Hanganaki ʻAʻeva ʻi he Moʻoní

 1. Hangē ko ia ʻoku hā ʻi he 3 Sione 3, 4, ko e hā ʻokú ne ʻai kitautolu ke fiefiá?

ʻE LAVA ke ke sioloto atu ki he fiefia ʻa e ʻapositolo ko Sioné ʻi heʻene fanongo ko e faʻahinga ko ia naʻá ne tokoniʻi ke ako ʻa e moʻoní naʻe hokohoko atu ʻenau tauhi faitōnunga kia Sihová? Naʻa nau fehangahangai mo e ngaahi palopalema lahi pea naʻe ngāue mālohi ʻa Sione ke fakaivimālohiʻi ʻa e tui ʻa e kau Kalisitiane mateaki ko ení ʻa ia naʻá ne vakai ki ai ko ʻene fānau fakalaumālie. ʻI he tuʻunga meimei tatau, ʻoku tau fiefia ʻi he taimi ʻoku fakatapui ai kia Sihova ʻetau fānaú tonu pe fānau fakalaumālié pea kītaki ʻi he tauhi kiate iá.​—Lau ʻa e 3 Sione 3, 4.

 2. Ko e hā ʻa e taumuʻa ʻo e ngaahi tohi naʻe hiki ʻe Sioné?

² ʻI he 98 T.S., ʻoku ngalingali naʻe nofo ʻa Sione ʻi ʻEfesō pe ofi ki ai. Naʻá ne hiki nai ki ai ʻi he hili hono fakaʻatā ia mei hono fakaheeʻi ki he motu ko Pātimosí. ʻI he taimi nai ko iá, naʻe ueʻi ia ʻe he laumālie māʻoniʻoni ʻo Sihová ke ne hiki ʻa e tohi ʻe tolu. Ko e taumuʻa ʻo e ngaahi tohi ko iá ke ueʻi ʻa e kau Kalisitiane mateakí ke tauhi maʻu ʻenau tui kia Sīsuú pea hanganaki ʻaʻeva ʻi he moʻoní.

 3. Ko e hā ʻa e ngaahi fehuʻi te tau talí?

³ Ko Sione ʻi he kau ʻapositoló naʻe moʻui fuoloa tahá, pea naʻá ne hohaʻa fekauʻaki mo hono uesia ʻe he kau faiako loí ʻa e ngaahi fakatahaʻangá.b (1 Sio. 2:18, 19, 26) Naʻe taukaveʻi ʻe he kau tafoki ʻo fakafepaki ki he moʻoní ʻoku nau ʻiloʻi ʻa e ʻOtuá, ka naʻe ʻikai ke nau talangofua ki he ngaahi fekau ʻa Sihová. Tau lāulea angé ki he faleʻi fakamānavaʻi naʻe ʻomai ʻe Sioné. Te tau tali ai ʻa e fehuʻi ʻe tolu: ʻOku ʻuhinga ki he hā ʻa e ʻaʻeva ʻi he moʻoní? Ko e hā ʻa e fakafaingataʻaʻiaʻanga ʻoku tau fekuki mo iá? Pea ʻe lava fēfē ke tau fetokoniʻaki ke nofo maʻu ʻi he moʻoní?

 4. Fakatatau ki he 1 Sione 2:3-6 mo e 2 Sione 4, 6, ko e hā ʻoku kau ki he ʻaʻeva ʻi he moʻoní?

⁴ Ke ʻaʻeva ʻi he moʻoní, ʻoku fiemaʻu ke tau ʻiloʻi ʻa e moʻoni ʻoku maʻu ʻi he Folofola ʻa e ʻOtuá, ʻa e Tohi Tapú. ʻIkai ngata aí, kuo pau ke tau ‘tauhi ʻa e ngaahi fekau ʻa Sihová,’ ʻa ia kuo pau ke tau talangofua ki ai. (Lau ʻa e 1 Sione 2:3-6; 2 Sione 4, 6.) Naʻe fokotuʻu ʻe Sīsū ʻa e faʻifaʻitakiʻanga haohaoa ʻi he talangofua kia Sihová. Ko ia ko e founga mahuʻinga ʻe taha ke tau talangofua ai kia Sihová ko e muimui ofi ʻi he topuvaʻe ʻo Sīsuú.​—Sione 8:29; 1 Pita 2:21.

