Fanongo, Mahinoʻi pea Fakahāhā ʻa e Manavaʻofa

 1. Ko e hā ʻa e moʻoni fakafiemālie ʻoku fakahaaʻi mai ʻe he Tohi Tapú fekauʻaki mo Sihová?

TE KE saiʻia ke fakamāuʻi koe ʻe he kakaí ʻo makatuʻunga ʻi he lanu ho kilí, ko ho fōtungá pe ko ho mamafá? Ngalingali, heʻikai te ke saiʻia ai. He fakafiemālie ē ke ʻiloʻi, ʻoku ʻikai ke fakamāuʻi kitautolu ʻe Sihova ʻo makatuʻunga ʻi he meʻa ʻoku sio ki ai ʻa e tangatá! Ko e fakatātaá, ʻi he sio ʻa Sāmiuela ki he ngaahi foha ʻo Sesé, naʻe ʻikai ke ne sio ki he meʻa naʻe sio ki ai ʻa Sihová. Naʻe tala ange ʻe Sihova kia Sāmiuela ko e taha ʻi he ngaahi foha ʻo Sesé te ne hoko ko e tuʻi ʻo ʻIsileli. Ko hai nai ia? ʻI he sio ʻa Sāmiuela ki he foha lahi taha ʻo Sesé, ʻa ʻEliapi, naʻá ne pehē: “ʻOku tuʻu moʻoni heni ʻi he ʻao ʻo Sihová ʻa ʻene tokotaha paní.” Naʻe hangē ʻa ʻEliapi ko ha tuʻí. “Ka naʻe folofola ʻa Sihova kia Sāmiuela: ‘ʻOua naʻá ke tokanga ki hono fōtungá pea mo hono māʻolungá, he kuó u siʻaki ia.’” Ko e hā ʻa e lēsoní? Naʻe toe pehē ʻe Sihova: “ʻOku sio ʻa e tangatá pē ki he meʻa ʻoku hā ki he matá, ka ʻoku sio ʻa Sihova ia ki he lotó.”—1 Sām. 16:1, 6, 7.

 2. Hangē ko e Sione 7:24, ko e hā ʻoku ʻikai totonu ai ke tau fakamāuʻi ha taha ʻaki hono fōtungá? Fakatātaaʻi.

² ʻI he tuʻunga ko e faʻahinga taʻehaohaoa ʻo e tangatá, ko kitautolu kotoa ʻoku tau hehema ke fakamāuʻi ʻa e niʻihi kehé ʻaki ʻa e meʻa ʻoku hā ki tuʻá. (Lau ʻa e Sione 7:24.) Ka ko e meʻa siʻisiʻi pē ʻoku tau ʻiloʻi fekauʻaki mo ha taha mei he meʻa ʻoku tau sio ki aí. Ke fakatātaaʻí, naʻa mo ha toketā poto mo taukei ʻe lava ke ne ʻilo pē ha meʻa siʻisiʻi ʻi heʻene sio pē ki ha tokotaha mahaki. Kuo pau ke ne fanongo tokanga kapau ʻokú ne loto ke ʻiloʻi ʻa e puipuituʻa fakafaitoʻo ʻo e tokotahá, ko e anga ʻene ongoʻí pe ko ha fakaʻilonga pē ʻokú ne maʻu. ʻE aʻu ʻo fiemaʻu nai ʻe he toketaá ke fai hano fakaʻata. He ka ʻikai, ʻe ʻoange ʻe he toketaá ha faitoʻo ʻoku hala. ʻI he tuʻunga meimei tatau, heʻikai lava ke tau mahinoʻi kakato hotau fanga tokouá mo e fanga tuofāfiné ʻaki ʻetau sio pē ki he meʻa ʻoku hā ki tuʻá. Kuo pau ke tau sio fakalaka atu ai—ki he tangata ʻi lotó. Ko e moʻoni, ʻoku ʻikai lava ke tau sio ki he lotó, ko ia heʻikai ʻaupito ke tau mahinoʻi ʻa e niʻihi kehé ʻo hangē ko Sihová. Ka ʻe lava ke tau fai hotau lelei tahá ke faʻifaʻitaki kia Sihova. Anga-fēfē?

 3. ʻE anga-fēfē hono tokoniʻi kitautolu ʻe he ngaahi fakamatala Fakatohitapu ʻi he kupu ko ení ke faʻifaʻitaki kia Sihová?

