Ngaahi Talaʻofa ʻE Lava Ke Ke Falala ki Aí

KO E palōfita ʻa e ʻOtuá ko Maiká naʻá ne ʻiloʻi ko e ngaahi talaʻofá ʻoku faʻa lava ke fakamoʻoniʻi ʻa ʻene taʻefalalaʻangá. ʻI hono ʻahó, naʻa mo e ngaahi kaumeʻa ofi tahá naʻe ʻikai lava ke falala maʻu pē ki ai te nau tauhi ʻenau leá. Ko ia, naʻe fakatokanga ʻa Maika: “ʻOua te mou tuʻanaki ki ha kaumeʻa, ʻoua te mou falala ki ha toʻutakanga: tauhi ʻa e matapa ʻo ho ngutu mei he fefine ʻoku tokoto ʻi ho fatafata.”—Maika 7:5.

Naʻe fakaʻatā ʻe Maika ʻa e tuʻunga fakamamahi ko ení ke ʻai ia ke ne veiveiua fekauʻaki mo e kotoa ʻo e ngaahi talaʻofá? ʻIkai! Naʻá ne fakahaaʻi ʻa e tuipau kakato ki he ngaahi talaʻofa naʻe fai ʻe hono ʻOtua ko Sihová. “Ka ko au,” ko e tohi ia ʻa Maiká, “te u fakasio atu he haʻu ʻa Sihova; te u nofoʻaki tali ki hoku ʻOtua fakamoʻuiʻanga.”—Maika 7:7.

Ko e hā naʻe maʻu ai ʻe Maika ʻa e tuipau peheé? Koeʻuhí naʻá ne ʻiloʻi ʻoku tauhi maʻu pē ʻa Sihova ki heʻene leá. Ko e meʻa kotoa naʻe fuakava ʻaki ʻe he ʻOtuá ki he fanga kui ʻa Maiká naʻe hoko papau moʻoni ia. (Maika 7:​20) Ko e faitōnunga ʻa Sihova ʻi he kuohilí naʻe ʻoange ai kia Maika ʻa e ʻuhinga kotoa ke tui ai te Ne tauhi ki Heʻene leá ʻi he kahaʻú.

‘Oku Ikai ha Folofola . . . ʻe Liaki’

Ko e fakatātaá, naʻe ʻiloʻi ʻe Maika, naʻe fakahaofi ʻe Sihova ʻa e kau ʻIsilelí mei he nofo pōpula ʻi ʻIsipité. (Maika 7:​15) Ko Siosiua, ʻa ia naʻá ne hokosia ʻa e fakahaofi ko iá, naʻá ne fakalototoʻaʻi ʻa hono kaungā ʻIsilelí ke nau tui ki he talaʻofa kotoa pē ʻa e ʻOtuá. ʻI he makatuʻunga fē? “Oku mou ilo i ho mou loto kotoabe, bea i ho mou laumalie kotoabe,” ko e fakamanatu ia ʻa Siosiua kia kinautolú, “i he gaahi mea lelei kotoabe aia nae folofola ai a Jihova ko ho mou Otua kiate kimoutolu oku ikai liaki ha mea e taha; kuo fakahoko kotoabe kiate kimoutolu, bea oku ikai liaki hano mea e taha.”—Siosiua 23:​14, PM.

Naʻe ʻiloʻi lelei ʻe he kau ʻIsilelí naʻe fai ʻe Sihova ʻa e ngaahi meʻa fakaofo maʻanautolu. Naʻá ne fakahoko ʻa ʻene talaʻofa ki heʻenau kui manavahē-ʻOtua ko ʻĒpalahamé ʻo pehē ko hono hakó ʻe hoko ia ʻo lahi hangē ko e ngaahi fetuʻú pea te nau maʻu ʻa e fonua ko Kēnaní. Naʻe toe tala ʻe Sihova kia ʻĒpalahame ko hono hakó te nau tofanga ʻi he faingataʻá ʻo feʻunga mo e taʻu ʻe 400 ka te nau toe foki ki Kēnani “ʻi hono fa ʻo e toʻutangata.” Naʻe hoko kotoa ʻa e meʻá ni.—Senesi 15:​5-16; Ekisoto 3:​6-8.