 5. Ko e hā kuo pau ke tau tuipau ki aí?

⁵ Ke hanganaki ʻaʻeva ʻi he moʻoní, kuo pau ke tau tuipau ko Sihova ʻa e ʻOtua ʻo e moʻoní, ʻa ia ko e meʻa kotoa pē ʻokú ne tala mai ʻi heʻene Folofolá, ʻa e Tohi Tapú, ʻoku moʻoni. Pea kuo pau foki ke tau tuipau ko Sīsū ʻa e Mīsaia naʻe talaʻofa maí. Ko e tokolahi ʻi he ʻahó ni ʻoku ʻikai ke nau tui kuo ʻosi fakanofo ʻa Sīsū ko e Tuʻi ʻo e Puleʻanga ʻo e ʻOtuá. Naʻe fakatokanga ʻa Sione naʻe “tokolahi ʻa e kau kākā,” ʻa ia ʻe lava ke nau takihalaʻi ʻa e faʻahinga naʻe ʻikai ke nau mateuteu ke taukapoʻi ʻa e moʻoni fekauʻaki mo Sihova mo Sīsuú. (2 Sio. 7-11) Naʻe tohi ʻe Sione: “Ko hai ia ʻa e tokotaha ʻoku loí ka ko e tokotaha ko ē ʻokú ne fakafisingaʻi ko Sīsū ʻa e Kalaisí?” (1 Sio. 2:22) Ko e founga pē taha ʻe lava ke tau fakaʻehiʻehi ai mei hono kākāʻí ko hono ako ʻa e Folofola ʻa e ʻOtuá. Ko ʻetau toki fai pē iá te tau hoko ai ʻo ʻiloʻi ʻa Sihova mo Sīsū. (Sione 17:3) Pea ko ʻetau toki tuipau ia ʻoku tau maʻu ʻa e moʻoní.

 6. Ko e hā ʻa e fakafaingataʻaʻiaʻanga ʻe taha naʻe fekuki mo ha finemui Kalisitiane?

⁶ Ko e kotoa ʻo e kau Kalisitiané kuo pau ke nau tokanga naʻa takihalaʻi kinautolu ʻe he filōsofia fakaetangatá. (1 Sio. 2:26) ʻOku tautefito ʻa e fiemaʻu ki he toʻutupu Kalisitiané ke nau tokanga ki he tauhele ko ení. Ko Alexia,c ko ha tuofefine Falanisē, taʻu 25, ʻokú ne pehē: “ʻI heʻeku kei siʻí, naʻe fakahohaʻasi au ʻe he ngaahi fakaʻuhinga ʻa e māmaní, hangē ko e ʻevalūsiō mo e filōsofia fakaetangatá. ʻI he taimi ʻe niʻihi, naʻe fakamānako ʻa e ngaahi akonaki ko iá kiate au. Ka naʻá ku ongoʻi heʻikai ke u fanongo ai pē ki he meʻa naʻe akoʻi mai ʻi he ʻapiakó pea ʻikai ʻoange ha faingamālie kia Sihova ke lea mai.” Naʻe ako ʻe Alexia ʻa e tohi Life​—How Did It Get Here? By Evolution or by Creation? ʻI ha ngaahi uike siʻi mei ai, naʻe mole atu ʻene veiveiuá. ʻOku pehē ʻe Alexia: “Naʻá ku fakamoʻoniʻi tonu ko e Tohi Tapú ʻoku maʻu ai ʻa e moʻoní. Pea naʻá ku ʻiloʻi ko e moʻuiʻaki ʻene ngaahi tuʻungá ʻe ʻomai ai kiate au ʻa e fiefia mo e nonga.”

