Ko ha ʻAmanaki Papau ki he Kau Maté

NAʻE tohi ha finemui taʻu 25 ʻo pehē: “ʻI he 1981 naʻe mate ai ʻa ʻeku faʻē naʻá ne pusiakiʻi aú ʻi he kanisā. Naʻe mātuʻaki faingataʻa ʻa ʻene maté kiate au pea mo hoku tuongaʻane pusiakí. Naʻá ku taʻu 17, pea taʻu 11 ʻa hoku tuongaʻané. Naʻá ku ʻofa lahi ʻaupito ki heʻeku faʻeé ni. ʻI hano akoʻi kiate au ʻo pehē kuó ne ʻi hēvaní, naʻá ku loto leva ke u taonakita koeʻuhi ke u ʻalu kiate ia. He ko hoku kaumeʻa lelei tahá ia.”

ʻOku hā ngali mātuʻaki taʻetotonu ʻa hono maʻu ʻe he maté ʻa e mālohi ke ne toʻo atu ha taha ʻokú ke ʻofa ai. Pea ʻi he taimi ʻoku hoko ai iá, ʻoku mātuʻaki faingataʻa lahi ʻaupito ke fuesia ʻa e fakakaukau atu ki he ʻikai ʻaupito ke toe malava ke talanoa atu ki he tokotaha naʻá te ʻofa aí, mo kata fakataha mo ia, pe puke mai ia. ʻOku ʻikai lava ke toʻo atu ʻa e mamahi ko iá ʻe he tala mai ʻo pehē ʻoku ʻi hēvani ʻa e tokotaha naʻá ke ʻofa aí.

Kae kehe, ʻoku fokotuʻu mai ʻe he Tohitapú ia ha ʻamanaki mātuʻaki kehe ʻaupito. Hangē ko ia naʻa tau lave ki ai ki muʻá, ʻoku fakahaaʻi mai ʻe he Tohitapú ʻoku malava ke toe feohi mo e tokotaha mate naʻá ke ʻofa aí ʻi he kahaʻu vave maí ni, ʻo ʻikai ʻi ha hēvani taʻeʻiloa ka ʻi heni tonu ʻi he māmaní ʻi he malumalu ʻo e ngaahi tuʻunga melino mo māʻoniʻoni. Pea ʻi he aʻu ki he taimi ko iá ʻe maʻu ai ʻe he faʻahinga ʻo e tangatá ʻa e ʻamanaki ko e moʻuilelei haohaoa, pea heʻikai ʻaupito te nau toe mate. ʻE pehē nai ʻe ha niʻihi: ‘Ka ʻoku pau ko ha fakaʻamu pē ia!’

Ko e hā te ne ʻai koe ke ke tuipau ko ha ʻamanaki papau ʻeni ia? Ke tui ki ha talaʻofa, ʻe fiemaʻu kiate koe ke ke fakapapauʻi ko e tokotaha ʻokú ne fai ʻa e talaʻofá ʻokú ne fakatou loto-lelei mo malava ke ne fakahoko ia. Ko ia, ko hai ʻa e tokotaha kuó ne talaʻofa mai ʻe toetuʻu ʻa e kau maté?

ʻI he faʻahitaʻu kamata ke māfana ʻo e 31 T.S., naʻe talaʻofa lototoʻa ai ʻa Sīsū Kalaisi ʻo pehē: “He hange ā ʻoku fokotuʻu ʻe he Tamai ʻa e kau pekia, mo ne ngaohi ke moʻui; pehe foki mo e ʻAlo, ʻoku ne ngaohi ke moʻui ʻa kinautolu ʻoku ne loto ki ai. ʻOua te mou ofo ʻi he meʻa ko ia: he ʻoku ʻunu mai ha taimi, ʻa ia ʻe fanongo ai ki hono [Sīsū] leʻo ʻe he kakai kotoa pe ʻoku ʻi he ngaahi faʻitoka, pea te nau ʻalu atu mei ai.” (Sione 5:​21, 28, 29) ʻIo, naʻe talaʻofa ʻe Sīsū Kalaisi ʻo pehē ko e laui miliona ʻoku nau lolotonga mate he taimi ní te nau toe moʻui mai ʻi he māmani ko ʻení pea maʻu ʻa e ʻamanaki ko e nofo ai ʻo taʻengata ʻi he malumalu ʻo e ngaahi tuʻunga melino mo faka-Palataisi. (Luke 23:43; Sione 3:16; 17:3; fakafehoanaki mo Sāme 37:29 mo Mātiu 5:5.) Koeʻuhi ko Sīsū naʻá ne fai ʻa e talaʻofá ni, ʻoku pau ke tau fakakaukau atu ʻokú ne loto-lelei ke fakahoko ia. Ka te ne malava ke fai ia?