Naʻe talitali lelei ʻa e kau ʻIsilelí ʻi ʻIsipite ʻi he ngaahi ʻaho ʻo e foha ʻo Sēkope ko Siosifá. Naʻe fakavaivaiʻi ki mui kinautolu ʻe he kau ʻIsipité ʻo fakamālohiʻi anga-fakamanu kinautolu ki he ngāue pōpulá, ka ʻi he moʻoni ʻa e talaʻofa ʻa e ʻOtuá, ʻi ha vahaʻa taimi ʻo e toʻutangata fehopeʻaki ʻe fā mei he taimi naʻa nau hū ai ki ʻIsipité, naʻe fakatauʻatāinaʻi ai ʻa e hako ko eni ʻo ʻĒpalahamé mei he fakapōpula ʻa ʻIsipité.a

Lolotonga ʻa e taʻu hoko mai ʻe 40, naʻe fakamoʻoniʻi lahi ange ai ʻe he kau ʻIsilelí ʻoku tauhi maʻu pē ʻe Sihova ʻa ʻene ngaahi talaʻofá. ʻI he taimi naʻe kamata ai ʻe he kau ʻAmalekí ha ʻohofi taʻetotonu ʻo e kau ʻIsilelí, naʻe faitau ʻa e ʻOtuá maʻa hono kakaí ʻo maluʻi kinautolu. Naʻá ne fakalato ʻenau ngaahi fiemaʻu fakamatelié kotoa lolotonga ʻenau fononga taʻu ʻe 40 ʻi he toafá pea faifai pē ʻo ne ʻai ke nau nofo ʻi he Fonua ʻo e Talaʻofá. ʻI he fakamanatu ʻe Siosiua ʻa e hisitōlia ʻo e ngaahi feangainga ʻa Sihova mo e hako ko eni ʻo ʻĒpalahamé, naʻe lava ke ne lea ʻi he tuipau: “Naʻe ʻikai ke to kelekele ha momoʻi meʻa ʻe taha ʻi he ngaahi lelei naʻa ne talaʻofa ki haʻa Isileli; naʻe hoko hono kotoa.”—Siosiua 21:45.

Langa Hake ʻa e Tuipau ki he Ngaahi Talaʻofa ʻa e ʻOtuá

ʻE lava fēfē ke ke langa hake ha tui ki he ngaahi talaʻofa ʻa Sihová, ʻo hangē ko ia naʻe fai ʻe Maika mo Siosiuá? Sai, ʻoku anga-fēfē hoʻo fakatupulekina ʻa e falala ki he niʻihi kehé? Hoko ʻo feinga ke ʻiloʻi kinautolu ʻi he lahi taha te ke malavá. Hangē ko ení, te ke ʻilo nai ai ki heʻenau alafalalaʻangá ʻi he sio ki heʻenau feinga faitōnunga ke fakahoko ʻa e kotoa ʻo ʻenau ngaahi talaʻofá. ʻI he tupulaki ʻa hoʻo ʻilo ki he kakai peheé, ʻokú ke fakahoko fakalakalaka ai ʻa e falala kia kinautolu. ʻE lava ke ke fai ʻa e meʻa tatau ʻi he taimi ʻoku hoko mai ai ki hono langa hake ʻa e tui ki he ngaahi talaʻofa ʻa e ʻOtuá.

Ko e founga ʻe taha ʻe lava ke ke fai ai ení ko e fakakaukauloto ki he fakatupú pea mo e ngaahi lao ʻokú ne puleʻi iá. ʻOku tuku ʻa e falala ʻa e kau saienisí ki he ngaahi laó ni, hangē ko e lao ko ia ʻokú ne puleʻi ʻa e founga ʻoku vahevahe ai ha sela fakaetangata ʻe taha ʻo liuliunga ke faʻuʻaki ʻa e sela ʻe laui tiliona ʻoku faʻuʻaki ho sinó. Ko hono moʻoní, ko e ngaahi lao ʻokú ne puleʻi ʻa e tōʻonga ʻa e kakano matelie mo e ivi ʻi he ʻunivēsí fakakātoá kuo pau pē naʻe fokotuʻu ia ʻe ha Toko Taha Faʻu-Lao falalaʻanga fakaʻaufuli. Ko e moʻoni ʻoku lava ke ke falala ki heʻene ngaahi talaʻofá, hangē pē ko hoʻo tuipau ki he ngaahi lao ʻokú ne puleʻi ʻene fakatupú.​—Sāme 139:​14-​16; Aisea 40:26; Hepelu 3:4.

