ʻOku ʻIkai ha Meʻa ʻe Lava ke Tūkia Ai ʻa e Māʻoniʻoní

1-2. Ko e hā ʻa e fakamatala naʻe fai ʻe ha faʻutohi, pea ko e hā te tau lāulea ki ai ʻi he kupu ko ení?

ʻI HE ʻahó ni ʻoku taukaveʻi ʻe he laui miliona ʻoku nau tui kia Sīsū, ka ʻoku ʻikai te nau tali ʻa e ngaahi meʻa naʻá ne akoʻí. (2 Tīm. 4:3, 4) Ko hono moʻoní, naʻe pehē ʻe ha tokotaha faʻutohi: “Kapau naʻe ʻi ai ha ‘Sīsū’ ʻe taha ʻi hotau haʻohaʻongá he ʻahó ni ʻa ia te ne leaʻaki ʻa e ngaahi meʻa tatau mo Sīsū . . . , te tau talitekeʻi ia he ʻahó ni ʻo hangē ko ia naʻe hoko ʻi he taʻu ʻe ua afe kuohilí? . . . Ko e tali ki aí: ʻIo, te tau fai pehē.”

² Ko e tokolahi ʻi he ʻuluaki senitulí naʻa nau fanongo ki he faiako ʻa Sīsuú pea sio ki heʻene fakahoko ʻa e ngaahi maná, ka naʻa nau fakafisi ke tui kiate ia. Ko e hā hono ʻuhingá? ʻI he kupu ki muʻá, naʻa tau lāulea ki he ʻuhinga ʻe fā naʻe tūkia ai ʻa e kakaí ʻi he meʻa naʻe leaʻaki mo fai ʻe Sīsuú. Tau lāulea angé ki ha toe ʻuhinga ʻe fā. ʻI heʻetau fai iá, te tau vakai ki he ʻuhinga ʻoku talitekeʻi ai ʻe he kakai ʻi he ʻaho ní ʻa e kau muimui ʻo Sīsuú pea mo e founga ʻe lava ke tau fakaʻehiʻehi ai mei he hoko ʻo tūkiá.

 3. Ko e hā ʻa e fili naʻe fai ʻe Sīsū ʻo taki atu ai ʻa e niʻihi ke nau tūkia?

³ ʻI he ʻi māmani ʻa Sīsuú, naʻá ne fili ke feohi mo e kakai kotoa pē. Naʻá ne kai fakataha mo e koloaʻiá mo e māʻolungá, ka naʻá ne toe fakamoleki ʻa e taimi lahi mo e masivá mo e māʻulaló. Tānaki atu ki aí, naʻá ne manavaʻofa ki he faʻahinga naʻe lau ko e “kau angahalá.” Naʻe tūkia ʻa e niʻihi ʻo e kau māʻoniʻoni-fakaekitá ʻi he meʻa naʻe fai ʻe Sīsuú. Naʻa nau ʻeke ki heʻene kau ākongá: “Ko e hā ʻoku mou kai ai mo inu fakataha mo e kau tānaki tukuhaú mo e kau angahalá?” ʻI he tali ki aí, naʻe pehē ʻe Sīsū: “Ko e faʻahinga ʻoku moʻui leleí ʻoku ʻikai fiemaʻu ki ai ha toketā, ka ʻoku fiemaʻu ia ki he faʻahinga ʻoku puké. Kuó u haʻu ke ui, ʻo ʻikai ko e kakai māʻoniʻoní, ka ko e kau angahalá ke nau fakatomala.”​—Luke 5:29-32.

 4. Fakatatau ki he palōfita ko ʻAiseá, ko e hā naʻe totonu ke ʻamanekina ʻe he kau Siú fekauʻaki mo e Mīsaiá?

⁴ Ko e hā ʻoku leaʻaki ʻe he Folofolá? Ki muʻa fuoloa pea haʻu ʻa e Mīsaiá, naʻe fakamatala ʻa e palōfita ko ʻAiseá fekauʻaki mo ia ko ha tokotaha heʻikai ke tali ʻe he māmaní. Naʻe tomuʻa tala ʻi he kikité: “Naʻe taʻetokaʻi ia pea naʻe fakaʻehiʻehi mei ai ʻa e tangatá . . . Naʻe hangē ia ne fufū ʻa hono fofongá meiate kimautolú. Naʻe taʻetokaʻi ia, pea naʻa mau vakai kiate ia ʻoku ʻikai hano mahuʻinga.” (ʻAi. 53:3) Ko e Mīsaiá ʻe fakaʻehiʻehi mei ai “ʻa e tangatá,” ko ia naʻe totonu ke ʻamanekina ʻe he kau Siu ʻi he ʻuluaki senitulí ʻe talitekeʻi ʻa Sīsū.

