Naʻe Tolomakaʻi ʻa Sitīveni

KO E tangata ʻoku tūʻulutui ko ʻení ko Sitīveni ia. Ko ha ākonga angatonu ia ʻa Sīsū. Kae sio atu ki he meʻa ʻoku hoko kiate ia hení! Ko e kau tangata ko ʻení ʻoku nau toloʻaki ia ha ngaahi foʻi maka lalahi. Ko e hā ʻoku nau fehiʻa lahi pehē ai kia Sitīveni ʻo nau fai ai ʻa e meʻa fakalilifu ko ʻení? Tau sio ange.

Naʻe tokoniʻi ʻe he ʻOtuá ʻa Sitīveni ke fai ha ngaahi mana fakaofo. Naʻe ʻikai ke sai eni ki he kau tangata ko ʻení, ko ia naʻa nau fakafekiki mo ia ʻo fekauʻaki mo ʻene akoʻi ʻa e kakaí ki he moʻoní. Ka naʻe ʻoange ʻe he ʻOtuá ʻa e poto lahi kia Sitīveni, pea naʻe fakahā ai ʻe Sitīveni kuo akonakiʻaki ʻe he kau tangata ko ʻení ʻa e ngaahi meʻa loi. Naʻe ʻai ʻe he meʻá ni ke toe lahi ange ai ʻa ʻenau ʻitá. Ko ia naʻa nau puke ia pea ʻomai ʻa e kakai ke nau tala ʻa e ngaahi loi kau ʻo kiate ia.

Naʻe ʻeke ʻe he taulaʻeiki lahí kia Sitīveni: ‘ʻOku moʻoni ʻa e ngaahi meʻa ko ʻení?’ Naʻe tali ʻe Sitīveni ʻaki ʻene fai ha malanga lelei mei he Tohitapú. ʻI hono ngataʻangá, naʻá ne fakahā kiate kinautolu ʻa e fehiʻa ʻa e kau tangata kovi ʻi he kuo hilí ki he kau palōfita ʻa Sihová. Peá ne pehē: ‘ʻOku mou hangē tofu pē ko e kau tangata ko iá. Naʻa mou tāmateʻi ʻa e sevāniti ʻa e ʻOtuá ko Sīsū, pea kuo ʻikai te mou talangofua ki he ngaahi lao ʻa e ʻOtuá.’

Naʻe ʻai ʻe he meʻá ni ke ʻita lahi ʻaupito ʻa e kau taki lotú! Naʻa nau ʻūtaki honau nifó ʻi heʻenau ʻitá. Ka naʻe toki malanga hake ʻe Sitīveni hono ʻulú ʻo ne pehē: ‘Vakai! ʻOku ou sio kia Sīsū ʻoku tuʻu ʻi he toʻomataʻu ʻo e ʻOtuá ʻi hēvani.’ ʻI he meʻa ko ʻení, naʻe kuku ʻe he kau tangatá ni honau telingá pea nau ʻohofi ʻa Sitīveni. Naʻa nau puke ia ʻo toho ki he tuʻa koló.

Naʻa nau vete heni honau ngaahi koté ʻo ʻoange ki he tangata talavou ko Saula ke ne tokangaʻi. ʻOkú ke sio kia Saula? Pea naʻe kamata ʻa e niʻihi ʻo e kau tangatá ke tolomakaʻi ʻa Sitīveni. Naʻe tūʻulutui ʻa Sitīveni, ʻo hangē ko ia ʻokú ke sio ki aí, pea naʻá ne lotu ki he ʻOtuá: ‘ʻE Sihova, ʻoua te ke tautea kinautolu ki he meʻa ʻoku kovi ko ʻení.’ Naʻá ne ʻilo kuo kākaaʻi ʻe he kau taki lotú ʻa e niʻihi ʻo kinautolu. Pea hili iá naʻe mate leva ʻa Sitīveni.

ʻI ha fai ʻe ha tokotaha ha meʻa ʻoku kovi kiate koe, ʻokú ke feinga ke toe fai ha meʻa ʻoku kovi ko hono fetongi, pe kole ki he ʻOtuá ke fakalaveaʻi kinautolu? Naʻe ʻikai ko e meʻa ia naʻe fai ʻe Sitīveni pe ko Sīsuú. Naʻá na anga-ʻofa ʻo aʻu ki he faʻahinga naʻa nau taʻeʻofa kiate kinauá. Tau feinga ke faʻifaʻitaki kiate kinaua.