Fekuki mo e Mamahí

“Bea tuu hake hono gaahi foha mo hono gaahi ofefine [ʻo Sēkopé] ke nau fakafiemalieʻi ia; ka nae ikai te ne tali ae fakafiemalie; bea ne behe, He teu alu hifo tagi be ki he faitoka ki hoku foha. Nae behe ae tagi a ene tamai koeuhi koia.”—SENESI 37:35, Paaki Motuʻa.

NAʻE mamahi lahi ʻa e pēteliake ko Sēkopé ʻi he mole ʻa hono fohá. Naʻá ne ʻamanekina te ne mamahi pē ʻo aʻu ki he ʻaho ʻo ʻene maté. ʻI he hangē ko Sēkopé, te ke ongoʻi nai ko e mamahi ʻi he mate ʻa ha taha ʻofeiná ʻoku fuʻu lahi pea heʻikai ʻaupito mole ia. ʻOku fakahaaʻi papau ʻi ha mamahi lahi pehē ha taʻetui ki he ʻOtuá? ʻIkai ʻaupito!

ʻOku fakahaaʻi ʻe he Tohi Tapú ko Sēkopé ko ha tangata ia ʻo e tuí. ʻOku fakaongoongoleleiʻi ʻa Sēkope fakataha mo ʻene kui-tangata ko ʻĒpalahamé pea mo ʻene tamaí, ʻa ʻAisake, ʻi he tuʻu-ki-muʻa ʻa ʻene tuí. (Hepelu 11:8, 9, 13) He ko ē, ʻi he taimi ʻe taha, naʻe aʻu ai ʻo ne fangatua ʻi ha pō kakato mo ha ʻāngelo ke ne maʻu ha tāpuaki mei he ʻOtuá! (Senesi 32:24-30) ʻOku hā mahino, ko Sēkopé ko ha tangata fakalaumālie lahi ia. Ko e hā leva ʻe lava ke tau ako mei he mamahi ʻa Sēkopé? Ko e ngaahi ongoʻi ʻo e mamahi mo e faingataʻaʻia lahi ʻi he taimi ʻoku mate ai ha taha ʻofeiná ʻoku ʻikai taʻefehoanaki ia mo e tui mālohi ki he ʻOtuá. Ko e mamahí ko e tali anga-maheni mo fakanatula ia ki he mole ʻa ha taha ʻoku tau ʻofa ai.

Ko e Hā ʻa e Mamahi?

ʻE lava ke uesia kitautolu ʻe he mamahí ʻi he ngaahi founga kehekehe, ka ki he tokolahi ko e ongoʻi mālohi tahá ʻa e mamahi fakaeongó. Fakakaukau angé ki he meʻa naʻe hoko kia Leonardo, ʻa ia naʻá ne taʻu 14 ʻi he taimi naʻe mate fakafokifā ai ʻene tamaí ʻi he ngaahi palopalema ʻi hono mafú mo ʻene mānavá. Heʻikai ʻaupito ngalo ʻia Leonardo ʻa e ʻaho naʻe tala ange ai kiate ia ʻe he tokoua ʻo ʻene faʻeé ʻa e ongoongó. Naʻá ne ʻuluaki fakafisi ke tui naʻe moʻoni ia. Naʻá ne sio ki he sino ʻo ʻene tamaí ʻi he putú, ka naʻe hā ngali ʻoku ʻikai hoko moʻoni ia. Naʻe feʻunga mo e māhina ʻe ono ʻa e ʻikai lava ke tangi ʻa Leonardo. Naʻá ne faʻa tatali ki heʻene tamaí ke ne foki mai mei he ngāué. Naʻe feʻunga mo e taʻu nai ʻe taha ki muʻa ke ne toki mahinoʻi kakato kuo mate moʻoni ʻa ʻene tamaí. ʻI heʻene hokó, naʻá ne ongoʻi tuēnoa lahi fakaʻulia. Ko e ngaahi meʻa anga-mahení—hangē ko e foki atu ki ʻapi ki ha fale ʻoku ʻikai ha tahá—naʻe fakamanatu ai kiate ia ʻa e puli ʻa ʻene tamaí. ʻI he ngaahi taimi peheé, naʻá ne faʻa tangutu hifo ai ʻo tangi. He ongo moʻoni kiate ia e mole ʻa ʻene tamaí!

