Talanoa ki he Moʻuí

Naʻá Ma Fai ha Fili Papau ki he Tuʻunga-Pule ʻa e ʻOtuá

FAKAMATALA FAI ʻE MICHAL ŽOBRÁK

Hili hono fakamoleki ha māhina ʻi he pilīsone tauteá, naʻe toho atu au ki ha tokotaha fakaʻekeʻeke. ʻIkai fuoloa mei ai, naʻá ne kula mumū mo ne kaila: “Ko e kau sipai kimoutolu! Ko e kau sipai ʻAmelika!” Ko e hā naʻá ne ʻai ia ke ne ʻita lahí? Ko e toki ʻosi pē ia ʻene ʻeke mai kiate au ʻa e lotu ʻoku ou kau ki aí, pea naʻá ku tali ange: “Ko e taha au ʻo e Kau Fakamoʻoni ʻa Sihová.”

NAʻE hoko ʻa e meʻá ni laka hake he vaeuaʻi senituli kuo maliu atú. ʻI he taimi ko iá, ko e fonua ʻa ia naʻá ku nofo aí naʻe ʻi he malumalu ʻo e pule faka-Kominiusí. Kae kehe, fuoloa ki muʻa aí, ne mau ʻosi hokosia ai ʻa e fakafepaki kakaha ki heʻemau ngāue fakaeako faka-Kalisitiané.

Mau Ongoʻi ʻa e Ngaahi Nunuʻa Fakamamahi ʻo e Taú

ʻI he kamata ʻa e Tau I ʻa Māmaní ʻi he 1914, naʻá ku taʻu valu ai. ʻI he taimi ko iá, ko hoku koló ʻa Zálužice, naʻe fakamoʻulaloa ia ki he pule fakatuʻi ʻa e ʻEmipaea ʻAositulia-Hungalí. Naʻe ʻikai ngata pē ʻi hono fulihi ʻe he taú ʻa e tuʻunga ʻo e māmaní kae pehē foki naʻá ne fakangata taʻeʻamanekina ʻa hoku tuʻunga kei siʻí. Ko ʻeku tamaí, ʻa ia naʻá ne sōtia, naʻá ne mate ʻi he ʻuluaki taʻu pē ʻo e taú. Naʻe toe heni ʻa ʻeku faʻeé, ko hoku ongo tuofefine īkí, pea mo au ʻi he tuʻunga masiva ʻangoʻango. ʻI he tuʻunga ko e tangata pea ko e lahi taha ia ʻi he ʻapí, naʻe vave ai ʻa ʻeku fua ʻa e ngaahi fatongia lahi ʻi homau kiʻi fāmá pea ʻi he ʻapí takatakai. Mei ha taʻu siʻi, naʻá ku anga-fakalotu ʻaupito. Ko e faifekau ʻi homau Siasi Fakaleleí (lotu Kalavini) naʻe aʻu ʻo ne kole mai ke u fetongi ia pea akoʻi ʻa hoku kaungāakó lolotonga ʻa ʻene mavahé.

ʻI he 1918 naʻe ngata ai ʻa e Tau Lahí, pea naʻa mau fiefia lahi. Naʻe liua ʻa e ʻEmipaea ʻAositulia-Hungalí, pea naʻa mau hoko ai ko e tangataʻifonua ʻo e Lepupilika Sekisolovākiá. Naʻe vave ʻa e foki mai ki ʻapi ʻa e tokolahi mei homau feituʻú ʻa ia naʻa nau hiki ki he ʻIunaite Seteté. Naʻe ʻi honau lotolotongá ʻa Michal Petrík, ʻa ia naʻá ne haʻu ki homau koló ʻi he 1922. ʻI he taimi naʻá ne ʻaʻahi ai ki ha fāmili ʻi homau feituʻu kaungāʻapí, naʻe fakaafeʻi ki ai ʻa ʻeku faʻeé pea mo au.

