ʻE Anga-Fēfē ʻEku Fekuki mo Hoku Loto-Mamahí?

“NAʻÁ KU ongoʻi ʻoku ueʻi mālohi au ke u kukuta ʻeku ngaahi ongoʻí,” ko e fakamatala ia ʻa Mike ʻi heʻene manatu ki he mate ʻa ʻene tamaí. Fakatatau kia Mike, ko hono lōmia ʻa hono loto-mamahí ko ha meʻa ngali tangata moʻoni ia ke fai. Ka naʻá ne toki fakatokangaʻi naʻá ne hala. Ko ia ʻi he taimi naʻe mate ai ʻa e kui tangata ʻa e kaumeʻa ʻo Mike, naʻe ʻilo ʻe Mike ʻa e meʻa ke faí. ʻOkú ne pehē: “Ko ʻeku founga fakafeangai ki he meʻá ni ʻi he ngaahi taʻu siʻi kuo maliu atú, naʻá ku tātaaʻi pē hono umá peá u pehē: ‘ʻAi ke ngali tangata.’ Ko ʻeku founga fakafeangai leva ki he meʻá ni ʻi he taimi ní ʻoku ou ala ki hono nimá peá u pehē, ‘Tauʻatāina pē koe ki he anga ʻo hoʻo ongoʻí. ʻE tokoni ia kiate koe ke ke fekuki ai mo e meʻá ni. Kapau ʻokú ke loto ke u ʻalu, te u ʻalu. Kapau ʻokú ke loto ke u nofo atu, te u nofo. Kae ʻoua te ke manavasiʻi ke fakahāhā hoʻo ongoʻí.’”

Naʻe toe ongoʻi foki ʻe MaryAnne ʻa hono ueʻi ia ke ne kukuta ʻa ʻene ngaahi ongoʻí ʻi he taimi naʻe mate ai ʻa hono husepānití. ʻOkú ne manatuʻi: “Koeʻuhi naʻá ku loto-hohaʻa lahi ʻo kau ki haʻaku hoko ko ha faʻifaʻitakiʻanga lelei ki he niʻihi kehé, naʻe ʻikai te u fakaʻatā au ke u fakahā ʻa e ngaahi ongo anga-maheni mo e meʻá ni. Ka naʻe faifai atu peá u ʻiloʻi ko e feinga ko ia ke hoko ʻo tuʻu mālohi koeʻuhi ko e niʻihi kehé naʻe ʻikai ke tokoni ia kiate au. Naʻe kamata leva ke u sivisiviʻi ʻa e tuʻunga ʻoku ou ʻi aí peá u pehē, ‘Tangi ʻo kapau ʻoku totonu ke ke tangi. ʻOua ʻe feinga ke hoko ʻo fuʻu tuʻu mālohi. Fakahā hoʻo ngaahi ongoʻí koeʻuhi ke ke ongoʻi lelei ange ʻamui.’”

Ko ia naʻe poupouʻi mai ʻe Mike mo MaryAnne: Loto-mamahi pē koe! Pea ʻokú na tonu ai. Ko e hā hono ʻuhingá? Koeʻuhi ko e loto-mamahí ko hano tukuange totonu atu ia ʻa e anga ʻo e ongoʻí. Ko hoʻo tukuange atu ʻa hoʻo ngaahi ongoʻí ʻoku malava ke ke fakamaʻamaʻa atu ʻa e mafasia ʻokú ke ʻi aí. Ko hono fakahaaʻi totonu ʻo e ngaahi ongoʻí, kapau ʻoku kau fakataha ki ai ʻa e mahino mo e fakamatala totonu, ʻai hoʻo ngaahi ongoʻí ʻi he tuʻunga totonu ʻoku hā mahino kiate koé.