Hangē ko ia ʻoku fakatātaaʻi lelei ʻi he meʻa naʻe hoko kia Leonardo, ʻoku lava ke hoko ʻo lahi ʻa e mamahí. Ko e ongoongo leleí he ʻoku malava ke fai ha fakaakeake. Kae kehe, ʻe fiemaʻu nai ki ai ha taimi. Hangē ko e fiemaʻu ko ia ʻa e taimi ke moʻui ai ha lavea lahi, ʻoku pehē pē ʻa e mamahí. Ko e fakaakeake mei he mamahí ʻe fiemaʻu nai ki ai ha ngaahi māhina, ko ha ngaahi taʻu siʻi, pe toe lōloa ange ai. Ka ko e mamahi lahi ʻokú ke ongoʻi ʻi he kamatá ʻe holo hifo ia ʻi he faai mai ʻa e taimí, pea ʻe faifai atu pē ʻo hā ngali siʻi ʻa e siva ʻamanakí mo e taumuʻavalea ʻa e moʻuí.

Lolotonga iá, ko e mamahí ʻoku pehē tokua ko ha konga pau ia ʻo e fakaakeaké pea mo e ako ke feʻunuʻaki ki he tuʻunga foʻoú. ʻOku ʻi ai ha tuʻunga ngeʻesi ʻa ia ki muʻá naʻe ʻi ai ha tokotaha moʻui. ʻOku fiemaʻu ke tau feʻunuʻaki ki he moʻui ʻoku ʻikai kau ai ʻa e tokotaha ko iá. ʻOku tokoni nai ʻa e mamahí ke fakahaaʻi ai hoʻo ngaahi ongoʻí. Ko e moʻoni, ʻoku ʻikai ke mamahi ʻa e tokotaha kotoa ʻi ha founga tatau tofu pē. Kae kehe, ʻoku ʻi ai e meʻa ʻe taha ʻoku moʻoni: Ko hono fakamaʻumaʻu hoʻo mamahí ʻoku lava ke fakatupu maumau fakaʻatamai, fakaeongo mo fakaesino ia. ʻE lava fēfē leva ke ke fakahaaʻi hoʻo mamahí ʻi ha ngaahi founga lelei? ʻOku ʻi he Tohi Tapú ha faleʻi fakapotopoto.a

Fekuki mo e Mamahí

Kuo ʻilo ʻe he kau mamahi tokolahi ko e talanoá ʻoku lava ke hoko ia ko ha fakafiemālie ʻaonga. Ko e fakatātaá, fakatokangaʻi ʻa e ngaahi lea ʻa Siope ʻi he Tohi Tapú, ʻa ia naʻá ne faingataʻaʻia ʻi he mole ʻa e kotoa ʻo ʻene fānau ʻe toko hongofulú peá ne kātekina mo e ngaahi meʻa fakamamahi kehe. Naʻá ne pehē: “ʻOku fiu hoku laumalie ʻi heʻeku moʻui; te u laku atu ʻeku launga: Te u lea ʻi he mamahi hoku laumalie.” (Siope 1:2, 18, 19; 10:1) Fakatokangaʻi naʻe fiemaʻu kia Siope ke ne “laku atu” ʻa e ngaahi meʻa naʻá ne hohaʻa ki aí. Naʻe fēfē ʻene fai iá? “Te u lea,” ko ʻene fakamatalá ia.