Siʻi hifo ʻi he taʻu ʻe ua ʻi he hili ʻa ʻene fai ʻa e talaʻofa ko iá, naʻe fakahāhaaʻi ai ʻe Sīsū ʻi ha founga mālohi ʻokú ne fakatou loto-lelei mo malava ke ne fakahoko ʻa e toetuʻú.

Naʻe hoko ha meʻa fakaueʻi-loto moʻoni. Naʻe puke lahi ʻaupito ʻa Lasalosi. Ko hono ongo tuofefiné, ko Mele mo Māʻata, naʻá na fai ha fekau kia Sīsū, ʻa ia naʻá ne ʻi he kauvai ʻe taha ʻo e Vaitafe Sioataní: “ʻEiki, ke ke meaʻi ko e siana ʻoku ke ʻofa ai ʻoku puke.” (Sione 11:3) Naʻá na ʻilo naʻe ʻofa ʻa Sīsū ʻia Lasalosi. ʻIkai ʻe fie sio ʻa Sīsū ki hono kaumeʻa kuo puké? Ka ko e meʻa faikehé, naʻe ʻikai te ne ʻalu leva ki Pētani, ka naʻe nofo pē ʻa Sīsū ʻi he feituʻu naʻá ne ʻi aí ʻi he ʻaho ʻe ua hono hokó.​—Sione 11:5, 6.

Naʻe mate ʻa Lasalosi ʻi he hili pē ha taimi siʻi mei hono ʻoatu ʻa e pōpoaki ʻo kau ki heʻene puké. Naʻe ʻilo ʻe Sīsū ʻa e taimi naʻe mate ai ʻa Lasalosí, pea naʻá ne fakakaukau leva ke fai ha meʻa ʻo fekauʻaki mo e meʻá ni. ʻI he taimi naʻe toki aʻu mai ai ʻa Sīsū ki Pētaní, ne ʻosi ʻa e ʻaho ia ʻe fā mei he mate ʻa hono kaumeʻa ʻofeiná ni. (Sione 11:​17, 39) Naʻe malava ʻe Sīsū ke toe fakafoki mai ke moʻui ha taha kuó ne mate ʻi he vahaʻa taimi lōloa ko iá?

ʻI he fanongo ʻo fekauʻaki mo e haʻu ʻa Sīsuú, naʻe lele leva ʻa Māʻata, he ko e fefine longomoʻui, ke fakafetaulaki kiate ia. (Fakafehoanaki mo Luke 10:​38-42.) ʻI he ongo kia Sīsū ʻa e loto-mamahi ʻa Māʻatá, naʻá ne fakapapauʻi ange kiate ia: “ʻE toetuʻu ho tuongaʻane.” ʻI hono fakahaaʻi ʻe Māʻata ʻa ʻene tui ki ha toetuʻu ʻi he kahaʻú, naʻe tala mahino ange ʻe Sīsū kiate ia: “Ko au pē ko e Toetuʻu, pea mo e Moʻui: ko ia ʻoku tui pikitai kiate au, ne ongo kuo pekia, ka te ne moʻui pē.”​—Sione 11:​20-25.

ʻI he aʻu ʻa Sīsū ki he fonualotó, naʻá ne fekau atu leva ke toʻo ʻa e fuʻu maka naʻe tāpuniʻiʻaki ʻa e hūʻangá. Pea ʻi he hili ʻa ʻene lotu leʻo lahi, naʻá ne fekau atu leva: “Lasalosi, tuʻu mai kituʻa”!​—Sione 11:​38-43.

