Fānau ʻOku Nau ʻAi ke Fiefia ʻa e ʻOtuá

KO HAI ʻa e tama ʻi he māmaní ʻokú ke fakakaukau naʻá ne ʻai ʻa Sihova ko e tokotaha fiefia tahá?— Ko hono ʻAló, ʻa Sīsū. Ta talanoa angé ʻo fekauʻaki mo e ngaahi meʻa naʻe fai ʻe Sīsū ke ʻai ai ke fiefia ʻa ʻene Tamai fakahēvaní.

Naʻe nofo ʻa e fāmili ʻo Sīsuú ʻi ha feituʻu naʻe feʻunga nai mo ha fononga ʻaho ʻe tolu ki ai mei Selusalema, ʻa ia naʻe tuʻu ai ʻa e temipale fakaʻofoʻofa ʻo Sihová. Naʻe ui ʻe Sīsū ʻa e temipalé “ko e fale ʻo ʻeku Tamaí.” Ko ia mo hono fāmilí naʻa nau ʻalu ki ai ʻi he taʻu kotoa pē ke maʻu ʻa e Laka-Atú.

ʻI he taʻu ʻe taha, ʻi he taimi naʻe taʻu 12 ai ʻa Sīsuú, naʻe kamata ai ʻa e foki ʻa hono fāmilí ʻi he hili ʻa e Laka-Atú. Naʻe toki aʻu ki heʻenau mālōlō hifo ʻi he poʻulí naʻa nau fakatokangaʻi ai ʻoku ʻikai ke ʻiloa ʻa Sīsū ʻi he lotolotonga ʻo honau kāingá mo e ngaahi kaumeʻá. Ko ia, ʻi he taimi pē ko iá naʻe foki ai ʻa Mele mo Siosefa ki Selusalema ke kumi ʻa Sīsū. ʻOkú ke pehē naʻá ne ʻi fē?—

Naʻá na ʻilo ʻa Sīsū ʻi he temipalé. Naʻá ne fanongo ki he kau faiakó, pea naʻá ne ʻeke kia kinautolu ha ngaahi fehuʻi. Pea ʻi he taimi naʻa nau ʻeke ai kiate ia ha meʻá, naʻá ne tali ia. Naʻa nau ʻohovale ʻi he ngaahi tali lelei naʻá ne faí. ʻOku lava ke ke sio ki he ʻuhinga naʻe fiefia ai ʻa e ʻOtuá ʻi hono ʻAló?—

Ko e moʻoni, ʻi he taimi naʻe iku ai ʻo ʻilo ʻe Mele mo Siosefa ʻa Sīsuú, naʻá na ongoʻi fiemālie lahi ange. Ka naʻe ʻikai ke hohaʻa ʻa Sīsū ia. Naʻá ne ʻilo ko e temipalé ko ha feituʻu lelei ia ke ʻi ai. Ko ia, naʻá ne ʻeke: “ʻIkai naʻá mo ʻilo kuo pau ke u ʻi he fale ʻo ʻeku Tamaí?” Naʻá ne ʻilo ko e temipalé ko e fale ia ʻo e ʻOtuá, pea naʻá ne fiefia ke ʻi ai.

Hili iá, naʻe foki ʻa Mele mo Siosefa fakataha mo e taʻu 12 ko Sīsuú ki honau ʻapí ki Nasaleti. ʻOkú ke fakakaukau naʻe fēfē ʻa e tōʻonga ʻa Sīsū ki heʻene ongo mātuʻá?— Sai, ʻoku pehē ʻe he Tohitapú naʻá ne “anganofo ai pē kiate kinaua.” Ko e hā hoʻo fakakaukau ki he ʻuhinga ʻo e meʻa ko iá?— ʻOku ʻuhingá naʻá ne talangofua kiate kinaua. ʻIo, naʻá ne fai ʻa e meʻa naʻe kole ange ʻe heʻene ongo mātuʻá ke ne faí, neongo kapau ko e ngāue eni ʻo hangē ko hono ʻomai ʻa e vaí mei he vaikelí.—Luke 2:​41-52, NW.

Ko ia, fakakaukau ki he meʻa ko ení: Neongo ko Sīsuú naʻe haohaoa, naʻá ne talangofua ki heʻene ongo mātuʻa taʻehaohaoá. Naʻe ʻai ʻe he meʻá ni ʻa e ʻOtuá ke fiefia?— ʻIo naʻe pehē, he ʻoku tala ʻe he Folofola ʻa e ʻOtuá ki he fānaú: ‘Mou talangofua ki hoʻomou matuʻá.’ (Efeso 6:⁠1) Te ke ʻai foki ke fiefia ʻa e ʻOtuá kapau te ke talangofua ki hoʻo ongo mātuʻá, ʻo hangē ko Sīsuú.

