ʻI he Founga Fē ʻOku Malava ke Tokoni Ai ʻa e Niʻihi Kehé?

“KAPAU ʻoku ʻi ai ha meʻa ʻe lava ke u fai, tala mai ke u ʻiloʻi.” Ko e meʻa eni ʻoku leaʻaki ʻe he tokolahi ʻo kitautolu ki ha kaumeʻa pe kāinga ko ʻene toki hoko ia kiate ia ha loto-mamahi ʻi he mole atu ʻa ha taha. ʻOku tau loto-moʻoni ki he lea ko ia ʻoku tau faí. Te tau fai ha meʻa pē ke tokoni ai. Ka ʻoku ui mai ʻa e tokotaha loto-mamahí kiate kitautolu peá ne pehē: “Kuó u fakakaukau ki ha meʻa ʻe lava ke ke tokoni mai ai kiate au”? ʻOku ʻikai ke faʻa pehē. ʻOku hā mahino, ʻoku fiemaʻu nai kiate kitautolu ke tau tomuʻa fai ʻe kitautolu ha meʻa ʻo kapau ʻoku tau fiemaʻu moʻoni ke tokoni mo fakafiemālieʻi ʻa e tokotaha ʻoku loto-mamahí.

ʻOku pehē ʻe he tohi palōvepi ʻi he Tohitapú: “Koni apele koula ʻi he ainga siliva, ko e lea ia ʻoku tautaungamalie hono leaʻaki.” (Palovepi 15:23; 25:11) Ko e poto ia ʻa hono ʻiloʻi ʻo e meʻa ke leaʻakí mo e meʻa ke ʻoua ʻe leaʻakí, ʻa e meʻa ke faí mo e meʻa ke ʻoua ʻe faí. Ko e niʻihi ʻeni ʻo e ngaahi fokotuʻu mei he Tohitapú kuo ʻilo ʻe he faʻahinga loto-mamahi ʻe niʻihi ko ha tokoni lahi ia.

Fanongo: Ke “vave ʻa e tangata fuape he fanongo,” ko e lau ia ʻa e Semisi 1:19. Ko e taha ʻo e ngaahi meʻa ʻoku tokoni lahi taha ʻa ia ʻe lava ke ke faí ko hoʻo kaungāmamahi mo e tokotaha loto-mamahí ʻaki hoʻo fanongo. ʻOku fiemaʻu nai ki he faʻahinga loto-mamahi ʻe niʻihi ke nau talanoa ʻo kau ki he tokotaha naʻa nau ʻofa ai ka kuo maté, ke talanoa ʻo kau ki he fakatuʻutāmaki pe ko e mahaki naʻe tupu mei ai ʻene maté, pe fekauʻaki mo ʻenau ngaahi ongoʻi koeʻuhi ko e maté. ʻEke leva: “Te ke saiʻia ke talanoa ʻo kau ki he meʻa ko iá?” Tuku ke fai ʻenau filí. ʻI he manatu ʻa ha tangata kei talavou ki he taimi naʻe mate ai ʻa ʻene tamaí, naʻá ne pehē: “Naʻe tokoni moʻoni kiate au ʻa hono ʻeke mai ʻe he niʻihi kehé ʻa e meʻa naʻe hokó pea nau fanongo moʻoní.” Fanongo anga-kātaki mo kaungāongoʻi ʻo ʻoua ʻe fakakaukau kuo pau ke ke ʻoatu ha ngaahi tali pe ko ha ngaahi fakaleleiʻanga. Tuku kiate kinautolu ke nau leaʻaki ha meʻa pē ʻoku nau loto ki aí.