Hoko ʻo Moʻoni kia Kimaua ʻa e Tuʻunga-Pule ʻa e ʻOtuá

Ko Michal ko ha Tokotaha Ako Tohi Tapu ia, hangē ko ia naʻe uiʻaki ʻa e Kau Fakamoʻoni ʻa Sihová he taimi ko iá, pea naʻá ne talanoa fekauʻaki mo e ngaahi ʻīsiu Fakatohitapu mahuʻinga ʻa ia naʻá ne langaʻi ʻeku mahuʻingaʻiá. Naʻe tuʻu-ki-muʻa ʻi he lotolotonga ʻo e ngaahi ʻīsiú ko ʻení ʻa e hoko mai ʻa e Puleʻanga ʻo Sihová. (Taniela 2:​44) ʻI heʻene pehē ʻe ʻi ai ha fakataha faka-Kalisitiane ʻi he kolo ko Záhor ʻi he Sāpate hoko maí, naʻá ku fakapapauʻi ai ke ʻalu ki ai. Naʻá ku tuʻu hake he 4:00 hengihengi ʻo lue ʻi he kilomita nai ʻe 8 ki he ʻapi ʻo e tokotaha naʻá ku tokouaʻaki ke kole ha pasikala. Hili hono ngaahi ha foʻi vaʻe naʻe molū, naʻá ku hoko atu ai ʻi ha toe kilomita ʻe 24 ki Záhor. Naʻe ʻikai te u ʻiloʻi pe ʻe fai ʻi fē ʻa e fakatahá, ko ia naʻá ku hokohoko māmālie atu ai ʻi he taha ʻo e ngaahi halá. Naʻá ku fakatokangaʻi leva ai ha foʻi hiva ʻo e Puleʻangá naʻe hivaʻi mai ʻi he taha ʻo e ngaahi falé. Naʻe mahiki ʻi he fiefia ʻa hoku lotó. Naʻá ku hū ai ki he falé ʻo fakamatala ki he ʻuhinga naʻá ku ʻi ai aí. Naʻe fakaafeʻi au ke kau fakataha mo e fāmilí ʻi heʻenau kai pongipongí, pea naʻa nau ʻave leva au ki he fakatahá. Neongo naʻe pau ke u heka pea luelue ʻi ha toe kilomita ʻe 32 ke aʻu ai ki ʻapi, naʻe ʻikai ʻaupito haʻaku ongoʻi helaʻia.​—Aisea 40:31.

Naʻá ku mālieʻia ʻi he ngaahi fakamatala mahino pea makatuʻunga ʻi he Tohi Tapú naʻe ʻomai ʻe he Kau Fakamoʻoni ʻa Sihová. Ko e ʻamanaki ki he maʻu ha moʻui kakato mo fakafiemālie ʻi he malumalu ʻo e tuʻunga-pule ʻa e ʻOtuá naʻá ne laveʻi ʻa hoku lotó. (Sāme 104:28) Ko ʻeku faʻeé mo au naʻá ma fakatou fili ai ke ʻoatu ha tohi fakafisi ki homa siasí. Naʻe fakatupunga ʻe he meʻá ni ha felāuaki lahi ʻi homau koló. Naʻe aʻu ʻo ʻikai lea mai ʻa e kakai ʻe niʻihi kia kimaua ʻi ha taimi, neongo ia naʻá ma maʻu ʻa e feohi lelei mo e Kau Fakamoʻoni tokolahi ʻi homau feituʻú. (Mātiu 5:​11, 12) ʻIkai fuoloa mei ai naʻá ku papitaiso ai ʻi he Vaitafe Uh.

