ʻEke ʻe he Toʻutupú

Ko Hai Hoku Ngaahi Kaumeʻa Moʻoní?

“Naʻe akoʻi kiate au ʻe Koli e ngaahi meʻa lahi. ʻI heʻeku feohi mo iá, ʻoku ou feʻiloaki ai mo e kakai foʻou, ʻahiʻahiʻi e ngaahi meʻa foʻou, pea maʻu e fakaoli ʻi ha feituʻu pē naʻá ma ō ki ai. Ko e kaumeʻa mo Kolí kuó ne liliu moʻoni ʻeku moʻuí!”​—Tala.a

ʻOku ongo mātuʻaki faingataʻa ke maʻu ha faʻahinga kaumeʻa pehē? Kapau ko ia, ʻoua ʻe loto-siʻi. ʻOku takatakai ʻiate koe ʻa e faʻahinga ʻe malava ke hoko ko e ngaahi kaumeʻa. ʻE tokoniʻi koe ʻe he kupu ko ení ke ke ʻiloʻi kinautolu.

ʻOKU takatakaiʻi au ʻe ha ngaahi kaumeʻa ka ʻoku ʻikai te u maʻu ha kaumeʻa.’ Ko e anga ia e fakamatala ʻa e taʻu 21 ko Shayna ki he hokosia ʻo e nofo takai he kakai tokolahi kae ʻikai ongoʻi vāofi ʻi ha tuʻunga mo ha taha ʻo kinautolu. Ko e ongoʻi ko iá ʻe tautefito ʻene hoko lahi ʻi he lotolotonga ʻo e faʻahinga ko ia ʻoku nau ngāueʻaki ʻa e netiueka sōsialé. “ʻOku lava ke ke maʻu ha fuʻu ‘lisi ʻo e ngaahi kaumeʻá’ pea ʻoku hā manakoa mo tōtōatu,” ko e lau ia ʻa e taʻu 22 ko Serena, “ka ko hono moʻoní ko e lisi ko iá ʻoku fonu nai he ngaahi fetuʻutaki ʻoku ʻikai ke mahuʻinga.”b

Ko fē te ke saiʻia ange ke maʻú—ko e hingoa mo e tuʻasila ʻe laui ngeau pe ko ha ngaahi kaumeʻa moʻoni tokosiʻi? Neongo ʻoku fakatou ʻi ai hono lelei, ko ha kaumeʻa moʻoni ʻe lava ke ne tokoniʻi koe ʻi he ngaahi palopalemá pea aʻu ʻo fakalototoʻaʻi koe ke ke hoko ko ha tokotaha lelei ange. (1 Kolinitō 16:​17, 18) Ngāueʻaki e ngaahi meʻa tefito hokó ke tokoniʻi koe ke ke fakapapauʻi ai pe ko hai he lotolotonga ho ngaahi mahení ʻokú ne ʻosi fakahāhā nai ʻa e ngaahi ʻulungaanga ʻo ha kaumeʻa moʻoni.

KO HA KAUMEʻA MOʻONI ʻOKU ALAFALALAʻANGA

“Ko hoku kaumeʻá naʻá ne faʻa tala mai kiate au ʻene ngaahi fakapulipulí, pea koeʻuhi ko ia, naʻá ku fakakaukau ai ʻe lava ke u falala kiate ia ʻi heʻeku meʻa fakapulipulí. Ko ia ʻi he ʻaho ʻe taha naʻá ku tala ange ai kiate ia naʻá ku teʻiteʻia ʻi ha tamasiʻi. Tamani, ko ha fehālaaki moʻoni ē ko ia! Ko ʻene ʻalú atu pē ʻo talanoaʻi ia ki he niʻihi kehé!”​—Beverly.

“ʻOku lava ke u talanoa ki hoku kaumeʻa ko Alan ha meʻa pē, pea ʻoku ou ʻiloʻi heʻikai ʻalu takai holo ia ʻo talanoaʻi.”​—Calvin.

Ko hai ʻi he toʻutupu ʻi ʻolungá naʻe ʻi ai hono kaumeʻa moʻoní? Ko hai ʻi ho ngaahi kaumeʻá te ke ongoʻi fiemālie ke falala ki aí?c ʻOku pehē ʻe he Tohi Tapú “ko e kaumeʻa ʻoku ne ʻofa ʻi he taimi kotoa pe.”​—Palōveepi 17:17.

