Naʻe Anga-Fēfē ʻa e Hoko ʻa Sīsū Kalaisi ko ha Palōfita Hangē ko Mōsesé?

ʻOKU ʻikai ke loi ʻa e ʻOtua ko Sihová. (Taitusi 1:2; Hepelū 6:18) Ko ia ai, ko e ngaahi kikite ʻo ʻene Folofolá, ko e Tohitapú, ʻoku falalaʻanga mo moʻoni. ʻOku pau ʻe fakahoko kinautolu.

Ko e taha ʻo e ngaahi kikite fakamānavaʻi fakaeʻotua ko ʻení ko e kikite naʻe hiki ʻe he palōfita Hepelū ko Mōsesé ʻo kau ki he Mīsaiá. Naʻe ngāueʻaki ʻe Mōsese ʻa e ngaahi lea ʻa Sihova, ʻo ne pehē: “Te u fokotuʻu maʻanautolu [kakai ʻIsileli] ha palofita mei he lotolotonga ʻo honau kainga hange ko koe [Mōsese], pea te u ʻai ʻeku lea ki hono ngutu, pea te ne leaʻaki kiate kinautolu ʻa e meʻa kotoa te u fekau kiate ia.”​—Teutalōnome 18:17, 18.

Naʻe ngāueʻaki ʻe he ʻapositolo ko Pitá ʻa e kikite ko ʻení kia Sīsū Kalaisi ʻi heʻene lea: “Naʻe lea ʻa Mosese, ʻo pehē, Ko e ʻEiki [Sihova] ko homou ʻOtua, te ne fokotuʻu maʻamoutolu mei homou kainga ha palofita ʻoku hange ko au; te mou tokanga ki he toko taha ko ia ʻi he meʻa kotoa pe te ne folofolaʻaki kiate kimoutolu.” (Ngāue 3:22) Ko hono moʻoní, naʻe leaʻaki ʻe Sīsū tonu ʻo pehē: “He ka ne ʻoku mou tui kia Mosese, pehē ʻoku mou tui kiate au: he ko e tohi ʻa e toko taha ko ia, ko e tohi kiate au.” (Sione 5:46) Naʻe tatau ai ʻa Sīsū mo Mōsese ʻi he ngaahi founga fē?

Tatau ʻi he Kamataʻanga ʻo ʻEna Ngāué

Ko Mōsese mo Sīsū naʻá na hao fakatouʻosi ʻi he tāmate tavale ʻo e fānau tangata kei iiki tokolahi. Naʻe fūfuuʻi ʻa e kiʻi pēpē ko Mōsesé ʻi he vao he kauvai ʻo e Vaitafe Nailá peá ne hao ai mei he tāmate tavale ʻo e fānau tangata ʻIsileli ʻa ia ko e fekau ʻa Felo ʻo ʻIsipité. Naʻe toe hao foki ʻa Sīsū ʻi heʻene kei siʻí mei he tāmate tavale ʻo e fānau tangata tokolahi ʻo aʻu ki he taʻu ua honau motuʻá ʻi Pētelihema mo hono ngaahi vahefonuá. Ko e tāmate tavale ko ʻení ko e fekau ia ʻe he Tuʻi ko Hēlota ko e Lahí, ʻa ia naʻe hangē ko Feló, ko ha fili ʻo e ʻOtuá mo ʻEne kakaí.​—ʻEkisoto 1:22–2:10; Mātiu 2:13-18.

