ʻOku Tokoni ʻa e Fāmili Kalisitiané ki he Kau Taʻumotuʻá

“Bea oua naa jiaki au i he aho o eku motua; oua naa liaki au oka mole iate au eku malohi.”​—SĀME 71:9, PM.

 1. Ko e hā ʻa e meʻa ʻoku hoko ki he kau taʻumotuʻá ʻi he ngaahi sivilaise lahi?

NAʻE pehē ʻe he The Wall Street Journal: “ʻOku hā mei he ngaahi saveá ko e meimei toko ono ʻi he toko fitu (86%) ʻo e kau taʻumotuʻa kuo ngaohikoviá ko e ngaohikoviʻi pē ia ʻe honau ngaahi fāmilí tonu pē.” Naʻe pehē ʻe he makasini ko e Modern Maturity: “Ko e ngaohikovia ʻo e kau taʻumotuʻá ko e fakamuimui taha ia [ʻo e ngaohikoviʻi ʻi he fāmili] kuo fakahā ʻi he ngaahi nusipepa ʻi ʻAmeliká.” ʻIo, kuo mātuʻaki ngaohikoviʻi mo liʻekina ʻa e kau taʻumotuʻá ʻi he ngaahi sivilaise lahi. Ko e moʻoni ko hotau taimí ʻoku lahi ai ʻa e “ofa ae kau tagata kiate kinautolu be, . . . mo taefakafetai, . . . mo taemaonioni, o taemaʻu ae ofa oku gali moe kaiga.”​—2 Tīmote 3:​1-3, PM.

 2. Fakatatau ki he Konga Tohi Tapu Faka-Hepeluú, ʻoku fēfē ʻa e vakai ʻa Sihova ki he kau taʻumotuʻá?

² Ka, ʻoku ʻikai ko e founga ia naʻe fie maʻu ke tauhi ʻaki ʻa e kau taʻumotuʻá ʻi ʻIsileli ʻo e kuonga muʻá. Naʻe pehē ʻe he Laó: “Te ke tuʻu ki ʻolunga ʻi he ʻao ʻo e ʻuluhinā, pea te ke fakaʻapaʻapa kiate ia ʻoku motuʻa, pea te ke ʻapasia ki ho ʻOtua: ko Sihova au.” ʻOku ekinaki mai kiate kitautolu ʻa e tohi fakamānavaʻi ʻo e ngaahi palōvepi fakapotopotó: “Tokanga ki hoʻo tamai, he ko eni ia naʻe fakatupu koe, pea ʻoua te ke taʻetokaʻi ʻoka motuʻa hoʻo faʻe.” ʻOku fekau mai ai: “Tama, fanongo ki he akonaki ʻa hoʻo tamai, pea ʻouae hiki mei he ngaahi tala ʻa hoʻo faʻe.” Naʻe akoʻi ʻe he Lao ʻia Mōsesé ʻa e fakaʻapaʻapa mo e tokanga fakatouʻosi ki he kakai tangata mo e kakai fefine taʻumotuʻá. ʻOku hā mahino, ʻoku finangalo ʻa Sihova ke fakaʻapaʻapaʻi ʻa e kau taʻumotuʻá.​—Livitikō 19:32; Palōvepi 1:8; 23:22.

Tokangaʻi ʻo e Kau Taʻumotuʻá ʻi he Kuonga ʻo e Tohi Tapú

 3. Naʻe fēfē ʻa hono fakahā ʻe Siosefa ʻa e fakaʻatuʻi ki heʻene tamai taʻumotuʻá?

³ Naʻe fie maʻu ke fakahā ʻa e fakaʻapaʻapá ʻo ʻikai ngata pē ʻi he ngaahi lea ka ʻi he ngaahi ngāue fakaʻatuʻi foki. Naʻe fakahā ʻe Siosefa ʻa e fakaʻatuʻi lahi ki heʻene tamai taʻumotuʻá. Naʻá ne loto ke fai ʻe Sēkope ha fononga mei Kēnani ki ʻIsipite, ko hona vā mamaʻó ʻoku laka hake ʻi he kilomita ʻe 300. Ko ia naʻe tuku ʻatu ʻe Siosefa kia Sēkope ʻa e “asi ʻe toko hongofulu kuo fakaheka ki ai ʻa e ngaahi meʻa ngako ʻo Isipite, pea mo e asi fefine ʻe hongofulu kuo fakaheka ki ai ʻa e koane mo e ma mo e meʻakai maʻa ʻene ʻeiki ki he fononga.” ʻI he aʻu ʻa Sēkope ki Kosení, naʻe ʻalu ʻa Siosefa kiate ia “ʻo ne tāupe ʻi hono kia, mo tangi fuoloa.” Naʻe fakahāhā ʻe Siosefa ki heʻene tamaí ʻa e anga-ʻofa loloto. Ko ha faʻifaʻitakiʻanga fakalotomāfana ē ʻo e tokanga ki he kau taʻumotuʻá!​—Sēnesi 45:23; 46:​5, 29.