Tohiʻi ʻi lalo e hingoa ʻo e ongo kaumeʻa kuó ke ʻiloʻi ʻokú na alafalalaʻanga.

 1 ․․․․․

 2 ․․․․․

KO HA KAUMEʻA MOʻONI ʻOKU FEILAULAUʻI-KITA

“ʻI ha tuʻunga ʻi ha kaumeʻa pē, ʻoku mālohi ange ʻa e tokotaha ʻe taha ʻi he tokotaha kehé. Ko ha kaumeʻa moʻoni ʻokú ne ʻiloʻi ʻa e taimi ʻokú ke vaivai aí pea ʻokú ne fai leva ha meʻa ke tokoniʻi koe. Ko e moʻoni, ko e kaumeʻa ko iá ʻokú ne falala te ke fai ʻa e meʻa tatau ʻi he taimi ʻe fiemaʻu ai kiate ia ha tokoní.”​—Kellie.

“ʻI he taimi naʻe mate ai ʻeku faʻeé, naʻe ʻi ai hoku kaumeʻa foʻou. Naʻe teʻeki ai ke ma fuʻu vāofi, neongo ia naʻá ma palani ke ma ō ki ha mali. Ko e meʻa naʻe hokó, naʻe pau ke fai e ouau fakamanatu ʻo ʻeku faʻeé ʻi he ʻaho tatau naʻe fai ai ʻa e malí. ʻI heʻeku ʻohovalé, naʻe haʻu hoku kaumeʻá ki he ouau fakamanatú kae ʻikai ke ne ʻalu ki he malí. ʻI he mōmeniti ko iá, naʻá ku ʻiloʻi ai ko ha kaumeʻa moʻoni ia!”​—Lena.

Ko hai he lotolotonga ho ngaahi kaumeʻá ʻokú ne fakahāhā ha laumālie feilaulauʻi-kita? Ko ha kaumeʻa moʻoni te ne “hanganaki kumi, ʻo ʻikai ki he lelei pē ʻaʻaná, ka ki he lelei ʻa e tokotaha kehé.”​—1 Kolinitō 10:24.

Tohiʻi ʻi lalo e hingoa ʻo e ongo kaumeʻa kuó na fakahāhā ʻokú na feilaulauʻi-kita.

 1 ․․․․․

 2 ․․․․․

KO HA KAUMEʻA MOʻONI ʻOKÚ NE TOKONIʻI KOE KE KE HOKO KO HA TOKOTAHA LELEI ANGE

“ʻOku ʻamanekina ʻe he kakai ʻe niʻihi ke u mateaki kia kinautolu pe felotoi mo kinautolu neongo kapau ʻoku ʻuhinga iá ʻe fakangaloku ai hoku ʻulungaanga leleí pe fai ai ha meʻa ʻoku fepaki mo hoku konisēnisí. ʻOku ʻikai ko ha ngaahi kaumeʻa moʻoni ia.”​—Nadeine.

“Ko hoku tokouá ʻa hoku kaumeʻa moʻoní. ʻOkú ne teke au ke ʻoua te u fakafiefiemālie pea tokoniʻi au ke u anga-fakakaumeʻa. ʻOkú ne tala mai ʻa e moʻoní ʻo tatau ai pē kapau ʻoku ʻikai ko e meʻa ia ʻoku ou fiefanongo ki aí.”​—Amy.

“ʻI heʻeku fou he taimi faingataʻá, ko hoku ngaahi kaumeʻa lelei tahá ʻa e faʻahinga naʻe ʻikai te nau fakaoleoleʻi aú; naʻa nau ʻomai ha faleʻi faitotonu. Ko e niʻihi kehé naʻa nau tatali ke u fakaleleiʻi ʻa e meʻá pe feinga ke afeʻi ʻa ʻeku tokangá. Naʻe ʻikai te nau fakahaaʻi ʻoku ʻi ai ha meʻa naʻe hala.”​—Miki.