Ko hono moʻoní, heʻikai ke fakahaaʻi ʻe he tokotaha kotoa pē ʻa e loto-mamahí ʻi he founga tatau. Pea kapau ko e mate fakafokifā ʻa ha taha naʻá te ʻofa ai pe ko e hoko mai ʻa e maté ʻi he hili ha tokoto puke fuoloa, ʻoku ʻi ai ʻene tākiekina nai ki he anga ʻo e ongoʻi ʻa e faʻahinga ʻoku kei moʻuí. Ka ʻoku hā mai ha meʻa pē ʻe taha ʻoku pau: Ko hono lōmia ʻa hoʻo ngaahi ongoʻí ʻoku malava ke hoko fakatouʻosi ai ha maumau fakaesino mo fakaeongo. Te ke moʻuilelei ange ʻi hono tukuange atu hoʻo loto-mamahí. Anga-fēfē? ʻOku ʻi he Tohitapú ha ngaahi faleʻi ʻaonga ʻe niʻihi.

Ko e talanoá ʻoku malava ke hoko ia ko ha tokoni lahi ki hono tukuange atu ʻo e loto-mamahí. ʻI he hili ʻa e mate ʻa e fānau kotoa ʻe toko hongofulu ʻa Siopé pea pehē ki he ngaahi fakamamahi kehe naʻe hoko kiate iá, naʻe pehē ʻe he pēteliake ko ʻeni ʻo e kuonga muʻá: “ʻOku fiu hoku laumalie ʻi heʻeku moʻui; te u laku atu [faka-Hepelū, “tukuange”] ʻeku launga; te u lea ʻi he mamahi hoku laumalie.” (Siope 1:​2, 18, 19; 10:1) Naʻe ʻikai malava ʻe Siope ke kei taʻotaʻofi ʻa ʻene loto-moʻuá. Naʻe fiemaʻu kiate ia ke ne tukuange atu ia; naʻe pau ke ne “lea.” ʻI he tuʻunga meimei tatau, naʻe tohi ʻe he tangata faʻu-tohi faiva ʻi he lea faka-​Pilitāniá ko Shakespeare ʻi he tohi ko e Macbeth: “Lea ʻaki ʻa e mamahí; ko e loto-mamahi ʻoku ʻikai ke leaʻakí ʻoku malava ke ne lōmekina fakalongolongo ʻa e tokotaha ʻoku mamahí.”

Ko ia, talanoa ʻo fekauʻaki mo hoʻo ngaahi ongoʻí ki ha ‘kaumeʻa moʻoni’ ʻa ia te ne fanongo anga-kātaki mo anga-fiekaungāmamahi peá ne fakahoko mai ha fakafiemālie. (Palovepi 17:17) Ko hono leaʻaki ʻa e ngaahi meʻa ʻoku hokosiá pea mo e ngaahi ongoʻí ʻoku faʻa faingofua ange ai ke mahino pea lava ke fekuki mo kinautolu. Pea kapau ko e tokotaha ʻoku fanongo maí ko ha toe tokotaha loto-​mamahi mo ia ʻa ia naʻe lavameʻa ʻa ʻene fekuki mo e ongoʻi ʻo e mole atu ha taha ʻi he maté, ʻe malava nai ke ke maʻu mei ai ha ngaahi fokotuʻu ʻaonga ʻo fekauʻaki mo e founga te ke lava ʻo fekuki ai mo iá. ʻI he mate ʻa ha kiʻi tama ʻa ha fefine ʻe taha, naʻá ne fakamatala ki he ʻuhinga naʻe tokoni ai ʻa ʻene talanoa ki ha toe fefine ʻe taha ʻa ia naʻá ne fehangahangai mo ha mole meimei tatau pē: “Ke ʻilo ha toe tokotaha kehe naʻá ne hokosia ʻa e meʻa tatau, naʻe toe sai ʻa ʻene ongoʻí mo e fakakaukaú, pea naʻá ne kei maʻu ha tuʻunga maau ʻi heʻene moʻuí, naʻe fuʻu fakalototoʻa ia kiate au.”