 4. Ko e hā ko ha faʻifaʻitakiʻanga lelei ai ʻa Lute ke muimui ki aí?

⁴ Ko e toe sīpinga fakaʻofoʻofa ʻe taha ke muimui ki ai ʻi he fekauʻaki mo e anga-ʻofa ki he kau taʻumotuʻá ko Lute. Neongo ko ha Senitaile ia, ka naʻá ne nofo ai pē mo ʻene faʻē-ʻi-he-fono taʻumotuʻa ko Nāomí ko ha uitou Siu ia. Naʻe liʻaki ʻe Lute ʻa hono kakaí tonu neongo ʻe fakamamahi nai ha ʻikai ke toe maʻu hano husepāniti ʻe taha. ʻI he fakaʻaiʻai ia ʻe Nāomi ke ne toe foki ki hono kakaí tonu, naʻe tali ʻaki ʻe Lute ʻa e niʻihi ʻo e ngaahi lea fakaʻofoʻofa taha ʻi he Tohi Tapú: “Oua naa ke kole keu liaki koe, be keu foki mei he eku muimui iate koe: he koe botu oku ke alu ki ai, te ta o ai; bea koe botu te ke mohe ai, te ta mohe ai: ko ho kakai e hoko ko hoku kakai, bea ko ho Otua ko hoku Otua: Koe botu te ke mate ai, teu mate ai, bea teu tanu i ai: ke fai behe e Jihova kiate au, bea lahi hake, o kabau e ai ha mea te ta mavae ai mo koe ka koe mate be.” (Lute 1:​16, 17, PM) Naʻe toe fakahāhā foki ʻe Lute ʻa e ngaahi ʻulungāanga lelei ʻi heʻene loto-lelei ke mali mo Pōasi neongo ʻene taʻumotuʻá ʻi he fokotuʻutuʻu ke mali pē ha uitou mo ha kāinga ʻo hono husepānití.​—Lute, vahe 2 ki he 4.

 5. Ko e hā ʻa e ngaahi ʻulungāanga naʻe fakahāhā ʻe Sīsū ʻi heʻene feangainga mo e kakaí?

⁵ Naʻe fokotuʻu ʻe Sīsū ʻa e faʻifaʻitakiʻanga meimei tatau ʻi heʻene feangainga mo e kakai kehé. Naʻá ne faʻa kātaki, fakaʻatuʻi, anga-ʻofa, mo nau maʻu ha mālōlō ʻiate ia. Naʻá ne tokanga moʻoni ʻo ne fakamoʻui ha tangata masiva naʻe mamatea, ʻo ʻikai lava ʻo ʻalu ʻi he taʻu ʻe 38. Naʻá ne fai ha tokanga ki he kau uitoú. (Luke 7:​11-15; Sione 5:​1-9) Naʻa mo e lolotonga ʻo e langa lahi ʻo ʻene mate fakamamahi ʻi he ʻakau fakamamahí, naʻá ne fakapapauʻi ʻe tokangaʻi ʻa ʻene faʻeé naʻe taʻu 50 tupu nai. Naʻe fakatupu ongoʻi mālohi ki he toko taha kotoa pē ʻa e feohi mo Sīsuú, tuku kehe pē ʻa hono ngaahi fili mālualoí. Ko ia, naʻe malava ai ke ne pehē: “Haʻu kiate au, ʻa kimoutolu kotoa pe ʻoku fakaongosia mo māfasia, pea te u fakamālōlō kimoutolu. ʻAi ʻeku ioke kiate kimoutolu, pea mou ako ʻiate au: he ʻoku ou faʻa kataki mo angafākatuʻa, pea te mou ʻilo ha mālōlō ʻi homou laumalie.”​—Mātiu 9:36; 11:​28, 29; Sione 19:​25-27.

Ko Hai ʻOku Taau ke Tokangaʻi?

 6. (a) Ko hai ʻoku taau ke ne maʻu ʻa e tokangaʻi makehe? (e) Ko e hā ʻa e ngaahi fehuʻi te tau ʻeke hifo nai kiate kitautolú?