“ʻOku sio ʻa hoku kaumeʻá ki heʻeku malavá ʻo mahulu ʻi ha toe taha kehe, pea ʻokú ne fakaʻaiʻai au ke lavaʻi ʻa ʻeku ngaahi taumuʻá. ʻOkú ne faitotonu fakaʻaufuli kiate au ʻi he taimi ʻoku fiemaʻu ai ke ne fai peheé​—pea ʻoku ou saiʻia ai!”​—Elaine.

ʻOku tokoniʻi koe ʻe ho ngaahi kaumeʻá ke ke aʻusia hoʻo malavá, pe ʻoku fiemaʻu ke ke tuku hifo hoʻo ngaahi tuʻungá ke fetaulaki mo kinautolu? ʻOku pehē ʻi he Palōveepi 13:20: “Ko ia ʻoku fafale ki he kau poto, te ne hoko ko e poto: Ka ko ia ʻoku kaumeʻa mo e sesele ʻe hoko ko e lusa.”

Tohiʻi ʻi lalo e hingoa ʻo e ongo kaumeʻa kuó na tokoniʻi koe ke ke hoko ko ha tokotaha lelei ange.

 1 ․․․․․

 2 ․․․․․

Sio ki he ngaahi hingoa naʻá ke tohiʻi ʻi he konga ʻe tolu ʻi ʻolungá. Kapau ʻoku ʻasi ha hingoa ʻo ha tokotaha ʻi he konga kotoa ʻe tolú, ko ha kaumeʻa moʻoni ia! ʻI he tafaʻaki ʻe tahá, kapau ʻokú ke faingataʻaʻia ʻi hono fakakaukauʻi ha taha ʻoku feʻunga mo e meʻa tefito ʻi ʻolungá, ʻoua ʻe loto-siʻi. ʻE mātuʻaki lava lelei ke ke maʻu ha ngaahi kaumeʻa moʻoni takatakai ʻiate koe. ʻE fiemaʻu nai pē ha taimi lahi ange ke maʻu ai kinautolu.d Lolotonga iá, fai hoʻo lelei tahá ke hoko ko ha kaumeʻa lelei. “ʻOku ou feinga maʻu pē ke ʻi ai maʻa hoku ngaahi kaumeʻá,” ko e lau ia ʻa e taʻu 20 ko Elena. “ʻI he taimi ʻoku nau fiemaʻu ai ke fai ha meʻá, ʻoku ou tokoni. ʻI he taimi ʻoku nau fiemaʻu ai ke talanoá, ʻoku ou fanongo. ʻI he taimi ʻoku nau tangi aí, ʻoku ou fai ha poupou.”

Ko e moʻoni, ʻoku ʻi ai nai ho ngaahi maheni tokolahi, pea ʻoku lelei ange ia ʻi he kaumeʻa mo ha tokosiʻi pē. (2 Kolinitō 6:13) Kae ʻikai te ke toe saiʻia foki ke maʻu ha ngaahi kaumeʻa moʻoni tokosiʻi ʻa ia “naʻe fanauʻi maʻa ha faingataʻa”? (Palōveepi 17:17) “ʻOku lelei ke ʻiloʻi ha kakai tokolahi,” ko e lau ia ʻa e taʻu 20 ko Jean, “ka ʻoku hangē ia ko ha tautauʻanga vala ʻoku fonu he valá ʻa ia ʻoku ʻasi lelei mai mei he hengá ka ʻoku ʻikai ke feʻunga kotoa ʻiate koe. ʻOkú ke foki maʻu pē ki he ngaahi vala siʻi pē ʻokú ke ʻiloʻi ʻe hao ʻiate koé. Pea ko e meʻa pē ia ʻokú ke fai foki ki he ngaahi kaumeʻa ofí.”

[Fakamatala ʻi lalo]

[Puha ʻi he peesi 18]

FOUNGA KE MAʻU AI ʻA E KAUMEʻA MOʻONÍ

 1. Feinga ki he tuʻunga leleí, ʻikai ko e lahí. “ʻOku lelei ke ʻiloʻi ha kakai tokolahi, ka naʻa mo ha ʻi ha kulupu tokolahi, ʻokú ke hehema ke kumi ʻa e tokosiʻi ko ia ʻokú ke ongoʻi fiemālie taha aí.”​—Karen.

 2. Hoko ko ha kaumeʻa moʻoni. “ʻOku ou ʻamanekina ʻa e mateaki mo e falala mei hoku ngaahi kaumeʻá, ko ia ʻoku ou feinga ke fai kia kinautolu ʻa e meʻa tatau.”​—Evelyn.