Naʻe fakahā fakatouʻosi ʻe Mōsese mo Sīsū ʻa e anga-malū, pe anga-vaivai. Neongo naʻe tupu hake ʻa Mōsese ko ha foha ia ʻi he fāmili ʻo ha tuʻi fuʻu mālohi ʻo ʻIsipite, naʻe hoko ia “koe tagata . . . agavaivai ia, o lahi hake i he kau tagata kotoabe nae i he fuga o mamani.” (Nōmipa 12:3, PM) ʻI ha founga ala fakatataua, naʻe ngāue ʻa Sīsū ʻi he tuʻunga ko e pilinisi mālohi ko Maikeli ʻi hēvani ka naʻá ne fakatōkilaloʻi ʻe ia ia ʻo ne haʻu ki he māmaní. (Tāniela 10:13; Filipai 2:5-8) ʻIkai ko ia pē, naʻe manavaʻofa ʻa Sīsū ki he kakaí peá ne lava ke lea ʻo pehē: “Too eku haamoga kiate kimoutolu, bea mou ako iate au; he oku ou agavaivai mo agamalu: bea te mou ilo ai ae fiemalie ki ho mou laumalie.”​—Mātiu 11:29, PM; Māt 14:14.

Ko Mōsese mo Sīsū fakatouʻosi naʻá na liʻaki ʻa e tuʻunga māʻolunga mo e koloa lahi koeʻuhi pē ko e ngāue ʻa Sihová. Naʻe liʻaki ʻe Mōsese ʻa e koloa pea mo e tuʻunga māʻolunga ʻi ʻIsipité ka ne tauhi kia Sihova mo ʻEne kakaí. (Hepelū 11:24-26) ʻI he tuʻunga meimei tatau, naʻe tuku ange ʻe Sīsū ʻa e tuʻunga hōifua ʻaupito mo e koloa lahi ʻi hēvani koeʻuhi ka ne tauhi ki he ʻOtua mo ʻEne kakai ʻi he māmaní.​—2 Kolinitō 8:9.

Naʻe hoko fakatouʻosi ʻa Mōsese mo Sīsū ko e ongo pani ʻa e ʻOtuá. Naʻe ngāue ʻa e palōfita ko Mōsesé ʻi he tuʻunga ko e tokotaha pani ʻa Sihova ki he puleʻanga ʻo ʻIsilelí. Hangē ko ia naʻe leaʻaki ʻe he ʻapositolo ko Paulá, ko Mōsese “naʻa ne lau ʻa e manukiʻi ʻo [ʻene hoko ko e] Kalaisi [tokotaha pani] ko e koloa naʻe hulu atu ʻi he ngaahi fokotuʻunga-koloa ʻo Isipite.” (Hepelū 11:26; ʻEkisoto 3:1–4:17) Ko e taimi fē naʻe hoko ai ʻa Sīsū ko e Kalaisí, pe ko e Tokotaha paní? Naʻe hoko ʻeni ʻi hono pani ia ʻaki ʻa e laumālie māʻoniʻoni, pe ivi-ngāué ʻo e ʻOtuá, ʻi hono papitaisó. Naʻe fakamoʻoniʻi ʻe Sīsū ko e Mīsaiá ia, pe Kalaisí ki he fefine Samēlia ʻi he vaikeli ʻo Sēkope ʻi Saiká pea ʻi he ʻao ʻo e taulaʻeiki lahi ʻo ʻIsilelí lolotonga ʻa hono fai ʻa e hopo.​—Maʻake 14:61, 62; Sione 4:25, 26.

Naʻe ʻaukai fakatouʻosi ʻa Mōsese mo Sīsū ʻi he ngaahi ʻaho ʻe 40. ʻI he kamataʻanga ʻo e ngāue ʻa Mōsese ʻi he tuʻunga ko e tangatalea ʻa e ʻOtuá, naʻá ne ʻaukai ʻi he ngaahi ʻaho ʻe 40 lolotonga ʻa ʻene ʻi he moʻunga ko Sainaí. (ʻEkisoto 34:28) Naʻe ʻaukai ʻa Sīsū ʻi he ngaahi ʻaho ʻe 40 ʻi he toafá peá ne toki talitekeʻi ʻa e fakatauele faka-sētane ʻi he kamataʻanga ʻo ʻene ngāue ko e Mīsaia kuo talaʻofá.​—Mātiu 4:1-11.