⁶ Koeʻuhi ko Sihova ko e ʻOtuá mo hono ʻAló, ko Sīsū Kalaisi, kuó na fokotuʻu ha faʻifaʻitakiʻanga lelei pehē ʻo fekauʻaki mo e tokangaʻí, ʻoku feʻunga mālie ki he kau Kalisitiane fakatapuí ke faʻifaʻitaki ki heʻena sīpingá. ʻOku ʻi hotau lotolotongá ha niʻihi kuo nau ngāue mālohi pea kuo nau ongosia ʻi he ngaahi taʻu lahi​—ko e ngaahi tokoua mo e tuofāfine kuo nau aʻu ki he taʻumotuʻá ʻi he fonongaʻanga ʻo ʻenau moʻuí. Ko e niʻihi nai ko ʻetau ngaahi mātuʻa pe ngaahi kui. ʻOku tau fakahā ʻa e houngaʻia mātuʻaki siʻisiʻi pē ʻiate kinautolu? ʻOku tau sio lalo kiate kinautolu? Pe ʻoku tau houngaʻia moʻoni ʻi he lahi ʻaupito ʻo e taukei mo e poto kuo nau maʻú? Ko e moʻoni, ʻe ʻahiʻahiʻi nai ʻe he niʻihi ʻo kinautolu ʻa ʻetau kātakí ʻaki ʻa e ngaahi anga faikehe mo e ngaahi tōʻonga kehe ʻoku faʻa toki hoko ia ʻi he aʻu ʻo taʻumotuʻá. Ka ke ʻeke hifo kiate koe, ‘ʻI heʻeku aʻu ki he ngaahi tuʻunga ko iá te u toe kehekehe au meiate kinautolu?’

 7. Ko e hā ʻokú ne fakatātaaʻi ʻa e fie maʻu ke fakahā ʻa e mahino ki he tuʻunga ʻoku ʻi ai ʻa e kau taʻumotuʻá?

⁷ ʻOku ʻi ai ha talanoa fakaueʻi loto mei he Hahake Lotolotó ʻo fekauʻaki mo e anga-fakaʻatuʻi ʻa e kiʻi taʻahine ki he kau taʻumotuʻá. Naʻe fai ʻe he kui fefiné ha tokoni ʻi he peitó pea naʻe matuʻutāmaki ʻo tō ʻo maumau ai ha peleti maka lelei ʻaupito. Naʻe loto-mamahi ʻa e kui fefiné ni ʻi heʻene lakahalá; ka naʻe toe lahi ange ʻa e ʻita ʻa ʻene tama fefiné. Naʻe ui ʻe he tama fefiné ʻa ʻene kiʻi taʻahine ia ʻaʻana ʻo fekau ke ʻalu ki he fale koloá ʻo fakatau mai ha peleti ʻakau ʻoku ʻikai lava ke mafoá maʻá e kui fefiné. Naʻe foki mai ʻa e kiʻi taʻahine ko ʻení mo ha peleti ʻakau ʻe ua. Naʻe ʻeke ange ʻe heʻene faʻeé: “Ko e hā naʻá ke fakatau mai ai ʻa e peleti ʻe uá?” Naʻe nenu ʻa e mokopuna fefiné ni ʻo ne tali: “Ko e taha maʻa ʻeku kui fefiné pea ko e taha maʻau ʻi haʻo aʻu ʻo motuʻa.” ʻIo, ʻi he māmani ko ʻení ko hono kotoa ʻo kitautolú ʻoku tau fehangahangai mo e ʻamanaki ke aʻu ʻo motuʻa. ʻIkai te tau loto-hounga ʻi hono tauhi kitautolu ʻaki ʻa e kātaki mo e anga-ʻofa?​—Sāme 71:9.

 8, 9. (a) ʻOku totonu ke fēfē ʻa ʻetau angafai ki he kau taʻumotuʻa ʻi hotau lotolotongá? (e) Ko e hā ʻoku fie maʻu ke manatuʻi ʻe kinautolu kuo nau toki hoko ko e kau Kalisitiane ki muí ni mai?

⁸ ʻOua ʻaupito naʻa ngalo ʻiate kitautolu, ko e tokolahi ʻo hotau ngaahi tokoua mo e tuofāfine taʻumotuʻá naʻa nau ngāue mateaki faka-Kalisitiane fuoloa. ʻOku taau ke nau maʻu meiate kitautolu ʻa e fakaʻapaʻapa mo e fakaʻatuʻi, ʻetau tokoni anga-ʻofa mo fakalototoʻa. Naʻe tonu ʻa e pehē ʻe he tangata potó: “Ko e ʻuluhina ko e kalauni matamatalelei ʻoku maʻu ʻi he hala ʻo e faitotonu.” Pea ʻoku totonu ke fakaʻapaʻapaʻi ʻa e ʻulu-hinā, ʻo ha fefine pe ko e tangata. Ko e niʻihi ʻo e kau tangata mo e kau fefine taʻumotuʻa ko ʻení ʻoku nau kei ngāue ko e kau tāimuʻa loto-tōnunga, pea ko e kau tangata tokolahi ʻoku nau hokohoko atu ʻenau ngāue ko e kau mātuʻa loto-tōnunga ʻi he ngaahi fakatahaʻangá; ko e niʻihi kehe ʻoku nau fai ʻa e ngāue alafaʻifaʻitakiʻanga ko e kau ʻovasia fefonongaaki.​—Palōvepi 16:31.

