Ko ha Meʻa Fakalilolilo ke ʻOua ʻe Tauhi ʻe he Kau Kalisitiané!
“Kuo u lea ʻasi, ʻo fai ki māmani; . . . naʻe ʻikai te u fai fūfūnaki [“fakalilolilo,” NW] ha momoʻi lea.”—SIONE 18:20.
1, 2. Ko e hā ʻa e ʻuhinga ʻo e foʻi lea faka-Kalisi ko e my·steʹri·on hangē ko ia kuo ngāueʻaki ʻi he ngaahi Konga Tohitapú?
KO E foʻi lea faka-Kalisi ko e my·steʹri·on ʻoku liliu tuʻo 25 ia ʻi he New World Translation of the Holy Scriptures ko e “fakalilolilo toputapu” pea tuʻo 3 ko e “misiteli.” ʻOku pau pē ʻoku mahuʻinga moʻoni ha meʻa fakalilolilo kuo ui ʻoku toputapu! ʻOku totonu ke ongoʻi lāngilangiʻia māʻolunga ha taha pē kuo fakamonūʻaki ia ke ne maʻu ʻa e ʻilo ʻo ha fakalilolilo pehē, koeʻuhi he kuo lau ia ʻokú ne taau ke fevahevaheʻaki mo e ʻOtua Aoniu ʻo e ʻuniveesí ha meʻa fakalilolilo.
2 ʻOku fakapapauʻi ʻi he Expository Dictionary of Old and New Testament Words ʻa Vine ko e “fakalilolilo toputapu” ʻi he tuʻunga lahi tahá ko ha liliu ia ʻoku feʻungamālie lahi ange ʻi he “misiteli.” ʻOku pehē ai fekauʻaki mo e my·steʹri·on: “ʻI he [Ngaahi Konga Tohitapu Faka-Kalisi Kalisitiané] ʻoku ʻuhingá, ʻoku ʻikai ko e misiteli (hangē ko ia ko e foʻi lea faka-Pilitāniá) ka ko ia ko ē, ʻoku taumamaʻo atu ʻi hano mahinoʻi fakaenatula taʻetokonia, ʻe lava ke toki fakaʻilo pē ia ʻe ha fakahā fakaʻotua, pea ʻoku fakaʻilo ia ʻi he founga pea ʻi he taimi kuo kotofa ʻe he ʻOtuá, pea ki he faʻahinga pē ʻoku fakamaama ʻe Hono Laumālié. ʻI he ʻuhinga mahení ʻoku fakahuʻunga ha misiteli ki ha ʻilo ʻoku mamaeʻi; ko hono ʻuhinga Fakatohitapú ko e moʻoni kuo fakaeʻa. Mei hení ko e ngaahi kupuʻi lea kuo tautefito ʻene fekauʻaki mo e tuʻunga-leá ko e ‘fakaʻilo,’ ‘fakahā,’ ‘fakaeʻa,’ ‘malangaʻi,’ ‘mahino,’ mo e ‘tufa.’”
3. Naʻe anga-fēfē ʻa e kehe ʻa e fakatahaʻanga Kalisitiane ʻo e ʻuluaki senitulí mei he ngaahi kulupu fakalotu fakamisiteli ʻe niʻihi?
3 ʻOku fakamamafaʻi ʻi he fakamatala ko ʻení ha faikehekehe lahi ʻi he vahaʻa ʻo e ngaahi kulupu faka-lotu misiteli ko ia naʻe tupulaki ʻi he ʻuluaki senitulí mo e fakatahaʻanga Kalisitiane foʻou naʻe toki fokotuʻú. Kae kehe, ko kinautolu ko ia ʻoku fakaului ki he ngaahi lotu misiteli mavahevahé ʻoku faʻa fakataputapui kinautolu ʻaki ha tukupā ʻo e fakalongotai ke maluʻi ʻa e ngaahi akonaki faka-lotú, ka kuo ʻikai teitei tuku ha fakangatangata pehē ia ki he kau Kalisitiané. Ko e moʻoni naʻe lea ʻa e ʻaposetolo ko Paulá ki he “poto ʻo e ʻOtuá ʻi ha fakalilolilo toputapu,” ʻo ui ia ko e “poto fufū,” ʻa ia ʻoku fufū mei he “kau pule ʻo e fokotuʻutuʻu ko ʻení.” ʻOku ʻikai fufū ia mei he kau Kalisitiané ʻa ē kuo fakaeʻa kiate kinautolu ʻo fakafou ʻi he laumālie ʻo e ʻOtuá koeʻuhi nai ke nau ʻai ia ke ʻiloa atu.—1 Kolinito 2:7-12, NW; fakafehoanaki mo Palovepi 1:20.