Hoko ʻa e Ngāue Fakafaifekaú ko ʻEmau Founga Moʻuí Ia

Naʻa mau ngāueʻaki ʻa e faingamālie kotoa pē ke malanga ai fekauʻaki mo e Puleʻanga ʻo Sihová. (Mātiu 24:14) Naʻa mau tokangataha tautefito ki he ngaahi feingangāue fakamalanga fokotuʻutuʻu lelei ʻi he ngaahi ʻaho Sāpaté. ʻI he fakalūkufuá, ko e kakai ʻi he taimi ko ení naʻa nau ʻā pongipongia, ko ia naʻe lava ai ke mau kamata malanga pongipongia ʻaupito. Ki mui ʻi he ʻahó, naʻe fakataimitēpileʻi ai ha fakataha maʻá e kakaí. Ko e kau faiako Tohi Tapú naʻa nau malanga lahi tahá ʻi ha tuʻunga fakatuʻupakē. Naʻa nau tokanga ki he tokolahi ʻo e kakai mahuʻingaʻiá, ko honau puipuituʻa fakalotú pea mo e ngaahi ʻīsiu naʻa nau tokanga ki aí.

Ko e ngaahi moʻoni Fakatohitapu naʻa mau malangaʻí naʻá ne fakaʻaaki ʻa e mata ʻo e kakai loto-totonu tokolahi. ʻIkai fuoloa hili ʻeku papitaisó, naʻá ku ngāue ai ʻi he kolo ko Trhovište. ʻI ha fale ʻe taha, naʻá ku talanoa ai ki ha fefine anga-lelei mo anga-fakakaumeʻa ko Mrs. Zuzana Moskal. Ko ia mo hono fāmilí ko e kau lotu Kalavini, hangē ko ia naʻá ku ʻi aí. Neongo ʻa ʻene maheni mo e Tohi Tapú, naʻe lahi ʻene ngaahi fehuʻi Fakatohitapu naʻe taʻetali. Naʻá ma fetalanoaʻaki ʻi ha houa ʻe taha, pea naʻá ku tuku ʻiate ia ʻa e tohi The Harp of God.a

Naʻe fakakau leva ʻe he fāmili Moskal ʻa hono lau ʻo e tohi Harp ʻi heʻenau ngaahi taimi lau Tohi Tapu tuʻumaʻú. Naʻe fakahaaʻi ʻe he ngaahi fāmili lahi ange ʻi he kolo ko iá ʻa e mahuʻingaʻia pea kamata ke nau maʻu ʻemau ngaahi fakatahá. Naʻe fakaongo atu ʻe heʻenau faifekau lotu Kalaviní ha fakatokanga mālohi fekauʻaki mo kimautolu mo ʻemau ʻū tohí. Naʻe fokotuʻu ange leva ʻe he faʻahinga mahuʻingaʻia ʻe niʻihi ki he faifekaú ke ne haʻu ki heʻemau fakatahá ʻo fakahalaʻi ʻemau ngaahi akonakí ʻi he lolotonga ha tipeiti fakahāhā.

Naʻe haʻu ʻa e faifekaú, ka naʻe ʻikai ke ne lava ʻo ʻomai ha fakaʻuhinga ʻe taha mei he Tohi Tapú ke poupouʻiʻaki ʻa ʻene ngaahi akonakí. Ke taukapoʻi iá, naʻá ne fakamatala: “ʻE ʻikai lava ke tau tui ki he meʻa kotoa pē ʻoku ʻi he Tohi Tapú. Naʻe hiki ia ʻe he kau tangata, pea ko e ngaahi fehuʻi fakalotú ʻe lava ke fakamatalaʻi ia ʻi he ngaahi founga kehekehe.” Ko ha liliuʻanga tefito eni ki he tokolahi. Naʻe tala ʻe he niʻihi ki he faifekaú kapau ʻoku ʻikai te ne tui ki he Tohi Tapú, ʻe ʻikai te nau toe haʻu ʻo fanongo ki heʻene ngaahi malangá. Ko ia, naʻa nau mavahe ai mei he Siasi Kalaviní, pea naʻe tuʻu mālohi ha kakai ʻe toko 30 nai mei he kolo ko iá maʻá e moʻoni Fakatohitapú.

