Akoʻi Hoʻo Fānaú

Ko ha Meʻa Fakapulipuli ʻe Lava Ke Ke Tala ki he Niʻihi Kehé

KUO faifai ange pea tala atu kia koe ha meʻa fakapulipuli?—a ʻOku ʻi ai e meʻa ʻe taha te u saiʻia ke tala atu kiate koe. ʻI he Tohi Tapú ʻoku ui ia ai ko e “mea fakalilolilo [‘fakapulipuli toputapu,’ NW], aia nae tuku fufu be talu ae kamataaga o mamani.” (Loman 16:25, PM) ʻI he kamatá ko e ʻOtuá pē naʻá ne ʻilo ʻa e ‘mea fakapulipuli toputapú.’ Ta sio angé ki he anga hono ʻai ʻe he ʻOtuá ke hoko ʻo ʻiloʻi ʻe he tokolahi ʻa e meʻa fakapulipuli ko ení.

Ke kamataʻakí, ʻokú ke ʻilo ko e hā ʻa e ʻuhinga ʻo e ‘toputapú’?— ʻOku ʻuhinga ʻa e foʻi leá ko e māʻoniʻoni, maʻa, pe makehe ʻaupito. Ko ia ʻoku ui ʻa e meʻa fakapulipulí ko e meʻa fakapulipuli toputapu koeʻuhí ʻoku mei he ʻOtuá ia, ʻa ia ʻoku māʻoniʻoni. Ko hai ʻokú ke fakakaukau naʻa nau loto ke ʻilo ki he meʻa fakapulipuli makehe ko ení?— Ko e kau ʻāngeló. ʻOku pehē ʻe he Tohi Tapú: “[Ko e] ngaahi meʻa ʻoku holi ʻa e kau angelo ke fakasio hifo ki ai.” ʻIo, naʻa nau holi ke mahinoʻi ʻa e meʻa fakapulipuli māʻoniʻoni ko ení.—1 Pita 1:12.

ʻI he taimi naʻe haʻu ai ʻa Sīsū ki māmaní, naʻá ne talanoa fekauʻaki mo e meʻa fakapulipuli toputapú peá ne kamata fakamatalaʻi ia. Naʻá ne tala ki heʻene kau ākongá: “Kuo tuku kiate kimoutolu ke mou ilo ae mea lilo [‘fakapulipuli toputapu,’ NW] oe buleaga oe Otua.” (Maake 4:11, PM) Naʻá ke fakatokangaʻi ʻa e meʻa ʻoku fekauʻaki mo e meʻa fakapulipuli toputapú?— ʻOku fekauʻaki ia mo e Puleʻanga ʻo e ʻOtuá, ʻa ia naʻe akoʻi mai ʻe Sīsū ke ta lotu fekauʻaki mo iá!—Mātiu 6:9, 10.

Ta sio angé he taimí ni ki he founga naʻe hoko ai ʻa e Puleʻanga ʻo e ʻOtuá ko ha meʻa fakapulipuli “talu ae kamataaga” ʻo aʻu ki he haʻu ʻa Sīsū ki he māmaní peá ne kamata fakamatalaʻi ia. Hili hono maumauʻi ʻe ʻĀtama mo ʻIvi ʻa e lao ʻa e ʻOtuá pea tuku kinaua ki tuʻa mei he ngoue ʻo ʻĪtení, naʻe hoko ʻo ʻiloʻi ʻe he kau sevāniti ʻa e ʻOtuá ʻe kei ngaohi pē ʻe he ʻOtuá ʻa e māmaní kātoa ko ha palataisi. (Senesi 1:26-28; 2:8, 9; Aisea 45:18) Naʻa nau tohi fekauʻaki mo e kakai fiefia te nau maʻu ʻa e māmaní ʻi he malumalu ʻo e Puleʻanga ʻo e ʻOtuá.—Sāme 37:11, 29; Aisea 11:6-9; 25:8; 33:24; 65:21-24.