Kuo ʻIloʻi Papau ʻa e “Fakalilolilo Toputapú”
4. Ko hai ʻoku fakatefito ai ʻa e “fakalilolilo toputapu,” pea ʻoku anga-fēfē?
4 Ko e “fakalilolilo toputapu” ʻa Sihová ʻoku fakatefito ia ʻia Sīsū Kalaisi. Naʻe tohi ʻe Paula: “[Ko Sihova] naʻá ne fakaʻilo mai kiate kitautolu ʻa e fakalilolilo toputapu ʻo hono finangaló. ʻOku fakatatau ia ki heʻene loto-lelei ʻaʻaná, ʻa ia naʻá ne fakataumuʻa ʻiate ia pē ha founga puleʻi ʻi he kakato ʻo e taimi kuo kotofá, koeʻuhi ke toe fakatahatahaʻi ʻa e ngaahi meʻa kotoa pē ʻo fakafou ʻia Kalaisi, ʻa e ngaahi meʻa ʻi hēvani mo e ngaahi meʻa ʻi māmani. ʻIo, ʻiate ia.” (Efeso 1:9, 10, NW) Naʻe aʻu ʻo lea hangatonu ange ʻa Paula fekauʻaki mo e natula ʻo e “fakalilolilo toputapú” ʻi he taimi naʻá ne fakahanga ai ʻa e tokangá ki he fiemaʻu ki ha “ʻilo totonu ʻo e fakalilolilo toputapu ʻa e ʻOtuá, ʻa ia ko Kalaisi.”—Kolose 2:2, NW.
5. Ko e hā ʻoku kau ki he “fakalilolilo toputapu”?
5 Kae kehe, ʻoku kau ki ai ʻa e meʻa lahi ange, he ko e “fakalilolilo toputapu” ko ha fakalilolilo ia ʻoku lahi ʻa hono ngaahi tafaʻakí. ʻOku ʻikai ko hono ʻiloʻi papau pē ʻo Sīsū ʻi heʻene hoko ko e Hako ʻo e talaʻofá pe Mīsaiá; ʻoku kau ki ai ʻa e ngafa kuo vaheʻi ke ne fakahoko ʻi he taumuʻa ʻa e ʻOtuá. ʻOku kau ki ai ha founga-pule fakahēvani, ko e Puleʻanga faka-Mīsaia ʻo e ʻOtuá, hangē ko ia naʻe fakamatalaʻi maʻalaʻala ʻe Sīsū ʻi he taimi naʻá ne tala ai ki heʻene kau ākongá: “Kuo tuku kiate kimoutolu ke ʻilo ʻa e ngāhi misiteli [“fakalilolilo toputapu,” NW] ʻo e Puleʻanga ʻo Hevani, ka ko kinautolu ʻoku ʻikai tuku ki ai.”—Mātiu 13:11, fakaʻītali ʻamautolu.
6. (a) Ko e hā ʻoku tonu ai ke pehē ko e “fakalilolilo toputapu” naʻe “fufū mei he ngaahi kuonga ʻo itaniti”? (e) Naʻe anga-fefē ʻa hono fakaeʻa fakalakalaka iá?
6 Naʻe pau ke ʻosi ha vahaʻa taimi lōloa ʻi he vahaʻa ʻo e ʻuluaki lave ki he taumuʻa ʻa e ʻOtuá ke tokonaki ha makatuʻunga ki he Puleʻanga faka-Mīsaiá pea mo hono ʻomi ʻo e “fakalilolilo toputapú . . . ki hono ngataʻangá.” (Fakahā 10:7, NW; Senesi 3:15) Ko hono ʻomi ki hono ngataʻangá ʻe hoko ia ʻi hono fokotuʻu ʻo e Puleʻangá, hangē ko ia ʻoku fakamoʻoniʻi ʻi hono fakafehoanaki ʻo e Fakahā 10:7 mo e Fakahā 11:15. Ko hono moʻoní, kuo ʻosi ʻa e taʻu ʻe 4,000 mei hono fai ʻo e ʻuluaki talaʻofa fekauʻaki mo e Puleʻangá ʻi ʻĪtení ʻo aʻu ki he hā ʻa e Tuʻi-Fakanofó ʻi he 29 T.S. Kuo ʻosi mo e toe taʻu ʻe 1,885 ki muʻa ʻi hono fokotuʻu ʻa e Puleʻangá ʻi he langí ʻi he 1914. Ko ia ai, kuo fakaeʻa fakalakalaka ʻa e “fakalilolilo toputapu” ʻi ha vahaʻa taimi ʻo e meimei taʻu ʻe 6,000. (Sio ki he peesi 30.) Naʻe tonu moʻoni ʻa Paula ʻi heʻene lea ʻo fekauʻaki mo e “misiteli [“fakalilolilo toputapú,” NW] ne fufū mei he ngaahi kuonga ʻo itaniti ka kuo fakaeʻa ʻi onopōni, pea fakaha.”—Loma 16:25-27; Efeso 3:4-11.