Ko hono malangaʻi ʻa e ongoongo lelei ʻo e Puleʻangá naʻe hoko ia ko ʻemau founga moʻuí, ko ia naʻe fakanatula ai ʻeku kumi ki ha feohi mei ha fāmili mālohi fakalaumālie. Ko e taha ʻo hoku ngaahi kaungāngāue ʻi he ngāue fakafaifekaú ko Ján Petruška, ʻa ia naʻá ne ako ʻa e moʻoní ʻi he ʻIunaite Seteté. Ko hono ʻofefiné ko Mária naʻe maongo kiate au ʻa ʻene mateuteu ke fai ha fakamoʻoni ki he tokotaha kotoa pē, ʻo hangē tofu pē ko ʻene tamaí. Naʻá ma mali ʻi he 1936, pea naʻe hoko ai ʻa Mária ko hoku feohi faitōnunga ʻo feʻunga mo e taʻu ʻe 50, ʻo aʻu ki heʻene toki mate ʻi he 1986. ʻI he 1938, naʻe fāʻeleʻi ai ʻa homa foha pē tahá, ko Eduard. Ka ʻi he taimi ko iá, naʻe toe hā ngali tuʻunuku mai ai ha toe tau ʻe taha ʻi ʻIulope. ʻE anga-fēfē ʻene uesia ʻemau ngāué?

ʻAhiʻahiʻi ʻEmau Tuʻu-ʻAtā Faka-Kalisitiané

ʻI he kamata ʻa e Tau II ʻa Māmaní, ko Solovākia, ʻa ia naʻe hoko ko ha fonua mavahé, naʻe ʻi he malumalu ia ʻo e tākiekina faka-Nasí. Neongo ia, naʻe ʻikai ha ngāue fakapuleʻanga papau naʻe fai ki he Kau Fakamoʻoni ʻa Sihová ʻi he tuʻunga ko ha kautahá. Ko e moʻoni, naʻe pau ke mau ngāue fakapulipuli, pea naʻe vakaiʻi ke taʻofi ʻemau ʻū tohí. Neongo ia, naʻa mau hokohoko atu fakapotopoto ʻa ʻemau ngaahi ngāué.​—Mātiu 10:16.

ʻI he fakalalahi ʻa e taú, naʻe ui ai au ki he kau taú, neongo naʻá ku lahi hake ʻi he taʻu 35. Koeʻuhi ko ʻeku tuʻu-ʻatā faka-Kalisitiané, naʻá ku fakafisi ai ke kau ʻi he taú. (Aisea 2:​2-4) Ko e meʻa fakafiefiá, ki muʻa ke fakapapauʻi ʻe he kau maʻu mafaí ʻa e meʻa ke fai kiate aú, naʻe tukuange ʻa e faʻahinga kotoa pē naʻe taʻumotuʻa tatau mo aú.

Naʻa mau ʻiloʻi naʻe faingataʻa mamaʻo ange ki homau fanga tokoua ʻi he ngaahi kolo lalahí ke nau maʻu ʻa e meʻa tefito ki he moʻuí ʻia kimautolu naʻe nofo ʻi he ngaahi feituʻu ʻutá. Naʻa mau loto ke vahevahe ki ai ʻa e meʻa naʻa mau maʻú. (2 Kolinito 8:​14) Ko ia, naʻa mau ʻave ai ʻa e ngaahi koloa meʻakai lahi naʻe lava ke mau toʻó ʻo fononga laka hake ʻi he kilomita ʻe 500 ʻo kolosi ʻi he fonuá ki Bratislava. Ko e ngaahi haʻi ʻo e kaumeʻa mo e ʻofa faka-Kalisitiane naʻa mau fakahoko lolotonga ʻa e ngaahi taʻu ʻo e taú naʻá ne fakaivia kimautolu ʻi he ngaahi taʻu faingataʻa ko ia naʻe toka mai mei muʻá.

