Naʻe Haʻu ʻa Sīsū ko e Tuʻi

ʻI HA taimi siʻi pē mei hono fakamoʻui ʻa e ongo kui moʻui kolekolé, naʻe aʻu mai ʻa Sīsū ki ha kiʻi kolo ofi ki Selusalema. Naʻá ne tala ki he toko ua ʻo ʻene kau ākongá: ‘Mo ō ki he koló pea te mo ʻilo ai ha kiʻi ʻuhikiʻi ʻasi. Vete ia pea ʻomai kiate au.’

ʻI hono ʻomai ʻa e ʻasí kiate iá, naʻe heka ki ai ʻa Sīsū. Pea naʻá ne heka ai ki Selusalema ʻoku ofi mai pē ia. ʻI heʻene ofi atu ki he koló, naʻe haʻu ha fuʻu kakai ke fakafetaulaki kiate ia. Ko e tokolahi taha ʻiate kinautolu naʻa nau vete honau ngaahi koté ʻo fola ʻi he halá. Ko ha niʻihi naʻa nau tutuʻu hifo ha ngaahi vaʻa paame mei he ngaahi fuʻu paame. Naʻa nau fola mo ia foki ʻi he halá mo nau kaila: ‘Ke tāpuakiʻi ʻe he ʻOtuá ʻa e tuʻi ʻoku haʻu ʻi he huafa ʻo Sihová!’

ʻI ʻIsileli ʻo e kuonga ko ē ko e ngaahi tuʻi foʻoú naʻa nau heka atu ki Selusalema ʻi ha kiʻi ʻasi ke fakahāhā kinautolu ki he kakaí. Ko e meʻa ia naʻe fai ʻe Sīsuú. Pea ko e kakai ko ʻení naʻa nau fakahāhā ʻa ʻenau loto ke hoko ʻa Sīsū ko honau tuʻí. Ka naʻe ʻikai ke fiemaʻu ia ʻe he kotoa ʻo e kakaí. ʻOku lava ke tau ʻilo ʻeni ʻi he meʻa naʻe hoko ʻi he ʻalu ʻa Sīsū ki he temipalé.

ʻI he temipalé naʻe fakamoʻui ai ʻe Sīsū ʻa e kakai ʻoku kui mo heke. ʻI he sio ʻa e fānau iikí ki he meʻa ko ʻení, naʻa nau kaila ʻo fakamālō kia Sīsū. Ka naʻe ʻai ʻe he meʻá ni ke ʻita ai ʻa e kau taulaʻeikí pea nau tala kia Sīsū: ‘ʻOkú ke fanongo ki he meʻa ʻoku leaʻaki ʻe he fānaú?’

Naʻe tali ange ʻe Sīsū: ‘ʻIo, ʻoku ou fanongo ki ai. Naʻe ʻikai te mou lau ʻi he Tohitapú ʻa ia ʻoku pehē ai: “ʻE ʻomai ʻe he ʻOtuá ʻa e fakamālō mei he ngutu ʻo e fānau iikí?”’ Ko ia naʻe hokohoko atu ʻe he fānaú ʻa e fai fakamālō ki he tuʻi ʻa e ʻOtuá.

ʻIkai ʻoku tau loto ke tau hangē ko e fānau ko iá? ʻE feinga nai ha kakai ʻe niʻihi ke taʻofi kitautolu mei haʻatau fakamatala ʻo kau ki he puleʻanga ʻo e ʻOtuá. Ka te tau hokohoko atu ʻa hono tala ki he niʻihi kehé ʻo kau ki he ngaahi meʻa fakaofo ʻe fai ʻe Sīsū maʻá e kakaí.

Naʻe teʻeki ai ke hoko ʻa e taimi kia Sīsū ke ne kamata ke pule ai ko ha tuʻí ʻi he taimi naʻá ne ʻi māmani aí. Ka ʻe hoko ʻeni ʻafē? Naʻe fieʻilo ki ai ʻa e kau ākonga ʻa Sīsuú. Te tau lau hoko mai ʻo kau ki he meʻá ni.