ʻOua ʻAupito Te Ke Hoko ko ha Kaihaʻa!

KUO kaihaʻasi ʻe ha taha ha meʻa meia koe ʻi ha taimi?— Naʻe fēfē hoʻo ongoʻí?— Ko hai pē naʻá ne kaihaʻasi iá ko ha tokotaha kaihaʻa, pea ʻoku ʻikai ha taha ʻe saiʻia ʻi ha tokotaha kaihaʻa. ʻOku anga-fēfē hoʻo fakakaukau ki he hoko ʻa ha taha ko ha kaihaʻa? ʻOku fanauʻi mai ia ʻoku pehē?—

Naʻá ta toki ako eni ʻoku fanauʻi mai ʻa e kakaí mo e angahala. Ko ia, ko kitautolu kotoa ʻoku tau taʻehaohaoa. Ka ʻoku ʻikai ha taha ʻe fanauʻi mai ko ha kaihaʻa. ʻE haʻu nai ha tokotaha kaihaʻa mei ha fāmili lelei. Ko ʻene ongo mātuʻá, ko hono fanga tokouá mo hono fanga tuofāfiné ʻoku nau faitotonu nai. Ka ko e holi ʻa ha taha ki he ngaahi meʻa hangē ko e paʻangá mo e meʻa ʻe lava ke fakatau mai ʻe he paʻangá ʻe fakatupunga nai ai ia ke ne hoko ko ha kaihaʻa.

Ko hai te ke pehē naʻe hoko ko e ʻuluaki kaihaʻá?— Ta fakakaukau angé ki aí. Naʻe ʻiloʻi ʻe he Faiako Lahí ʻa e tokotaha ko iá ʻi he taimi naʻe ʻi hēvani aí. Ko e tokotaha kaihaʻa ko iá ko ha ʻāngelo. Ka koeʻuhi naʻe ngaohi ʻe he ʻOtuá ʻa e kau ʻāngelo kotoa pē ke haohaoa, naʻe anga-fēfē ʻa e hoko ʻa e ʻāngelo ko iá ko ha kaihaʻá?— Sai, hangē ko ia naʻá ta ako ʻi he Vahe 8 ʻo e tohí ni, naʻá ne fiemaʻu ha meʻa naʻe ʻikai ʻaʻana. ʻOkú ke manatuʻi ko e hā ia?—

ʻI he hili hono fakatupu ʻe he ʻOtuá ʻa e ʻuluaki tangatá mo e fefiné, naʻe fiemaʻu ʻe he ʻāngelo ko iá ke na lotu ange ki ai. Naʻe ʻikai haʻane totonu ki heʻena lotú. Ko ʻena lotú ko e meʻa ia ʻa e ʻOtuá. Ka naʻá ne kaihaʻasi ia! ʻI hono ʻai ʻa ʻĀtama mo ʻIvi ke na lotu ange ki aí, naʻe hoko ai ʻa e ʻāngelo ko iá ko ha kaihaʻa. Naʻá ne hoko ko Sētane ko e Tēvoló.

Ko e hā ʻa e meʻa ʻokú ne ʻai ha taha ke hoko ko ha kaihaʻá?— Ko ha holi ki he meʻa ʻoku ʻikai ʻaʻaná. Ko e holi ko ení ʻe lava ke hoko ʻo mālohi ʻaupito ʻo malava ai ke ne ʻai naʻa mo e kakai leleí ke nau fai ʻa e ngaahi meʻa ʻoku koví. ʻI he taimi ʻe niʻihi, ko e kakai ko ia ʻoku hoko ko e kau kaihaʻá ʻoku ʻikai ʻaupito te nau toe liliu ʻo fai ʻa e meʻa ʻoku leleí. Ko e taha ʻo kinautolu ko ha ʻapositolo ʻa Sīsū. Ko hono hingoá ko Siutasi ʻIsikaliote.

Naʻe ʻiloʻi ʻe Siutasi ʻoku hala ke kaihaʻa koeʻuhí he naʻe ʻosi akoʻi ia ki he Lao ʻa e ʻOtuá ʻo talu mei heʻene kei siʻí. Naʻá ne ʻilo naʻe aʻu ʻo lea hifo ʻa e ʻOtuá mei hēvani ʻi ha taimi ʻo tala ki hono kakaí: “ʻOua naʻa ke kaihaʻa.” (Ekisoto 20:15) ʻI he taimi naʻe tupu hake ai ʻa Siutasí, naʻá ne fetaulaki mo e Faiako Lahí peá ne hoko ko ha taha ʻo ʻene kau ākongá. Ki mui ai, naʻe aʻu ʻo fili ʻe Sīsū ʻa Siutasi ke hoko ko e taha ʻo ʻene kau ʻapositolo ʻe toko 12.