Fakahā pau ha meʻa ke fakafiemālieʻiʻaki: Fakafiemālieʻi kinautolu ʻo pehē naʻa nau fai ʻa e meʻa kotoa pē naʻa nau malavá (pe ko ha meʻa kehe pē ʻokú ke ʻilo ʻoku moʻoni mo pau). Fakafiemālieʻi kinautolu ko e meʻa ʻoku nau ongoʻí​—ko e mamahí, ʻitá, halaiá, pe ko ha toe ngaahi ongo kehe​—ʻoku ʻikai nai ko ha meʻa foʻou ia. Tala ange ʻa e niʻihi kehe ʻokú ke ʻilo naʻa nau toe maʻu ʻa e ongoʻi lelei ʻi he mole atu meimei tatau pē. Ko e “ngaahi lea ʻofa” peheé ko ha “faitoʻo ki hoto ngaahi hui,” ko e lau ia ʻa e Palovepi 16:24.​—1 Tesalonaika 5:​11, 14.

Mateuteu ke tokoni: ʻAi ke ke mateuteu ke tokoni, ʻo ʻikai ʻi he ʻuluaki ngaahi ʻahó pē ʻi he kei tokolahi ai ʻa e ngaahi kaumeʻá mo e ngaahi kāingá, ka naʻa mo e ngaahi māhina ki mui ʻi he mātuku atu ʻa e niʻihi kehé ʻo taki taha fai ʻenau ngaahi meʻa ʻoku nau anga ki aí. Te ke fakamoʻoniʻi ai ʻi he foungá ni ko koé ‘ko ha kaumeʻa moʻoni,’ ko e faʻahinga kaumeʻa ʻoku poupou ʻi ha taimi ʻo e “faingataʻa” ʻa hono kaumeʻá. (Palovepi 17:17) Ko e fakamatala ʻeni ʻa Teresea ʻa ia naʻe mate ʻa ʻene kiʻi tamá ʻi ha fakatuʻutāmaki ʻa ha motokā: “Naʻe fakapapauʻi ʻe homa ngaahi kaumeʻá kuo ʻosi fokotuʻutuʻu ha ngaahi meʻa ke ma fai ʻi he ngaahi efiafí koeʻuhi ke ʻoua te ma fakamoleki ha fuʻu taimi lahi ʻi he nofo fakaumiuminoa pē ʻi homa ʻapí. Naʻe tokoni ia kiate kimaua ke ma fekuki ai mo e ongoʻi ʻo e mole atu naʻá ma maʻú.” ʻI he hili ha ngaahi taʻu mei ai, ʻi he aʻu ki he ngaahi ʻaho ʻoku fakamanatu fakataʻú, ʻo hangē ko e fakamanatu fakataʻu ʻo e ʻaho malí pe ko e ʻaho ʻo e maté, ko e taimi fakamamahi ia ki he faʻahinga ʻoku kei moʻuí. Ko e hā ʻoku ʻikai ke fakaʻilongaʻi ai ʻa e ngaahi ʻaho peheé ʻi hoʻo tohi māhiná koeʻuhi ʻi he taimi ʻe aʻu ai ki he ʻaho ko iá ʻi he taʻú, te ke mateuteu ke fai ha tokoni, kapau ʻoku fiemaʻu, ha poupou fiekaungāmamahi?