Ko e toe founga ʻe taha ʻe lava ke ke ʻai ai ke fiefia ʻa e ʻOtuá ko e talanoa ki he niʻihi kehé ʻo fekauʻaki mo ia. Sai, ʻe pehē nai ʻe he kakai ʻe niʻihi ʻoku ʻikai ko e meʻa eni ʻoku totonu ke fai ʻe he fānaú. Ka, ʻi he taimi naʻe feinga ai ʻa e kakaí ke taʻofi ʻa e tamaiki tangatá mei hono fai ení, naʻe pehē ʻe Sīsū: ‘Kuo teʻeki koā ke mou lau ʻi he ngaahi Konga Tohitapú, ʻo pehe, Ko e ngutu ʻo e fānau īkí ʻe ʻomai mei ai ʻe he ʻOtuá ha fakamalo?’ (Mātiu 21:16) Ko ia, ʻoku tau malava kotoa ke talanoa ki he niʻihi kehé ʻo fekauʻaki mo Sihova pea fekauʻaki mo e ʻOtua lelei ko iá, kapau ʻoku tau fiemaʻu moʻoni ke fai pehē. Pea kapau te tau fai pehē, te tau ʻai ai ʻa e ʻOtuá ke fiefia.

Ko fē ʻokú ta ako mei ai ʻa e ngaahi meʻa ʻo fekauʻaki mo e ʻOtuá ʻe lava ke ta talanoa ki he niʻihi kehé ʻo fekauʻaki mo iá?— Mei heʻeta ako Tohitapu ʻi ʻapí. Ka ʻokú ta ako ʻa e meʻa lahi ange ʻi he feituʻu ʻoku fakatahataha ai ʻa e kakai ʻa e ʻOtuá ke akó. Ka ʻe lava fēfē ke ta ʻiloʻi ʻa ʻene kakaí?—

Sai, ko e hā ʻa e meʻa ʻoku fai ʻe he kakaí ʻi heʻenau ngaahi fakatahá? ʻOku nau akoʻi moʻoni ʻa e meʻa ʻoku ʻi he Tohitapú? ʻOku nau lau ia mo talanoa ki ai? Ko e founga ia ʻokú ta fanongo ai ki he ʻOtuá, ʻikai ko ia?— Pea ʻi he ngaahi fakataha faka-Kalisitiané ʻokú ta ʻamanaki atu ai ke fanongo ki he meʻa ʻoku folofolaʻaki ʻe he ʻOtuá, ʻikai ko ia?— Kae fēfē kapau ʻe pehē ʻe he kakaí ʻoku ʻikai totonu ke ke moʻui ʻo fakatatau ki he meʻa ʻoku leaʻaki ʻe he Tohitapú? Te ke pehē ko e kakai kinautolu ʻa e ʻOtuá?—

Ko e toe meʻa eni ʻe taha ke fakakaukau ki ai. ʻOku pehē ʻe he Tohitapú ko e kakai ʻa e ʻOtuá te nau hoko ko ha “kakai ke kau ki hono huafa.” (Ngāue 15:14) Koeʻuhi ko e huafa ʻo e ʻOtuá ko Sihova, ʻe lava ke ta ʻeke ki he kakaí pe ko Sihova ʻa honau ʻOtuá. Kapau te nau pehē ʻikai, te ta ʻilo leva ai ʻoku ʻikai ko ʻene kakai kinautolu. Ko e kakai ʻa e ʻOtuá te nau talanoa foki ki he niʻihi kehé ʻo fekauʻaki mo e Puleʻanga ʻo e ʻOtuá. Pea te nau fakahaaʻi ʻenau ʻofa ki he ʻOtuá ʻaki ʻenau tauhi ʻene ngaahi fekaú.—1 Sione 5:⁠3.

Kapau ʻokú ke ʻilo ha kakai ʻoku nau fai kotoa ʻa e ngaahi meʻa ko iá, pea ʻoku totonu leva ke ke fakataha mo kinautolu ʻi he fai ʻo e lotú. ʻOku totonu ke ke fanongo tokanga ʻi he ngaahi fakataha ko ení pea fai ha tali ʻi he taimi ʻoku ʻeke ai ʻa e ngaahi fehuʻí. Ko e meʻa ia naʻe fai ʻe Sīsū ʻi he taimi naʻá ne ʻi he fale ai ʻo e ʻOtuá. Pea kapau te ke fai ʻa e ngaahi meʻa ko iá, te ke ʻai ai ke fiefia ʻa e ʻOtuá, ʻo hangē pē ko Sīsuú.

