LĒSONI 05
Ko e Tohi Tapú ko e Pōpoaki Ia ʻa e ʻOtuá Kiate Kitautolu
Kuo ʻomai ʻe Sihova kiate kitautolu ha meʻaʻofa fakaofo—ko e fanga kiʻi tohi ʻe 66 ʻoku fakatahaʻi ki he voliume ʻe taha, ko e Tohi Tapú. Ka te ke fifili nai: ‘Naʻe haʻu mei fē ʻa e Tohi Tapú? Ko hai ʻa hono tokotaha faʻutohí?’ Ke tali ʻa e ongo fehuʻi ko ení, tau lāulea angé ki he founga naʻe aʻu mai ai ʻa e pōpoaki ʻa e ʻOtuá ʻi he Tohi Tapú kiate kitautolú.
1. Kapau ko e kau tangata naʻa nau hiki ʻa e Tohi Tapú, ʻoku anga-fēfē hoko ʻa e ʻOtuá ko hono Tokotaha Faʻutohí?
Naʻe hiki ʻa e Tohi Tapú ʻe he kau hiki-tohi ʻe toko 40 nai ʻi he vahaʻa taimi ko e taʻu nai ʻe 1,600 mei he 1513 K.M. ki he 98 T.S. nai. Pea ko e kau hiki-tohí naʻa nau haʻu mei he ngaahi puipuituʻa kehekehe. Neongo ia, ʻoku kei feongoongoi pē ʻa e konga kotoa ʻo e Tohi Tapú. ʻOku malava fēfē eni? Koeʻuhí ko e ʻOtuá ʻa e Tokotaha Faʻutohi ʻo e Tohi Tapú. (Lau ʻa e 1 Tesalonaika 2:13.) Naʻe ʻikai ke hiki ʻe he kau hiki-tohí ʻa ʻenau ngaahi fakakaukau pē ʻanautolu. ʻI hono kehé, naʻa nau “lea mei he ʻOtuá . . . ʻi hono ueʻi kinautolu ʻe he laumālie māʻoniʻoní.”a (2 Pita 1:21) Naʻe ngāueʻaki ʻe he ʻOtuá ʻa hono laumālie māʻoniʻoní ke fakamānavaʻi pe ueʻi ha kau tangata ke nau hiki ʻene ngaahi fakakaukaú.—2 Tīmote 3:16.
2. Ko hai ʻoku lava ke ne maʻu ʻa e Tohi Tapú?
Ko e “puleʻanga mo e matakali mo e lea mo e kakai kotoa pē” ʻe lava ke nau maʻu ʻaonga mei he ongoongo lelei ʻoku maʻu ʻi he Tohi Tapú. (Lau ʻa e Fakahā 14:6.) Naʻe fakapapauʻi ʻe he ʻOtuá ke ala maʻu ʻa e Tohi Tapú ʻi he ngaahi lea lahi ange ʻi ha toe tohi ʻi he hisitōliá. Ko e meimei taha kotoa ʻoku lava ke nau maʻu ha Tohi Tapu. ʻOku moʻoni eni tatau ai pē pe ko fē ʻa e feituʻu ʻoku nofo ai ʻa e kakaí pe ko e hā ʻa e lea ʻoku nau lea aí.
3. Kuo anga-fēfē hono fakatolonga mai ʻe Sihova ʻa e Tohi Tapú?
Ko e Tohi Tapú naʻe hiki ia ʻi he ngaahi meʻa naʻe ʻikai ke tolonga, hangē ko e leta mo e pepailo. Ka ko e kau tangata naʻa nau ʻofa ʻi he Tohi Tapú naʻa nau hiki tohinima mo toutou hiki-tatau fakalelei ia. Neongo naʻe feinga ha kau tangata maʻu mafai māʻolunga ke nau fakaʻauha ʻa e Tohi Tapú, naʻe loto-lelei ʻa e niʻihi ia ke tuku atu ʻenau moʻuí ki ha tuʻunga fakatuʻutāmaki ke maluʻi ia. Kuo ʻikai fakaʻatā ʻe Sihova ha taha pe ha meʻa pē ke taʻofi ia mei heʻene fetuʻutaki mai kiate kitautolú. ʻOku pehē ʻe he Tohi Tapú: “Ko e folofola ʻa hotau ʻOtuá ʻoku tolonga ʻo taʻengata.”—ʻAisea 40:8.
KELI LOLOTO ANGE
Ako lahi ange ki he founga naʻe fakamānavaʻi ai ʻe he ʻOtuá ha kau tangata ke nau hiki ʻa e Tohi Tapú, founga naʻá ne fakatolonga mai ai iá, pea mo e founga naʻá ne ʻai ai ke ala maʻu ia ʻe he faʻahinga ʻo e tangatá.
4. ʻOku fakahaaʻi ʻe he Tohi Tapú ʻa hono Tokotaha Faʻutohí
Huluʻi ʻa e VITIOÓ. Lau ʻa e 2 Tīmote 3:16, pea lāulea ki he ongo fehuʻi hokó.
Kapau ko e kau tangata naʻa nau hiki ʻa e Tohi Tapú, ko e hā ʻoku ui ai ia ko e Folofola ʻa e ʻOtuá?
