Tokanga e ʻOtuá ki he Taʻumotuʻá

ʻOKU ʻikai fakaʻohovale ʻa e lahi hono ngaohikovia he ʻahó ni ʻo e kau taʻumotuʻá. ʻI he kuonga muʻá, naʻe tomuʻa tala ai ʻe he Tohi Tapú ʻo pehē ʻi he lolotonga ʻo e “kuonga fakamui” ʻo e fokotuʻutuʻu taʻefakaʻotua ko ení, ʻe hoko ai ʻa e kakaí ʻo “ʻofa kiate kinautolu pe, . . . taeʻofa-ki-hoʻota.” (2 Timote 3:​1-3) Ko e foʻi lea faka-Kalisi ʻoku fakalea ko e ‘ʻofa-ki-hoʻotá’ ʻe lava ke fakakau ai ʻa e ʻofa ko ē ʻoku hoko fakanatula ʻi he ngaahi lotoʻi fāmilí. ʻI he fehoanaki mo e kikite Fakatohitapú, ko e faʻahinga ʻofa ko iá ʻoku taau ke fakatokangaʻi ʻa e ʻikai ke ʻi ai he ʻaho ní.

ʻI he kehekehe lahi mei he faʻahinga ʻoku nau ngaohikovia ʻa e kau taʻumotuʻá, ʻoku fakamahuʻingaʻi lahi mo tokanga ʻa e ʻOtua ko Sihová ki he faʻahinga ʻoku taʻumotuʻá. Fakakaukau atu ki he anga ʻo hono fakahaaʻi eni ʻi he Tohi Tapú.

“Fakamāu ʻOku Tokanga ki he Fefine Uitou”

Ko e tokanga ʻa e ʻOtua ko Sihová ki he kau taʻumotuʻá ʻoku hā mahino ia ʻi he Ngaahi Konga Tohi Tapu Faka-Hepeluú. Ko e fakatātaá, ʻi he Sāme 68:​5, ʻoku ui ai ʻe Tēvita ʻa e ʻOtuá ko ha “fakamāu ʻoku tokanga ki he [kau] fefine uitou,” tautefito kia kinautolu ʻoku taʻumotuʻá.a ʻI he ngaahi liliu Tohi Tapu kehé, ko e foʻi lea “fakamāu” ʻoku fakalea ia ai ko e “taukapo,” “maluʻi” mo e “mafi.” ʻOku hā mahino, ʻoku tokanga ʻa Sihova ki he kau uitoú. Ko hono moʻoní, ʻoku pehē ʻe he Tohi Tapú, ʻoku kakaha ʻa ʻene ʻitá kapau ʻoku ngaohikovia kinautolu. (Ekisoto 22:​22-24) Ko e kau uitoú​—mo e faʻahinga taʻumotuʻa faitōnungá kotoa—ʻoku fakamahuʻingaʻi lahi ʻe he ʻOtuá pea mo ʻene kau sevānití. ʻOku fakahaaʻi ʻe he Palovepi 16:31 ʻa e vakai ʻa Sihova ko e ʻOtuá pea mo ʻene kakaí ʻi heʻene pehē: “Ko e ʻuluhina ko e kalauni matamatalelei ʻoku maʻu ʻi he hala ʻo e faitotonu.”

ʻOku ʻikai ha ofo, ʻi he hoko ʻa e fakaʻapaʻapa ki he faʻahinga taʻumotuʻá ko ha konga tefito ia ʻo e Lao naʻe ʻoange ʻe Sihova ki ʻIsilelí. Naʻe fekauʻi ki he kau ʻIsilelí: “Te ke tuʻu ki ʻolunga ʻi he ʻao ʻo e ʻuluhinā, pea te ke fakaʻapaʻapa kiate ia ʻoku motuʻa, pea te ke ʻapasia ki ho ʻOtua: ko Sihova au.” (Livitiko 19:32) Ko ia ai, ko e vakai ʻi ʻIsileli ki he faʻahinga taʻumotuʻá naʻe fekauʻaki vāofi ia mo hoto vahaʻangatae tonu mo Sihova ko e ʻOtuá. Heʻikai lava ke pehē ʻe ha taha ʻoku ʻofa ki he ʻOtuá kapau ʻokú ne ngaohikovia ʻa e kau taʻumotuʻá.