7. Ko e hā ʻoku lava ai ke tau maʻu ʻa e falala taupotu taha ki he kalasi tamaioʻeiki anga-tonu mo potó?
7 ʻI hono kehe mei he tangatá, ʻa ē ʻoku fakangatangata pē ʻa e vilo ʻene moʻuí, ʻoku ʻikai teitei ongoʻi ʻe Sihova ia ʻoku tenge ia ʻe he taimí ke fakaeʻa ʻoku teʻeki ai taimi ʻa ʻene ngaahi fakaliloliló. ʻOku totonu ke taʻofi kitautolu ʻe he moʻoniʻi meʻa ko ʻení mei he hoko ʻo taʻefaʻakātaki ʻi he taimi ʻoku ʻikai lava ai he lolotongá ni, ke fakamatalaʻi ke tau fiemālie ʻi he ngaahi fehuʻi ʻe niʻihi mei he Tohitapú. Ko e anga-fakanānā ʻi he tafaʻaki ʻa e kalasi tamaioʻeiki anga-tonu mo potó, ʻa ē kuo fekauʻi mai ke tokonaki ki he fāmili Kalisitiané ʻa e meʻakai ʻi hono taimi totonú, ʻokú ne taʻofi ia mei he fiematamuʻa ʻo lele muʻa mo fakamahalo noaʻia ki he ngaahi meʻa ʻoku kei taʻemahinó. ʻOku feinga ʻa e kalasi tamaioʻeikí ke fakaʻehiʻehi mei he hoko ʻo fakamatemateé. ʻOku ʻikai te ne fuʻu loto-mahikihiki ke fakahā ʻoku ʻikai lava he taimí ni ke ne tali ʻa e fehuʻi kotoa pē, ʻi he tauhi maʻu maʻalaʻala ʻi he fakakaukaú ʻa e Palovepi 4:18. Ka he toki meʻa fakalotofiefia ē ke ʻilo ʻe hokohoko atu ʻe Sihova ʻi heʻene taimi pau pea ʻi heʻene founga pē ʻaʻana, ke fakaeʻa ʻa ʻene ngaahi fakalilolilo fekauʻaki mo ʻene ngaahi taumuʻá! ʻOku ʻikai totonu ke tau hoko ʻo taʻefaʻakātaki fekauʻaki mo e fokotuʻutuʻu ʻa Sihová, ʻo feinga taʻefakapotopoto ke ʻoho muʻa ʻi he Tokotaha-Fakahā ʻo e ngaahi fakaliloliló. He meʻa fakafiemālie ē ke ʻilo ko e fouʻanga ʻoku ngāueʻaki ʻe Sihova ʻi he ʻaho ní ʻoku ʻikai te ne fai pehē! ʻOkú ne fakatou anga-tonu mo poto.—Mātiu 24:45; 1 Kolinito 4:6.
Ko e Fakalilolilo ko ia Kuo Fakaeʻá Kuo Pau ke Tala!
8. ʻOku tau ʻilo fēfē kuo pau ke ʻai ke ʻiloa ʻa e “fakalilolilo toputapu”?
8 Kuo ʻikai fakaeʻa ʻe Sihova ʻa ʻene “fakalilolilo toputapu” ki he kau Kalisitiané ke nau tuku fufū ia. ʻOku fiemaʻu ke fakaʻilo ia, ʻi he fehoanaki mo e tefitoʻi moʻoni kuo tuku mai ʻe Sīsū ki he kotoa ʻo hono kau muimuí—ʻo ʻikai ki ha kau tangata faifekau toko siʻi pē: “Ko kimoutolu ko e māma ʻo mamani: ko e kolo ʻoku tuʻu ʻi ha fuga moʻunga ʻoku ʻikai te ne lava ke puli. Pea talaʻehai ʻoku tutu ha māma ʻo ʻai ki he loto puha fua, ka ki he tuʻunga māma pe, pea ʻoku ūlo atu ia ki he kakai kotoa pe ʻoku ʻi he fale. Pehē foki, ke ulo atu hoʻomou māma ke hā ki he kakai, ke nau mamata ki hoʻomou ngāhi ngaue lelei, pea fakamāloʻia ʻa hoʻomou Tamai ʻoku ʻi Hevani.”—Mātiu 5:14-16; 28:19, 20.