⁹ Naʻe akonakiʻi ʻe Paula ʻa Tīmote: “ʻOua naʻa haʻaki valokiʻi ha motuʻa, ka ke fai fakaoleole pe ʻo hange ko hoʻo tamai; fai ki he kau talavou ʻo hange ko ho tokoua; ki he kau fineʻeiki ʻo hange ko hoʻo faʻe; ki he kau finemui ʻo hange ko ho tuofefine, ʻo matuʻaki angamaʻa.” (1 Tīmote 5:​1, 2) Tautautefito kiate kinautolu kuo nau toki haʻu ki mui ni mai ki he fakatahaʻanga Kalisitiané mei he māmani taʻe fakaʻapaʻapá ʻoku totonu ke nau tukulotoʻi ʻa e ngaahi lea ko eni ʻa Paulá, ʻa ia ʻoku makatuʻunga ʻi he ʻofá. Kau talavou, ʻoua te mou faʻifaʻitaki ki he ngaahi anga ʻo e fakakaukau kovi kuo mou sio nai ai ʻi he ʻapi akó. ʻOua ʻe fakafisingaʻi ʻa e akonaki anga-ʻofa ʻa e Kau Fakamoʻoni taʻumotuʻá. (1 Kolinitō 13:​4-8; Hepelū 12:​5, 6, 11) Kae kehe, ʻi ha fie maʻu ha tokoni ʻe he kau taʻumotuʻá koeʻuhi ko e ʻikai te nau moʻui lelei fakasinó pe ngaahi palōpalema fakaepaʻanga, ko hai ʻokú ne maʻu ʻa e fatongia tefito ke tokoni kiate kinautolú?

Ko e Ngāue ʻa e Fāmilí ʻi Hono Tokangaʻi ʻa e Kau Taʻumotuʻá

10, 11. (a) Fakatatau ki he Tohi Tapú, ko hai ʻoku totonu ke taki muʻa ʻi hono tokangaʻi ʻo e kau taʻumotuʻá? (e) Ko e hā ʻoku ʻikai ke faingofua maʻu ai pē ʻa hono tokangaʻi ʻo e kau taʻumotuʻá?

¹⁰ ʻI he muʻaki fakatahaʻanga Kalisitiané, naʻe hoko ha ngaahi palōpalema ʻo fekauʻaki mo hono tokangaʻi ʻo e kau uitoú. Naʻe fēfē ʻa hono fakahā ʻe he ʻaposetolo ko Paulá ʻoku totonu ke fai ha tokanga ki he ngaahi fie maʻu ko iá? “Tokangaʻi ʻa e kau fefine uitou ʻoku paea moʻoni. Ka ʻo kapau ʻoku maʻu fanau pe makapuna ʻe siʻi uitou, ʻoua muʻa ke akoʻi kinautolu ke nau fai ʻa e toʻonga totonu ki hoto famili, pea ke fai ʻa e totongi ki heʻenau matuʻa: he ko e meʻa ia ʻe hangai fofonga ki ai ʻa e ʻOtua. Ka ʻo ka ai ha taha ʻoku ʻikai tokanga ki hono kainga, kaeʻumaʻā hono famili, ʻoku ne fakaʻikaiʻi ʻene lotu, ʻio, ʻoku ne koviange ʻi ha hiteni.”​—1 Tīmote 5:​3, 4, 8.

