Sāmiuela ʻOkú Ne Pouaki ʻa e Lotu Moʻoní

ʻOKU valokiʻi ʻe ha palōfita ha kaungātui ʻa ia ʻoku nau kole ange ha tuʻi fakaetangata pea tapou kia kinautolu ke nau talangofua ki he ʻOtuá. Ke fakapapauʻiʻaki hono tuʻunga mafaí, ʻokú ne kole ange kia Sihova ki ha fakaʻilonga fakafou ʻi ha afā. ʻOku tātātaha ke tō ʻa e ngaahi afā lōvaí ʻi ʻIsileli lolotonga ʻa e taimi ko eni ʻo e taʻú, ʻa e ngaahi taimi ʻo e utu-taʻu uité. Ka neongo ia, ʻoku ʻomai ʻe he ʻOtuá ʻa e manamana mo e ʻuha. ʻOku faai mai pē ʻo manavahē lahi ʻa e kakaí kia Sihova pea ki hono fakafofongá, ʻa Sāmiuela.—1 Samiuela 12:​11-19.

Ko Sāmiuela ko e palōfitá ko ha tokotaha-tohi foki ia. Ko hono hisitōlia fonu ʻi he ngaahi meʻa mālié ʻokú ne kāpui ha taʻu nai ʻe 330 pea ʻoku kau ai ʻa e ngaahi ngāue fakaofo ʻa e Kau Fakamaau ʻo ʻIsilelí. Ko e fakatātaá, ko e talanoa moʻoni ki he moʻui ʻa Samisoní, ʻa e tangata mālohi taha kuo faifai ange pea moʻui maí, kuo hoko ko e kaveinga ia ki he faʻu māú mo e faiva hivá pea pehē foki ki he ngaahi founga kehe ʻo e ʻeti tulamá mo e ʻeti faivá. (Fakamaau, vahe 13–16) Naʻe toe tohi foki ʻa Sāmiuela ʻo kau kia Lute mo ʻene faʻē ʻi he fonó, ʻa Nāomi, fakatouʻosi kinaua naʻá na uitou mo masiva. Ko e talanoa moʻoni ko ení fakataha mo hono ikuʻanga fakafiefiá ʻoku tatau tofu pē ʻene mālié mo e talanoa kia Samisoní.—Lute, vahe 1–4.

Ko e hā ʻa e ngaahi lēsoni ʻe lava ke tau ako mei he ngaahi tohi ʻa Samiuelá mo ʻene moʻuí? Naʻe anga-fēfē ʻene pouaki ʻa e lotu moʻoní?

Ko ʻEne Kei Talavoú

Ko e tamai ʻa Sāmiuelá, ʻa ʻElikena, ko ha tokotaha lotu ia ʻa Sihova pea ko ha husepāniti ʻofa. Ko e uaifi ʻo ʻElikená ʻa ʻAna ko ha fefine mālohi fakalaumālie ia. ʻI he fale ʻo Sihova ʻi Sailó, naʻe lotu tōtōivi ai ʻa ʻAna naʻe paʻá mo fuakava: “Sihova Sapaoti e, kapau moʻoni te ke ʻafioʻi ʻa e mamahi ʻa hoʻo kaunanga, ka ke manatuʻi au, ʻo ʻikai ngalo hoʻo kaunanga, ka ke foaki mai ha hako tangata, pea te u toki tuku ia ki he ʻAfiona ʻi he ngaahi ʻaho kotoa pe o ʻene moʻui, pea ʻe ʻikai apo ha tele ki hono ʻulu.” (1 Samiuela 1:​1-11) ʻOku ʻuhinga ení ʻe līʻoa ʻa e kiʻi tamá ki he ngāue ʻa Sihová.

Naʻe lotu fakalongolongo ʻa ʻAna. “Naʻe ngaue pe hono loungutu,” ko e lau ia ʻa e talanoá. Naʻe fakamahalo hala ʻa e Taulaʻeiki Lahi ko ʻĪlaí naʻá ne konā peá ne valokiʻi ia. Kae kehe, naʻe fakamatala anga-fakaʻapaʻapa ange ʻe ʻAna hono tuʻungá, pea tala ange ʻe ʻĪlai: “ʻAlu fiemalie pe: pea tauange mo e ʻOtua ʻo Isileli ke ne tali ʻa e kole kuo ke fai kiate ia.” Pea naʻe tali ia ʻe Sihova, he ʻoku hoko atu e talanoá: “ʻI he faifai pea hoko ʻa e taimi, naʻe feitama ʻa Ana, ʻo ne faʻeleʻi ha tama tangata; pea ne fakahingoa ia ko Samiuela (ko Ongoʻi ʻe he ʻOtua) heʻene pehe, Naʻa ku kole ia meia Sihova.”—1 Samiuela 1:​12-20.