 5. ʻOku anga-fēfē ʻa e vakai ʻa e tokolahi he ʻahó ni ki he kau muimui ʻo Sīsuú?

⁵ ʻOku tau vakai ki he palopalema tatau ʻi he ʻahó ni? ʻIo. Ko e haʻa faifekau tokolahi ʻoku nau vēkeveke ke tali ʻa e faʻahinga tuʻu-ki-muʻa, koloaʻia, mo e kau poto ʻi he vakai ʻa e māmaní ko e kau mēmipa ʻi heʻenau fakatahaʻangá. ʻOku fai eni ʻe he haʻa faifekaú neongo ko e ngaahi ʻulungaanga mo e founga moʻui ʻa e kau mēmipa foʻou ko iá ʻoku ʻikai fehoanaki mo e ngaahi tuʻunga ʻa e ʻOtuá. ʻOku fehiʻa ʻa e haʻa faifekau ko iá ʻi he kau sevāniti faivelenga mo maʻa fakaeʻulungaanga ʻa Sihová koeʻuhi ʻoku ʻikai ke nau tuʻu-ki-muʻa ʻi he ngaahi tuʻunga ʻa e māmaní. Hangē ko ia naʻe leaʻaki ʻe Paulá, naʻe fili ʻe he ʻOtuá ʻa e faʻahinga ʻoku fai “ʻa e siolalo ki aí.” (1 Kol. 1:26-29) Kae kehe, ʻoku mahuʻinga kia Sihova ʻa e kotoa ʻene kau sevāniti faitōnungá.

 6. ʻE lava fēfē ke tau faʻifaʻitaki ki he vakai ʻa Sīsuú, hangē ko ia ʻoku hā ʻi he Mātiu 11:25, 26?

⁶ ʻE lava fēfē ke tau fakaʻehiʻehi mei he hoko ʻo tūkiá? (Lau ʻa e Mātiu 11:25, 26.) ʻOua ʻe hoko ʻo tākiekina ʻe he vakai ʻa e māmaní ki he kakai ʻa e ʻOtuá. Lāuʻilo ko e kakai anga-fakatōkilaló pē ʻoku ngāueʻaki ʻe Sihova ke fai hono finangaló. (Saame 138:6) Pea fakakaukauloto ki he lahi ʻo e meʻa kuó ne fakahoko ʻaki hono ngāueʻaki ʻa e faʻahinga ʻoku ʻikai ke lau ʻe he māmaní ʻoku nau poto pe ʻatamaiʻia.

 7. Ko e hā naʻe ui ai ʻe Sīsū ʻa e kau Fālesí ko e kau mālualoí, pea naʻe anga-fēfē ʻenau fakafeangaí?

⁷ Naʻe fakahalaiaʻi loto-toʻa ʻe Sīsū ʻa e ngaahi tōʻonga mālualoi ʻa e ngaahi lotu ʻi hono taimí. Ko e fakatātaá, naʻá ne fakaeʻa ʻa e mālualoi ʻa e kau Fālesí, ʻa ia naʻa nau hohaʻa lahi ange ki he founga ʻenau fanofanó ʻi he anga ʻenau tokangaʻi ʻenau ngaahi mātuʻá. (Māt. 15:1-11) Naʻe ʻohovale nai ʻa e kau ākonga ʻa Sīsuú ʻi heʻene ngaahi leá. Ko hono moʻoní, naʻa nau ʻeke kiate ia: “ʻOkú ke ʻilo naʻe tūkia ʻa e kau Fālesí ʻi he fanongo ki he meʻa naʻá ke leaʻakí?” Naʻe tali ange ʻe Sīsū: “Ko e ʻakau kotoa pē naʻe ʻikai ke tō ʻe heʻeku Tamai fakahēvaní ʻe taʻakifuʻu ia. Tuku ai pē ʻa kinautolu ia. Ko e kau takimuʻa kui kinautolu. Kapau leva ʻoku taki ʻe ha tangata kui ha tangata kui, te na fakatou tō ʻi ha luo.” (Māt. 15:12-14) Naʻe ʻikai ke fakaʻatā ʻe Sīsū ʻa e fakafeangai ʻikai lelei ʻa e kau taki lotú ke ne taʻofi ia mei hono leaʻaki ʻa e moʻoní.