Ko Sīsū mo ʻene kau ʻapositoló naʻa nau fononga fakataha holo. Naʻa nau kai fakataha ʻenau meʻakaí. Pea ko e paʻanga kotoa naʻa nau maʻú naʻe tauhi ia ʻi ha puha. Naʻe ʻoange ʻe Sīsū ʻa e puha ko iá kia Siutasi ke ne tokangaʻi. ʻOku moʻoni, naʻe ʻikai ko e paʻanga ia ʻa Siutasi. Ka ʻokú ke ʻilo ʻa e meʻa naʻe fai ʻe Siutasí ʻi he hili ha taimi nounou mei ai?—

Naʻe kamata ke toʻo ʻe Siutasi ha paʻanga mei he puhá ʻi he taimi naʻe ʻikai totonu ai ke ne fai peheé. Naʻá ne toʻo ia ʻi he taimi naʻe ʻikai ke sio atu ai ʻa e niʻihi kehé, pea naʻe aʻu ʻo ne feinga ke maʻu ha ngaahi founga ke maʻu ai ha paʻanga lahi ange. Naʻe kamata ke ne fakakaukau ki he paʻangá ʻi he taimi kotoa pē. Ta sio ki he meʻa naʻe iku ki ai ʻa e holi fehālaaki ko ení ʻi he ngaahi ʻaho siʻi pē ki muʻa pea tāmateʻi ʻa e Faiako Lahí.

Ko Melé, ko ha tuofefine ʻo e kaumeʻa ʻo Sīsū ko Lāsalosí, naʻá ne ʻave ha lolo lelei ʻaupito ʻo ne lilingi ia ʻi he vaʻe ʻo Sīsuú. Ka naʻe lāunga ʻa Siutasi ia. ʻOkú ke ʻilo ʻa hono ʻuhingá?— Naʻá ne pehē, koeʻuhí naʻe totonu ke fakatau atu ʻa e loló pea foaki ʻa e paʻanga ko iá ki he kakai masivá. Ka naʻá ne fiemaʻu moʻoni ke lahi ange ʻa e paʻanga ʻi he puhá koeʻuhí ke ne kaihaʻasi ia.—Sione 12:​1-6.

Naʻe tala ange ʻe Sīsū kia Siutasi ke ʻoua ʻe fakatupu palopalema kia Mele, ʻa ia naʻá ne anga-lelei ʻaupitó. Naʻe ʻikai ke saiʻia ʻa Siutasi ʻi hono tala ange ʻe Sīsū ʻa e meʻa ko iá kiate iá, ko ia naʻá ne ʻalu ki he kau taulaʻeiki lahí, ʻa ia ko e ngaahi fili kinautolu ʻo Sīsuú. Naʻa nau loto ke puke ʻa Sīsū, ka naʻa nau fiemaʻu ke fai ia ʻi he poʻulí koeʻuhi ke ʻoua ʻe sio atu ʻa e kakaí kia kinautolu.

Naʻe tala ange ʻe Siutasi ki he kau taulaʻeikí: ‘Te u tala atu kia kimoutolu ʻa e founga ʻe lava ke mou puke ai ʻa Sīsuú ʻo kapau te mou ʻomi kiate au ha paʻanga. Ko e fiha te mou ʻomaí?’

‘Te mau ʻoatu kia koe ʻa e konga siliva ʻe tolunoa,’ ko e tali ia ʻa e kau taulaʻeikí.—Mātiu 26:​14-16.

Naʻe toʻo ʻe Siutasi ʻa e paʻangá. Naʻe hangē pē ia haʻane fakatau atu ʻa e Faiako Lahí ki he kau tangata ko iá! ʻE lava ke ke fakakaukau atu ki ha taha ʻokú ne fai ha fuʻu meʻa kovi pehē?— Sai, ko e faʻahinga meʻa ia ʻoku hoko ʻi he taimi ʻoku hoko ai ha taha ko ha kaihaʻa pea kaihaʻa paʻangá. ʻOku ʻofa ia ʻi he paʻangá ʻo lahi ange ʻi heʻene ʻofa ʻi he kakai kehé ʻo aʻu ki he ʻOtuá.

Mahalo te ke pehē, ‘ʻE ʻikai ʻaupito te u ʻofa ʻi ha meʻa ʻo laka hake ʻi heʻeku ʻofa kia Sihova ko e ʻOtuá.’ Ko e meʻa lelei ʻa hoʻo ongoʻi peheé. ʻI he taimi naʻe fili ai ʻe Sīsū ʻa Siutasi ko ha ʻapositoló, ngalingali ko e anga ia ʻo e ongoʻi ʻa Siutasí. Ko e niʻihi naʻa nau hoko ko e kau kaihaʻá naʻa nau ongoʻi pehē nai mo kinautolu foki. Ta talanoa angé ʻo fekauʻaki mo ha niʻihi ʻo kinautolu.

Ko e tokotaha ko ha sevāniti ʻa e ʻOtuá ko hono hingoá ko ʻĀkani, ʻa ia naʻe moʻui fuoloa ia ki muʻa pea toki fanauʻi ʻa e Faiako Lahí. Naʻe sio ʻa ʻĀkani ki ha kofu fakaʻofoʻofa, ko ha konga koula, mo ha ngaahi paʻanga siliva. Naʻe ʻikai ko ha meʻa ia ʻaʻana. ʻOku pehē ʻe he Tohitapú ko e meʻa ia ʻa Sihova koeʻuhí he naʻe toʻo ia mei he ngaahi fili ʻo e kakai ʻa e ʻOtuá. Ka naʻe fiemaʻu lahi ia ʻe ʻĀkani ʻo ne kaihaʻasi ai ia.—Siosiua 6:19; 7:​11, 20-22.