Tomuʻa fai ʻe koe ha meʻa ʻoku feʻungamālié: ʻOku ʻi ai ha ngaahi fekau ʻoku fiemaʻu ke fai? ʻOku fiemaʻu ha taha ke ne tokangaʻi ʻa e fānaú? ʻOku fiemaʻu ha feituʻu ke nofo ai ʻa e ngaahi kaumeʻa mo e ngaahi kāinga ʻoku ʻaʻahi maí? Ki muí ni mai, ʻoku faʻa moʻutāfuʻua lahi ʻa e faʻahinga ʻoku loto-mamahí ʻo aʻu ʻo ʻikai te nau ʻilo ʻa e meʻa ʻoku fiemaʻu ke nau faí, ko ia ai, ʻoku ʻikai te nau lava ʻo fakahā ki he niʻihi kehé ʻa e founga ʻe lava ke nau tokoni mai nai aí. Ko ia kapau ʻokú ke ʻiloʻi ha fiemaʻu moʻoni, ʻoua te ke tatali pē ke toki kole atu ke fai ia; tomuʻa fai ʻe koe ʻa e meʻa ko iá. (1 Kolinito 10:24; fakafehoanaki mo 1 Sione 3:​17, 18.) ʻOku manatuʻi ʻe ha fefine ʻe taha ʻa ia naʻe mate ʻa hono husepānití: “Naʻe pehē mai ʻe he tokolahi, ‘Kapau ʻoku ʻi ai ha meʻa ʻe lava ke u fai, tala mai ia ke u ʻilo.’ Ka naʻe ʻi ai ha kaumeʻa ʻe taha naʻe ʻikai te ne ʻeke mai ʻe ia ha meʻa. Naʻe hū pē ʻa e fefiné ni ia ki he loki mohé, ʻo ʻaʻau mai ʻa e moheʻangá, pea fō ʻa e ngaahi tupenu naʻe ʻuli mei heʻene maté. Naʻe maʻu ʻe ha fefine ʻe taha ha kane, mo e vai, pea mo ha naunau fakamaʻa peá ne olo ʻa e meʻa naʻe lua ai ʻa hoku husepānití. ʻI he hili ha ngaahi uike siʻi mei ai, naʻe haʻu ha taha ʻo e kau mātuʻa ʻi he fakatahaʻangá ʻokú ne ʻosi vala ngāue mai mo haʻane ngaahi meʻangāue peá ne pehē, ‘ʻOku ou ʻilo ʻoku pau pē ʻoku ʻi ai ha meʻa ʻoku fiemaʻu ke ngaahi fakaleleiʻi. Ko e hā ʻa e meʻa ko iá?’ He meʻa ʻofeina moʻoni ko e tangata ko iá ki hoku lotó ʻi heʻene ngaohi ʻa e matapā naʻe tautau fakaheihei ʻaki pē ha foʻi hinisi ʻe taha peá ne ngaohi mo ha meʻa fakaʻuhila!”​—Fakafehoanaki mo Semisi 1:27.

Ke anga-ʻofa ʻi he tali kakaí: “ʻOua te mou loto ngalongalo he fakaafe ʻāunofo,” ko e fakamanatu ia ʻoku fai mai ʻe he Tohitapú kiate kitautolu. (Hepelu 13:2) ʻOku totonu ke tau manatuʻi ke tau anga-ʻofa ʻi he tali kakaí ʻo tautefito ki he faʻahinga ʻoku nau loto-mamahí. ʻI he ʻikai ko ha fakaafe ke “haʻu ʻi ha faʻahinga taimi pē,” fokotuʻu ha ʻaho mo ha taimi ki ai. Kapau ʻe ʻikai te nau tali, ʻoua ʻe foʻi vave leva. ʻOku fiemaʻu nai ha fakalototoʻa fakaalaala. Mahalo ʻoku ʻikai te nau tali ʻa hoʻo fakaafé koeʻuhi ʻoku nau manavasiʻi naʻa ʻikai te nau lava ʻo mapuleʻi ʻa ʻenau ongoʻi mamahí ʻi he haʻohaʻonga ʻo ha niʻihi kehe. Pe ʻoku nau ongoʻi halaia nai ke kau fiefia ki he kai mo ha feohi ʻi ha taimi pehē. Manatuʻi ʻa e fefine anga-ʻofa ʻi he tali kakaí ko Litia ʻoku lave ki ai ʻi he Tohitapú. ʻI he hili haʻane fai ha fakaafe ki hono ʻapí, ʻoku pehē ʻe Luke, “Pea ne puketuʻu kimautolu.”​—Ngāue 16:15.