 8. Naʻe anga-fēfē hono fakahaaʻi ʻe Sīsū ʻoku ʻikai ke tali ʻe he ʻOtuá ʻa e ngaahi tui fakalotu kotoa pē?

⁸ Naʻe toe fakaeʻa ʻe Sīsū ʻa e ngaahi akonaki fakalotu loí. Naʻe ʻikai ke ne pehē ʻoku tali ʻe he ʻOtuá ʻa e ngaahi tui fakalotu kotoa pē. ʻI hono kehé, naʻá ne pehē ʻe ʻi ai ʻa e tokolahi te nau ʻalu ʻi he hala ʻoku ʻatā ʻa ia ʻoku taki atu ki he ʻauhá, lolotonga ia ko e tokosiʻi pē te nau ʻi he hala ʻefiʻefi ʻoku taki atu ki he moʻuí. (Māt. 7:13, 14) Naʻá ne fakamahino ʻoku ʻi ai ʻa e niʻihi ʻe hā ngali ʻoku nau tauhi ki he ʻOtuá, ka ko hono moʻoní ʻoku ʻikai ke nau tauhi kiate ia. Naʻá ne fakatokanga: “Mou tokanga telia ʻa e kau palōfita loi ʻoku nau haʻu kiate kimoutolu ʻoku nau kofu hangē ha sipí, ka ʻi lotó ko e fanga ulofi fekai kinautolu. ʻI honau ngaahi fuá te mou ʻiloʻi ai kinautolu.”​—Māt. 7:15-20.

 9. Ko e hā ʻa e niʻihi ʻo e ngaahi akonaki fakalotu loi naʻe fakaeʻa ʻe Sīsū?

⁹ Ko e hā ʻoku leaʻaki ʻe he Folofolá? Naʻe tomuʻa tala ʻe he ngaahi kikite ʻi he Tohi Tapú ko e mamahiʻi ʻo e fale ʻo Sihová te ne keina ʻa e Mīsaiá. (Saame 69:9; Sione 2:14-17) Naʻe ueʻi ʻe he meʻá ni ʻa Sīsū ke ne fakaeʻa ʻa e ngaahi tui mo e tōʻonga fakalotu loí. Ko e fakatātaá, naʻe tui ʻa e kau Fālesí ʻoku taʻefaʻamate ʻa e laumālié; naʻe akoʻi ʻe Sīsū ʻoku mohe ʻa e kau maté. (Sione 11:11) Naʻe fakaʻikaiʻi ʻe he kau Sātusí ʻa e toetuʻú; naʻe fokotuʻu hake ʻe Sīsū hono kaumeʻa ko Lāsalosí. (Sione 11:43, 44; Ngā. 23:8) Naʻe fakakaukau ʻa e kau Fālesí ko e meʻa kotoa pē naʻe ʻosi tomuʻa fakapapauʻi ʻene hokó pe ko e fili ʻe he ʻOtuá; naʻe akoʻi ʻe Sīsū ko e faʻahinga ʻo e tangatá ʻe lava ke nau fili pe te nau tauhi ki he ʻOtuá pe ʻikai.​—Māt. 11:28.

