ʻOKU ʻEKE ʻE HE TOʻUTUPÚ

Te u tala?

“Naʻe mātuʻaki faingataʻa. Ko e tokotahá ni ko hoku kaumeʻa lelei ia.”— Sēmisi.a

“ʻI he ʻuluaki taimí, naʻe faingataʻa moʻoni. Naʻe ngaahi au ʻo hangē ha kehé koeʻuhi ko ʻeku talá.”—ʻAna.

ʻOKU pehē ʻe he Tohi Tapú: “Oku ai ae takaga [pe kaumeʻa] oku bikitai malohi hake i ha tokoua.” (Palovepi 18:24, PM) Kuó ke maʻu ha kaumeʻa pehē? Kapau ko ia, kuó ke maʻu ha meʻa mātuʻaki mahuʻinga ʻaupito.

Kae fēfē kapau ʻoku ʻi ai ha kaumeʻa ko ha Kalisitiane ia ka kuó ne tō ki ha faingataʻa? Hangē ko ení, fēfē kapau kuó ne kau ʻi he ʻulungāanga taʻetāú, ifí, inu kei taʻu siʻí, ngāuehalaʻaki ʻa e faitoʻo kona tapú, pe faihala mamafa kehe? (1 Kolinito 6:9, 10; 1 Timote 1:9, 10) Ko e hā ʻoku totonu ke ke faí? Te ke tala ange ki ho kaumeʻá ʻokú ke ʻiloʻi? Te ke tala ki hoʻo ongo mātuʻá? Te ke tala ki he ongo mātuʻa ho kaumeʻá? Te ke fakahā ia ki ha mātuʻa ʻi he fakatahaʻangá?b Kapau te ke tala, ko e hā ʻe hoko ki hoʻomo kaumeʻá? ʻE sai ange ke longo ai pē?

Tala pe ʻIkai?

ʻOku fai ʻe he tokotaha kotoa ʻa e ngaahi fehālaaki. ʻOku pehē foki ʻe he Tohi Tapú: “He kuo fai angahala kotoa pe, pea ʻoku ʻikai te nau aʻusia ʻa e hōifua ʻa e ʻOtua.” (Loma 3:23) Kae kehe, kuo kau ʻa e niʻihi ʻi he ngaahi angahala mamafa. Ko e niʻihi ia kuo nau fai ha “laka hala” pea kapau heʻikai ke fakatonutonu ʻe lava ke taki atu ki he palopalema lahi ange. (Kaletia 6:1, NW) Fakakaukau angé ki he fakatātā moʻoni ko eni ʻi he moʻuí.

◼ Ko ha finemui Kalisitiane ko hono hingoá ko Sūsana naʻá ne toki ʻiloʻi ko hono kaumeʻá, ko ha Kalisitiane foki mo ia, naʻe ʻi ai ʻene Uepisaiti ʻoku hā ai ʻa e ngaahi laʻitā langaʻi fehokotaki fakasino mo e ngaahi fasi taʻetaau.

◼Fakakaukau angé: Ko e hā te ke faí kapau ko Sūsana koe? Te ke fai ha meʻa ki ai? Pe te ke pehē ko e meʻa ko ia ʻoku ʻai ʻe ho kaumeʻá ki heʻene Uepisaití ko e meʻa pē ia ʻaʻana pea ʻoua ʻe kaunoa ai ha taha? Kapau naʻe ʻalu atu ʻa Sūsana kiate koe ʻo kole faleʻi, ko e hā te ke tala ange kiate iá?

․․․․․

Meʻa naʻe fili ʻe Sūsana ke ne faí: Hili ha fakakaukau ki he meʻa naʻe hokó, naʻe fakapapauʻi ʻe Sūsana ke talanoa mo e ongo mātuʻa ʻa hono kaumeʻá. “Naʻá ku ongoʻi papaka,” ko ʻene leá ia, “koeʻuhí ko hoku ongo kaumeʻa lelei foki kinaua. Naʻe mātuʻaki faingataʻa ke tala kia kinaua ʻo kamata ai ke u tangi.”

Ko e hā hoʻo fakakaukaú? Naʻe fai nai ʻe Sūsana ʻa e meʻa totonú? Pe naʻe mei sai ange ke ne longo ai pē?