Naʻe sio fakamamaʻu ʻa e faʻahinga kotoa pē naʻe ʻi aí ki he fonualotó. Ko ia, naʻe ʻasi mai leva mei he kaupōʻulí ha tokotaha. Ko hono ongo vaʻé mo hono ongo nimá naʻe kei haʻiʻaki ha ngaahi noʻo, pea ko hono fofongá naʻe takaiʻaki ha konga tupenu. Naʻe fekau atu leva ʻa Sīsū: “Vete ia, pea tukuange ke ne ʻalu.” Naʻe tō hifo ki he kelekelé ʻa e noʻo fakamuimui naʻe tāvaniʻaki iá. ʻIo, tā ko Lasalosi, ko e tangata naʻá ne mate ʻo ʻosi ʻa e ʻaho ʻe faá!​—Sione 11:44.

Ko e fakamatala ʻo fekauʻaki mo hono fokotuʻu hake ʻo Lasalosi mei he maté ʻoku fakahaaʻi ia ʻi he Kōsipeli ʻa Sioné ko ha meʻa moʻoni naʻe hoko ʻi he hisitōliá. ʻOku maeʻeeʻa lelei ʻa e fakamatala fakaikiiki ki aí ke lau ia ko ha talanoa fakatātā pē. Ko hano fehuʻia ʻa e hoko moʻoni ʻa e meʻá ni ʻi he hisitōliá ko hano toe fehuʻia ai pē ia ʻo e ngaahi mana kotoa ʻi he Tohitapú, ʻo kau ai ʻa e toetuʻu ʻa Sīsū Kalaisí tonu. Pea ko hano fakaʻikaiʻi ʻa e toetuʻu ʻa Sīsuú ko hano fakaʻikaiʻi ai pē ia ʻa e tui fakalūkufua ʻa e Kalisitiané.​—1 Kolinito 15:​13-15.

Ko hono moʻoní, kapau ʻokú ke tui ʻoku ʻi ai ʻa e ʻOtua, ʻoku totonu ke ʻoua ʻe ʻi ai haʻo palopalema ʻo fekauʻaki mo e tui ki he toetuʻú. Ke fakatātā ʻaki ʻeni: ʻOku malava ke hiki ʻi ha foʻi tepi vitiō ʻa hono lau ʻe ha taha ʻa ʻene tohi tuku fakalao, pea ʻi he hili ʻene maté, ʻoku malava ʻa hono ngaahi kāingá mo hono ngaahi kaumeʻá ke nau sio mo fanongo kiate ia tonu, ki heʻene fakamatala ʻo fekauʻaki mo e meʻa ʻe fai ki hono konga ʻapí. ʻI he taʻu ʻe teau kuo maliu atú, naʻe ʻikai fai ha fakakaukau ai ki hono fai ha hiki vitiō pehē. Pea ki he kakai ʻe niʻihi ʻoku nau lolotonga moʻui ʻi he ngaahi feituʻu mamaʻo ʻo e māmaní, ʻoku kei mamaʻo mei heʻenau fakakaukaú ʻanautolu ʻa hono ngāueʻaki fakatekinolosia ʻo e hiki vitioó pea ʻoku hangē ia ha mana kiate kinautolú. Kapau ʻoku malava ʻa e ngaahi tefitoʻi moʻoni fakasaienisi naʻe fokotuʻu ʻe he Tokotaha-Fakatupú ke ngāueʻaki ʻe he faʻahinga ʻo e tangatá ki hano toe faʻu ha faʻahinga meʻa hā mai mo malava ke fanongo ki ai, ʻikai ʻoku totonu ke malava ʻe he Tokotaha-Fakatupú ke fai ha meʻa ʻoku toe lahi ange? Ko ia, ʻikai ʻoku ʻuhinga lelei, ke pehē ko e Tokotaha naʻá ne fakatupu ʻa e moʻuí ʻoku malava ke ne toe fakatupu mai ia?