³ ʻOku anga-fēfē ʻa e fakafeangai ʻa Sihova ki heʻene kau lotú? ʻOkú ne fanongo kiate kinautolu. ʻOkú ne fakakaukau ki honau puipuituʻá mo e tuʻungá. Pea ʻokú ne fakahāhā ʻa e manavaʻofa kiate kinautolu. ʻI heʻetau lāulea ki he founga naʻe fai pehē ai ʻa Sihova kia Siona, ʻIlaisiā, Hekaʻā mo Loté, tau vakai angé ki he founga ʻe lava ke tau faʻifaʻitaki ai kia Sihova ʻi he fakafeangai ki hotau fanga tokouá mo e fanga tuofāfiné.

 4. Ko e hā nai te tau vakai ʻikai lelei ai kia Sioná?

⁴ Mei heʻetau vakai fakangatangatá, ʻe lava ke tau fakamāuʻi ʻa Siona ko ha tokotaha taʻefalalaʻanga pe taʻemateaki. Naʻá ne maʻu ha fekau hangatonu meia Sihova ke fanongonongo ʻa e fakamaau ki Ninive. Ka naʻe ʻikai ke talangofua ʻa Siona, naʻá ne heka ki ha vaka ʻo ʻalu ki ha feituʻu kehe, “ʻo mamaʻo meia Sihova.” (Siona 1:1-3) Naʻá ke mei ʻoange kia Siona hano faingamālie? Mahalo pē ʻikai. Neongo ia, naʻe kehe ʻa e vakai ia ʻa Sihová.—Siona 3:1, 2.

 5. Ko e hā ʻokú ke ako fekauʻaki mo Siona mei heʻene ngaahi lea ʻi he Siona 2:1, 2, 9?

⁵ Naʻe fakaeʻa ʻe Siona ʻa ia tonu ʻi heʻene lotú. (Lau ʻa e Siona 2:1, 2, 9.) Ko e lotu ko iá—ʻoku ʻikai ha veiveiua ko e taha ia ʻi he ngaahi lotu lahi ʻa Siona—ʻokú ne tokoniʻi kitautolu ke sio kiate ia ʻo fakalaka atu ia ʻi ha tangata naʻá ne hola mei ha vāhenga-ngāue. ʻOku fakahaaʻi ʻi heʻene ngaahi leá naʻá ne anga-fakatōkilalo, houngaʻia mo fakapapauʻi ke talangofua kia Sihova. Tāneʻineʻi ke sio fakalaka atu ʻa Sihova ʻi he tōʻonga ʻa Sioná, tali ʻene lotú pea hokohoko atu hono ngāueʻaki ia ko ha palōfitá!

 6. Ko e hā ʻoku tuha ai mo e feingá ke tau fanongo tokangá?

⁶ Ke fanongo tokanga ki he niʻihi kehé, ʻoku fiemaʻu ke tau anga-fakatōkilalo mo kātaki. ʻOku ʻi ai ha ʻuhinga ʻe tolu ʻoku tuha ai ia mo e feingá. ʻUluakí, heʻikai ke tau hehema ke fakamulituku hala fekauʻaki mo e kakaí. Uá, ʻe lava ke tau ʻiloʻi ʻa e ongoʻi mo e fakaueʻiloto hotau tokouá, pea ʻe tokoni eni ke tau kaungāongoʻi lahi ange. Pea ko e tolú, te tau tokoniʻi nai ʻa e tokotahá ke ne ako ha meʻa fekauʻaki mo ia tonu. Ko e moʻoni, ʻi he taimi ʻe niʻihi ʻoku ʻikai ke tau mahinoʻi ʻetau ongoʻí kae ʻoua kuo tau talanoa fekauʻaki mo ia. (Pal. 20:5) ʻOku fakahaaʻi ʻe ha mātuʻa ʻi ʻĒsia: “Naʻe ngalo ʻiate au, ʻoku totonu ke u fanongo ki muʻa peá u toki lea. Naʻá ku tala ange ki ha tuofefine naʻe fiemaʻu ke ne fakaleleiʻi ʻene ngaahi talí. Ki mui ai, naʻá ku mahinoʻi naʻe ʻikai loko sai ʻene lautohí pea naʻe fiemaʻu kiate ia ʻa e feinga lahi ke fai ha tali.” ʻOku mātuʻaki mahuʻinga ki he kau mātuʻá ke “fanongo ki he ngaahi moʻoniʻi meʻá” ki muʻa ke fai ha akonaki.—Pal. 18:13.