ʻOku ʻikai ke moʻulaloa ʻa e kau Kalisitiané ki he Lao ʻa Mōsesé. Kae kehe, ʻoku nau ʻi he malumalu ʻo e “lao ʻa Kalaisi,” ʻa ia ʻoku ʻi ai ʻene kaunga lahi ki honau ʻulungāangá mo e fakakaukaú, ʻo kau ai hono fakahāhā ʻa e ʻofa mo e tokanga ki he ngaahi mātuʻá mo e kau taʻumotuʻá. (Kaletia 6:2; Efeso 6:​1-3; 1 Timote 5:​1-3) Pea ʻoku fakahaaʻi ʻe he kau Kalisitiané ʻa e ʻofá ʻo ʻikai koeʻuhí pē ko hono fekauʻi ke nau fai peheé ka koeʻuhí ko hono ueʻi kinautolu mei honau lotó. “Ke mou tōtōivi hoʻomou fai ʻofa ʻa e taha ki he taha, ʻo fai mei he loto,” ko e ekinaki ia ʻa e ʻapositolo ko Pitá.—1 Pita 1:22.

ʻOku ʻomai ʻe he ākonga ko Sēmisí ʻa e toe ʻuhinga ke tau tokanga ai ki he kau taʻumotuʻá. Naʻá ne tohi: “Ko eni ia ʻa e toʻonga lotu ʻoku maʻa mo taʻe hano ʻuli ʻi he ʻafio ʻa e ʻOtua ko ʻetau Tamai, ʻa ʻete aʻahi ki he faʻahinga matuʻamate mo e kau uitou ʻi heʻenau mamahi, ʻa ʻete tauhi kita mei mamani ke taʻe hato ʻila.” (Semisi 1:27) ʻOku ʻomai ʻe Sēmisi ha foʻi poini fakalotomāfana. ʻOkú ne ʻomai ki heʻetau tokangá ʻa e mahuʻinga ʻo e siʻi faʻahingá ni kia Sihová.

Ko ia ai, ʻoku ʻikai feʻunga pē ke fakaʻehiʻehi mei hono ngaohikovia ʻa e kau taʻumotuʻá. ʻI hono kehé, ʻoku totonu ke tau fakahaaʻi ʻa e tokanga lahi kia kinautolu ʻaki hono fakahoko ʻa e ngaahi ngāue ʻaonga. (Sio ki he puha “Ngāueʻi ʻa e ʻOfá,” ʻi he peesi 6-7.) Naʻe tohi ʻe Sēmisi: “ʻOku mate ʻa e tui ʻo ka mavahe mo e ngaue.”—Semisi 2:26.

Fakafiemālie “ʻi Heʻenau Mamahi”