Maʻu ʻa e Fakalototoʻa Naʻe Fiemaʻú

Hili ʻa e Tau II ʻa Māmaní, naʻe toe hoko ai ʻa Solovākia ko ha konga ʻo Sekisolovākia. Mei he 1946 ki he 1948, naʻe fai ai ʻa e ngaahi fakataha-lahi fakafonua ʻa e Kau Fakamoʻoni ʻa Sihová ʻi Brno pe ʻi Prague. Ko kimautolu mei he fakahahake ʻo Solovākiá naʻa mau fononga ʻi he ngaahi lēlue makehe naʻe fokotuʻutuʻu ki he kau fakafofonga ʻo e fakataha-lahí. ʻE lava ke ke ui ʻa e ngaahi lēlué ko e ngaahi lēlue hiva, koeʻuhi naʻa mau hiva ʻi he kotoa ʻo e fonongá.​—Ngāue 16:25.

ʻOku ou manatuʻi tautefito ʻa e fakataha-lahi ʻi he 1947 ʻi Brno, ʻa ia naʻe ʻi ai ʻa e kau ʻovasia Kalisitiane ʻe toko tolu mei he ʻuluʻi ʻapitanga ʻi he māmaní, ʻo kau ai ʻa Tokoua Nathan H. Knorr. Ke tuʻuaki ʻa e malanga maʻá e kakaí, ko e tokolahi ʻo kimautolú naʻa mau lue ʻi he loto koló mo e ngaahi fakaʻilonga ʻi ha lauʻipapa naʻe fakahaaʻi ai ʻa e kaveingá. Ko homa fohá, ʻa Eduard, ʻa ia naʻá ne taʻu hiva pē he taimi ko iá, naʻá ne loto-mamahi ʻaupito ʻi he ʻikai te ne maʻu ha lauʻipapá. Ko ia naʻe faʻu ai ʻe he fanga tokouá ʻa e fanga kiʻi fakaʻilonga iiki ange ʻo ʻikai maʻana pē kae pehē foki ki he fānau tokolahi kehe. Ko e kulupu iiki ange ko ení naʻa nau fai ha ngāue lelei ʻi hono tuʻuaki ʻa e malangá!

ʻI Fepueli 1948 naʻe hoko ai ki he mafaí ʻa e kau Kominiusí. Naʻa mau ʻiloʻi ʻe vave ʻaupito ʻa e fai ʻe he puleʻangá ʻa e ngaahi ngāue ke taʻofiʻaki ʻemau ngāue fakafaifekaú. Naʻe fai ha fakataha-lahi ʻi Prague ʻi Sepitema 1948, pea naʻa mau maʻu ha ngaahi ongoʻi mālohi ʻi heʻemau fakatuʻotuʻa atu ki hano toe tapui ʻo ʻemau ngaahi fakatahataha fakahāhaá, hili ia ʻa e taʻu pē ʻe tolu ʻo e tauʻatāina ʻa e ʻasemipilií. Ki muʻa ke mavahe mei he fakataha-lahí, naʻa mau tali ai ha fakapapau, ʻa ia naʻe pehē ʻe hono konga: “Ko kimautolu, ʻa e Kau Fakamoʻoni ʻa Sihová, ʻa ia kuo mau fakatahataha fakatahá . . . , ʻoku mau fakapapauʻi ke fakalahi ʻa e ngāue faitāpuekina ko ení ke toe lahi ange, pea ʻi he kelesi ʻa e ʻEikí, ke kītaki ʻi he meʻa ko iá ʻi he faingamālié pea ʻi he ngaahi taimi ʻo e ʻahiʻahí, pea ke fakahaaʻi ʻa e kōsipeli ʻo e Puleʻanga ʻo e ʻOtuá ʻaki ʻa e faivelenga ʻoku toe lahi ange.”

“Ngaahi Fili ʻo e Puleʻangá”

ʻI he māhina pē ʻe ua hili ʻa e fakataha-lahi ʻi Prague, naʻe ʻohofi ai ʻe he kau polisi fufuú ʻa e ʻapi Pēteli ofi ki Prague. Naʻa nau puke ʻa e kelekelé, faʻao ha ʻū tohi pē naʻe lava ke nau maʻú, pea puke ʻa e kau ngāue Pētelí kotoa mo e fanga tokoua kehe ʻe niʻihi. Ka naʻe kei toe ha meʻa lahi ange.