 7. Ko e hā ʻokú ke ako mei he anga ʻo e fakafeangai ʻa Sihova kia ʻIlaisiā?

⁷ ʻOku faingataʻa ki he niʻihi hotau fanga tokouá mo e fanga tuofāfiné ke talanoa fekauʻaki mo ʻenau ongoʻí koeʻuhi ko honau puipuituʻá, anga fakafonuá pe angaʻitangatá. ʻE lava fēfē ke tau ʻai ke faingofua ange ke nau fakahaaʻi mai ʻenau ongoʻí? Manatuʻi ʻa e anga ʻo e fakafeangai ʻa Sihova kia ʻIlaisiā ʻi heʻene hola meia Sisipelí. Naʻe ʻosi atu ʻa e ngaahi ʻaho pea toki fakahaaʻi ʻe ʻIlaisiā ʻene ongoʻi moʻoní ki heʻene Tamai fakahēvaní. Naʻe fanongo tokanga ʻa Sihova. Peá ne fakalototoʻaʻi ʻa ʻIlaisiā ʻo ʻoange kiate ia ha ngāue mahuʻinga ke ne fai. (1 Tuʻi 19:1-18) ʻE fiemaʻu nai ha taimi ki hotau fanga tokouá mo e fanga tuofāfine ke nau ongoʻi fiemālie ke talanoa mai kiate kitautolu, ka ko e toki taimi pē ia te tau mahinoʻi ai ʻenau ngaahi ongoʻi moʻoní. ʻI heʻetau faʻifaʻitaki kia Sihova ʻi he hoko ʻo anga-kātakí, te nau toki falala mai. Ka, ʻi he taimi ʻoku nau loto ai ke fakahaaʻi ʻenau ongoʻí, ʻoku totonu ke tau fanongo tokanga.

 8. Fakatatau ki he Sēnesi 16:7-13, naʻe anga-fēfē hono tokoniʻi ʻe Sihova ʻa Hekaʻā?

⁸ Ko Hekaʻā, ʻa e kaunanga ʻa Sēlaí, naʻá ne fai taʻefakapotopoto hili ʻene hoko ko e uaifi ʻo ʻEpalamé. ʻI he feitama ʻa Hekaʻaá naʻe kamata ke ne taʻetokaʻi ʻa Sēlai, naʻe ʻikai haʻane fānau. ʻI he fakautuutu ke kovi ange ʻa e tuʻungá naʻe tuli ʻe Sēlai ʻa Hekaʻā. (Sēn. 16:4-6) Mei heʻetau vakai taʻehaohaoá, ʻoku hā ngali ko ha fefine kovi ʻa Hekaʻā ʻo tuha pē mo hono tulí. Ka naʻe kehe ʻa e vakai ia ʻa Sihova kia Hekaʻaá. Naʻá ne fekauʻi atu ʻene ʻāngelo kiate ia. ʻI hono ʻiloʻi ia ʻe he ʻāngeló, naʻá ne tokoniʻi ia ke fakatonutonu ʻene fakakaukaú pea tāpuakiʻi ia. Naʻe ongoʻi ʻe Hekaʻā naʻe ʻafioʻi mo mahinoʻi ʻe Sihova ʻa e meʻa kotoa naʻe hoko kiate iá. Naʻe ueʻi ia ke ne ui ʻa Sihova ‘ko ha ʻOtua ʻo e mamata, ʻa e tokotaha ʻokú ne mamata kiate aú.’—Lau ʻa e Sēnesi 16:7-13.

 9. Ko e hā naʻe fakafeangai pehē ai ʻa e ʻOtuá kia Hekaʻā?

⁹ Ko e hā naʻe vakai ki ai ʻa Sihova ʻia Hekaʻaá? Naʻá ne ʻiloʻi kakato hono puipuituʻá mo e meʻa kotoa naʻá ne fouá. (Pal. 15:3) Ko Hekaʻaá ko ha ʻIsipite naʻá ne nofo ʻi ha fāmili Hepelū. Naʻá ne faʻa ongoʻi ʻo hangē haʻane nofo hili atú? Naʻá ne ʻofa ki hono fāmilí mo hono fonuá? Naʻe ʻikai ko e uaifi pē ia ʻo ʻEpalamé. Naʻe ʻi ai ʻa e taimi ko e kau tangata faitōnunga ʻe niʻihi naʻa nau mali tokolahi. Ka naʻe ʻikai ko e muʻaki taumuʻa ia ʻa Sihová. (Māt. 19:4-6) ʻOku ʻikai leva ha ofo, ko e ngaahi tuʻunga peheé naʻe faʻa fakatupunga ai ʻa e fuaʻa mo e tāufehiʻa. Neongo naʻe ʻikai ke fakatonuhiaʻi ʻe Sihova hono taʻetokaʻi ʻe Hekaʻā ʻa Sēlaí, ʻoku tau ʻiloʻi naʻá ne fakakaukau ki he puipuituʻa ʻo Hekaʻaá pea mahinoʻi hono tuʻungá.