Naʻe ʻohake ʻa Sāmiuela “ʻi he akonaki mo e fakatonutonu-fakaʻatamai ʻa Sihová.” (Efeso 6:​4, NW) ʻI hono fakamavaeʻi pē ʻo Sāmiuelá, naʻe ʻomi ia ʻe ʻAna ki he fale ʻo e ʻOtuá ʻi Sailó ʻo ʻoatu ia ki he Taulaʻeiki Lahi ko ʻĪlaí. ʻI he malumalu ʻo ʻene tokangaʻí, naʻe hoko ai ʻa e tamasiʻí ʻo ‘tauhi ʻa Sihova.’ Ko e fiefia lahi ʻa ʻAná naʻe fakahaaʻi ia ʻi heʻene ngaahi lea fakaueʻiloto ʻo e fakafetaʻi naʻe toki hiki ki mui ʻe Sāmiuela tonu.—1 Samiuela 2:​1-11.

Kapau ko ha mātuʻa koe, ʻokú ke fakalototoʻaʻi ʻa hoʻo fānaú ke nau ʻai ko ʻenau ngāue ia ʻi he moʻuí ʻa e ngāue ʻa Sihová? Ko hono pouaki ʻa e lotu moʻoní ʻa e founga lelei taha ʻe lava ke faifai ange pea ngāueʻaki ai ʻe ha taha ʻa hono iví.

Naʻe feʻunuʻaki lelei ʻa Sāmiuela ki he moʻui ʻi he potu toputapú. Naʻá ne ‘tupu ʻi he fakafeʻao kia Sihová’ peá ne hoko ʻo “ʻofeina ʻia Sihova mo e kakai foki.” Naʻá ne fakahāhā ʻa e ngaahi ʻulungāanga fakaʻotua ʻa ia naʻe ʻofaʻi ai ia ʻe he niʻihi kehé.—1 Samiuela 2:​21, 26.

Heʻikai lava ke leaʻaki ʻa e meʻa tatau ki he ongo foha anga-kovi ʻo ʻĪlai ko Hofinai mo Fineasí, ʻa ia “naʻe ʻikai te na tokaʻi ʻa e ʻEiki” pe Sihova. Naʻá na fai ʻa e ʻulungāanga fehokotaki fakasino taʻetāú peá na toʻo moʻonaua ʻa e ngaahi konga lelei taha ʻo e ngaahi feilaulau naʻe ʻomi ʻe he kakaí ki he potu toputapú. Naʻe ʻosi fekauʻi ʻe he ʻOtuá ha palōfita ke ne fanongonongo ʻa e tautea ʻoku lava ke ʻamanekina ʻe ʻĪlaí, ʻa ia naʻe kau ai ʻa e mate ʻa hono ongo fohá. (1 Samiuela 2:​12, 15-17, 22-25, 27, 30-34) ʻE ngāueʻaki ʻe Sihova ʻa Sāmiuela ke ne fakahoko ha toe pōpoaki fakaefakamaau ʻe taha.

Hoko ʻa Sāmiuela ko ha Palōfita

Naʻe tala ʻe he ʻOtuá kia Sāmiuela: “Fakaha [kia ʻĪlai] te u fakamāu ʻe au hono fale ʻo taʻengata, koeʻuhi ko e kovi naʻa ne ʻilo ki ai, he fakatupu ʻe heʻene fanau ha mala kiate kinautolu, kae ʻikai te ne taʻofi kinaua.” Naʻe ʻikai ko ha fekau faingofua ia ke fakahoko, pea naʻe vilitaki ʻa ʻĪlai ke ʻoua ʻe fufū ʻe Sāmiuela ha meʻa ʻe taha meiate ia. Ko ia naʻe fakamatala kotoa ʻe Sāmiuela ʻa e meʻa naʻe folofolaʻaki ʻe Sihová. Naʻe fiemaʻu ki ai ʻa e loto-toʻa!—1 Samiuela 3:​10-18.