Fakakaukau he taimí ni fekauʻaki mo e Pule ʻo e Puleʻanga ʻo e ʻOtuá. ʻOkú ke ʻilo ʻa e tokotaha kuo fili ʻe he ʻOtuá ke hoko ko e Pulé?— Ko hono ʻAló, ko e “ʻEiki ʻo e Melino,” ʻa Sīsū Kalaisi. “ʻE ʻi hono uma ʻa e puleʻanga” pe pule fakapilinisí, ko e lau ia ʻa e Tohi Tapú. (Aisea 9:6-7 [9:5, 6, PM]) Ko koe mo au kuo pau ke ta “ilo, ki he fakaha oe mea fakalilolilo [‘fakapulipuli toputapu,’ NW] ae Otua, io, ae Tamai, bea mo Kalaisi.” (Kolose 2:2, PM) ʻOku fiemaʻu ke ta ʻilo naʻe ʻohifo ʻe he ʻOtuá ʻa e moʻui ʻa e ʻuluaki ʻāngelo (ʻAlo laumālié) ʻa ia naʻá ne fakatupú pea ʻai ʻa e moʻui ko iá ʻi loto ʻia Mele. Ko e ʻAlo ko iá, ʻa ia ko ha ʻāngelo mālohi naʻá ne hoko ko e toko taha naʻe fekau mai ʻe he ʻOtuá ki he māmaní ko ha feilaulau koeʻuhi ke lava ʻo ta maʻu ai ʻa e moʻui taʻengatá.—Mātiu 20:28; Sione 3:16; 17:3.

Neongo ia, ʻoku ʻi ai ʻa e meʻa lahi ange, ʻa ia ʻoku fiemaʻu ke ta ʻilo fekauʻaki mo e meʻa fakapulipuli ko ení ʻi hono fili pē ʻe he ʻOtuá ʻa Sīsū ke hoko ko e Pule ʻo Hono Puleʻangá. Ko e konga ʻo e meʻa fakapulipuli toputapú ko e niʻihi kehe ko ia te nau ʻi hēvani fakataha mo Sīsū kuo ʻosi toetuʻú, fakatouʻosi ʻa e tangata mo e fefine. Te nau pule fakataha mo Sīsū ʻi hēvani!—Efeso 1:8-12.

Te ta ako ki he ngaahi hingoa ʻo e niʻihi ʻo e faʻahinga ko ia te nau pule fakataha mo Sīsū ʻi hēvaní. Naʻe tala ʻe Sīsū ki heʻene kau ʻapositolo faitōnungá te ne ʻalu ki ai ʻo teuteu ha potu moʻonautolu. (Sione 14:2, 3) ʻI he sio ki he ngaahi konga Tohi Tapu hoko haké, te ke sio ai ki he ngaahi hingoa ʻo e kau tangata mo e kau fefine ʻe niʻihi ʻa ia te nau pule fakataha mo Sīsū ʻi he Puleʻanga ʻo ʻene Tamaí.—Mātiu 10:2-4; Maake 15:39-41; Sione 19:25.

ʻI ha taimi fuoloa, naʻe ʻikai ʻilo ai ʻa e tokolahi ʻo e kakai te nau pule ʻi hēvani fakataha mo Sīsū ko e konga ʻo hono Puleʻangá. Ka ʻi he taimi ní ʻokú ta ʻilo ʻa e tokolahí. ʻOkú ke ʻiloʻi ia?— ʻOku pehē ʻe he Tohi Tapú ko e toko 144,000. Ko e konga foki eni ʻo e meʻa fakapulipuli toputapú.—Fakahā 14:1, 4.

ʻOkú ke loto-tatau ko e ‘mea fakapulipuli toputapu oe buleaga oe Otuá’ ʻa e meʻa fakapulipuli fakaofo taha kuo faifai ange pea lava ʻe ha taha ke ʻiloʻí?— Kapau ko ia, ta feinga ke ako ʻa e meʻa kotoa te ta malava fekauʻaki mo iá koeʻuhí ke lava ke ta fakamatalaʻi ʻa e ngaahi meʻa ko ení ki he tokolahi taha ʻo e kakai te ta malavá.

[Fakamatala ʻi lalo]

FEHUʻI:

▪ Ko e hā hono ui ʻa e meʻa fakapulipuli naʻá ta talanoa fekauʻaki mo iá, pea ko e hā hono ʻuhinga ʻoku ui peheʻi aí?

▪ Ko e hā ʻa e meʻa fakapulipuli ko ení, pea ko hai ʻa e ʻuluaki tokotaha naʻá ne akoʻi ʻa e kakaí fekauʻaki mo iá?

▪ Ko e hā ʻa e ngaahi meʻa ʻe niʻihi fekauʻaki mo e meʻa fakapulipuli ko ení kuó ke akó?

▪ ʻE fēfē nai haʻo fakamatalaʻi ʻa e meʻa fakapulipuli toputapú ki ha kaumeʻa?

[Fakatātā ʻi he peesi 31]

Ko e hā ʻokú ke fakakaukau naʻe feinga ʻa e kau ʻāngeló ke ʻilo ki aí?