo e meʻa ʻoku tau laú. Pea ʻe tākiekina leva ʻe he Folofola ʻa e ʻOtuá ʻa e meʻa kotoa ʻoku tau leaʻaki mo faí.

14. (a) Ko e hā ʻoku lava ai ke tau pehē ko ʻetau ngaahi fakataha faka-Kalisitiané ʻa e feituʻu ʻoku “angimui ai ʻa e matangí”? (e) Ko e hā ʻe tokoni kiate kitautolu ke maʻu ʻaonga kakato mei he laumālie māʻoniʻoní ʻi heʻetau ngaahi fakatahá?

¹⁴ Uá, lotu fakataha ki he ʻOtuá. (Saame 22:22) ʻI ha ʻuhinga, ko ʻetau ngaahi fakataha faka-Kalisitiané ʻa e feituʻu ʻoku “angimui ai ʻa e matangí.” Ko e laumālie ʻo Sihová ʻoku ʻi heʻetau ngaahi fakatahá. (Fkh. 2:29) Ko e hā ʻoku lava ai ke tau lea peheé? Koeʻuhi ʻi he taimi ʻoku tau fakataha ai ki he lotú mo hotau kaungā-Kalisitiané, ʻoku tau lotu ʻo kole ʻa e laumālie māʻoniʻoní, ʻoku tau hivaʻi ʻa e ngaahi hiva ʻo e Puleʻangá ʻo makatuʻunga ʻi he Folofola ʻa e ʻOtuá, pea ʻoku tau fanongo ki he ngaahi fakahinohino makatuʻunga ʻi he Tohi Tapú ʻoku fakahoko ʻe he fanga tokoua kuo fakanofo ʻe he laumālie māʻoniʻoní. Pea ko e laumālie tatau pē ʻoku tokoni ki he fanga tuofāfiné ke teuteu mo fakahoko ʻenau ngaahi kongá. Kae kehe, ke maʻu ʻaonga kakato mei he laumālie māʻoniʻoní, ʻoku fiemaʻu ke tau ʻalu ki he ngaahi fakatahá kuo tau mateuteu ke kau ki ai. ʻI he founga ko iá, ʻoku tau maʻu ai ʻa e ngaahi fakatahá ʻo hangē ha vaka kuo “mafola hono laá.”

15. ʻOku anga-fēfē kaunga ʻa e laumālie māʻoniʻoní ki he ngāue fakamalangá?

¹⁵ Tolú, kau ʻi he ngāue fakamalangá. ʻI heʻetau ngāueʻaki ʻa e Tohi Tapú ʻi he ngāue fakamalangá mo e ngāue fakafaiakó, ʻoku tau fakaʻatā ai ʻa e laumālie māʻoniʻoní ke kau ʻi heʻetau ngāue fakafaifekaú. (Loma 15:18, 19) Neongo ia, ke maʻu ʻaonga kakato mei he laumālie ʻo e ʻOtuá, kuo pau ke ke kau maʻu pē ʻi he ngāue fakamalangá pea ngāueʻaki ʻa e Tohi Tapú ʻi he faingamālie kotoa. Ko e founga ʻe taha ʻe lava ke ke ʻai ai hoʻo ngāue fakafaifekaú ke mohu ʻuhinga angé ko hono ngāueʻaki ʻa e sīpinga fetalanoaʻaki mei he Polokalama Ngāue ki he Fakataha Moʻuí mo e Ngāue Fakafaifekaú.

16. Ko e hā ʻa e founga fakahangatonu taha ke maʻu ai ʻa e laumālie māʻoniʻoní?

¹⁶ Faá, lotu kia Sihova. (Māt. 7:7-11; Luke 11:13) Ko e founga fakahangatonu taha ke maʻu ai ʻa e laumālie māʻoniʻoní ko e kole ia kia Sihova ʻi he lotu. ʻOku halaʻatā ha meʻa ʻe lava ke ne taʻofi ʻetau lotú mei heʻene aʻu kia Sihová pe taʻofi ʻa e meʻaʻofa lelei ʻo e laumālie māʻoniʻoni ʻa e ʻOtuá mei heʻene aʻu mai kiate kitautolú​—pe ko ha pilīsone pea naʻa mo Sētane. (Sēm. 1:17) ʻOku totonu ke fēfē ʻetau lotú koeʻuhi ke tau maʻu ʻaonga kakato ai mei he laumālie māʻoniʻoní? Ke talí, tau sivisiviʻi fakaikiiki angé ʻa e kaveinga ʻo e lotú ʻaki ʻa e lāulea ki ha talanoa fakatātā ʻoku maʻu pē ʻi he Kōsipeli ʻa Luké.b

17. Ko e hā ʻa e lēsoni fekauʻaki mo e lotú ʻe lava ke tau ako mei he talanoa fakatātā ʻa Sīsū ʻoku hiki ʻi he Luke 11:5-9, 13?