ʻI he tupu hake ʻa Sāmiuela ʻo matuʻotuʻá, naʻe hoko ai ʻo ʻiloʻi ʻe ʻIsileli kotoa ko e palōfita ia ʻa e ʻOtuá. (1 Samiuela 3:​19, 20) Ko e fakamaau naʻe tomuʻa tala ʻe Sāmiuelá naʻe kamata ia ʻi he taimi naʻe tofanga ai ʻa ʻIsileli ʻi ha ʻulungia fakaefakaʻauha ʻi he kau Filisitiá. Naʻe mate ʻa Hofinai mo Fineasi ʻi he taú, pea naʻe puke ʻe he kau Filisitiá ʻa e ʻaʻake ʻo e kovinānite ʻa Sihová. ʻI hono ʻiloʻi ʻa e mate ʻa hono ongo fohá mo e mole ʻa e ʻAʻaké, naʻe tō foʻohake ʻa ʻĪlai mei hono nofoʻá ʻo fasi hono kiá peá ne mālōlō.—1 Samiuela 4:​1-18.

Hili mei ai ha taʻu ʻe 20, naʻe tapou ai ʻa Sāmiuela ki he kau ʻIsilelí ke liʻaki ʻa e lotu loí. Naʻa nau tali ki ai ʻaki hono fakaʻauha ʻenau ngaahi ʻaitolí, ʻaukai pea nau vete ʻenau ngaahi angahalá. Naʻe lotu ʻa Sāmiuela peá ne ʻoatu ha feilaulau tutu maʻanautolu. Ko e ikuʻangá? ʻI he taimi naʻe ʻoho mai ai ʻa e kau Filisitiá, naʻe fakapuputuʻuʻi kinautolu ʻe he ʻOtuá, pea ʻi he ʻohofi fakafepaki ʻe he kau ʻIsilelí ne nau ikunaʻi ai e filí. Fakafou ʻi he tāpuaki ʻa Sihová, naʻe fakalakalaka lahi ai ʻa e tuʻunga ʻo e kau ʻIsilelí, pea nau toe maʻu ʻa e feituʻu naʻe faʻao meia kinautolu ʻe he kau Filisitiá.—1 Samiuela 7:​3-14.

Naʻe pouaki moʻoni ʻe Sāmiuela ʻa e lotu moʻoní. Ko e fakatātaá, naʻá ne fakapapauʻi ko e niʻihi ʻo e ngaahi meʻa ne nau maʻu ʻi he taú naʻe ngāueʻaki ia ke tauhiʻaki ʻa e tāpanekalé. Naʻá ne tokoni ke fokotuʻutuʻu ʻa e ngaahi kātoanga Laka-Atú pea mo e ngāue ʻa e kau Līvai leʻo matapaá. (1 Kalonikali 9:22; 26:​27, 28; 2 Kalonikali 35:18) Naʻe fononga fakataʻu ʻa Sāmiuela mei hono ʻapí ʻi Lama ke faifakamaau ʻi he ngaahi kolo kehekehe. Naʻá ne maʻu ʻa e ongoongo ʻo e hoko ʻo faitotonu mo taʻefilifilimānako. Koeʻuhi naʻe fakaʻapaʻapaʻi ʻe he kakaí ʻa Sāmiuela, naʻá ne malava ai ke tokoniʻi fakalaumālie kinautolu. (1 Samiuela 7:​15-17; 9:​6-14; 12:​2-5) ʻOku ʻikai ha veiveiua ko ʻene faitotonú mo hono tuʻunga fakalaumālié naʻe ueʻi ai ʻa e tokolahi ke nau muimui ʻi heʻene faʻifaʻitakiʻangá. ʻOku ueʻi nai koe ʻe he ʻalunga ʻo Sāmiuelá?