 7. Ko e hā ʻa e tenge kuo pau ke tau talitekeʻí, pea ko e hā hono ʻuhingá?

⁷ Ko e kau Kalisitiané kotoa, kei siʻi mo e taʻumotuʻa, kuo pau ke nau talitekeʻi ʻa e tenge ke moʻui lōuá. Naʻe fakamamafaʻi ʻe Sione heʻikai lava ke tau ʻaʻeva ʻi he moʻoní pea ʻi he taimi tatau ʻoku tau moʻui taʻetaau. (1 Sio. 1:6) Kapau ʻoku tau loto ke maʻu ʻa e hōifua ʻa e ʻOtuá he taimí ni pea ʻi he kahaʻú, ʻoku fiemaʻu ke tau manatuʻi maʻu pē ʻokú ne ʻafioʻi ʻa e meʻa kotoa pē ʻoku tau faí. Neongo kapau ʻoku tau fai ha angahala fakapulipuli, ʻoku tokaimaʻananga kia Sihova ʻa e meʻa kotoa.​—Hep. 4:13.

 8. Ko e hā kuo pau ke tau talitekeʻí?

⁸ Kuo pau ke tau talitekeʻi ʻa e vakai ʻa e māmaní ki he angahalá. Naʻe tohi ʻe he ʻapositolo ko Sioné: “Kapau ʻoku tau leaʻaki ʻo pehē, ‘ʻOku ʻikai haʻatau angahala,’ ʻoku tau takihalaʻi ai kitautolu tonu.” (1 Sio. 1:8) ʻI he taimi ʻo Sioné, naʻe taukaveʻi ʻe he kau tafoki ʻo fakafepaki ki he moʻoní ʻe lava ke faiangahala ʻiloʻilo pau pē ha tokotaha pea kei maʻu pē ha vahaʻangatae mo e ʻOtuá. ʻI he ʻahó ni, ʻoku tau moʻui ʻi he haʻohaʻonga ʻo e kakai ʻoku nau maʻu ʻa e vakai tatau. ʻOku taukaveʻi ʻe he tokolahi ʻoku nau tui ki he ʻOtuá, ka ʻoku ʻikai ke nau tali ʻa e vakai ʻa Sihova ki he angahalá, tautefito ʻi he fekauʻaki mo e fehokotaki fakasinó. Ko e meʻa ʻoku vakai ki ai ʻa Sihova ko ha tōʻonga angahalaʻiá ʻoku nau pehē ko ha meʻa fakafoʻituitui pē ia pe ko ha founga pē ia ʻe taha ʻo e moʻuí.

 9. ʻOku anga-fēfē maʻu ʻaonga ʻa e toʻutupú ʻi he pipiki ki heʻenau tuipau makatuʻunga ʻi he Tohi Tapú?

⁹ Ko e toʻutupu Kalisitiané ʻoku tautefito ʻenau ongoʻi nai ʻoku tenge kinautolu ke ohi ʻa e vakai honau kaungāakó pe kaungāngāué ki he tōʻonga taʻetāú. Ko e meʻa ia naʻe hoko kia Aleksandar. ʻOkú ne pehē: “Naʻe feinga ʻa e tamaiki fefine ʻe niʻihi ʻi he ʻapiakó ke tenge au ke fehokotaki fakasino mo kinautolu. Naʻa nau tala mai koeʻuhi ʻoku ʻikai ke ʻi ai haku sō, kuo pau pē ʻoku ou fakasōtoma.” Kapau ʻokú ke fehangahangai mo ha ʻahiʻahi meimei tatau, manatuʻi ko hoʻo pipiki ki hoʻo tuipau makatuʻunga ʻi he Tohi Tapú, ʻokú ke maluʻi ai ho ngeiá, moʻui leleí, ngaahi ongó mo ho vahaʻangatae mo Sihová. Pea ʻi he taimi taki taha ʻokú ke talitekeʻi ai ʻa e ʻahiʻahí, ʻe faingofua ange ai ke ke fai ʻa e meʻa ʻoku totonú. Manatuʻi foki ko e vakai mioʻi ʻa e māmani ko ení ki he fehokotaki fakasinó ko e tupu meia Sētane. Ko ia ʻi he taimi ʻokú ke fakafisi ai ke fakangalokú, te ke “ikunaʻi ʻa e tokotaha fulikivanú.”​—1 Sio. 2:14.