Ko Paulo, ʻa ia naʻe mate ʻa ʻene faʻeé, ʻokú ne pehē: “Ko e taha ʻo e ngaahi meʻa kuó ne tokoniʻi aú ko e talanoa ʻo fekauʻaki mo ʻeku faʻeé.” Ko ia ko e talanoa ʻo fekauʻaki mo hoʻo ngaahi ongoʻí ki ha kaumeʻa falalaʻanga ʻe lava ke ne ʻomai ha fakafiemālie. (Palovepi 17:17) Hili e mate ʻa ʻene faʻeé, naʻe kole ʻe Yone ki hono fanga tuongaʻane Kalisitiané ke nau toutou ʻaʻahi ange kiate ia. “Naʻe tokoni e talanoá ke fakasiʻisiʻi e mamahí,” ko ʻene manatú ia. Ko koe foki te ke ʻiloʻi ko hono leaʻaki hoʻo ngaahi ongoʻí pea vahevahe ia ki ha tokotaha fanongo kaungāongoʻí ʻe faingofua ange ai ke ke fekuki mo ia.

Ko e faitohí ʻe toe lava ke hoko ia ko ha fakafiemālie ʻaonga. Ko e niʻihi ʻoku nau ʻiloʻi ʻoku faingataʻa ke talanoa fekauʻaki mo ʻenau ongoʻí ʻe faingofua ange nai ke nau talanoa fekauʻaki mo ʻenau ongoʻí ʻi he faitohí. Hili e mate ʻa Saula mo Sionatané, naʻe hiki ʻe he tangata faitōnunga ko Tēvitá ha hiva ʻo e tengihia lahi ʻa ia naʻá ne fakahaaʻi ai ʻene mamahí. Ko e taʻanga fakaueʻiloto ko ení naʻe faifai pē ʻo hoko ko e konga ia ʻo e tohi hono Ua ʻa Samiuela ʻi he Tohi Tapú.—2 Samiuela 1:17–27.

Ko e tangí ʻe toe hoko ia ko ha fakafiemālie fakaeongo. “Ko e meʻa kotoa ʻoku ai hano taimi, pea . . . ko e ʻaho ke tangi,” ko e lau ia ʻa e Tohi Tapú. (Koheleti 3:1, 4) Ko e moʻoni, ko e mate ʻa ha taha ʻoku tau ʻofa ai ko e ‘ʻaho ia ke tangi’ ai. Ko e loʻimata ʻo e mamahí ʻoku ʻikai ko ha meʻa ia ke mā ai. ʻOku ʻi he Tohi Tapú ʻa e ngaahi fakatātā lahi ʻo e kau tangata mo e kau fefine faitōnunga naʻa nau fakahaaʻi fakahāhā ʻenau mamahí ʻaki ʻenau tangi. (Senesi 23:2; 2 Samiuela 1:11, 12) Naʻe “tutulu” ʻa Sīsū Kalaisi ʻi heʻene fakaofi atu ki he fonualoto ʻo siʻono kaumeʻa ko Lāsalosí, ʻa ia naʻe toki maté.—Sione 11:33, 35.

Ko e ngāue ki he mamahí ʻoku fiemaʻu ki ai ʻa e kātaki, he te ke ongoʻi nai ʻokú ke ʻi he tuʻunga feliliuaki fakaeongo. Manatuʻi ʻoku ʻikai fiemaʻu ia ke ke mā ʻi hoʻo tangí. Kuo ʻiloʻi ʻe he faʻahinga faitōnunga tokolahi ko e tō e loʻimata ʻi he mamahí ko ha konga fakanatula mo taʻealakalofi ia ʻo e fakaakeaké.