Kole ʻe ʻIsileli ha Tuʻi

ʻI heʻene taʻumotuʻá, naʻe fakanofo ai ʻe Sāmiuela ʻa hono ongo fohá, ʻa Sioeli mo ʻApaia ko e ongo fakamaau. ‘Naʻe ʻikai te na fou ʻi hono ngaahi founga oʻoná, ka naʻá na afe ko e sio koloa, peá na tali meaʻofa, ʻo na leʻei ʻa e fakamāú.’ Ko hona ʻulungāangá naʻe iku atu ai ki hono kole ʻe he kau tangata matuʻotuʻa ʻi ʻIsilelí ha tuʻi. (1 Samiuela 8:​1-5) Naʻe kovi eni ʻi he vakai ʻa Sāmiuelá. Kae kehe, ʻi heʻene lotu ʻo kau ki aí, naʻe folofola ai ʻa Sihova: “ʻOku ʻikai ko koe kuo nau liʻaki, ka kuo nau liʻaki au mei he nofo ko honau tuʻi.” (1 Samiuela 8:​6, 7) Naʻe tala ʻe he ʻOtuá kia Sāmiuela ke fai ʻa e loto ʻo e kakaí pea ke fakatokanga kia kinautolu ʻo pehē fakafou ʻi he pule ʻa ha tuʻí, ʻe mole ai ʻa e ngaahi tauʻatāina ʻe niʻihi meia kinautolu. ʻI he vilitaki ʻa e kakaí, naʻe fokotuʻutuʻu ai ʻe Sihova kia Sāmiuela ke ne fakanofo tuʻi ʻa Saula.—1 Samiuela 8:​6-22; 9:​15-17; 10:1.

Naʻe poupouʻi ʻe Sāmiuela ʻa e fokotuʻutuʻu ko ení neongo ʻa ʻene kei tālaʻá. Hili ʻa hono ikunaʻi ʻe ʻIsileli ʻa e kau ʻĀmoní, naʻá ne fakatahatahaʻi ʻa e kakaí ʻi Kilikali ke fakapapauʻi ange ʻa e tuʻunga-tuʻi ʻo Saulá. (1 Samiuela 10:​17-24; 11:​11-15) Naʻe fakamanatu ʻe Sāmiuela ʻa e hisitōlia ʻo ʻIsilelí peá ne naʻinaʻi ki he tuʻí mo e kakaí ke nau talangofua kia Sihova. Naʻe tali ʻe he ʻOtuá ʻa e lotu ʻa Sāmiuelá ʻaki ʻa e afā lōvai tuʻungaʻa naʻe lave ki ai ʻi he kamataʻangá. Naʻe fakatupunga ʻe he afā ko iá ʻa e kakaí ke nau fakahaaʻi ʻenau fehālaaki ʻo hono liʻaki ʻa Sihová. ʻI heʻenau kole ange kia Sāmiuela ke ne lotu maʻanautolú, naʻá ne tali: “Mole ke mamaʻo haʻaku hia kia Sihova, ʻi heʻeku tuku ʻeku hufia kimoutolu: ka te u faleʻi kimoutolu ʻi he hala ʻoku lelei mo totonu.” He faʻifaʻitakiʻanga moʻoni ia ʻo e ʻofa mateaki kia Sihova pea mo ʻene kakaí! (1 Samiuela 12:​6-24) ʻOkú ke loto-lelei pehē ke poupouʻi ʻa e ngaahi fokotuʻutuʻu fakateokalatí pea ke lotu maʻá e kaungātuí?

Fuofua Ongo Tuʻi Fakaetangata ʻo ʻIsilelí

Ko Saulá ko ha tangata anga-malū ia naʻe hōifua ki ai ʻa e ʻOtuá. (1 Samiuela 9:21; 11:6) Kae kehe, naʻe faai mai pē ʻo ne taʻetokaʻi ʻa e fakahinohino fakaʻotuá. Ko e fakatātaá, naʻe valokiʻi ia ʻe Sāmiuela ʻi heʻene anga-taʻefakamaʻumaʻu ʻo ʻoatu ha feilaulaú, kae ʻikai ke tatali ʻo hangē ko ia naʻe tuʻutuʻuni kiate iá. (1 Samiuela 13:​10-14) ʻI he talangataʻa ʻa Saula ʻo fakahaofi ʻa e moʻui ʻa e tuʻi ʻAmaleki ko ʻĒkakí, naʻe tala ai ʻe Sāmiuela kiate ia: “Kuo hae ʻe Sihova ʻa e puleʻanga ʻo Isileli meiate koe he ʻaho ni, pea kuo ne foaki ki hao kaungaʻapi, ha taha ʻoku lelei hake ʻiate koe.” Ko Sāmiuela tonu naʻá ne tāmateʻi ʻa ʻĒkakí peá ne tengihia ʻa Saulá.—1 Samiuela 15:​1-35.