¹¹ ʻI he taimi ʻoku hoko ai ha tuʻunga faingataʻa, ʻoku totonu ke ʻuluaki tokoni ki he faʻahinga taʻumotuʻá ʻa e ngaahi memipa ofi ko e fāmilí.a ʻI he founga ko ʻení, ʻoku malava ke fakahā ai ʻe he fānau kuo nau lalahí ʻa e houngaʻia ki he ʻofa, ngāue, mo e tauhi naʻe fai ange ʻe heʻenau ngaahi mātuʻá ʻi he ngaahi taʻu lahi. ʻOku ʻikai ke faingofua nai ʻeni. ʻI he fakaʻau ke taʻumotuʻa ange ʻa e kakaí, ʻoku fakanatula pē ʻenau hoko ʻo tōʻohi ange, pea hoko nai ʻa e niʻihi ʻo ʻikai lava ke fai ha meʻa. Ko e niʻihi ʻoku nau hoko nai ʻo ʻafungi mo hulu ʻenau fie maʻú, ʻo fai ʻeni ʻi he taʻe ʻilo nai ki ai. Ka ʻi he taimi naʻa tau kei pēpē aí, ʻikai naʻa tau ʻafungi mo hulu ʻetau fie maʻú? Pea ʻikai naʻe vēkeveke ʻa ʻetau ngaahi mātuʻá ke tokoni kiate kitautolu? Kuo liliu ʻeni ʻa e ngaahi meʻa ia ʻi heʻenau taʻumotuʻá. Ko ia, ko e hā ʻa e meʻa ʻoku fie maʻú? Ko e fakaʻatuʻi mo e kātaki.​—Fakafehoanaki mo 1 Tesalonaika 2:​7, 8.

12. Ko e hā ʻa e ngaahi ʻulungāanga ʻoku fie maʻu kiate kitautolu ʻi hono tokangaʻi ʻa e kau taʻumotuʻá​—pea mo e niʻihi kehe kotoa pē ʻi he fakatahaʻanga Kalisitiané?

¹² Naʻe fai ʻe he ʻaposetolo ko Paulá ha akonaki ʻaonga ʻi heʻene tohi: “Ko ia ke mou fai ʻo tāu mo e kau fili ʻe he ʻOtua, ʻa ia ʻoku tapu mo ʻofeina ʻo mou ʻai; ʻa e fatu ʻoku langa ʻi he fai meesi mo e angaʻofa mo e fakaʻakiʻakimui mo e angakataki mo e angamokomoko; pea ka ai ha taha ʻoku ne koviʻia ʻi ha taha ʻi ha meʻa, ke mou fekatakiʻaki pe mo fefakamolemoleʻaki; ʻio, ʻo hange foki ne fakamolemole kimoutolu ʻe he ʻEiki, ke pehe pe mo kimoutolu. Pea mou kofutuʻaʻaki ʻa e ngaahi meʻa ko ia katoa ʻa e ʻofa, ʻa ia ko e fakamaʻu ʻo e haohaoa.” Kapau ʻoku totonu ke tau fakahā ʻa e faʻahinga fakaʻatuʻi mo e ʻofa pehē ní ʻi he fakatahaʻangá, ʻikai ʻoku totonu ke tau fakahā ia ʻo lahi ange ʻi he fāmilí?​—Kolose 3:​12-14.

13. Ko hai nai ʻoku fie maʻu ha tokoni ki ai, tuku kehe ʻa e ngaahi mātuʻa mo e ngaahi kui taʻumotuʻá?

¹³ ʻI he taimi ʻe niʻihi ʻoku ʻikai ke ngata pē ʻa hono fie maʻu ʻa e faʻahinga tokoni ko ʻení ki he ngaahi mātuʻá pe ngaahi kuí ka ʻoku toe pehē foki ki he ngaahi kāinga kehe ʻoku taʻumotuʻá. Ko e kau taʻumotuʻa ʻe niʻihi ʻa ia ʻoku ʻikai ke ʻi ai haʻanau fānaú naʻa nau ngāue ʻi he ngaahi taʻu lahi ʻi he ngāue fakamisinalé, ngāue fakamalanga fefonongaakí, mo e ngaahi ngāue fakamalanga taimi kakato kehe. Naʻa nau fakamuʻomuʻa moʻoni ʻa e Puleʻangá ʻi heʻenau moʻuí. (Mātiu 6:33) Ko ia, ʻikai ʻoku taau ke fakahāhā kiate kinautolu ʻa e loto-lelei ke tokangaʻi kinautolu? ʻOku tau maʻu ha faʻifaʻitakiʻanga lelei ʻi he founga ʻo hono tokangaʻi ʻe he Watch Tower Society ʻa ʻene kau memipa taʻumotuʻa ʻi Pētelí. ʻI Pēteli ʻi he ʻuluʻi ʻōfisi ʻi Brooklyn pea mo e niʻihi ʻo e ngaahi ʻōfisi vaʻa ʻo e Sosaieté, ʻoku ʻi ai ʻa e ngaahi tokoua mo e tuofāfine taʻumotuʻa ʻe niʻihi ʻoku tauhi fakaʻaho ʻe he kau memipa ʻo e fāmili Pētelí kuo akoʻi mo vaheʻi ki he fatongia ko ʻení. ʻOku nau fiefia ke tokangaʻi ʻa e faʻahinga taʻumotuʻa ko ʻení ʻo hangē ko ʻenau ngaahi mātuʻa pe ngaahi kui tonu pē ʻa kinautolu. Pea ʻi he taimi tatau pē, ʻoku nau ako ʻa e ngaahi meʻa lahi mei he taukei ʻa e kau taʻumotuʻá.​—Palōvepi 22:17.