10. ʻOku anga-fēfē hono tokoniʻi kitautolu ʻe he 1 Sione 1:9 ke tauhi kia Sihova mo ha konisēnisi maʻa?

¹⁰ ʻOku tau lāuʻilo ko Sihova ʻokú ne maʻu ʻa e totonu ke tala mai pe ko e hā ʻa e tōʻonga angahalaʻia. Pea ʻoku tau fai hotau lelei tahá ke ʻoua te tau faiangahala. Ka ʻi he taimi ʻoku tau faiangahala aí, ʻoku tau vete ʻetau faihalá kia Sihova ʻi he lotu. (Lau ʻa e 1 Sione 1:9.) Pea kapau ʻoku tau fai ha angahala mamafa, ʻoku tau kumi tokoni ki he kau mātuʻá ʻa ia kuo fakanofo ʻe Sihova ke nau tokangaʻi kitautolú. (Sēm. 5:14-16) Kae kehe, ʻoku ʻikai totonu ke lōmekina kitautolu ʻe he ngaahi ongoʻi halaia koeʻuhi ko e fehālaaki ʻi he kuohilí. He ko e hā? Koeʻuhi naʻe tokonaki mai ʻe heʻetau Tamai ʻofá ʻa e feilaulau huhuʻi ʻa hono ʻAló ke lava ʻo fakamolemoleʻi ai ʻetau ngaahi angahalá. ʻI he pehē ʻe Sihova te ne fakamolemoleʻi ʻa e kau faiangahala fakatomalá, kuo pau ke ne fakahoko ia. Ko ia ʻoku ʻikai ha meʻa te ne taʻofi kitautolu mei he tauhi kia Sihova mo ha konisēnisi maʻa.​—1 Sio. 2:1, 2, 12; 3:19, 20.

11. ʻE lava fēfē ke tau maluʻi hotau ʻatamaí mei he ngaahi akonaki ʻe lava ke ne uesia ʻetau tuí?

¹¹ Kuo pau ke tau talitekeʻi ʻa e ngaahi akonaki ʻa e kau tafoki ʻo fakafepaki ki he moʻoní. Talu mei he kamataʻanga ʻo e fakatahaʻanga Kalisitiané, kuo ngāueʻaki ʻe he Tēvoló ʻa e kau kākā tokolahi ke nau ʻai ke veiveiua ʻa e ʻatamai ʻo e kau sevāniti faitōnunga ʻa e ʻOtuá. Ko ia ai, ʻoku fiemaʻu ke tau ʻiloʻi ʻa e founga ke fakafaikehekeheʻi ai ʻa e moʻoní mei he loí.d ʻE ngāueʻaki nai ʻe hotau ngaahi filí ʻa e ʻInitanetí pe mītia fakasōsialé ke fakavaivaiʻiʻaki ʻetau falala kia Sihová mo ʻetau ʻofa ki hotau fanga tokouá. Manatuʻi ʻa e tokotaha ʻoku teke mui ʻi he ngaahi fakamatala fakangalilelei ko iá, pea talitekeʻi ia!​—1 Sio. 4:1, 6; Fkh. 12:9.

12. Ko e hā ʻoku totonu ai ke tau fakaivimālohiʻi ʻetau houngaʻia ʻi he ngaahi moʻoni kuo tau akó?

¹² Ke talitekeʻi ʻa e ngaahi ʻoho ʻa Sētané, ʻoku fiemaʻu ke tau fakaivimālohiʻi ʻetau falala kia Sīsū pea mo hono ngafa ʻi he taumuʻa ʻa e ʻOtuá. ʻOku fiemaʻu foki ke tau falala ki he founga pē taha ʻoku ngāueʻaki ʻe Sihova ke tataki ʻene kautahá he ʻahó ni. (Māt. 24:45-47) ʻOku tau fakaivimālohiʻi ʻetau falalá ʻaki hono ako tuʻumaʻu ʻa e Folofola ʻa e ʻOtuá. Pea ʻe hangē leva ʻetau tuí ko ha fuʻu ʻakau kuo faiaka loloto ʻi he kelekelé. Naʻe fakamamafaʻi ʻe Paula ʻa e meʻa meimei tatau ʻi heʻene tohi ki he fakatahaʻanga Kolosé. Naʻá ne pehē: “Hangē tofu pē ko hoʻomou tali ʻa Kalaisi Sīsū ko e ʻEikí, hokohoko atu ʻa e ʻaʻeva ʻi he fāʻūtaha mo iá, ʻo faiaka mo langa hake ʻiate ia pea hoko ʻo tuʻu maʻu ʻi he tuí.” (Kol. 2:6, 7) ʻOku ʻikai ʻaupito ke lava ʻe Sētane pe ko e faʻahinga ʻokú ne tākiekiná ʻo fai ha meʻa ʻe ueʻia ai ha Kalisitiane kuó ne fakaivimālohiʻi ʻene tuí.​—2 Sio. 8, 9.