Fēfē kapau ʻoku ʻikai te ke talanoa fiemālie ʻo kau ki hoʻo ngaahi ongoʻí? ʻI he hili ʻa e mate ʻa Saula mo Sionatané, naʻe faʻu ʻe Tēvita ha taʻanga ongo mātuʻaki fakamamahi ʻa ia naʻá ne fakahaaʻi ai ʻa ʻene loto-​mamahí. ʻI he faai mai ʻa e taimí naʻe hoko ʻa e taʻanga ongo fakamamahí ni ko ha konga ʻo e fakamatala naʻe hiki ʻi he tohi Tohitapu ko e Ua Samiuelá. (2 Samiuela 1:​17-27; 2 Kalonikali 35:25) ʻI he tuʻunga meimei tatau, ʻoku pehē ʻe he niʻihi ʻoku faingofua ange ke fakamatalaʻi ʻenau mamahí ʻi hono fai ha tohi. Naʻe pehē ʻe ha uitou ʻe taha naʻá ne hanga ʻo tohi ʻa ʻene ngaahi ongoʻí pea ʻi he hili ha ngaahi ʻaho mei ai naʻá ne lau ʻa e meʻa naʻá ne tohí. Naʻá ne pehē ko ha tokoni lahi ia ki hono tukuange atu ʻa e loto-​mamahí.

Tatau ai pē pe ʻoku talanoaʻaki pe ʻoku tohi, ko hono fakamatalaʻi atu ʻa hoʻo ngaahi ongoʻí ʻoku malava ke tokoni ia kiate koe ke ke tukuange atu ai ʻa hoʻo loto-​mamahí. ʻE toe tokoni foki ia ki hono fakamahinoʻi ʻa e ngaahi taʻefemahinoʻakí. Ko ha fakamatala ʻeni ʻa ha faʻē loto-​mamahi: “Naʻá ku fanongo mo hoku husepānití ʻo fekauʻaki mo ha ngaahi hoa mali naʻa nau vete ʻi he hili ʻa e mole atu haʻanau kiʻi tama, pea naʻe ʻikai te ma loto ke hoko ha meʻa pehē kiate kimaua. Ko ia, ʻi ha taimi pē naʻá ma ongoʻi ʻita ai, ʻo loto ke fetēkeaki, te ma fetalanoaʻaki leva ki ai pea feinga ke fakaleleiʻi. ʻOku ou tui naʻá ma fakatupu ai ke ma toe vāofi ange koeʻuhi ko ʻema fai ʻa e meʻa ko iá.” Ko ia, ko hono ʻai ʻa hoʻo ngaahi ongoʻí ke ʻiloʻí ʻoku malava ke tokoni ia kiate koe ke ke maʻu ʻa e mahinó neongo ʻoku mou tofanga ʻi he tuʻunga tatau ko e mole atu ʻa ha taha, ʻe kehekehe pē nai ʻa e anga ʻo e loto-​mamahi ai ʻa e niʻihi kehé​—ʻi he vave pea mo e founga pē ʻa kinautolu.

Ko e toe meʻa ʻe taha ʻoku malava ke tokoni ki hono fakafaingofuaʻi ʻa hono tukuange atu ʻo e loto-​mamahí ko e tangi. ʻOku ʻi ai ʻa e “ʻaho ke tangi,” ko e lau ia ʻa e Tohitapú. (Koheleti 3:​1, 4) Ko hono moʻoní ʻoku hoko mai ʻa e taimi ko iá ʻi he mate atu ʻa ha taha ʻoku tau ʻofa ai. ʻOku hā ko e tō loʻimata ʻi he loto-​mamahí ko ha konga feʻungamālie ia ki hono maʻu ʻa e ʻalunga fakafiemālié.

ʻOku fakamatala ha fefine teʻeki mali ʻe taha ʻo kau ki ha founga naʻe tokoni ange ai kiate ia ʻa hono kaumeʻa vāofí ʻi heʻene fekuki mo e taimi naʻe mate ai ʻa ʻene faʻeé. ʻOkú ne pehē: “Naʻe ʻi ai maʻu pē ʻa hoku kaumeʻá ke fakafiemālieʻi au. Naʻá ne tangi fakataha mo au. Naʻá ne talanoa mai kiate au. Naʻe lava pē ke u fakahāhaaʻi ʻa ʻeku ngaahi ongoʻí, pea naʻe mahuʻinga ia kiate au. Naʻe ʻikai ke u ongoʻi mā ʻi heʻeku tangí.” (Sio ki he Loma 12:15.) ʻOku ʻikai totonu ke ke ongoʻi mā ʻo fekauʻaki mo hoʻo tangí. Hangē ko ia kuo tau vakai ki aí, ʻoku fonu ʻi he Tohitapú ʻa e ngaahi fakatātā ʻo fekauʻaki mo e kau tangata mo e kau fefine anga-tonu​—kau ai ʻa Sīsū Kalaisi​—ʻa ia naʻa nau tō loʻimata ʻi he loto-mamahí ʻo ʻikai ongoʻi mā.​—Senesi 50:3; 2 Samiuela 1:​11, 12; Sione 11:​33, 35.