Ke anga-kātaki mo maʻu ʻa e mahinó: ʻOua ʻe hoko ʻo fuʻu ʻohovale ʻi he meʻa ʻe leaʻaki nai ʻe ha faʻahinga ʻoku loto-mamahi. Manatuʻi, ʻoku nau ongoʻi ʻita mo ongoʻi halaia nai. Kapau ʻoku fakahā fakahangatonu atu kiate koe ʻa e anga ʻo ʻenau ongoʻí, ʻe hā mai ʻokú ke maʻu ʻa e mahino mo e anga-kātakí ʻi he ʻikai te ke fai ha tali ʻita ki he meʻa ko iá. ʻOku fokotuʻu mai ʻe he Tohitapú: “ʻO mou ʻai; ʻa e fatu ʻoku langa ʻi he fai meesi mo e angaʻofa mo e fakaʻakiʻakimui mo e angakataki mo e angamokomoko.”​—Kolose 3:​12, 13.

Fai ha tohi: ʻOku faʻa ngalo ʻa e mahuʻinga ʻo ha tohi ʻoku fakahā ai ʻa e lea fakafiemālié pe ko ha kaati fiekaungāmamahi. Ko e hā hono leleí? Ko e tali ʻeni ʻa Cindy, ʻa ia naʻe mole atu ʻa ʻene faʻeé ʻi he kanisā: “Naʻe tohi mai ʻe ha kaumeʻa ʻe taha ha tohi lelei ʻaupito kiate au. Naʻe tokoni moʻoni ʻa e tohi ko iá koeʻuhi he naʻe malava ke u toutou lau ia.” Ko ha tohi pe ko ha kaati fakalototoʻa pehē ʻoku malava ke faʻuʻaki ha “ngaahi lea jii be,” ka ʻoku totonu ke ne fakahaaʻi atu ho lotó. (Hepelu 13:​22, PM) ʻOku lava ke fakahaaʻi ʻe he tohi ko iá ʻokú ke tokaʻi pea ʻikai ngata aí ka ʻokú ke kau ʻi ha manatu makehe ʻo fekauʻaki mo e tokotaha kuo maté, pe ʻoku malava ke fakahaaʻi ai ʻoku ongo ki hoʻo moʻuí ʻa e tokotaha kuo maté.

Lotu fakataha mo kinautolu: ʻOua naʻa fakasiʻisiʻi ʻa e mahuʻinga ʻo hoʻo ngaahi lotu fakataha mo e faʻahinga ʻoku loto-mamahí pe ko e lotu maʻanautolu. ʻOku pehē ʻe he Tohitapú: “Ko e lotu fakamātoato ʻa e tangata maʻoniʻoni ʻoku ʻaonga lahi.” (Semisi 5:16) Ko e fakatātaá, ʻi heʻenau fanongo ʻokú ke lotu maʻanautolú ʻoku tokoniʻi ai kinautolu ke fakasiʻisiʻi hifo ai ʻenau ongoʻi halaiá.​—Fakafehoanaki mo Semisi 5:​13-15.