10. ʻE lava fēfē ke tau hoko ʻo mahinoʻi lelei ange hotau fanga tokouá mo e fanga tuofāfiné?

¹⁰ ʻE lava ke tau faʻifaʻitaki kia Sihova ʻi he feinga ke mahinoʻi ʻa e niʻihi kehé. Hoko ʻo mahinoʻi lelei ange ho fanga tokouá mo e fanga tuofāfiné. Talanoa mo kinautolu ki muʻa he fakatahá mo e tukú, ngāue mo kinautolu ʻi he ngāue fakafaifekaú pea ʻo ka malava, fakaafeʻi kinautolu ke mou kai fakataha. ʻI hoʻo fai iá, te ke ʻiloʻi nai ai ko ha tuofefine ʻoku hā ngali anga-taʻefakakaumeʻa ko hono moʻoní ʻokú ne mā, ko ha tokoua ʻokú ke fakakaukau ʻokú ne tuli ki he meʻa fakamatelié ʻokú ne anga-talitali kakai, pe ko ha fāmili ʻoku nau faʻa tōmui mai ki he fakatahá ʻoku nau kātekina ha fakatanga. (Siope 6:29) Ko hono moʻoní, ʻoku ʻikai totonu ke tau hoko ko e “kau kaunoa ʻi he ngaahi meʻa ʻa e kakai kehé.” (1 Tīm. 5:13) Kae kehe, ʻoku lelei ke tau ʻiloʻi ha meʻa fekauʻaki mo hotau fanga tokouá mo e fanga tuofāfiné mo e ngaahi tuʻunga kuó ne fakafuo honau angaʻitangatá.

11. Ko e hā ʻoku mahuʻinga ai ki he kau mātuʻá ke nau mahinoʻi lelei ʻa e fanga sipí?

¹¹ Ko e kau mātuʻá ʻoku tautefito ʻa e fiemaʻu ke nau ʻiloʻi ʻa e puipuituʻa ʻo e fanga tokoua mo e fanga tuofāfine ʻoku nau tokangaʻí. Fakakaukau ki he faʻifaʻitakiʻanga ʻa Artur naʻá ne ngāue ko ha ʻovasia sēketi. Naʻá ne ʻaʻahi mo ha mātuʻa ki ha tuofefine naʻe hā ngali mā. “Naʻá ma ʻiloʻi ko hono husepānití naʻe mate ʻi he hili pē ʻena malí,” ko e lau ia ʻa Artur. “Neongo ʻa e ngaahi polé, naʻá ne ʻohake ha ongo tamaiki fefine mālohi fakalaumālie. Ka ʻi he taimi ní ʻoku ʻalu ke kovi ange ʻene sió pea loto-mafasia. Neongo ia, ko ʻene ʻofa kia Sihová mo ʻene tui kiate iá ʻoku hanganaki mālohi. Naʻá ma ʻiloʻi naʻe lahi ʻa e meʻa ʻoku lava ke ma ako mei he faʻifaʻitakiʻanga lelei ʻa e tuofefine ko ení.” (Fil. 2:3) Naʻe muimui ʻa e ʻovasia sēketí ki he faʻifaʻitakiʻanga ʻa Sihová. ʻOku ʻafioʻi ʻe Sihova ʻene fanga sipí mo e mamahi ʻoku nau fuesiá. (ʻEki. 3:7) Ko e kau mātuʻa ʻoku nau mahinoʻi lelei ʻa e fanga sipí ʻoku nau ʻi ha tuʻunga lelei ange ke tokoniʻi kinautolu.