ʻE ʻi ai ha taimi ʻe hoko mai nai ai ʻa hoʻo ngaahi ongoʻí ʻo ʻikai te ke tomuʻa ʻilo ki ai. ʻE tafe nai ʻa e loʻimatá ʻo ʻikai te ke tomuʻa ʻilo ʻe hoko ia. Naʻe ʻilo ʻe ha uitou ʻe taha ko e ʻalu ʻo fakatau meʻakai mei he fale-koloá (ʻa e meʻa naʻá ne fai maʻu pē mo hono husepānití) naʻe malava ke ʻai ai ia ke ne tangi, tautefito ki he taimi naʻá ne aʻu fāinoa ai ki he ngaahi meʻakai naʻe manako ai ʻa hono husepānití. Fakaʻatuʻi ai koe. Pea ʻoua te ke fakakaukau kuo pau ke ke taʻofi ho loʻimatá. Manatuʻi, ko ha meʻa fakaenatula ia pea ko ha konga totonu pē ia ʻo e loto-​mamahí.

Hangē ko ia naʻe lave ki ai ki muʻá, kuo ongoʻi halaia ʻa e niʻihi ʻi he hili ʻa e mole atu ʻa ha taha naʻa nau ʻofa ai ʻi he maté. ʻOku tokoni nai ʻeni ki hono fakamatalaʻi ʻa e loto-mamahi lahi ʻa e tangata anga-tonu ko Sēkopé ʻi hono tohoaki ia ke ne tui ko hono foha ko Siosifá ne tāmateʻi ia ʻe “ha manu fekai.” Naʻe fekau ʻe Sēkope ʻa Siosifa ke ne ʻalu ʻo vakai pe ʻoku lelei pē ʻa hono ngaahi tokouá. Ko ia ʻoku hangehangē naʻe hohaʻaʻia ʻa Sēkope ʻi he ongoʻi halaia, ʻo hangē ko ha pehē ‘Ko e hā naʻá ku fekau ai ʻa Siosifa ke ʻalu tokotahá? Ko e hā naʻá ku fekau atu ai ia ke ʻalu ki ha feituʻu ʻoku lahi ai ʻa e fanga manu fekaí?’​—Senesi 37:​33-35.

Mahalo pē ʻokú ke ongoʻi naʻe ʻi ai haʻo taʻetokanga naʻe kaunga ki he mate ʻa ha taha naʻá ke ʻofa ai. ʻI hono mahinoʻi ʻa e ongoʻi halaia ko iá​—pe ko e moʻoni pe ko e fakakaukauloto pē​—ko ha faʻahinga ongo totonu pē ia ʻo e loto-mamahí ʻe malava ke ne fai ha tokoni. ʻOku toe fiemaʻu heni, ke ʻoua ʻe fakakaukau kuo pau ke ke tauhi maʻu ʻiate koe ʻa e faʻahinga ongoʻi peheé. Ko e talanoa ʻo kau ki he anga ʻo hoʻo ongoʻi halaia peheé ʻoku tokoni ia ki hono tukuange atu ʻo e mamahí.

Ka neongo ia, ʻai ke ke ʻiloʻi, neongo pe ko e hā hono lahi ʻo ʻetau ʻofa ki ha tokotaha, ʻoku ʻikai malava ke tau puleʻi ʻa ʻene moʻuí, pea ʻoku ʻikai malava ke tau taʻofi ʻa e “hokonoa ki he faʻahinga kotoa pe ʻa e faingamalie mo e tuʻutamaki” ke ʻoua ʻe hoko ki he faʻahinga ʻoku tau ʻofa aí. (Koheleti 9:11) Kae kehe, ʻoku ʻikai ha veiveiua naʻe ʻikai ha taumuʻa kovi ia ʻiate koe. Ko e fakatātaá, ʻi he ʻikai ke sio fakavavevave ange ki he toketaá, naʻá ke taumuʻa ki he tokotaha naʻá ke ʻofa aí ke ne hoko ʻo puke pea mate? Ko hono moʻoní ʻikai! Ko ia ai, ʻokú ke halaia moʻoni ʻo fekauʻaki mo hano fakatupunga ʻa e mate ʻa e tokotaha ko iá? ʻIkai.