Ko ha toe fakatātā eni ʻe taha. ʻI he kuohilí, naʻe fili ʻe Sihova ʻa Tēvita ko e tuʻi ki he kakai ʻo ʻIsilelí. ʻI he ʻaho ʻe taha, naʻe kamata ke sio ʻa Tēvita ki he fefine fakaʻofoʻofa ko Patisepá. Naʻá ne toutou sio maʻu pē kia Patisepa pea fakakaukau ʻo fekauʻaki mo hono ʻave ia ki hono ʻapí ke na nofo. Kae kehe, ko e uaifi ia ʻo ʻUlaiá. Ko e hā naʻe totonu ke fai ʻe Tēvitá?—

Naʻe totonu ke taʻofi ʻe Tēvita ʻa ʻene fakakaukau ʻo fekauʻaki mo hono maʻu ʻo Patisepá. Ka naʻe ʻikai te ne fai pehē. Ko ia, naʻe ʻave ai ia ʻe Tēvita ki hono ʻapí. Pea naʻá ne ʻai leva ke tāmateʻi ʻa ʻUlaia. Ko e hā naʻe fai ai ʻe Tēvita ʻa e ngaahi meʻa kovi ko ení?— Koeʻuhí he naʻá ne hokohoko fiemaʻu ha fefine naʻe maʻu ʻe ha tokotaha kehe.—2 Samiuela 11:​2-27.

Koeʻuhi naʻe fakatomala ʻa Tēvita, naʻe tuku ia ʻe Sihova ke moʻui. Ka ʻi he taimi ko ení naʻe lahi ʻa e faingataʻa naʻe hoko kia Tēvitá. Ko hono foha ko ʻApisalomé naʻá ne loto ke maʻu ʻa e tuʻunga ʻo Tēvita ko e tuʻí. Ko ia, ʻi he taimi naʻe haʻu ai ʻa e kakaí ke sio kia Tēvitá, naʻe ala atu ʻa ʻApisalome ʻo puke mai kinautolu ʻo ne ʻuma kia kinautolu. ʻOku pehē ʻe he Tohitapú: “Naʻe kaihaʻasi ʻe Apisalome ʻa e loto ʻo e kau tangata Isileli.” (Fakaʻītali ʻamautolu.) Naʻá ne fakalotoʻi ʻa e kakai ko iá ke nau loto ke tuʻi ia kae tuku ʻa Tēvita ia.—2 Samiuela 15:​1-12.

Kuó ke fuʻu fiemaʻu nai ha meʻa ʻi ha taimi, ʻo hangē ko ʻĀkani, Tēvita mo ʻApisalomé?— Kapau ko e meʻa ia ʻa ha tokotaha kehe, ke toʻo ia ʻo ʻikai maʻu ha ngofua ki aí ko e kaihaʻá ia. ʻOkú ke manatuʻi ʻa e meʻa naʻe fiemaʻu ʻe he ʻuluaki tokotaha kaihaʻá, ʻa Sētane?— Naʻá ne fiemaʻu ke lotu ange ʻa e kakaí kiate ia kae ʻikai ko e ʻOtuá. Ko ia ai, naʻe kaihaʻa ʻa Sētane ʻi heʻene ʻai ʻa ʻĀtama mo ʻIvi ke na talangofua ange ki aí.

ʻI hono maʻu ʻe ha taha ha meʻa, ʻokú ne maʻu ʻa e totonu ke ne pehē pe ko hai nai te ne ngāueʻaki iá. Ko e fakatātaá, te ke ʻalu nai ke vaʻinga mo e fānau kehé ʻi honau ʻapí. ʻE sai ke toʻo ha meʻa mei ai pea ʻave ia ki ho ʻapí?— ʻE ʻikai, tuku kehe kapau ʻoku pehē ʻe he tamai pe faʻē ʻa e fānau ko iá ʻe lava ke ke ʻalu mo ia. Kapau te ke ʻave ha meʻa ki ho ʻapí ʻo ʻikai te ke kole kia kinaua, ko e kaihaʻá ia.

Ko e hā ʻe fakataueleʻi nai ai koe ke ke kaihaʻá?— Koeʻuhí he ʻokú ke fiemaʻu ha meʻa ʻoku ʻikai ko hoʻo meʻa. Neongo kapau ʻoku ʻikai ke sio atu ha taha ʻokú ke toʻo ia, ko hai ʻoku sio atú?— Ko Sihova ko e ʻOtuá. Pea ʻoku fiemaʻu ke ta manatuʻi ʻoku fehiʻa ʻa e ʻOtuá ʻi he kaihaʻá. Ko ia, ko e ʻofa ki he ʻOtuá pea mo ho kaungāʻapí ʻe tokoni ia kia koe ke ʻoua ʻaupito te ke hoko ko ha kaihaʻa.