Mapuleʻi-Kita​—Mahuʻinga ki he Hōifua ʻa Sihová

“ʻI he fakalanga kē mai hoku kāsiní, naʻá ku puke hono mongá pea kamata ke fakasisina ia. Naʻá ku loto ke tāmateʻi ia.”—Paul.

“ʻI heʻeku ʻi ʻapí naʻá ku faʻa ʻita taʻeʻuhinga. Te u hanga ʻo fahi ʻa e naunau falé, meʻa vaʻingá pe ko ha meʻa pē naʻá ku maʻu.”—Marco.

Heʻikai nai ke tōtuʻa pehē ʻetau ʻitá. Ka ko kitautolu kotoa ʻoku faingataʻa ke tau mapuleʻi kitautolu ʻi he taimi ʻe niʻihi. ʻOku hoko eni koeʻuhi ko ʻetau ngaahi hehema angahalaʻia tukufakaholo mei he ʻuluaki tangatá, ʻa ʻĀtama. (Loma 5:12) Ko e niʻihi hangē ko Paul mo Marco, ʻoku faingataʻa ke nau mapuleʻi ʻenau ʻitá. ʻOku faingataʻa ki he niʻihi ke mapuleʻi ʻenau fakakaukaú. ʻOku nau nōfoʻi ʻi heʻenau ilifiá pe ʻoku faʻa fakahohaʻasi kinautolu ʻe he fakakaukau taʻepaú. Ka ko e niʻihi ʻoku faingataʻa nai ke nau talitekeʻi ʻa e holi ke fai ʻa e fehokotaki fakasino taʻetāú, ngāuekoviʻaki ʻa e ʻolokaholó pe ngāuekoviʻaki ʻa e faitoʻo kona tapú.

Ko e faʻahinga ʻoku ʻikai ke nau mapuleʻi ʻenau fakakaukaú, holí mo e tōʻongá ʻoku lava ke uesia ai ʻenau moʻuí. Ka ʻoku lava ke tau fakaʻehiʻehi mei hono nunuʻá. Anga-fēfē? ʻAki hono fakatupulekina ʻa e mapuleʻi-kitá. Ke tokoniʻi kitautolu ke fai iá, tau lāulea angé ki he fehuʻi ʻe tolu: (1) Ko e hā ʻa e mapuleʻi-kita? (2) Ko e hā ʻoku mātuʻaki mahuʻinga ai iá? (3) ʻE lava fēfē ke tau fakatupulekina ʻa e ʻulungaanga ko ení ʻa ia ko e tafaʻaki ia ʻo e “fua ʻo e laumālié”? (Kal. 5:22, 23) Pea te tau lāulea ki he meʻa ʻe lava ke tau fai ʻi he taimi ʻoku ʻikai ke tau mapuleʻi-kita aí.

Ko ha tokotaha mapuleʻi-kita ʻoku ʻikai ke ne fakahoko ʻene holi kotoa pē. ʻI hono kehé, ʻokú ne fakamaʻumaʻu mei he lea mo hono fai ha meʻa ʻi ha founga ʻoku taʻefakahōifua ki he ʻOtuá.

Naʻe fakahaaʻi mai ʻe Sīsū ʻa e meʻa ʻoku kau ki he mapuleʻi-kitá. ʻOku pehē ʻi he Tohi Tapú: “ʻI he taimi naʻe leakovia ai iá, naʻe ʻikai te ne tali ʻaki ha lea kovi. ʻI he taimi naʻá ne faingataʻaʻia aí, naʻe ʻikai te ne fai ha fakamanamana, ka naʻá ne tuku atu ʻa ia tonu ki he Tokotaha ʻoku fakamaau māʻoniʻoní.” (1 Pita 2:23) Naʻe fakahāhā ʻe Sīsū ʻa e mapuleʻi-kita ʻi he taimi naʻe lumaʻi ai ia ʻe he kau fakafepakí ʻi hono tautau ia ʻi he ʻakau fakamamahí. (Māt. 27:39-44) Ki muʻa atu, naʻá ne fakahāhā ʻa e mapuleʻi-kita lahi ʻi he taimi naʻe feinga ai ʻa e kau taki lotu anga-fakamamahí ke tauheleʻi ia ʻi heʻene leá. (Māt. 22:15-22) Pea he faʻifaʻitakiʻanga lelei ē naʻá ne fokotuʻu mai ʻi he ʻai ke tolomakaʻi ia ʻe he kau Siu ʻitá! ʻI he ʻikai ke faisāuní, “naʻe toi ʻa Sīsū ia peá ne ʻalu atu mei he temipalé.”—Sione 8:57-59.