Naʻe ako ha fefine ʻe taha ke fekuki mo e ongoʻi halaia ʻi he hili ʻa e mate ʻa ʻene taʻahiné ʻi ha fakatuʻutāmaki ʻa ha kā. ʻOkú ne fakamatala mai: “Naʻá ku ongoʻi halaia ʻi heʻeku fekau ia ke ʻalú. Ka naʻá ku toki fakatokangaʻi ko ha meʻa ngalivale ia ke te ongoʻi pehē. Naʻe ʻikai ke ʻi ai ha meʻa ʻe hala ʻi heʻeku fekau ia ke ne ʻalu mo ʻene tamaí ke fai ha fekau. Ko ha fakatuʻutāmaki fakalilifu pē ia naʻe hokó.”

Te ke pehē nai: ‘Ka ʻoku lahi ʻaupito ʻa e ngaahi meʻa ʻoku ou fakaʻamu naʻe tonu ke u leaʻaki mo faí.’ ʻOku moʻoni, ka ko hai ʻiate kitautolu ʻe lava ke ne pehē ko e tamai, faʻē, pe tama haohaoa kitautolu? ʻOku fakamanatu mai ʻe he Tohitapú kiate kitautolu: “He ʻoku lahi ʻa e meʻa ʻoku tau humu ai kotoa pe. Toki ai ha tangata ʻoku ʻikai ke humu ʻi he lea, pea ko e tangata haohaoa ia.” (Semisi 3:2; Loma 5:12) Ko ia, tali ʻa e moʻoniʻi meʻa ko ia ʻoku ʻikai te ke haohaoa. Ko e hanganaki fakakaukau ki he ngaahi faʻahinga kotoa ʻo pehē, “Kapau pē naʻe,” heʻikai ke liliu ai ha faʻahinga meʻa, ka te ne fakatuaiʻi nai ʻa hoʻo toe foki ki ha tuʻunga ʻoku leleí.

Kapau ʻokú ke maʻu ha ngaahi ʻuhinga totonu ke ke tui ai ko hoʻo halaiá ko e moʻoni pē, ka ʻoku ʻikai ko ha fakakaukauloto, pea fakakaukau ange ki he meʻa mahuʻinga lahi taha ki hono fakafiemālieʻi ʻa e halaiá​—ko e fakamolemole ʻa e ʻOtuá. ʻOku fakapapauʻi mai ʻe he Tohitapú kiate kitautolu: “Ka ne ke nofo, ʻe Iaa, ke lama kovi, ko hai ha taha ʻe tuʻu, Atonai? Ka ʻoku ʻiate koe ʻa e fakamolemole.” (Sāme 130:​3, 4) Heʻikai malava ke ke toe foki ki he kuo hilí pea liliu ai ha faʻahinga meʻa. Kae kehe, ʻoku malava ke ke kole ki he ʻOtuá ke fakamolemoleʻi ʻa e ngaahi laka hala ʻi he kuo hilí. Pea ʻe hā leva? Kapau ʻoku talaʻofa mai ʻa e ʻOtuá te ne hanga ʻo fakamolemoleʻi ʻa hoʻo ngaahi hala ʻi he kuo hilí, ʻikai ʻoku totonu ke ke fai pehē ʻiate koe?​—Palovepi 28:13; 1 Sione 1:9.

ʻOkú ke ongoʻi ʻita, ki he kau toketaá nai, kau neesí, ngaahi kaumeʻá, pea naʻa mo e tokotaha kuo maté? Fakatokangaʻi ʻoku toe kau mo e meʻá ni ʻi he anga ʻo e ongoʻi ʻoku hoko maʻu pē ʻi he mole atu ʻa ha taha. Mahalo ko hoʻo ʻitá ʻoku hoko fakataha fakaenatula mai pē ia pea mo e loto-lavea ʻokú ke ongoʻí. Naʻe pehē ʻe ha tokotaha tohi ʻe taha: “ʻI heʻete hoko ʻo ʻilo pē ki he ʻitá​—ʻo ʻikai fai ki ai kae ʻiloʻi pē ʻokú te ongoʻi ia—ʻoku malava ai ke ke ʻataʻatā mei hono nunuʻa fakatupu maumaú.”