ʻUnuʻunu Atu ki he ʻOtuá

ʻOku tala mai ʻe he Tohi Tapú: “ʻUnuʻunu atu ki he ʻOtua, pea ʻe ʻunuʻunu mai ia kiate kimoutolu.” (Semisi 4:8) Ko e taha ʻo e ngaahi founga tefito ke ʻunuʻunu atu ai ki he ʻOtuá ʻoku fakafou ia ʻi he lotu. ʻOua ʻe fakasiʻia ʻa hono mahuʻingá! ʻOku ʻomai ʻe he Tohi Tapú ʻa e palōmesi fakafiemālie ko ení: “Ko e loto lavea ʻoku ofi ki ai ʻa e ʻEiki, pea ʻoku ne fakamoʻui ʻakinautolu ʻoku laumalie mafesi.” (Sāme 34:18) ʻOkú ne toe fakapapauʻi mai: “Li hoʻo kavenga kia Sihova, he te ne poupou koe ʻe ia.” (Sāme 55:22) Fakakaukau fekauʻaki mo eni. Hangē ko ia ne tau vakai ki ai ki muʻa angé, kuo ʻiloʻi ʻe he tokolahi ʻoku ʻaonga ke talanoa mo ha kaumeʻa falalaʻanga ʻo fekauʻaki mo ʻenau ongoʻí. ʻIkai ʻe toe ʻaonga lahi ange ke lilingi ʻetau ongoʻí ki he ʻOtuá ʻa ia ʻokú ne palōmesi mai te ne fakafiemālieʻi hotau lotó?—2 Tesalonaika 2:16, 17.

Ko Paulo, ʻa ia naʻe lave ki ai ki muʻa angé, naʻá ne pehē: “ʻI he taimi naʻe ʻikai ai te u kei lava ke kātakiʻi ʻa e mamahí peá u ongoʻi heʻikai lava ke u fekuki mo iá, naʻá ku tūʻulutui hifo ai ʻo lotu ki he ʻOtuá. Naʻá ku kōlenga kiate ia ke ne tokoniʻi au.” ʻOku tuipau ʻa Paulo naʻe tokoniʻi ia heʻene ngaahi lotú. Ko koe foki te ke ʻiloʻi ʻi he tali ki hoʻo ngaahi lotu kīkīvoí, ko e “Otua oe fiemalie kotoabe” te ne ʻoatu kiate koe ʻa e loto-toʻa mo e mālohi ke fekuki mo ia.—2 Kolinito 1:3, 4, PM; Loma 12:12.

ʻAmanaki ʻo e Toetuʻú

Naʻe pehē ʻe Sīsū: “Ko au pē ko e Toetuʻu, pea mo e Moʻui: ko ia ʻoku tui pikitai kiate au, ne ongo kuo pekia, ka te ne moʻui pē.” (Sione 11:25) ʻOku akoʻi ʻe he Tohi Tapú ʻe toe moʻui ʻa e kau maté.b Lolotonga ʻa e ʻi māmani ʻa Sīsuú, naʻá ne fakahaaʻi ʻokú ne malava ke fokotuʻu hake ʻa e kau maté. ʻI he taimi ʻe taha, naʻá ne fokotuʻu hake ai ha kiʻi taʻahine taʻu 12. Naʻe fēfē ʻa e fakafeangai ki ai ʻa ʻene ongo mātuʻá? Naʻá na ‘ofo ai i he ofo lahi.’ (Maake 5:42, PM) ʻI he malumalu ʻo e pule ʻa hono Puleʻangá, ʻe fokotuʻu hake ai ʻe he tuʻi fakahēvani ko Sīsū Kalaisí ʻa e fuʻu kakai taʻefaʻalaua ke nau moʻui heni ʻi he māmaní—ka ʻi he malumalu ʻo e ngaahi tuʻunga melino mo māʻoniʻoni. (Ngāue 24:15; 2 Pita 3:13) Fakaʻuta atu ki he ofo lahi ʻi he taimi ʻe toe moʻui ai ʻa e kau maté ʻo nau toe fakataha mo e faʻahinga ʻoku nau ʻofa aí!

Ko Claudete, naʻe mole ʻa ʻene tamasiʻí ʻi he pā ʻa e vakapuná, naʻá ne fokotuʻu ha tā ʻo ʻene tamasiʻi, ʻa Renato, ʻi he funga ʻaisí. ʻOkú ne faʻa sio ki he taá mo ne pehē hifo pē kiate ia, ‘Te ta toe feʻiloaki, ʻi he toetuʻú.’ ʻOku sioloto atu ʻa Leonardo ki he toe moʻui mai ʻa ʻene tamaí ʻi he māmani foʻou ʻa e ʻOtuá naʻá ne talaʻofá. ʻIo, ko e ʻamanaki ʻo e toetuʻú ko ha matavai moʻoni ia ʻo e fakafiemālie kiate kinautolu mo e faʻahinga taʻefaʻalaua kehe kuo mate ʻa e faʻahinga ʻoku nau ʻofa aí. ʻE lava ke hoko foki ia kiate koe!