Ko e Ongo Tangatá Ni Fakatouʻosi Naʻá Na Fakalāngilangiʻi ʻa Sihova

Naʻe ngāueʻaki ʻe Sihova fakatouʻosi ʻa Mōsese mo Sīsū ke fakalāngilangiʻi Hono huafa toputapú. Naʻe tala ʻe he ʻOtuá kia Mōsese ke ʻalu ki he kakai ʻIsilelí ʻi he huafa ʻo ‘Sihova ko e ʻOtua ʻo ʻenau ngaahi kui.’ (ʻEkisoto 3:13-16) Naʻe fakafofongaʻi ʻe Mōsese ʻa e ʻOtuá ʻi he ʻao ʻo Feló, pea naʻe tauhi ʻa e moʻui ʻa Feló ke malava ʻo fakahāhā ai ʻa e māfimafi ʻo Sihová pea mo tala fakahāhā Hono huafá ʻi māmani kātoa. (ʻEkisoto 9:16) Naʻe toe haʻu mo Sīsū ʻi he huafa ʻo Sihová. Ko e fakatātā, naʻe pehē ʻe Kalaisi: “Ko au naʻa ku haʻu ʻi he huafa ʻo ʻeku Tamai; ka talaʻehai ʻoku mou tali au.” (Sione 5:43) Naʻe fakalāngilangiʻi ʻe Sīsū ʻa ʻene Tamaí, mo ne fakaʻilo atu hono huafá ki he kau tangata naʻe foaki kiate ia ʻe he ʻOtuá, pea naʻá ne ʻai ia ke ʻilo lahia ʻi he māmaní.​—Sione 17:4, 6, 26.

Naʻe fai fakatouʻosi ʻe Mōsese mo Sīsū ʻa e ngaahi mana ʻaki ʻa e ivi fakaeʻotua ke fakalāngilangiʻi ʻa e ʻOtuá. Naʻe fai ʻe Mōsese ʻa e ngaahi mana ke fakamoʻoniʻi naʻe fekauʻi ia ʻe he ʻOtua ko Sihová. (ʻEkisoto 4:1-31) ʻI he kotoa ʻo e ngāue tuʻumaʻu ʻa Mōsese, ʻa ia naʻe ngāueʻaki ʻe he ʻOtuá ke ne vaheʻi ʻa e Tahi Kulokulá, naʻe hokohoko atu ʻene fai ʻa e ngaahi mana ke fakalāngilangiʻi ʻa Sihova. (ʻEkisoto 5:1–12:36; 14:21-31; 16:11-18; 17:5-7; Sāme 78:12-54) ʻI he founga meimei tatau, naʻe fakahoko ʻe Sīsū ʻa e fakalāngilangi ki he ʻOtuá ʻi heʻene fai ʻa e ngaahi mana lahi. Naʻe fuʻu mātuʻaki moʻoni ʻa e meʻá ni ʻa ia naʻe lava ʻa Sīsū ke ne lea ʻo pehē: “Mou tui kiate au, ko au ʻoku ou ʻi he Tamai, mo e Tamai ʻiate au: pea ka ʻikai, pea mou tui koeʻuhi ko ʻene ngaahi ngaue.” (Sione 14:11) Ko e taha ʻo ʻene ngaahi mana naʻe faí ko ʻene taʻofi ke tuʻu ʻa e fuʻu ʻahiohio fakatuʻutāmaki, ʻo hoko ai ʻa e Tahi Kālelí ʻo nonga.​—Maʻake 4:35-41; Luke 7:18-23.