ʻOua ʻe fakamamaʻo koeʻuhi ko e ʻikai te ke ʻiloʻi ʻa e meʻa ke leaʻaki pe faí: Te tau pehē hifo nai kiate kitautolu: ‘ʻOku ou tuipau ʻoku fiemaʻu ke nau nofo ʻiate kinautolu pē.’ Ka mahalo pē ko hono moʻoní ʻoku tau fakamamaʻo koeʻuhi ʻoku tau manavasiʻi naʻa tau leaʻaki pe te tau fai ha meʻa ʻoku hala. Kae kehe, ko e fakamamaʻo ʻa e ngaahi kaumeʻá, ngaahi kāingá, pe kaungātuí ko e meʻa pē ʻoku hoko aí ʻokú ne ʻai ʻa e tokotaha loto-mamahí ke ne ongoʻi tuēnoa ange, ʻo toe tānaki atu ia ki hono mamahí. Manatuʻi, ko e ngaahi lea mo e ngaahi ngāue anga-ʻofa lahi tahá ʻoku faʻa hoko ia ko e ngaahi meʻa faingofua lahi taha. (Efeso 4:32) ʻOku malava ke hoko ʻa hoʻo ʻi aí pē ko ha matavai ia ʻo e fakalototoʻa. (Fakafehoanaki mo Ngāue 28:15.) ʻI he manatu ʻa Teresea ki he ʻaho naʻe mate ai ʻa ʻene taʻahiné, ʻokú ne pehē: “ʻI ha houa pē ʻe taha, naʻe fonu ai ʻa e loki hūʻanga ʻo e falemahakí ʻi homau ngaahi kaumeʻá; ko e kotoa ʻo e kau mātuʻá pea mo honau ngaahi uaifí naʻa nau ʻi ai. Ko e niʻihi ʻo e kau fefiné naʻe kei fāʻū hake pē honau ʻulú koeʻuhi naʻe ʻikai ha taimi ke ʻai fakalelei ai, pea ko e niʻihi naʻa nau kei vala ngāue pē. Naʻa nau tuku ʻa e meʻa naʻa nau lolotonga faí pea nau haʻu leva. Naʻe tala mai ʻe he tokolahi ʻo kinautolu kiate kimaua ʻoku ʻikai te nau ʻilo ha meʻa ke nau leaʻaki, ka naʻe ʻikai ko e meʻa mahuʻingá ia koeʻuhi ko e meʻa naʻe mahuʻingá ʻa ʻenau ʻi aí.”

ʻOua ʻe vivili kiate kinautolu ke taʻofi ʻenau loto-​mamahí: Te tau loto nai ke tau lea ʻo pehē: ‘Tuku ā, tuku ā ʻa e tangí.’ Ka ʻoku lelei ange nai ke tuku pē ke ne tangi. Ko e lau ʻeni ʻa Katherine, ʻa ia naʻá ne fakakaukau atu ki he mate ʻa hono husepānití: “ʻOku ou fakakaukau ʻoku mahuʻinga ke tuku pē ʻa e faʻahinga ʻoku loto-mamahí ke nau fakahāhā ʻa e anga ʻo ʻenau ongoʻí pea nau tukuange atu ia.” Talitekeʻi ʻa e hehema ke tala ki he niʻihi kehé pe ʻoku totonu ke fēfē ʻenau ongoʻí. Pea ʻoua ʻe fakakaukau ʻo pehē kuo pau ke ke fūfuuʻi ʻa hoʻo ngaahi ongoʻí koeʻuhi ʻi hono fai iá te ke maluʻi ai ʻenau ongoʻí. Ka, ʻoku poupouʻi mai ʻe he Tohitapú ke “tangi mo kinautolu ʻoku tangi.”​—Loma 12:15.

ʻOua ʻe fakavave ke faleʻi kinautolu ke liʻaki atu ʻa e vala pe ngaahi meʻa kehe fakafoʻituitui ʻa e tokotaha kuo maté ki muʻa ke nau loto ki aí: ʻOku tau fakakaukau nai ʻe lelei ange kiate kinautolu ke nau liʻaki atu ʻa e ngaahi meʻa ʻokú ne langaʻi ʻa e manatú koeʻuhi he ʻe fakafuoloaʻi atu nai ai ʻa e loto-mamahí. Ka heʻikai nai ke ngāueʻaki ia heni ʻa e lea ko ia ʻoku pehē, “ʻI he ʻikai ke sio ki aí heʻikai ke fakakaukau ki ai.” ʻOku fiemaʻu nai ki he tokotaha loto-mamahí ke ne tukuange māmālie atu ʻa e tokotaha kuo maté. Manatuʻi ʻa e fakamatala ʻa e Tohitapú ʻo fekauʻaki mo e anga ʻo e ongoʻi ʻa e pēteliake ko Sēkopé ʻi hono tohoaki ia ke ne tui ne tāmateʻi ʻe ha manu fekai ʻa hono kiʻi foha ko Siosifá. ʻI he hili ʻa hono fakaʻaliʻali kia Sēkope ʻa e kofu ʻo Siosifa ne papani ai ʻa e totó, naʻá ne “tengihia hono foha ʻo ʻaho lahi. Pea naʻe tutuʻu kotoa pe hono ngaahi foha mo hono ngaahi ʻofefine ke fakafiemalie ki ai: ka naʻe ʻikai te ne tali ʻenau fakafiemalie.”​—Senesi 37:​31-35.