[Fakamatala ʻi lalo]

[Puha ʻi he peesi 7]

“Otua oe Fiemalie Kotoabe”

“Fakafetai ki he Otua, moe Tamai a ho tau Eiki ko Jisu Kalaisi, koe Tamai ae gaahi aloofa, moe Otua oe fiemalie kotoabe.”—2 Kolinito 1:3, PM.

ʻOku fakahaaʻi ʻi he veesi Tohi Tapú ʻoku lava ke tokoniʻi ʻe he ʻOtuá ʻa ʻene kau sevāniti faitōnungá ke nau kātakiʻi ha palopalema pe pole pē te nau fehangahangai nai mo ia. Ko e founga ʻe taha ʻe tokonaki mai nai ai ʻe Sihova ʻa e fakafiemālié ʻoku fakafou ia ʻi ha kaumeʻa pe ko ha taha ʻokú te ʻofa ai ʻokú ne kau ʻi he tui tatau mo kita.

Ko Leonardo, ʻa ia naʻe mate ʻa ʻene tamaí, ʻokú ne manatuʻi ha hokosia ʻa ia naʻá ne ʻomai kiate ia ʻa e mālohi mo e fakafiemālie. Ko ʻene toki aʻu atu pē ia ki ʻapi, pea ʻi heʻene manatuʻi ʻoku ʻikai ha taha aí, naʻá ne kamata leva ke tangi taʻealamapuleʻi. Naʻá ne ʻalu ki ha paʻake ofi mai ʻo tangutu ai ʻi ha sea, ʻa ia naʻe hoko atu ai ʻene tangí. ʻI he lolotonga ʻene tangí, naʻá ne kōlenga ai ki he ʻOtuá ki ha tokoni. Fakafokifā pē, naʻe tuʻu ofi mai ai ha veeni, pea naʻe ʻiloʻi ʻe Leonardo ko e fakaʻulí ko e taha ia ʻo hono fanga tokoua Kalisitiané. Naʻe fai e tiliva ʻa e tokouá pea afe hala ange ia ai. Ko ʻene ʻi aí naʻe feʻungaʻānoa pē ia ki hono fakafiemālieʻi ʻo Leonardo.

ʻI he taimi ʻe taha, naʻe ongoʻi taʻelata ai ha siana uitou peá ne loto-mafasia ʻaupito. Naʻe ʻikai lava ʻo tuku ʻene tangí koeʻuhi ne hā ngali fakataʻeoli ʻa e meʻa kotoa pē. Naʻá ne kole tokoni ki he ʻOtuá. Lolotonga ʻene kei lotú, naʻe tatangi ʻa e telefoní. Ko hono mokopuna fefiné. ʻOkú ne manatuʻi: “Ko ʻema fetalanoaʻaki nounoú naʻe feʻunga ia ki hono toe fakafoʻou ʻa ʻeku loto-toʻá. Naʻe ʻikai haʻaku toe veiveiua ko ʻene telefoní ko e tali ia ki he lotu ʻo kole tokoní.”

[Puha ʻi he peesi 9]

Fai ʻa e Fakafiemālie ki he Niʻihi Kehé

“[Ko e ʻOtuá] oku ne fakafiemalieʻi akimautolu i he e mau mamahi kotoabe, koeuhi ke mau faa fai ai ke fakafiemalieʻi akinautolu oku mamahiia, aki ae fakafiemalie koia aia oku fakafiemalieʻi aki akimautolu e he Otua.”—2 Kolinito 1:4, PM.