13. Ko e hā ʻoku totonu ke tau ʻamanekiná, pea ko e hā hono ʻuhingá?

¹³ Kuo pau ke tau ʻamanekina ʻe fehiʻa ʻa e māmaní ʻiate kitautolu. (1 Sio. 3:13) Naʻe fakamanatu mai ʻe Sione “ko e māmaní kotoa ʻoku tokoto ia ʻi he mafai ʻo e tokotaha fulikivanú.” (1 Sio. 5:19) ʻI he ofi ke ngata ʻa e fokotuʻutuʻu ko ení, ʻoku ʻita lahi ange ʻa Sētane. (Fkh. 12:12) ʻOkú ne ngāueʻaki ʻa e meʻa lahi ange ʻi he ngaahi ʻoho taʻefakahangatonú, hangē ko e ʻulungaanga taʻetāú pe ko e ngaahi loi ʻa e kau tafoki ʻo fakafepaki ki he moʻoní. ʻOkú ne toe ngāueʻaki foki mo e ngaahi ʻoho fakahangatonu. ʻOku ʻiloʻi ʻe Sētane ʻoku toe siʻi pē hono taimi ke feinga ai ke taʻofi ʻetau ngāue fakamalangá pe fakavaivaiʻi ʻetau tuí. Ko ia ʻoku ʻikai ke fai ha ofo ʻi hono fakangatangata pe tapui ʻetau ngāué ʻi he ngaahi fonua lahi. Neongo ia, ko hotau fanga tokoua mo e fanga tuofāfine ʻi he ngaahi fonua ko iá ʻoku nau kātekina ia. ʻOku nau fakamoʻoniʻi tatau ai pē pe ko e hā ʻoku fai mai ʻe he tokotaha fulikivanú, ʻe lava ke tau ikuna!

14. Ko e hā ʻa e founga ʻe taha ʻe lava ke tau tokoniʻi ai hotau fanga tokouá mo e fanga tuofāfiné ke nofo maʻu ʻi he moʻoní?

¹⁴ Ke tokoniʻi hotau fanga tokouá mo e fanga tuofāfiné ke nofo maʻu ʻi he moʻoní, kuo pau ke tau fakahāhā ʻa e manavaʻofa. (1 Sio. 3:10, 11, 16-18) ʻOku fiemaʻu ke tau feʻofaʻaki ʻo ʻikai ʻi he taimi pē ʻoku lelei ai ʻa e ngaahi meʻá kae pehē foki ki he taimi ʻoku hoko ai ha palopalema. Ko e fakatātaá, ʻokú ke ʻiloʻi ha taha kuo mole hano ʻofaʻanga ʻi he maté pea fiemaʻu ha fakafiemālie pe ko ha tokoni ʻaonga? Pe kuó ke fanongo fekauʻaki mo ha kaungātui kuo nau tofanga ʻi ha fakatamaki fakanatula pea fiemaʻu ke toe langa honau Fale Fakatahaʻangá pe ngaahi ʻapí? ʻOku tau fakahaaʻi ʻa e lahi ʻo ʻetau ʻofa mo e manavaʻofa ki hotau fanga tokouá mo e fanga tuofāfiné ʻo ʻikai ʻi heʻetau leá pē, ka ko e mahuʻinga angé, ko e meʻa ʻoku tau faí.

