Māmani Foʻou Melino ʻa e ʻOtuá—ʻE Lava Ke Ke Moʻui Ai

NAʻE tuku ʻe he ʻOtuá ʻa ʻĀtama mo ʻIvi ʻi he ngoue ko ʻĪtení. Neongo naʻá na hoko ʻo talangataʻa peá na mate, kuo ʻai ʻe he ʻOtuá ke malava ʻa ʻena fānaú, kau ai kitaua he ʻaho ní, ke moʻui taʻengata ʻi he Palataisí. ʻOku palōmesi ʻa e Tohitapú: “Ko haʻa fai totonu te nau maʻu ʻa e fonua [“māmaní,” NW], pea te nau nofo ai ʻo tuputupuʻa.”—Sāme 37:⁠29.

ʻOku fakamatala ʻa e Tohitapú ʻo fekauʻaki mo ha “ngaahi langi foʻou” pea “mo ha māmani foʻou.” (Aisea 65:​17, NW; 2 Pita 3:​13, NW) Ko e “ngaahi langi” lolotongá ʻoku faʻuʻaki ia ʻa e ngaahi puleʻanga fakaetangata he ʻaho ní, ka ko Sīsū Kalaisi mo e faʻahinga ʻoku pule fakataha mo ia ʻi hēvaní ʻe faʻuʻaki kinautolu ʻa e “ngaahi langi foʻou.” He meʻa lelei moʻoni ē ko e taimi ʻe puleʻi ai ʻe he ngaahi langi foʻou ko ení, ʻa ia ko e puleʻanga māʻoniʻoni melino ʻa e ʻOtuá, ʻa e foʻi māmaní kotoa!

Ko e hā leva ʻa e “māmani foʻou” ia?— Ko e māmani foʻoú ko e kakai lelei ia ʻoku nau ʻofa kia Sihova. ʻOku fiemaʻu ke ke mahinoʻi, ʻi he taimi ʻoku lea ai ʻa e Tohitapú ʻo kau ki he “mamani,” ʻoku ʻuhinga ia ʻi he taimi ʻe niʻihi ki he kakai ʻoku nofo ʻi he foʻi māmaní, kae ʻikai ko e fonuá tonu. (Senesi 11:​1, PM; Sāme 66:4; 96:⁠1) Ko ia, ko e kakai ʻoku faʻuʻaki ʻa e māmani foʻoú te nau moʻui ʻi heni tonu ʻi he foʻi māmani ko ení.

Ko e māmani lolotonga ʻo e kakai koví ʻe ʻikai ke nau toe ʻi ai. Manatuʻi, ko e Lōmaki ʻo e ʻaho ʻo Noá naʻá ne toʻo atu ha māmani ʻo e kakai koví. Pea hangē ko ia kuó ta akó, ko e māmani kovi ko eni he taimi ní ʻe fakaʻauha ia ʻi ʻĀmaketone. Ta sio leva he taimí ni pe ʻe anga-fēfē ʻa e moʻui ʻi he māmani foʻou ʻa e ʻOtuá ʻi he hili ʻa ʻĀmaketoné.

ʻOkú ke fiemaʻu ke ke moʻui taʻengata ʻi he Palataisi ʻi he māmani foʻou melino ʻa e ʻOtuá?— ʻOku ʻikai ha toketā ʻe lava ke ne ʻai kitaua ke ta moʻui taʻengata. ʻOku ʻikai ha foʻiʻakau te ne taʻofi kitaua mei he maté. Ko e founga pē ʻe taha ʻe lava ke ta moʻui taʻengata aí ko e ʻunuʻunu ofi ki he ʻOtuá. Pea ʻoku tala mai ʻe he Faiako Lahí kia kitaua ʻa e founga ke fai ai ʻa e meʻa ko iá.

Toʻo mai ʻeta Tohitapú pea fakaava ia ki he Sione vahe 17, veesi 3. ʻOkú ta maʻu ai heni ʻa e ngaahi lea ko eni ʻa e Faiako Lahí: “Ko eni ia ʻa e moʻui taʻengata, ke nau fai ke ʻilo koe ko e Otua moʻonia pe taha, pea mo Sisu ne ke fekau mai ko e Misaia.”