10. Ko e hā ʻoku tūkia ai ʻa e tokolahi ʻi heʻetau ngaahi akonakí?

¹⁰ ʻOku tau vakai ki he palopalema tatau ʻi he ʻahó ni? ʻIo. ʻOku tūkia ʻa e tokolahi koeʻuhi ko hono fakaeʻa ʻe heʻetau ngaahi akonaki makatuʻunga ʻi he Tohi Tapú ʻa e ngaahi fakakaukau fakalotu loí. ʻOku akoʻi ʻe he haʻa faifekaú ki heʻenau tākangá ʻoku tauteaʻi ʻe he ʻOtuá ʻa e fulikivanú ʻi heli. ʻOku nau ngāueʻaki ʻa e akonaki loi ko iá ke puleʻiʻaki ʻa e kakaí. ʻI he tuʻunga ko e kau sevāniti ʻa Sihova, ʻa ia ʻoku lotu ki he ʻOtua ʻo e ʻofá, ʻoku tau fakaeʻa ʻa e akonaki loi ko iá. ʻOku toe akoʻi ʻe he haʻa faifekaú ko e laumālié ʻoku taʻefaʻamate. ʻOku tau fakaeʻa ʻa e tupuʻanga fakapangani ʻo e tokāteline ko iá, ʻa ia​—kapau ʻoku moʻoni​—ʻe ʻai ai ke ʻikai ha ʻaonga ʻo e toetuʻú. Pea ʻi he kehe mei he tui ʻa e ngaahi lotu lahi ki he tomuʻa fakatufakangaʻí, ʻoku tau akoʻi ko e tangatá ʻoku nau maʻu ʻa e tauʻatāina ke fili pea lava ke nau fili ke tauhi ki he ʻOtuá. ʻOku anga-fēfē ʻa e fakafeangai ʻa e kau taki lotú? ʻOku nau faʻa ʻita tōlili!

11. Fakatatau ki he lea ʻa Sīsū ʻi he Sione 8:45-47, ko e hā ʻoku fiemaʻu ʻe he ʻOtuá mei heʻene kakaí?

¹¹ ʻE lava fēfē ke tau fakaʻehiʻehi mei he hoko ʻo tūkiá? Kapau ʻoku tau ʻofa ʻi he moʻoní, kuo pau ke tau tali ʻa e ngaahi folofola ʻa e ʻOtuá. (Lau ʻa e Sione 8:45-47.) ʻI he ʻikai ke hangē ko Sētane ko e Tēvoló, ʻoku tau tuʻu maʻu ʻi he moʻoní. Heʻikai ʻaupito ke tau fakangaloku ʻetau tuí. (Sione 8:44) ʻOku fiemaʻu ʻe he ʻOtuá ʻene kakaí ke nau “fakaliliʻa ki he meʻa ʻoku fulikivanú” pea “pīkitai ki he meʻa ʻoku leleí,” hangē pē ko ia naʻe fai ʻe Sīsuú.​—Loma 12:9; Hep. 1:9.

12. Ko e hā naʻe hoko ai ʻa e founga naʻe pekia ai ʻa Sīsuú ko ha tūkiaʻanga ki he kakai Siu tokolahi?

¹² Ko e hā ha toe tūkiaʻanga ki he kau Siu ʻi he taimi ʻo Sīsuú? Naʻe pehē ʻe Paula: “ʻOku tau malangaʻi naʻe tautau ʻa Kalaisi ʻi he ʻakaú, ʻa ia ko ha tūkiaʻanga ia ki he kau Siú.” (1 Kol. 1:23) Ko e hā naʻe hohaʻa ai ʻa e kau Siu tokolahi ki he founga naʻe pekia ai ʻa Sīsuú? Naʻa nau vakai ko e pekia ʻa Sīsū ʻi ha ʻakaú naʻe ʻai ai ke ne hā ngali ko ha tokotaha faihia mo faiangahala kae ʻikai ko e Mīsaiá.​—Teu. 21:22, 23.