¹⁷ Lau ʻa e Luke 11:5-9, 13. ʻI he talanoa fakatātā ʻa Sīsuú ʻoku fakahaaʻi mai ai ʻa e founga ʻoku totonu ke tau lotu ai ʻo kole ʻa e laumālie māʻoniʻoní. ʻI he talanoa fakatātaá, naʻe maʻu ʻe he tangatá ʻa e meʻa naʻá ne fiemaʻú “koeʻuhi ko ʻene vilitakí.” Naʻe ʻikai ke ne ilifia ke kole tokoni ki hono kaumeʻá neongo naʻe fuoloa ʻa e poʻulí. (Sio ki he nouti akó ki he Luke 11:8 ʻi he mwb18 Siulai.) Naʻe anga-fēfē hono ngāueʻaki ʻe Sīsū ʻa e talanoa fakatātā ko ení ki he lotú? Naʻá ne pehē: “Hanganaki kole, pea ʻe foaki atu kiate kimoutolu; hanganaki kumi, pea te mou ʻilo; hanganaki tukituki, pea ʻe fakaava atu kiate kimoutolu.” Ko ia, ko e hā ʻa e lēsoni kiate kitautolú? Ke maʻu ʻa e tokoni ʻa e laumālie māʻoniʻoní, kuo pau ke tau kīvoi ʻi he lotu fekauʻaki mo iá.

18. Fakatatau ki he talanoa fakatātā ʻa Sīsuú, ko e hā ʻe lava ai ke tau tuipau ʻe ʻomai ʻe Sihova hono laumālie māʻoniʻoní?

¹⁸ ʻOku toe tokoniʻi kitautolu ʻe he talanoa fakatātā ʻa Sīsuú ke sio ki he ʻuhinga ʻe ʻomai ai ʻe Sihova hono laumālie māʻoniʻoní. Ko e tangata ʻi he talanoa fakatātaá naʻá ne loto ke hoko ko ha tokotaha talitali kakai lelei. Naʻá ne ongoʻi naʻe fiemaʻu ke ne ʻoange ha meʻakai ki heʻene tokotaha ʻaʻahi ʻi he tuʻapoó ka naʻe ʻikai ha meʻa ke ne ʻoange kiate ia. Naʻe pehē ʻe Sīsū naʻe tali ʻe he kaungāʻapí koeʻuhi ko e vilitaki ʻa e tangatá ʻi he kole ki ha maá. Ko e hā ʻa e poini ʻa Sīsuú? Kapau ʻoku loto-lelei ʻa e tangata taʻehaohaoá ke tokoni ki ha kaungāʻapi vilitaki, huanoa ange ai hono tokoniʻi ʻe heʻetau Tamai fakahēvani anga-leleí ʻa e faʻahinga ʻoku kīvoi ʻi he kole kiate ia ʻa e laumālie māʻoniʻoní! Ko ia ai, ʻe lava ke tau lotu fakataha mo e tuipau ʻe tali ʻe Sihova ʻetau kōlenga ʻa e laumālie māʻoniʻoní.​—Saame 10:17; 66:19.

19. Ko e hā ʻoku lava ai ke tau fakapapauʻi te tau ikuná?

¹⁹ ʻOku lava ke tau fakapapauʻi neongo ʻa e ngaahi feinga taʻemālōlō ʻa Sētane ke ikunaʻi kitautolú, te tau ikuna. Ko e hā hono ʻuhingá? Koeʻuhi ʻoku tokoniʻi kitautolu ʻe he laumālie māʻoniʻoní ʻi he founga ʻe ua. ʻUluakí, ʻokú ne ʻomai ʻa e mālohi ʻoku fiemaʻu ke tau ikuʻi ʻaki ʻa e ngaahi ʻahiʻahí. Uá, ko e mālohi ia ʻokú ne “ʻai ke mafola ʻa e laá,” ʻo tokoni ke tau ngaʻunu ai ki muʻa ʻi he tauhi kia Sihova he taimí ni ʻo aʻu ki he māmani foʻou ʻa e ʻOtuá. Fakatauange ke tau fakapapauʻi ke maʻu ʻaonga kakato mei he tokoni ʻa e laumālie māʻoniʻoní!