ʻOkú ke fakakaukau pe ʻoku ʻuhinga lelei ke tui ʻe lava ʻe he ʻOtuá ʻo fakahoko ʻene ngaahi fakakaukaú ki ha kau tangata ke nau hiki ia?
ʻE hiki nai ʻe ha sekelitali ha tohi, ka ko e pōpoaki ʻi aí, ko e haʻu ia mei he tokotaha naʻá ne fekau ke ne tohi iá. ʻI he tuʻunga meimei tatau, ko e kau tangata naʻa nau hiki ʻa e Tohi Tapú, ka ko e pōpoaki ʻi aí ko e haʻu ia mei he ʻOtuá
5. Naʻe hao mai pē ʻa e Tohi Tapú ʻi hono ʻohofí
Kapau ko e Tohi Tapú ʻoku mei he ʻOtuá, te tau ʻamanekina ke ne fakatolonga ia. ʻI he kotoa ʻa e hisitōliá, naʻe feinga ha kau tangata maʻu mafai māʻolunga ke nau fakaʻauha ʻa e Tohi Tapú. Ko e kau taki lotú naʻa nau feinga ke fūfuuʻi ia. Kae neongo ʻa e fakafepakí mo e fakamanamana ʻo e maté, ko e kakai tokolahi naʻa nau tuku atu ʻenau moʻuí ki ha tuʻunga fakatuʻutāmaki ke maluʻi ʻa e Tohi Tapú. Ke ʻilo fekauʻaki mo ha taha pehē, huluʻi ʻa e VITIOÓ, pea lāulea leva ki he ongo fehuʻi hokó.
ʻI hono ʻiloʻi naʻe lahi fau ʻa e meʻa naʻe fai ke fakatolonga ai ʻa e Tohi Tapú, ʻoku ʻai nai ai koe ke ke loto ke lau ia? Ko e hā hono ʻuhingá?
Lau ʻa e Saame 119:97, pea lāulea leva ki he fehuʻi ko ení:
Ko e hā naʻá ne ueʻi ʻa e kakai tokolahi ke tuku atu ʻenau moʻuí ki ha tuʻunga fakatuʻutāmaki ke liliu mo tufaki ʻa e Tohi Tapú?
6. Ko ha tohi maʻá e kakaí kotoa
Ko e Tohi Tapú ʻa e tohi kuo lahi taha hono liliu mo tufakí ʻi he hisitōliá. Lau ʻa e Ngāue 10:34, 35, pea lāulea leva ki he ongo fehuʻi ko ení:
Ko e hā ʻoku finangalo ai ʻa e ʻOtuá ke liliu mo tufaki lahia ʻa ʻene Folofolá?
Ko e hā ʻoku fakamānako kiate koe fekauʻaki mo e Tohi Tapú?
ʻOku ofi ki he
100%
ʻo e kakai ʻi he māmaní
ʻoku lava ke nau maʻu ʻa e Tohi Tapú ʻi ha lea ʻoku nau mahinoʻi
Ala maʻu ʻi he
lea laka hake ʻi he
3,000
kakato pe ʻi hano konga
5,000,000,000
ʻOku fakafuofua ko e lahi eni ʻo e tatau kuo pulusí,
ʻo laka mamaʻo ange ia ʻi ha toe tohi pē
ʻOKU PEHĒ ʻE HE NIʻIHI: “Ko e Tohi Tapú ko ha tohi motuʻa pē ia naʻe hiki ʻe he faʻahinga ʻo e tangatá.”
Ko e hā hoʻo fakakaukaú?
Ko e hā ha fakamoʻoni ʻokú ne fakahaaʻi ko e Tohi Tapú ko e Folofola ia ʻa e ʻOtuá?
FAKANOUNOU
Ko e Tohi Tapú ko e Folofola ia ʻa e ʻOtuá, pea kuó ne ʻosi fakapapauʻi ʻe ala maʻu ia ʻe he faʻahinga kotoa ʻo e tangatá.
Fakamanatu
ʻOku ʻuhinga ki he hā ʻa ʻetau pehē naʻe fakamānavaʻi ʻe he ʻOtuá ha kau tangata ke hiki ʻa e Tohi Tapú?
Ko e hā ʻoku maongo kiate koe fekauʻaki mo e hao mai ʻa e Tohi Tapú, ko hono liliú mo hono tufakí?
ʻOku fēfē hoʻo ongoʻí ʻi hono ʻiloʻi kuo fai ʻe he ʻOtuá ha feinga lahi pehē ke fetuʻutaki mai kiate koe?
AKO LAHI ANGE
Lau fekauʻaki mo e hisitōlia ʻo e Tohi Tapú—mei he muʻaki ngaahi tatau tohinimá ki he ngaahi liliu ʻi onopōní.
“Founga Ne Tolonga Mai Ai ʻa e Tohi Tapú” (ʻĀ Hake!, Sanuali 2008)
Ako ki he founga kuo hao mai ai ʻa e Tohi Tapú ʻi he ngaahi fakamanamana lalahi ʻe tolu.
“Tohi Tapú—Ko ʻEne Tukuʻau Maí” (Ko e Taua Leʻo Fika 4 2016)
Kuo hiki-tatau mo liliu ʻa e Tohi Tapú ʻo tā tuʻo lahi. ʻE lava fēfē ke ke fakapapauʻi ko e pōpoaki ʻi aí kuo fakatolonga tonu mātē mai?