ʻE lava ke tau faʻifaʻitaki kia Sīsū? ʻIo, te tau lava. Naʻe tohi ʻe he ʻapositolo ko Pitá: “[Ko] Kalaisi naʻá ne faingataʻaʻia maʻamoutolu, ʻo ne tuku atu ha faʻifaʻitakiʻanga kiate kimoutolu ke mou muimui ofi ʻi hono topuvaʻé.” (1 Pita 2:21) Neongo ʻoku tau taʻehaohaoa, ʻoku lava ke tau muimui ofi ʻi he faʻifaʻitakiʻanga ʻa Sīsū ʻo e mapuleʻi-kitá. Ko e hā ʻoku mātuʻaki mahuʻinga ai ke tau fai peheé?

ʻOku fiemaʻu ke tau mapuleʻi-kita kae lava ke maʻu ʻa e hōifua ʻa Sihová. Neongo kapau kuo tau tauhi faitōnunga kia Sihova ʻi ha taimi fuoloa, ʻe lava ke mole ʻetau kaumeʻa mo iá kapau heʻikai ke tau mapuleʻi ʻa e meʻa ʻoku tau faí mo leaʻakí.

Fakakaukau kia Mōsese ko e “tangata anga-vaivai taha ʻi he kau tangata kotoa pē ʻi he funga ʻo māmaní” ʻi he taimi ko iá. (Nōm. 12:3) Hili ʻa e ngaahi hongofuluʻi taʻu ʻo e kātekina anga-kātaki ʻe Mōsese ʻa e lāunga mei he kau ʻIsilelí, naʻe ʻikai ke ne mapuleʻi ia. Naʻá ne ʻita ʻi heʻenau toe lāunga fekauʻaki mo e ʻikai ha vaí. Naʻá ne lea fefeka ki he kakaí, ʻo pehē: “Fanongo mai, ʻi he taimí ni, ʻa kimoutolu kau angatuʻu! Kuo pau koā ke ma ʻomai ha vai maʻamoutolu mei he maká ni?”—Nōm. 20:2-11.

Naʻe ʻikai ke mapuleʻi-kita ʻa Mōsese. Naʻe ʻikai ke ne ʻave ʻa e lāngilangí kia Sihova ko e Matavai ʻo e vai naʻe tokonaki fakaemaná. (Saame 106:32, 33) Ko hono olá, naʻe ʻikai ke fakaʻatā ia ʻe Sihova ke ne hū ki he Fonua ʻo e Talaʻofá. (Nōm. 20:12) ʻI he fakaʻosiʻosi ʻa e moʻui ʻa Mōsesé, ʻoku ngalingali naʻá ne fakaʻiseʻisa ʻi he ʻikai ke ne mapuleʻi-kita.—Teu. 3:23-27.

Ko e hā ʻa e lēsoní? Neongo kapau kuo tau kau ki he moʻoní ʻi ha taimi fuoloa, ʻoku totonu ke ʻoua ʻaupito te tau lea taʻefakaʻapaʻapa ki he faʻahinga ʻoku nau fakaʻitaʻi kitautolú pe ʻoku fiemaʻu ke fakatonutonú. (ʻEf. 4:32; Kol. 3:12) Ko e moʻoni, ʻi heʻetau hoholo ke motuʻá ʻe toe siʻi ange ʻetau kātakí. Kae manatuʻi ʻa Mōsese. Heʻikai te tau teitei loto ke fakameleʻi ʻetau tauhi faitōnunga fuoloá ʻaki ʻetau tō ʻi he ʻikai mapuleʻi-kitá. Ko e hā ʻe lava ke tau fai ke fakatupulekina ʻa e ʻulungaanga mātuʻaki mahuʻinga ko ení?

Lotu ʻo kole ʻa e laumālie māʻoniʻoní. Ko e hā hono ʻuhingá? Koeʻuhi ko e mapuleʻi-kitá ko ha tafaʻaki ia ʻo e fua ʻo e laumālie ʻo e ʻOtuá, pea ʻoku foaki ʻe Sihova hono laumālié ki he faʻahinga ʻoku nau kole iá. (Luke 11:13) Fakafou ʻi hono laumālié, ʻoku lava ke ʻomai ai ʻe Sihova ʻa e mālohi ʻoku tau fiemaʻú. (Fil. 4:13) ʻOku toe lava ke ne tokoniʻi kitautolu ke fakatupulekina ʻa e ngaahi tafaʻaki kehe ʻo e fua ʻo e laumālié, hangē ko e ʻofá, ʻa ia te ne tokoniʻi kitautolu ke ʻai ke mālohi ʻetau mapuleʻi-kitá.—1 Kol. 13:5.