9. Ko e hā ʻokú ne fakamoʻoniʻi ko Sīsuú naʻe ʻikai ko ha tokotaha liukava, ʻo hangē ko ia ʻoku taukaveʻi ʻe he niʻihi?
9 Naʻe ʻikai ha fakakaukau liukava ʻa Sīsū ke nōfoʻi ai ʻi hono faʻu ha kautaha fakapulipuli ʻo ha kau muimui ke tuli ki he ngaahi taumuʻa fakalilolilo. ʻI he tohi ko e Early Christianity and Society, naʻe tohi ai ʻa Robert M. Grant ʻo fekauʻaki mo e maluʻi naʻe fai ʻo e muʻaki kau Kalisitiané ʻe he tokotaha-taukapo ʻo e tuí ʻi he senituli hono uá ko Justin Martyr: “Kapau ko e kau liukava ʻa e kau Kalisitiané te nau nofo toitoi koeʻuhi ke aʻusia ʻenau taumuʻá.” Ka ʻe lava fēfē ke “nofo toitoi” ʻa e kau Kalisitiané pea ʻi he taimi tatau te nau hoko ʻo hangē “ko e kolo . . . ʻoku tuʻu ʻi ha fuga moʻunga”? ʻE ʻikai ke nau teitei fufū ʻenau maamá ʻi ha lalo puha fua! Ko ia ai, ʻoku ʻikai ha meʻa ke manavahē ai ʻa e puleʻangá ki heʻenau ngāué. Naʻe hoko atu ʻa e tangata faʻutohi ko ʻení ʻo fakamatalaʻi kinautolu ko e “faʻahi lelei taha ʻa e ʻemipolá ʻi he meʻa fekauʻaki mo e melinó mo e fokotuʻutuʻu māú.”
10. Ko e hā ʻoku totonu ai ke ʻoua ʻe tauhi ʻe he kau Kalisitiané ke fakalilolilo honau ʻiloʻangá?
10 Naʻe ʻikai fiemaʻu ʻe Sīsū ʻa hono kau muimuí ke tauhi fakalilolilo ʻa honau ʻiloʻangá ʻi he tuʻunga ko e kau mēmipa ʻo ha kulupu ʻoku taku ko ha lotu mavahevahe. (Ngāue 24:14; 28:22) Ko e ʻikai lava ʻo tuku ke ulo atu ʻetau māmá ʻi he ʻaho ní ʻe taʻefakahōifua ia fakatouʻosi kia Kalaisi pea ki heʻene Tamaí, ko e Tokotaha-Fakahā ʻo e ngaahi fakaliloliló, pea ʻe ʻikai te ne ʻai kitautolu ke tau fiefia.
11, 12. (a) Ko e hā ʻoku finangalo ai ʻa Sihova ke ʻai ke fakaʻilo ʻa e lotu faka-Kalisitiané? (e) Naʻe anga-fēfē hono fokotuʻu ʻe Sīsū ʻa e faʻifaʻitakiʻanga totonú?
11 Ko Sihová ʻoku “ʻikai te ne finangalo ke ʻauha ha taha, ka ke aʻusia ʻa e fakatomala ʻe he kakai kotoa pe.” (2 Pita 3:9; Isikeli 18:23; 33:11; Ngāue 17:30) Ko e makatuʻunga ki he fakamolemoleʻi ʻo e ngaahi angahala ʻa e faʻahinga fakatomala ʻo e tangatá ko e tui ki he feilaulau huhuʻi ʻa Sīsū Kalaisí, ʻa ē naʻá ne foaki atu ia tonu ko ha huhuʻi maʻá e tokotaha kotoa pē—ʻo ʻikai maʻa ha kiʻi toko siʻi pē—koeʻuhi “ko ia kotoa pe ʻoku tui pikitai kiate ia ke ʻoua naʻa ʻauha, kae maʻu ʻa e moʻui taʻengata.” (Sione 3:16) ʻOku mātuʻaki mahuʻinga ke tokoniʻi ʻa e kakaí ke nau fou ʻi he ngaahi sitepu ʻoku fiemaʻú ʻa ia te ne ʻai ai kinautolu ke taau ke fakamāuʻi ko e fanga sipi, ʻo ʻikai ko e fanga kosi, ʻi he lolotonga ʻo e fakamaau ka hoko maí.—Mātiu 25:31-46.
12 ʻOku ʻikai ko e lotu faka-Kalisitiane moʻoní ke fūfuuʻi; kuo pau ke fakaʻilo ia ʻi he founga feʻungamālie kotoa pē ʻe ala lavá. Naʻe fokotuʻu ʻe Sīsū tonu ʻa e faʻifaʻitakiʻanga totonú. ʻI he taimi naʻe fakafehuʻi ai ʻe he taulaʻeiki lahí ʻo kau ki heʻene kau ākongá mo ʻene akonakí, naʻá ne pehē: “Kuo u lea ʻasi, ʻo fai ki māmani; ko ʻeku ako naʻe fai maʻu pe, kaeʻumaʻā ʻi he Temipale, ʻa e potu ʻoku fakataha ki ai ʻa haʻa Siū kotoa; pea naʻe ʻikai te u fai fūfūnaki [“fakalilolilo,” NW] ha momoʻi lea.” (Sione 18:19, 20) ʻI he vakai atu ki he meʻa ko ʻeni naʻe hoko ki muʻá, ko hai ia ha tokotaha manavahē-ʻOtua ʻe fakatoʻotoʻa ke tauhi fakalilolilo ʻa e meʻa kuo fakahā ʻe he ʻOtuá kuo pau ke talakí? Ko hai ia te ne teitei fufū ʻa e “ki oe ilo” ʻa ia ʻoku taki atu ki he moʻui taʻengatá? ʻI he fai peheé, te ne ʻai ia ʻo hangē ko e kau lotu mālualoi ʻo e ʻuluaki senitulí.—Luke 11:52, PM; Sione 17:3.