ʻOku toe ʻi ai ha poini ke ako mei he ngaahi lea ʻa Sēmisí. Fakatokangaʻi naʻe tala ʻe Sēmisi ki he kau Kalisitiané ke nau ʻaʻahi ki he kau uitoú “ʻi heʻenau mamahi.” Ko e foʻi lea faka-Kalisi naʻe liliu ko e “mamahi” ʻoku ʻuhinga tefito iá ko e loto-mamahi, fakamamahiʻi, pe faingataʻaʻia ʻoku tupu mei he ngaahi tenge ʻa hotau ngaahi tuʻunga ʻi he moʻuí. ʻOku ʻikai ha veiveiua ko e tokolahi ʻi he lotolotonga ʻo e kau taʻumotuʻá ʻoku nau hokosia ʻa e loto-mamahi ko iá. Ko e niʻihi ʻoku nau ongoʻi tuēnoa. ʻOku loto-mafasia ʻa e niʻihi kehé ia tupu mei he ngaahi fakangatangata ʻoku hoko ʻi he taʻumotuʻá. Naʻa mo e faʻahinga ʻoku nau mātuʻaki longomoʻui ʻi heʻenau ngāue ki he ʻOtuá ʻoku nau loto-siʻi nai. Fakakaukau angé kia Sione,b ko ha tokotaha fanongonongo faitōnunga ʻo e Puleʻanga ʻo e ʻOtuá ʻo laka hake ʻi he taʻu ʻe fāngofulu, ʻa ia ko e taʻu ʻe tolungofulu fakamuimuí naʻá ne ngāueʻaki ʻi he ngāue taimi-kakato makehé. ʻI he taimí ni ʻi hono taʻu 80 tupú, ʻoku fakahaaʻi ai ʻe Sione ʻokú ne ongoʻi taʻotaʻomia ʻi he taimi ʻe niʻihi. ʻOkú ne pehē: “ʻOku ou faʻa sioloto atu ʻo manatuʻi ʻeku ngaahi fehālaakí, ko e ngaahi fehālaaki lahi ʻaupito. ʻOku ou fakakaukau maʻu pē naʻe mei lava ke u fai ha meʻa lelei ange.”

ʻE lava ke fakafiemālieʻi ʻa e faʻahinga peheé ʻi he ʻiloʻi ko Sihová, neongo ʻoku haohaoa, ʻoku ʻikai te ne ʻamanekina ke tau haohaoa. Neongo ʻokú ne ʻafioʻi ʻetau ngaahi fehālaakí, ʻoku pehē ʻe he Tohi Tapú ʻo fekauʻaki mo ia: “Ka ne ke nofo, ʻe Iaa, ke lama kovi, ko hai ha taha ʻe tuʻu, Atonai?” (Sāme 130:3) ʻIo, ʻoku ʻikai ke siofi ʻe Sihova ʻetau ngaahi fehālaakí ka ʻokú ne ʻafioʻi ʻa e meʻa ʻoku ʻi he lotó. ʻOku anga-fēfē ʻetau ʻiloʻi ení?

Ko Tuʻi Tēvita tonu​—ʻi he ʻikai foʻou kiate ia ʻa e halá mo e taʻehaohaoá—naʻe fakamānavaʻi ia ʻe he ʻOtuá ke ne faʻu ʻa e ngaahi lea ko eni, ʻa ia ʻoku hiki ʻi he Sāme 139:​1-3: “ʻE Sihova, kuo ke hakule au, ʻo ʻiloā. Ko ʻeku nofo hifo mo tuʻu hake ʻoku ke ʻilo, ʻoku ke vavanga ki heʻeku fakakaukau kei mamaʻo. Ko ʻeku laka mo ʻeku tokoto ʻoku ke sivi pe, pea ʻoku ke maheni mo hoku hala fulipe.” Ko e foʻi lea heni ʻa ia ʻoku ʻuhinga fakafoʻilea ko e “sivi,” ʻoku ʻuhinga tatau ia mo hono ʻauʻau ʻe ha tangata ngoue ʻa e kafukafú kae tauhi ʻa e foʻi uité. ʻI hono fakamānavaʻi fakaʻotuá, naʻe fakapapauʻi mai ai ʻe Tēvita ʻoku ʻafioʻi ʻe Sihova ʻa e founga ke sivi ai pea tauhi ʻi heʻene manatú ʻa ʻetau ngaahi ngāue leleí.

Ko ʻetau Tamai fakahēvani mohu mēsí ʻokú ne manatua—mo tukulotoa—ʻa ʻetau ngaahi ngāue leleí lolotonga ʻoku tau faitōnunga ai pē kiate iá. Ko e moʻoni, ʻoku pehē ʻe he Tohi Tapú te ne vakai ki ai ko ha ngāue taʻemāʻoniʻoni ia ke fakangaloʻi ʻetau ngāué mo e ʻofa ʻoku tau fakahāhā ki hono huafá.—Hepelu 6:10.

