Akoʻi Hoʻo Fānaú

Naʻe Ako ʻa Sīsū ke Talangofua

ʻOKÚ KE ʻiloʻi ʻoku faingataʻa ʻi he taimi ʻe niʻihi ke talangofua?—a ʻOku ʻikai fakaʻohovale kapau ko ia. ʻOku ʻiloʻi ʻe he tokotaha kotoa pē ʻoku faingataʻa ʻi he taimi ʻe niʻihi ke talangofua. Naʻá ke ʻiloʻi naʻa mo Sīsū naʻe pau ke ne ako ke talangofua?—

ʻOkú ke ʻiloʻi pe ko hai ʻoku totonu ke talangofua ki ai ʻa e fānau kotoa pē?— ʻIo, ko ʻetau tamaí mo e faʻeé. “Mou talangofua ʻi he ʻEiki ki hoʻomou matuʻa,” ko e lau ia ʻa e Tohi Tapú. (Efeso 6:1) Ko hai ʻa e tamai ʻa Sīsuú?— Ko Sihova ko e ʻOtuá, pea ko e tamai foki ia ʻatautolú. (Mātiu 6:9, 10) Ka ʻo kapau naʻá ke pehē ko Siosefa mo Mele ʻa e tamai mo e faʻē ʻa Sīsuú, te ke toe tonu foki ai. ʻOkú ke ʻiloʻi ʻa e founga naʻá na hoko ai ko ʻene ongo mātuʻá?—

Naʻe tala ʻe he ʻāngelo ko Kepalelí kia Mele te ne hoko ko ha faʻē neongo naʻe ʻikai haʻane fehokotaki fakasino mo ha tangata. Naʻe ʻai ʻe Sihova ke malava ʻa e feitamá ni ʻaki ʻene fakahoko ha mana lahi. Naʻe fakamatala ʻa Kepaleli kia Mele: “E fakamalu koe e he malohi oe Fugani Maoluga; bea koia foki e ui ai ae hako maonioni te ke faeleʻi koe Alo oe Otua.”—Luke 1:30-35, PM.

Naʻe toʻo ʻe he ʻOtuá ʻa e moʻui ʻa hono ʻAló ʻi hēvani ʻo ʻai ki loto ʻia Mele. Naʻe tupu leva ʻa e moʻui ko iá ʻi loto ʻiate ia ʻo hangē pē ko e tupu ʻa e fanga kiʻi pēpē kehé ʻi loto ʻi heʻenau faʻeé. ʻI he māhina nai ʻe hiva ki mui aí, naʻe ʻaloʻi ʻa Sīsū. ʻI he taimi ko ení, naʻe mali ʻa Siosefa mo Mele, pea ko e tokolahi taha ʻo e kakaí naʻa nau fakakaukau ko Siosefa ʻa e tamai moʻoni ʻa Sīsuú. Ko hono moʻoní, ko Siosefa ʻa ʻene tamai ohí. Ko ia ai, ʻoku lava ke pehē naʻe ua ʻa e tamai ʻa Sīsuú!

ʻI he taʻu 12 pē ʻa Sīsuú, naʻá ne fai ai ʻa e meʻa naʻe fakahaaʻi ai ʻa e lahi ʻo ʻene ʻofa ki heʻene Tamai fakahēvaní, ʻa Sihova. ʻI he taimi ko iá, ko e fāmili ʻo Sīsuú, hangē ko ia naʻa nau angaʻakí, naʻa nau fai ha fononga mamaʻo ki Selusalema ki he Pāsová. Hili iá ʻi heʻenau fononga ki ʻapi ki Nāsaletí, naʻe ʻikai fakatokangaʻi ʻe Siosefa mo Mele naʻe ʻikai te nau ō fakataha mo Sīsū. ʻOkú ke fifili pe naʻe anga-fēfē ʻene ngalo ʻia kinauá?—

Sai, ʻi he taimi ko ení naʻe toe ʻi ai ʻa e fānau ʻa Siosefa mo Mele. (Mātiu 13:55, 56) Ngalingali naʻe toe ʻi ai foki mo hona kāinga naʻa nau fononga fakataha, hangē ko Sēmisi mo Sione fakataha mo ʻena tamaí, ʻa Sēpeti, mo ʻena faʻeé, ʻa Sālome, ʻa ia ko e tokoua nai ia ʻo Mele. Ko ia naʻe fakakaukau pē nai ʻa Mele ia naʻe ʻi he kāinga kehé ʻa Sīsū.—Mātiu 27:56; Maake 15:40; Sione 19:25.