13. Ko e hā ʻoku totonu ai ke tau malanga ʻi he faingamālie taki taha kotoa pē?
13 ʻOfa ke ʻoua naʻa faifai ange pea pehē mai ʻe ha taha ko kitautolu Kau Fakamoʻoni ʻa Sihová kuo tau tauhi ʻo fakalilolilo ʻa e pōpoaki ʻo e Puleʻanga ʻo e ʻOtuá! Tatau ai pē pe ʻoku tali pe talitekeʻi ʻa e pōpoakí, kuo pau ke ʻiloʻi ʻe he kakaí kuo ʻosi malangaʻi ia. (Fakafehoanaki mo Isikeli 2:5; 33:33.) Ko ia ai, tau ngāueʻaongaʻaki ʻa e faingamālie taki taha kotoa pē ke leaʻaki ʻa e pōpoaki ʻo e moʻoní ki he tokotaha kotoa pē, ʻi ha feituʻu pē ʻe fakaʻohovale haʻatau fetaulaki ai mo kinautolu.
ʻAi ʻa e Ngaahi Mātaʻu ʻi he Kaungao ʻo Sētané
14. Ko e hā ʻoku ʻikai totonu ai ke tau toumoua ʻo fekauʻaki mo hono fakahāhā ʻo ʻetau founga-lotú?
14 ʻI he ngaahi feituʻu lahi kuo lahi ange ʻaupito ʻa e hoko ai ʻa e Kau Fakamoʻoni ʻa Sihová ko e senitā ia ʻo e tokanga ʻa e ngaahi maʻuʻanga ongoongó. ʻOku meimei tatau ia mo e meʻa naʻe hoko ki he muʻaki kau Kalisitiané, ʻoku faʻa fakafofongahalaʻi kinautolu pea fakakulupu fakataha kinautolu mo e ngaahi lotu fehuʻia mavahevahé pea mo e ngaahi kautaha fakaliloliló. (Ngāue 28:22) ʻOku hanga nai ʻe heʻetau fai fakahāhā ʻi he malangá ʻo ʻai ke faingofua ange hano ʻohofi kitautolu? ʻE taʻefakapotopoto moʻoni ia, pea ʻe ʻikai fai tatau ia mo e akonaki ʻa Sīsū, ʻoku ʻikai fiemaʻu ke tau tuiaki atu ki ha lotolotonga ʻo ha fekīhiaki. (Palovepi 26:17; Mātiu 10:16) Kae kehe, ʻoku ʻikai totonu ke fufū ʻa e ngāue ʻaonga ko hono malangaʻi ʻo e Puleʻangá mo hono tokoniʻi ʻa e kakaí ke fakaleleiʻi ʻenau moʻuí. ʻOkú ne fakalāngilangiʻi ʻa Sihova, ʻo hākeakiʻi ia, ʻo fakahanga ʻa e tokangá kiate ia pea ki hono Puleʻanga kuo fokotuʻú. Ko e tali fakafiefia ki muí ni ʻa e moʻoni ʻo e Tohitapú ʻi ʻIulope Hahake mo e ngaahi konga ʻo ʻAfiliká kuo hoko ia ʻi he konga lahi koeʻuhi ko e tupulekina ʻo e tuʻunga fai fakahāhā ko ia ʻoku lava ke malangaʻi he taimí ni ai ʻa e moʻoní.
15, 16. (a) Ko e hā ʻa e ngaahi taumuʻa ʻoku hoko ʻi heʻetau fai fakahāhaá mo e tuʻumālie fakalaumālié, ka ko ha meʻa ʻeni ke fai ki ai ha hohaʻa? (e) Ko e hā ʻoku fakamono ai ʻe Sihova ʻa e ngaahi mātaʻú ki he kaungao ʻo Sētané?
15 Ko e moʻoni ko e fakahāhā ko ia ʻoku malangaʻaki ʻe he Kau Fakamoʻoni ʻa Sihová, ko e palataisi fakalaumālie ʻoku nau fiefia aí, mo ʻenau tuʻumālié—fakatouʻosi ʻi he maʻuʻanga moʻui fakaetangatá mo e koloa fakamatelié—ʻoku ʻikai ke taʻefakatokangaʻi. Lolotonga ʻene tohoekina mai ʻa e faʻahinga loto-totonú, ʻe talitekeʻi nai ʻe he ngaahi moʻoniʻi meʻa ko ʻení ʻa e kau fakafepakí. (2 Kolinito 2:14-17) Ko hono moʻoní, ʻe faifai atu pē nai ʻo tohoakiʻi ʻe he meʻá ni ʻa e ngaahi kongakau ʻa Sētané ki hono ʻohofi ʻo e kakai ʻa e ʻOtuá.