Ko e Ngaahi Meʻa Meimei Tatau Kehe ʻOku Mahuʻinga

Naʻe kau fakatouʻosi ʻa Mōsese mo Sīsū ʻi hono tokonaki fakaemana mai ʻo e meʻakai. Ko Mōsese ko e palōfita ʻa Sihova ʻi he taimi naʻe tokonaki fakaemana ai ʻa e meʻakai ki he kakai ʻIsilelí. (ʻEkisoto 16:11-36) ʻI ha founga meimei tatau, ʻoku ʻasi tuʻo ua ʻa e fakamatala ʻi he Tohitapú ʻo kau ki hono fafangaʻi fakaemana ʻe Sīsū ʻa e fuʻu kakai tokolahi ʻaki ʻa e meʻakai fakamatelie.​—Mātiu 14:14-21; 15:32-38.

Ko e mana mei hēvani naʻe ʻi ai ʻene fekauʻaki mo e ngāue fakatouʻosi ʻa Mōsese mo Sīsū. Naʻe taki ʻe Mōsese ʻa e kakai ʻIsilelí ʻi he taimi naʻe tokonaki ai ʻa e mana ʻo hangē naʻe hoko mei hēvani. (ʻEkisoto 16:11-27; Nōmipa 11:4-9; Sāme 78:25) ʻI he founga meimei tatau ka ʻoku fuʻu mahuʻinga, naʻe tokonaki ʻe Sīsū hono kakano ʻoʻoná ko e mana mei hēvani ke moʻui ai ʻa e faʻahinga ʻo e tangatá ʻoku talangofuá.​—Sione 6:48-51.

Naʻe fakatou taki ʻe Mōsese mo Sīsū ha kakai mei he nofo fakapōpula ki he tauʻatāina. Naʻe ngāueʻaki ʻe he ʻOtuá ʻa Mōsese ke ne taki ʻa e kakai ʻIsilelí mei he nofo fakapōpula ki he kakai ʻIsipité ʻo ʻave kinautolu ki he tauʻatāina ʻi he tuʻunga ko ʻEne kakai. (ʻEkisoto 12:37-42) ʻI he founga meimei tatau, kuo taki ʻe Sīsū hono kau muimuí ki he tauʻatāina. Pea ʻe taki ʻe Kalaisi ʻa e faʻahinga ʻo e tangatá ʻoku talangofuá ki he tauʻatāina mei he nofo fakapōpula ki he kautaha ʻa Sētane ko e Tēvoló, pea pehē pē mei he angahalá mo e maté.​—1 Kolinitō 15:24-26; Kolose 1:13; 1 Sione 5:19.

Naʻe fakalaloa fakatouʻosi ʻa Mōsese mo Sīsū ʻi ha fuakava. Ko Mōsesé ko e fakalaloa ia ʻo e fuakava ʻo e Laó, ʻi he vahaʻa ʻo e ʻOtua ko Sihová mo e kakai ʻIsilelí. (ʻEkisoto 19:3-9) Ko Sīsū ko e fakalaloa ia ʻo e fuakava foʻoú, ʻi he vahaʻa ʻo e ʻOtuá mo e ʻIsileli fakalaumālié.​—Selemaia 31:31-34; Luke 22:20; Hepelū 8:6-13.

Naʻe tuku ke fai fakamaau fakatouʻosi ʻa Mōsese mo Sīsū. Naʻe ngāue ʻa Mōsese ʻi he tuʻunga ko e fakamaau mo e tokotaha fokotuʻu-lao ki ʻIsileli fakaekakano. (ʻEkisoto 18:13; Malakai 4:4) ʻOku ngāue ʻa Sīsū ko e Fakamaau pea kuó ne ʻoange ki “Isileli oe Otua” fakalaumālié hono ngaahi lao mo hono ngaahi tuʻutuʻuni. (Kalētia 6:16, PM; Sione 15:10) Naʻe lea ʻa Kalaisi tonu ʻo pehē: “ʻOku ʻikai ke fakamāu ʻe he Tamai ha toko taha, ka kuo ne tuku ʻa e fakamāu kotoa pe ki he ʻAlo: koeʻuhi ke ʻapasia ʻa e kakai kotoa pe ki he ʻAlo, ʻo hange ko ʻenau ʻapasia ki he Tamai. Ko ia ʻoku ʻikai ke ʻapasia ki he ʻAlo, ʻoku ʻikai te ne ʻapasia ki he Tamai naʻa ne fekau mai ia.”​—Sione 5:22, 23.