Ko e Ngāue ʻa e Fakatahaʻangá ʻi Hono Fai ʻa e Tokangaʻí

14. Ko e hā ʻa e ngaahi tokonaki naʻe fai maʻá e kau taʻumotuʻá ʻi he muʻaki fakatahaʻanga Kalisitiané?

¹⁴ ʻI he ngaahi fonua lahi ʻi he ʻahó ni ʻoku ʻi ai ʻa ʻenau ngaahi fokotuʻutuʻu ki he vāhenga mālōlō pea pehē pē mo e tokangaʻi fakafaitoʻo ʻoku tokonaki ʻe he Puleʻangá ki he kau taʻumotuʻá. ʻOku lava ke ngāuekakatoʻaki ʻe he kau Kalisitiané ʻa e ngaahi tokonaki ko ʻení ʻo kapau ʻoku nau maʻu ʻa e totonu ke fai pehē. Kae kehe, ʻi he ʻuluaki senitulí, naʻe ʻikai ke ʻi ai ha ngaahi tokonaki pehē ia. Ko ia ai, naʻe fai ʻe he fakatahaʻanga Kalisitiané ha ngāue pau ke tokoni ki he kau uitou ʻoku masiva ʻaupitó. Naʻe fakahinohino ʻe Paula: “Ke ʻoua naʻa tuʻu ha taha ʻi he tohi ʻo e Kau Uitou [ke maʻu ʻa e tokoni mei he fakatahaʻangá], ʻoku siʻi hono taʻu ʻi he onongofulu, ko e uaifi ʻo e tangata pe taha; ko e toko taha kuo fakaongolelei heʻene ngaahi ngaue ʻaonga, haʻane tauhi ha fanau, haʻane fakaafe ha ʻāunofo, haʻane fufulu ʻa e vaʻe ʻo e kau lotu, haʻane tokoniʻi ha kakai kuo moʻua ha mamahi, kapau naʻe ʻilonga pe ha ngaue lelei pea ne feinga ki ai.” Ko ia, naʻe fakahā ʻe Paula ʻoku kau ʻa e fakatahaʻangá foki ki he tokoni ki he kau taʻumotuʻá. Naʻe taau ke maʻu ʻa e tokoni pehē ʻe he kau fefine faʻa fakakaukau ki he ngaahi meʻa fakalaumālié kae ʻikai ke ʻi he tuí ʻa ʻenau fānaú.​—1 Tīmote 5:​9, 10.

15. Ko e hā ʻe fie maʻu nai ai ha tokoni koeʻuhi kae lava ke maʻu ʻa e tokoni mei he Puleʻangá?

¹⁵ ʻI he ʻi ai ʻa e ngaahi tokonaki ʻa e Puleʻangá ki he kau taʻumotuʻá, ʻoku faʻa fie maʻu ki ai ke fakafonu ʻa e ngaahi pepa ʻa ia ʻoku fakalotosiʻi nai. ʻI ha ngaahi tuʻunga pehē ʻoku feʻunga ki he kau ʻovasia ʻi he fakatahaʻangá ke fokotuʻutuʻu ke fai ha tokoni koeʻuhi ke malava ʻa e kau taʻumotuʻá ʻo tohi kole ki he tokoní, mo maʻu mai, pe toe fakalahi hake ʻa e tokoni ko iá. ʻI he taimi ʻe niʻihi ʻoku hoko ʻa e liliu ʻa e ngaahi tuʻunga ʻokú te ʻi aí ke toe fakalahi ai ʻa e vāhenga mālōloó. Ka ʻoku toe ʻi ai foki mo e ngaahi meʻa ʻaonga lahi ange ʻe malava ʻe he kau ʻovasiá ke faʻufaʻu maau ʻi hono tokangaʻi ʻo e kau taʻumotuʻá. Ko e hā ʻa e niʻihi ʻo e ngaahi meʻá ni?

16, 17. Ko e hā ʻa e ngaahi founga kehekehe te tau fakahāhā nai ai ʻa e anga-ʻofa ʻi he tali kakaí ki he kau taʻumotuʻa ʻi he fakatahaʻangá?