ʻOua ʻe pehē, ‘ʻE lava pē ke ke toe maʻu mai ha pēpē ʻe taha’: “Naʻá ku ongoʻi ʻita ʻi he kakai naʻa nau tala mai kiate au te u toe malava pē ke maʻu ha toe tama ʻe taha,” ko e fakamatala ia ʻa ha faʻē ʻa ia naʻe mole atu haʻane tama ʻi he maté. Naʻa nau ʻuhinga lelei pē nai, ka ki he mātuʻa ʻoku loto-mamahí, ko e ngaahi lea ʻo pehē ko e tama kuo molé ʻoku malava ke toe fetongi mai pē iá, ʻoku hangē ia hano ‘hokohokaʻi ʻaki ha heletā.’ (Palovepi 12:18) ʻOku ʻikai ʻaupito malava ke fetongi mai ʻe ha kiʻi tama ʻe taha ha kiʻi tama ʻe taha. Ko e hā hono ʻuhingá? Koeʻuhi ʻoku ʻikai hano tatau ʻo e tokotaha taki taha.

ʻOua ʻe fakaʻehiʻehi mei he lave ʻo kau ki he tokotaha kuo mole atú: “Ko e kakai tokolahi naʻe ʻikai te nau lave ki he hingoa ʻo ʻeku tama ko Jimmy pe talanoa ʻo kau kiate ia,” ko e fakamatala ia ʻa ha faʻē ʻe taha. “Kuo pau ke u tala tonu atu naʻá ku kiʻi ongoʻi mamahi ʻi he ʻikai lave ʻa e niʻihi kehé ʻo kau ki heʻeku tamasiʻí.” Ko ia, ʻoua ʻe liliu ʻa e meʻa ʻoku fai ki ai ʻa e talanoá ʻi he taimi ʻoku lave ai ki he hingoa ʻo e tokotaha kuo maté. ʻEke ki he tokotaha loto-mamahí pe ʻokú ne fiemaʻu ke fai ha talanoa ʻo kau ki he tokotaha naʻá ne ʻofa aí. (Fakafehoanaki mo Siope 1:​18, 19 mo e 10:1.) ʻOku houngaʻia ʻa e faʻahinga loto-mamahi ʻe niʻihi ʻi heʻenau fanongo ki he ngaahi kaumeʻá ʻoku nau leaʻaki ha ngaahi ʻulungaanga makehe naʻe fakatupu ʻofeina ai kiate kinautolu ʻa e tokotaha kuo mole atú.​—Fakafehoanaki mo Ngāue 9:​36-39.

ʻOua ʻe fakavave ke lea ʻo pehē, ‘Ne sai ange pē ā ʻene maté’: Ko e feinga ko ia ke fakahā hano lelei ʻo e maté ʻoku ʻikai hoko maʻu pē ia ʻo ne ‘fakafiemālieʻi ʻa e loto-siʻi’ ʻoku loto-mamahí. (1 Tesalonaika 5:14) ʻI he manatu ʻa ha taʻahine ki he mate ʻa ʻene faʻeé, naʻá ne pehē: “Naʻe pehē mai ʻe he niʻihi, ‘ʻOku ʻikai te ne kei faingataʻaʻia’ pe, ‘Kuó ne toka ʻi he melino.’ Ka naʻe ʻikai te u saiʻia ke fanongo ki he lea ko iá.” ʻOku fakataumuʻa nai ʻa e ngaahi lea pehē ki he faʻahinga ʻoku kei moʻuí ke pehē ʻoku ʻikai totonu ke nau kei ongoʻi mamahi pe ʻoku ʻikai ko ha meʻa lahi ʻa e mole atu ʻa e tokotaha ko iá. Kae kehe, ʻoku ongoʻi nai ʻe he faʻahingá ni ʻoku nau mātuʻaki mamahi koeʻuhi he ʻoku nau manatu moʻoni ki he tokotaha naʻa nau ʻofa aí.