13. Ko e hā naʻe ʻikai ke ʻiloʻi ʻe he faʻahinga naʻa nau tūkia ʻia Sīsuú?

¹³ Ko e faʻahinga ʻi he lotolotonga ʻo e kau Siu naʻa nau tūkia ʻia Sīsuú naʻe ʻikai ke nau ʻiloʻi naʻá ne taʻehalaia, naʻe tukuakiʻi loi ia pea ngaohikovia taʻetotonu. Ko e faʻahinga naʻa nau hopoʻi ʻa Sīsuú naʻa nau taʻefakaʻapaʻapaʻi ʻa e fakamaau totonú. Ko e fakamaauʻanga lahi Siú naʻa nau fai fakavave ʻa e fakamāú, pea naʻe ʻikai ke nau muimui ki he laó. (Luke 22:54; Sione 18:24) ʻI he ʻikai ke fanongo taʻefilifilimānako ki he ngaahi tukuakiʻi mo e fakamoʻoni fekauʻaki mo Sīsuú, ko e kau fakamāú naʻa nau kumi “ki ha fakamoʻoni loi ke tukuakiʻi ʻaki ʻa Sīsū koeʻuhi ke tāmateʻi ia.” ʻI he ʻikai ke nau fai peheé, naʻe feinga ʻa e taulaʻeiki lahí ke ʻai ʻa Sīsū ke ne fakahalaiaʻi pē ʻe ia ia. Naʻe ʻikai ʻaupito ke fehoanaki ʻa e meʻá ni mo e ngaahi tuʻunga fakalaó. (Māt. 26:59; Mk. 14:55-64) Pea ʻi he hili hono fokotuʻu hake ʻa Sīsū mei he maté, ko e kau fakamaau taʻetotonu ko iá naʻa nau totongiʻi ʻa e kau sōtia Loma naʻa nau leʻohi hono fonualotó ʻaki “ha ngaahi konga siliva lahi” ke nau fakamafola ha talanoa loi fekauʻaki mo e ʻuhinga naʻe ʻikai ai ha taha ʻi he fonualotó.​—Māt. 28:11-15.

14. Ko e hā naʻe tomuʻa tala ʻe he Folofolá fekauʻaki mo e pekia ʻa e Mīsaiá?

¹⁴ Ko e hā ʻoku leaʻaki ʻe he Folofolá? Neongo ko e tokolahi ʻo e kau Siu ʻi he taimi ʻo Sīsuú naʻe ʻikai ke nau ʻamanekina ko e Mīsaiá ʻe fiemaʻu ke pekia, fakatokangaʻi ʻa e meʻa naʻe kikiteʻi ʻi he Folofolá: “Naʻá ne lilingi atu ʻa ʻene moʻuí ʻo aʻu ki heʻene mate pea naʻe lau ia ʻi he lotolotonga ʻo e kau laka halá; naʻá ne ʻave ʻa e angahala ʻa e kakai tokolahi, pea naʻá ne fakalaloa maʻá e kau laka halá.” (ʻAi. 53:12) Ko ia naʻe ʻikai ha ʻuhinga ki he kau Siú ke nau tūkia ʻi hono tautau ʻa Sīsū ko ha tokotaha angahalá.

15. Ko e hā ʻa e ngaahi tukuakiʻi kuo fai ki he Kau Fakamoʻoni ʻa Sihová kuo fakatupunga ai ke tūkia ha niʻihi?

¹⁵ ʻOku tau vakai ki he palopalema tatau ʻi he ʻahó ni? ʻAupito! Naʻe tukuakiʻi pea fakahalaiaʻi taʻetotonu ʻa Sīsū, pea ko e Kau Fakamoʻoni ʻa Sihová kuo nau tofanga ʻi he fakafeangai taʻetotonu meimei tatau. Fakatokangaʻi ʻa e fakatātā ʻe niʻihi. Lolotonga ʻa e 1930 tupú mo e 1940 tupú ʻi ʻAmelika, ko ʻetau tauʻatāina ke lotu ki he ʻOtuá naʻe toutou ʻave ki he fakamaauʻangá. Ko e kau fakamaau ʻe niʻihi naʻa nau taʻeufi ʻi hono fakamāuʻi taʻetotonu kitautolú. ʻI Quebec, Kānata, naʻe ngāue fakataha ʻa e Siasí mo e Puleʻangá ke fakafepakiʻi ʻetau ngāué. Naʻe tokolahi ʻa e kau malanga naʻe tuku pilīsone koeʻuhi ko ʻenau talanoa ki honau kaungāʻapí fekauʻaki mo e Puleʻanga ʻo e ʻOtuá. ʻI Siamane Nasi, naʻe tokolahi ʻa e fanga tokoua faitōnunga kei siʻi naʻe tāmateʻi ʻe he founga-pule fakaʻikaiʻi-ʻotua ko iá. Pea ʻi he ngaahi taʻu ki muí ni maí, ko e tokolahi hotau fanga tokoua ʻi Lūsiá kuo fakahalaiaʻi pea tuku pilīsone ʻi heʻenau talanoa ki he Tohi Tapú, ʻa ia kuo lau ia ko ha “ngāue fakatupu moveuveu.” Naʻa mo e Liliu Tohi Tapu ʻo e Māmani Foʻoú ʻo e Tohi Tapu Māʻoniʻoní ʻi he lea faka-Lūsiá kuo tapui pea lau ia ko ha “tohi fakatupu moveuveu” koeʻuhi ʻoku ngāueʻaki ai ʻa e huafa Sihová.