15. Hangē ko ia ʻoku hā ʻi he 1 Sione 4:7, 8, ko e hā ʻoku fiemaʻu ke tau faí?

¹⁵ ʻOku tau faʻifaʻitaki ki heʻetau Tamai fakahēvani ʻofá ʻi he taimi ʻoku tau fakahāhā ai ʻa e feʻofaʻakí. (Lau ʻa e 1 Sione 4:7, 8.) Ko e founga mahuʻinga ʻoku tau fakahaaʻi ai ʻa e ʻofá ko e fefakamolemoleʻaki. Ko e fakatātaá, ʻe fakalotomamahiʻi nai kitautolu ʻe ha taha peá ne toki kole fakamolemole mai. ʻOku tau fakahāhā ʻa e ʻofá ʻaki hono fakamolemoleʻi ia pea fakangaloʻi ʻene fehālaakí. (Kol. 3:13) Naʻe fehangahangai ha tokoua ko Aldo mo e ʻahiʻahi ko ení ʻi he taimi naʻá ne fanongo ai ki ha tokoua naʻá ne tokaʻi naʻá ne fai ha lea fakalotomamahi fekauʻaki mo hono matakalí. ʻOku pehē ʻe Aldo, “Naʻá ku lotu maʻu pē kia Sihova ke ne tokoniʻi au ke ʻoua te u maʻu ha ngaahi ongoʻi ʻikai lelei fekauʻaki mo e tokoua ko ení.” Ka naʻe fai ʻe Aldo ha meʻa ʻe taha. Naʻá ne fakakaukau ke kole ki he tokouá ke na ʻalu ʻo malanga. ʻI heʻena ngāue fakatahá, naʻe fakamatalaʻi ange ʻe Aldo ʻene mamahi ʻi he lea naʻá ne faí. “ʻI he fanongo ʻa e tokouá ki he anga ʻeku ongoʻi fekauʻaki mo ʻene lea fakalotomamahí,” ko e lea ia ʻa Aldo, “naʻá ne kole fakamolemole mai. Mei he tō hono leʻó, naʻe lava ke u ongoʻi ʻa ʻene fakaʻiseʻisa moʻoni ʻi he meʻa naʻá ne leaʻakí. Naʻá ma toe kaungāmeʻa lelei pea fakangaloʻi ʻa e palopalemá.”

16-17. Ko e hā ʻoku totonu ke tau fakapapauʻi ke faí?

¹⁶ Ko e ʻapositolo ko Sioné naʻá ne mātuʻaki tokanga anga-ʻofa ki he lelei fakalaumālie hono fanga tokouá, pea naʻe hā mahino ʻene ongoʻí ʻi he faleʻi naʻá ne fai ʻi heʻene tohi fakamānavaʻi ʻe tolú. He fakalototoʻa ē ke ʻiloʻi ko e kau tangata mo e kau fefine, hangē ko iá, kuo pani ke nau kaungāpule mo Kalaisi!​—1 Sio. 2:27.

¹⁷ ʻOfa ke tau tokanga fakamātoato ki he faleʻi ko ia naʻa tau lāulea ki aí. Tau fakapapauʻi ke ʻaʻeva ʻi he moʻoní, ʻo talangofua kia Sihova ʻi he tafaʻaki kotoa pē ʻetau moʻuí. Ako ʻene Folofolá, pea falala ki ai. Langa hake ha tui mālohi kia Sīsū. Talitekeʻi ʻa e ngaahi filōsofia fakaetangatá mo e akonaki ʻa e kau tafoki ʻo fakafepaki ki he moʻoní. Talitekeʻi ʻa e tenge ke moʻui lōua mo faiangahalá. Moʻuiʻaki ʻa e ngaahi tuʻunga fakaeʻulungaanga māʻolunga ʻa Sihová. Pea tau tokoni ki hotau fanga tokouá ke nau hanganaki mālohi ʻaki hono fakamolemoleʻi ʻa e faʻahinga ʻoku nau fakalotomamahiʻi kitautolú pea tokoni ki he niʻihi kehé. Pea neongo ʻetau fekuki mo e ngaahi faingataʻá, te tau hanganaki ʻaʻeva ʻi he moʻoní.