Fakafou he palōfita ko ʻAiseá, ʻa ia ko ha toʻumeʻa ʻo Maika, naʻe ngāueʻaki ʻe Sihova ʻa e tuʻumaʻu ʻo e ngaahi faʻahitaʻu pea mo e vilo fakaofo ʻa e vaí ke fakatātaaʻiʻaki ʻa e alafalalaʻanga ʻo ʻene leá. ʻI he taʻu taki taha ʻoku hoko mai ai ʻa e ʻuhá. ʻOku nau fakaviviku ʻa e kelekelé pea ʻai ia ke malava ʻa e kakaí ʻo tūtuuʻi ʻenau tengá pea toli ʻa hono fuá. ʻI he fekauʻaki mo e meʻá ni, naʻe folofola ʻa Sihova: “Hange ʻoku hifo ʻa e ʻuha mo e sinou mei langi, ʻo ʻikai te ne foki ki ai, kaeʻoua ke ne fakaviviku ʻa e fonua, ʻo ngaohi ia ke fakatupu meʻa, mo laku muka mai; ʻo ʻoua foki ke ai ha tenga maʻa e tangata tūtūʻi, mo ha meʻakai maʻa e fiekaia; ʻe pehe pe mo ʻeku lea ʻoku ʻalu atu mei hoku ngutu: ʻe ʻikai foki ngeʻesi mai, kaeʻoua ke ne fai ʻa e meʻa ne u loto ki ai, mo fakaaʻu ʻa e meʻa ne u fekau atu ai ia.”—Aisea 55:​10, 11.

Ngaahi Talaʻofa Papau ʻo e Palataisí

Ko hono sivisiviʻi ʻa e fakatupú ʻoku lava ke ne langa hake ʻa e falala ki he Tokotaha-Fakatupú, ka ʻoku fiemaʻu ʻa e meʻa lahi ange ia kapau ʻokú ke loto ke ako fekauʻaki mo e ngaahi talaʻofa ʻa ia ko e konga ia ʻo e “lea ʻoku ʻalu atu mei [hono] ngutu.” Ke ako fekauʻaki mo e ngaahi talaʻofa ko ení koeʻuhi ke ke lava ʻo tuku ai hoʻo falalá ki aí, ʻoku fiemaʻu ke ke sivisiviʻi ʻa e lēkooti faka-Tohitapu fakamānavaʻi fakaʻotua fekauʻaki mo e taumuʻa ʻa e ʻOtuá ki he foʻi māmaní mo ʻene ngaahi feangainga mo e faʻahinga ʻo e tangatá.​—2 Timote 3:​14-​17.

Ko e palōfita ko Maiká naʻá ne tuipau ki he ngaahi talaʻofa ʻa Sihová. ʻOkú ke maʻu ʻo toe lahi ange ʻa e lēkooti fakamānavaʻi ʻa e ʻOtuá ʻoku ala maʻu ʻia Maika. ʻI hoʻo lau ʻa e Tohi Tapú ʻo fakalaulauloto ki aí, te ke lava mo koe foki ʻo fakatupulekina ʻa e tui ki he fakahoko ʻo e ngaahi talaʻofa ʻa e ʻOtuá. Ko e ngaahi talaʻofá ni ʻoku kau ki ai ʻo ʻikai ko e ngaahi hako totonu pē ʻo ʻĒpalahamé ka ko e faʻahinga kotoa ʻo e tangatá. Naʻe talaʻofa ʻa Sihova ki he pēteliake manavahē-ʻOtua ko ení: “Ko ho hako ʻe monuʻia ai ʻa e ngaahi puleʻanga ʻo mamani; koeʻuhiā kuo ke tuitala ki heʻeku lea.” (Senesi 22:18) Ko e konga tefito ʻo e “hako,” pe fānau, ʻa ʻĒpalahamé ko e Mīsaiá, ʻa Sīsū Kalaisi.​—Kaletia 3:​16.

Fakafou ʻia Sīsū Kalaisi, ʻoku fakapapauʻi ai ʻe Sihova ke tafe mai ʻa e ngaahi tāpuaki ki he faʻahinga talangofua ʻo e tangatá. Pea ko e hā kuo talaʻofa ʻe he ʻOtuá ke fai ʻi hotau taimí? ʻOku tali ia ʻe he Maika 4:​1, 2 ʻi he ngaahi lea fakaekikite ko ení: “ʻE hoko ʻo pehe ʻi he kuonga ʻamui, ʻe fokotuʻu ʻa e moʻunga ʻo e fale ʻo Sihova ko e ʻulu ʻo e ngaahi moʻunga, pea ʻe mahiki hake ia ʻi he ngaahi foʻi maʻolunga; pea ʻe tafe ki ai ʻa e ngaahi kakai. ʻIo, ʻe ōange ʻa e ngaahi puleʻanga lahi, pea te nau pehe, Haʻuā, ka tau ʻalu hake ki he moʻunga ʻo Sihova, pea ki he fale ʻo e ʻOtua ʻo Sekope; pea te ne ako kiate kitautolu hano ngaahi ʻalunga, pea te tau fou ʻi hono ngaahi founga.”