16. Hangē ko ia ʻoku fakamamafaʻi ʻi he 1 Sione 4:1, ko e hā ʻoku ʻikai totonu ke takihalaʻi ai kitautolu ʻe he ngaahi talanoa loi fekauʻaki mo e kakai ʻa Sihová?

¹⁶ ʻE lava fēfē ke tau fakaʻehiʻehi mei he hoko ʻo tūkiá? Feinga ke ʻiloʻi ʻa e ngaahi moʻoniʻi meʻá. ʻI he Malanga ʻa Sīsū ʻi he Moʻungá, naʻá ne fakatokanga ki heʻene kau fanongó ʻe ʻi ai ʻa e niʻihi te nau “fai ha ngaahi loi kovi kehekehe fekauʻaki” mo kinautolu. (Māt. 5:11) Ko e tupuʻanga ʻo e ngaahi loi ko ení ko Sētane. ʻOkú ne tākiekina ʻa e kau fakafepakí ke nau fakamafola ʻa e lauʻikovi loi fekauʻaki mo e faʻahinga ʻoku ʻofa ʻi he moʻoní. (Fkh. 12:9, 10) Kuo pau ke tau talitekeʻi ʻa e ngaahi loi ʻoku fai ʻe hotau ngaahi filí. ʻOua ʻaupito te tau fakaʻatā ʻa e ngaahi loi peheé ke ne fakamanavaheeʻi kitautolu pe fakavaivaiʻi ʻetau tuí.​—Lau ʻa e 1 Sione 4:1.

17. ʻI he founga fē naʻe tūkia ai ʻa e niʻihi ʻi he ngaahi meʻa naʻe hoko ki muʻa ke pekia ʻa Sīsuú?

¹⁷ Ki muʻa pē pea pekia ʻa Sīsuú, naʻe lavakiʻi ia ʻe ha taha ʻi heʻene kau ʻapositolo ʻe toko 12. Naʻe toe fakaʻikaiʻi tuʻo tolu ʻe ha ʻapositolo ʻa Sīsū, pea naʻe liʻaki ia ʻe heʻene kau ʻapositoló kotoa ʻi he efiafi ki muʻa ke ne pekiá. (Māt. 26:14-16, 47, 56, 75) Naʻe ʻikai ke ofo ai ʻa Sīsū. Naʻe aʻu ʻo ne tomuʻa tala ʻe hoko ʻa e meʻá ni. (Sione 6:64; 13:21, 26, 38; 16:32) ʻI he vakai ki he meʻá ni, naʻe tūkia nai ʻa e niʻihi, ʻo fakaʻuhinga, ‘Kapau ko e tōʻonga eni ʻa e kau ʻapositolo ʻa Sīsuú, ʻoku ʻikai ke u loto ke kau ʻi he kulupu ko iá!’

18. Ko e hā ʻa e ngaahi kikite naʻe fakahoko ʻi he ofi ke pekia ʻa Sīsuú?

¹⁸ Ko e hā ʻoku leaʻaki ʻe he Folofolá? ʻI ha laui senituli ki muʻa atu, naʻe fakahaaʻi ʻe Sihova ʻi heʻene Folofolá ko e Mīsaiá ʻe lavakiʻi ʻaki ʻa e konga siliva ʻe 30. (Sāk. 11:12, 13) Ko e tokotaha lavakí ko ha taha ʻi he ngaahi kaumeʻa ofi ʻo Sīsuú. (Saame 41:9) Naʻe toe tohi ʻe he palōfita ko Sākalaiá: “Taaʻi ʻa e tauhi-sipí, pea tuku ke movete ʻa e tākangá.” (Sāk. 13:7) ʻI he ʻikai ke tūkia ʻi he ngaahi meʻa naʻe hoko ko ení, ko e faʻahinga loto-totonú naʻe totonu nai ke fakaivimālohiʻi ʻi heʻenau vakai ki hono fakahoko ʻa e ngaahi kikite ko ení ʻia Sīsuú.