Fakaʻehiʻehi mei ha meʻa te ne fakavaivaiʻi hoʻo mapuleʻi-kitá. Ko e fakatātā, fakaʻehiʻehi mei he ngaahi uepisaiti ʻi he ʻInitanetí mo e fakafiefia ʻoku hā ai ʻa e tōʻonga halá. (ʻEf. 5:3, 4) Ko hono moʻoní, kuo pau ke tau fakaʻehiʻehi mei ha meʻa te ne fakataueleʻi kitautolu ke faihala. (Pal. 22:3; 1 Kol. 6:12) Ko e fakatātaá, ko ha tokotaha ʻokú ne hehema ki he fehokotaki fakasino taʻetāú ʻe fiemaʻu nai ke ne fakaʻehiʻehi fakaʻaufuli mei he ngaahi tohi mo e faiva ʻevá.

ʻE faingataʻa nai ke ngāueʻaki ʻa e faleʻi ko ení. Kae kehe, kapau te tau feinga mālohi, ʻe ʻomai ʻe Sihova ʻa e mālohi ʻoku tau fiemaʻú ke mapuleʻi-kita. (2 Pita 1:5-8) Te ne tokoniʻi kitautolu ke mapuleʻi ʻetau fakakaukaú, leá mo e tōʻongá. Hangē ko Paul mo Marco naʻe lave ki ai ki muʻá, naʻá na ako ke mapuleʻi ʻena ʻita fakamālohí. Fakakaukau foki ki ha tokoua naʻá ne faʻa ʻita vave lolotonga ʻene fakaʻulí, pea aʻu ʻo fakafekiki mo e niʻihi kehé. Ko e hā naʻá ne fai fekauʻaki mo ení? “Naʻá ku lotu tōtōivi ʻi he ʻaho kotoa. Naʻá ku ako ʻa e ngaahi kupu ako fekauʻaki mo e mapuleʻi-kitá pea ako maʻuloto ʻa e ngaahi veesi Tohi Tapu ʻaonga. Neongo kuó u fai eni ʻi he laui taʻu, ʻoku kei ʻaonga pē kiate au ke fakakaukau ʻi he kamataʻanga ʻo e ʻaho taki taha ke hanganaki nonga. Pea naʻá ku ʻalu ki muʻa ʻi heʻeku ngaahi ʻapoinimení koeʻuhi ke ʻoua te u fakavavevave.”

ʻI he taimi ʻe niʻihi, heʻikai lava ke tau fakahāhā ʻa e mapuleʻi-kitá. ʻI he hoko iá, te tau ongoʻi mā nai ke fakaofiofi kia Sihova ʻi he lotu. Ka ko e taimi eni ʻoku fiemaʻu lahi taha ai ke tau lotú. Ko ia lotu leva kia Sihova. Kōlenga ki heʻene fakamolemolé, kumi ki heʻene tokoní, pea fakapapauʻi ke ʻoua te ke toe fai ʻa e fehālaaki tatau. (Saame 51:9-11) Heʻikai ke taʻetokaʻi ʻe Sihova hoʻo lotu loto-moʻoni ki ha mēsí. (Saame 102:17) ʻOku fakamanatu mai ʻe he ʻapositolo ko Sioné ko e taʻataʻa ʻo e ʻAlo ʻo e ʻOtuá ʻokú ne “fakamaʻa kitautolu mei he angahalá kotoa.” (1 Sio. 1:7; 2:1; Saame 86:5) Manatuʻi ʻoku tala ʻe Sihova ki heʻene kau sevānití ke nau faʻa fakamolemole. Ko ia ʻoku lava ke tau tuipau te ne fai ʻa e meʻa tatau kiate kitautolu.—Māt. 18:21, 22; Kol. 3:13.

Naʻe taʻefakahōifua kia Sihova ʻa e ʻikai ke mapuleʻi-kita ʻa Mōsese ʻi ha taimi ʻi he toafá. Neongo ia, naʻe fakamolemoleʻi ia ʻe Sihova. Pea ʻoku lave ʻa e Folofola ʻa e ʻOtuá kia Mōsese ko e faʻifaʻitakiʻanga tuʻu-ki-muʻa ia ʻo e tuí. (Teu. 34:10; Hep. 11:24-28) Naʻe ʻikai ke fakaʻatā ʻe Sihova ʻa Mōsese ke hū ki he Fonua ʻo e Talaʻofá, ka te Ne talitali lelei ʻa Mōsese ki he māmani Palataisí pea ʻoange ʻa e ʻamanaki ʻo e moʻui taʻengatá. ʻE lava ke tau fiefia ʻi he ʻamanaki tatau kapau ʻoku tau hanganaki feinga lahi ke fakatupulekina ʻa e ʻulungaanga mātuʻaki mahuʻinga ko e mapuleʻi-kitá.—1 Kol. 9:25.