Lolotonga ʻa e pō ʻo Fepueli 3-4, 1952, naʻe ngaʻunu fakamālohi ai ʻi he fonuá ʻa e ngaahi kongakau maluʻi ʻo puke ʻa e Kau Fakamoʻoni laka hake he toko 100. Ko e taha au ʻo kinautolu. ʻI he tolú hengihengi nai, naʻe fakaʻaaki ai ʻe he kau polisí ʻa hoku fāmilí kotoa. ʻI he ʻikai ha fakamatalá, naʻa nau fiemaʻu ke u ʻalu mo kinautolu. Naʻe haʻi au pea haʻi mo hoku matá ʻo lī ki mui ki ha loli fakataha mo e faʻahinga kehe. Naʻá ku iku ai ki ha pilīsone tautea.

Naʻe mahili mei ai ha māhina kakato mo e ʻikai pē ke talanoa mai ha taha kiate au. Ko e tokotaha pē naʻá ku sio ki aí ko e kaʻate ʻa ia naʻá ne tekeʻi mai ha kiʻi meʻi meʻakai ʻi ha ava ʻi he matapaá. Naʻe fekauʻi mai leva ke u ʻalu ange ʻe he tokotaha fakaʻekeʻeke ko ia naʻá ku lave ki ai ʻi he kamatá. Hili ʻene ui au ko ha sipaí, naʻá ne hoko atu: “Ko e tuʻunga fakapoʻuli ʻa e lotú. ʻOku ʻikai ha ʻOtua! ʻE ʻikai te mau fakaʻatā koe ke ke kākaaʻi ʻemau kakai ngāué. ʻE ʻakahi ʻe ha tangata fai tautau ʻa e sea ʻi ho lalo vaʻé pe te ke ʻauʻaunga ʻi pilīsone. Pea kapau ʻe haʻu ki heni ho ʻOtuá, te mau tāmateʻi mo ia foki!”

Koeʻuhi naʻe ʻiloʻi ʻe he kau maʻu mafaí naʻe ʻikai ha lao pau ke tapui ai ʻemau ngaahi ngāue faka-Kalisitiané, naʻa nau loto ke toe liliu ʻemau ngaahi ngāué ke feʻunga mo e ngaahi lao lolotongá ʻaki ʻenau fakahaaʻi kimautolu ko e “ngaahi fili ʻo e Puleʻangá” pea ko e kau sipai muli. Ke fai iá, naʻe fiemaʻu ke nau maumauʻi ʻemau fakapapaú pea ʻai ke mau “vetehia” ki he ngaahi tukuakiʻi loi. Hili ʻa e fakaʻekeʻeke ʻi he pō ko iá, naʻe ʻikai fakaʻatā ke u mohe. ʻI loto ʻi ha ngaahi houa siʻi, naʻe toe fakaʻekeʻeke ai au. ʻI he taimi ko ení naʻe fiemaʻu ai ʻe he tokotaha fakaʻekeʻeké ke u fakamoʻoni ʻi ha fakamatala naʻe pehē ai: “Ko au ʻi he tuʻunga ko ha fili ʻo e Kakai Temokalati Sekisolovākiá naʻe ʻikai te u kau ki he [faama fakatahatahá] koeʻuhi naʻá ku tatali ki he kau ʻAmeliká.” ʻI heʻeku fakafisi ke fakamoʻoni ki ha loi peheé, naʻe ʻave au ki ha pilīsone tautea.