“Kuo Mole ʻa e Ngaahi Meʻa Muʻa”

ʻOku fakahaaʻi ʻe he Tohi Tapú ko e ngaahi faingataʻa ʻo e taʻumotuʻá naʻe ʻikai ko e meʻa ia naʻe fakataumuʻa ʻe he ʻOtuá ki he faʻahinga ʻo e tangatá. ʻI he hili ʻa e angatuʻu ʻa ʻetau ʻuluaki ongo mātuʻá ki hona Tokotaha-Fakatupú naʻe toki hoko ai ʻa e ngaahi nunuʻa fakatupu maumau ʻo e taʻumotuʻá ko e konga ʻo e moʻui ʻa e tangatá. (Senesi 3:​17-​19; Loma 5:​12) Heʻikai ke hokohoko atu eni ʻo taʻengata.

Hangē ko ia kuo ʻosi fakahāʻí, ko e lahi ʻo e ngaahi tuʻunga kovi ʻoku tau hokosia he ʻaho ní—ʻo kau ai ʻa hono ngaohikovia ʻo e kau taʻumotuʻá—ʻoku ʻomai ai ʻa e fakamoʻoni ʻoku tau moʻui ʻi he “kuonga fakamui” ʻo e fokotuʻutuʻu ko eni ʻo e ngaahi meʻá. (2 Timote 3:1) Ko e taumuʻa ʻa e ʻOtuá ke toʻo ʻa e ngaahi nunuʻa ʻo e angahalá, ʻo kau ai ʻa e ngaahi maumau ʻo e taʻumotuʻá mo e maté. ʻOku pehē ʻe he Tohi Tapú: “[Ko e ʻOtuá] te ne holoholo ʻa e loʻimata kotoa pē mei honau mata; pea ʻe ʻikai toe ai ha mate, pea ʻe ʻikai toe ai ha mamahi, pe ha tangi, pe ha ongosia; kuo mole ʻa e ngaahi meʻa muʻa.”—Fakahā 21:4.

ʻI he māmani foʻou ʻa e ʻOtuá, ko e ngaahi langa mo e mamahi ʻo e taʻumotuʻá ʻe hoko ko e meʻa pē ia ʻo e kuohilí. ʻE pehē pē mo e ngaohikovia ʻo e kau taʻumotuʻá. (Maika 4:4) Naʻa mo e faʻahinga kuo nau mate pea ʻoku nau ʻi he manatu ʻa e ʻOtuá te nau toe moʻui mai, koeʻuhi ke nau maʻu foki ʻa e faingamālie ke moʻui taʻengata ʻi ha māmani palataisi. (Sione 5:​28, 29) ʻI he taimi ko iá, ʻe hā mahino ange ai ʻo ʻikai ʻi ha toe taimi ki muʻa ʻoku tokanga ʻa e ʻOtua ko Sihová ʻo ʻikai ki he kau taʻumotuʻá pē ka ki he faʻahinga kotoa pē ʻoku talangofua kiate iá.

[Fakamatala ʻi lalo]

[Puha/Fakatātā ʻi he peesi 6]

Ngāueʻi ʻa e ʻOfá

ʻI he lotolotonga ʻo e Kau Fakamoʻoni ʻa Sihová, ʻoku takimuʻa ai ʻa e kau mātuʻa ʻi he fakatahaʻangá ʻi hono fakahāhā ʻa e tokanga ki he kau taʻumotuʻá. ʻOku nau tokanga fakamātoato ki he naʻinaʻi ʻa e ʻapositolo ko Pitá: “Mou fei mo tauhi ʻa e fanga sipi ʻa e ʻOtua ʻoku ʻiate kimoutolu.” (1 Pita 5:2) Ko hono tokangaʻi ʻi he ngaahi founga ʻaonga ʻa e kau taʻumotuʻá ko e konga ia ʻo hono tokangaʻi ʻo e tākanga ʻa e ʻOtuá. Ko ia ai, ko e hā nai ʻoku kau ki hení?