16 ʻOku totonu ke fakatupunga ha hohaʻa ʻi he meʻá ni? Fakatatau ki he kikite ʻa Sihova ʻoku maʻu ʻi he Isikelí vahe 38 ʻoku ʻikai. ʻOku tomuʻa tala ai ko Koki ʻo Mēkokí, ko hono fakamatalaʻi ia ʻo Sētane ko e Tēvoló talu mei hono tukuhifo ki he feituʻu ʻo e māmaní hili hono fokotuʻu ʻo e Puleʻangá ʻi he 1914, te ne taki ha ʻoho ki he kakai ʻa e ʻOtuá. (Fakahā 12:7-9) Naʻe folofola ʻa Sihova kia Koki: “Te ke pehe, Kau ʻalu hake ki he fonua tukuʻuta, ʻo aʻu ki he kakai nofo noa; ʻa kinautolu ʻoku nofo nonga honau kotoa: ʻOku nofo taʻehanau ʻa, ʻo ʻikai hanau songo pe lau matapa; ke u maʻu ha vete ʻo faʻao meʻa—ko e toe ʻai ho nima ki he ngaahi potu maumau kuo nofoʻia, pea ki he kakai kuo tanaki mei he ngaahi puleʻanga, kuo nau maʻu monumanu mo e koloa, ʻoku nau nofo ʻi he pito ʻo mamani.” (Isikeli 38:11, 12) Kae kehe, ʻoku fakahaaʻi ʻi he veesi 4 ʻoku ʻikai fiemaʻu ke manavahē ʻa e kakai ʻa e ʻOtuá ki he ʻohofi ko ʻení, koeʻuhi he ko e tupu ia mei he ngāue ʻa Sihova. Ka ko e hā ʻe fakaʻatā ai ʻe he ʻOtuá—ʻio, naʻa mo hono langaʻi—ha ʻohofi fakaʻāuliliki ʻo hono kakaí? ʻOku tau lau ʻi he veesi 23 ʻa e tali ʻa Sihová: “Te u ʻai ke u ha lahi mo tapuha; ʻio, te u ʻai ke u ʻilonga ʻi he vakai ʻa e ngaahi puleʻanga lahi; pea te nau ʻilo ko Sihova au.”
17. ʻOku totonu ke anga-fēfē ʻetau vakai atu ki he ʻoho ʻa Koki ʻoku tuʻunuku maí?
17 Ko ia ai, ʻi he ʻikai nofo ʻo tailiili ki he ʻoho ʻa Kokí, ʻoku hanga atu ʻa e kakai ʻa Sihová mo e ʻamanaki ki he fakahoko lahi ange ko ʻeni ʻo e kikite ʻa e Tohitapú. He fakafiefia ē ke ʻilo ʻi hono fakatuʻumālieʻi mo tāpuekina ʻene kautaha hāmaí, ʻoku fakamono ai ʻe Sihova ʻa e ngaahi mātaʻu ki he kaungao ʻo Sētané ʻo tohoakiʻi ai ia mo ʻene kongakau fakakautaú ki honau ikunaʻí!—Isikeli 38:4.
Laka Ange he Taimí Ni ʻi ha Toe Taimi!
18. (a) Ko e hā ʻoku hoko ʻo ʻilo ʻe he kakai tokolahi he taimi ní, pea ko e hā hono ʻuhingá? (e) ʻOku anga-fēfē ʻa e hoko ko ha ueʻi mālohi ʻa e tali ki hono malangaʻi ʻo e Puleʻangá?