Naʻe hoko ʻa e mana ko eni fekauʻaki mo hono toe fokotuʻu mai ʻo Lasalosi ke moʻuí ʻo tupulekina ai ʻa e tui kia Sīsū pea mo e toetuʻú. (Sione 11:​41, 42; 12:​9-11, 17-19) ʻI ha founga fakaueʻi-loto, ʻoku toe fakahaaʻi ʻe he meʻa ko iá ʻa e holi mālohi ʻa Sihova mo hono ʻAló ke fakahoko ʻa e toetuʻú.

Ko e meʻa naʻe fai ʻe Sīsū ʻi he mate ʻa Lasalosí ʻoku hā mei ai ʻa e ʻofa uʻuuʻu ʻa e ʻAlo ʻo e ʻOtuá. ʻOku fakahaaʻi mahino ʻe heʻene ngaahi ongoʻi loloto ʻi he meʻa ko ení ʻa ʻene holi mālohi ke fokotuʻu ʻa e kau maté. ʻOku tau lau: “Bea kuo aluage a Mele ki he botu oku i ai a Jisu, o ne mamata ki ai, bea tomabee ia ki hono vaʻe, o ne behe kiate ia, Eiki, ka ne ke i heni, behe, ne ikai mate hoku tuogaane. Bea i he mamata a Jisu kiate ia oku tagi, bea tagi foki moe kakai Jiu nae haʻu mo ia, bea toʻe ia i he laumalie, bea mamahi ia, O ne pehe, Kuo mou tuku ife ia? Bea nau tala kiate ia, Eiki, haʻu o mamata. Bea tagi a Jisu. Bea lea ai ae kau Jiu, Vakai ki hono lahi o ene ofa kiate ia”!​—Sione 11:​32-36, PM.

Ko e ongoʻi kaungāmamahi mei he loto ʻo Sīsuú naʻe fakahāhā ia heni ʻi he ngaahi kupuʻi lea ʻe tolu: “toʻe,” “bea mamahi,” “bea tangi.” Ko e ngaahi foʻi lea ʻi he tupuʻilea naʻe ngāueʻaki ʻi hono hiki ʻa e meʻa fakaueʻi-loto ko ʻení ʻoku fakahaaʻi ai naʻe mātuʻaki ueʻi loloto ʻa Sīsū ʻe he mate ʻa hono kaumeʻa ʻofeina ko Lasalosí pea ʻi heʻene mamata ki he tangi ʻa e tuofefine ʻo Lasalosí naʻe tō loʻimata mo Ia.a

Ko e meʻa ʻoku taau ke fakatokangaʻi hení naʻe ʻosi fakahoko ʻe Sīsū ia ki muʻa hano fokotuʻu mei he maté ha ongo meʻa ʻe toko ua. Pea naʻá ne ʻosi fakaangaanga ke fai ʻa e meʻa tatau kia Lasalosi. (Sione 11:​11, 23, 25) Ka neongo ia, naʻá ne “tangi.” Ko ia, ko hono toe fokotuʻu mai ʻa e faʻahinga ʻo e tangatá ke moʻuí, ʻoku ʻikai ko ha meʻa pē kia Sīsū naʻe pau ke ne fai. ʻI he meʻa ko ʻení ʻoku fakahaaʻi mahino ai ko ʻene manavaʻofa mo ʻene ngaahi ongoʻi loloto ʻa ʻene holi mālohi ke toʻo atu ʻa e fakaʻauha ʻa e maté.