Ke tokoniʻi koe ke ke fakaʻuhinga he meʻá ni, ko e meʻa ʻeni ʻe niʻihi ke fakakaukau ki ai:

Ko e hā ʻa e meʻa ʻe fai ʻe ha kaumeʻa moʻoni? ʻOku pehē ʻe he Palovepi 17:17: “Ko e kaumeʻa [moʻoni] ʻoku ne ʻofa ʻi he taimi kotoa pe; pea ko hoto moʻoni naʻe fanauʻi maʻa ha faingataʻa.” ʻI he tuli ha tokotaha ki ha ʻalunga ʻoku maumauʻi ai ʻa e ngaahi tefitoʻi moʻoni ʻa e Tohi Tapú, ʻokú ne tō ai ki he “faingataʻa” ʻo tatau ai pē pe ʻokú ne ʻiloʻi pe ʻikai. Lolotonga ko ha fehālaaki ia ke hoko ʻo “maʻoniʻoni fau” ʻaki hono ʻai ke mamafa ʻa e fanga kiʻi meʻa īkí, ko ha kaumeʻa moʻoni heʻikai fakakuikui ia mei he ʻulungāanga taʻefakakalisitiané. (Koheleti 7:16) Ko hono tukunoaʻi ʻa e meʻa peheé ʻoku ʻikai tonu ke ala tali ia.—Livitiko 5:1.

Fēfē kapau naʻe maliu ʻa e tuʻungá? ʻEke hifo: ‘Kapau ko ha mātuʻa au pea ko hoku fohá pe ʻofefiné naʻe ʻi ai haʻane Uepisaiti ʻoku ʻasi ai ha ngaahi ʻata langaʻi fehokotaki fakasino, te u loto ke u ʻilo ki ai? ʻE fēfē ʻeku ongoʻí kapau naʻe ʻi ai ha kaumeʻa ʻo hoku fohá pe ʻofefiné naʻá ne ʻiloʻi ʻa e meʻa naʻe hokó kae ʻikai te ne lea?’

Fēfē ʻa e ngaahi tuʻunga ʻa e ʻOtuá? Kapau ʻoku ʻi ai ha tuʻutuʻuni ʻe fiemaʻu ke muimui ki ai, ʻoku ʻikai ko ha taimi ia ke ngūngū tapu lea ai. ʻI hono kehé, ʻoku totonu ke ke pipiki ki he tuʻutuʻuni fakaeʻulungāanga ʻa e ʻOtuá hangē ko ia ʻoku hā ʻi he Tohi Tapú. Ko hono moʻoní, ʻi hoʻo tuʻu ki he meʻa ʻoku totonú, ʻokú ke ʻai ai ʻa e loto ʻo ho Tokotaha-Fakatupú ke fiefia. (Palovepi 27:11) Tānaki atu ki ai, ʻokú ke ongoʻi fiemālie ange ai koeʻuhí ʻokú ke ʻilo naʻá ke fai moʻoni ʻa e lelei taha maʻa ho kaumeʻá.—Isikeli 33:8.

“ʻAho ke Lea”

ʻOku pehē ʻe he Tohi Tapú ʻoku ʻi ai ʻa e “ʻaho ke silongo, mo e ʻaho ke lea.” (Koheleti 3:7) Ko e fānau iiki angé ʻoku ʻikai faʻa lava ke nau tala pe ko fē ʻa e ʻalunga ʻoku tāú ʻi ha tuʻunga pau. ʻI he fai ʻe ha kaumeʻa ha fehālaakí, ʻoku nau fakaʻuhinga: ‘ʻOku ʻikai te u loto ke hoko ha meʻa ki hoku kaumeʻá’ pe ‘ʻOku ʻikai te u loto ke ʻi ai haku vā mo hoku kaumeʻá.’ Kapau ko e ngaahi meʻa pē ia ke fakakaukau ki aí, ʻoku faingofua e fili ia ʻo e meʻa ke faí—ko e taimi eni ke “silongo” ai.

Kae kehe, ʻi hoʻo fuʻu lahi haké, te ke kamata vakai ai ki he meʻa peheé mo ha fakakaukau fakamatuʻotuʻa ange. ʻOkú ke lāuʻilo kuo ʻosi tō ʻa ho kaumeʻá ki he faingataʻa pea ʻokú ne fiemaʻu e tokoni—ko e tokoni ʻe lava nai ke ke fakahoko. Kae kehe, ko e ha ʻa e meʻa papau ʻe lava ke ke fai ʻo kapau te ke fanongo kuo kau hao kaumeʻa ʻi ha ʻulungāanga ʻoku maumauʻi ai ʻa e ngaahi lao pe tefitoʻi moʻoni ʻa e Tohi Tapú?