18 Kuo mātuʻaki fai fakahāhā ʻa e Kau Fakamoʻoni ʻa Sihová ʻi onopooni ʻi hono fakamatalaʻi ʻenau ngaahi fakakaukau makatuʻunga ʻi he Tohitapú, neongo kuo ʻikai ke manakoa ʻeni. Kuo nau fakatokanga ʻi he ngaahi hongofuluʻi taʻu ki he ngaahi fakatuʻutāmaki ʻo e ifí mo e ngāuehalaʻaki ʻa e faitoʻo kona tapú, ko e sio nounou ʻi hono akoʻi ke faʻifaʻiteliha ha kiʻi tama, ko e ngaahi nunuʻa kovi ʻo e fakafiefia kuo ʻuliʻiʻaki ʻa e fehokotaki fakasino taʻemalí mo e fakamālohí, pea mo e fakatuʻutāmaki ʻo e huhu totó. Kuo nau toe ʻohake ʻa e feliliuaki ʻo e fakakaukau ki he ʻevolūsoné. Kuo tokolahi ange ʻa e kakai ʻoku nau pehē ʻi he taimí ni, “ʻOku ʻikai ke hala ʻa e Kau Fakamoʻoni ʻa Sihová.” Kapau naʻe ʻikai te tau mātuʻaki fai fakahāhā ʻi hono ʻai ke ʻiloa ʻetau ngaahi fakakaukaú, ʻe ʻikai lava ke nau tali pehē ni. Pea ʻoua naʻa taʻetokangaʻi ʻa e moʻoniʻi meʻa ko ia ʻi hano fai ha fakamatala peheé, ʻoku nau fou ai ʻi ha sitepu ki he tafaʻaki ʻo e pehē, “Sētane, ko e tokotaha loi koe; ʻoku moʻoni pē ʻa Sihova ia.” Ko hano ueʻi mālohi ē ʻo kitautolu ke hokohoko atu ʻi he muimui ki he faʻifaʻitakiʻanga ʻa Sīsuú, ʻo leaʻaki fakahāhā ʻa e lea ʻo e moʻoní!—Palovepi 27:11.
19, 20. (a) Ko e hā ʻa e fakapapau naʻe fakamatalaʻi ʻe he kakai ʻa Sihová ʻi he 1922, pea ʻoku kei ngāueʻaki ʻa e ngaahi leá ni? (e) ʻOku totonu ke anga-fēfē ʻetau vakai ki he “fakalilolilo toputapu” ʻa Sihová?
19 Kuo fuoloa ʻa e mahino ki he kakai ʻa Sihová ʻa honau fatongia fekauʻaki mo e meʻá ni. ʻI ha fakataha-lahi ʻiloa ʻi he 1922, naʻe fakafiefiaʻi ai ʻe J. F. Rutherford, ko e palesiteni ʻo e Sōsaieti Taua Leʻó ʻi he taimi ko iá ʻa ʻene kau fanongó ʻaki ʻene pehē: “Fakamātoato, ʻāʻā, longomoʻui, loto-toʻa. Hoko ko e kau fakamoʻoni anga-tonu mo moʻoni maʻá e ʻEikí. Laka atu ki muʻa ʻi he taú kaeʻoua kuo fakalala ʻa e toetoenga kotoa pē ʻo Pāpiloné. Fakaongo atu ki he mamaʻó ʻa e pōpoakí. Kuo pau ke ʻilo ʻe he māmaní ko Sihova ko e ʻOtuá ia pea ko Sīsū Kalaisí ko e Tuʻi ʻo e ngaahi tuʻi mo e ʻEiki ʻo e ngaahi ʻeiki. Ko e ʻaho mahuʻinga taha ʻeni. Vakai, ʻoku pule ʻa e Tuʻí! Ko kimoutolú ko hono kau fakafofonga ke fakahāhā ʻa e meʻá ni. Ko ia tuʻuaki, tuʻuaki, tuʻuaki, ʻa e Tuʻí mo hono puleʻangá.”
20 Hangē pē ko e mahuʻinga ʻa e ngaahi leá ni ʻi he 1922, he hulu ange ē ʻene pehē ʻi he taʻu ʻe 75 ki muí, ʻi he mātuʻaki ofi ange ʻa hono fakaeʻa ʻo Kalaisi ko e Fakamaau mo e Tokotaha-Sāuni! Ko e pōpoaki ʻo e Puleʻanga ʻo Sihova kuo fokotuʻú pea mo e palataisi fakalaumālie ʻoku fiefia ai ʻa e kakai ʻa e ʻOtuá ko ha “fakalilolilo toputapu” ia ʻoku fuʻu maʻongoʻonga moʻoni ke tuku tauhi. Hangē pē ko ia naʻe fakahaaʻi maʻalaʻala ʻe Sīsuú, ko hono kau muimuí kuo pau ke nau hoko ko e kau fakamoʻoni “ki he ngataʻanga ʻo māmani,” ʻaki ʻa e tokoni ʻa e laumālie māʻoniʻoní, ʻo fekauʻaki mo hono tuʻunga tefito ʻi he taumuʻa taʻengata ʻa Sihová. (Ngāue 1:8; Efeso 3:8-12) Ko hono moʻoní, ʻi heʻetau hoko ko e kau sevāniti ʻa Sihová, ko e ʻOtua ʻokú ne fakaeʻa ʻa e ngaahi meʻa fakaliloliló, heʻikai te tau teitei tuku tauhi maʻa kitautolu ʻa e fakalilolilo ko ʻení!
Ko e Hā Haʻo Tali?
◻ Ko e hā ʻa e “fakalilolilo toputapu”?
◻ ʻOku tau ʻilo fēfē ʻoku totonu ke fanongonongo iá?
◻ Ko e hā ʻokú ne fakatupunga ke ʻohofi ʻe Koki ʻa e kakai ʻa Sihová, pea ʻoku totonu ke anga-fēfē ʻetau fakakaukau atu ki he meʻá ni?