¹⁶ Ko e fakahāhā ʻo e anga-ʻofa ʻi he tali kakaí ko ha ʻulungāanga fakafonua ia naʻe fai pē ia mei he kuonga ʻo e Tohi Tapú. ʻI he aʻu mai ki he ʻaho ní ʻi he ngaahi fonua lahi ʻo e Hahake Lotolotó, ʻoku fakahāhā ʻa e anga-ʻofa ʻi he tali kakaí ki he kau solá, naʻa mo hono ʻoange pē ha ipu tī pe kofi. Ko ia ai, ʻoku ʻikai ke fakaʻohovale he naʻe tohi ʻe Paula: “ʻI he faʻa masiva ʻa e kau lotu, mou kau ai: nofo ki he fakaafe ʻāunofo [“anga-ʻofa ʻi he tali kakai,” NW].” (Loma 12:13) Ko e foʻi lea faka-Kalisi ki he anga-ʻofa ʻi he tali kakaí ko e phi·lo·xe·niʹa, ko hono ʻuhinga fakatufunga leá ko e “ʻofa ki he (manako ki he, pe anga-ʻofa ki he) kau solá.” Kapau ʻoku totonu ki ha Kalisitiane ke ne anga-ʻofa ʻi he tali kakaí ʻo aʻu ki he kau solá, ʻikai ʻoku totonu ke toe fakahāhā ʻo lahi ange ʻa e anga-ʻofa ʻi he tali kakaí kiate kinautolu ʻoku felāveʻi kiate ia ʻi he tuí? Ko ha fakaafe ki ha maʻu meʻatokoní ʻoku faʻa hoko ia ko ha kiʻi mālōlō fakafiefia ki ha toko taha taʻumotuʻa mei heʻene meʻa ʻoku fai tuʻu maʻú. Kapau te ke saiʻia ke ʻi ai ha faʻahinga ʻoku fakapotopoto mo taukei ʻi hoʻo ngaahi fakatahataha fakafiefiá, fakakau mai ki ai ʻa e kau taʻumotuʻá.​—Fakafehoanaki mo Luke 14:​12-14.

¹⁷ ʻOku lahi ʻa e ngaahi founga ia ke fakalototoʻaʻi ai ʻa e faʻahinga ʻoku taʻumotuʻá. Kapau ʻoku tau ʻalu kā ki he Kingdom Hall pe ki ha fakataha lahi, ʻoku ʻi ai ha kau taʻumotuʻa ʻe niʻihi te nau fiefia ke tau ō fakataha? ʻOua ʻe tali ke nau toki kole mai. Fakahā ange te ke ʻave kinautolu. Ko ha tokoni ʻaonga ʻe taha ko hono fai ʻo ʻenau fakataú. Pea kapau ʻoku nau malava pē ke fai ia, fēfē ke tau ō mo kinautolu ʻi heʻetau ō ʻo fai ʻa ʻetau fakataú? Kae ʻai ke fakapapauʻi ʻe ʻi ai ha ngaahi feituʻu ke nau mālōlō ai ʻo ka nau fie maʻu ke fai pehē. ʻOku ʻikai ha toe veiveiua ʻe fie maʻu ʻa e kātaki mo e anga-ʻofa, ka ʻoku fakafiemālie lahi ʻa e loto-hounga moʻoni ʻa e toko taha taʻumotuʻá.​—2 Kolinitō 1:11.

Ko ha Meʻa ʻAonga mo Fakaʻofoʻofa ki he Fakatahaʻangá

18. Ko e hā ko ha tāpuaki ai ʻa e kau taʻumotuʻá ki he fakatahaʻangá?

¹⁸ Ko ha tāpuaki ē ke sio ki ha kau ʻulu-hinā ʻe niʻihi (mo e ngaahi ʻulu kuo ngangana koeʻuhi ko e taʻumotuʻá) ʻi ha fakatahaʻanga! ʻOku ʻuhinga ʻení, ʻi he lotolotonga ʻo e kau talavou longomoʻuí mo ivimoʻuí, ʻoku tau maʻu ai ha fakapotopoto mo e taukei​—ko ha meʻa ʻaonga moʻoni ia ki ha fakatahaʻanga pē. Ko ʻenau ʻiló ʻoku hangē ha vai fakatupu ivi mālohi ʻoku fie maʻu ke ʻohake mei ha vai keli. ʻOku hangē ia ko hono fakalea ʻi he tohi Palōvepi 18:​4, PM: “Oku hage koe gaahi vai loloto ae gaahi lea mei he gutu oe tagata, bea oku tatau ae matavai oe boto moe ba ae vaitafe.” Ko ha fakalototoʻa ē ki he kau taʻumotuʻá ke nau ongoʻi ʻoku fie maʻu mo fakahoungaʻi kinautolu!​—Fakafehoanaki mo Sāme 92:14.

19. Kuo fēfē ʻa hono tuku ange ʻe he niʻihi ʻa e ngaahi meʻa mahuʻinga kiate kinautolú ka nau tokanga ki heʻenau ngaahi mātuʻa kuo taʻumotuʻá?