ʻUluakí, fakapapauʻi pe ko e meʻa naʻá ke fanongo aí ʻoku moʻoni. Mahalo pē nai ko ha talanoa loi pē ia ʻoku sasala holo. (Palovepi 14:15) ʻOku fakamatala ha taʻu hongofulu tupu ko Keiti ʻo pehē: “Naʻe ʻi ai haku kaumeʻa naʻá ne kamata tala ha ngaahi loi ʻo kau kiate au, pea ko e kakai naʻa mau vāofí naʻa nau fakakaukau ko e meʻa naʻá ne leaʻakí naʻe moʻoni. Naʻá ku manavasiʻi naʻa ʻikai ʻaupito toe tui mai ha taha kiate au!” Naʻe tomuʻa tala ʻe he Tohi Tapú ko Sīsuú heʻikai te ne “valoki o hage koe fanogo a hono teliga”—pe hangē ko ia ʻoku fakalea ʻe he Tohi Tapu Contemporary English Version, “heʻikai te ne . . . fanongo ki he ngaahi talanoa sasalá.” (Aisea 11:3, PM) Ko e hā ʻa e lēsoní? ʻOua ʻe fakamahalo vave ko e meʻa kotoa pē ʻokú ke fanongo aí ʻoku moʻoni. Feinga ke maʻu ʻa e moʻoni ʻo e talanoá. Fakakaukau angé ki ha meʻa naʻe hoko moʻoni ʻi he moʻuí.

◼ Ko Sēmisi, ʻa ia naʻe lave ki ai ʻi he kamataʻanga ʻo e kupú ni, naʻá ne fanongo ʻi hono ngāueʻaki ʻe hono kaumeʻa leleí ʻa e faitoʻo kona tapú ʻi ha paati.

Fakakaukau angé: Ko e hā te ke faí kapau ko Sēmisi koe? ʻE lava fēfē ke ke fakapapauʻi ko e meʻa naʻá ke fanongo aí ko e moʻoní ia?

․․․․․

Meʻa naʻe fili ʻe Sēmisi ke ne faí. ʻUluakí, naʻe fakangalingali ʻa Sēmisi naʻe ʻikai te ne fanongo pe ʻilo ha meʻa. “Naʻe kamata leva ke uesia au ʻe hoku konisēnisí,” ko ʻene leá ia. “Naʻá ku ʻilo naʻe pau ke u lea ki hoku kaumeʻá ʻo kau ki he meʻá ni.”

Ko e hā hoʻo fakakaukaú? Ko e hā nai e ngaahi ʻaongá kapau te ke ʻuluaki talanoa mo e tokotaha naʻe tukuakiʻi ʻokú ne fai ha ʻulungāanga taʻefakakalisitiané?

․․․․․

Kapau ʻoku faingataʻa kiate koe ke ke talanoa mo e tokotahá ʻo kau ki ai, ko e hā ha toe meʻa te ke fai?

․․․․․

Naʻe vetehia ʻa e kaumeʻa ʻo Sēmisí ko e moʻoni naʻá ne ngāueʻaki ʻa e faitoʻo kona tapú ʻi ha paati. Ka naʻá ne kōlenga leva kia Sēmisi ke ʻoua te ne tala ki ha taha. Naʻe loto ʻa Sēmisi ke ne fai ʻa e meʻa ʻoku totonú. Ka naʻá ne toe fiemaʻu foki hono kaumeʻá ke ne fai ʻa e meʻa ʻoku totonú. Ko ia naʻá ne tala ange ki hono kaumeʻá te ne tuku ange ʻa e uike ʻe taha ke ne fakahā ai ki he kau mātuʻa ʻi heʻene fakatahaʻangá. Kapau heʻikai te ne fai pehē, ʻe fakahā leva ia ʻe Sēmisi tonu.

ʻOkú ke fakakaukau naʻe ʻuhinga lelei ʻa e meʻa naʻe fai ʻe Sēmisí? Ko e hā ʻa e ʻuhinga ki hoʻo talí?