Ko ia, ko e hā ʻa e meʻa naʻe pehē ʻe Sīsū ʻoku fiemaʻu ke ta fai ke maʻu ai ʻa e moʻui taʻengatá?— ʻUluakí, kuo pau ke ta ʻiloʻi ʻeta Tamai fakahēvani ko Sihová, pea pehē ki hono ʻAló, ʻa ia naʻá ne foaki ʻa ʻene moʻuí maʻataua. ʻOku ʻuhinga ení ʻoku fiemaʻu ke ta ako ʻa e Tohitapú. Ko e tohí ni, ʻa e Ako mei he Faiako Lahí, ʻokú ne tokoniʻi kitaua ke ta fai ʻa e meʻa ko iá.

Ka ʻe lava fēfē ke tokoniʻi kitaua ʻe he ako fekauʻaki mo Sihová ke ta moʻui taʻengata?— Sai, hangē pē ko ʻeta fiemaʻu ha meʻakai ʻi he ʻaho kotoa pē, ʻoku fiemaʻu ke ta ako ʻo fekauʻaki mo Sihova ʻi he ʻaho kotoa pē. ʻOku pehē ʻe he Tohitapú: ‘Oku ikai moʻui ʻa e tangatá ʻi he maá pe, ka ʻi he ngāhi lea kotoa pe ʻoku ʻalu atu mei he ngutu ʻo e ʻOtuá.’—Mātiu 4:⁠4.

ʻOku toe fiemaʻu ke ta ʻiloʻi ʻa Sīsū Kalaisi koeʻuhí he naʻe fekau hifo ʻe he ʻOtuá ʻa hono ʻAló ke ne toʻo ʻeta angahalá. ʻOku pehē ʻe he Tohitapú: “ʻOku ʻikai ke tuʻu ʻi ha taha kehe ʻa e fakamoʻui.” Pea ʻoku toe pehē ʻe he Tohitapú: “Ko ia ʻoku ne tui pikitai ki he ʻAlo ʻoku ne maʻu ʻa e moʻui taʻengata.” (Ngāue 4:12; Sione 3:36) Sai, ko e hā ʻa e ʻuhinga ʻo e pehē ke “tui” kia Sīsuú?— ʻOku ʻuhinga iá ʻokú ta tui moʻoni kia Sīsū pea ʻiloʻi ʻe ʻikai lava ke ta moʻui taʻengata ʻo taʻekau ai ia. ʻOkú ta tui ki he meʻa ko iá?— Kapau ko ia, te ta hokohoko atu ke ako mei he Faiako Lahí ʻi he ʻaho kotoa pē, pea te ta fai ʻa e meʻa ʻokú ne tala maí.

Ko e founga lelei ʻe taha ke ako ai mei he Faiako Lahí ko e toutou lau ʻa e tohí ni pea sio mo fakakaukau ki he kotoa ʻo e ngaahi fakatātaá. Sio pe ʻe lava ke ke tali ʻa e ngaahi fehuʻi ʻoku ʻasi ʻi he ʻū fakatātā ko ení. Pehē foki, lau ʻa e tohí mo hoʻo faʻeé pe tamaí. Kapau ʻoku ʻikai ke faingamālie ʻa hoʻo ongo mātuʻá, lau fakataha ia mo e kakai lalahi kehé pea mo e fānau kehé. ʻIkai ko ha meʻa lelei ia kapau ʻe lava ke ke tokoniʻi ʻa e niʻihi kehé ke nau ako mei he Faiako Lahí ʻa e meʻa ʻoku fiemaʻu ke nau fai ke moʻui taʻengata ai ʻi he māmani foʻou ʻa e ʻOtuá?—

ʻOku tala mai kia kitaua ʻe he Tohitapú: “ʻOku fakaʻaʻau ke mole ʻa mamani.” Ka neongo ia ʻoku fakamatalaʻi ʻe he Tohitapú ʻa e founga ʻe malava ke ta moʻui taʻengata ai ʻi he māmani foʻou ʻa e ʻOtuá. ʻOku pehē ai: “Ko ia ʻoku ne fai ʻa e finangalo ʻo e ʻOtua, ʻoku ne nofo maʻu ʻo taʻengata.” (1 Sione 2:17) Ko ia ʻe lava fēfē ke ta moʻui taʻengata ʻi he māmani foʻou ʻa e ʻOtuá?— ʻIo, ʻaki ʻa e hoko ʻo ʻiloʻi ʻa Sihova mo hono ʻAlo ʻofeina ko Sīsuú. Ka kuo pau foki ke ta fai, pe ngāueʻaki ʻa e meʻa ʻokú ta akó. ʻOfa ke tokoniʻi koe ʻe hoʻo ako ʻa e tohí ni ke ke fai ʻa e ngaahi meʻá ni.