Līpooti ʻa e Kau Fanongonongo ʻo e Puleʻangá

“ʻE Tali ko Au ʻe he Kakai Na”

KO E ʻeiki tau mālohi Sīlia ko Neamaní ʻoku kilia. Kapau naʻe tuku taʻefaitoʻo, ʻoku lava ke iku ʻa e mahaki fakalielia ko ʻení ki hono maumauʻi ʻo e sinó mo e mate. Ko e hā ke fai ʻe Neamaní? Naʻe ʻi he lotolotonga ʻo e faʻahinga ko ia ʻi he fale ʻo Neamaní ha kiʻi taʻahine, “bobula . . . mei he fonua o Isileli.” Naʻá ne lea loto-toʻa ʻo fakahaaʻi ko e tokotaha ko ia te ne lava ke fakamoʻui ʻa Neamaní, ko e palōfita ko ʻIlaisá.​—2 Tuʻi 5:​1-​3.

Koeʻuhi ko ʻene tuʻu loto-toʻá, ʻoku kumi ai ʻa Neamani kia ʻIlaisa pea fakamoʻui. ʻIkai ngata aí, ʻoku hoko ai ʻa Neamani ko ha tokotaha lotu kia Sihova! Ko e meʻa ko ʻeni naʻe hokosiá, ʻa ia naʻe lēkooti ʻi he Tohitapú, naʻe hoko ia ʻi he senituli hono hongofulú K.M. (2 Tuʻi 5:​4-​15) ʻI he ʻahó ni, ʻoku fakahaaʻi ʻe he toʻutupu tokolahi ʻa e loto-toʻa tatau ʻi he lea fekauʻaki mo e ngaahi meʻa mahuʻinga ʻo e Puleʻangá. ʻOku fakamatalaʻi ia ʻe he meʻa naʻe hokosia hono hokó mei Mosemipīki.

Ko Nuno taʻu onó ko ha tokotaha malanga teʻeki papitaiso ia ʻo e ongoongo leleí. Naʻa mo e ki muʻa ke ne hoko ko ha tokotaha malanga teʻeki papitaisó, naʻe tānaki mai ʻe Nuno ʻa e kau leka ʻi hono feituʻú, ʻo fai ha lotu, pea akoʻi kiate kinautolu ʻa e Tohitapú, ʻo ngāueʻaki ʻa e tohi ko e Ko ʻEku Tohi ʻo e Ngaahi Talanoa Faka-Tohitapú.

ʻOku ʻā pongipongia hake ʻa Nuno ʻi he ngaahi taimi lahi ʻi he pongipongi Tokonakí ʻo fakamanatu ki hono fāmilí: “Ko e ʻahó ni ʻoku tau ō ai ʻi he ngāue fakamalangá.” Ko ʻene faivelenga ki he ngāue fakafaifekaú ʻoku fakahāhā ia ʻi he ngaahi founga kehe. Lolotonga ʻene ʻalu fakataha mo ʻene ongo mātuʻá ʻi he ngāue fakafaifekau ʻi he halá ʻi Maputo, ʻoku faʻa fakaofiofi atu ai ʻa Nuno ʻiate ia pē ki he kakaí. ʻI ha taimi pehē ʻe taha, naʻe haʻu ai kiate ia ha tangata pisinisi ʻo ʻeke ange: “Ko e hā ʻokú ke fakatau atu ai ʻa e ngaahi makasini ko ʻení?” Naʻe pehē ange ʻe Nuno: “ʻOku ʻikai te u fakatau atu ʻa e ngaahi makasiní, ka ʻoku ou tali ʻa e ngaahi meʻaʻofá ke tokoniʻi fakapaʻangaʻaki ʻa e ngāue fakamalangá.” Naʻe tali ange ʻe he tangata pisinisí: “Neongo ʻoku ʻikai te u mahuʻingaʻia, ʻoku maongo kiate au ʻa hoʻo fakakaukaú mo e malavá. Te u saiʻia ke fai ha tokoni ki he ngāue ko ʻení.”

ʻI he taimi ʻe taha, naʻe fakaofiofi atu ai ʻa Nuno ki ha tangata ʻi he halá ʻo tuʻuaki ange kiate ia ʻa e tohi ko e True Peace and Security​—How Can You Find It? Naʻe ʻeke ange ʻe he tangatá: “ʻIkai ʻokú ke kau ki he ʻapi-ako ko eé?” “ʻIo,” ko e tali ange ia ʻa Nuno, “ʻOku ou kau ki he ʻapi-ako ko iá, ka ʻi he ʻaho ní ʻoku ou ʻoatu ai ha pōpoaki mahuʻinga mei he tohi ko ʻení. ʻOku fakahā atu ai kiate koe ʻe lava ke ke moʻui ʻi he māmani foʻou ʻe ʻomai ʻe he ʻOtuá, hangē ko ia ʻoku hā ʻi he fakatātā ʻo e tohí ni.” Naʻe ʻikai ke ʻilo ʻe Nuno ko e tangata naʻá ne lea ki aí ko ha faiako ia ʻi hono ʻapi-akó. Naʻe ʻikai ngata pē ʻi hono tali ʻa e tohí ʻe he faiakó ka ʻokú ne toe maʻu tuʻumaʻu ʻi he taimí ni ʻa e ngaahi makasini Taua Leʻo mo e Awake! meia Nuno.

ʻI he taimi ʻoku ʻeke ai kia Nuno ʻa e ʻuhinga ʻokú ne saiʻia ai ʻi he ngāue fakamalangá, ʻokú ne pehē: “ʻOku ou fielea ki he kakaí mo akoʻi kinautolu fekauʻaki mo Sihova pea mo hono ʻAló, ʻa Sīsū Kalaisi.” ʻOkú ne tānaki mai: “Pea kapau ʻoku ʻikai ke fiefanongo ʻa e kakaí, ʻoku ʻikai ha ʻuhinga ia ke loto-mamahi ai.”

ʻI māmani lahi, ko e toʻutupu ʻe laui afe hangē ko Nuno ‘ʻoku nau tali ko au’ ke faiako mo malanga ʻo fekauʻaki mo e Puleʻanga ʻo e ʻOtuá. (Sāme 110:3) Ka ʻoku ʻikai ke hokonoa pē ʻa e meʻá ni. Ko e ngaahi mātuʻa ko ia ʻoku nau akoʻi ʻenau fānaú fekauʻaki mo Sihova ʻi heʻenau kei valevalé, ʻoku nau fokotuʻu ha faʻifaʻitakiʻanga ʻi he ngāue fakafaifekaú, pea tuli faivelenga ki he ngaahi meʻa mahuʻinga ʻo e Puleʻangá ʻe fakapaleʻi lahi.