12. Naʻe anga-fēfē ʻa e maʻu ʻaonga ʻa Yip Yee mei he hoko ʻo ʻiloʻi ha tuofefine ʻi he fakatahaʻangá?

¹² ʻI hoʻo ʻiloʻi ʻa e puipuituʻa ʻo ha kaungā-Kalisitiane ʻokú ne fakaʻitaʻi koe, ʻoku ngalingali te ke ongoʻi kaungāongoʻi ange ki he tokotaha ko iá. Fakakaukau ki ha fakatātā. “Ko ha tuofefine ʻi heʻeku fakatahaʻangá naʻá ne lea mātuʻaki leʻo-lahi,” ko e lau ia ʻa Yip Yee, ʻa ia ʻokú ne nofo ʻi ʻĒsia. “Naʻá ku fakakaukau naʻe ʻikai ke ne ʻulungaanga lelei. Ka ʻi heʻeku ngāue fakataha mo ia ʻi he malangá, naʻá ku ʻiloʻi naʻá ne faʻa tokoni ki heʻene ongo mātuʻá ʻi he fakatau ika he māketí. Naʻe pau ke ne lea leʻo-lahi ke tohoakiʻi mai ʻa e kakaí.” ʻOku toe pehē ʻe Yip Yee: “Naʻá ku ʻiloʻi ke mahinoʻi hoku fanga tokouá mo e fanga tuofāfiné, ʻoku fiemaʻu ke u ʻiloʻi honau puipuituʻá.” ʻOku fiemaʻu ʻa e feinga ke hoko ʻo ʻiloʻi lelei ange ho fanga tokouá. Ka, ʻi he taimi ʻokú ke muimui ai ʻi he akonaki ʻa e Tohi Tapú ke mātuʻaki fakaava atu ho lotó, ʻokú ke faʻifaʻitaki ai kia Sihova, ʻa ia ʻokú ne ʻofa ʻi he “faʻahinga kakai kotoa pē.”—1 Tīm. 2:3, 4; 2 Kol. 6:11-13.

13. Hangē ko ia ʻoku hiki ʻi he Sēnesi 19:15, 16, ko e hā naʻe fai ʻe he ongo ʻāngeló ʻi he kei fakatuotuai ʻa Loté, pea ko e hā hono ʻuhingá?

¹³ ʻI ha taimi mātuʻaki mahuʻinga ʻi he moʻui ʻa Loté, naʻá ne fakatuotuai ke talangofua ki he fakahinohino ʻa Sihová. Naʻe ʻaʻahi ha ongo ʻāngelo kia Lote pea tala ange ke ʻave hono fāmilí ki tuʻa mei Sōtoma. Ko e hā hono ʻuhingá? Naʻá na pehē: “Te ma fakaʻauha ʻa e feituʻú ni.” (Sēn. 19:12, 13) ʻI he pongipongi hokó, naʻe kei ʻi honau ʻapí pē ʻa Lote mo hono fāmilí. Ko ia naʻe toe fakatokanga ʻa e ongo ʻāngeló kia Lote. Ka naʻá ne ‘kei fakatuotuai.’ Te tau fakamāuʻi nai ʻa Lote ʻo pehē naʻá ne taʻetokanga pe talangataʻa. Neongo ia, naʻe ʻikai foʻi ʻa Sihova ʻiate ia. “Koeʻuhi ko e manavaʻofa ʻa Sihova kiate iá,” naʻe puke ʻe he ongo ʻāngeló ʻa e nima ʻo e fāmilí pea taki atu kinautolu ki tuʻa mei he koló.—Lau ʻa e Sēnesi 19:15, 16.

14. Ko e hā nai naʻe ongoʻi manavaʻofa ai ʻa Sihova kia Loté?

¹⁴ Naʻe ongoʻi manavaʻofa nai ʻa Sihova kia Lote ʻi he ngaahi ʻuhinga lahi. Naʻe toumoua nai ʻa Lote ke mavahe mei hono ʻapí koeʻuhí naʻá ne manavahē ʻi he kakai ʻi tuʻa ʻi he koló. Naʻe ʻi ai foki mo e ngaahi fakatuʻutāmaki kehe. ʻOku ngalingali naʻe ʻiloʻi ʻe Lote ʻa e ongo tuʻi naʻá na tō ʻi he ngaahi luo ʻo e meʻa hangē ha valitaá, ʻi ha teleʻa ofi mai. (Sēn. 14:8-12) ʻI he tuʻunga ko ha husepāniti mo e tamai, kuo pau pē naʻe hohaʻa ʻa Lote fekauʻaki mo hono fāmilí. Pehē foki, naʻe koloaʻia ʻa Lote, ko ia kuo pau pē naʻá ne maʻu ha fale lelei ʻi Sōtoma. (Sēn. 13:5, 6) Ko hono moʻoní, ʻoku ʻikai hoko ʻa e ngaahi ʻuhinga ko ení ko ha kalofanga ki he ʻikai talangofua vave ʻa Lote kia Sihová. Kae kehe, naʻe sio fakalaka atu ʻa Sihova ʻi he fehālaaki ʻa Loté pea vakai kiate ia ko ha “tangata māʻoniʻoni.”—2 Pita 2:7, 8.