ʻE lava ke ke fakakaukau ki ha toe fānau kehe ʻoku lave ki ai ʻa e Tohitapú naʻa nau ʻai ʻa e ʻOtuá ke fiefia?— Ko Tīmote ko ha faʻifaʻitakiʻanga ʻiloa ia. Ko ʻene tamaí naʻe ʻikai ko ha tokotaha naʻe tui kia Sihova. Ka ko ʻene faʻeé, ʻa ʻIunisi naʻe tui kia Sihova, pea pehē ki heʻene kui fefine ko Loisí. Naʻe fanongo ʻa Tīmote kia kinaua pea ako ʻo fekauʻaki mo Sihova.

ʻI he taimi naʻe lahi ai ʻa Tīmoté, naʻe ʻaʻahi atu ʻa e ʻapositolo ko Paulá ki he kolo naʻá ne nofo aí. Naʻá ne fakatokangaʻi ʻa e fiemaʻu lahi ʻe Tīmote ke tauhi ʻa Sihová. Ko ia, naʻá ne fakaafeʻi ʻa Tīmote ke na ō fakataha ke tauhi ai ʻa e ʻOtuá ʻi ha founga ʻoku toe lahi angé. ʻI he feituʻu kotoa pē naʻá na fononga ai, naʻá na talanoa ki he kakaí ʻo fekauʻaki mo e Puleʻanga ʻo e ʻOtuá pea fekauʻaki mo Sīsū.—Ngāue 16:​1-5; 2 Timote 1:5; 3:​14, 15.

Ka ko e tamaiki tangatá pē ʻoku ʻi ai ʻa e faʻifaʻitakiʻanga ʻi he Tohitapú naʻa nau ʻai ʻa e ʻOtuá ke fiefiá?— ʻIkai ʻaupito. Fakakaukau ki ha kiʻi taʻahine ʻIsileli naʻá ne fai pehē. ʻI he taimi naʻá ne moʻui aí, naʻe hoko ʻa e puleʻanga ʻo Sīliá pea mo e puleʻanga ʻIsilelí ko e ongo fili. ʻI he ʻaho ʻe taha, naʻe tauʻi ʻe he kau Sīliá ʻa ʻIsileli pea ʻave pōpula ai ʻa e kiʻi taʻahine ko iá. Naʻe ʻave ia ki he fale ʻo e ʻeiki taú, ʻa ia ko Neamani hono hingoá. Naʻá ne hoko ai ko e sevāniti ʻa e uaifi ʻo Neamaní.

Sai, naʻe maʻu ʻe Neamani ha mahaki ʻoku ui ko e kilia. Naʻe ʻikai lava ha taha ʻo e kau toketaá ke tokoni kiate ia. Ka naʻe tui ʻa e kiʻi taʻahine mei ʻIsilelí ʻe lava ke tokoni ha taha ʻo e kau sevāniti makehe ʻa e ʻOtuá, ʻa ia ko ha palōfita, kia Neamani. Ko e moʻoni, ko Neamani mo hono uaifí naʻe ʻikai te na lotu kia Sihova. ʻE tala ange nai ʻe he kiʻi taʻahiné kia kinaua ʻa e meʻa naʻá ne ʻiló? Ko e hā naʻá ke mei faí?—

Sai, naʻe pehē ʻe he kiʻi taʻahiné: ‘Kapau pē ʻe ʻalu ʻa Neamani ki he palōfita ʻa Sihova ʻi ʻIsilelí, ʻi he meʻa ko iá, ʻe fakamoʻui ai ʻa Neamani mei hono kiliá.’ Naʻe fanongo ʻa Neamani ki he kiʻi taʻahiné, pea naʻá ne ʻalu ki he palōfita ʻa Sihová. ʻI heʻene fai ʻa e meʻa naʻe tala ange ʻe he palōfitá ke ne faí, naʻá ne moʻui. Naʻe ʻai ʻe he meʻá ni ʻa Neamani ke ne hoko ko ha tokotaha lotu ki he ʻOtua moʻoní.—2 Tuʻi 5:​1-15.

Te ke saiʻia ke tokoniʻi ha taha ke ako ʻo fekauʻaki mo Sihova pea fekauʻaki mo e meʻa ʻe lava ke ne faí, hangē ko ia naʻe fai ʻe he kiʻi taʻahiné?— Ko hai ʻe lava ke ke tokoniʻí?— Ko e moʻoni, ʻi he ʻuluaki taimí ʻe ʻikai nai te nau fakakaukau ʻoku nau fiemaʻu ha tokoni. Ka ʻe lava ke ke talanoa kia kinautolu ʻo fekauʻaki mo e ngaahi meʻa lelei ʻoku fai ʻe Sihová. Pea te nau fanongo nai. ʻOku lava ke ke fakapapauʻi ʻe ʻai ʻe he meʻá ni ʻa e ʻOtuá ke fiefia.