◻ Ko e hā ʻoku totonu kiate kitautolu taki taha ke tau fakapapauʻi ke faí?
[Puha ʻi he peesi 16]
Ko ha “Fakalilolilo Toputapu” Kuo Fakaeʻa Fakalakalaka
◻ Hili ʻa e 4026 K.M.: ʻOku talaʻofa ʻa e ʻOtuá ke fokotuʻu hake ha Hako ke ne fakaʻauha ʻa Sētane.—Senesi 3:15
◻ 1943 K.M.: Ko e fuakava ʻia ʻĒpalahamé ʻoku fakapapauʻi, ʻi he talaʻofa ko e Hakó ʻe hoko mai fakafou ʻia ʻĒpalahame.—Senesi 12:1-7
◻ 1918 K.M.: Fanauʻi ʻo ʻAisake ko e ʻea ki he fuakavá.—Senesi 17:19; 21:1-5
◻ 1761 K.M. nai: ʻOku fakapapauʻi ʻe Sihova ʻe hoko mai ʻa e Hakó fakafou ʻi he foha ʻo ʻAisake ko Sēkopé.—Senesi 28:10-15
◻ 1711 K.M.: Naʻe fakahā ʻe Sēkope ʻe hoko mai ʻa e Hakó ʻi hono foha ko Siutá.—Senesi 49:10
◻ 1070-1038 K.M.: ʻOku ʻilo ʻe Tuʻi Tēvita ko e Hakó ʻe ʻi hono haʻá pea ʻe pule ia ko e Tuʻi ʻo taʻengata.—2 Samiuela 7:13-16; Sāme 89:35, 36
◻ 29-33 T.S.: ʻOku fakapapauʻi ko Sīsū ʻa e Hakó, ko e Mīsaia, ko e fakamaau ʻi he kahaʻú, pea ko e Tuʻi-Fakanofo.—Sione 1:17; 4:25, 26; Ngāue 10:42, 43; 2 Kolinito 1:20; 1 Timote 3:16
◻ ʻOku fakaeʻa ʻe Sīsū ʻe ʻi ai hono kaungā-pule mo e fakamaau, pea ko e Puleʻanga fakahēvaní ʻe ʻi ai ʻa e faʻahinga ʻe pule ki ai ʻi he māmaní, pea ko e kotoa ʻo hono kau muimuí kuo pau ke nau hoko ko e kau malangaʻi ʻo e Puleʻangá.—Mātiu 5:3-5; 6:10; 28:19, 20; Luke 10:1-9; 12:32; 22:29, 30; Sione 10:16; 14:2, 3
◻ ʻOku fakaeʻa ʻe Sīsū ʻe fokotuʻu ʻa e Puleʻangá ʻi ha taimi pau, hangē ko ia ʻoku kaungā fakamoʻoni ki ai ʻa e ngaahi meʻa ʻoku hoko ʻi he māmaní.—Mātiu 24:3-22; Luke 21:24
◻ 36 T.S.: ʻOku ʻilo ʻe Pita ʻe kaungā-hoko ko e ngaahi ʻea ki he Puleʻangá ʻa e faʻahinga ʻikai ko e Siu.—Ngāue 10:30-48
◻ 55 T.S.: ʻOku fakamatalaʻi ʻe Paula ko e kaungā-ʻea ki he Puleʻangá ʻe toe fokotuʻu hake ki he moʻui taʻefaʻamaté mo e taʻefaʻaʻauhá ʻi he lolotonga ʻo e ʻi ai ʻa Kalaisí.—1 Kolinito 15:51-54
◻ 96 T.S.: Ko Sīsū, ʻa ia kuó ne ʻosi pule hifo ki hono kau muimui paní, ʻokú ne fakaeʻa mai ko honau tokolahí fakakātoa ko e toko 144,000.—Efeso 5:32; Kolose 1:13-20; Fakahā 1:1; 14:1-3
◻ 1879 T.S.: ʻOku tuhu ʻa e Zion’s Watch Tower ki he 1914 ko ha taʻu ia ʻoku mahuʻinga moʻoni ʻi hono ngāueʻi ʻo e “fakalilolilo toputapu” ʻa e ʻOtuá
◻ 1925 T.S.: ʻOku fakamatala ʻa e Watch Tower naʻe fanauʻi ʻa e Puleʻangá ʻi he 1914; kuo pau ke fanongonongo ʻa e “fakalilolilo toputapu” fekauʻaki mo e Puleʻangá.—Fakahā 12:1-5, 10, 17
[Fakatātā ʻi he peesi 29]
Hangē pē ko honau Takí, ko Sīsū, ʻoku talaki fakahāhā ʻe he Kau Fakamoʻoni ʻa Sihová ʻa e Puleʻanga ʻo Sihová