¹⁹ ʻOku ʻiloʻi ʻe he niʻihi kuo kau ki he ngāue fakamalanga taimi-kakató ʻa e fie maʻu ke nau tuku ange honau ngaahi monuú koeʻuhi ka nau foki ki honau ʻapí ke tokangaʻi ʻa ʻenau ngaahi mātuʻa mahamahaki ʻoku nau taʻumotuʻá. Kuo nau tuku ange ʻa e meʻa mahuʻinga kiate kinautolú kae tokoni ki heʻenau ngaahi mātuʻá ʻa ia naʻa nau ʻuluaki fai pehē foki. Ko ha ongo meʻa mali naʻá na ngāue fakamisinale ki muʻa pea ʻokú na kei kau pē ki he ngāue fakamalanga taimi kakató, naʻá na foki ke tauhi ʻena ongo mātuʻa taʻumotuʻa. Kuó na fai ʻeni ʻo lahi hake ʻi he taʻu ʻe 20. ʻI he taʻu ʻe fā kuo maliu atú naʻe ʻave ai ʻa e faʻē ʻa e tangatá ki he ʻapi ki he kau taʻumotuʻá. Ko e husepānití ʻa ia naʻá ne ngāue fakamisinale ki muʻá, ʻokú ne taʻu 60 tupu eni, ka ʻokú ne ʻaʻahi ʻi he ʻaho kotoa pē ki heʻene faʻeé kuó ne taʻu 93. ʻOkú ne fakamatala: “ʻE malava fēfē ke u liʻaki ia? Ko ʻeku faʻeé ia!” ʻI he ngaahi tuʻunga ʻe niʻihi kuo loto-lelei ʻa e ngaahi fakatahaʻanga mo e faʻahinga kehe ke nau tokangaʻi ʻa e kau taʻumotuʻá koeʻuhi kae kei hoko atu ai pē ʻa ʻenau fānaú ʻi honau ngaahi vāhenga ngāué. ʻOku taau foki ke fakaongoongoleleiʻi lahi ʻaupito ʻa e ʻofa taʻesiokita peheé. ʻOku totonu ke fakapotopoto ʻi he tuʻunga taki taha koeʻuhi he ʻoku ʻikai totonu ke liʻaki ʻa e kau taʻumotuʻá. Fakahāhā ʻokú ke ʻofa ʻi hoʻo ongo mātuʻa kuo taʻumotuʻá.​—ʻEkisoto 20:12; ʻEfesō 6:​2, 3.

20. Ko e hā ʻa e faʻifaʻitakiʻanga kuo ʻomai ʻe Sihova kiate kitautolu ʻi hono tokangaʻi ʻo e kau taʻumotuʻá?

²⁰ Ko e moʻoni, ko hotau ngaahi tokoua mo e tuofāfine taʻumotuʻá ko e kalauni fakaʻofoʻofa ia ki ha fāmili pe ʻi ha fakatahaʻanga. Naʻe pehē ʻe Sihova: “ʻIo, ʻo aʻu ki hoʻomou motuʻa ka ko au ai pe, pea ko au te u fafa ʻo aʻu ki hoʻomou ʻuluhiná: ko au kuo u fai, pea ko au te u fua; ʻio, ko au te u fafa mo fakahaofi.” ʻOfa ke tau fakahāhā ʻa e kātaki mo e tokanga tatau ki hotau ngaahi tokoua mo e tuofāfine taʻumotuʻa ʻi he fāmili Kalisitiané.​—ʻAisea 46:4; Palōvepi 16:31.

[Fakamatala ʻi lalo]

ʻOkú Ke Manatuʻi?

◻ Ko e hā ʻa e ngaahi faʻifaʻitakiʻanga ʻoku tau maʻu ʻi he Tohi Tapú ki hono tokangaʻi ʻo e kau taʻumotuʻá?

◻ ʻOku totonu ke fēfē ʻa ʻetau angafai ki he kau taʻumotuʻá?

◻ ʻOku lava fēfē ʻe he ngaahi memipa ʻo e fāmilí ke tokangaʻi ʻa ʻenau kau taʻumotuʻa ʻoku nau ʻofa aí?

◻ Ko e hā ʻoku lava ke fai ʻe he fakatahaʻangá ke tokoni ki he kau taʻumotuʻá?

◻ Ko e hā ʻoku hoko ai ʻa e kau taʻumotuʻá ko ha tāpuaki kiate kitautolu hono kotoa pē?

[Fakatātā ʻi he peesi 19]

Naʻe fakahāhā ʻe Lute ʻa e anga-ʻofa mo e fakaʻapaʻapa ki he toko taha taʻumotuʻa ko Nāomí