Kuo hokosia tonu ʻe he kau Kalisitiane moʻoni tokolahi ʻa e ʻuhinga ʻo e ngaahi lea ko iá. ʻI heʻenau maʻu ʻa e fakafiemālie ke fekuki mo e mole ʻa ha taha ʻofeiná, ʻoku nau ʻilo ai ʻoku nau malava ke fai ʻa e fakalototoʻa mo e fakafiemālie ki he niʻihi kehé.

Fakakaukau angé ki he faʻifaʻitakiʻanga ʻa Claudete, ʻa ia ʻokú ne ʻaʻahi maʻu pē ki he niʻihi kehé ke vahevahe kiate kinautolu ʻa ʻene tui makatuʻunga ʻi he Tohi Tapú. Ki muʻa ke mate ʻa ʻene tamasiʻí, naʻá ne ʻaʻahi ai ki ha fefine ʻa ia naʻe mate ʻa ʻene tamasiʻí ʻi he kanisā totó. Naʻe fiefia ʻa e fefiné ʻi heʻene ngaahi ʻaʻahí, ka naʻá ne ongoʻi heʻikai ʻaupito ke mahinoʻi kakato ʻe Claudete ʻa ʻene mamahí. Kae kehe, ʻikai fuoloa mei he mate ʻa e tamasiʻi ʻa Claudete, naʻe ʻaʻahi kiate ia ʻa e fefiné ʻo ne tala ange ko ʻene haʻú ke sio pe ʻoku kei tauhi maʻu pē ʻe Claudete ʻa ʻene tuí he taimi ko ení ʻi he mate ʻa ʻene tamasiʻí. ʻI he maongo kiate ia ʻa e tui mālohi ʻa Claudete, ʻoku ako tuʻumaʻu ai ʻa e fefiné mo Claudete pea ʻokú ne maʻu ʻa e fakafiemālie lahi mei he Folofola ʻa e ʻOtuá.

Hili e mate ʻa ʻene tamaí, naʻe fili ai ʻa Leonardo ke ne ako ʻa e lea fakaʻilongá koeʻuhi ke lava ai ʻo ne vahevahe ʻa e pōpoaki fakafiemālie ʻa e Tohi Tapú ki he faʻahinga ʻoku tulí. Kuó ne ʻiloʻi ko ʻene ngaahi feinga ke tokoniʻi ʻa e kau tulí kuo ʻaonga lahi kiate ia. ʻOkú ne pehē: “Ko e taha ʻo e ngaahi meʻa kuó ne tokoniʻi au ke u fekuki mo ʻeku mamahí ko ʻeku holi ko ia ke tokoniʻi ʻa e kau tulí ke nau ako fekauʻaki mo e ʻOtuá. Kuó u līʻoa ha taimi mo e ivi lahi ki hono tokoniʻi kinautolú. Ko ʻeku ngaahi ongoʻi loto-mamahí naʻe liliu ia ko e fiefia ʻi heʻeku sio ki he papitaiso ʻa ʻeku ʻuluaki ako Tohi Tapú! Ko hono moʻoní, ko e ʻuluaki taimi ia naʻá ku ongoʻi ai ha fiefia lahi talu e mate ʻa ʻeku tamaí.”—Ngāue 20:35.

[Fakatātā ʻi he peesi 5]

Ko e talanoa fekauʻaki mo hoʻo ngaahi ongoʻí ʻoku lava ke ne ʻomai ha fakafiemālie

[Fakatātā ʻi he peesi 6]

Ko e faitohí ʻe lava ke hoko ia ʻo ʻaonga ʻi hono fakahaaʻi ʻa e mamahí

[Fakatātā ʻi he peesi 6]

Ko e lautohi fekauʻaki mo e ʻamanaki ʻo e toetuʻú ʻoku lava ke hoko ia ko ha matavai ʻo e fakafiemālie

[Fakatātā ʻi he peesi 8, 9]

Naʻe palōmesi ʻe Sīsū ha toetuʻu ki he faʻahinga ʻoku nau ngāueʻi ʻa e tui kiate iá