Naʻe tapui ke u mohe, tokoto, pe naʻa mo tangutu. Naʻe lava ke u tuʻu pē pe luelue. ʻI heʻeku hoko ʻo ongosiá, naʻá ku tokoto ai ʻi he faliki simá. Naʻe fakafoki leva au ʻe he kau kaʻaté ki he ʻōfisi ʻo e tokotaha fakaʻekeʻeké. “Te ke fakamoʻoni he taimí ni?” ko e ʻeke ia ʻa e tokotaha fakaʻekeʻeké. ʻI heʻeku toe fakafisí, naʻá ne hapoʻi hoku matá. Naʻe kamata ke u fetotoʻi. Naʻá ne kalanga leva ki he kau kaʻaté: “ʻOkú ne loto ke tāmateʻi pē ia. Tauhi ia ke vakaiʻi naʻá ne taonakita!” Naʻe fakafoki au ki he pilīsone tauteá. Naʻe toutou fai ʻo feʻunga mo e māhina ʻe ono ʻa e ngaahi founga fakaʻekeʻeke ko ení ʻi he ngaahi taimi lahi. Naʻe ʻikai ha fakalotoʻi fakaefakakaukau pe ngaahi feinga ke ʻai au ke u fakahaaʻi ko ha fili au ʻo e Puleʻangá naʻá ne ʻai ke tamatemate ʻa ʻeku fakapapauʻi ke tauhi ʻa ʻeku anga-tonu kia Sihová.

ʻI ha māhina ki muʻa ʻi he taimi ke hopoʻi ai aú, naʻe haʻu ai ha tokotaha talatalaaki mei Prague ʻo fakaʻekeʻeke ʻa e tokotaha taki taha ʻi heʻemau kulupu ʻo e fanga tokoua ʻe toko 12. Naʻá ne ʻeke mai kiate au: “Ko e hā te ke faí kapau ʻe ʻohofi hotau fonuá ʻe he ngaahi fonua Fakahihifó?” “Ko e meʻa naʻá ku fai ʻi he taimi naʻe ʻohofi ai ʻe he fonuá ni fakataha mo Hitilā ʻa e USSR. Naʻe ʻikai te u tau he taimi ko iá, pea ʻe ʻikai te u tau he taimí ni koeʻuhi ko aú ko ha Kalisitiane pea ʻoku ou tuʻu-ʻatā.” Naʻá ne tala mai leva kiate au: “ʻOku ʻikai lava ke mau fakamolemoleʻi ʻa e Kau Fakamoʻoni ʻa Sihová. ʻOku mau fiemaʻu ʻa e kau sōtia telia naʻa ʻohofi kimautolu ʻe he ngaahi fonua Fakahihifó, pea ʻoku mau fiemaʻu ha kau sōtia ke fakatauʻatāinaʻi ʻa homau kakai ngāue ʻi he Hihifó.”

ʻI Siulai 24, 1953, naʻe taki ai kimautolu ki he fakamaauʻangá. Naʻe ui tahataha ai ʻa kimautolu toko 12 ki he ʻao ʻo e pēnolo ʻo e kau fakamāú. Naʻa mau puke ʻa e faingamālié ni ke fai ai ha fakamoʻoni fekauʻaki mo ʻemau tuí. Hili ʻemau ngaahi tali ki he ngaahi tukuakiʻi loi naʻe nafuiʻaki kimautolú, naʻe tuʻu hake ai ha loea ʻo ne pehē: “Kuo tā tuʻo lahi ʻeku ʻi he fakamaauʻanga ko ení. ʻOku faʻa hoko ʻo lahi ai ʻa e vetehiá, fakatomalá pea naʻa mo e ngaahi loʻimata. Ka ko e kau tangatá ni te nau mavahe ʻoku nau toe mālohi ange ʻi he taimi naʻa nau haʻu aí.” Hili iá, naʻe fakahaaʻi ʻa e toko 12 kotoa ko kimautolú ʻoku mau halaia ʻi he faʻufaʻufono ki he Puleʻangá. Naʻe tautea au ki he taʻu ʻe tolu pea mole ʻa ʻeku koloá kotoa ki he Puleʻangá.