ʻE toe tokoni nai ʻa ʻete leaʻaki atu ʻa e ʻitá. ʻO anga-fēfē? ʻOku pau ʻoku ʻikai ʻi ha founga taʻemapuleʻi ia. ʻOku fakatokanga mai ʻa e Tohitapú ko e ʻita fuoloá ʻoku fakatuʻutāmaki. (Palovepi 14:​29, 30) Ka te ke maʻu nai ha fiemālie ʻi hoʻo talanoa ʻo kau ki ai mo ha kaumeʻa ʻokú ne maʻu ʻa e mahinó. Pea ʻoku ʻilo ʻe he niʻihi ko ʻenau fai ha ngāue fakaesino longomoʻui ʻi he taimi ʻoku nau ʻita aí ko ha tokoni lelei ia ki hono tukuange atu ʻa e ʻitá.​—Toe sio ki he Efeso 4:​25, 26.

Koeʻuhi ʻoku mahuʻinga ke ke fakaʻatā mo faitotonu ʻi he fekauʻaki mo hoʻo ngaahi ongoʻí, ʻoku feʻungamālie ke fai ha tokanga ki ai. ʻOku ʻi ai ha faikehekehe lahi ʻi hono leaʻaki atu ʻa hoʻo ngaahi ongoʻí pea mo hono fakapā mālohi atu ia ki he niʻihi kehé. ʻOku ʻikai fiemaʻu ke tukuakiʻi ʻa e niʻihi kehé ki hoʻo ʻitá mo hoʻo ongoʻi laufānoó. Ko ia, manatuʻi ke talanoa atu ʻo fekauʻaki mo hoʻo ngaahi ongoʻí, kae ʻoua ʻe fai ia ʻi ha founga fakafili. (Palovepi 18:21) ʻOku ʻi ai ʻa e tokoni māʻolunga taha ki he fekuki mo e loto-mamahí, pea te tau fakamatala leva ki ai.

ʻOku fakapapauʻi mai kiate kitautolu ʻe he Tohitapú: “He ko e loto lavea ʻoku ofi ki ai ʻa e ʻEiki [Sihova], pea ʻoku ne fakamoʻui ʻakinautolu ʻoku laumalie mafesi.” (Sāme 34:18) ʻIo, ʻoku malava ʻa e vahaʻangatae mo e ʻOtuá ke ne tokoniʻi koe ke ke fekuki mo e mate atu ʻa ha taha ʻokú ke ʻofa ai, ʻo mahulu ange ia ʻi ha toe meʻa. ʻO anga-fēfē? Ko hono kotoa ʻo e ngaahi fokotuʻu ʻaonga kuo tuʻuaki maí ʻoku makatuʻunga pe ʻoku fehoanakimālie ia mo e Folofola ʻa e ʻOtuá, ko e Tohitapú. Ko hono ngāueʻaki kinautolú ʻe tokoni ia kiate koe.

ʻIkai ko ia pē, ʻoua ʻe fakafuofuahalaʻi ʻa e mahuʻinga ʻo e lotú. ʻOku naʻinaʻi mai ʻa e Tohitapú kiate kitautolu: “Li hoʻo kavenga kia Sihova, he te ne poupou koe ʻe ia.” (Sāme 55:22) Kapau ʻoku maʻu ha tokoni ʻi hoʻo talanoa atu ʻa hoʻo ngaahi ongoʻí ki ha kaumeʻa ʻoku kaungāmamahi mo koe, huanoa hake ai ʻa e tokoni kiate koe ʻa hoʻo lilingi atu ho lotó ki he “Otua oe fiemalie kotoabe”!​—2 Kolinito 1:​3, PM.

