Ko e Hā Kuo Hoko ki he ʻUlungaanga Tāú?​—Ko e Hā ʻa e Lau ʻa e Tohi Tapú?

ʻOku hōloa ʻa e ʻulungaanga tāú. ʻOku kaikailaʻi ʻe he kau mahakí ʻa e kau toketaá; ko e faʻahinga ʻi he falekaí ʻoku nau taʻefakaʻapaʻapa ʻo ngāhiʻi ʻa e kau ngaué; ko e kau pāsese ʻi he vakapuná ʻoku nau angatuʻu ʻo ʻohofi ʻa e kau ngāué; ko e fānau akó ʻoku nau anga-kovi ʻi he ʻapiakó ʻoku nau manukiʻi, fakamanamanaʻi, pea ʻohofi ʻa e kau faiakó; pea ko e kau politiki ʻe niʻihi ʻoku nau fai ʻa e ngaahi tōʻonga ngalivale lolotonga iá ko e kau politiki ʻe niʻihi ʻoku nau feinga ke fakahaaʻi atu ʻoku nau maʻu ʻa e ʻulungaanga tāú.

Ko e Tohi Tapú ko e tataki falalaʻanga ia ki he ʻulungaanga taau moʻoní. ʻOkú ne toe fakamatalaʻi foki ʻa e ʻuhinga ʻoku fakahāhā ai ʻe he kakaí ʻa e tōʻonga taʻefeʻunga ʻoku tau sio ki ai ʻi he ʻaho ní.

Ko e hōloa ko ia ʻa e ʻulungaanga tāú​—tuʻunga fakaeʻulungaanga ʻoku leleí mo ala talí​—ʻoku hā mahino ia ʻi he māmaní.

•  Fakatatau ki ha savea ki muí ni mai, naʻe fakahaaʻi ai ʻe he kau ʻAmeliká ʻoku nau tui ko e tuʻunga fakaeʻulungaanga ʻoku ʻi ai honau fonuá kuo ʻi ha tuʻunga māʻulalo ʻaupito ia ʻi ha toe taimi ʻi he taʻu ʻe 22 kuohilí.

•  ʻI ha savea ʻe taha naʻe fai ki ha kakai laka hake ʻi he toko 32,000 ʻi he ngaahi fonua ʻe 28, ko e pēseti ʻe 65 ai naʻa nau pehē ko e hōloa ko ia ʻa e ʻulungaanga tāú ʻi he ʻaho ní ko e kovi taha ia kuo nau sio aí.

Naʻe tomuʻa fakahaaʻi ʻe he Tohi Tapú ʻa e ngaahi ʻulungaanga ko ia ʻoku tau sio ai ʻi he ʻaho ní.

•  “Bea ke ilo ae mea ni foki, e hoko i he gaahi aho fakamui ae kuoga fakatuutamaki. Koeuhi e ofa ae kau tagata kiate kinautolu be, o manumanu, mo bolebole, mo laukau, mo lea kovi, mo talagataa ki he mātua, mo taefakafetai, . . .  taemaʻu ae ofa, [mo e] aga malohi.”​—2 Tīmote 3:1-3, Paaki Motuʻa.

Ke maʻu ha fakamatala lahi ange ki he founga hono fakahoko ʻa e kikite ko ení, lau ʻa e kupu “Naʻe Tomuʻa Tala ʻe he Tohi Tapú ʻa e Anga ʻo e Fakakaukau mo e Tōʻonga ʻa e Kakaí he ʻAho Ní?”

ʻI ha māmani ʻoku hōloa ai ʻa e ʻulungaanga tāú, kuo ʻiloʻi ʻe he laui miliona ko e Tohi Tapú ʻa e tataki tuʻu-ki-muʻa taha ki he ʻulungaanga leleí. Ko ʻene ngaahi faleʻi fakaeʻulungāngá “ʻoku falalaʻanga maʻu pē ia, ʻi he taimí ni pea taʻengata.” (Saame 111:8) Fakakaukau ki he ngaahi fakatātā ko ení:

•  Meʻa ʻoku leaʻaki ʻe he Tohi Tapú: “Ko e ngaahi meʻa kotoa pē ʻoku mou loto ke fai atu ʻe he kakaí kiate kimoutolú, kuo pau foki ke mou fai ia kiate kinautolu.”​—Mātiu 7:12.

  ʻUhingá: ʻOku totonu ke tau fakafeangai ki he niʻihi kehé ʻi he anga-ʻofa mo e anga-fakaʻapaʻapa, ʻo hangē pē ko ʻetau loto ke fai mai ʻe he niʻihi kehé kiate kitautolú.

•  Meʻa ʻoku leaʻaki ʻe he Tohi Tapú: “Ko eni kuo mou huʻi atu ʻa e kākaá, ko e tokotaha taki taha ʻo kimoutolu ke ne lea moʻoni ki hono kaungāʻapí.”​—ʻEfesō 4:25.

  ʻUhingá: ʻOku totonu ke tau faitotonu ʻi he meʻa ʻoku tau leaʻakí mo e meʻa ʻoku tau faí.

Ki ha fakamatala lahi ange ki he kaveinga ko ení, kātaki ʻo lau ʻa e:

•  Ko e Taua Leʻo ʻoku fakakaveinga “Tonú mo e Hala​—Tataki ʻe Lava Ke Ke Falala ki Ai.”

•  Ko e kupu “Tali ʻa e Fefaikehekeheʻakí​—Founga ʻe Lava ke Tokoni Ai ʻa e Tohi Tapú.”