․․․․․

Naʻe ʻikai ʻalu ʻa e kaumeʻa ia ʻo Sēmisí ki he kau mātuʻá, ko ia naʻe fakahā ia ʻe Sēmisi. Kae kehe, naʻe toki fakakaukau lelei ki mui ai hono kaumeʻá. Naʻe tokoniʻi ia ʻe he kau mātuʻá ke ne mahinoʻi ʻa e fiemaʻu ke fakatomala pea ke toe maʻu hono vahaʻangatae maʻa mo Sihová.

ʻOkú Ke Ngutu Matalatala?

Ka te ke ʻeke nai: ‘ʻOku ou ngutu matalatala nai kapau te u tala? ʻIkai nai ʻe faingofua ange ke fakangalingali naʻe ʻikai te u ʻilo ha meʻa?’ Kapau naʻá ke ʻi ha tuʻunga pehē, ko e hā ʻe lava ke ke faí?

ʻUluakí, ʻai ke ke ʻiloʻi ko e meʻa faingofua ke faí ʻoku ʻikai ko e meʻa anga-ʻofá maʻu pē ia pea ko e meʻa anga-ʻofa ke faí ʻoku ʻikai faingofua maʻu pē ia. ʻOku fiemaʻu ʻa e loto-toʻa ke fakahā ai ʻa e faihala ha kaumeʻa. Fēfē ke ke lotu ki he ʻOtuá ʻo fekauʻaki mo ia! Kole ange kiate ia ki he poto mo e loto-toʻa ʻokú ke fiemaʻú. Te ne tokoniʻi koe.—Filipai 4:6.

Ko hono uá, fakakaukau angé ki he ʻaonga ki ho kaumeʻá ʻa hoʻo fakahā ʻa e meʻa naʻe hokó. Ke fakatātaaʻi, tau pehē pē ko koe eni mo ho kaumeʻá ʻokú mo lue ʻi ha tafaʻaki moʻunga māʻolunga pea fakafokifā pē ʻi he fehālaaki ʻene mangá, kuo humu ho kaumeʻá ʻo ne tō hifo ki ha tepuʻi maka ʻi lalo. ʻOku hā mahino ʻoku fiemaʻu tokoni ʻa ho kaumeʻá. Kae fēfē kapau te ne tala atu ʻi haʻane ongoʻi mā, ʻe sai ange ke ne feinga ʻiate ia pē ke ne kaka hake ʻi he tahake māʻolungá? Te ke tuku pē ke matuʻutāmaki ai ʻene moʻuí?

ʻOku meimei tatau ia mo e taimi ʻoku humu ai ha kaumeʻa mei he ʻalunga faka-Kalisitiané. ʻE ongoʻi nai ʻe he tokotaha ko iá ʻe lava pē ke ne toe ake fakalaumālie ʻo ʻikai ha tokoni. Ka ko e fakaʻuhinga fakavalevale ia. Ko e moʻoni, ʻe kiʻi ongoʻi mā nai ʻa ho kaumeʻá ʻi he meʻa naʻe hokó. Ka ko hoʻo ‘ui tokoní’ ʻe fakahaofi moʻoni ai ʻa e moʻui ʻa ho kaumeʻá!—Semisi 5:15.

Ko ia ai, ʻoua ʻe manavahē ke lea loto-toʻa kapau naʻe kau hao kaumeʻa ʻi ha faihala. ʻI hoʻo kumi tokoni ki he tokotaha ko iá, ʻokú ke fakahaaʻi ai ʻa e mateaki kia Sihova ko e ʻOtuá pea mo e mateaki ki ho kaumeʻá, ʻa ia ʻe ʻi ai nai e ʻaho te ne houngaʻia ai ʻi hoʻo tokoni anga-ʻofá.

[Fakamatala ʻi lalo]

KE FAKAKAUKAU KI AI

◼ ʻOku anga-fēfē ʻa e hoko hono fakahā e faihala ʻa ha kaumeʻa ko ha fakamoʻoni ia ʻo e mateaki ki ho kaumeʻá?

◼ Ko hai ʻa e faʻahinga ʻi he Tohi Tapú ʻoku lava ke ke fakakaukau ki ai naʻe ʻahiʻahiʻi ʻenau mateaki ki ha kaumeʻá? Ko e hā ʻoku lava ke ke ako meia kinautolú?

[Fakatātā ʻi he peesi 28]

Kapau kuo tō ha kaumeʻa mei he ʻalunga faka-Kalisitiané, ʻoku fiemaʻu ke ke fakapapauʻi ʻoku fai ki ai ha tokoni