ʻI hono ʻiloʻi ʻe Siosefa mo Mele naʻe ʻikai ʻi ai ʻa Sīsuú, naʻá na foki fakavave ki Selusalema. Naʻá na kumi vavale holo ʻa hona fohá. ʻI he ʻaho hono tolú, naʻá na maʻu ai ia ʻi he temipalé. Naʻe pehē ange ʻe Mele kiate ia: “Ko e ha kuo ke fai pehē ai kiate kimaua? he ko eni, ko hoʻo tamai mo au kuo ma kumi koe mo e loto lavea.” Ka naʻe tali ange ʻe Sīsū: “Ko e ha kuo mo kumi ai au? ʻIkai naʻa mo ʻilo kuo pau ke u ʻi he ngaue [pe fale] a ʻeku Tamai?”—Luke 2:45-50.

ʻOkú ke fakakaukau naʻe hala ʻa e tali pehē ʻa Sīsū ki heʻene faʻeé?— Sai, naʻe ʻiloʻi ʻe heʻene ongo mātuʻá naʻá ne manako ke lotu ʻi he fale ʻo e ʻOtuá. (Sāme 122:1) Ko ia ʻikai naʻe totonu ʻa e fakakaukau ʻa Sīsū ko e temipale ʻo e ʻOtuá ʻa e ʻuluaki feituʻu te na kumi ia ki aí?— Ki mui ai, naʻe hanganaki fakakaukau ʻa Mele fekauʻaki mo e meʻa naʻe leaʻaki ʻe Sīsuú.

Ko e hā e tōʻonga naʻe fai ʻe Sīsū kia Siosefa mo Melé?— ʻOku pehē ʻe he Tohi Tapú: “Pea ʻalu hifo [ʻa Sīsū] mo kinaua, ʻo hoko ki Nasaleti; pea naʻa ne ʻi ai ʻo anganofo kiate kinaua.” (Luke 2:51, 52) Ko e hā ʻoku lava ke tau ako mei he faʻifaʻitakiʻanga ʻa Sīsuú?— ʻIo, ʻoku fiemaʻu foki ke tau talangofua ki heʻetau mātuʻá.

Ka, naʻe ʻikai faingofua maʻu pē kia Sīsū ke ne talangofua—naʻa mo e talangofua ki heʻene Tamai fakahēvaní.

ʻI he pō ki muʻa ke ne pekiá, naʻe kole ai ʻe Sīsū kia Sihova pe ʻe lava ke liliu ʻa ʻEne fakakaukau fekauʻaki mo e meʻa naʻá Ne loto ke ne faí. (Luke 22:42) Ka naʻe talangofua ʻa Sīsū ki he ʻOtuá neongo naʻe ʻikai ke faingofua. ʻOku pehē ʻe he Tohi Tapú naʻá ne “lavaʻi ʻene talangofua, ko e ako ʻe heʻene ngaahi mamahi.” (Hepelu 5:8) ʻOkú ke pehē te tau lava mo kitautolu foki ke ako ʻa e lēsoni ko iá?—

[Fakamatala ʻi lalo]

NGAAHI FEHUʻI:

▪ Naʻe anga-fēfē hoko ʻa Mele ko e faʻē ʻa Sīsuú, pea naʻe anga-fēfē ʻa e lava ke pehē naʻe ua ʻa e tamai ʻa Sīsuú?

▪ Ko e hā naʻe ʻikai lava ai ke ʻiloʻi ʻe he ongo mātuʻa ʻa Sīsuú naʻe ʻikai te ne ʻi he fonongá?

▪ Ko fē naʻe ʻamanekina ʻe Sīsū ʻe kumi ia ki ai ʻe heʻene ongo mātuʻá?

▪ Ko e hā ʻe lava ke ke ako mei he faʻifaʻitakiʻanga ʻa Sīsuú?

[Fakatātā ʻi he peesi 31]

Ko e hā ʻokú ke pehē ai naʻe totonu ke ʻuluaki kumi ʻe Siosefa mo Mele ʻa Sīsū ʻi he temipalé?