Ko e Talaʻofa ʻa Sēfitá

KUÓ KE ʻosi fai nai ha talaʻofa pea ki mui mai ai kuó ke faingataʻaʻia ke fakahoko ia? Naʻe hoko ʻo pehē ki he tangata ʻi he fakatātā ko ʻení, pea ko e ʻuhinga ia ʻoku fuʻu loto-mamahi aí. Ko e tangatá ni ko e fakamaau loto-toʻa ia ʻo ʻIsileli naʻe hingoa ko Sēfita.

Naʻe moʻui ʻa Sēfita ʻi he taimi naʻe ʻikai ke toe lotu ai ʻa e kau ʻIsilelí ia kia Sihova. Naʻa nau toe foki pē ʻo fai ʻa e meʻa naʻe kovi. Ko ia naʻe tuku ʻe Sihova ʻa e kakai ʻĀmoní ke nau fakamamahiʻi kinautolu. Naʻe ʻai ʻe he meʻá ni ʻa e kau ʻIsilelí ke nau tangi hake kia Sihova: ‘Kuo mau faiangahala kiate koe. Kātaki, fakahaofi kimautolu!’

Naʻe fakatomala ʻa e kakaí ʻi he ngaahi kovi naʻa nau faí. Naʻa nau fakahā ʻenau fakatomalá ʻaki ʻenau toe lotu kia Sihova. Ko ia ai, naʻe toe tokoniʻi kinautolu ʻe Sihova.

Naʻe fili ʻe he kakaí ʻa Sēfita ke ne tauʻi ʻa e kakai kovi ʻo ʻĀmoní. Naʻe fuʻu fiemaʻu ʻe Sēfita ke tokoniʻi ia ʻe Sihova ʻi he taú. Ko ia naʻá ne talaʻofa kia Sihova: ‘Kapau te ke tuku ke u ikuna ʻa e kau ʻĀmoní, te u ʻoatu kiate koe ʻa e ʻuluaki tokotaha ʻe haʻu mei hoku falé ke fakafetaulaki kiate au ʻi heʻeku foki mei he ikuná.’

Naʻe fanongo ʻa Sihova ki he talaʻofa ʻa Sēfitá, pea naʻá ne tokoniʻi ia ke ikuna. ʻI he foki mai ʻa Sēfita ki ʻapí, ʻokú ke ʻilo pe ko hai ʻa e ʻuluaki tokotaha naʻe haʻu ke fakafetaulaki kiate iá? Ko hono ʻofefiné, ʻa ia ko ʻene tama pē ia ʻe taha. Naʻe tangi ʻa Sēfita: ‘ʻOiauē, siʻoku ʻofefine! Kuó ke ʻomi ha mamahi lahi kiate au. Ka kuó u fai ha talaʻofa kia Sihova, pea heʻikai toe lava ke fakafoki ia.’

Naʻe ʻuluaki loto-mamahi foki ʻa e ʻofefine ʻo Sēfitá ʻi heʻene ʻilo ʻo fekauʻaki mo e talaʻofa naʻe faí. He ko hono ʻuhingá kuo pau ke ne mavahe mei heʻene tamaí mo hono ngaahi kaungāmeʻá. Ka te ne tauhi kia Sihova ʻi hono tāpanekale ʻi Sailó ʻi he toenga ʻo ʻene moʻuí. Ko ia naʻá ne tala ange ki heʻene tamaí: ‘Kapau naʻá ke fai ha talaʻofa kia Sihova, kuo pau ke ke tauhi ki ai.’

Ko ia naʻe ʻalu ʻa e ʻofefine ʻo Sēfitá ki Sailo, pea naʻá ne tauhi kia Sihova ʻi hono tāpanekalé he toenga ʻo ʻene moʻuí. Ko e ʻaho ʻe fā ʻi he taʻu kotoa pē naʻe ʻalu ʻa e kau fefine ʻIsilelí ʻo ʻaʻahi ki ai, pea mo maʻu ha taimi fakafiefia fakataha mo ia. Naʻe ʻofa ʻaupito ʻa e kakaí ʻi he ʻofefine ʻo Sēfitá koeʻuhi ko ʻene hoko ko e sevāniti lelei ʻa Sihova.