Naʻe Lea ha ʻAsi

KUÓ KE fanongo ʻo kau ki ha ʻasi naʻe poto he leá? Mahalo te ke tali ʻo pehē: ‘ʻIkai. ʻOku ʻikai lava ke lea ʻa e fanga manú.’ Ka ʻoku fakahā ʻe he Tohitapú ʻo fekauʻaki mo e ʻasi naʻe lea. Tau vakai pe naʻe anga-fēfē ʻene hokó.

Naʻe mei mateuteu ʻa e kau ʻIsilelí ke nau hū atu ki he fonua ko Kēnaní. Naʻe ilifia ʻa Pēlaki, ko e tuʻi ʻo Mōapé, ʻi he kau ʻIsilelí. Ko ia naʻá ne fekau ki ha tangata poto ko Pēlami ke ne haʻu ʻo fakamalaʻiaʻi ʻa e kau ʻIsilelí. Naʻe talaʻofa ange ʻe Pēlaki kia Pēlami te ne ʻoange haʻane paʻanga lahi, ko ia naʻe heka leva ʻa Pēlami ki heʻene ʻasí peá ne fononga atu ke sio kia Pēlaki.

Naʻe ʻikai ke fiemaʻu ʻe Sihova ʻa Pēlami ke ne fakamalaʻiaʻi ʻEne kakaí. Ko ia naʻá ne fekau ha ʻāngelo ke tuʻu ʻi he halá mo ha heletā lōloa ʻo taʻofi ʻa Pēlami. Naʻe ʻikai lava ʻa Pēlami ʻo sio ki he ʻāngeló, ka naʻe sio ki ai ʻa ʻene ʻasí. Ko ia naʻe toutou feinga ʻa e ʻasí ke afe mei he ʻāngeló pea aʻu ʻo ne tokoto ʻi he halá. Naʻe ʻita lahi ʻa Pēlami ʻo ne tā ʻaki ʻa e vaʻakau ʻa e ʻasí.

Naʻe toki ʻai leva ʻe Sihova ʻa Pēlami ke fanongo ki he lea ʻa ʻene ʻasí kiate ia. Naʻe ʻeke ʻe he ʻasí: ‘Ko e hā kuó u fai kiate koe kuó ke taaʻi ai aú?’

Naʻe pehē ʻe Pēlami: ‘Kuó ke ʻai au ke hangē ha fuʻu valé. Kapau naʻe ʻi ai haʻaku heletā te u tāmateʻi koe!’

Naʻe ʻeke ʻe he ʻasí: ‘Kuó u fai pehe ni kiate koe ki muʻa?’

‘ʻIkai,’ ko e tali ia ʻa Pēlamí.

Naʻe ʻai leva ʻe Sihova ʻa Pēlami ke sio ki he ʻāngelo ʻoku tuʻu ʻi he loto halá mo e heletā. Naʻe pehē atu ʻe he ʻāngeló: ‘Ko e hā kuó ke tā ai hoʻo ʻasí? Kuó u haʻu ke taʻofi ho fonongá, koeʻuhi he ʻoku ʻikai totonu ke ke ʻalu ʻo fakamalaʻiaʻi ʻa ʻIsileli. Kapau naʻe ʻikai afe ʻa hoʻo ʻasí meiate au, naʻá ku mei taaʻi koe ke ke mate, ka heʻikai te u fai ha meʻa ki hoʻo ʻasí.’

Naʻe pehē ʻe Pēlami: ‘Kuó u faiangahala. Naʻe ʻikai te u ʻilo ʻokú ke tuʻu ʻi he halá.’ Naʻe fakaʻatā ʻe he ʻāngeló ʻa Pēlami ke ʻalu, pea ʻalu pē ʻa Pēlami ʻo sio kia Pēlaki. Naʻá ne kei feinga pē ke fakamalaʻiaʻi ʻa ʻIsileli, ka naʻe ʻai ia ʻe Sihova ke ne tāpuakiʻi ʻa ʻIsileli ʻo tuʻo tolu.