Kuo ʻIkai Taʻofi Au ʻe he Taʻumotuʻá

Hili ʻeku foki ki ʻapí, naʻe kei siofi pē au ʻe he kau polisi fufuú. Neongo ia, naʻá ku toe fai ʻeku ngaahi ngāue fakateokalatí pea naʻe tuku mai kiate au ʻa e tuʻunga tauhi fakalaumālie ʻi heʻemau fakatahaʻangá. Neongo naʻe fakaʻatā ke mau nofo ʻi homau fale naʻe molé, naʻe fakafoki fakalao mai ia kia kimautolu ʻi he taʻu nai ʻe 40 ki mui ai, hili ʻa e tō ʻa e pule Kominiusí.

Ko e meʻa naʻá ku hokosia ʻi pilīsoné naʻe ʻikai ko e fakaʻosí ia ʻi hoku fāmilí. Naʻá ku ʻi ʻapi ʻi he taʻu pē ʻe tolu mo hono ui ʻa Eduard ki he ngāue fakakautaú. Koeʻuhi ko hono konisēnisi kuo akoʻi Fakatohitapú, naʻá ne fakafisi ai pea naʻe tuku pilīsone ia. ʻI ha ngaahi taʻu ki mui ai, naʻa mo hoku mokopuna tangatá, ko Peter naʻá ne fou ʻi he hokosia tatau, neongo ʻa ʻene mahamahakí.

ʻI he 1989 naʻe holafa ai ʻa e puleʻanga faka-Kominiusí ʻi Sekisolovākia. He fiefia ē ko au ʻi he hili ʻa e hongofuluʻi taʻu ʻe fā ʻo e tapuí, naʻe lava ke u malanga tauʻatāina mei he fale ki he fale! (Ngāue 20:20) Naʻá ku fiefia ʻi he faʻahinga ngāue ko ení ʻi he lōloa taha ʻe fakaʻatā ʻi hoku tuʻunga moʻui leleí. ʻI heʻeku taʻu 98 he taimi ní, ʻoku ʻikai ke u kei moʻui lelei ʻo hangē ko ia naʻe ʻi ai ki muʻá, ka ʻoku ou fiefia he ʻoku kei lava ke u fakamoʻoni ki he kakaí fekauʻaki mo e ngaahi talaʻofa lāngilangiʻia ʻa Sihova ki he kahaʻú.

ʻOku lava ke u fakalau ʻa e ngaahi pule ʻe toko 12 ʻo e ngaahi fonua kehekehe ʻe nima naʻe pule ʻi hoku kolo tupuʻangá. Naʻe kau ai ʻa e kau tikitato, kau palesiteni pea mo ha tuʻi. Naʻe halaʻatā ha taha ʻo kinautolu naʻá ne tokonaki mai ha fakaleleiʻanga tuʻuloa ki he ngaahi faingataʻa naʻá ne fakahohaʻasi ʻa e kakaí ʻi he malumalu ʻo ʻenau pulé. (Sāme 146:​3, 4) ʻOku ou houngaʻia ʻia Sihova ʻi heʻene fakaʻatā au ke u hoko ʻo ʻiloʻi tōmuʻa ia ʻi he moʻuí. Ko ia, naʻá ku malava ai ke mahinoʻi ʻa ʻene fakaleleiʻanga fakafou ʻi he Puleʻanga faka-Mīsaiá pea fakaʻehiʻehi mei he muna ʻo e moʻui ʻo taʻekau ai ʻa e ʻOtuá. Kuó u malangaʻi longomoʻui ʻa e ongoongo lelei tahá ʻo laka hake ʻi he taʻu ʻe 75, pea kuó ne ʻomai kiate au ha taumuʻa ʻi he moʻuí, fiemālie, mo ha ʻamanaki fakafiefia ʻo e moʻui taʻengata ʻi he māmaní. Ko e hā ha toe meʻa ʻe lava ke u kole?b

[Fakamatala ʻi lalo]

[Fakatātā ʻi he peesi 26]

Taimi nounou hili ʻema malí

[Fakatātā ʻi he peesi 26]

Mo Eduard ʻi he konga ki muʻa ʻo e 1940 tupú

[Fakatātā ʻi he peesi 27]

Tuʻuaki ʻo e fakataha-lahi ʻi Brno, 1947