ʻOku lelei ange nai ke ʻoua ʻe pehē, ‘ʻOku ou ʻilo pē ʻa e anga ʻo hoʻo ongoʻí’: ʻOkú ke ʻiloʻi moʻoni ia? Ko e fakatātaá, ʻoku malava ke ke ʻilo ʻa e anga ʻo e ongoʻi ʻa ha taha ʻo e ongo mātuʻá ʻi he mate ʻa ha kiʻi tama kapau kuo teʻeki ai ke ke hokosia ʻe koe ha mole atu pehē? Pea kapau kuó ke hokosia ia, ʻai ke ke ʻiloʻi ʻoku ʻikai nai ke tatau tofu pē ʻa e ongoʻi ʻa e niʻihi kehé mo e anga ʻo e ongoʻi naʻá ke maʻú. (Fakafehoanaki mo Tangilaulau 1:12.) ʻI he tafaʻaki ʻe tahá, kapau ʻoku hā ngali feʻungamālie, ʻoku lelei nai ke ke fakahā ʻa e founga naʻá ke toe maʻu ai ha tuʻunga lelei ʻo e ongoʻí ʻi he hili ʻa e mole atu ʻa ha tokotaha naʻá ke ʻofa ai. Ko ha fefine ʻe taha ʻa ia naʻe mate ʻa ʻene taʻahiné naʻá ne maʻu ha fakafiemālie ʻi he taimi naʻe talanoa ange ai ha faʻē ʻa ha taʻahine ʻe taha naʻe mate ʻo kau ki he founga naʻá ne toe maʻu ai ʻa e tuʻunga totonu ʻi heʻene moʻuí. Naʻe pehē ʻe he fefiné: “Naʻe ʻikai ke kamataʻaki ʻe he faʻē ʻa e taʻahine naʻe maté ʻa ʻene talanoá ʻo pehē ‘ʻOku ou ʻilo pē ʻa e anga ʻo hoʻo ongoʻí.’ Naʻá ne tala mai pē kiate au ʻa e anga ʻo e ngaahi meʻa naʻe hoko kiate iá peá ne tuku mai pē ke u sio ki hono kaunga kiate aú.”

ʻOku fiemaʻu ʻa e kaungāmamahi, ʻiloʻilo, mo e ʻofa lahi meiate koe ʻi hono fai ha tokoni ki ha tokotaha ʻoku loto-mamahi. ʻOua te ke tatali ke toki haʻu kiate koe ʻa e tokotaha ʻoku loto-mamahí. ʻOua te ke pehē pē, “Kapau ʻoku ʻi ai ha meʻa te u ala fai . . . ” Kumi koe ki “ha meʻa” pehē, pea ke tomuʻa fai ʻe koe ha meʻa ʻoku feʻungamālie ke faí.

Ko e ngaahi fehuʻi ʻoku kei toé: Fēfē ʻa e ʻamanaki ʻi he Tohitapú ʻoku fekauʻaki mo e toetuʻú? Ko e hā hono ʻuhinga ia kiate koe pea mo e tokotaha naʻá ke ʻofa ai ka kuo maté? ʻOku lava fēfē ke tau fakapapauʻi ko ha ʻamanaki alafalalaʻanga ia?