ʻOku ʻikai ko e lotu ko iá pē ʻoku ne ʻai kitautolu ke tau ongoʻi lelei angé. Ko e Tokotaha “tali lotu” ʻokú ne talaʻofa mai te ne foaki ʻa e laumālie māʻoniʻoní ki heʻene kau sevāniti ʻoku nau kole loto-moʻoni ki aí. (Sāme 65:2; Luke 11:13) Pea ko e laumālie māʻoniʻoni ʻo e ʻOtuá, pe ivi ngāué, ʻoku malava ke ne ʻai kiate koe ʻa e “makehe atu ʻo e mafai” ke ke aʻu ai mei he ʻaho ko ē ki he ʻaho ko ē. (2 Kolinito 4:7) Manatuʻi: ʻoku malava ʻe he ʻOtuá ke ne tokoniʻi ʻa ʻene kau sevāniti anga-tonú ke nau kātekina ha faʻahinga mo e ngaahi palopalema kotoa pē te nau fehangahangai nai mo ia.

Ko ha fefine mali ʻe taha ʻa ia naʻe mole atu ʻa ʻene kiʻi tama ʻi he maté ʻokú ne manatuʻi ʻa e founga ʻo hono tokoniʻi ia mo hono husepānití ʻe he mālohi ʻo e lotú ʻi he mole ko ʻeni naʻe hokó. ʻOkú ne fakamatala ʻo pehē: “Kapau naʻá ma ʻi ʻapi ʻi he poʻulí pea hoko ʻa e loto-mamahí ʻo ʻikai ala lakasi, te ma lotu leʻo lahi fakataha. Ko e fuofua taimi naʻá ma fai ai ha meʻa ʻo taʻekau ai ʻa ʻema kiʻi taʻahiné ​—ʻa ia ko e fuofua fakataha ʻa e fakatahaʻangá naʻá ma ō ki aí, mo e fuofua fakataha fakavahe naʻá ma ō ki aí—naʻá ma lotu ke maʻu ha mālohi. ʻI heʻema ʻā hake ʻi he pongipongí pea hā ngali kātakiʻingataʻa ʻa e moʻoni ʻo ʻene pulia atú, naʻá ma lotu kia Sihova ke tokoniʻi kimaua. ʻI ha faʻahinga ʻuhinga, naʻe hoko ko ha meʻa fakamamahi moʻoni kiate au ke u hū tokotaha ki homau falé. Pea ko ia ʻi he taimi kotoa pē naʻá ku haʻu tokotaha ai ki homau ʻapí, te u fai ha lotu kia Sihova ke ne kātaki ʻo tokoniʻi au ke u maʻu ha nonga.” Naʻe tui mālohi mo totonu ʻa e fefine anga-tonu ko ʻení naʻe ola lelei ʻa e ngaahi lotu naʻá ne faí. Te ke toe ʻilo nai mo koe ʻi ha tali ki hoʻo ngaahi lotu tāumaʻú, ‘ko e nonga ʻa e ʻOtuá, ʻa ia ʻoku mamaʻo ʻi he tatae ʻa e ʻatamai kotoa pē, te ne maluʻi homou lotó mo hoʻomou ngaahi fakakaukaú.’​—Filipai 4:​6, 7; Loma 12:​12.

ʻOku ʻi ai hono ola ʻo e tokoni ʻoku tokonaki mai ʻe he ʻOtuá. Naʻe pehē ʻe he ʻapositolo Kalisitiane ko Paulá, ko e ʻOtuá ʻokú ne “tokoni kimautolu ʻi heʻemau tuʻutamaki kotoa pe, koeʻuhi ke mau lava ai ke tokoniʻi ʻa kinautolu ʻoku ʻi he tuʻutamaki kehekehe.” ʻOku moʻoni, ʻoku ʻikai ke toʻo atu ʻe he tokoni ʻa e ʻOtuá ʻa e mamahí, ka ʻokú ne ʻai ia ke faingofua ange ʻa hono fuesiá. ʻOku ʻikai ʻuhinga ia ʻo pehē ʻe ʻikai te ke toe tangi pea ʻe ngalo ʻiate koe ʻa e tokotaha naʻá ke ʻofa aí. Ka ʻoku malava ke ke toe foki ki he tuʻunga lelei. Ko e meʻa kuó ke hokosiá ʻoku malava ke ne ʻai koe ke ke maʻu ʻa e mahino mo e kaungāongoʻi lahi ange ke ke tokoni ki he niʻihi kehé ke nau fekuki mo ha mole meimei tatau.​—2 Kolinito 1:4.