Ko e faʻahinga ʻoku ako fekauʻaki mo e ngaahi founga ʻa Sihová ʻoku nau “tuki huotoho ʻaki ʻenau ngaahi heleta, mo e ngaahi hele ʻauhani ʻaki honau tao.” Ko ha hehema pē ki he taú ʻoku mole atu ia. Kuo vavé ni ke fakafonu ʻa e māmaní ʻaki ʻa e kakai faitotonu, pea ʻe ʻikai ha taha te ne ʻai ke nau tetetete ʻi he manavaheé. (Maika 4:​3, 4) ʻIo, ʻoku talaʻofa ʻa e Folofola ʻa e ʻOtuá ʻo pehē ʻi he malumalu ʻo e pule ʻa e Puleʻangá ʻi he nima ʻo Sīsū Kalaisí, ʻe toʻo ʻosi ai ʻe Sihova mei he māmaní ʻa e kau fakafeʻātungiá kotoa.​—Aisea 11:​6-9; Taniela 2:​44; Fakahā 11:18.

Naʻa mo e faʻahinga kuo nau faingataʻaʻia pea mate ko e tupu mei he angatuʻu ʻa e tangatá ki he ʻOtuá ʻe fokotuʻu hake kinautolu fakataha mo e ʻamanaki ke moʻui taʻengata ʻi he māmaní. (Sione 5:​28, 29) Ko Sētane mo ʻene kau tēmenioó, ʻa e kau fakaʻaiʻai ʻo e fulikivanú, ʻe ʻikai te nau toe ʻi ai, pea ko e ngaahi nunuʻa ʻo e angahala ʻa ʻĀtamá ʻe toʻo atu ia fakafou ʻi he feilaulau huhuʻi ʻa Sīsuú. (Mātiu 20:28; Loma 3:​23, 24; 5:​12; 6:​23; Fakahā 20:​1-3) Pea ko e hā ʻa e tuʻunga ʻe ʻi ai ʻa e faʻahinga talangofua ʻo e tangatá? ʻĀua, ʻe tāpuakiʻi ʻaki kinautolu ʻa e moʻui taʻengata ʻi he tuʻunga moʻui lelei haohaoa ʻi ha māmani palataisi!​—Sāme 37:​10, 11; Luke 23:43; Fakahā 21:​3-5.

Ko ha ngaahi talaʻofa fakaofo moʻoni ē! Ka ʻe lava ke ke tui ki ai? Ko e moʻoni te ke malava. ʻOku ʻikai ko e ngaahi talaʻofa eni ʻa e tangatá ʻa ia ʻoku ʻi ai nai ʻenau ngaahi taumuʻa lelei ka ʻoku ʻikai te nau maʻu ʻa e mālohi ke fakahoko ia. Ko e ngaahi talaʻofa ia ʻa e ʻOtua Māfimafi-Aoniú, ʻa ia ʻoku ʻikai lava ke ne loi pea ʻoku ‘ʻikai fai tuai ʻi heʻene talaʻofá.’ (2 Pita 3:9; Hepelu 6:​13-​18) ʻE lava ke ke maʻu ʻa e falala kakato ki he ngaahi talaʻofa kotoa ʻoku ʻi he Tohi Tapú, he ko honau Matavaí ko “Sihova, ʻa e ʻOtua moʻonia.”—Sāme 31:5.

[Fakamatala ʻi lalo]

[Fakamatala ʻi he peesi 6]

“Kuo ʻikai to kelekele ha momoʻi meʻa ʻe taha ʻi he ngaahi lelei fuape naʻe talaʻofa ʻe Sihova ko homou ʻOtua maʻamoutolu.”—SIOSIUA 23:14

[Fakatātā ʻi he peesi 4, 5]

Naʻe tauhi ʻe Sihova ʻene ngaahi talaʻofa ki ʻIsilelí ʻi he Tahi Kulokulá pea ʻi he toafá

[Fakatātā ʻi he peesi 7]

Naʻe fakahoko ʻe Sihova ʻene talaʻofa kia ʻĒpalahamé. Ko hono Hakó, ʻa Sīsū Kalaisi, te ne ʻomai ʻa e tāpuaki ki he faʻahinga ʻo e tangatá