Naʻe tuku fakatouʻosi ʻa Mōsese mo Sīsū ke na ʻi he tuʻunga-ʻulu ʻi he fale ʻo e ʻOtuá. Naʻe angatonu ʻa Mōsese ʻi he tuʻunga ko e ʻulu ki he fale ʻo e ʻOtuá ʻi he ʻIsileli ʻo onoʻahó. (Nōmipa 12:7) ʻI hono fehoanaki-mālié, naʻe ʻai ʻa Sīsū ko e ʻUlu ia ʻo e fale fakalaumālie ko e ngaahi foha ʻo Sihová pea kuo fakamoʻoniʻi ʻene angatonu ki ai. Ko e moʻoni, ko Sīsū “nae agatonu kiate ia ne Ne fakanofo ia, o hage foki ko Mosese i Hono fale kotoabe. He nae totonu ke ne maʻu eia ae ogoogo lelei lahi ia Mosese, o hage oku maʻu eia oku laga ae fale ae ogoogo lelei lahi i he fale. . . . Nae agatonu mooni a Mosese i Hono fale kotoabe, o hage koe tamaioeiki, koe fakamooni oe gaahi mea koia e lea aki; Ka ko Kalaisi koe ʻAlo ia i Hono fale oona; bea ko Hono fale akitautolu, o kabau te tau kuku mau ae tui moe fiefia oe amanaki lelei o aʻu ki he ikuaga.”​—Hepelū 3:2-6, PM.

Naʻa mo ʻi he maté naʻe tatau ʻa Mōsese mo Sīsū. ʻOku anga-fēfē? Naʻe ʻave ʻe Sihova ʻa e sino ʻo Mōsesé, ke taʻofi ai mei hano fakalieliaʻi pe ko hano ʻotuaʻaki ia ʻe he tangatá. (Teutalōnome 34:5, 6; Suitasi 9) ʻI he founga meimei tatau, naʻe ʻave ʻe he ʻOtuá ʻa e sino ʻo Sīsuú, ʻo ʻikai tuku ia ke ne aʻu ki he ʻauʻauha ʻa ia naʻá ne taʻofi ai ia mei haʻane hoko ko ha maka tūkiaʻanga ki he tuí.​—Sāme 16:10; Ngāue 2:29-31; 1 Kolinitō 15:50.

Fai ha Tokanga ki he Kikité

Ko e ngaahi founga ʻe niʻihi ia ʻa ia naʻe fakamoʻoniʻi ai ʻa Sīsū Kalaisi ko ha palōfita hangē ko Mōsesé. ʻOku fakaofo ʻa e ngaahi folofola ʻa e ʻOtuá kia Mōsese ʻo kau ki he fakahoko ʻa e kikite ki he hoko mai ʻa e palōfita ko iá!

ʻOku ʻikai ke toe fehuʻia ʻa hono fakahoko ʻe Sihova ʻa ʻene talaʻofa fakaekikite ke fokotuʻu hake ha palōfita ʻo hangē ko Mōsesé. Ko e ngaahi lea ko ia ʻia Teutalōnome 18:18 ne fakahoko ia ʻi he moʻui mo e ngaahi meʻa naʻe hokosia ʻia Sīsū Kalaisí. Pea ko e fakahoko ʻo e ngaahi meʻá ni ʻokú ne ʻomai ai kiate kitautolu ha ʻuhinga lelei ke tau tui ki he ngaahi meʻa fakaekikite kehe ʻoku ʻomai ʻe he Folofola ʻa e ʻOtuá. Ko ia ai, ʻai ke tau tokanga maʻu pē ki he kikite ʻa e Tohitapú.