 3. Fakahāhā ʻa e houngaʻia. “ʻI he taimi ʻoku ou houngaʻia ai ʻi he kaumeʻa mo ha taha, ʻoku ou ʻai ke nau ʻiloʻi ia ʻi hano ʻave ha kaati pe ko ha meʻaʻofa.”​—Kellie.

[Puha ʻi he peesi 18]

KO E HĀ ʻOKU ʻIKAI ʻEKE AI KI HOʻO ONGO MĀTUʻÁ?

ʻI he taimi naʻá mo ʻi hoku taʻú aí, ko e hā e hokosia naʻá mo maʻu ʻi he ngaahi kaumeʻá? Naʻe lavakiʻi kimoua ʻi ha taimi ʻe ha kaumeʻa? Kapau ko ia ko e hā naʻá mo ako mei he hokosiá? Ko hai ne fakamoʻoniʻi ko e ngaahi kaumeʻa mateakí, pea naʻe anga-fēfē hoʻomo ʻilo kinautolú?

[Puha ʻi he peesi 19]

MAKATUʻUNGA KI HE KAUMEʻÁ

Ko ha kaumeʻa lelei ʻoku langa ia ʻi he makatuʻunga ʻo e ngaahi tefitoʻi moʻoni tatau. ʻOku ʻuhinga iá ko ho kaumeʻá ʻoku kau ʻi hoʻo tuipau fakalaumālié, fakaeʻulungāngá mo fakaʻēfiká.

Ko e meʻa tefito hono hokó, ʻa e ngaahi anga tataú, ʻoku ʻikai loko mahuʻinga ia.

Pea ʻoku faʻa hoko, ko e ngaahi saiʻia meimei tataú ʻoku siʻi hono mahuʻingá. He ko ē, ʻe lava ke ke kaumeʻa mo ha taha ʻa ia ko ʻene ngaahi vaʻinga manakó mo e talēnití ʻoku kehe ia mei haʻaú.

Fakatokanga: Tokanga fekauʻaki mo e kaumeʻa ʻoku makatuʻunga he ngaahi saiʻia meimei tataú ʻataʻatā pē. Kapau ʻoku ʻikai kau e kaumeʻa ko iá ʻi hoʻo ngaahi tefitoʻi moʻoní, ngalingali ko e vahaʻangataé ʻe movete​—pe ko e kovi angé, te ne ʻai nai koe ke ke tō ki ha faingataʻa.

[Puha/Fakatātā ʻi he peesi 19]

MEʻA ʻOKU LEAʻAKI ʻE HO TOʻUMEʻÁ

“Kapau ʻoku fuʻu māʻolunga ʻa hoʻo ngaahi tuʻungá, heʻikai ke ʻi ai hao ngaahi kaumeʻa koeʻuhí te ke ʻamanekina e meʻa ʻoku fuʻu lahi mei he kakaí. Kapau ʻoku fuʻu māʻulalo hoʻo ngaahi tuʻungá, te ke tali ha faʻahinga taha pē​—pea ʻoku ʻikai ke lelei mo ia foki.”

“Ko e kakai ʻe niʻihi ʻi he netiueka sōsialé ʻoku hā ngali ʻoku nau tokanga lahi ange fekauʻaki mo e tokolahi ʻo e ngaahi kaumeʻa ʻoku nau fakahokohokó ʻi he vahaʻangatae ʻoku nau maʻu mo e ngaahi kaumeʻa ko iá. ʻI heʻene hoko mai ki he ngaahi kaumeʻá, ko e tuʻungá ʻoku lelei lahi ange ia ʻi he tokolahí.”

“ʻI he taimi ʻoku fai mai ai ʻe ha taha ha lau kiate au fekauʻaki mo hono ngaahi kaumeʻa kehé, ʻoku ou ʻiloʻi ʻokú ne leaʻaki nai foki e ngaahi meʻa fekauʻaki mo au kia kinautolu. ʻOku ʻai au ʻe he meʻa ko iá ke u hohaʻa. Ko ha kaumeʻa lelei ʻoku ʻikai ke lau.”

[Ngaahi fakatātā]

Dominique

Lianne

Brieanne