ʻOku fiemaʻu ʻa e kātaki pea mo ha ngaahi ʻaʻahi nai mo e fetalanoaʻaki, ke fakapapauʻi ai ʻa e ngaahi fiemaʻu kakato ʻa ha tokotaha taʻumotuʻa. Mahalo pē ʻe fiemaʻu ha tokoni ʻi he faifakataú mo e fakamaʻá, ʻi he ʻave ki he ngaahi fakataha faka-Kalisitiané, ʻi hono lau ʻa e Tohi Tapú mo e ngaahi ʻū tohi faka-Kalisitiané pea mo e ngaahi meʻa lahi kehe. ʻI heʻene malavá, ʻoku totonu ke fai ha ngaahi fokotuʻutuʻu ʻaonga mo alafalalaʻanga pea fakahoko leva.c

Kae fēfē kapau ʻoku ʻi ha tuʻunga faingatāmaki ʻaupito ha tokoua pe tuofefine taʻumotuʻa ʻi he fakatahaʻangá, ʻo ne fiemaʻu nai ha tokoni fakapaʻanga? ʻUluakí, ʻe lelei ke ʻiloʻi pe ʻoku ʻi ai haʻane fānau pe ko ha ngaahi kāinga kehe ʻa ia ʻe lava ke nau tokoni. ʻE fehoanaki eni mo e meʻa ʻoku fakahaaʻi ʻi he 1 Timote 5:4: “Ka ʻo kapau ʻoku maʻu fanau pe makapuna ʻe siʻi uitou, ʻoua muʻa ke akoʻi kinautolu ke nau fai ʻa e toʻonga totonu ki hoto famili, pea ke fai ʻa e totongi ki heʻenau matuʻa: he ko e meʻa ia ʻe hangai fofonga ki ai ʻa e ʻOtua.”

Mahalo pē ko e tokotaha taʻumotuʻá ʻokú ne fiemaʻu ha tokoni ki hono fakapapauʻi pe ʻokú ne taau ki ha ngaahi tokonaki pē ʻe lava ke ʻomai ʻe he puleʻangá. Mahalo pē ʻe malava ke tokoni ha niʻihi ʻi he fakatahaʻangá. Kapau heʻikai malava ha taha ʻo e ngaahi founga ko ení, ʻe lava ke fakapapauʻi ʻe he kau mātuʻá pe ʻoku taau ʻa e tokotahá ki ha tokoni mei he fakatahaʻangá. ʻI he ngaahi tuʻunga ʻe niʻihi, naʻe fakaʻatā eni ʻi he fakatahaʻanga he taimi ʻo e kau ʻapositoló, he naʻe tohi ʻa e ʻapositolo ko Paulá ki hono kaungāngāue ko Tīmoté: “Ke ʻoua naʻa tuʻu ha taha ʻi he tohi ʻo e Kau Uitou, ʻoku siʻi hono taʻu ʻi he onongofulu, ko e uaifi ʻo e tangata pe taha; ko e toko taha kuo fakaongolelei heʻene ngaahi ngaue ʻaonga, haʻane tauhi ha fanau, haʻane fakaafe ha ʻāunofo, haʻane fufulu ʻa e vaʻe ʻo e kau lotu, haʻane tokoniʻi ha kakai kuo moʻua ha mamahi, kapau naʻe ʻilonga pe ha ngaue lelei pea ne feinga ki ai.”—1 Timote 5:​9, 10.

[Fakamatala ʻi lalo]

[Fakatātā ʻi he peesi 5]

Naʻe tokanga ʻa Toakase ki he kau uitou masivá.—Ngāue 9:​36-39