Naʻe faai mai pē ʻo folofola ʻa Sihova kia Sāmiuela: “Ko futu hoʻo fakamamahi koeʻuhi ko Saula, ka kuo u liʻaki ia mei heʻene Tuʻi Isileli?” ʻI he meʻa ko iá, naʻe fekauʻi ai ʻe Sihova ʻa Sāmiuela ki Pētelihema ke ne fakanofo tuʻi ha foha ʻo Sese. Naʻe vakaiʻi tahataha ai ʻe Sāmiuela ʻa e ngaahi foha kotoa ʻo Sesé kae toki hōifua pē ʻa Sihova kia Tēvita, ko e siʻisiʻi tahá, ke fakanofo ia. ʻI he ʻaho ko iá, naʻe ako ai ʻe Sāmiuela ha lēsoni mahuʻinga: “He talaʻehai ko e fai ki he sio ʻa e tangata; he ʻoku sio ʻa e tangata ki he mata, ka ʻoku sio ʻa e ʻEiki ki he loto.”—1 Samiuela 16:​1-13.

Koeʻuhi naʻe fakamamahiʻi ʻe he talangataʻa ʻa Saulá ʻa Sāmiuela, he fakalotomamahiʻi moʻoni ia ʻi he taimi naʻe tafunaki ai ʻe Saula ʻa e tāufehiʻa loto-fakapō kia Tēvitá! Neongo ʻa e ngaahi ʻahiʻahi ko iá, naʻe kei longomoʻui pē ʻa Sāmiuela ʻi heʻene taʻumotuʻá peá ne fai ʻa e meʻa naʻá ne lavá ʻi he ngāue ʻa Sihová.—1 Samiuela 19:​18-20.

Tofiʻa ʻo Sāmiuelá

ʻI he mate ʻa Sāmiuelá, naʻe tengihia ʻe ʻIsileli ʻa e palōfita anga-fakatōkilalo mo loto-toʻa ko ení ʻa ia naʻá ne tākiekina ʻa e moʻui ʻa e tokolahi. (1 Samiuela 25:1) Naʻe taʻehaohaoa ʻa Sāmiuela, pea ʻi he taimi ʻe niʻihi naʻá ne tōnounou ʻi heʻene faifakamāú. Kae kehe, neongo hono ngaahi ngātangá, naʻe ʻoatu ʻe Sāmiuela kia Sihova ʻa e līʻoa ʻaufuatō pea ngāue taʻehela ke tokoniʻi ʻa e niʻihi kehé ke nau fai ʻa e meʻa tatau.

Kuo liliu ʻa e meʻa lahi talu mei he ʻaho ʻo Sāmiuelá, ka ko e talanoa ki heʻene moʻuí ʻoku ʻomai ai ʻa e ngaahi lēsoni mahuʻinga kia kitautolu. Hiliō ai, naʻe fakahoko mo pouaki ʻe Sāmiuela ʻa e lotu moʻoni ʻa Sihová. Ko e meʻa ia ʻokú ke faí?

[Puha ʻi he peesi 16]

FAKALAULAULOTO KI HE MOʻUI ʻA SĀMIUELÁ

• Hangē pē ko hono akoʻi ʻe he ongo mātuʻa ʻa Sāmiuelá kiate ia ʻa e folofola ʻa e ʻOtuá, ʻohake hoʻo fānaú “ʻi he akonaki mo e fakatonutonu-fakaʻatamai ʻa Sihová.”—Efeso 6:​4, NW.

• Fakalototoʻaʻi hoʻo fānaú ke nau hangē ko Sāmiuelá ʻo ʻai ʻa e ngāue kia Sihová ko ʻenau ngāue ia ʻi he moʻuí.

• Ko e ngaahi ʻulungāanga fakaʻotua naʻe fakahāhā ʻe Sāmiuelá naʻe ʻofaʻi ai ia ʻe he niʻihi kehé, pea ko ia ai naʻá ne fokotuʻu ha faʻifaʻitakiʻanga lelei maʻatautolu.

• Naʻe fai ʻe Sāmiuela ʻa e meʻa kotoa naʻá ne lavá ke pouaki ʻa e lotu moʻoní, pea ʻoku totonu mo kitautolu ke tau fai pehē.

[Fakatātā ʻi he peesi 15]

Naʻe pouaki ʻe Sāmiuela ʻa e lotu moʻoní peá ne loto-lelei ke fai ʻa e tokoni fakalaumālie