Koeʻuhi ko Sīsū ‘ko e ʻimisi moʻoni ia ʻo Sihova tonu ko e ʻOtuá,’ ʻoku totonu ke tau ʻamanekina ʻa e meʻa tatau mei heʻetau Tamai fakahēvaní. (Hepelu 1:3) ʻI he fekauʻaki mo e loto-lelei ʻa Sihova tonu ke fakahoko ʻa e toetuʻú, naʻe pehē ʻe he tangata anga-tonu ko Siopé: “Ka pekia ha tangata, te ne toe moʻui koa? . . . Te ke toki ui, pea te u tali atu ʻe au: ʻE kavea ho finangalo ki he fitaʻa ʻa ho nima.” (Siope 14:​14, 15, fakaʻītali ʻamautolu.) Ko e tupuʻilea ʻoku ngāueʻaki heni ʻo pehē “ʻe kavea ho finangalo,” ʻokú ne fakahaaʻi ʻa e fakaʻamu mo e holi fakamātoato ʻa e ʻOtuá. (Senesi 31:30; Sāme 84:2) ʻOku hā mahino, ʻoku fakatuʻotuʻa vēkeveke atu ʻa Sihova ki he toetuʻú.

ʻE lava ke tau tui moʻoni ki he talaʻofa fekauʻaki mo e toetuʻú? ʻIo, ʻoku ʻikai toe ʻi ai ha veiveiua ko Sihova mo hono ʻAló ʻokú na fakatou loto-lelei ke fai ia mo malava ke na fakahoko ia. Ko e hā hono ʻuhinga ʻo e meʻá ni kiate koé? ʻOkú ke maʻu ʻa e ʻamanaki ke toe feohi mo e faʻahinga ʻofeina kuo nau maté ʻi heni ʻi he māmaní kae ʻi ha ngaahi tuʻunga mātuʻaki kehekehe ia mei he ngaahi tuʻunga ʻi he taimi ní!

Ko Sihova ko e ʻOtuá, ʻa ia naʻá ne ʻai ke kamata ʻa e moʻui ʻa e faʻahinga ʻo e tangatá ʻi ha ngoue fakaʻofoʻofa, kuó ne talaʻofa ke toe fakafoki mai ʻa e Palataisi ʻi he māmaní ʻi he malumalu ʻo e pule ʻa Hono Puleʻanga fakahēvaní ʻi he toʻukupu ʻo Sīsū Kalaisi kuo fakalāngilangiʻi he taimi ní. (Senesi 2:​7-9; Mātiu 6:10; Luke 23:​42, 43) ʻI he Palataisi ko ia ʻe toe fakafoki maí, ʻe maʻu ai ʻe he fāmili ʻo e tangatá ʻa e ʻamanaki ko e moʻui fiefia ʻo taʻengata, ʻo ʻataʻatā mei he ngaahi mahaki kotoa mo e puké. (Fakahā 21:​1-4; fakafehoanaki mo Siope 33:25; Aisea 35:​5-7.) ʻE mole atu foki ʻa e taaufehiʻa kotoa pē, taaufehiʻa fakamatakali, fakamālohi fakamatakali, mo e faingataʻaʻia fakaʻekonōmiká. ʻE hanga ʻe Sihova ko e ʻOtuá ʻo fakafou ʻia Sīsū Kalaisi ʻa hono fokotuʻu hake ʻa e kau maté ki ha māmani kuo ʻosi fakamaʻa pehē.

Ko e ʻamanaki ia he taimí ni ʻoku maʻu ʻe he fefine Kalisitiane naʻe lave ki ai ʻi he kamataʻanga ʻo e konga ko ʻení. ʻI he hili ha ngaahi taʻu mei he mate ʻa ʻene faʻeé, naʻe tokoniʻi ia ʻe he Kau Fakamoʻoni ʻa Sihová ke ne fai ha ako fakalelei ʻo e Tohitapú. ʻOkú ne fakamanatuʻi ʻo pehē: “ʻI he hili ʻa e ako ʻo kau ki he ʻamanaki ʻo e toetuʻú, naʻá ku tangi. Naʻe hoko ko ha meʻa fakaofo moʻoni ia ke u ʻilo ʻe lava ke u toe sio ki heʻeku faʻeé.”

Kapau ʻoku fakaʻamu pehē ho lotó ke toe sio ki ha taha naʻá ke ʻofa ai, ʻe fiefia ʻa e Kau Fakamoʻoni ʻa Sihová ke nau tokoniʻi koe ke ke ako ki he founga ʻe lava ke ke fakapapauʻi ai kiate koe ʻa e ʻamanaki papau ko ʻení.