15. ʻI he ʻikai fakamāuʻi ʻa e tōʻonga ʻa ha tokotaha, ko e hā ʻoku totonu ke tau faí?

¹⁵ ʻI he ʻikai fakamāuʻi ʻa e tōʻonga ʻa ha tokotaha, fai ho lelei tahá ke mahinoʻi ʻa e anga ʻene ongoʻí. Ko ha tuofefine ʻi ʻIulope, ko Veronica, naʻá ne feinga ke fai ia. “Naʻe ʻi ai ha tuofefine naʻá ne hā ngali ʻiteʻita maʻu pē,” ko ʻene laú ia. “Naʻá ne fakamavaheʻi maʻu pē ia mei he niʻihi kehé. ʻI he taimi ʻe niʻihi, naʻá ku ilifia ke lea kiate ia. Ka naʻá ku fakakaukau, ‘Kapau naʻá ku ʻi hono tuʻungá, te u fiemaʻu ha kaumeʻa.’ Ko ia naʻá ku ʻeke ange pe ʻokú ne fēfē. Pea naʻe kamata ke ne tala mai ʻa e anga ʻene ongoʻí. ʻOku ou mahinoʻi he taimí ni ʻa e meʻa lahi ange fekauʻaki mo ia.”

16. Ko e hā ʻoku totonu ai ke tau lotu ki ha tokoni ke fakatupulekina ʻa e kaungāongoʻí?

¹⁶ Ko e tokotaha pē ʻokú ne mahinoʻi moʻoni kitautolú ko Sihova. (Pal. 15:11) Ko ia kole kiate ia ke tokoniʻi koe ke sio ki he niʻihi kehé ʻo hangē ko ʻene sio kiate kinautolú pea ke mahinoʻi ʻa e founga ke fakahāhā ai ʻa e manavaʻofá kiate kinautolu. Ko e lotú naʻe tokoni ki ha tuofefine ko Anzhela ke kaungāongoʻi lahi ange. Ko ha tuofefine ʻi heʻene fakatahaʻangá naʻe anga-faingataʻa. ʻOku pehē ʻe Anzhela: “Naʻe mei faingofua ʻaupito ke fakaangaʻi ʻa e tuofefiné pea fakamamaʻo meiate ia. Ka naʻá ku kole kia Sihova ke tokoniʻi au ke kaungāongoʻi ki he tuofefine ko ení.” Naʻe tali ʻe Sihova ʻa e lotu ʻa Anzhela? ʻOkú ne pehē: “Naʻá ma ngāue fakataha ʻi he malangá pea ʻi he hili iá naʻá ma talanoa ʻi he laui houa. Naʻá ku fanongo kiate ia ʻi he kaungāongoʻi. ʻOku ou ʻofa lahi ange kiate ia he taimí ni, pea ʻoku ou fakapapauʻi ke tokoniʻi ia.”

17. Ko e hā ʻoku totonu ke tau fakapapauʻi ke faí?

¹⁷ Heʻikai lava ke ke fili ʻa e fanga tokoua mo e fanga tuofāfine ʻoku nau tuha mo hoʻo manavaʻofa kaungāongoʻí. Ko kinautolu kotoa ʻoku nau fehangahangai mo e ngaahi palopalema hangē pē ko Siona, ʻIlaisiā, Hekaʻā mo Lote. ʻI he ngaahi tuʻunga lahi, ko e fakatupunga pē ʻe kinautolu. Ko hono moʻoní, ko kitautolu kotoa kuo tau fai pehē ʻi ha taimi. ʻOku ʻuhinga lelei leva, ʻa e fiemaʻu mai ʻe Sihova ke tau fakahāhā ʻa e kaungāongoʻi ki he niʻihi kehé. (1 Pita 3:8) ʻI heʻetau talangofua kia Sihová, ʻoku tau tokoni ai ki he fāʻūtaha ʻa hotau fāmili ʻi māmani lahí. Ko ia ʻi heʻetau fefakafeangaiʻakí, ʻofa ke tau fakapapauʻi ke fanongo, mahinoʻi pea fakahāhā ʻa e manavaʻofá.