19. Ko e hā ʻoku ʻiloʻi ʻe he faʻahinga loto-totonú?

¹⁹ ʻOku tau vakai ki he palopalema tatau ʻi he ʻahó ni? ʻIo. ʻI onopooni, kuo mavahe ʻa e Kau Fakamoʻoni tokosiʻi mei he moʻoní, tafoki ʻo fakafepaki ki he moʻoní, pea feinga ke fakatafokiʻi ʻa e niʻihi kehé. Kuo nau fakamafola ʻa e ngaahi talanoa ʻikai lelei, moʻoni fakakonga, loi mataʻāʻā fekauʻaki mo e Kau Fakamoʻoni ʻa Sihová ʻi he maʻuʻanga ongoongó mo e ʻInitanetí. Ka ko e faʻahinga loto-totonú ʻoku ʻikai ke nau tūkia. ʻI hono kehé, ʻoku nau ʻiloʻi naʻe tomuʻa tala ʻi he Tohi Tapú ʻe hoko ʻa e ngaahi meʻa ko iá.​—Māt. 24:24; 2 Pita 2:18-22.

20. ʻE lava fēfē ke tau fakaʻehiʻehi mei he hoko ʻo tūkia ʻi he faʻahinga kuo mavahe mei he moʻoní? (2 Tīmote 4:4, 5)

²⁰ ʻE lava fēfē ke tau fakaʻehiʻehi mei he hoko ʻo tūkiá? ʻOku fiemaʻu ke tau tauhi ʻetau tuí ke mālohi ʻaki ʻa e ako tuʻumaʻu, lotu maʻu pē, pea hanganaki femoʻuekina ʻi he ngāue kuo tuku mai ʻe Sihova ke tau faí. (Lau ʻa e 2 Tīmote 4:4, 5.) Kapau ʻoku tau ngāueʻi ʻa e tuí, heʻikai ke tau ilifia ʻi heʻetau fanongo ki he ngaahi fakamatala ʻikai leleí. (ʻAi. 28:16) Ko ʻetau ʻofa kia Sihová, ko ʻene Folofolá mo hotau fanga tokouá ʻe tokoniʻi ai kitautolu ke fakaʻehiʻehi mei he hoko ʻo tūkia ʻi he faʻahinga kuo mavahe mei he moʻoní.

21. Neongo ko e tokolahi taha ʻo e kakai he ʻaho ní ʻoku nau talitekeʻi ʻetau pōpoakí, ko e hā ʻe lava ke tau fakapapauʻí?

²¹ ʻI he ʻuluaki senitulí, naʻe tūkia ʻa e tokolahi, pea naʻa nau talitekeʻi ʻa Sīsū. Neongo ia, naʻe tali ia ʻe he tokolahi. Naʻe kau heni ha mēmipa ʻo e Sanetalimi Faka-Siú pea naʻa mo ha “fuʻu tokolahi ʻo e kau taulaʻeikí.” (Ngā. 6:7; Māt. 27:57-60; Mk. 15:43) ʻI he tuʻunga meimei tatau he ʻahó ni, kuo ʻikai ke tūkia ʻa e laui miliona. Ko e hā hono ʻuhingá? Koeʻuhí ʻoku nau ʻiloʻi mo ʻofa ʻi he ngaahi moʻoni ʻoku maʻu ʻi he Folofolá. ʻOku pehē ʻe he Folofola ʻa e ʻOtuá: “ʻOku maʻu ʻa e melino lahi ʻe he faʻahinga ʻoku nau ʻofa ki hoʻo laó; ʻoku ʻikai ha meʻa ʻe lava ke ne ʻai kinautolu ke nau tūkia.”​—Saame 119:165.